منوع

البت بنتي الكبيره لوجي ( 6 سنين ) قالت لمامتها في ساعة صفا ( إمتى يارب هكبر بقى وأدخل الجامعه عشان أخلص من تحكيماتكو دي , وإلبسي ده و متلبسيش ده , وابقى أخرج مع أصحابي وصاحباتي ونقعد في أي كافيتيريا نشرب حاجه كده !! ).
مع إني أب بيس والله , دي لما بتحب ترقص انا اللي بسأف لها ( تقولشي محمد نوح في زمانه ) , ومع ذلك البت حاسه إنها مختوقه , أدي أخرة الفرجه على الأفلام المصري والمسلسلات التركي وغاده عبد الرازق !.
إنما أختها الصغيره لمار ( سنتين ونص ) , بارك الله فيكي يا أخت لمار , مغرمه بقناة طيور الجنه وحافظه أسماء كل اللي فيها صغير وكبير ومشغلاها 24 ساعه , خالد مقداد ومراته وعياله وخواته وعصومي ووليد وجنا ولين ومحمد بشار وعمر الصعيدي وديما بشار ................. إنما متعرفش إسم أمي !!.

.في السجون المصريه , بيدخل المذنب للسجن لأنه ( حرامي غسيل ) , وبيخرج منه وهو هجّام وطفاش خزن وتاجر مخدرات وبلطجي أد الدنيا !!.

هو ده بالظبط اللي حصل مع الإخوان , دخلو السجون وهما ( نص بلطجي ) وخرجو منها وهم بلطجي مكتمل أركان البلطجه , يعني تقدر تقول بلطجي ونص .
ركز في تصرفاتهم وانت تلاحظ كده , بيرتكبو كل أنواع الموبقات بنفس راضيه مطمئنه ( بس بيدخلو الحمام بالرجل الشمال !! ), ده بيبقى مرض نفسي مزمن بيصيب خريجي السجون المصريه , المصيبه بقى إننا اللي بندفع الفاتوره حاليا , إحنا , يعني الأزهر والكنسيه والإعلام والقضاء والبلد والمواطن البسيط , مع إننا منعرفش فرج ولا نقرب له والله !!.

.

يارب سامحني بقى , هو انا عملت إيه يعني ؟ دي هي كلها شوية ذنوب صغيره ومتناهية الصغر ( دقيقه ومتناهية الدقه ) , إيه يعني إني أقتل تلاته أربعه ظباط على خمسه سته عساكر على كام مواطن ؟! , إيه يعني لما أتهجم على كام قسم شرطه في سينا بالسلاح وكام بنك وأسرقهم ؟! , إيه يعني لما أمشي بالرشاش في الشارع واللي ميعجبنيش أقتله ؟! ماهو كله عشان خاطر نشر دعوتك وهداية الكفار للإسلام , طيب يارب اعتبرني مذنب سياسي وسامحني !!
عن حماده شيته ( المسجون السياسي ) أتحدث , اللي خرج من سجنه بعد مسرحية خطف الجنود أو هيخرج عن قريب مع أول عصفوره جديده نتلهي فيها , والخلاصه يعني الشياطين تدعم بعضها بعضا , واحنا لسه بنتخانق لما بتيجي سيرة عبد الناصر أو الجيش !!.

.

من أكثر المشاهد الهزليه السخيفه المقززه في مسرحية تحرير الجنود دي مشهد مرسي وهو بيطلب رأي الأزهر في عملية التحرير ؟ والله العظيم أنا ماعرفش أقذر من كده , الأزهر ده محدش اتهجم عليه من أيام نابليون بونابرت تقريبا غير كلاب الإخوان , وكل ما عيل يجيله إنفلونزا يقولو شيلو شيخ الأزهر , الأزهر ده رفض قانون الصكوك وقال إنه مش إسلامي وخطه لبيع مصر والقانون اتوضع خلاص , الأزهر ده رفض دخول نجاد والشيعه ومع ذلك دخلو وقعدو في الأزهر نفسه , حاجه في منتهى الوقاحه والسفاله , بالظبط الإخوان دول عاملين ذي راجل بيخون مراته قدام عينيها ويعذبها ويضربها وفي الأخر يقول لها إيه رأيك في لون الكرافته دي ؟ لايقه مع القميص صح ؟ أنا أصلي بثق في ذوقك ورأيك أوي !!.

.

أهل بك
تسجيل الدخول إلى ( غيط الدره )
sign in to corn field
.
في الحقيقه لو ركزت حضرتك شويه هتكتشف إن هذا الفيس بوك اللعين ماهو إلا التطور الطبيعي ل ( غيط الدره ) بتاع زمان , مكان جيد وأمن للإختباء , أه والله , إي وربي , لو واحد عايز يقابل حبيبته في الخباثه يبقى يتقابلو في الفيس ( غيط الدره ) , عشان كده هتلاقي الحب ولّع في الدره أو الرومانسيه ولّعت في الفيس , و هريدي لابد لمحمدين في في غيط الدره ( الفيس ) وعايز ياخد بتاره بقى , يطخه عيارين مثلا أو يعمل له ريبورتات , وحماده الصغير عايز يشرب سجاير من غير ما حد من أهل البلد يشوفه يقوم يستخبى في غيط الدره ( ويسبرس ) ولو مش معاه فلوس يشتري سجاير ممكن يقضيها ( شواشي دره ) أو يستخبى في الفيس ويشوف المواقع الثقافيه , والقاعده تحلى بين الأصدقاء تحت ظل عودين دره يتكلمو في السياسه وحال البلد ( تواصل اجتماعي ).
كمان حكاية اللايكات دي هي التطور الطبيعي لمبدأ ( الزِمال ) عند الفلاحين , يعني واحد بيجمع أرض القطن بتاعته فتروح انت تشتغل معاه وتساعده عشان لما تيجي تجمع القطن بتاعك يجي يساعدك ( إسمه نفر زمال ) , وفي الفيس تعملي لايك أعملك لايك , تهبدني شير أرزعك مثله ( نفر زمال برضه ).
عشان كده ممكن يعني من باب إحقاق الحق إننا نقول إن الفلاح المصري القديم هو اللي اخترع الفيس بوك , ومش بعيد أبدا نكتشف إن الراجل مارك ابن رزولمورم ده أصل عيلته من مركز ههيا شرقيه وإنه متجوز بنت محمد أبو سويلم !!.

.

واحده ( ست ) إسمها عالفيس ( أغدا ألقاك ) باعتالي طلب صداقه , مفيش أصدقاء مشتركين ولا ليها اهتمامات سياسيه , وانا بقالي فتره بقلق من هذا المجهول القادم , عايز أقول لل ( ست ) دي :................. ....................... يا خوفَ فؤادي من غدي !!.

.

.....صباح الخير , حقيقه موجوده في سينا من سنين طويله لحد النهارده , لو عايز تعرف إيه اللي حصل واللي بيحصل واللي هيحصل اسأل اسرائيل !! , هي دي الحقيقه , لو عايز تعرف مين اتجوز مين في العريش ومين بتحب مين من ورا أهلها , ومين اتطلقت والواد سويلم عمل ايه في امتحان سنه تالته ابتدائي , اسأل اسرائيل , وعاى فكره اسرائيل معدش يلزمها إنها تكدب أو تخدعك في اللي بيحصل في سينا , لأن اللي بيحصل على حالته كده ( وبحطة إيدك ) هو مأساه مش محتاجه فبركه أو مبالغه , شوفو بقى اسرائيل قالت إيه على( مسرحية تحرير الجنود ) , وإزاي إن الخاطفين سابوهم في الصحرا ( بعد ما حققو الهدف من المسرحيه ) وإن الجنود وصلو لنقطة شرطه عسكريه لوحدهم إلى أخر القصه , إنما الرئاسه والجيش والشرطه والمخابرات وماسبيرو راسهم وألف جزمه قديمه إننا حررنا الجنود , ذي ما قال مرسي يعني ( بعمليه دقيقه متناهية الدقه ) , يا مولانا محصلش وعزة جلال الله ما حصل يقولك أبدا , إحنا حررناهم ولازم نحتفل , دقو الطبول وأوقدو النيران وهاتو الرقاصات ( اللي بيرقصو على الشريعه ) وأقيمو الأفراح والليالي الملاح , الموضوع ده فكرني بحادثه حصلت زمان , بيقولك يا سيدي دكتور نسا من النوع ( الأوشاط ) معدومي الضمير راحت له واحده ست بتولد , الدكتور قال لجوزها هاخد 1000 جنيه وأولدها , الراجل قال له يا دكتور مش معايا غير 500 , الدكتور رفض وطلب منهم يغادرو العياده, المهم الست وهي نازله على السلم ولدت على باسطة السلم , التمرجي سمعها وهي بتصرخ وشاف اللي حصل فراح قال للدكتور ( الست ولدت على السلم ) , الدكتور قال له دخلها العياده فورا وناخد منها ال 500 جنيه وخلاص !!

هي دي كل الحكايه , الدكتور راسه وألف جزمه إن هو اللي ولّد الست والرئيس راسه وألف جزمه إن هو اللي حرر الجنود !!.

.

.

حقيقه علميه للذكرى
.
البطولات والأمجاد الحقيقيه اللي عملتها المخابرات المصريه والجيش المصري في ال 60 سنه اللي فاتو ضيعهم الموكوس ابن الموكوس في مسرحية خطف الجنود دي.
بعد كده لو أي مخرج فكر يعمل مسلسل مكتوب على التتر بتاعه ( من ملفات المخابرات العامه المصريه ) المسلسل ده هيتذاع ك ( سيت كوم ) كوميدي في رمضان والناس هتضحك عليه .
كتب نبيل فاروق هتتباع في المكتبات في قسم النكت والمونولوج واحتمال في قسم ألعاب الأطفال .
منك لله يا مرسي , كرهتنا في الحاجه الحقيقيه الحلوه اللي كنا مسنودين عليها , أنا حاسس إن عبد الناصر وابو غزاله هيزوروك الليله دي في المنام , يفشخوك ويرجعو تاني , حاول تنام لوحدك النهارده مش ناقصين فضايح , إنت مهما كان عضو في جماعه إرهابيه محظوره أد الدنيا !!.

.

الناس اللي زعلانه من تدني مستوى التأليف والإخراج في مسرحية خطف الجنود مالهمشي حق , زمان ظهرت موضه كده اسمها المسرح الصيفي ( أو المسرحيات السياحيه ) , حاجه كانت بتتعمل عشان السياح العرب لشهور 7 و 8 , ذي مسرحية حمري جمري , والحاجه صابرين لما رقصت بالفستات البامبي , أي تأليف وأي إخراج المهم يكون فيه الرقاصه والبنات العريانين عشان أشقاءنا العرب يضحكو علينا ويتبسطو , كل اللي حصل اليومين اللي فاتو إن الريس مرسي أعاد افتتاح المسرح الصيفي مره تانيه , وأشقائنا العرب ضحكو علينا واتبسطو !!.

.

وخير اللهم اجعله خير , العسكري دخل يسلم على الرئيس ووزير الدفاع ووزير الداخليه وزراير قميصه مفتوحه ! , قام مولانا مرسي الراجل الطيب المتواضع وقف بنفسه وقفل له زراير القميص , الدمعه هتفر من عيني والله ................ تنهييييييييييييييييييييييق !!
يا مولانا , العسكري ده قبل ما بيدخل على الناس دي بيكون فيه 50 ألف واحد مفتشينه عشان ميكونشي في معاه سلاح ولا مطوه ولا حتى مشط شعر , و50 ألف واحد تانيين بيهندموه ويظبطو له لبسه ويحطو له مزيل عرق ! , قال زراير القميص مفتوحه قال ( سهوا يا سيدي ) , دانا لما كنت عسكري في الجيش كنت بقفّز وأشد نفسي وامسح البياده بسرعه لما أشوف الصول عاطف جاي من بعيد !!

.

خبر لذيذ أوي , بيقولك يا سيدي ( حركة حماس تطلب من مصر إعتذار رسمي عن اتهامها في خطف الجنود السبعه ) !!
طيب بص يا مولانا , ماهي أيام سوده مايعلم بيها إلا ربنا , في السنتين اللي فاتو حصلت 10 حوادث في سينا من النوع المشكّل ( يعني قتل على خطف على هجوم مسلح على وحدات جيش وشرطه وبنوك ) , ال 10 جرايم دول أشرفت حماس بنفسها على 9 منهم , تولت الإعداد والتنفيذ والإخراج والقتل والخطف , وفي المره العاشره (الأخيره) حماس قالت لك إحنا نسيبها للجماعه الجهاديه ( يعني من باب تشجيع النشأ والأشبال عشان تشوف تعليمها وصل لفين ؟ ) !!.
والموضوع ده بقى بيفكرني بنكته زمان , راجل ومراته خلفو 10 عيال , 9 منهم لونهم أسود والواد الأخير لونه أبيض , قامت الست ( الطاهره ) دي قبل ماتموت قالت لجوزها أنا عايزه أعترف لك بسر , أنا خنتك يا وديع ! , قال لها عارف , خنتيني في الواد الأبيض , قالت له لأ ,............ في ال9 السود !!
عشان كده إحنا لازم نعتذر لحماس عشان ظلمناها واتهمناها بالخيانه في الواد الأبيض (قصدي العمليه الأخيره ) , ............ إحنا أسفين يا طاهره !!.

.

يا دين أمي على علاء صادق ده , يا مرارة اللي خلفوني , بيقولك تحرير الجنود هو انتصار جديد للرئيس مرسي على أسوأ معارضه في مصر !! , إيه العالم ولاد الكلب دي ؟ , هو البرادعي اللي كان خاطف الجنود وبيهدد بقتلهم لو مأفرجوش عن حمدين صباحي ؟! يا عيلاء بطل والنبي تكتب تغريداتك وانت قاعد في الأتوبيس الزحمه على رجل اللي جنبك , مرسي حرر الجنود من إيد أنصاره ( الإسلاميين ) مش من إيد المعارضه , أه والله العظيم يا نوسه يا ( صديقة الطلبه ) !!.

.محمد حسين