منوع

وتلاقي الإخوانجي من دول من ساعة ما يصحى من النوم لحد ماينام ماشي يتلفّت حواليه , يبص يمين وشمال وفوق وتحت , حاسس إن عمو د الكهربا بيراقبه والشجره فوقها مخبر والبلاعه مستخبي فيها اتنين أمن دوله, ولو سلّمت عليه يبقى أكيد هتزرع في إيديه جهاز تجسس صغير الحجم , ولو إديتله حاجه ياكلها يبقى أكيد عايز تسمه , عشان كده تلاقيهم وصلو للسلطه ومعاهم شرطه وجيش ومخابرات وحرس جمهوري وليله زرقا ومع ذلك لسه مرعوبين ويقولك البرادعي بتاع تويتر كان عايز يخطف مرسي !!
.
.... نوع من المرض النفسي الميئوس من علاجه , وسواس قهري مجاش لحد قبل كده , بيلعبو نفس دور الراجل المريض النفسي اللي كان في فيلم حنان ترك وليلى علوي , اللي قال لأشرف عبد الباقي ( الدكتور النفسي ) : أنا حاسس إن مراتي بتراقبني يا دكتور .
وأشرف عبد الباقي قاله : مراتك إيه بس ؟ مراتك ماتت من 3 سنين وانا حاضر الدفنه معاك !!.
وبجد والله يعني لما بشوف كلامهم وتصرفاتهم بفتكر الدعاء ده وأردده ( الحمد لله الذي عفانا مما ابتلى به كثيرا من خلقه ) !!.

.

يا دين أمي على علاء صادق ده , يا مرارة اللي خلفوني , بيقولك تحرير الجنود هو انتصار جديد للرئيس مرسي على أسوأ معارضه في مصر !! , إيه العالم ولاد الكلب دي ؟ , هو البرادعي اللي كان خاطف الجنود وبيهدد بقتلهم لو مأفرجوش عن حمدين صباحي ؟! يا عيلاء بطل والنبي تكتب تغريداتك وانت قاعد في الأتوبيس الزحمه على رجل اللي جنبك , مرسي حرر الجنود من إيد أنصاره ( الإسلاميين ) مش من إيد المعارضه , أه والله العظيم يا نوسه يا ( صديقة الطلبه ) !!.

.أنا قررت إني أكلم الواد أخويا وأخليه يخطف الواد حماده ابن الجيران , وبعدين هتفاوض مع أخويا وهبزل العرق والدم من أجل استعادة حمادة , وهحاصر بيت أخويا بالطيران والمدفعيه , ولما أقدر أرجع حماده من براثن وأنياب ومخالب الواد أخويا هعمل حفله بقى واعزم أمي وخالي وعمي ومش هنسى أعزم الواد أخويا ذات نفسه , وهطلع أتكلم عن الإنتخابات والبرلمان والمعارضه اللي لازم تحط إيديها في إيدنا , ولو ضغطّو عليّ شويه هقولك لزمتها إيه حملة تمرد بس والخروج يوم 30 يونيو ؟! مانا حررت حماده أهو وبقيت بطل ؟!

.

صباح الخير , ألف مبروك عودة الجنود المحتطفين كده وكده , أهو إنجاز جديد نلحق نضيفه في كتاب الإنجازات قبل ما المطبعه تشتغل والماكنه تطلع قماش, عاجبني أوي المقطع ده من فيلم رشه جريئه ( مونولوج عيل صغير ) : عيل صغير عمل صوابعه كداهو مسدس وقال لصاحبه تريخ تروخ , قام صاحبه صدق وعمل له ميت وأهله قالو ده طخه طخ !!.
النهارده وعلى الريق كده , الإخوان واللي مش إخوان بس بيحترموهم مش بس هيعملو فرح 7 أيام بلياليهم عن شجاعة وفروسية مرسي ( بالذمه ده منظر فارس ؟ ) , لأ ...خدو اللي أنقح من كده بقى , بوست كاتبه أحد المثقفين الإخوان ( شوفتو النكته دي ؟ ) , المهم المثقف الإخوانجي بيقول إيه بقى ؟ إن حماس والجماعات الإسلاميه طول عمرها بتمثل العمق الإستراتيجي لمصر ووجودها مهم للأمن القومي !! , أيتها السماء صبي لعنتك وغضب الألهه على هؤلاء الخرفان , أنا يتهيألي إن عدد المصريين ضحايا الجماعات الإسلاميه ( بتوع العمق الإستراتيجي) تقريبا أكتر من عدد الجنود المصريين اللي قتلهم الصهاينه في 73 , عمق استراتيجي مفيش كلام .
بالمناسبه أنا أعرف أسره مصريه بسيطه وغاليه عليّ جدا عانت الأمرين على يد الجمعات الإسلاميه ( العمق الإستراتيجي ) !!.

.

طيب سؤال في علم المنطق 

.
جيكا وكرستي ومينا وعماد وغيرهم ألفات وملايين نزلو الميادين ووقفو قدام المدفع وصرخو في وش الحاكم الظالم ..........دول إسمهم الثوار الحقيقيين .
وعالفيس بوك فيه ملايين تانيين ثارو وهما قاعدين في التكييف , ثارو بالكي بورد والماوس ( ثوار الفيس بوك ) ,............... أنصاف الثوار وانا منهم .
سؤالي بقى : اللي خايف حتى إنه يثور على الفيس ( على صفحته وقدام الناس وفي النور ) وبيبعت بوستاته الثورجيه على الإينبوكس نسميه إيه ؟
.................................. ( ثوار الإينبوكس ولا ثوار الإينبوكسر ؟! ) !!.

.

محمد حسين