منوع

ومما يُقال عن كرامات باسم عوده :
إن ( الجالاكسي ) كان مقضيها سُكر وعربده في مستنقع الرذيله , وبعدين ( تاب ) على إيدين باسم عوده , وعشان كده سمّوه.................بلاك بيري !!.

.

ولما تعرف إن نجيب ساويرس رجع مصر تاني وإن مرسي بعت مندوب من الرئاسه لاستقباله ! , مممممممم غيّر يابني أغنية ( فين ال 14 مليار يا حرامي ؟ ) وانزل لنا بأوبريت ( مسلم ومسيحي إيد واحده ) !!.

.

وجدي غنيم طالع في فيديو لابس الذي العسكري وبيتكلم عن الحرب والجهاد !! , كده تمام أوي , واكتمل أخيرا مشروع النهضه , عندنا المرشد وقائد الحرس الثوري ( وجدي غنيم ) , وباقي لنا حسينيتين تلاته ونعلن قيام الجمهوريه المصريه الإيرانيه السنيه الشيعيه المشتركه وعاصمتها طهران الصبح والقدس أخر النهار , وأتحداك أن تفهم شئ مما أقول !!.

.

أرزاق والنبي أرزاق , البهاليل بقو يحلمو بباسم عوده في موكب سيدنا رسول الله وسيدنا يوسف , حظك بقى يا بسومتي , باقي لك صورتين اتنين جنب رغيف العيش ونلاقي بهلول جديد حلم بيك وانت بتأوم المسيح عليه السلام في الصلاه , ده طبعا بعد ما يعتنق الإسلام على إيديك وينضم رسميا لحزب الحريه والعداله ( فرع بني سويف ) !! هع هع هع الله يخرب بيوتكو يا خرفان , جننتوني وخليتوني أقول الكلام اللي مش بيتقال , سامحوني يا رجاله , سامحوني يا عيال .

.

صباح الخير , النهارده الجمعه , يعني إمبارح كان الخميس ( شوفت حكمة ربنا يا جدع ؟ ) , المهم بقى إن يوم الخميس عشان نص دوام والجمعه أجازه عند ناس كتير بتكتر أوي حكاية الرؤيا الحسنه من الصالحين ولاد الصالحين , واحد من أسيادنا اللي بيمشو عالحيط شاف رؤيا عظيمه ولا تخرج قبل أن تقفل الباب وراك عشان أكمل نوم , بيقولك يا سيدي شاف موكب سيدنا النبي في حجة الوداع ومعاه لفيف من الصحابه وفي وسطهم الشهيد سيد قطب والإمام حسن الباندا والدكتور مرسي والدكتور باسم عوده !! أه والله , والأخير تحديدا كان رايح في طريق سيدنا يوسف بس معرفش بقى هيجيب لنا من هناك ال 7 سنين السمان الأول ولا ال 7 العجاف ؟! , الحمد لله إنه مقالش من ضمن الموكب كان الشهيد علاء صادق والإمام عبود الزمر ومولانا عصام سلطان , طبعا أم أيمن كانت موجوده أكيد في خيم الحريم ومش باينه , إلهي يطلع قطاع الطريق ومعاهم أبو لهب وحنظله على موكب باسم عوده وياخدو أم أيمن وعلاء صادق من خيم الحريم عشان نستريخ يا شيخ , طيب يا شيخ ياللي شفت الرؤيا مش كنت تسأل سيدنا النبي بالمره عن فوايد القرض بتاع صندوق النقد وعن المتاجره بكتاب الله وعن الدستور الإسلامي ؟! , قطع لسان اللي يقول على البانجو المصري كلمه كده ولا كده !!.
الغريبه إني بموت في البرادعي وعبد الناصر وكل يوم بصلي العشا وانام ولا عمري شفت لهم حلم ولا رؤيا ولا طقطوقه ولا زغلوله , أنا لازم أغير نوع البانجو اللي بشربه وأجرب النوع بتاع مولانا المبروك اللي بيقول الشهيد سيد قطب والإمام حسن الباندا !!.

.

مرسي راح يفتتح كوبري مشاه ...!! بكده نقدر نقول عليه أول رئيس يفتتح كوبري مشاه مدني منتخب !!.
والله العظيم أنا لو كنت عمدة قريتنا واتعمل فيها كوبري مشاه هتكسف أروح أفتتحه وهبعت عوضين الغفير مكاني لإستشعار الحرج !!.

.

أبو اسماعيل هيفضل يهدد ويحاصر كده , مره وزارة الدفاع ومره مدينة الإنتاج ومره المحكمه الدستوريه ومره الأمن القومي والمره الجايه قناة السويس أو السد العالي واحتمال تمثال رمسيس طول ماهو لاقي وراه قطيع من الخرفان والجحوش منهم من يحمل لقب دكتور ( د خ...يعني دكتور خروف) أو مهندس ( م ج يعني مهندس جحش ), فخامة الدكتور ومعالي المهندس أعضاء قطيع أبو اسماعيل ,....... أزدادُ غثياناً بكم ( البوب ستايل ) !!.

.

ابن أخت أحمد مكي وزير العدل اتمسك بمخدرات !! , لا حول ولا قوة إلا بالله , الواد ده كان المفروض هيمسك منصب وزير العدل ( أو النائب العام على الأقل ) في حكومة أحمد المغير سنه 2023 , ليه يابني تضيع مستقبلك كده وانت من عيلة مكي المقدسه ؟!!.

.

لو ركزتو شويه هتكتشفو إن جماعة الإخوان المسلمين مالهاش أي وجود في أي دوله متقدمه أو شبه متقدمه أو حتى دوله ناميه , مالهاش فرع في ألمانيا مثلا ولا تركيا ولا البرازيل ولا ماليزيا , الجماعات الإسلاميه إجمالا بيرتبط وجودها بتخلف الشعوب , هتلاقوها في السودان وأفغانستان والصومال والجزاير وسوريا واليمن , لازم لها شعب متخلف عشان تعرف تعيش وتكبر , هي بالظبط عامله ذي الدبان اللي مش ممكن يعيش في مكان نضيف , لازمه أكوام زباله , حضرتك متخيل إن أي جماعه إسلاميه تعرفها ممكن توصل لحكم أي دوله عليها القيمه ؟ طيب ليه لأ ؟ إبحث عن الشعب يا صاحبي , لولا أننا شعب يغلب عليه التخلف لما كانت هذه الجماعه تحكمنا الأن , ولعلمك الشديد جماعة الإخوان المسلمين بعقولها دي وأشكالها وطريقة تفكيرها لو كانت موجوده في دوله متقدمه كنت هتلاقي نص أعضاءها في السجن والنص التاني بيشتغل زبّال , هي دي إمكانياتهم ومكانتهم اللي يستحقوها !!.

.

أستاذ عصام سلطان الفقيه الدستوري والخبير القانوني والسياسي المحنك , عضو جمعية الأعضاء ورئيس جمعية الرؤساء , حامي حمى الأوطان وسوبر مان وكبير المجاهدين الأفغان بيقول إيه بقى ؟ بيقول ( عبد الناصر الشاذ السفيه !! ) , طيب والله لو كان قال كده فانا عاذره بجد , البركه في الليبراليين المثقفين أخر حاجه , الأستاذ اللي ورا الليبرالي المثقف تحب تقول حاجه في تقييمك لحكم عبد الناصر ؟ الأنسه الليبراليه اللي هناك إنتي أكيد مثقفه وبالتالي لازم تنتقدي عبد الناصر , اتفضلي الميكروفون معاكي , كلمينا عن أملاك جدو الباشا اللي اتأممت وراحت للفلاحين للرعاع , كلمينا بما إنك مثقفه عن فتح السجون للإخوان اللي مكانوش يستحقو السجن لأنهم بيس خالص وسو كيوت , اتفضلي اتكلمي وانا هجيبلك عصير الفراوله والشاليمو , أستاذ بلال فضل مش ممكن دانت حضرتك كبير المثقفين في الشرق الأوسط وشمال أفريقيا , إزاي يا أستاذ بلال يعدي عليك 3 أيام متقطعشي فيهم فروة عبد الناصر ؟ جالك نوم أيها الليبرالي المثقف ؟ طيب أقول عليك مثقف إزاي بعد كده وانت مش بتنتقد عبد الناصر ؟!!.

.

طب والله العظيم أنا ممكن أقبل من الإخوان أي حاجه , ومن اللي مش إخوان بس بيحترموهم , ومن اللي مش إخوان بس بيبوسو رجليهم , أه يا سيدي أي حاجه , يحكمونا ماشي , يدوسو على رقابينا ماشي , يكفرو اللي جابونا ماشي , إلا حاجه واحده بس , إنهم يهذرو أو ينكتو أو يقلشو , ومنهم هذا المخلوق الهلامي اللزج :
Moataz Abd AlFattah - معتز عبد الفتاح
إيه ده: هو برشلونة اتغلب 3 - صفر؟
حكومة بايظة صحيح!
..................... إستنى كده يمكن أضحك , لا لا مش قادر , هموت يا ناس !!.

.

محمد حسين