منوع

وأي واحد يقولك الجمله دي ( أنا معاكو بس تفتكرو مين ممكن يجي مكان مرسي ؟! ) , لازم تعرف إنه إخوانجي متنكر في صورة بني أدم , ولابس قميص وبنطلون كمان ( زياده في التنكر يعني ) , ومخبي قرونه في مكان أمين محدش يعرفه غير متولي عبد المقصود .
أي حد يامولانا يجي مكان مرسي , أي حد أفضل من حكم الإخوان , البرادعي أفضل , صباحي أفضل , خالد على أفضل , عمرو موسى أفضل , صباع رجلي الصغير أفضل , طفاية السجاير دي أفضل , دي مصر ياهبل يابو رياله , هما أقنعوك إن مرسي بقى سياسي محنك وخطيب مفوه ومصري وطني اخر حاجه وجمّع المصريين حواليه وبيقود بنفسه قطر الحضاره المصريه ؟! هع هع , والنبي انت حد لذوذ , مش لذيذ لأ لأ لذوذ , والله لذوذ , وعزة جلال الله لذوذ , مفيش منك بجيبه ؟!.

.حملة تمرد هي طريقه متحضره جدا لنزع الشرعيه عن ال ( لارئيس ) المدني المنتخب , هتكون بروفه واستعداد قوي ليوم 30 يونيو ( يوم الفراق الجميل ) , يعني لما تدخل على اليوم الموعود وانت في إيدك 10 مليون استمارة تمرد مثلا هتفرق معاك كتير .

فيه تجربه عملها واحد زمان , كان عنده فيل صغير , الراجل ده عود الفيل من صغره إنه بربط رجليه بجنزير كبير في شجره ضخمه ويضربه ويعذبه , في البدايه الفيل حاول يتخلص من قيده ومقدرش , ولما كبر الفيل اتعود على الجنزير والشجره وكان عنده إحساس مستمر إن رجليه تقيله وإنه هينضرب ويتعذب لو حاول يكسر قيده , الراجل بقى غيّر الجنزير وربط الفيل بتاعه بخيط رفيع ضعيف جدا , يعني لو نمله شدته هتقطعه , ومع ذلك الفيل مبقاش عنده الجرأه إنه يتمرد ولا يكسر قيده الوهمي , النهارده 12 مايو يا ساده واحنا مربوطين بالخيط الضعيف ده , يارب مانكون اتعودنا على الحبس والذل ذي الفيل إياه , بينك وبين الحريه خطوه تقدر عليها النمله , متقولشي مش قادر !!.

.

كتبت قبل كده عن معاملة السوريات اللاجئات في مصر وباقي الدول العربيه , و النهارده قريت تقرير عن معاملتهم في الأردن ومأساة فتاه سوريه 18 سنه كانت بتحب زميلها في الجامعه واضطرتها الحرب للجوء للأردن , وضيق ذات اليد أجبرها على الزواج من مواطن خليجي في الخمسينات من عمره مقابل 3 ألاف دولار ( يا بلاش ), الزواج استمر إسبوع عانت فيه البنت الأمرين , معاملة الخادمه أفضل من اللي عاشته , وانتهى بالطلاق , الحقيقه الأردن متختلفش كتير عن مصر والشيخ السعودي ميختلفش أبدا عن محمد حسان وخيرت الشاطر وعبد الله بدر , تخلفنا واحد وهمجيتنا واحده , ونظرتنا الدونيه للمرأه واحده , وزريبه واحده بتجمعنا كلنا ( الحلم العربي !! ) , أي حد متخلف حيوان برياله لسه بيعتقد إن اللي بيحصل للسوريات المهجرات في الدول العربيه اسمه جواز وستره مش سوق نخاسه وعبوديه لازم يراجع دكتور بيطري متخصص في أمراض الحيوانات النفسيه , بس بلاش محمد بديع , غيّرو الدكتور البيطري أيها الساده الحيوانات !!.

.

.

بيقولك يا سيدي طالبت النجمه ( باريس هيلتون ) من معجبيها حول العالم المواساه لأنها خلعت ضروس العقل , وقالت في حسابها على تويتر ( أنا أرقد الأن على الفراش وأتألم بشده ) !! , أه والمصحف ذي ما بقولك كده , قلبي عندك ياباريس ياختي , إن شالله أم أيمن وباكينام الشرقاوي وانتي لأ, ربنا ينتعك بالسلامه يا بنت الحاج هيلتون رمسيس عشان إنتي أصلا طاهره وهيلتون رمسيس مايته طاهره , يا نهار أبيض دانا أمي ولدتني وهي قاعده قدام الفرن أبو قش وحطب , كانت بتعمل رز معمر !!.

.

صباح الخير , مش هنسى أبدا إننا ضيعنا يجي 18 سنه من عمرنا بنفتي في حكم الدين في التصوير والرسم , وقالك يا سيدي لو صورة ضوئيه للبطاقه ماشي غير كده لأ , طيب لو لجواز سفر ولا كارنيه نقابه ؟, يبقى يجوز , طيب يا مولانا صور الفرح ( والعذراء والفستان الأبيض ؟) , ممممممممم لا أدري , وانا في مصيف بيلزمني صورتين تلاته على البحر للذكرى يعني إيه رأي فضيلة جنابك ؟ , طيب بالنسبه للرسم بالقلم الرصاص ؟ طيب لو كان ألوان فلوماستر ؟, إيه رأيك لو اتعلمنا الرسم على البطيخ أو باستخدام حبات القمح ؟ لالالالالا , طيب ينفع أحط في بيتي صورة عبد الناصر مثلا مع إن البيت فيه حريم ( نسوان يعني ) ؟ ممممممممم , والمصيبه الأكبر في فن النحت , تماثيل بقى وإبداع محمود مختار وحاجه تقرف , أعوذ بالله من غضب الله , أصنام يا كفره يا ولاد الحرام , مع إن محمود مختار قعد ينحت وينحت لحد ماتنحت وبره ومع ذلك محدش شافه وهو بيعبد أصنامه اللي بينحته , ما علينا , المهم بقى إن نفس ذات أم الشعب , في نفس ذات أم التوقيت وحتى يومنا هذا مشهور عنه جدا الكدب وقذف المحصنات ( كبائر يا مولانا كبائر ) ولا تخلو جلسه نسائيه من قنطارين تلاته غيبه ونميمه , وفي نفس ال 18 سنه بتوع موضة التصوير حلال ولا حرام ؟ استطاعت الشقيه الصغرى اليابان التحول من خرابه دمرتها القنابل النوويه إلى كوكب اليابان اللي بنسمع عنه سمع خير , ماهي اليابان لو كان عندها كام شيخ من بتوعنا دول من اللي قلبك يحبهم كان زمانها لحد النهارده بتتكلم في حكم مضاجعة الست الأمريكيه اللي جوزها رمى القنبله على هيروشيما !!.

.

إبنكو عنده (كونيكتيف تيشو ).......... يا ساتر يارب !!
.
عندنا في الريف , الطالب أول ما يدخل كلية طب ويبقى في سنه أولى بيعتبروه أهالي القريه إنه بقى دكتور مكتمل أركان الدكتره , والطالب في طب بيدرس في أول سنه تشريح وعلم الأنسجه , وبيبدأ يتعرف على الأمراض والعلاج أظن من سنه رابعه , بعد مايكون درس فارما وباثولوجي إلخ , المهم الفكره دي لما بتسيطر على أهالي القريه بتحط الطالب من دول في موقف لا يحسد عليه , بيبقى مكملش شهرين في الكليه وتلاقي راجل غلبان من أهل البلد بيخبط عليه ويقول له إلحقني يا دكتور , إبني تعبان أوي وعنده إسهال ومغض وترجيع وسخونيه ولوز وبواسير وفتاء , طيب الطالب لو قال معرفش محدش بيصدقه , والناس بتعتقد إنه عارف كل حاجه ( بس مدكّن ) , ويقولو له ( متقولشي كده يا دكتور دانت الخير والبركه برضه ) , المهم الموقف ده حصل مع واحد صاحبي واحنا لسه في أولى كليه , وهو يا دوب كان لسه راجع من محاضره في علم الأنسجه بتشرح النسيج الضام ( connective tissue ) , والنسيج الضام ده (هذا الكونيكتيف تيشو ) هو نسيج أساسا من تركيب جسم أي إنسان يعني ذي الجلد والكليه والطحال , صاحبي الذكي قدر يتصرف ( مهم أوي في الموقف ده إنك تتكلم بالإنجليزي ), عمل انه بيكشف على الحاله وقال لهم بكل ثقه ( الحاله دي لازم تتحول للمستشفى فورا .... إبنكو عنده كونيكتيف تيشو بروبر !! ) , أهل المريض قالو في نفس واحد ............... يا ساتر يارب , وبروبر كمان !!.

.

هل تعلم أن عدد اليهود في العالم لا يزيد عن 15 مليون نسمه وأن عدد المسلمين مليار و500 مليون .......... يعني ( 100 ضعف ) !.
وهل تعلم أن عدد اليهود الحاصلين على جائزة نوبل حوالي 200 من أصل 800 , حصلو عليها ( في الأدب والطب والكيمياء والفيزياء ....إلخ )
وأن عدد المسلمين الحاصلين على جائزة نوبل هو 10 , أكثر من نصفهم حصل عليها في السلام !!.
وبعد ما حضرتك تتعالج من نظرية المؤامره وإن الجايزه يهوديه يقدمها اليهود لليهود وإن نوبل نفسه كان بوذي وابن خالته هندوسي ومتجوز واحده بهائيه على مراته المسيحيه, أحب أقولك إن إنتاجنا العلمي في أخر 1000 سنه لا يزيد على إن ابن النفيس اكتشف الدوره الدمويه الصغرى وإن جامعه بنها جمّعت التابلت ( إينار ) , والمصريين اخترعو ( حجر المعسل ومشابك الغسيل ) , أنا شخصيا أحمل المسئوليه الأولى لمشايخنا , بتوع بول الناقه وإرضاع الكبير والعشبه السحريه , ودخول الحمام بالقدم اليسرى , ونوع النمله اللي كلمت سيدنا سليمان .
أعرف واحد شيخ قرب ياخد ماجستير في نوع النمله دي , وواحد صاحبي انتهى من تحضير رسالة الدكتوراه في مسألة ومعضلة ( هي الملايكه بتبيض ولا بتولد ) ؟!! .

.

في الأول قالك ( ليه تنتخب شخص لما ممكن تنتخب مشروع ؟) , ولما لقو إن مفيش مشروع ولا يحزنون قالو ( طيب إدو للشخص فرصه ) , ولما لقوه شخص فاشل أخر حاجه قالو ( انتو محتاجين ملك من السما يغير لكو الكون , إن الله لا يغير ما بقوم............ !! ) , طيب أنا عايز خروف ( بس يكون خروف مثقف , يعني واكل برسيم مستورد ) يقولي , إنتو جبتو لنا شخص ولا مشروع ولا ملك م السما ؟ ولا جبتو ربع مشكل من ده على ده ؟!!.
اللي بيوجعني أوي في هذا الهراء والخراء الثقافي والفكري إن مصر كل يوم بتنهار أكتر , وعلى بال ما الخرفان يتنازلو عن قرونهم ويحتفظو بيها في مكان أمين ويبطلو نطح في أم مصر هيكون شعارنا كلنا ( إقرولها الفاتحه .........ولا تنسوها من صالح الدعاء ) !!.

.

محمد حسين 

.