منوع

ولو واحد صاحبك سألك عن عريس متقدم لأخته , وقلت له , لأ يا حمدان , ده واد خمورجي وبيشرب مخدرات وقتّال قتله وبلطجي وهجّام وبيكدب وطارد أبوه من البيت وقطع ودن أمه قبل كده وحرامي ............. وبتاع نسوان , هتلاقيه فجأه ينفعل ويقولك : إنت متأكد يا إبراهيم إنه بتاع نسوان ؟ بالله عليك قولي إنك مش متأكد , أصل الجوازه كده هتبوظ يا إبراهيم !!.

.

على أعلى مستوى !!
.
من أكبر أفات المصريين والعرب الجمله دي ( على أعلى مستوى ) .
زورونا في مستشفى كذا وسوف تجدون أطباء على أعلى مستوى , اركبو معنا الخطوط الجويه ال.... فلدينا ضيافه على أعلى مستوى , تمتعو معنا في ملاهي ......... فلدينا مراجيح على أعلى مستوى , اختارو البطاطا من عربية عم ......... فلدينا بطاطا على أعلى مستوى .
هنا السؤال اللي بيجي في ذهني , أعلى مستوى بالنسبه لمين ؟ أعلى مستوى من مين ؟ يعني حضرتك قارنت نفسك بمين ؟ طيب عرفت منين إنك على أعلى مستوى ؟!
.
........... البوست ده بكتبه بمناسبة إني شوفت إعلان تلفزيوني عن مستوصف فاتح في الخصوص , أه والله في الخصوص , وبيقول ( لدينا أطباء على أعلى مستوى !! ) , أعلى مستوى ؟ في الخصوص ؟ طيب دي أجي أكشف فيها وانا معايا ال أر بي جي بتاعي ولا لازم أطلع الدبابه من الجراش ؟!.
.
................ إيه رأيكو في كلامي ده ؟ بالذمه مش كلام على أعلى مستوى ؟!!.

.

مين اللي هيشيل على الحمير ؟!!.
.
تقريبا نُص الأصدقاء ( اللي مش ناشطين ) عندي لو دخلت على بروفايل أي واحد فيهم هتلاقيه كاتب المهنه صحفي , أو كاتب أو شاعر, الكاتب فلان الفلاني , الصحفيه فلانه الفلانيه , الشاعر علان العلاني وهكذا يعني , بعرفهم أنا أزاي بقى ؟ تلاقيه داخل بيتسحّب كده على طراطيف مناخيره وبيتكلم من طراطيف صوابعه ! , ( ماهو شاعر بقى أو كاتب أد الدنيا )
زمان كان عندنا مثل في البلد بيقول ( أنا كبير وانت كبير ... مين هيشيل عالحمير ؟!! ) , وسؤالي اللي سألته لنفسي , لما الباشا ده كبير والهانم دي كبيره والأفندي ده كبير مين اللي هيشيل عالحمير ؟!
عشان كده الإسلاميين بيهزمونا باستمرار وذي ما قال الإنجليز يعني ( فريق من الجنود يهزم فريق من اللواءات ) , واحنا بختصار فريق من اللواءات , كلنا منظّرين وكلنا محللين سياسيين وكلنا مبدعين وموهوبين ومعندناش حد بينفّذ على الأرض ( يعني معندناش حد بيشيل على الحمير ) !!.

.

بيقولك يا سيدي , إجمالي مكافأت تحرير الجنود (اللي كانو هربانين في الصحرا ورجعو لوحدهم ) هي 700 ألف جنيه !!
مفيش حاجه اتغيرت في مصر , زمان كان فيه نكته : بيقولك يا سيدي مسئول عراقي ومسئول مصري أصحاب , المصري راح يزور العراقي لقاه ساكن في فيلا كبيره فسأله جبت فلوس الفيلا منين ؟ العراقي قاله بص من الشباك ده , فالمصري بص , قاله شايف الكوبري اللي هناك ده , قال له أه , قال له أهو ده اتكلف 50 مليون والمقاول عمل لي الفيلا دي هديه .
وبعد شهرين تلاته راح العراقي يزور المصري , لقاه ساكن في قصر كبير جدا , قال له جبت الفلوس بتاعة القصر ده منين ؟ المصري قال له بص من الشباك , العراقي بص , المصري قال له شايف الكوبري اللي هناك ده , العراقي قال له لأ !! , المصري قال له أهو ده اتكلف 100 مليون !!.
.
نفس الحكايه بتتكرر , شايف حضرتك الجنود اللي كانو مخطوفين ووصلو لحد عندنا دول ؟ أه مالهم ؟ , أهم دول بقى اللي حررهم أخد 700 ألف جنيه !!.

.

إيه المشكله لما وزيرة التعدين الأثيوبيه تقابل مرسي في المطار ؟! الإخوان هيقولو دي البروتوكولات الإثيوبيه بتقول كده يا جاهل , هع هع هع , وحتى يا سيدي لو مش بروتوكولات إيه المشكله يعني ؟! هي لا دي أول مره ولا أخر مره يتعمل في مرسي كده , بالعكس بقى أنا شايف إن المره دي تحديدا بعتو لمرسي الشخص المناسب , هقولك ليه ؟
بقى يا سيدي , مصر الكبيره العظيمه دي تحت حكم الإخوان بقت عامله ذي العيله الصغيره اللي قاعده في طشت نحاس وكل اللي رايح واللي جاي بيشطف فيها !!
, فقامت أثيوبيا قالت تبعت وزيرة التعدين , أولا : لأنها بتفهم في النحاس ( المعادن ) , و ثانيا : لأنها بحكم تخصصها هتعرف تتعامل مع الطشت !!.

.

وتاني مثال على نظام الحكم الإسلامي بين قوسين , وعلى النهضه الإسلاميه , هو السودان , وبعد نيف وعشرين سنه يا مؤمن من حكم البشير ( الإسلامي ) , ضربت إسرائيل مصنع كيماويات ( أو بومب تقريبا ) في الخرطوم وكان رد الوزير السوداني وقتها ( وشنو نعمل , الطيارات الإسرائيليه كانت طافيه النور !! ) , مع إن السودانيين عايشين في الضلمه ( بتاعة النهضه ذينا بالظبط ) , ويعني المفروض يكونو دايرين ومتعودين على النور المطفي , وكده مش باقي من النماذج والتجارب الإسلاميه غير تركيا , أه تركيا , يا سلام على تركيا , أحبيبتي يا تركيا , إسلامي إسلامي مفيش كلام , إسلامي بالكرتونه والضمان.................. حتى اسأل نور وزمرد خانو !!.
باختصار عايز أقول إن حكاية المشروع الإسلامي ده هي فطشه بيستخدمها بعض الأحزاب والحكام العرب والمسلمين , ذي حكاية القوميه العربيه كده وحكاية تحرير القدس ( سبوبه يعني وناس بتاكل منها عيش ) , وعلاقة قطر بالقوميه العربيه هي نفس علاقة حماس بتحرير القدس هي نفس علاقة الإخوان والبشير وطالبان بالإسلام !!.

.

وكل القرارات الرئاسيه الهامه والمؤثره بيتخدها مولانا محمد بديع وملانا خيرت الشاطر في الفتره اللي بيكون فيها مرسي مسافر بره , يعني بيبعتوه الأول وبعدين يشتغلو براحتهم , على طريقة الراجل اللي بيصّر إن مراته تروح تزور أمها ( اللي مش عيانه ) أو خالتها بتاعة البدرشين عشان يخونها في البيت !

إنما مرسي مسكتش , وعلى طرقة الإيد البطّاله ..... , فقد قرر السيد الرئيس محمد مرسي أنه سوف يتولى بنفسه شخصيا مسئولية غسيل الأطباق والكوبايات والفناجين في مكتب الإرشاد ( قهوة المقطم )
أيوه جاييييييييييييييييييييييييييييييييييي , وعندك واحد يانسون بحبة البركه لمولانا المرشد على مايه بيضا , بارك الله فيك يا مرسي , أوّل جارسون مدني منتخب , أخد من الليبراليين وبتوع اللمون 8 مليون صوت , هع هع هع , أه والله 8 مليون صوت ( وخلّي الباقي عشانك ........ تيبس يعني ) !!.

.

احترس ... مصر ترجع إلى الخلف !!.
.
في أقل من سنه ظهرت اللمبات الجاز وبقت بتتباع على الأرصفه , يعني رجعنا لجو السبعينات والمفترض من الساده المستمتعين والمتمعين بالنهضه في مصر إنهم يواكبو الحدث ويبدأو يلبسو بناطيل شارلستون ويطولو السوالف ....................ويقول الحبيب لحبيبته لما يقابلها في الكازينو ( بتفخيم الياء ) .....................( ممنون يا هانم ) !.
.
كلها سنتين بالكتير والكوليرا تظهر في مصر تاني , الغريبه في الموضوع ده بقى , إن ذي مافيه ناس حاليا بيقولو ( إحنا أسفين يا مبارك ) , هتلاقي ناس موجوده بعد ما يغور حكم الإخوان بيقولو ( إحنا أسفين يا كوليرا ....قصدي يا نهضه ) !!.
.
طيب حضرتك مش واثق ومش متأكد من الكلام ده ؟ , ومحتاج دليل أو رابط ( كالعاده ) , بسيطه خالص , شوف أفغانستان من 50 سنه كانت إزاي ؟ ودلوأتي شكلها إيه ؟ ولو عايز تعرف مدى تحضر الشعوب إبحث عن المرأه , شوف صورة المرأه الأفغانيه من نص قرن وصورتها النهارده وانت تعرف مدى التقدم والتحضر والنهضه اللي بتعيشها أفغانستان تحت الحكم الإسلامي , على فكره مفيش أي فرق بين طالبان والإخوان , لا يا كابتن مفيش , محدش يضحك عليك ويقولك الإسلام الإخوانجي إسلام وسطي , لا وعزة جلال الله , لا وسطي ولا وسطك !!.
.
زمان من كام سنه , قعد جدي الأفغاني واسمه ( شهربار ) مع جد أفغاني مش طالباني بس بيحترمهم اسمه ( شهربور ) , وقام شهربار قال لشهربور ( إحنا داخلين على أيام سوده بسبب حكم طالبان بتاعتكو دي يا مولانا ) , أياميها كانو عيال في مدرسة كابول الثانويه ( المشتركه ) , قام شهربور قال لشهربار ( يا جدع متقولشي كده عيب عليك , داحنا هنشوف الهنا كله تحت حكم طالبان , نهضه وجبال عسل وبراميل مربى وبترول ومشاريع عملاقه , دي أمريكا بنت الحرام هتترعب مننا وبكره تشوف ) , واللي مش مصدقني في الحكايه دي يروح يسأل شهربار وشهربور , هما لسه عاييشين وحسّهم بالدنيا بس عجزو طبعا , هيلاقيهم في رابع وخامس خيمه وانت داخل كابول على إيدك الشمال , كل واحد فيهم عنده 3 معيز بيربيهم ( ربنا يوعدنا , اللهم لا حسد ) وبيستنو الطيارات الأباتشي الأمريكيه بنت الحرام ترمي عليهم ساندوتشات العسل والمربى ) , وكأن الدنيا دي يا جدعان على رأي اللي قال ( أوضه وصاله )!!

.

معلومه في التاريخ العربي والأدب ( اللي فضلوه عن اللحمه ) :
.
زمان في العصر الجاهلي وصدر الإسلام والأموي والعباسي كان للشعراء في علاقتهم بالمرأه حاجتين مهمين جدا :
أولا : كان الشاعر بينسب إسمه إلى إسم حبيبته , فتلاقي مثلا ( قيس ليلى , كُثيِّر عزه , جميل بثينه ..... وهكذا ).
وبعضهم مش بيعمل كده ذي امرؤ القيس وعمر بن أبي ربيعه ( عندهم ألوت أوف فريندز...هينسبو إسمهم لمين ولا مين ؟! ).
.
ثانيا : كان الشاعر بيدلّع حبيبته عادي ذي ماحنا بنعمل دلوأتي , بس الدلع زمان كان بحذف الحرف الأخير من إسم الحبيبه ( خاصة الهاء ) لما يكون راضي عنها يعني فتلاقيه يقول ( ألا يا عبلُ قد زاد التصابي ...............عنتره بن شداد )
فقلتُ لها يا عزَُ .............. كُثيِّر )
.حتى جميل بن معمر كان بيدلع حبيبته بثينه وبيقول لها ............... يا بُثبث !!
.
......... المهم يعني والشاهد في الموضوع ( اللي مشافشي حاجه ) إن الشعراء والرجاله زمان مكانوش بيتدلعو , يعني عبلة عمرها ما قالت لعنتره يا ( توتو ) , ولا بثينه قالت لجميل ( يا جيمي ) !!.

.

محمد حسان بيقول : الناس كرهت الإسلام بسبب تصرفات بعض الدعاه !!............................... لا متقولشي على نفسك كده يا شيخ , إنت حد جميل , إي وربي !!.

.

ثرثره في علم البلاله المصري !!
.
لما واحده ست تدخل مستشفى حكومي كبيره في مصر وهي حامل , وبتعاني من أعراض سيئه ويكتشف الأطباء إن الجنين مشوه واحتمال وفاته كبيره جدا ووجوده خطر على حياة الأم , ويجمع 3 أطباء ( أخصائيين نسا ) على ضرورة إجهاض الحاله , ويوقعو بإنهم مسئولين عن رأيهم , في الحاله دي لو زوج الست راح يسأل الشيخ عن حكم الدين أنا بسمع سؤاله كده :
فضيلة الشيخ ما رأي فضيلتكم في طريقة أربعه أربعه اتنين اليت استخدمها حسن شحاته في بطولات أفريقيا , وأيهما أفضل دينيا السيارات الألماني أم الياباني , وهل غسيل فلتر المكيف بصفه دوريه ينقض الوضوء ؟!!.

.

صباح الخير , عارف حضرتك يعني إيه مشايخ (الجهل والبلطجه ) يحكمو ويتحكمو في عقول البشر ؟!............. تعالى هقولك ببساطه :
تخيل حضرتك إن الست ( منى ) كانت حامل , وبعدين حصل لها مشكله في الحمل , التحاليل والأشعه قالو إن فيه عيب خلقي كبير في الجنين وإنه غالبا هيموت ووجوده فيه خطوره على حياة الام نفسها , ده سيادتك رأي الأطباء المتخصصين , اللي شافو إن إجهاض الجنين هو الحل , زوج الست منى وافق فورا وطبعا منى وافقت بصعوبه , وبعدين الزوج قرر ( معرفش ليه ؟ ) إنه يسأل فضيلة الشيخ عن رأي الدين في الليله دي , طبعا الشيخ بعد أن حمد الله وأثنى عليه قال ما لذ وطاب من قتل النفس التي حرم الله , وا وا وا , ونسي فضيلته إن ده رأي الطب والعلم وإنه المفروض ميفتيش هنا أساسا .
طيب هنفترض إن الزوج استجاب لفتوى الشيخ واستنى لحد ما الجنين اتولد , شوف حكمة ربنا بقى . الجنين ده تحديدا هيدخل حضّانه غالبا ولفتره طويله , وغالبا الكهربا هتقطع في الحضانه وتفضل تقطع عليه لحد ما يموت , بعد ما تكون أمه عانت في الولاده وبدأت تتعلق بطفلها وكتبت له إسم كمان , دوّر حضرتك بقى على رأي الشيخ بتاع قتل النفس ( مش هتلاقيه ) , ماهو ده يا مولانا قتل للنفس برضه وبدون وجه حق المره دي.
.
الغريبه في الحكايه دي إن اللي حرم الإجهاض (اللي أوصى بيه الأطباء) هما المشايخ واللي قتل نفس الطفل بالإهمال بعد ما اتولد هي حكومة المشايخ برضه .....
.
يعني الحكايه باختصار بتقول : لأ يا أخي الكريم , لا تجهض زوجتك فهذا حرام حتى لو كان رأي طبي , ولا تقتل الجنين الأن ( ليس الأن ) . دعه يخرج إلى الحياه وسوف نقتله نحن في أقرب فرصه........... وصلى اللهم على سيدنا محمد وعلى أله وصحبه وسلم . !!.

.

اللي مش عاجبه العيشه في مصر بسبب الكهربا المقطوعه على طول والبنزين والسولار اللي مش لاقيهم أنصحه بالهجره إلى الشمال , إلى الشقيقه الكبرى ( قطاع غزه ) , هناك هيلاقي الكهربا بتاعتنا ( ومش هيلاقي محصل النور أبدا ! ) وهيلاقي البنزين والسولار , مش بس كده ده هيلاقي العربيات الكيا سيراتو ( بتاعتنا برضه ) , عايز دلع أكتر من كده ؟!.
وتصدق باله يا كابتن ياللي قاعد هناك , حتى الامن هتلاقيه هناك , ماهو سيادتك حركة حماس من ساعة ما وصلت للسلطه في قطاع غزه وهي مش بتحارب ولا بتجاهد ضد الأمريكان والصهاينه ( إنما بتجاهد ضد المصريين ) , يعني هناك هتلاقي الأمن والأمان , على عكس عندنا , حتى الأمن هربوه من الأنفاق !!
ومش بعيد أبدا بعد سنتين تلاته تبقى خبير أنفاق أد الدنيا , بس امانه عليك يا شيخ وانت هناك , لو لقيت واحد ملتحي كده من بتوع ربنا راكب حته سيراتو زيتي 2010 ( مسروقه ) قول له يحاسب عليها في المطبات أصل صاحبها في مصر دفع دم قلبه وباع سيغة مراته عشان يشتريها !!

.

محمد حسين 

.