الإخوان كل ما يلاقو السلفيين بعدو شويه يقومو نازلين بكارت إسلامي من اللي بيعجب الجماهير ويجذب الأهات , إيشي هنحجب المذيعات في التلفزيون ( بعد خطاب صديقي بيريز ) , وإيشي هنقفل المدارس في وقت الصلاه ( بعد مادخلو الشيعه مصر ) , وإيشي هنعمل فندق إسلامي ( بعد ما جددو تراخيص الكباريهات ) !! , بالمناسبه اللي طالب المذيعات إنها تتحجب هو صلاح عبد المقصود !! , طيب والله خيرت الشاطر بدأ يكيفني بأفكاره , أصل أنا بشجع اللعبه الحلوه , والعيب مش عليه , مصر هي اللي فيها شوية سلفيين ذي الفل , أجدع من أجدع محفظه جلد في جيب البنطلون الوراني , وأحلى من لعبة اليويو !!
.قضية عزل النائب العام الجديد متحصنه بالإعلان الدستوري بتاع مرسي وقضية عودة النائب العام القديم ممنوعه بناء على الإعلان الدستوري بتاع مرسي والدستور الجديد ( بتاع مرسي برضه ) , شوفتو حلاوه أكتر من كده ؟, إعلان دستوري معمول على إيد سيدنا إبليس الرجيم وهيفضل ينط لنا كل شويه , أه والنعمه , وكله بالشريعه بيفك وبالحنيه بيلين , تعرفو إن نابليون بونابرت قبل مايدخل مصر نشر إشاعه إنه مسلم ؟ وكان بيبدأ خطبه ( باسم الله ) وبعض أيات القرأن , وشعبيته في مصر زادت , طيب تصدقو بإيه ؟ والله لو كان نابليون ربى دقنه واتصور وهو بيصلي ركعتين في سيدنا الحسين كان زمان الحمله الفرنسيه مطلعتش من مصر لحد دلوأتي , وكان يبقى لقبه خليفة المسلمين مع إنه مسيحي يا جدع !!.
.
ويقولك يا سيدي , ( مصر تطالب هيئة الطاقه الذريه بالتفتيش على الأسلحه الذريه الإسرائيليه ) !! , والنبي يا إخوان , أبوس إيديكو يا إخوان متكتبوش الجمله دي في كتاب الإنجازات , عشان خاطر ربنا مش تكتبوها , أصل أصل , ماهو أصل , مبارك كان بيبعت للوكاله الدوليه للطاقه الذريه جواب كل يوم تلات , ويقول لهم ( نطالب بالتفتيش على الأسلحه الذريه الإسرائيليه ) , أه والنعمه ذي مابقول لكو كده , جواب متبرفن ومرسوم عليه قلب ودباديب ( أيوه ذي جوابات مرسي لبيريز كده ) , والسادات كان بيبعت جوابات يقول نفس الكلام , ومحمد رشدي كان بيبعت جوابات ومراسيل , وشفيق جلال كان بيبعت ل ( أمونه ) جوابات , وحراجي القط كان بيبعت جوابات , حتى أنا وانا في الكليه أيام الشقاوه كنت ببعت للبت حبيبتي جوابات أقول فيها ( بحبك بحبك بحبك كما أطالب بالتفتيش على الأسلحه الذريه الإسرائيليه !! ).
.ذات مومنت لما تشوف صورة ابن مرسي وهو بيصلي في حراسة ظباط الحرس الجمهوري , سيبك انت من أم التناكه اللي هو فيها مهو ده اللي بيسموه الشبع بعد جوعه , إنما حقيقي والله أول مره أشوف رئيس لمصر بكرش وابنه بكرش وعمه بكرش , هو انتو من دار السلام ؟ بص ياد يابن مرسي إنت لازم تشفط وأبوك لازم يشفط وعمك هو كمان لازم يشفط , قطيعه تقطع النسوان كلهم مش فالحين غير في نفخ شفايفهم وتقطع الرجاله كمان مش فالحين غير في نفخ كرشهم !!.
.
.
.
صباح الخير , هنحقق الإكتقاء الذاتي من القمح قريب جدا ( يمكن على بكره أخر النهار كده ) , واكتشفنا بترول في منخفض القطاره , وبكره هيقولو عثرنا على مناجم دهب ولولي ومرجان في المقطم جنب مكتب الإرشاد , لما تقابل حد من الغلابه أوي اللي بينامو في الشارع وبياكلو من صفايح الزباله لازم تقول له ( إطلع من دول يا مكار , إنت بتخزي العين عنك أكيد , لا لا إنت كويس أوي بس انت مش واخد بالك إنك كويس أوي !! ).
.
محمد حسين
ليست هناك تعليقات:
إرسال تعليق