طرطأ عينيك كده وفنجل ودنك معايا , عايز أقولك كلام مهم , ولو معجبكش الكلام ومستكنيصتش هرجعلك بدل التذكره اللي دفعتها تذكرتين ( كذكرتين ) , المهم دلوأتي إنك تدوس لايك عالبوست ده ولو مدوستش لايك فاعلم إن السلعوه هتجيلك بالليل وتقرم ودنك , بقى يا سيدي سلامه في خير زمان وخير زمان في النعام , سيادتك وانت داخل عالفيس هتلاقي بوست كده على إيدك اليمين بعد النزيمه , هتلاقيه بعد بوستات مطلوب مليون مسيح ومليون واحد يصلي عالنبي ومليون واحد يدعم القصف الصهيوني لسوريا ! , ما علينا بقى , المهم البوست ناشر صورة مصحف متقرقض منه من الجوانب كام حته كده , وقالك إيه لا سحر ولا شعوذه , إن الحشرات والقوارض اللي عملت كده قرقضت من الجوانب بس ومقربتش جنب الحته اللي مكتوب فيها القرأن , ولا تخرج قبل أن تقول أمك إسمها إيه ؟! , طيب أنا واحد ربنا خلقه من أعلى سلم الثدييات , والعلماء بيقولو على أمثالي إن اللي بيميزنا عن الشمبانزي والقرده والنسانيس والإخوان هو العقل , إديني عقلك بقى وإمشي إنت حافي , ولا أقولك خليني أجرب عقلي كده , يقولُ لي عقلي وهو لم يكذبني قط , إنك لو حطيت مصحف في مكان مقفول مع شوية فيران هياكلوه كله عادي , ولو رميته في النار هيتحرق , عادي والله , أصله ورق A4 بقي ولا A5 المهم إنه ورق , وعقلي بيقولي كمان إن ربنا حفظ كتابه في قلوب وصدور الحافظين والمقرئين , ومش هيغير لك طبيعة المواد وقوانين الطبيعه عشان سيادتك تتكيف وتقتنع إن ده كلام ربنا , موضوع الصحيفه اللي كانت معلقه على الكعبه والحشره أكلتها ماعد ( إسم الله ) دي كانت معجزه في بداية الدعوه عشان ربنا سبحانه وتعالى يثبت للكفار إن الإسلام دين سماوي مش من عند البشر , طيب ربنا يكرر المعجزه تاني ليه ؟ هو انت سيدنا رسول الله ؟ ولا إحنا كفار ومحتاجين دليل ؟ فهمت يا خال ؟ إتكيفت ولا عايز التذكره ؟ !!.
.
.
صباح الخير , إكتشفت بالصدفه إن اللي أصدر فتوى تحريم الرنجه والفسيخ وتلوين البيض في شم النسم هو الشيخ الحويني , الغريبه بقى إن الحويني أنصاره ودراويشه وبهاليله بيسموه ( أعلم أهل الأرض ) , طيب لما أعلم أهل الأرض يفتي في تلوين البيض ويبيض علينا أومال أجهل أهل الأرض هيعمل فينا إيه ؟!
في الحقيقه أنا لسه عند رأيي مشايخنا أنصار الوهابيه وعبيد المرشد هم أخطر علينا من القنبله الذريه الإسرائيليه , ولو قررت إسرائيل إنها تنفذ أكبر حملة إغتيالات وإباده جماعيه للمصريين هتبدأ بعلماء الذره و بعدين العلماء والفلاسفه والأدباء والمفكرين وبعدين تنزل للأطباء والمهندسين وبعدي تنزل تنزل لحد بياع الفجل والكرات وأخر حد هتغتاله إسرائيل هما مشايخنا !!.
.
محمد حسين
ليست هناك تعليقات:
إرسال تعليق