منوع

مقشة صبحيه !!.
.
الحكايه دي زادت عن حدها أوي وبوّخت , كل شويه خبر من نوعية ( طالب في تانيه ثانوي يكتشف علاج نهائي للسرطان ! ) , ( طالب في كلية هندسه يبتكر طائره هليكوبتر مصريه 100 % !!) , ( طالب معرفش فين يبتكر غواصه نوويه !! ) , ( طالب في كلية الزراعه يكتشف أن البرسيم يمكن أن يستخدم كعلف للمواشي والخرفان !! ) , المهم بقى , ما علينا يعني , أنا عارف والله إن عندنا العقول حلوه ولو عايزني أعزف لك على الربابه في الموضوع ده فانا أحسن واحد يعمل كده , بس كل حاجه بالعقل وبلاش الخرفان يشيرو كل حاجه بغشم كده , عندنا عشرات الألاف من الإبتكارات مرميه في الأدراج , أبحاث أوليه لم تكتمل أو أبحاث مكتمله وملاقوش لها جدوى اقتصاديه , بالمناسبه الطياره بتاعة طالب هندسه دي طياره لعبه مش طياره مقاتله ولا نفاثه بس هما مقالوش كده في الخبر , لعبة أطفال عاديه , أنا شاري واحده لابن أخويا من 4 سنين ب 120 ريال دلوأتي عليها عرض في كارفور ب 60 !! .
كل غرضي أقول إستنو لما الأبحاث بتاعة الإبتكار تنتهي وتاخد جدوى اقتصاديه وبلاش حكاية مصريه 100 % دي عشان بتجيب لأمي أرتيكاريا , واعرفو إن أغلب الأفكار مش بتكمل , وهنروح بعيد ليه ؟ , كان فيه ست عندنا في البلد اسمها ( صبحيه ) صحتها عفيه شويه , أوّل مانزلت المقشات الحديثه في التمانينات كانت كل ما تستخدم المقشه عشان تكنس البيت يقوم تنفصل الإيد الخشب عن الجزء البلاستيك اللي بيكنس , صبحيه بعد تفكير طويل توصلت لفكرة ( مقشه قطعه واحده !! ) , ومع ذلك البحث بتاعها هو كمان دخل الفرن , قصدي دخل الدرج ذي غيره , والنبي يا شباب شوفو حل الأول لموضوع ( مقشة صبحيه ) وبعدين نفكر في الطياره الهليكوبتر والغواصه النوويه !!.

.

مرسي راح يزور روسيا وهناك قابله عمده ( كفر أبو موسكو ) , وباسم يوسف صورته نازله على غلاف لوموند الفرنسيه مع تقرير كامل ! , الناس مقامات يا سيدي , إلهي يارب ياريس مرسي بعد ما تكبر وتذاكر وتجتهد أشوفك مذيع في قناة السي بي سي وتحقق حلمك !!.

.من فتره طويله وانا نفسي في حتة أرض في القاهره أبني عليها بيت , ياكش تكون في مدينة ( النهضه ) , بس خايف الأرض تتسرق مني , يعني الناس ياخدوها وضع يد وانا مش موجود , ماهي البلد مش أمان ومفيش حد بيقول مصر أمان حاليا غير خميس بتاع الديفراوي والشيخ السعودي اللي زار مصر من كام شهر وعمل حفله وبوليله , وبعد طول تفكير في حل لحماية الأرض ( اللي لسه مشتريتهاش ) جاتلي فكره حلوه أوي , قلت أعمل ذي الراجل البدوي في فيلم عبود على الحدود , هحط لوحه على الأرض مكتوب عليها ( إحترس أمامك حقل ألغام !! ) , (عشان ماحدا يقرّب من أرضي ) , بس هنا ظهرت مشكله تانيه , إفرض يا حلو الحراميه اللي بيحطو إيديهم على الأراضي كانو مش بيعرفو يقرو ؟! قلت مش مشكله , يبقى هما اللي اختارو قضاهم بإيديهم , الألغام هتنفجر فيهم وتقطعهم نسايل وتريح البشريه كلها من شرهم !!.

.

عندي يقين إن ال 5 مليون لحلوح مصري اللي بيأيدو الإخوان , بيدعو لمرسي في كل صلاه , أه والله , يعني 15 مليون دعوه في اليوم يابو الأمراس , يعني 4.5 مليار دعوه من يوم ماربنا ابتلانا بيك يا ريس , ومع ذلك أبيض ياورد !
الموضوع ده بيأكدلي معلومه , إن مصر ممكن تفوز ببطولة أفريقيا ببركة دعا الوالدين ( وسجده للمولى ) , إنما الأوطان لا تُحكم ببركة دعا الوالدين !!
ولعلمك الشديد , الأمريكان اللي كانو بيدعمو جورج واشنطن ( مؤسس أمريكا بنت الحرام ) مكانوش بيدعو له في صلواتهم ولا بيصومو عشانه اتنين وخميس !!.

.

.

أصل أنا مش داقق عصافير على دراعي , أه والنعمه , مش مصدق حكاية إن الجمارك والأمن في مطار القاهره مسكو راكب جاي من نيويورك كان مهرّب ( ختم مزور ) بتاع شعار الجمهوريه ! , لا والله يا بيه مش مصدق , وحياة العيش والملح اللي بينا مانا مصدق , ختم ايه اللي هتمسكوه ؟ ده بيتحط في جيب البنطلون , يا بيه أنا لو إديت موظف الجمارك في مطار القاهره حبيتين فياجرا مضروبين وانا نازل أجازه بعدّي من قدامه ب ( تلاجه 96 قدم ) مقفوله باللي فيها !!.

.

وبعد ما جبهة الإنقاذ قالت وعادت وزادت ولسانها اتدلدل طول كده , عايزين حكومه جديده محايده تشرف على الإنتخابات , لازم حكومه من خارج الإخوان تشرف على الإنتخابات , أيوه احنا مش واثقين فيكو يا إخوان , قام فضيلة المرشد بعد ما خلص اعتكافه كالعاده قرر إنه يعمل تعديل وزاري على حكومه هشام قنديل , ويغير تسع ست وزارات كده مالهمش أي تلاتين لزمه , منهم وزير البيئه !! , تصدقو إنتو كده طمنتوني , طالمو هتغيرو وزير البيئه يبقى الإنتخابات الجايه نزيهه وبنت نزيهه !!
حسب الله قال لمراته ( عيب يا نوسه كده , مينفعش أكون قاعد مع صحابي الرجاله وتدخلي تقعدي معانا وانتي لابسه قميص النوم ( الأحمر ) العريان ده )
وعشان نوسه بنت ناس مؤدبين وبتحافظ على بيتها سمعت كلام جوزها , وتاني يوم دخلت قعدت مع صحابه بقميص النوم ( الأسمر ) العريان !!... أحبيبتي يا نوسه.
أهل نوسه بقى والمبرراتيه لما عرفو بالموقف قالو لحسب الله ( إيه يا حسب الله , ماهي البت نوسه سمعت كلامك أهي , إياكش إنت بتتلكك بس ) !!.

.

بيقولك يا سيدي ( تعرضت مذيعة قناة الجزيرة القطرية غادة العويس للإغتصاب من قبل أمير ينتمي إلى جماعة جبهة النصرة السورية المعارضة ) !!
يا ست غاده متقوليش على نفسك كده , إنتي حد جميل خالص وأخت فاضله, لو كان سمو الأمير وفضيلة الشخ اغتصبك فمتقلقيش خالص...إحنا هنعتبرك كنتي بتجاهدي جهاد مناكحه !!.

.صباح الخير , من 40 سنه تقريبا والمنحنى بتاعنا عمّال بينزل , دي مكانتش حرب اللي انتصرنا فيها دي , السادات كان بيقول (العبور ) ومبارك من بعده بيقول ( السلام ) , وختمت بمرسي اللي بيقول ( النهضه ) , هوا احنا مكتوب علينا نركب خط العشوائيات ( العبور ..السلام ...النهضه ) ؟! , خايف الرئيس الجاي يقول ( الخصوص ) وكل راكب يجيب ال أر بي جيه بتاعه معاه , محتاجين رئيس مصري يكون سوّاق ابن حنت , حافظ البلد شبر شبر ويعرف يوصلنا لمصر ( الجديده) !!.

.

.ما زالَ لحبكِ 

تكملةٌ
في زمنٍ
يعرفُ معنى الحبْ
لا يصلبُ أبداً
عشاقَهْ
.
.
محمد حسين

.

يعني إيه خوارج هذا العصر ؟!
.
يعني تلاقيهم بيكدبو ليل ونهار وبيحللو الربا ويجيبو رقاصات في حفلاتهم , وممسوكين عالطريق الزراعي ومأفوشين بمخدرات وممسوكين في الزراعات وبيتاجرو بالصدقه بتاعة الغلابه وبيتاجرو في العمله ويعملو صفقات على دم الشهيد , وبيكفرو الناس ويغدرو ويخونو الوعد ويقتلو وبيفجرو في الخصومه وبعدين يقولك................................................ تهنئة الأقباط بعيدهم حرام !!على فكره , مش مهم أبدا تتابع كل الصفحات الثورجيه على الفيس , ومش مهم يفوت منك يوم واتنين أو 3 سنين من غير ما تشوفهم بيقولو ايه ؟ , مش هيفوتك كتير , كل اللي بتعمله الصفحات دي ( واللي بنعمله احنا كمان ) إنهم بيقولو جمله واحده , بوستات بقى ولا فيديوهات ولا تصريحات هي جمله واحده , الصبح ولا بالليل جمله واحده , صيف وشتا جمله واحده , الجمله بتقول ( الإخوان كدابين !! ) , أه والله الإخوان كدابين , وحياة ربنا الإخوان كدابين , الإخوان كاذبون , يا إلهي إنهم كاذبون , oh my god , they are liars !!.

يا سيدي طيب ماهما عارفين إنهم كدابين وكل الناس عارفه إنهم كدابين ومرعي بتاع الكليمه عارف إنهم كدابين , والبت نوسه عارفه إنهم كدابين وحياة النعمه كدابين وساره عارفه إنهم كدابين والديفراوي عارف إنهم كدابين وهما مبسوطين إنهم كدابين ومعترفين إنهم كدابين وصباع رجلي الصغير عارف إنهم كدابين وطفاية السجاير دي عارفه إنهم كدابين , وبعدين ؟ أخرك فين ؟ وبعد ماعرفت وعرّفت الناس إنهم كدابين هتعمل ايه ? بالإنجليزي عشان تفهم and so ?!!.
هنفضل نلف وندور كده , بنثبت ما تم إثباته وبنأكد على المؤكد زيادة في الإحتياط يعني , ونعيد إختراع قرص الطعميه , عارف إنت الضحكات الشريره بتاعة الكفار في الأفلام التاريخيه ؟ أهو أنا دلوأتي شايف خيرت الشاطر قدامه خروف كبير بياكله وفجأه دخل عليه الواد اللجنه الإلكترونيه بيديله التقرير اليومي عن الفيس وشايفه بيضحك الضحكه إياها بتاعة كفار قريش ............... هه هه هه ( مرحى مرحى ) !!.

.

.

.

من أغبى المواقف اللي بتحصل لي في الشغل , تدخل زبونه بتسأل على مسكن لألام الركبه , أسألها عايزه حاجه معينه ؟ تقول لأ ؟ طيب اتفضلي النوع ده كويس أوي وسعره كذا وبيتاخد كذا , طيب عندك حاجه تانيه ؟ أه عندي نوع تاني ب 10 ريال , تقوم ترد وتقول : أشوف , ( أو أشوفها ) !! , تشوفي ايه يا ستي ؟ , هو انا ببيع قماش ؟ ماهي علبة دوا ذي أي علبة دوا , اتفضلي شوفي , ولعلمك بقى الخامه بتاعة العلبه دي لا بتكش ولا بتوبّر بعد الغسيل وعالضمان , ولا أقولك , بصي لعلبة الدوا كويس وخلّي علبة الدوا هي كمان تبص لك كويس , خدو وقتكو وشوفو كده هيحصل بينكو هارموني وتوافق عصبي عضلي وكيميا ولا لأ ؟!!.

.

يا الله يا ولي الصابرين , تبا لي , فأنا أشجع هذا الفريق ( الأبيض ....... ياورد ) , ويحكمني هذا الرئيس ( الأحمق........يا بغل ) , ومش باقي لي من وسائل التعذيب المعتمده في سجون جوانتانامو وابو غريب غير إني كنت أتجوز أم أيمن !!.

.

وجدوهُ مقتولاً
على سفحِ الطريقْ
قالو فمَنْ يحمي الوطنْ
حينَ الذبابُ سينتشر ؟!.
.
محمد حسين

.

يعني ايه الحب من طرف تالت ؟!
.
يعني تلاقي أصدقاء كتير بيبعتولك رسايل على الإينبوكس كلها مدح وإشاده وانبهار بإسلوبك في الكتابه , وتبص على بوستاتك تكتشف إن عدد اللي بيبعتلك الرسايل أكتر بكتيييييييييير من عدد اللي بيعملك لايك !! , أه والله , هو ده بقى الحب من طرف تالت , يعني صاحبي يعجبه البوست بتاعي فيقوم يعمل لايك على بوست بتاع واحد تاني , أو تقريبا عاجبه البوست بس أهله في البلد محرجين عليه يعمل لايك , إنما إيه الغريب في كده ؟, مانا ليه أصحاب كتير كانو بيموتو في البرادعي وصباحي وعشان كده انتخبو مرسي ! , وإيراهيم ابن خالتي كان بيحب بنت اسمها فاطمه من التل الكبير وتاني يوم اتجوز بنت اسمها راشيل من تل أبيب !!
أصدقائي الأعزاء , والنبي بلاش تنبهرو بالبوستات بتاعتي عشان أنا خلاص قربت أقفل الصفحه دي بسبب الزياده الرهيبه في أعداد المنبهرين !!
.............. متبسطهاش أكتر من كده يارب .

.

محمد حسين