منوع + شعر

August 29

الفيس بوك كله مالهوش سيره غير البلتاجي وللأسف للأسف أغلب التعليقات والألشات شفتها ممله ومش لذيذه , تقريبا الناس ذهنها مشغول أكتر بسوريا , أنا أطالب أجهزة الأمن بالإفراج عن البلتاجي وإعطاءنا فرصه لنعد الألشات والكوميكس اللازمه , و ابقو اقبضو عليه تاني لما نكون جاهزين , مش هتغلبو يعني ... أه على فكره المره الجايه هتلاقو البلتاجي ربّى شنبه تاني عشان يتنكر ..... وعهد الله ده أخرهم !!.

Top of Form

1

Bottom of Form

وبعد القبض على أغلب قيادات الإخوان في ظرف أيام , توصلت لحقيقتين , أولا إن مصر لسه فيها جهاز أمني ومخابراتي معقول وثانيا إن الإخوان لا يصلحو لحكم قريه صغيره أد كده في مصر , بقى هما دول القيادات بتوع الإخوان ؟ وقالك تنظيم سري دولي وعارف المستخبيه والخُط بتاع الصعيد وعنده فرع مخابرات أخطر جهاز مخابرات في العالم , ومش عارف الواحد منهم يستخبي في دوله مساحتها مليون كيلو متر مربع وفيها 90 مليون نسمه وبتشكل الصحرا 94 % من مساحتها , يا سلاممممم , قيادات وتمويلات وتدريبات وترباتاتو وفي الأخر نلاقي أخر علم الواحد فيهم في التنكر إنه يلبس نقاب أو يحلق شنبه , يعني باختصار بيخبي رجولته مش بيخي شخصيته !!.

Top of Form

3

المفروض إن السيسي يسيب كل حاجه في إديه دلوأتي ويركز في حاجه واحده بس , هي إنه يعمل اتفاقية دفاع مشترك مع قناة الجزيره واتفاقيه لتسليم المطلوبين أمنيا أو قضائيا , لأن مفيش دوله في العالم بتعرف مكان اختباء قيادات الإخوان غير ( دولة قناة الجزيره ) .... والكيان الصهيوني , وابقى سلملي على جوزك ياسماعيل بيه !!.

Top of Form

Bottom of Form

Bottom of Form

و مصر دي ربنا هيكرمها أوي لما الست المصريه الكبيره تبطّل تقول لكل بنت في الجامعه بتقابلها ( ربنا يفرحك بعدلك , إلهي أشوفك في بيت العدل , ربنا يرزقك بابن الحلال , يارب أشوف عيالك بيتنططو حواليكي !! ) , وكأن أحلامنا في الدنيا دي لازم تكون عباره عن جواز وحمل وولاده , وربنا هيكرم مصر بجد فعلا لما تبدأ الست المصريه الكبيره تقول لبنت الجامعه اللي بتقابلها ( إلهي يارب أشوفك في وظيفه مرموقه , ربنا يرزقك بمرتب ثابت 7500 دولار , يارب أشوفك راكبه عربيه 4x4 لاندكروز ولا شيروكي وبتحققي ذاتك )......... ده كان رأي مراتي على فكره !!.

August 28

واحد سوداني صاحبي دخل بيقولي ضغطي 140/90 يبقى معقول ولا شنو ؟ قلت له عمرك كام ؟ قالي 41 سنه , لأ استنى أنا مواليد 75 يبقى ....مممممممممم 38 سنه !!.
أه يا مراري يامه , هي السودان اتقسمت من شويه !!

August 28

وعدلي منصور أصدر قرار بحذف جملة ( الولاء لرئيس الجمهوريه ) من قسم ظباط الجيش عند التخرج , مع إن عدلي منصور رئيس جمهوريه ( على حد علمي ) , من يوم ما شفت الراجل ده وانا بقول عليه راجل طيب و ف حاله و مش بتاع مشاكل , وعهد الله لو جه واحد وشال الكرسي من تحته وقال له بعد إذنك بس يا كابتن عشان عندنا فرح ومحتاجين الكرسي للعروسه تقعد عليه ما هيقول أي حاجه !!.

Top of Form

Bottom of Form

August 28

الحكايه أصلها سلف ودين , وزي ماحنا اتفرجنا على غزو العراق واحنا مبتسمين كأنها ( كوالا لامبور ) وزي ما هنتفرج على ضرب سوريا ومبتسمين كأنها ( كوبا ) , لما ييجي الدور علينا مش هتلاقي حد سوري ( من تبقى منهم ) ولا عراقي ( من تبقى منهم ) يتعاطف معاك أو يهتم ...وهتلاقي دمك سايح في الشوارع وصوت جايلك من بعيد , من نواحي الخيج بيقولك ...... ( الله يسامحك .... ضيّعت علينا حلقة اليوم من المسلسل التركي يا مصري !!).

وبشار سفّاح ابن كلب !!
.
صديقي العزيز فلان الفلاني , دعني أرضي غرورك وضميري في نفس الوقت , نعم أرفض العدوان الأمريكي الصهيوني على سوريا وأعلم أن ( بشار سفاح ابن كلب ) , أرفض هدم ما تبقى من الجيش العربي السوري ( و بشار سفاح ابن كلب ) , أرفض موقف الدول العربيه بما فيها مصر السيسي ( وبشار سفاح ابن كلب ) , أرفض تقسيم سوريا إلى دويلات على أساس عرقي وطائفي ( وبشار سفاح ابن كلب ) , أرفض أن يصبح المواطن ا...

صباح الخير , شعارنا دلوأتي , بمساعدة الأمريكان والفرنسيين والأتراك والصهاينه سوف نحرر سوريا من يد السفاح بشار ( شبراً شبراً ) وسوف نتركها هكذا بعد التحرير ( شبرا شبراً ) , وإذا كنت حضرتك ضليع في قواعد الرياضيات وحساب الجبنه المثلثات , إحسبلي من فضلك كم عدد المثلثات التي سوف تتبقى في علبة الجبنه ( سوريا ) بعد عملية التحرير ( ورابعه ) ؟!

August 27

كل الأنظمه العربيه ترحب بالعدوان الأمريكي الصهيوني على سوريا ( بعضها يرحب على استحياء ...... كالعذراءِ في خِدْرها ) , و مازال الفرز مستمر ...موسم تساقط البناطيل !!.

August 27

من كام سنه كده قعدت قدام التلفزيون وقدامي كيس لب معتبر وبتابع بشغف وعلى الهواء مباشرة عملية دخول الجنود الأمريكيين إلى بغداد ( بعدها على طول القناه شغلت لنا أغنية الحلم العربي ) , وبعد كام يوم هجيب كيس لب معتبر تاني و أتابع بنفس الشغب دخول الأمريكان إلى دمشق (وبعدها أغنيه الحلم العربي ) , وبعد كام شهر هييجي ( أخ ) عربي تاني يقعد مكاني ويجيب كيس لب معتبر ويتابع بشغف دخول الأمريكان إلى القاهره ( وأغنية الحلم العربي ) , باختصار يا ساده نهاية كل دوله عربيه كبيره بتكلف المواطن العربي كيس لب معتبر وأغنيه !!.

ومن باب التفاؤل والنظر إلى نصف الكوب المليان , ممكن نقول عادي مفهاش حاجه , يجرى إيه يعني لو مصر بقت زي العراق ولقينا أسيادنا الجنود الأمريكان في شوارع المحروسه , ماهو احنا يا بيه جيل محضرشي احتلال , سمعنا كتير عن الإنجليز والفرنساويين وعن جاك وجاكلين وخمارة ميشيل والكامب الأمريكاني , تجربه أكيد هتبقى ثريه , الواحد يتعرّف له على بنت من الجيش الأمريكي وينقل لها أخبارنا العسكريه , أمي طبخت إيه النهارده وما هو تأثير المحشي على الترابط الأسري ؟ وممكن تركب إيه لو حبت تروح من السنبلاوين لسندوب , تجربه حلوه مفيش كلام , أهو الواحد يلاقي حاجه يحكيها لأحفاده بعد عمر طويل , أومال هنبقى نحكي لهم عن إيه ؟ نحكي لهم ثورة يناير وإزاي الإخوان ركبو على ضهرنا 9 مرات متتاليه ( على سهوه ) بسبب النحانيح ؟!.

صباح الخير , يؤلمني جدا أن أرى مجموعه من أصدقائي يعتقدون إلى الأن أن مصر ليست في خطر وسوريا ليست في خطر و أن التهديدات الأمريكيه وتحركاتها على الأرض هي مجرد ( فوتو شوب ) من أجل إلهائنا , سقطت بغداد وكنا نعتقد يومها أن التهديد الأمريكي بضرب العراق لن يحدث , وانقسمت السودان وكنا نعتقد أن الأمر لا يعدو كونه لعبه ( أو مزحه سخيفه ) , صديقي العزيز حامل لواء النضال الفيس بوكي هل تصدق أصلا أنا هناك دوله اسمها أمريكا ودوله اسمها إسرائيل أم أنك تعتقد أنها كيانات وهميه صنعتها لنا أجهزة المخابرات وأمن الدوله لتخويفنا ليس أكثر ؟!!.

August 26

نياهاهاها , وعهد الله مصر دي فيها شوية شباب مثقف ثورجي زي الفل , ممكن يتجمع منهم عشره كده في قاعده ثقافيه حضاريه والطيران الأمريكي بيضرب مصر وطاير من فوقهم والقنبله تيجي في الأوضه اللي جنبهم يقوم واحد منهم يقول للتاني ( لأ متقلقش , ده أكيد شغل أمن دوله عشان يلهونا عن مشروعنا الحضاري التنويري الثقافي الثورجي ) ... ومش هيقومو من مكانهم لحد ماكل واحد يخلص سجارة الحشيش اللي في إديه !!.

August 26

خلاصة الكلام ( الحنينين والمثقفين ورقيقي المشاعر يمتنعون ! )
.
إنسى حضرتك شعارات وأغاني الديموقراطيه دلوأتي , لمدة سنتين تلاته بالكتير , بالمناسبه مصر عاشت 7000 سنه متعرفشي يعني إيه ديموقراطيه , مايجراش حاجه لما يبقو 7002 سنه ! , إحنا دلوأتي في خطر حقيقي , خارجي وداخلي , حاجه لها علاقه بالتراب والدم والتاريخ , عندنا اتنين ديابه والديب اللي جوه البيت ألعن ألف مره من اللي بيعوي بره .
وانسى كمان اللي عمله بشار الأسد , سوريا هي كمان في نفس الخطر وعندها نفس الديابه بتوعنا ( بره وجوه ) , بشار هيموت بعد سنه ولا عشره , لكن سوريا لازم تعيش .
باختصار الفرق بيني وبينك إني بلعب دلوأتي دور الجندي اللي شايل سلاح وواقف خدمه , بدافع عن تراب ووحده بلد وانت بتدافع عن ثوره وديموقراطيه وحريات , مفاهيم جميله أوي لكنها محتاجه يكون فيه بلد أصلا عشان تعرف تطبق مفاهيمك عليها !!.

صباح الخير , أمريكا هتضرب سوريا والإخوان والقرضاوي هيجاهدو على متن البوارج الأمريكيه , مطلوب منا أن لا ( نلحس ) بيادة الجندي المصري , لكن حبذا يا أخي الكريم لو وضعت بيادة الجندي الأمريكي في ( مؤخرتك ) !!

ماده في الدستور الجديد أبقت على محاكمة المدنيين أمام محاكم عسكريه في الجرائم التي لها علاقه بالقوات المسلحه !! , وهتلاقي بقى الزيّاطين بتوع ( خُلقنا لنعترض ) شغالين زي الفل , أنا أعترض وأنا أعترض والأنسه الأموره اللي في الأخر دي هي كمان تعترض , وأخويا مجاش معانا بس بيبلغكو إنه بيعترض وابن عمي في الأردن بيعترض !.
طيب يعني حضرتك عايز تروح تهجم على مبني قيادة الجيس التاني وتتحاكم في محاكمه مدنيه ونقوم لك محامي وتخرج بكفاله لحين إستكمال التحقيقات ؟ طيب عصابه ( مدنيه ) تتهجم على عسكري وتخطف منه المسدس أو البندقيه ونعتبرها جنحه و نعمل محضر صلح و نقول لك رجع اللي انت خدته و حبّ على راس العسكري وصافي يا لبن؟..طيب تبقى مهندس ( مدني ) وتشتغل جاسوس ونحاكمك في المحكمه اللي بيتحاكم فيها حرامي الغسيل , و ييجي مرتضى منصور يطلعك براءه ؟!!.

August 25

أجمل حاجه فيكي يا مصر دلوأتي إن السلفيين نُصهم بيكتب لنا الدستور في القاهره ونُصهم التاني بيقتل الجنود في سينا , يعني بالصلاة على النبي كده واحد هيولّع لك شمعه من أجل أن ينير المستقبل لأولادك وواحد هيولّع لك في أولادك ذات نفسهم ........ ومتنساش يابني تقول دعاء السفر وانت رايح تقتل العساكر الغلابه !!.

وكنتيجه حتميه للحمله اللي شغال فيها النحانيح وبتوع حقوق الإنسان وأبناء البرادعي وحمزاوي وبتوع المصالحه ولا للإكساء إنضم حزب النور للجنه تعديل الدستور , مبسوط يا نحنوح , إنت يابو كرافته يا بتاع الحريات , ابقى قولي بقى إزاي بروح مامتك هتحل الأحزاب اللي قايمه على أساس ديني إذا كانت بتكتب معاك الدستور ؟ ويوم ما تحل الحريه والعداله هيجيلك الإخوان بإسم حزب النور , ونوسه زي إبتسام , هع هع , ونلف في ميتين أم الدايره اللي مش عايزه تتقفل , هنفتح جوامعنا تاني لكل عيل برياله يطلع عالمنبر ويكفّر في ميتين أمي وأمك , ونعم حلال ولا خاطيه وبنت حرام , الكورولا حلال وسكودا ماشيه على حل شعرها , عليا النعمه ما محتاج يتسجن في مصر غير حمزاوي ونحانيحه , إنتو أخركو تربو سوالفكو وتنفخو شفايفكو !!.

هما فعلا نشرو الإسلام .... بس نشروه على حبل الغسيل !! , وبقى اللي ما يشتري يتفرج على إسلامنا و دينا ( ودين أمنا ! ) , وللأمانه محدش كان بيشتري , كله بيتفرج بس ( عَمْ نتفرّج ) , يعني على طريقة خدلك فكره واشتري ( ديانه ) لبكره ! , والنبي ياخوانا ألاقيش حداكو حرامي غسيل يكون ابن حلال زي المعلم محمد رضا كده ؟ و روحه تهفف على حبل الغسيل ده يقوم يطلع يقصه عشان شكلنا قدام العالم , أعتقد عبفتاح السيسي مؤهل جدا للعب دور حرامي الغسيل ابن الحلال , لأ البرادعي مينفعش , هيقولك : إن الطريقه التي تم بها قص حبل الغسيل لا تتفق مع الأعراف والمواثيق الدوليه لكبار حرامية الغسيل في أمريكا وكوبا , و رغم علمي أنه لم يكن هناك حل أخر سوى قص حبل الغسيل لكني أعترض !!

لو حضرتك قريت اللي بتكتبه صفحات الإخوان حاليا عن جيش مصر وتاريخه ( بيسموه جيش سوسن ) وبيشككو في أي انتصار عسكري أو وطنيه في تاريخنا ( وإذا خاصم فجر ) , ساعتها هتعرف ليه أنا بكرههم أوي ومش هتقولي تاني إنت متحامل عليهم , شعور غريب لما بقرا كلامهم أو بتناقش مع حد منهم , شعور بمزيج من اليأس والقرف ( والغثيان ) , بحس إن مصر دي بتساهينا كل يوم بالليل وتطلع تمشي شويه في الحرام وهما دول بقى ولاد ( شطحات الليل ) , باختصار عايز أقول : وجود هذه الجماعه الوثنيه المتخلفه داخل حدود مصر أخطر علينا ألف مره من وجود الصهاينه خارج الحدود , ويا ليت قومي يعلمون !

صباح الخير , بقالنا 3 سنين تقريبا واحنا مش ورانا حاجه بنعملها غير السياسه والثورات , إعتصام وإضراب ومناقشات حاميه حول من الأفضل ؟ وما الأفضل ؟ جدال ساخن في أفضل الطرق لنظام الحكم وأفضل الطرق للإنتخابات البرلمانيه , مين الدول اللي معانا ومين ضدنا , هي الصفقه كانت بين مين ومين ؟ ومين باع لمين ؟ طيب باع بكام ؟ , مجهود مضني على شعب أنهكه الإستعمار والإستبداد , حرقنا ملايين من جزيئات ATP من غير فايده , بتخيل مجرد تخيل إننا عملنا ثورة 25 يناير ومبارك مشي 10 فبراير وربنا بعت لنا يوميها شخصيه مصريه محترمه وقويه وقال لنا بصو الثورات بتستمر سنين وانا هعفيكو من السنين دي , كل أهداف الثوره هحققها بالظبط , كل المطلوب منكو لمدة 3 سنين ( زي الفتره اللي قصيناها دي ) إنكو تبذلو نفس المجهود في العلم والدراسه والفن والأدب والإنتاج , يعني 3 سنين كافيين أوي لتحضير رسالة دكتوراه في الطاقه النوويه ( محاجين 1000 رساله بس ) وفي الهندسه الوراثيه ( 1000 رساله ) , وفي طرق الزراعه الحديثه ( 1000 رساله ) وفي وفي وفي .... ومجموعه مننا هتاخد أراضي في الصحرا من الدوله مباشرة مجانا لزراعتها , رجال الأعمال هياخدو أراضي مجانا لبناء مصانع , الفنانين والشعراء والفلاسفه إتفرغو لإبداعكو وهاتو أجمل ما عندكو , تخيل كان زمان حالنا بقى إزاي دلوأتي ؟ مش كان زمان الأمريكان شغالين جارسونات في مصر والأتراك بنجيبهم عشان يشتغلو في القهاوي البلدي يرصّو لنا المعسل ويهوو عالفحم ؟ السنين اللي فاتت أثبتت لي إننا شعب طاقته الداخليه جباره ( مخيفه ) مفيش شعب يستحمل المجهود اللي بذلناه ده , إنما مجهودنا المخيف كان عامل زي السيل وبدل ما ربنا يبعت لنا واحد يستحدم السيل ده في إنتاج وصناعه وإبداع قام ربنا بعت لنا ناس بتوجه السيل ناحية البيوت عشان تهد مصر , ألا لعنة الله على الإخوان وطنطاوي وعنان !!.

أكبر دليل إن مفيش صفقه بين السيسي والفلول ولا يحزنون هو وجود مرتضى منصور وتوفيق عكاشه في المشهد , ماهو أنا ممكن أقبل منك تقول عالسيسي خاين لكن مش هقبل منك تقول عليه عبيط , وحده العبيط هو من يستعين باتنين مهرجين أمثال توفيق عكاشه ومرتضى منصور , لأنهم بيمثلو أفضل دعايه سلبيه لأي منتج !!.

Top of Form

2

Bottom of Form

ولادي راجعين من السفر بكره , وانا بقالي 3 أسابيع قاعد في الشقه لوحدي , إستخدام عازب يعني , وعازب عازب مش أي كلام , طيب أبدأ النضافه منين ؟ أجيب مين يزيل الأنقاض دي ؟ محتاج كام عامل نضافه ؟ أنا يتهيألي أتصل بالدفاع المدني أفضل !!.

August 24

قضّيت من عمري 20 سنه بحاول أقتع ناس قرايبي في البلد إن زيارة الأضرحه والتبرك والتمسح بها والنذور حرام , حاولت أقنعهم إن لا السيد البدوي هينجّح إبنك ولا أم هاشم هتشفي بنتك , يا ترى إحنا محتاجين وقت ومجهود أد إيه عشان نقنع مليون إخوانجي بأنصارهم وشبابهم وبناتهم إن زيارة مكتب الإرشاد والتبرك والتمسح بهذه العقيده الوثنيه حرام وإن حسن البنا كان مجرد فسل هفأ لا كان هيشفي بنتك ولا كان هينجّح إبنك ولا بينزل عليه الوحي من السما , محتاجين وقت أد إيه عشان نقنعهم إن انتماءك للجماعه بهذا الشكل الفج طغى على وطنيتك وحتى على دينك وكأنه نوع من الشرك والعياذ بالله , محتاجين نقنعهم إن مكتب الإرشاد هو مجرد ضريح ( قبر ) لشقي من أشقياء الله اسمه حسن البنا , وإن كل قرش كنت بتدفعه كاشتراك أو تبرع من قوتك وقوت عيالك كان مجرد نذر بتتقرب به إلى غير الله........... أشعر بالإرهاق !!.

August 24

لو حضرتك بالصدفه بصّيت على شريط الأخبار بتاع الجزيره , هتلاقي 5 أخبار متتاليه في الشريط كلها ل 6 إبريل , منها مثلا ( 6 إبريل تصرح أن الرقيب العسكري هو الذي يسيطر الأن على الإعلام المصري وأن الإعلاميين والنشطاء المناصرين لثورة يناير ممنوعون لحساب إعلاميي الفلول ) ! , طيب أنا معرفشي إن الإبراشي وإبراهيم عيسى ويوسف الحسيني بتوع فلول ولا حضرتك يا سته لا مؤاخذه إبريل تقصدي مين ببتوع ثورة يناير ؟ اكيد تقصدي خميس وابو إسلام و عبد الله بدر !!.

August 24

سيِّدتي الأنثى
لا تبكي
كالطفلِ بكاؤكِ أعياني
.
مهلاً مهلاً
مجتمعُكِ يا عمري
أحمقْ
سيقولُ بأنكِ جاريةٌ
في ظلمكِ شِطْرُ الإيمانِ
.
سيدتي الأنثى
أرجوكِ
من أجلِ الرحمةِ أرجوكِ
تكفيني دولةُ أحزاني !!.
.
.
محمد حسين

طب وعهد الله أنا كنت فاكر إن أسماء محفوظ وأحمد ماهر دول حاجه كده وطنيه قوميه محصلتش , وكان اللي يرشهم بالمايه أرشه بالدم , ومن كام سنه كنت بحترم أوي المعارض المحترم مصطفى بكري و المناضل رجب حميده , وكنت فاكر إن الإخوان دول ناس طيبين أوي وبتوع ربنا يا خال , أه والله , طيب أنا دلوأتي لما أقابل ربنا هقابله بأنهي وش ؟ هقول له إيه ؟ أقول له كنت بنتخب الإخوان وبحب رجب حميده ؟ أنا غبي أنا غبي , وعلى حد علمي الجنه لا يدخلها الأغبياء !!.

وانا كل ماشوف الراجل الطيب ده اللي اسمه عدلي منصور وهو قاعد في الكرسي كده أفتكر الراجل اللي كان في مسرحية ( الواد سيد الشغال ) , اللي صعب على عادل إمام فكان بيروح يجيب له خيار و عدس وزيت من المطبخ , أهو اللي مش عاجبكو ده طلع بيشتغل رئيس مصر في الفتره الصباحيه , يعني راجل فاتح بيت وصنايعي وكسّيب !!.

إذا حصل أي هجوم ( متوقع ) للقوات الأمريكيه على سوريا فبالتأكيد هتبقى دي بداية الحرب العالميه التالته أو الرابعه مش فاكر , مش مهم العدد هو أنا مهندس ديكور .؟! , المهم إن الحرب دي هتطرّتش على مصر جامد , يا سيدي إذا كانت الحرب العالميه الأولى ( ولا التانيه مش فاكر برضه ) كانت بين جيوش من أقصى الغرب وجيوش من أقصى الشرق وكانت طرطشت عندنا في مطروح والعالمين وحتى القاهره , ما بالك بسوريا والباب في الباب , إنما سؤال جه على بالي في علم ( الطرطشه ) , طيب الإخوان والسلفيين موقفهم معروف , هيركبو البوارج الأمريكيه , او هيشتغلو ( سيكات ) عند عساكر المارينز يعملو لهم شاي وقهوه و يجيبولهم خمره ( ونسوان ) عشان يطبقو الشريعه , السؤال هنا , حبايبنا بتوع ال....... هيطرطشو ( مع المطرطشين والسلفيين والإخوان ) ولا هيقفو معانا و يستحملو إن هدومهم تتوسخ شويه , ولا هيستنو ال ...... لما يرجع من بره ؟!.

صباح الخير . هل تعلم أن نهر الأمازون هو أطول أنهار العالم يليه نهر النيل , ولكن يُعتبر نهر النيل هو أطول نهر في العالم على الإطلاق إذا أضفنا إليه روافده أو لسان مرتضى منصور !!.

تصريحات الرئيس الأمريكي مولانا الشيخ أوباما النهارده خطيره جدا , بيقولك : لا يمكن السكوت عما يحدث في سوريا ومصر !! , تفهم حضرتك إيه ؟ ده تصريح عدائي رسمي للنظام السوري والنظام المصري , طيب سيبك من بشار , وخلينا في مصر , أوباما بيعادي النظام والجيش في مصر , سهله خالص أهي , ولسه الخرفان بيهتفو ( يا سيسي يا جبان يا عميل الأمريكان !! ) , ولسه النحانيح بتوع الدكتور بسم الله الرحيم اللهم احفظنا فاكرين إن فيه صفقه عشان كبيرنا قدم استقالته !!( أنا مقلتش إسمه أهو ) , ومن كام يوم قريت خبر ( مش متأكد من صحته ) إن التوتر في العلاقات بين مصر وأمريكا كان متوقع نتيجة دعم أمريكا للإرهابيين في مصر لكن اللي زاد الطين بله في العلاقات إن السيسي رفض يرد على مكالمه لأوباما , إنت عارف يعني إيه وزير دفاع مصري ميردش على مكالمه لرئيس أمريكا ؟ لا والله ماتعرف , وعزة جلال الله ما تعرف , ولا جيلنا الحالي يعرف , لأن دي محصلتش من أيام عبد الناصر تقريبا !! , حدد موقفك يا صاحبي , تقف مع أمريكا ضد ( الأنكلاب ) , ولا تقف مع جيش بلدك حتى لو كانت النتايج مش على هواك أوي ؟!!.

حوار على قناة الجزيره ( بعد بكره ) !!.
.
خبر عاجل : إعتصام ألاف من مؤيدي الشرعيه ورافضي الإنقلاب في الأنتريه بتاع شقة الحاج عبد البر .
.
ومعنا من شقة الحاج عبد البر وتحديدا من منظقة الأنتريه إحدى المعتصمات من أجل الشرعيه , نتعرف بحضرتك ؟
أنا شيماء والسيسي بيحارب الإسلام
.
المذيع : إذا شيماء , صفي لنا ما يحدث عندك , وكم هي أعداد المعتصمين بالتقريب
شيماء : الوضع هنا خطير وحسبي الله ونعم الوكيل والسيسي بيحارب الإسلام , إحنا هنا حوالي 752 ألف و 294 معتصم .
.
خبر عاجل : إعتصام الملايين من رافضي الإنقلاب في الأنتريه بتاع شقة الحاج عبد البر
.
المذيع : شيماء هل بإمكانك تقريب الكاميرا من كرسي الفوتيه بجوار الفازه , فأنا ألمح شئ غريب يا سيدتي
شيماء : حاضر , حسبنا الله ونعم الوكيل والسيسي بيحارب الإسلام , حضرتك ده قطع في كرسي الفوتيه لأن الشرطه والجيش والبلطجيه حاولو إنهم يرمو علينا سكاكين حاده من شباك المطبخ , ولما حاولنا نتفادى السكينه جت في الكرسي زي ماحضرتك شايف كده .
.
خبر عاجل : البلطجيه والشرطه يلقون بالسكاكين والقنابل والصواريخ على كرسي الفوتيه بتاع شقة الحاج عبد البر وشهود عيان يؤكدون استشهاد 9465 من المعتصمين الرافضين للإنقلاب .
.
المذيع : شيماء , ما أخبار المستشفى الميداني لديكم في أنتريه شقة الحاج عبد البر ؟ وهل الأدوات الطبيه والمعدات كافيه لكل هذه المليارات من المعتصمين , وأين توجد المستشفى الميداني تحديدا ؟ وما هي الخطوه القادمه لكم خصوصا بعد ما تأكدنا وتأكد العالم بأسره ( إن السيسي بيحارب الإسلام ) ؟!!.

August 23

كل أحلامنا البريئه
تنتهي فوق الصليب
مصلوبين من يوم ماجينا
وامّا كان الدور علينا
قالو برضه مش مسيح
.
اللي كان في الحكم ظالم
واللي جوه الحكم ظالم
واللي ييجي بعده ظالم
دولة الظلم المريح
.
كنت بحلم
نبقى زي الناس بشر
إحنا ليه أنصاف بشر ؟
إحنا واحد مش صحيح
.
.
محمد حسين

August 22

التشكيل الجديد للمجلس القومي لحقوق الإنسان حاجه تشرح القلب , فيه أسماء محترمه , على الأقل تعرف يعني إيه حقوق ؟ ويعني إيه إنسان ؟! ياخرابي على التشكيل اللي فات , دي كانت سنه سوده الله لا يرجعها , كان المجلس بيضم في عضويته نادر بكار وصفوت حجازي وتقريبا عاصم عبد الماجد وأسامه بن لادن الله يرحمه , ولو كان عندهم كرسيين باقيين كانو اختارو ريا وسكينه !!.

August 22

بكره الناشطات هينزلو عرايا للميادين اعتراضا على خروج مبارك , وحركة 6 لامؤاخذه إبريل قررت إنها تلغي التظاهره الإحتجاجيه خوفا من اعتداء ( ولا مؤاخذه برضه ) أنصار الإخوان عليها ! , يعني 6 أبريل خايفه من اعتداء الإخوان ؟ انت عايز تفهمني إن 6 إبريل خايفه من إعتداء الإخوان ؟ يا بيه الكلام ده عيب , وعهد الله عيب , ده لو حصل يبقى اسمه ( *** محارم ) .
عموما , أتوقع إن الإقبال على الديموقراطيه وحقوق الشهداء في تظاهرات الغد هيبقى تايخي يافندم , وعلى رأي إسلام بيومي صاحبي : متنزلشي الميدان بلافتات وشعارات , فقط خد فوطته وصابونتك وبشكيرك و انت نازل.
يعني بكره هيبقى فيه بنات عريانين و محارم وبشكير ونحانيح وإخوان وسلفيين , مممممممم يبقى نسميه جمعة ( المليطه .......... والشريعه ).

Top of Form

5L

Bottom of Form

August 22

إرهاصات في ثورات الربيع ( ولا مؤاخذه ) العربي
.
في أدب الهجاء يقول الرواي : استمر الهجاء الشعري بين جرير والفرزدق لأكثر من 50 سنه , يكتب جرير قصديته الهجائيه في الفرزدق فيرد الفرذق بمثلها أو أحسن منها , 50 سنه يا مؤمن واتنين شعراء كبار موراهمشي شغله ولا مشغله إلا إنهم يلعنو سلسفيل بعض , إنما الليله دي خلّفت لنا مجموعه كبيره من القصائد البديعه تعمل لها بتاع 19 كيلو كده , ويقول ابن خلدون في مقدمته ( إن جرير أخر ما زهق من الفرزذق واتخنق من أمه , قام رامي له حتة حشيش في العربيه وبلّغ عنه الشرطه ) !! .

August 22

بكره هيبقى يوم مختلف , وانا قررت إني مش هنفعل بكره , بالعكس هستمتع أوي , هتفرج عالجزيره واضحك , و هتفرج عالميادين واضحك , هستمتع حد ( الثماله ) , كيس لب وسوداني كبير وعلبتين سجاير والطفايه وإزازة ماية ساقعه مشبره ودوس يا معلم , كده تبقى تمام أوي و اتعشت , هشوفك بقى وانت نازل ترجّع ثورة يناير وثورة 30 يونيو ويا ريتك تجيب لنا ثورة 19 في إيديك وانت راجع أصلها عزيزه على جدي وجدتي أوي , لما أشوفك بتتقتل يا صديقي هيبقى عندي مشكله كبيره أوي , إن قشر اللب بهدلني وحواليه في كل مكان , وانا مكسل أقوم أجمعه وارميه , ......... للأسف للأسف بعد نزولك دلوأتي وفي الظروف دي هقدر أقول بنفس راضيه مطمئنه , إحنا متسرقتشي مننا ثورة يناير ولا حاجه , لا خالص , داحنا اتعمل علينا حفله بسلطاتها وبابا غنوجها و ولاد الحرام كانو بيتأجّرونا بالساعه ويركبو !!.

الغريبه إنك لو كنت سألت أي واحد من اللي نازلين بكره من سنه كده عن حق الشهدا وثورة يناير كان هيضحك ضحكه رقيعه متقطعه على شاكلة ( هع هع هع ) ويقولك ( ياعم حق الشهدا إيه ؟ ضحكه رقيعه تانيه ( هع هع هع ) , الشهدا خلاص دمهم ضاع على إيد الإخوان وطنطاوي والقضايا متستفه من غير ولا دليل والمحاكمه كلها مسرحيه عشان الناس تهدا )
ولو النهارده مسكت إيد نفس الشخص وسألته إنت نازل بكره ليه ؟ هيقولك ( عشان حق الشهدا وثورة يناير ... وإوعى إيدك كده ملخت الكُم !! ).

وقالك يا سيدي هننزل عشان ثورة يناير أصل مبارك مخدشي إعدام في عهد عدلي منصور والسيسي , هع هع ده على أساس إنه اتعدم 19 مره قبل كده في عهد مرسي وطنطاوي , واحنا اللي قصرنا في المره ال 20 ؟! مالناش حق والله , إحنا قلبنا قاسي أوي , إنزل يا ميدو , إنزل عشان دم الشهدا الي راح هضر في قضية هدايا الأهرام !! . وانزل عشان مصر محتاجاك , يالله بسرعه إلبس لبس الثوره والوطنيه هتلاقي المقاس مظبوط ومتسألنيش......... هي مصر عرفت مقاسك إزاي ؟!

صباح الخير , أصحابي الليبراليين والثورجيه اللي بيفكرو ينزلو بكره التحرير أو رابعه أو النهضه أو عند كشك عم عبده اللي عالناصيه عشان مبارك خاد إخلاء سبيل في قضية الفازتين والصابونه البريحه بتوع الأهرام عايز أقول لهم : نزولك هيرهق الجيش والشرطه والبلد , و الإخوان هيهربو من السجون تاني ويرجعو للحكم , بس المره دي هتكون ال **** شامي ومغربي يا جميل , فيا ريت تكون عامل حسابك ومأمن نفسك قبل ماتنزل ... وحاول تستمتع باللحظه الرومانسيه دي , أنا عن نفسي هتفرج عليك وأشجعك عشان بعشق متابعة ( البورنو السياسي ) !!.
أه نسيت حاجه , يا ريت تحذفني قبل ما تنزل ( ورجّعلي الجوابات ) , عشان أبويا قبل مايموت كان محلفني إني ماصحبشي حد زي محمد محسوب وعلاء صادق وسلمى حايك .

تفتكر
.
تفتكر نومك على
مفرش حرير
هيكبّركْ ؟
.
تفتكر هي الفلوس
هتساوي ناس
بتقدّركْ ؟
.
تفتكر عود الفقير
مممكن عشانك
ينكسر ؟
.
........ ما أحْمركْ !!.
.
محمد حسين

August 21

أتمنى من النيابه العامه المصريه إنها تخلّي التحقيق مع قيادات الإخوان مذاع على الفضائيات , عايز شباب الإخوان يقعدو كده في بيوتهم , كل واحد مع مراته وعياله يتفرجو , ويعرفو هما باتو في الميدان شهرين عشان خاطر مين ؟ كفّرو خواتهم في نفس البيت وقاطعو أهاليهم عشان خاطر مين ؟ قرايبهم اتقتلو عشان خاطر مين ؟! هما دول ؟! أه والله هما دول , يسمعوهم وهما كل واحد فيهم بيرمي التهمه عالتاني , يسمعوهم وهما بيتبرأو من أي كلام سخنّوا بيه الشباب في رابعه ودفعهم للقتل وبينكرو كل حاجه عملوها , يسمعوهم وهما بيلعنو جدود بعض في التحقيقات , كمان نفسي جدا أبص في عين القيادي الإخوانجي وأشوف ذل الحيره في عنيه وهو بيبص للكاميرا ومحتار يقول نفس خطابه التحريضي بتاع رابعه عشان يهيّج الشباب ولا يبرأ نفسه قدام النيابه ؟ ............. ياااااااااااه , يارب ده يحصل .

أي هري من أصدقائنا النشطاء ولا مؤاخذه عن موضوع براءة مبارك ده بيصب في مصلحة أم الجماعه الزفت الإرهابيه , عندنا شوية عقول بسم الله ما شاء الله تكفي لحرق روما بغباءها , واحتمال كبير ينزلو بقى عشان مبارك خد براءه وكداهون , انزل يا برنس واهتف مع أسماء محفوظ ( يسكت يسكت حكم العسكر ) , إنما لو مش عايز تنزل يعني بس عايز حد يطمنك ويفهمك مع إنك فاهم والله بس بتنكر , تعالى وانا أوشوشك في ودانك , كلام في سرك كده ( مبارك خد براءه من أيام مرسي في قتل المتظاهرين , والقضيه كلها مسرحيه فسكانه بين طنطاوي وبديع , وأمن الدوله فرم أم الأدله يعني مش مشكلة زفت قضاء , ومبارك النهارده كان بيتحاكم في هدايا الأهرام اللي هما فازتين وقلم جاف وصابونه بريحه عليها صورة بت عريانه , لو صعبانين عليك أوي الحاجات دي اعتبرهم عندي , أنا هدفع تمنهم لمصر ( اللي هي أمك ) , اقعد بقى في جنب ومتحملشي السيسي حمل زياده بغباءك وارحم أمي العيانه .
أه نسيت حاجه مهمه , ( مبارك براءه والإخوان في السجن والبرادعي في النمسا ...كده هنبدأ من الأول !! ) نياهاهاها مش قادر يا ناس هموت م الضحك !! , معلش أصلي اكتشفت إننا الوحيد في الفيس بوك اللي مكتبتش الألشه دي !!.

عايز أنسحب من عالفيس بوك بشويش , أرتاح شويه , بس بهدوء من غير ماحد ياخد باله , سكتم بكتم يعني , الوضع في مصر صعب وعالفيس أصعب , واحنا كل واحد بقى شايل سكينه للتاني ( أنا شايل كذَلْك صغير ) , الله يخرب بيتك يا برادعي , ما كنا متوحدين حتى لو على باطل , أديني بدعي عليك واكره اللي يقول أمين ( ليه خلتني أحبك ؟) , يا ريت كل أصدقائي محدش يبقى زعلان مني , بعتذر للجميع أو ( لمن تبقّى منهم !! ) , كنت عايز أقول لكو بس كلمتين في بوست الوداع المؤقت ده , الكلمتين بين قوسين أهم , افتح قوس : ثورة 30 يونيو مالهاش علاقه بثورة يناير , 30 يونيو قامت عشان تنقذ مصر من حكم الجماعه المحظوره بس , فبلاش تحط أبو قرش على أبو قرشين , واحد هيقولي وهو فيه ثوارات بتقوم لسبب وهدف صغير كده ؟ أقول له أه عشان ده مش هدف صغير ( لو كانو يعلمون ) ...إقفل القوس بقى , من أد ساعه كده كنت بكلم صديق عالشات ولقيت لغته وكلامه وأسلوبه متغير تماما لدرجة إني حسيت إن حسابه اتسرق وسألته أسئله كتير عشان أتأكد إنه هو , وبعدين إتأكدت , هو إيه بيحصل ؟ الناس مالها كده ؟ , أنا همشي , هنسحب ولو رجعتلكو ببوست بعد 3 دقايق يا ريت محدش يتريأ عليا ويقولي إنت رجعت في كلامك , مانا واحد زيكو مرتبك مش أكتر , وصدقني لو قدرت أبعد 3 دقايق وارتاح فيهم من التفكير هكون عملت إنجاز شخص عظيم

من حق أنصار البرادعي إنهم يدافعو عن وجة نظره , ويشوفوه ماشي صح و بيتصرف صح , ويتهجمو عالجيش أحيانا ويقولو صفقات , كل ده مش مهم , إنما بجد والله اللي وجعني أوي منهم , اللي ضربني في مقتل يعني وعملّلي جرح هنا ( في الحته دي ) , اللي احبطني اخر حاجه هي إنهم بدأو يكتبو تعليقاتهم عندي عباره عن بوستات بياخدوها من صفحاتهم الكبيره ويعملوها كوبي وبست , الموضوع ده بيفكرني بمين ؟ بمين ياربي ؟ بمين يا واد يا محمد .......... مش فاكر !!.

مفيش قائد ثوره بيقعد في الصفوف الخلفيه مع القواعد والمخلفين , أو يزعل و ( يتقمص ) فيقوم داخل أوضته و يقفل الباب عليه و يقعد عالسرير يعيط ويتشحتف و يحضن العرايس والدباديب بتاعته , عبد الناصر وجيفارا مكانوش بيخافو الموت , إنت ليه خايف على عمرك يا برادعي رغم إنك عشته تالت ومتلت واحنا مش خايفين على عمرنا اللي لسه معشنهوش ؟!... مين أولى يبقى قائد الثوره دي ؟ إنت ولا عماد و مينا و جيكا ؟!.

سؤال خارج المقرر ( للساده : ألتراس برادعاوي )
.
هفترض جدلا إن البرادعي ( حبيبي السابق ) استقال مش عشان طريقة فض الإعتصام لأ هو استقال لأنه حس بمؤامره كونيه رهيبه على مصر بيقودها جيشنا ابن الحرام وفلول مبارك وعصابة اللهو الخفي زي ما بتقولو , كويس كده ؟ مبسوطين مني ؟ أه يا سيدي , فيه مؤامره بتعصف بثورة يناير وثورة 30 يونيو ولو تحب ثورة 19 والثوره الفرنسيه والبولشفيه كمان , ماشي يا مولانا , وقبل كده البرادعي انسحب من انتخابات الرئاسه عشان حس إنها مهزله ومؤامره تانيه ......... تمام كده ؟ السؤال بقى , هو البرادعي مبيطلعشي في كل مره يقول فيه مؤامره ليه ويقول لنا إيه هي المؤامره بالظبط ومين أطرافها عشان الناس تنتبه ويبرأ نفسه ؟ هتقولي الجيش هدده بالقتل وإنه هيحط السيخ المحمي في صرصور ودنه لو نطق , هقولك اللي عندي بقى وسامحني ... سالي ومينا وكرستي وجيكا كانو عارفين إنهم ممكن يتقتلو ومع ذلك مخافوش , دول كانو عيال 20 سنه يعني الدنيا قدامهم ومفرحوش بيها ومع ذلك مخافوش , أبو 78 سنه خايف على عمره ليه ؟! وإزاي يبقى قائد لثوره ويخاف رغم إن الشباب اللي في الثوره مخافشي ؟!.

أي حد في مصر بيتسجن لما مراته بتروح تزوره في السجن بتقول له ( شد حيلك يا سبعي ..السجن للرجاله ) , إلا صفوت حجازي لما مراته هتروح تزوره هتقول له ( متنساش تاخد الحبايه ) !!.

صباح الخير , صورة صفوت حجازي بالنيو لوك الجديد بعد ما حلق دقنه ولبس النقاب بتقول لكل شاب إخوانجي فوق , فوووووووووووووق , اللي قالك هنحارب وهنجاهد وهنقاتل وهنزلزل الزنازين والدم بالدم و مين هيتسحر عند ربنا النهارده والجيش خاين وكافر , اللي سخنك إنك تقتل أو دفعك إنك تتقتل , اللي قال مرسي خليفة المسلمين ودولتنا عاصمتها القدس , أهو زي مانت شايف كده ( بالنقاب ) والحمد لله إنه ( بوست مينوبوزال ) وإلا كانت هتبقى المشكله أكبر , قياداتك وقت الجد بيبقو حاجه أخر رجوله أهي , حاجه في منتهى الدكرنه , قبل منه عملها كبيركم فاسألوهم إن كانو يسترجلون , أعظم حاجه عملها عبد الناصر إنه منعكو من دخول الجيش , جيش مصر الباسل مفهوش نسوان , خالي من النسوان , نسوان فري , بننتصر بشرف وننهزم برجوله , تخيل كده جندي مصري بيحارب وحس إنه ممكن يتقتل فقام مطلّع نقاب من جيبه ولبسه عشان يهرب ؟!!.

August 20

الخطوه الجايه بإذن الله في سياسات أمريكا الخارجيه هي ( الشلّوت ) المعتبر لعذبة قطر , بعد ما بقت كارت محروق ومفضوح , ولسان حال الخواجه الأمريكي بيقول لأمير قطر ( خبيبي إنت مش ينفع خلاص , إنت فينيتو ) , وموزه بقى تركع على رجليها قدام سيدها الأمريكاني وتقول له ( طيب إدي له فرصه تانيه , أرجوك , إبني لسه مفرحشي بالكرسي , بليز.... بليز ) , كل ده هيحصل وشباب الإخوان لسه فاكر لحد النهارده إن قطر اللي هي كلب أمريكا اللي هي حليفة إسرائيل كانت هتحرر لهم القدس وتنشر الإسلام !!.

August 20

الإمارات هتبني جامع لكل جندي شهيد في قريته , والسعوديه فتحت خزنتها لمصر وقالت لها عبّي و شيلي , الإتنين وقفو جنبنا قدام الكلب القطري في أوروبا وأمريكا ودفعو الإتحاد الأوروبي و الأمريكان لتغيير موقفهم ناحية مصر , من الحكمه أنك تحترم وقفتهم دي , ولو فيه أي خلاف تأجله , لو الإمارات والسعوديه كان ليهم مصلحه في كده فهي إنهم خايفين يقعو بعد مصر , لو مصر وقعت هيبقى الدور عليهم , طيب ده عيب ؟ يعني عيب إن ناس بيقولوك إنت عمود الخيمه اللي باقي لنا وبيسندوك ؟ يا ريت أصدقائي الأعزاء ينزلو من برجهم العاجي شويه ويقولو شكرا بدل من التجريح , قول شكرا , و لو مش شايف إنهم يستاهلو قولها عشان بلدك تستاهل إنك تشكر اللي بيقف جنبها .

قال عماد
لحسين ومينا
كنت غايب
طمّنوني يا أحبّه
ع الحبايب
قالو فاتك نُص عمرك
يابن عمي
اللي باع
في الثوره دمك
واللي خان
في الحكم دمي
مجموعين
صُحبه ف زكايب !!.
.
محمد حسين

محصلشي كل اللي قالو عليه , نزّلو عليهم سيدنا جبريل وتلتين الملايكه تقريبا بحسب أحلامهم , وتلت الأنبيا اعتصمو معاهم في رابعه , وقالو مرسي راجع قبل العيد , وصفوت حجازي كان عايز نُص المعتصمين يتسحر عند ربنا في رمضان , وست ام شوشو جارتنا قال شافت رؤيا إن مرسي بيقود جيوش المسلمين , عم مرعي شاف سيدنا رسول الله بيملس على قبة البرلمان اللي اتحل , ........ الحقيقه لازم نفتح الكادر شويتين لعقولنا , بجد والله , مش البانجو والحشيش هما اللي بيدمرو العقول المصريه , سجائر و حناتير العقيده الإخوانجيه أخطر على عقول الشباب , يا ترى لسه فيه بينا مدمنين للإخوان بعد كل الكدب والتجاره بدين ربنا اللي حصل ؟!.

صباح الخير , وبعد ما ربنا يتم جميله علينا هيبقى قدامنا مجهود كبير أوي لازم نبذله عشانها , عشان خاطرها , ساعتها لازم الشعب المصري يتقسم لفريقين عشان إعادة الإعمار , فريق صغير أوي مهمته إعادة إعمار مصر بعد خراب سنين , وفريق كبير أوي مهمته إعادة إعمار عقول الإخوان !!.

مكالمه عالشات من شخص مصري وطني عاشق لتراب بلده خلتني أعيط 10 دقايق ( هو ميعرفشي إني بعيط ) ... وبعدها على طول خبر القبض على الكلب الصهيوني .... يا فرج الله , يامانت كريم يارب ...شكل ربنا فرجها علينا بدم العساكر الغلابه اللي اتقتلت , تقربنا بدمهم ليك يا رب , فداك يا كريم , تم جميلك علينا .

August 19

مدرس العربي بتاعنا في أولى ثانوي كان إخوان ( رسمي ) و كان في لحظات التجلّي بتاعته بيتكلم في حاجتين مفيش غيرهم , أولا رأي جناب معاليه إن الشعراوي مبيفهمشي أي حاجه في الدنيا وثانيا إن مصر منتصرتش في حرب 73 , أه والله ده حصل , وخلاصة الكلام يعني إن اللي شايف الشعراوي جاهل في الدين ( عشان كان رافض فكر الإخوان ) , وشاف إننا منتصرناش في 73 ( عشان بيكره السادات ) وسجد لله شكراً في 67 ( عشان بيكره عبد الناصر ) مستحيل تعمل معاه مصالحه وطنيه ومستحيل تقدر تغيّر عقليته وتفكيره ( عقيدته ) , ......... أستاذ محمود السعدني ( مدرس العربي ) هو نموذج مثالي ( ideal ) للعقليه الإخوانجيه المتعفنه المنوط بها تعليم النشأ !! .

مش حقيقي إن أكبر كارثتين مرت بيهم مصر في القرن العشرين هما العدوان الثلاثي ونكسة 67 , كوارث الأوطان بتتحدد بحجم الخساره فيها والفاتوره المدفوعه ( البشريه و السياسيه والإقتصاديه والأجتماعيه ) , وبالفتره الزمنيه المطلوبه للتعافي من الكارثه , ورأيي الشخصي إن أكبر كارثه مرت بيها مصر في القرن العشرين هي تكوين الجماعه الإرهابيه المحظوره , شوف حجم الدمار اللي عملته في مصر على مدار عمرها و شوف المده الزمنيه المطلوبه للتعافي من كارثة ( مكتب الإرشاد ) .
أغلب ظني إن رقم الحظ السعيد عند الصهاينه هو الرقم ( 28 ) مش ( 67 ) !!.

على فكره أنا مش صغير وعارف كويس أوي إن موقفي من البرادعي حاليا هيخسرني أصدقاء كتير كنت حريص على صداقتهم دايما , أصول اللعبه في الفيس بوك إنك تفضل نحنوح تضرب هنا مره وهنا مره يقوم يحبك اللي هنا واللي هناك دي كمان أنا فاهمها , إنما بحاول أتحمل مسئوليتي قدام نفسي و قدام البلد دي , قناعتي الشخصيه بتقول ( في الحرب لا تشتكي من ألم الأسنان ) , وانت سيادتك لازم تحدد إحنا في حرب ولا في عيادة دكتور سنان ؟! , بالمناسبه هقول لحضراتكو حاجه شخصيه , أنا بخاف جدا من منظر الدم ( حتى لو دم فرخه ) , وبخاف جدا من منظر السكينه في إيد أمي أو مراتي ( حتى لو واقفه في المطبخ بتعمل سلطه ) , لكن مش بالضروه أقعد أتعاطف مع كل واحد حتى لو مات في حادثة موتوسيكل لأن الحاله العامه أكبر من كده , مش مهم تصدقني , إنما المهم لو حاسين إني متحامل على البرادعي أو الإخوان هقول لكو باختصار إني شايف اللي هيحصل بكره بصوره معينه وخايف منه ( خدو عيني شوفو بيها ) , الثبات على المواقف لا يعني إني أفضل أحب البرادعي و أثق في قدراته العقليه والسياسيه مدى الحياه ( شيك على بياض ) , الموقف الوحيد اللي انا ثابت عليه هو حب أم البلد دي .

أكبر دليل إن نظام الإخوان لسه مسقطشي بالكامل هو إن محمد حسان لسه بيدافع عن الإخوان هو وعلاء صادق ... أوّل ما تلاقي الأتنين دول بالذات بيقولو قصايد مدح في الجيش إعرف إن مركب الإخوان فينيتو !!

يا الله يا الله , أكشن ( ألف ) مره , 24 عسكري غلبان استشهدو في سينا على إيد الجماعه الإرهابيه اللي بتعتصم سلميا !! , العساكر في سينا أنا عارفهم بيبقو غلابه أوي جايين من أعماق الريف والصعيد , وتبقى حيوان فعلا لو قارنت بين ال 37 سجين إرهابي اللي اتقتلو وهما بيحاولو يهربو إمبارح وبين قتل 24 جندي غلبان مالهمشي في الطور ولا الطحين وكل مشكلتهم في الحياه وكل ذنبهم إنهم بيحمو حدودك وأرضك وعرضك !!.

صباح الخير , سؤال خارج المنهج والمقرر , في ثورة يناير مات أكتر من 2000 , وفي مظاهرات الجماعه المحظوره بعد 30 يونيو مات 400 , إحسب لي عدد الإخوان اللي ماتو في ثورة يناير وقارنهم بالعدد 400 وانت تعرف هل يموت شباب الإخوان من أجل الوطن والحق والعدل أم من أجل الجماعه , أتحداك أن تجد 10 أسماء من 2000 ماتو في ثورة يناير ينتمون للجماعه المحظوره , لماذا يقبل هؤلاء الأن أن يموتو بالمئات ومن أجل ماذا ؟ فارق كبير جدا بين أن تضحي بحياتك من أجل الحق والعدل والوطن وبين أن تضحي بحياتك من أجل الجماعه والجماعه والجماعه !!.
سؤال رقم اتنين : هل خرجت علينا زوجة عماد عفت أو خطيبة مينا دانيال أو والد سالي أو والدة جيكا وطالبو بالتدخل الأجنبي في مصر وفرض عقوبات و تدمير الجيش المصري ؟.......... هل طالبت والدة خالد سعيد ( ضحية بلطجة الشرطه بامتياز ) هل طالبت أنصار خالد سعيد وأصدقائه والثوار بحرق أقسام الشرطه ؟!!.

August 18

علاء عبدالفتاح هو نموذج لليساري اللي عايش بمبدأ ( خُلقنا لنعترض ) , هو بالظبط النموذج اللي قدمته داليا البحيري في فيلم السفاره في العماره , ......... باختصار يعني تقدر تقول : علاء بيحب جيفارا وبلال فضل بيحب ماركس !!.

وإيه اللي حصل في بين الإخوان والجيش في المنيا يا عبده ؟ مفيش يا باشا , مطاردات و ناس ماتت من هنا وناس ماتت من هنا وكان فيه تبادل لإطلاق النار ,........... إيه؟, يعني تقصد إن الإخوان مسلحين يا عبده ؟ لا والله يا باشا , الشهاده لله الناس دي أعرفهم من زمان دول ناس بتوع ربنا وعمرهم ماشالو سلاح !!
................ من مذكرات عبده نحنوح

في البدايه يكفّرونك ثم يرفعون في وجهك السلاح ثم يهددون بحرق بيتك إن لم تكن معهم ثم تتعاطف أنت معهم !!........ حقاً إنكَ لنْ تضعَ قدمكَ في ماية البطيخ مرتين !!.

أحمدك يا ربنا , أخيرا شوفت السلام الوطني بيتعزف تاني بعد خطاب سياسي في مصر , دانا كنت خايف لا يقوم واحد من ظباط الجيش والشرطه اللي قاعدين أثناء عزف السلام ويصرخ ( السلام الوطني حرام ... حرام يا كفره ... هتخشو النار كلكو !! ) , والحمد لله كمان إن مفيش حد من الظباط اللي حاضرين رفع علم تنظيم القاعده وقعد يشاور بيه للكاميرا بتاعة الجزيره !!.

August 18

خطاب حلو , عاطفي شويه بس جميل , كويس يا سيسي إنك مستخدمتش لغه عسكريه مجعلصه , الخلاصه في الخطاب إن الإخوان كانو عايزين يحكمو مصر 500 سنه أو يحرقوها , والأزهر على دماغنا من فوق ومش كل من هب ودب يتكلم في الدين , احنا مدّينا للإخوان إيد المصالحه أكتر من مره ورفضو و لسه الإيد ممدوده لو عايزين يبنو , أما لو بيفكرو يهدو يبقى هنمد لهم الإيد ولا مؤاخذه التانيه !!
.
, بس إنا زعلان منك يا مولانا , كان المفروض بعد ما تشكر السعوديه والإمارت إنك برضه ( تشكر ) ل...قطر !!.

هههههههههههه السيسي بيقولك إحنا لو استمر الحال على ماهو عليه فاحنا هنبقى داخلين على حرب أهليه !! ... يا جدع إنت إيش فهمك إنت ؟ إنت حيالله وزير دفاع وكنت قائد جهاز المخابرات !! , الحاجات اللي زي دي تسأل عنها المتخصصين أمثال بلال فضل وأصدقائي النحانيح , لا يا سيسي إحنا مش رايحين على حرب أهليه , متقولشي كده ... إحنا رايحين على مارينا !!.

مش هما بس اللي عندهم خرفان , إحنا كمان بالعشره الطويله معاهم إكتشفنا إن فينا ناس كتير أول ما جاتلهم الفرصه يقولو ماااااء قالوها , نطقوها بكل فصاحه وبيان , يعني إنت كنت خروف وكاتم في قلبك الفتره الطويله دي ؟ أه يا ضنايا يابني , الماااااء الليبراليه وقعها جديد على الأذن بس هنتعود عليها , خرفان 6 إبريل , خرفان البرادعي , خرفان ألتراس أهلاوي .... أهلا بكم في الزريبه ............ في إنتظار البان من أصدقائي الليبراليين الخرفان !!.

حاول تفكر بهدوء .... بهدوووووووووووء , الحكايه بسيطه خالص , الإخوان وقت الإنتخابات الرئاسيه اللي فاتت كانت معركتهم مع أحمد شفيق ( فلول ) فلعبو على الحته دي وخوفوك من عودة حكم الفلول , خاف ياض من الفلول ( إوعى الفلول تعضك ! ) , ولما بقت معركتهم مع الجيش بقو يخوفوك من عودة حكم الجيش ( العسكر ) , خاف ياض من الجيش ( إوعى الجيش يعضك ) ,وفي كل مره كان بيستجيب لهم الأستاذ بلال فضل ومعه لفيف من كبار النحانيح ........... وسبحان الله يا جدع , كلهم نسيو إن الإخوان تحالفو مع الفلول ضد ثوار يناير ( حتى اسألو مصطفى بكري ) , وتحالفو مع العسكر ضد ثوار يناير ( حتى اسألو طنطاوي ) .

وفي المقابل تلاقي صديقك النحنوح قاعد زعلان يا ولده , وحاطط إيده على خده , وعمال يتشحتف ويتعاطف مع الإخوان ومع أي حد معدّي من قدامه ضد الجيش , تقوم انت تطبطب على كتفه وتحاول تهديه وتقول له ( والله كلنا ضد الدم وربنا ما يكتبها على حد بس اللي حصل حصل وخلاص ) , وبعدين تسأله هو الحل إيه دلوأتي ؟ تحب نرجّع لك حكم الإخوان يقولك ( لأ ..الإخوان دول لعنه بس أنا خايف يرجع حكم العسكر تاني ) , طيب نجيب لك السلفيين يحكمو مصر يقولك ( لأ دول ألعن وأضل سبيل ... بس أنا خايف يرجع حكم العسكر تاني ) , طيب عندك حد في الساحه حاسس إنه يقدر يحكم مصر حاليا وانا أقوم أجيبهولك فورا ؟ يقولك ( للأسف لأ , كلهم خرعين ومينفعوش...بس أنا خايف يرجع حكم العسكر تاني ) !!.
في الحظه دي تدخل مراته عليكو وانتو قاعدين وتسأله ( حبيبي تشرب شاي ؟ ) ...يرد ويقول لها ( لأ بس انا خايف يرجع حكم العسكر تاني !! )
.
........................ تباً ثم تباً وألف تب لرجلٍ يضيّع حياته في المفاضله بين ال ( لا ) وال ( معرفشي ) !!.

يحدث أن أحد الكائنات الحيه الشهيره ( من أكلي الأعشاب ) يقبل راضيا مطمئنا بدعم تركيا لموقف فصيلته ( لانه يعتقد ان تركيا دوله إسلاميه سوف تقود العالم إلى حلم الخلافه الإسلاميه !!........... مع إن البنات في تركيا ب 12 دولار من أول ما تنزل من المطار ) , وأن نفس الكائن يقبل بالدعم الأمريكي ( لان أمريكا ترعى حقوق الإنسان في العالم ....... مع إن ضحايا التعذيب الامريكي في العراق وجونتانامو أكتر من عدد سكان قطر ) , ويقبل بالدعم الطالباني ..........لأن طالبان رائدة صناعة السلام في العالم !!

بلال فضل و يسري فوده ماشيين في سكة البرادعي ( سكة اللي يروح ميرجعش ) ...... وبيتعاطفو مع الإخوان !! , عملوها قبل كده أيام جولة الإعاده في انتخابات الرئاسه ووقفو مع مرسي وبعدها خادو بالجزمه على دماغهم من الإخوان ...........متستغربشي فيه ناس كده , بيقولك يا سيدي كان فيه مره راجل أحول عنده حمامه حوله , والراجل الأحول حب إنه يحط الحمامه الحوله في القفص فحطها بره القفص ( لأنه أحول ) , وبعدين الحمامه الحوله طارت فدخلت جوه القفص لأنها حوله !!.

عدلي منصور ( مين عدلي منصور ده ؟ ) , الإسم ده مش غريب عليه , شاكله كده ناشط سياسي أو عندي في قائمة الأصدقاء بس مش بيعمل لايكات كتير , المهم إن صديقي عدلي منصور كاتب على تويتر إن مندوب مصر في الأمم المتحده هيوقع بكره على اتفاقيه تعترف بمذبحة الأرمن التي قام بها الأترك وراح ضحيتها أكثر من مليون قتيل !! أيوه كده يا وديع كنت فين من زمان ؟.............أه أيوه افتكرتك , إنت رئيس مصر , بجد والله ....الله يفتح عليك , هي دي الردود اللي توجع تركيا بجد مش تقولي السيد البدوي هيوقف عرض المسلسلات التركيه !!.
التوقيع على اتفاقيه بهذا الشكل أصعب على الكلب التركي ألف مره من سحب السفير .

August 17

يا ترى الإخوان هيعملو ( الحسينيه ) وطقوسهم الكربلائيه بتاعة الليله دي فين ؟ .... أكيد شيماء بتاعة الجزيره تعرف , أيها الساده ابحثو عن شيماء , فعندما قال الفرنسيون ( شيرشيه لا فامّ ) كانو يقصدو شيماء بتاعة الجزيره على فكره !!.

ماهو إديني عقلك , بقى انت توافق وترحب بموقف أمريكا ( بتاعة أبو غريب وجوانتانامو ) وطالبان بتاعة ( الإرهاب والحشيش والبانجو ) , فرحان أوي إنهم بيدعمو الإخوان والشرعيه وبيدينو لا مؤاخذه العنف !! , ومش عايزني أوافق وأرحب بموقف السعوديه بتاعة ( الكعبه و الرسول ) لما تساند للجيش المصري !! .............. إنت إيه يا جدع إنت ؟ فاكر نفسك شيماء بتاعة الجزيره ؟!!.

هره بكره في جامع النور يا رجاله , كلكو معزومين للمتابعه وحبس الأنفاس , وبعده في جامع أبو بكر الصديق , والتلات في جامع خاتم المرسلين والأربع جامع المحافظه في المنصوره , ولما تعرف إن مصر فيها 200 ألف مئذنه مثلا والإخوان ممكن كل يوم يبعتو 200 منهم يعتصمو في جامع شكل يبقى قدامنا 500 سنه على هذا الوضع , حسبه بسيطه خالص , ونأمن لهم بقى الخروج الأمن , والجزيره تصور وشيماء تتكلم , ....................... وأمريكا تشجب وتستنكر هي وحركة طالبان , إنما البرادعي سياسي محنّك مفيش كلام !!.

طيب قولي بالله عليك , إزاي تقدر تقنعني بإننا في مصر مجتمع ييحارب و يحرّم و يجرّم تجارة الأعضاء البشريه مع إن أغلبنا مستعد يبيع ( مخه ) بتلاته تعريفه , حتى اسألو النشطاء والنحانيح والمصريين اللي شغالين في الجزيره , ليه بقى بتعتقد إنت إن بيع الكبد والكلى والعين حرام وبيع المخ حلال ؟!!.

طيب أحكي لكو بقى عن أيمن عزام ( مذيع قناة الجزيره الحيزبون )
.
وانا في الكليه كان أيمن عزام شغال مذيع في القناه السادسه بتاعة طنطا , وكانت بتغظي محافظات الدلتا بامتياز , يعني أسعار الخضار في سوق ستوته , أسعار المواشي في سوق أبو شقوق , واحده ولدت من المحله يبعتولها تهنئه وهكذا , وفي يوم ربنا فتح عليهم في القناه ونضفو شويه فالقناه بعتت أيمن عزام عشان يغطي مؤتمر طبي كانت عاملاه الكليه بتاعتنا ( صيدلة المنصوره ) , المؤتمر كان كبير وحاضر علماء كتير من صيدله وطب ( كان عن السموم على ما اذكر) , أغلب اللي قاعدين في القاعه عشان يسمعو المحُاضر كانو أساتذة جامعه ( علماء يعني ) وشوية طلبه صغيرين قاعدين ورا خالص وانا منهم , المهم بقى المحاضر قعد يشرح وبدأ يسخن والأساتذه يسألوه ويستفسرو كأنهم طلبه ( جو علمي حلو ) , وصاحبنا أيمن عزام اختار واحد من الموظفين بتوع شئون الطلبه وراسه وألف جزمه يعمل معاه حوار داخل القاعه والمؤتمر شغال , وبينه وبين المحاضر 3 متر , طبعا صوتهم شوّش على اللي بيشرح , قام الدكتور المحاضر وقال له لو سمحت إحنا هنا في مؤتمر علمي والمفروض إن حضرتك تستنانا بره القاعه لحد ما نخلص ونبقى نقول لك عملنا إيه في المؤتمر , كمان صوتكو مشوّش عليا ومش مخليني عارف أشرح , صاحبنا أيمن عزام المذيع أبو رياله قال للدكتور ( إنت مش عارف إنت بتكلم مين ؟ إحنا الإعلام .............إلخ ) , بعدها جه الحرس وانطرد أيمن عزام من القاعه !!.
الخلاصه " أيمن عزام هو مذيع تافه برياله اشترته الجزيره بتلاته تعريفه , والله كتير عليه تلاته تعريفه !!

الإخوان اللي معتصمين في جامع الفتح والإخوان اللي في بيوتهم أكتر خبر على الإطلاق هيفرحهم وأكتر خبر مستنينه هو الخبر ده ........ قناة الجزيره : خبر عاجل , مجلس الأمن وحلف الناتو يقرران بإجماع الأعضاء توجيه ضربه عسكريه للجيش المصري , خبر عاجل : بدء تحرك قطع بحريه من الأسطول الأمريكي في البحر المتوسط قبالة السواحل المصريه , خبر عاجل الطيران الفرنسي يشن غارات على الجيش التاني الميداني بالقرب من قناة السويس ..............................أي حيوان ابن حيوان هيقولي لأ مش مستني الأخبار دي ومش هفرح بيها هحط صوابعي في عنيه ... كده خلص الكلام !!.

طيب يا خوانا , أستأذنكو بقى عشان ألحق خطبة السبت في جامع الفتح اللي في رمسيس وأصلي صلاة السبت جماعه , إن في خطبة السبت لبركه !!

في المقابل
جالنا واحد مش بيعرف
يعني إيه كلمة رئيس ؟
واللي زاد الطينه بِّله
إنه كان خاين خسيس
والغلابه اللي في صفه
قال يهدّو الكون عشانه
قامو ماتو
خدتو إيه إنتو بكلامه
ولّا حتى من سكاته ؟
يابني راح موتك فطيس
.
اللي قابلينا قالولنا
لو هويت اعشق قمر
وان نويت الموت فموت
شرط تبقى انت العريس !!
.
.
محمد حسين

أنا هقوم أصلي الفجر وأنام بقى , والنبي تاخدو بالكو من شيماء بتاعة الجزيره وانا نايم , محدش يزعلها عشان خاطري , تصبحي على خير يا شوشو !!.

هههههههههههههه الناس طلعت من الجامع زي الفل ..وشيماء يا كبد أمها عماله تلف بكاميرة الجزيره يمين ولا شمال مش لاقيه ولا جثه , طيب هنعمل إيه في الورطه دي ؟ إنت يا حاج والنبي اعمل نفسك ميت , أرجوك بيتي هيتخرب .............. أحبيبتي يا شيماء , سيبك إنتي , والله إنتي اللي في الإعتصام ده ...دانا بدأت أتعلّق بيكي .

أنا عمري ما بثق في الإعلام المصري المضلل ولا الصحافه المصريه العميله , إنما بثق جدا في قناة الجزيره والإعلام الإسرائيلي , إسرائيل بالذات كانت من أوائل الناس اللي نزلت معانا التحرير يوم 25 يناير ومش ممكن أنسى أبدا دورها و دعمها للجيش المصري في حرب 73 !!.

سيناريو جميل أهو
.
http://www.al-mowaten.com/news/10963

http://www.al-mowaten.com/news/10963

www.al-mowaten.com

Top of Form

Bottom of Form

زمان لما كانت مصر تبقى في أزمه كانو بيغنّولها ( يا مصر قومي ... وشدّي الحيل ) , إنما في السنتين اللي فاتو وبعد ما شوفنا كم العقول وال ( بيبي ) اللي في البلد لازم نغنيّلها ( يا مصر قومي .... وشدّي السيفون !! ).

August 16

النحانيح والنشطاء السياسيين يدافعون عن الإخوان تحت شعار ( نحن بنات عائلات محترمه ) , أه و النعمه , ما هي الكيميا طول عمرها كده , غدّاره !!.

لو حصلت حرب الأيام دي بين مصر وإسرائيل ( الله لا يقدر ) , هيبقى فيه 3 جبهات على الساحه , جبهة مصر ودي وراها السعوديه والإمارات وسوريا وأغلب الدول العربيه , وجبهة إسرائيل ودي وراها أمريكا وقطر والجماعه المحظوره , والجبهه التالته دي جبهة البرادعي , ودي وراها حاجات كتير لسه هتطبخ لابو العيال وتروّق البيت واحتمال تروح عند الكوافير تسشور شعرها وتعمل تاتو على كتفها !!.

عندما رأيت أعلام تنظيم القاعده ترفرف في سماء ميدان رمسيس ( قلب القاهره ) أدركت أن الإرهاب دخل مصر , والنبي يا عم سالم إديني ربع جبنه رومي و اديني بالباقي قنابل ومتفجرات وطلقات خرطوش , لأ سجاير إيه يا راجل يا طيب ؟ , ربنا يحفظنا , أنا مبدخنشي بفضل الله !!.

مظاهرات الإخوان النهارده أظن الكل شافها وعلى عينك يا تاجر , اللي ما يشتري يتفرج , تحت شعار ( سلميه سالم سليم سويلم سلومه ............ والشريعه ) !! , كلمني شويه عن الإسلام يا سالم ؟ احكي لي عن تحية الإسلام يا سويلم ؟ ما رأي الدين في ترويع المواطنين بالسلاح يا سلميه ؟ ما رأي سيدي وسيدك رسول الله في حرق الكنايس يا سلومه ؟ رأيك إيه في تدمير الأوطان يا شريعه ؟!!.

عارف إنت لو ربنا كملها بالستر من عنده ( يارب ما يبقى فيه دم ) ونجحت ثورة 30 يونيو في تحقيق أهدافها , هي مش بس هتغير شكل المنطقه العربيه لا , التغيير هيوصل لحد أمريكا , مش فتونه ولا بالدراع ولا حاجه , إنما كل حاجه بالعقل , إوعى تكون فاهم إن اوباما مش متورط لشوشته ورطه ما يعلم بيها إلا ربنا , هبسطهالك , قولي إنت إزاي اوباما هيقنع الشعب الأمريكي بعد كده إن الإخوان والقاعده وحماس تنظيمات إرهابيه ممنوع وجودها على الأراضي الأمريكيه وفي نفس الوقت يقنع نفس الشعب بإن امريكا لازم تساعد التنظيمات دي في حكم دول تانيه زي مصر وتونس وتدافع عنها وتقول عليها تنظيمات شرعيه سلميه ؟ , قواعد اللعبه هتتغير بس انت قول يارب !!.

توفيق عكاشه بيقول هناك مطالب بترشيح السيسي رئيس وأنا نائب له بس أمريكا بتعترض !! ههههههههههههههههههه يا عم مش عايز أضحك بقى حرام عليك , الله يخليك متضحكنيش , البلد في حالة حداد ومينفعشي أضحك ....بص , إبقى تعالى بعد الليله دي ماتخلص وقول الكلام بتاعك ده ونضحك سوا .

Top of Form

Bottom of Form

يا مصر أكتب إيه ؟
جبل الهموم راسخ
حتى الكلام الحلو
لعنيكي بقى ماسخ !!
.
.
محمد حسين

صباح الخير , هو تقريبا البرادعي لما شاف إن ابو الفتوح انضم تاني للإخوان رسمي وساب الكرسي اللي في النُص ده , البرادعي لمح بطرف عنيه إن الكرسي اللي في النص فاضي قام طلع جري عشان يقعد عليه !!.
خلاصه السنتين اللي فاتو دول : مصر مفهاش سياسيين ولا محنكين ولا وطنيين ولا يحزنون , مصر فيها شوية عيال بيلعبو الكراسي الموسيقيه !!.

بص يا عم الحاج عشان انت خنقت اهلي بصورة البرادعي اللي انت حاططها دي , البرادعي ده كان نائب الرئيس , يعني تقدر تقول إنه بيمثل تلت مؤسسة الرئاسه , وبما إن رئيسنا هو رئيس مؤقت ومش معروف دوليا زي صاحبك يبقى البرادعي بيمثل التلتين مش التلت , واستقالة أفندينا بتعني إن مؤسسة الرئاسه متضامنه مع الإخوان في مطالبهم وشكواهم , هي هتتفسر كده ومالهاش تفسير غير كده قدام العالم , ده بقى هيشجع كل من هب ودب إنه يحط رجله في مصر , وتصدق بالله مفيش اوسخ من استقالة البرادعي غير طلبه للوساطه القطريه , كل اللي هيحصل في الفتره الجايه يتحمل مسئوليته السيد الدكتور النحنوح الحاصل على جايزة نوبل , والمفروض إنه بخبرته الطويله يعرف إن 200 أو 300 واحد اتقتلو في الإخوان مش رقم ولا حاجه جنب اللي هيحصل في الفتره الجايه , يقى هو ده بقى البوب كبيرنا السياسي المحنك اللي عنده خبره 60 سنه ؟ ده لو كان في ال 60 سنه دول بدأ حياته عجلاتي كان زمانه اخترع لنا دلوأتي طيارات نفاثه !!.

محدش مات من الجيش والشرطه الإسبوع اللي فات , ولو ماتو يبقى في ستين داهيه , والإخوان مش معاهم سلاح ولا عمرهم كان معاهم سلاح , دول ناس بتوع ربنا , ولو إنت فاكر إن الإخوان وانصارهم بيخططو لحرق مصر الأيام دي تبقى مش فاهم , دول طالعين على الصحرا قالو هنزرعها فاكهه وخضار ونعمرها , أيوه زي ما بقول لك كده , وطول عمرهم لا قتلو حد ولا بيقتلو حد , طول عمرهم بيعمرو الصحرا , ................ ممممممممممممممممممم حاجه تقرف والله , بجد والله حاجه تقرف , أوسخ نتيجه لثورات الربيع العربي إننا عرفنا إن فيه بشر عايشين وسطينا بالشكل ده , ما كنا مش عارفين وكنا مرتاحين ومبسوطين ومفكرين نفسنا هنكسر الدنيا بعقولنا الجباره بقى , ده الطفل المصري ده مفيش أذكى منه , والشاب المصري عبقري أخر حاجه , أه والله أخر حاجه

أمريكا قالت للبابا شنوده ( نيجي نحميكو ) ؟ قال لها ( سعيكم مشكور ) , قالت للبابا تواضروس ( ننزل نحمي لكو الكنايس اللي بتتحرق دي ؟ ) , قال لها ( الكنايس فدا مصر ) !!.......... الله يخرب بيوتكو يا مسيحيين يا خونه , ربنا ينتقم منكو قادر يا كريم ويخلي لنا الإخوان الفصيل الوطني أخر 9 حاجات اللي عمره ما طالب بتدخل اجنبي ولا حرب على جيش مصر ولا سجد شكراً لله لما جيش مصر انهزم !!.

August 15

اللي ماتو في 73 وفي التحرير كانو بيدافعو عن استقلال وطن وحريته ( شهداء الوطن ) , واللي ماتو في حروب المسملين وغزواتهم ضد الكفار كانو بيدافعو عن دين وعقيده ( شهداء الدين ) , واللي مات وهو بيدافع عن مراته وبنته وأخته كان بيدافع عن شرف وعرض إمرأه ( شهداء الشرف ) , .......... اللي ماتو إمبارح كانو بيدافعو عن جماعه الإخوان ( لا عن دين ولا عن وطن ولا عن شرف ) وأنا أول مره أسمع بقى عن حكاية شهداء الجماعه دي !! , مقريتهاش في أي كتاب الصراحه , يعني انا دلوأتي لو حصلت عاركه لرب السما بين حزب الدستور والتيار الشعبي وانا اتقتلت فيها أبقى شهيد حزب الدستور ؟ , يعني قصدك تقولي إن فيه مكان في الجنه مخصص لشهداء حزب الدستور ؟!!

هحكي لكو حكايه صغيره خالص , كان فيه ناس غلابه في قريه صغيره فقيره , اتجمعو مع بعض وقالو عايزين نبني جامع , المهم لمو الفلوس من بعض وبالعافيه كملو 10 ألاف جنيه , وفي يوم من الأيام مرّ على القريه دي فاعل خير ( غريب مش من القريه ), راجل كُباره كده ولابس أبيض في أبيض , قال لهم أنا سمعت إنكو عايزين تبنو جامع , قالو له أه , طيب جمّعتو كام لحد دلوأتي ؟ , قالو له 10 ألاف , قال لهم ده مبلغ صغير أوي , عموما خدو مني انا كمان 10 ألاف أهم وكملو بقى وهمر عليكو بعد إسبوعين , الناس بعدها اتشجعت واتحمست ولمت فلوس تاني لحد ما وصلو المبلغ 50 ألف , الراجل فاعل الخير مر بعد اسبوعين فعلا وقال لهم جمعتو كام ؟ قالو له 50 ألف , قال لهم لأ المبلغ ده صغير برضه , إنتو كده مش هتعرفو تبنو الجامع , هاتو ال 50 ألف وانا متبرع ببناء الجامع ده من الألف للياء , الناس الغلابه إدته الفلوس والراجل الكباره فاعل الخير فص ملح وداب !!.
الخلاصه , متسلمشي عقلك لحد حتى لو قالك هبني لك جامع , حتى لو كان شيخ الجامع , حتى لو كان نبي , يا أخي ربنا اللي خلق الخلق خلق لك عقلك عشان تفكر بيه وخلقك مُخير ومأجبركشي إنك تسلم عقلك للخالق من غير ما تفكر .
نصيحه تانيه كمان , أبوس إيد اللي خلفوكو , لو عايز تطلع زكاتك أو تتصدق بصدقه بلاش تديها لجمعية رساله ولا أي جمعيه ولا تديها لمشايخ الإخوان , عشان أديك عرفت أهو فلوسك وصدقتك ممكن تروح فين وتعمل بيها إيه ؟, الغلابه والفقرا ماليين الشوارع , إديها لفقير في إيده لو سمحت .

Top of Form

3Like ·

Bottom of Form

في كل دول العالم فيه اتنين بس بيشيلو سلاح , رجل الجيش ورجل الشرطه , ولما واحد فيهم يستخدم سلاحه بطريقه مفرطه بيتحاسب ويتحاكم ومفيش مانع أبدا إنه يتعدم , قولي بقى حضرتك إيه رأيك في مشهد مواطن شايل مدفع رشاش وبيضرب نار على رجل شرطه أو جيش ؟ لأ ركز معايا ... بقولك واحد عادي زينا , محاسب مثلا أو صيدلي او عاطل عن العمل شايل سلاح وبيضرب نار على رجل امن ؟! ... دي اسمها إيه ؟

صباح الخير , الله يرحم اللي ماتو كلهم , سواء كانو من أنصار الإخوان , أو شرطه وجيش , إنما تعالى أفكرك بحاجه , يوم إعلان نتيجة الرئاسه الإخوان هددو رسمي وعلني بحرق مصر لو مكانشي مرسي اللي ناجح , ولو كنا صبرنا على مرسي 3 سنين وفي أي انتخابات رئاسيه جايه كانو هيحرقو مصر برضه لو مكانشي مرشحهم هو اللي ناجح , عايز أقولك باختصار إن التعامل بتاع إمبارح مع الإخوان ده كان يوم مقدر ومكتوب على جبين مصر , كان ممكن يحصل من سنه أو يحصل بعد 3 سنين , كان لازم هيحصل , كان شر لابد منه , عملية كوي مؤلمه لبلد مجروحه عشان دمها يبطّل ينزف , إبقو اسألو الأول مين اللي جرحها ؟! ومين اللي من يوم ما شفناه وهو بيزوّد جرحها ؟!!.

وصفوت حجازي بقاله شهرين بيتكلم على منصة رابعه ويقول للمعتصمين ( مين عايز يتسحر عند ربنا النهارده ؟ مين نفسه يكون من الشهداء , مين بيحلم بحور العين ؟ ) , وأول ما بدأو فض الإعتصام ساب الميدان و الشهداء وحور العين وخلع !! ...في أفلام عادل إمام كان امير الجماعه يقول للشاب قبل ما يعمل عمليه تفجيريه ( ألف مبروك يا بني ..إنت هتبقى من الشهداء ........ والشهداء لهم الجنه ) وكان عادل إمام يقول له ( وانت يا شيخ مش عايز تبقى من الشهداء وتدخل الجنه ؟! ) , الكلام ده طلع حقيقي أهو !!.

بالمناسبه , ولحد ما البرادعي يطلع ينفي خبر إنه طلب الوساطه القطريه لحل الأزمه في مصر عايز أقول تنويه بسيط : قطر توسطت قبل كده لحل الأزمه في السودان وبعدها اتقسمت السودان لشمال وجنوب , وقطر توسطت في فلسطين ما بين فتح وحماس وبعدها حماس خدت حته من فلسطين وقالت دي بتاعتي , حاجه أخيره عايز أقولها : محدش يزايد على حبي للبرادعي بس انا مش خروف لحد ........أي حد , حتى لو كان قديس أو ولي من أولياء الله الصالحين !!.

August 14

قتل للظباط والعساكر في كرداسه والقاهره والمحافظات على إيد أنصار الإعتصام السلمي , الأرقام مكتوبه في كل محافظه والأسماء حتى مكتوبه , فيهم اللي اتمثل بجثته كمان , افتكرت جمله شهيره لمحمد بديع ( نحن مسالمون وجامعو حسنات لا أصوات ) .......... كويس اوي لحد كده , أصلي شفت ظابط واخدله 3 حسنات في الرأس والصدر والبطن من مسدس ( حسنات ) 8 مللي !!.

اللي يضحكك بقى في الليله السوده دي , إن الجزيره بتقول في خبر استقالة البرادعي ( ويُذكر أن الدكتور محمد البرادعي الحاصل على جائزة نوبل للسلام قد .... ) ! , والله وجه اليوم اللي الجزيره تصيّتك فيه يا بوب , زمان عبد الناصر قال ( إذا رأيتم أمريكا راضيه عني فاعلمو أني أسير في الطريق الخطأ ) , ودلوأتي اللي الجزيره راضيه عنه يبقى أكيد سافل وواطي .... سافل وواطي و طري !!.

القتلى 2500 زي ما بتقول الجزيره , بس الجيش خاد الجثث وحرقها زي ما بيقول الإخوان !! , ده لو جيش أبرهه أو هتلر مكانشي يبقى بالفجور ده يا ولاد الكدابه , عموما أهي الجزيره موجوده في الميدان ولها كاميرات في كل مكان ... وصورت كل حاجه ياريت تجيبولنا فيديو بس لإطلاق النار على 50 متظاهر ( 50 بس ) وانا أصدق إن اللي ماتو 2500 !!.

يا ريت البرادعي لو مستقالشي يطلع يقول كده ولا يصدر بيان ولا يكتب على تويتر ولا أي حاجه بدل تضارب التصريحات ده ... هو مش هيغلب ...بس في كل الأحوال استقال أو لأ فانا قلت من يومين إن السنين اللي جايه مش بتاعة البرادعي عشان معندوش خبره في التعامل مع شبكات الدعاره .

يجب طرد سفراء قطر واسرائيل وأمريكا وتركيا فورا وكل الدول التي ترعى الإرهاب على أراضينا , إحنا في معركة مصير يا سيسي , نكون أو لا نكون .

الجيش مكانشي مضطر يفض اعتصام رابعه و يقض اعتصام النهضه , كان المفروض يبدأ الاول بفض اعتصام قناة الجزيره في قطر , و يقبض على الأنجاس عملاء الصهاينه موزه وابنها والبغل الكبير .

August 13

أغرب عقليه ممكن تقابلها في حياتك هي دي , تسأله هو فيه إرهاب في مصر ؟ .. يقولك أه طبعا , تسأله والإرهابيين دول هيحرقو البلد عشان خاطر مرسي ؟... يقولك أكيد , تسأله ومعندهمشي مانع يعملو حرب أهليه ويدخلونا في حرب مع إسرائيل وأمريكا ؟ .... يقولك ده شئ مفروغ منه , تقوم تسأله بقى طيب تحب نجيب مين يشتغل محافظ ؟ ............. يرد عليك ويقولك : أنا أرشّح فاروق جويده !!.........صح والله يا عم الحاج , يسلم عقلك يا سيد المعلمين .... ولو أن إبليسّ رأكَ لقبّل إيديه وش وضهر على النعمه اللي هو فيها !!.

البرادعي ... و.... الببلاوي , الناس دي عاصرت ثورة 19 وفضلو عايشين تحت الإحتلال الإنجليزي يجي 70 سنه على بال ما قامو وقالو نقاوم الإحتلال بقى , مستكترين عليهم 6 شهور عشان يفضّو إعتصام رابعه ؟! , يا سيدي ده جيل مختلف , جيل اتربي عالفطير المشلتت والرحرحه , مالوش هو في التيك أوي والديلفري اللي بيجيب لك البيتزا سخنه , طيب تخيل كده لو كان فيه ديلفري في مصر أيام ما كان ( الببلاوي أفندي ) في التوجيهيه ؟ أولا كان لازم الببلاوي يتصل من دوار العمده ( يضرب ترانك ) للمأمور في المركز , والمأمور بدوره يكلف عسكري إنه يروح فرع بيتزا هت , وهناك العسكري يكتشف إنه معرفشي إيه نوع البيتزا المطلوبه فيرجع للمأمور تاني , المأمور يتصل بالعمده , يقوم العمده يبعت غفير لحد بيت الببلاوي , يلاقي الببلاوي مريّح شويه على السرير ويستناه لما يصحى بعد 3 أيام وهكذا , مش بقولك الإحتلال الأنجليزي فضل في مصر يجي قرن من الزمن !!.

وبعد ما الإخوان بتوع رابعه علّقو علم مصر بالمقلوب كحركة إستجداء واستدعاء لل( دكر ) الغربي على جيش مصر ( ماهو احنا في موسم تكاثر الضفادع حاليا ) , وبعد ما كتير منهم شال علم تنظيم القاعده واعتبر إن ده علمه الرسمي اللي بيفخر بيه ...... مين بقى اللي بيقول لا لإقصاء الإخوان ؟! يا سيدي ما هما كده يبقو مقصيّين لوحدهم , مقصيّين من نفسهم , مقصيّين بإرادتهم أهو .... مقصييييييييييييييييييييييييين ومحدش يفهمني غلط !!

Top of Form

5

Bottom of Form

هما ليه البنات اللي شغالين في بيوت الدعاره لما بوليس الاداب بيعمل كبسه عليهم مش بيحطو حاجه على جسمهم بسرعه ويعملو إنهم بيصلّو جماعه ... زي ما الإخوان بيعملو بعد قطع الطرق ودخول الأسلحه ومحاولة إقتحام المناطق العسكريه ؟! ........... , بيوت الدعاره أكثر شرفا من ميدان رابعه العدويه الأن , على الأقل اللي موجودين فيها مش بتوصل بيهم الوقاحه للمتاجره بدين ربنا عشان يهربو من العقوبه والمسئوليه .

الجزيره جايبه اعتصام رابعه ( كالعاده ) , وفاتحه الكادر ( عالبحري ) , وعهد الله المعتصمين حاليا ما يزيدو عن 750 راس ولا مؤاخذه , فيه إيه يا سيسي ؟ ما تبعتلهم 14 عسكري من بتوع السريه رقم 5620 اللي في الكتيبه رقم 1275 اللي في اللواء رقم 370 اللي في الفرقه ال 18 ويلمو العيال دول ويروحوهم بيوتهم بقى , خلي الناس تشوف شغلها وعجلة الإنتاج تتحرك , أه وعهد الله عجلة الإنتاج !!.

August 12

إمبارح اتفرجت على صلاة الفجر في رابعه , دعاء طويل عريض وبكاء ونحيب , المشهد باختصار هو مشهد ( كربلائي جنائزي ) من الدرجه الأولى , مين قال إن التشيع مكانشي هيدخل مصر على إيد الإخوان ؟ عموما أتمنى فض الإعتصام بأسرع وقت ممكن , أعتقد بعد اللي شفته في صلاة الفجر إن المعتصمين هناك باقي لهم يومين تلاته بالكتير ويلطمو الخدود ويشقو الجيوب ويشرّحو وشّهم وراسهم بالموس حزنا وكمداً على الشهيد الحي أو الشهيد الطائر ............ بتاع البنزيمه والإستزراع الزراعي !!.

صباح الخير , الإسلام هو إنك تعمل كل الموبقات اللي في الدنيا ولو الدوله حبت تعاقبك على الموبقات دي أو تمنعك تقوم إنت تعمل نفسك بتصلي !
والوطنيه هي إنك تروح عند السفاره الإسرائيليه للتنديد باختراق الطيران الإسرائيلي للأجواء المصريه وتهتف ساعتها بسقوط حكم العسكر ( اللي هو جيش بلدك ) !.
............... أهلا بك في الزريبه , مبروك يا أخ على انضمامك إلى شعب الزريبه الإخوانجيه , شعب وطني بدرجه وسخه , شعب متدين بتيييييييييييييييييت أم طبعه !!.

وعندنا في بلدنا يا بيه لما مسلم بيكتب شعارات طائفيه مسيئه على كنيسه يبقى عادي , لكن لو مسيحي فكّر بس مجرد تفكير إنه يكتب كلمه واحده على جامع بنفشخه ونقتله ونسحله ونمثّل بجثته وأخر النهار بتيجي الست المذيعه توقّف واحد مسلم جنب واحد مسيحي وتقول لهم امسكو إيد بعض وابتسمو للكاميرا , وحده وطنيه بقى !! .............. كان معكم محدثكم من أمام النصب التذكاري للإسلام السني الوسطي المتسامح وقبر المسلم المجهول !!.

الوضع في مصر الأن : قليلون حول الوطن , كثيرون حول ( غرزة الحشيش ) ............ المجد للنحانيح بتوع ( لا للإقصاء ... والديب لو عاملناه كويس هيبقى شخص مختلف تماما وممكن نعلمه العزف على الكمان ...... أقول كمان ؟!! ).

August 11

طيب خلاص , أنا موافق عالمصالحه , وعلى رأي ناديه مصطفى ( الصلح خير ...قوم نتصالح ) , وزياده في الإحتياط يعني إحنا نعمل سلسله بشريه نبهر بيها العالم كله , كل 3 ليبراليين وثوار يقف بعدهم واحد إخوانجي أو نحنوح في السلسله , ونمسك إيد بعض ونبتسم للكاميرا وكل واحد معلق حوالين رقبته ( طوق لا مؤاخذه ياسمين ) , سلسله بشريه طويله جدا تبدأ أول حلقاتها من مصر وتنتهي أخر حلقاتها عند أبواب الجحيم !!.

المحترم دكتور محمد البرادعي أسف جدا , السنوات القادمه ليست لك فأنت لا تجيد وليس لديك خبره كافيه في التعامل مع شبكات الدعاره !!.

حكاية قطر والجزيره .... اللهم قد بلّغت !!.
.
قطر عندها أكبر قاعده أمريكيه في الشرق الأوسط , محميه بأمريكا حمايه كامله , ومن أد عشره خمستاشر سنه أوحى ربهم ( الأمريكي ) إليهم أن اعملو قناه فضائيه تكون مهمتها تفتيت وتدمير الوطن العربي , الإعلام في العصر الحديث يمثل 50 % على الأقل من أي معركه , قطر أشرفت بنفسها على تقسيم السودان برعايه أمريكيه إسرائيليه , قطر أوحت إلى حركة حماس أن لكم حق في هذه السلطه حتى لو كان التمن تقسيم فلسطين , وفي الغزو الأمريكي للعراق سقطت بغداد إعلاميا ( إسألو الجزيره ) قبل أن تسقط بسهوله في يد الصديق الأمريكي , قطر تغذّي الأن الحرب الأهليه في سوريا , ................ باختصار : لولا الدعم والغطاء الأمريكي لقطر كان زمان السيسي بعت للجزيره جوز عساكر وشاويش جابو ضٌلفها , وكنا هنشوفها بتنفجر على الهواء مباشرة ........... أفيقو يرحمكم الله قبل أن تصبح مصر الضحيه رقم 5 في قائمة السفاح القطري الأمريكي الصهيوني .

صباح الخير , واحد بقف من أبو دقن طالع على قناة الجزيره أم بيبي دول وبيشتم في الجيش المصري والسيسي ( قائد الإنكلاب ) , الواحد ده هو اسم النبي حارسك وصاينك , عقبال ماتشوف ولادك يارب يبقى المستشار القانوني لحزب البناء والتنميه , س : هو فيه حزب اسمه البناء والتنميه ؟ أه ... ده بتاع عبود الزمر ولا طارق الزمر ولا عاصم عبد الماجد صح ؟ طيب س : والحزب ده محتاج مستشار قانوني ليه ؟ دول أخر معرفتهم بالقانون ( والحقوق ) إن إكرام القتيل دفنه !.
بس لذيذ أوي الإنقلاب العسكري اللي سايب بقف زي ده يتكلم ويشتم في الجيش المصري على سرير الغواني ( الجزيره ) , إنت بيس أوي يا سي سي , بيس وسو كيوت , إنت أرق من تامر حسني ونيللي و محمد محسوب !!.

الفلاحين في نعيم !!
.
أنا أول ما عملت حساب عالفيس بوك ( طبعا مش انا اللي عملته ) , المهم بقيت أسيب الحساب بتاعي مفتوح والكمبيوتر شغال , ليه بقى ؟ قولتلي ليه ... عشان البوستات بتاعتي تبقى باينه للناس و أصدقائي يعرفو يقروها , إيموشن واحد بيشاور بصباعه السبابه على راسه كدليل على المفهوميه والألمعيه , ماهو اللي عمل لي الحساب مفهمنيش إن الناس هتقرا بوستاتي حتى لو خرجت من الصفحه بشرط إن الكمبيوتر يكون شغال !! ..... تصبحو على خير بقى .

شيوخ الإخوان ( اللي بعضهم في الأزهر ) بيطالبو بتكوين جيش مصري موازي ....... لمواجهة جيش مصر !! , الله بسامحك يا عبد الناصر , إنت منعت الإخوان من دخول الجيش لأسباب تتعلق بالوطنيه والإنتماء ونسيت تمنعهم من دخول الازهر لنفس الأسباب !!.
الساده النحانيح بتوع ( الإخوان فصيل وطني ) والمصالحه الوطنيه , بعد سعي الإخوان لتحويل ميليشياتها لجيش لمحاربة الجيش المصري عايز أوجه لكو رساله ............ ممممممممممممممممم : إتفو , ملعون أبوكو ولاد كلب !!.
أنا من سنه واحده بس كنت بقول ( نعم للبرادعي ) , دلوأتي لازم أقول ( نعمين للسيسي )

August 10

الإعتصام بتاع رابعه العدويه ده جه فرصه ممتازه إننا نجمع المخلوقات الفضائيه في مكان واحد ( الكبسوله الأم ) , ونشوف وندرس عاداتهم وتقاليدهم و سلوكهم و طريقتهم في الأكل والكلام والتكاثر ونشاطهم ال ( سايكو سوماتيك ) , أنا واحد من الناس كنت فاكرهم بيتنفسو من الخياشيم وبيتكاثرو بالإنقسام الميتوزي زي الأمييا , خلّونا نستمتع بمشاهدة الفيلم ده على الطبيعه , وفي النهايه كعادة أفلام الخيال العلمي البطل بينتصر !!.

الصبح كنت بتفرج على قناة الحياه سينما , بشوف فيلم مطب صناعي ...وأعلنو في شريط أخبار القناه إن الفيلم اللي بعده هو ( مرجان أحمد مرجان ) , وبعد ما خلص مطب صناعي جابو اللوجو بتاع القناه وثبّتوه ييجي 10 دقايق قلت أكيد بيدورو على شريط الفيلم ومش لاقيينه , وفي الأخر جابو فيلم ( جواز بقرار جمهوري ..مش مرجان ) , قلت مش مشكله اتلخبطو ... عادي يعني , الغريب بقى إن الساعه في مصر كانت 10 ونص الصبح ولقيتهم قطعو الفيلم عشان يجيبو أدان الضهر ( أو العصر مش فاكر ! ). , أنا قمت وقفلت التلفزيون وقلت ألحق نفسي وانام قبل ما ينقلو شعائر الحج والوقوف بعرفه أو يجيبو خطاب على الهواء مباشرة للسادات !!

ومن فضل ربنا علينا هنا في السعوديه إن الحكومه قافله كل المواقع والقنوات الإباحيه والجنسيه , إلا موقع جنسي واحد مقدرتشي عليه تقريبا , هكتب لكو الأدريس بتاعه وربنا يسامحني بقى على نشر الرذيله دي www.aljazera.net !!

الجزيره كاتبه أول خبر في شريط الأخبار بتاعها على مدار يومين ( مصادر غير رسميه إسرائيليه تقول أن الطائره التي ضربت الإرهابيين في رفح هي طائره إسرائيليه ) !! , وكلمة مصادر غير رسميه بتفتح الباب أوي لكل الإحتمالات , يعني ممكن يكون مصدر الخبر هو غفير على جراج في تل أبيب , أو الكوافيره بتاعة مرات عسكري إسرائيلي , أو عم كوهين الحلاق , أو الحاج ليشع المنجّد ... أو حتى أحمد منصور !!.

صباح الخير , اللي شاكك في إمكانيات الجيش المصري والشعب المصري يرجع يقرا كتاب التاريخ , ويشوف حكاية المغول والهكسوس والحملات الصليبيه , بالمناسبه في كل الأوقات اللي قضينا فيها على قوه عظمى مكناش متقدمين عليهم لا علميا ولا عسكريا ولا غيره , بالعكس كنا دايما أقل منهم وأضعف , إنما الأرض دي والشعب ده والجيش ده فيهم لغز محير وصنعو التاريخ بشكل عجيب عشان كده كتبو عننا ( مصر مقبرة الغزاه ) , أنا بس حبيت أصبح على الحكومات اللي بتصطاد في المايه العكره ( الأكلون على كل الموائد ) !!.

August 9

بيان الجيش المصري بيقول إن موضوع رفح قيد التحقيق , وبينفي نفيا قاطعا إنه يكون هجوم لطيران إسرائيلي أو يكون بالتنسيق مع الجيش المصري , أنا في انتظار نتيجة التحقيق وهصدق بيان الجيش القادم , مش هصدق الجزيره ولا مواقع حماس الإلكترونيه ولا غيرها .. ممكن تعتبروه عيب خلقي أو مرض معين إني أصدق جيش بلدي !!.

جنودنا اللي اتقتلو في رفح من سنتين في شهر رمضان وقت الفطار , لما كنت تقول لأي إخوانجي إن اللي قتلهم حماس والجماعات الجهاديه , يقولك لأ محصلش , ده اللي قتلتهم إسرائيل ! , الكلام ده في عهد مرسي والجنود اتقتلو بأسلحه ناريه على الأرض مش بصواريخ , يعني الإخوانجي عشان يبرأ حماس والجماعات الإرهابيه كان مستعد يقبل إن جنود إسرائيليين يخترفو الحدود المصريه ويدخلو بشحمهم ولحمهم ويقتلو جنودنا في قلب سينا , أومال سيادتك يا خروف يعني هي الوطنيه نأحت على أمك دلوأتي لما سمعت خبر ( غالبا مش حقيقي ) إن الطيران الإسرائيلي قتل اتنين تلاته إرهابيين في رفح ( إرهابيين مش جنود مصريين ) , وبتقول اخترقو حدودنا المصريه ؟!!.

البلتاجي بيقول إن أحداث ماسبيرو ومحمد محمود من تخطيط السيسي !! نياهاهاهاها , لا يا عم وانت الصادق , دي من تخطيط جمال عبد الناصر واوعى الكلبش يعضك !!.

وعلى فكره أنا اعرف واحد في لجنة تعديل الدستور المعطل كانت عمته بتشتغل حرامية غسيل , وواحد تاني خالته كانت بتقعد تدق كفته طول الليل لدرجة إن البيبول في المنطفه اشتكو منها , وفيه واحده من اللجنه متصوره ببنطلون جينز والعياذ بالله ( زينس على رأي سمير غانم ) , وفيهم واد كده يا مولانا أبوه بيشرب معسل سلوم , يالله بقى يا ليبراليين يا نحانيح إهجمو عليهم , هجووووم , وعهد الله إحنا ربنا اكرمنا بدعم الجيش لثورة 30 يونيو وإلا كان زمان الإخوان بيحكمونا لمدة 300 ألف سنه جايين , وكان زمان حضرتك شغال كلّاف في وسية خيرت الشاطر , متعلمتوش حاجه أبدا من الإخوان رغم عشرة السنين السوده , اهو في لجنتهم بتاعة الدستور كان فيها مدرس إبتدائي وفرارجي وكانو بيدافعو عنهم بشراسه ويقولو عليهم فقهاء دستوريين !!

وعهد الله المناقشه مع أي شاب إخوانجي عامله بالظبط زي المناقشه مع أي شاب إخوانجي , أه والله , مانا مش لاقي تشبيه للحدث أوسخ من الحدث نفسه !!.

لسه خايف م البياده
رغم إني مش عميل
اللي شفته كتير يا ساده
حكم فاسد كان طويل
بس جيشنا الحر ماله ؟
الشرف وصفه وحاله
ولّا لسّه محتاجين
نمسك دليل ؟!.
.
.
محمد حسين

التاريخ مش هينسى أبدا إن في شهر رمضان 1434هجريه طلبت الكنيسه المصريه من المسيحيين المصريين صيام يوم مع المسلمين ( صوم مقطوع ) , وإن الكنيسه دقت أجراسها وقت ادان المغرب , ويوم ماحنا كمسلمين في مصر نقدر نتضامن مع أقباطها بطريقه مماثله ونرد لهم التحيه ساعتها بس هتأكد إن مصر دي هيبقى لها مستقبل يبهر العالم , بالمناسبه , الإسلاميين والمتأسلمين عايشين وبيقتاتو على خزعبلات ( إن أمريكا بتدعم الأقباط في مصر ) , وطبعا الأقباط عايزين يقتلو المسلمين ويعيشو في مصر لوحدهم تقريبا عشان تبقى مصر شِرْحه وبرحه والواد جون يسكن هو ومراته ماريانا في عماره كامله لوحدهم !! , صدقني يا جحش لو حصل اللي بقول عليه وعرفنا إزاي نرد التحيه تأكد إن الحدث ده هيهز عرش ماما أمريكا ويقلق منامها , يا ترى احنا المسلمين هيجي علينا اليوم ونبقى في تسامح الأقباط ولا هنكمل في طريق الخزعبلات والتعالي عليهم ؟!.

بعد ما تفرجت على 10 دقايق في قناة الجزيره بالصدفه ....مممممممممم انا أويد تماما الفريق اول عبد الفتاح السيسي رئيسا لمصر مدى الحياه ومن غير انتخابات كمان , يارب يا سيسي تطلع من طينة عبد الناصر وتوريهم ( فقه الإنقلابات بيكون إزاي ؟ ) , أيوه يا جدع احنا عيله واطيه مع بعضينا بس مبسوطين كده , مرتاحين كده , أقولكشي على حاجه , السيسي ده أصلا كان على علاقه بأم ميمي الشغاله إنما عاجبني و بعون الله هيعمل فيكو زي ما عمل في أم ميمي !!.

خبر بيقول : اسماعيل هنيه يطالب مصر بفتح معبر رفح و يحذرها من الوقوع في فخ حصار غزه !! , ده طلب ده ولا تهديد يا هنيه ؟ إنتي يابت يا هنيه ..بتهددي مصر يا مقصوفة الرقبه , الله يحرق أم الإخوان على أم عذبة قطر على أم قناة الجزيره اللي فهّموكي إنك تقدري تهددي مصر , أسيادك وتاج راسك اللي بتبوسي بيادتهم في إسرائيل ميقدروش يهددونا كده يا بيضه !!.

August 8

عشان تفهم وتستريح وتعرف إنت بتتعامل مع مين ؟ وتتوقع إذا كانو المعتصمين في رابعه هيفضو اعتصامهم ولا لأ ؟ إسأل أي واحد فيهم السؤال ده : لو خيّروك ما بين إسقاط جنسيتك المصريه أو إسقاط عضويتك في الجماعه هتختار إيه ؟! إسمع منه الإجابه وانت تعرف الطريقه المثاليه لفض اعتصام رابعه !! , وإياك بقى بعدها أسمع منك كلمة فصيل وطني تاني , يا صديقي الغلبان في عقلك , الجماعه بالنسبه للإخوان هي العقيده و الجنسيه و الديانه , عشان كده كل تصرفاتهم اللي انت شايفها غريبه أنا بشوفها منطقيه , إعتصام مسلح وكدب مستمر وتجاره بالدين وتحرك بشكل معين , تمثيل للقتل و تسيير مسيرات للأطفال بالأكفان , أناشيد وترانيم غريبه على مجتمعنا .. كل دي تقدر تقول عليها ( طقوس في الديانه الإخوانجيه ) , عارف إنت حكاية اللطم والدم عند الشيعه ؟ عارف إنت طريقة حرق الجثث عند بعض الديانات ؟ أهي زيها كده ............ وانا اتعلمت إني أتفهم و أحترم ديانة غيري !!.

الحمد لله , أنا لا بشرب حشيش ولا بانجو , لكن فكرة إستبعاد شخص من العمل السياسي عشان احتمال يكون بيشرب بانجو دي عامله بالظبط زي اختيار شخص للعمل السياسي على أساس إنه بيصلي !! , مفيش فرق , وانا مش ممكن هبطل أقرا إبداعات أحمد فؤاد نجم عشان بيشرب حشيش , على فكره السادات ( قائد النصر ) كان بيشرب حشيش , لما محمود بدر يتقدم لأختك عشان يطلب إيديها إبقى ارفضه وجوزها لواحد بيصلي ! , بالمناسبه أنا مبحبش الواد ده وعرفت إن خبر تعيينه في لجنة الدستور هو إشاعه , لكن الحمله السخيفه اللي عليه حاليا بتقول إن البانجو مش نبته مخدره بيشربها بعض الشباب لأ....البانجو ده طريقة تفكير بتدمنها الشعوب المتخلفه !!.

August 8

يا سلام على جمال العيد النهارده , الواحد نزل صلى العيد وبعدين راح عيّد على قرايبه وصحابه ..وبعدين رجعت البيت لقيت أمي مجهزه الفطار ( بط ورقاق ) واتلمينا أنا وخواتي وعيالهم وقعدنا كلنا ع ( الصينيه ) عشان نفطر , وبعدين عيّدت على أمي وبوست إيديها , واديت لولاد خواتي عيدياتهم , وياسلام بقى على فرحة الأطفال بالعيديه , وقعدت جنبهم وهما بيلعبو بالمسدسات ( الحبش ) والبلالين , وإيه كمان ؟ عندي أجازه 5 أيام من الشغل .................... مممممممممممممم أحلام صيدلي مفحوت في أم الغربه وكان نايم من بعد صلاة العيد ونازل الشغل دلوأتي !!.

اللهم صلي عالنبي , البرادعي بيصلي العيد أهو , أه والنبي كده يا برادعي , أنا عايزك كل ما تصلي ركعتين تتصور 500 صوره وفيديو , وفي ظرف خمس ست شهور تكون مالي لنا اليوتيوب وملغمطه فيديوهات للبرادعي وهو بيصلي ...أصلنا شعب ابن صرمه متدين بطبعه , ودرجة قبول المسئول عندنا بنقيسها بعدد الصور والفيديوهات في المساجد , وبعد ما تخلص عاليويتيوب مفيش مانع بقى تخرب البلد وتنهبها وتجيب بتوع حماس بأسلحتهم وتقتل فينا وتبيع مصر لكلاب السكك ونوطي راسنا للي يسوى واللي ( قطر ) , أهم حاجه صورك وانت بتصلي , وعهد الله كل صوره منهم هتجيبلك بتاع متين تلتميت ألف صوت إنتخابي ... مش بقولك شعب متدين ( لا مؤاخذه ) بطبعه............و الكلام ليكي يا جاره !!.

النهارده العيد .. كل سنه وأهل مصر كلهم , الأقباط والمسلمين بخير , إنما اعملو حسابكو إن رمضان هيفضل يجي لمدة 5 سنين كمان في الصيف والحر ده , أديني بقول أهو واهدّي النفوس , إنما لو عليا انا يعني فانا أطالب الحكومه المصريه إن شهر رمضان بداية من السنه الجايه يبقى 8 أيام , تمانيه حلوين أوي يا ببلاوي , مشيها تمانيه وانا بن بلد برضه وكلي مفهوميه !!.

August 7

مع نهاية شهر رمضان المبارك أزف إلى كل أصدقائي بشرى ساره وعظيمه , خطة الإخوان في إقامة دولة الخلافه الإسلاميه ( اللهم صل عالنبي ) , تعتمد الخطه على إقامة علاقه مشبوهه مع الأمريكان لدعم الشريعه والشرعيه وتوطيد الصداقه مع الصهاينه لنفس الغرض , البند الثاني في الخطه , تكفير الشعب المصري وقتله , ولتكن البدايه بالأقباط ( الطفله جيسي ) , ودعاء الإخوان في العشر الأواخر من رمضان : اللهم ارزقنا صلاة ركعتين على كوبري اكتوبر قبل الممات , اللهم ارزقنا فضل الصلاه خلف مولانا جون ماكين رضي المرشد عنه وأرضاه !!.

August 6

المسيحيين في مصر بيتقتلو في ماسبيرو , وبيتقتلو في الكنايس وهما بيصلو ( ومطلعوش قالو : قتلونا واحنا بنصلي يا بيه !! ) , وبيتقتلو في الصعيد , كل ده بإيد الإخوان والجماعات ( الإسلاميه ) أو بإيد أمن الدوله السابق , يعني ( بين شقي الرحى ) , ومع ذلك مشوفناش السلاح اللي المسيحيين مخبينه في الكنايس زي ما قال الإخوان وزي ما قال سليم لا مؤاخذه العوا , يكونشي المسيحيين اشترو الأسلحه ومش عارفين يستخدموها عشان يدافعو عن نفسهم ؟ أو يكونو جابوها من غير ذخيره أو كتالوج ؟ بتعاطف تماما مع أقباط مصر , عشان أنا مسلم بجد مش مسلم من ( منازلهم ) ولا إخوانجي من زرايبهم !!.

وفد غربي رفيع المستوى بيزور خيرت الشاطر والكتاتني , ومعرفشي وزير دولة إيه زار مرسي , ومعرفشي مين عايز يزور بديع والعريان !! هو فيه إيه يا سيسي ؟ طلبت تفويض من الشعب عملنالك تفويض مكنتش تحلم بيه ؟ بأي حق الناس دي داخله طالعه كده ؟ هي مصر اتحولت كلها لحمامات رمسيس العموميه ؟ كل اللي رايح واللي جاي يدخل يفك نفسه فيها ؟! , طيب نعملك إيه طيب ؟........... يا خوفي يا بدران لا تطلع نوسه زي ابتسام !!.

وانا اللي كنت فاكر إن القرضاوي ( بيمثل ) الإسلام السني الوسطي المستنير , أتاريه طلع فعلا بيمثل !! , الراجل عايز المسلمين ييجو من كل انحاء العالم عشان يحاربو الجيش المصري ومعاهم الامم المتحده والإتحاد الأوروبي وعصابة اللهو الخفي والولاويله الحمره , هي صحيح فلوس قطر كتيييييير والغاز بينزل عندهم من الحنفيه بس مش كده يعني يا مولانا , مش إنت اللي قلت لنا إن فيه أخره وجنه ونار ؟ ولا هي النار دي ربنا عاملها عشان يدخلها الغلابه ؟!

August 5

علّموني
إني احبك من سكات
من ورا كل البنات
وارسمك في القلب
واحه متداريه
نيل بيجري
والسدود
مش حايشه مايه
اللي بينا مش تاريخك
مش قولات
مش حروف
خايبه وغريبه
أي عاشق والحبيبه
يبقى بينهم ذكريات !!.
.
علّموني إني أحبك
من سكات
.
.
محمد حسين

توكّل كرمان سايبه بلدها وجايه تتعاطف ( وتتشحتف ) مع معتصمي رابعه واتمنعت من الدخول في مطار القاهره , و عبدالمنعم ابو الفتوح , اللي مش إخوان بس بيحترمهم , اللي خاد 2 مليون صوت ليبرالي في الإنتخابات , اللي حظى بدعم صحفيين زي بلال فضل يصرّح : ( ما حدث مع توكل كرمان فى المطار اهانة لنا جميعا ليس لمكانتها فى وطنها وفى العالم كله فقط بل بكل اسف وحسرة لان الدولة البوليسيه اطلت من جديد ) !!
.
استخرج من الفقره السابقه : فاعل ومفعول به ومفعول معه ومفعول لأجله ومفعول معه .... ومفعول فيه !!.

يعني إيه عدلي منصور يقابل وزير خارجية قطر ( مندوب أمريكا الدائم في الجامعه العربيه ) ؟ يعني إيه رئيس مصر يقابل فسل قطري عميل للصهيونيه ؟ إحنا مش هننضف بقى ونعرف قيمة البلد دي ؟!......... يا عم الحاج عدلي سيب البرادعي بتصرف هو متعملشي حاجه من دماغك ...ومع قطر بالذات سيب الفريق السيسي يتصرّف !!

August 4

الإخوان خلصو من حكاية المليونيات دي وبيتكلمو دلوأتي عن ملياريه ودشيليونيه , بيقولك هيعملو مليارية ليلة القدر , وأعلنو إن هيحضرها سيدنا جبريل ومعه لفيف من كبار الملائكه وحملة العرش ومندوب عن كل سماء من السماوات السبعه !! .....أنا بجد بشجع اللعبه الحلوه وممكن أنزل معاهم لو قالو لي إن أبويا الله يرحمه بخير وهيجي يحضر الملياريه , وعلى رأي ستنا المناضله عايده رياض : كتكوووووووووووووووووووووت !!.

الداخليه للمره المعرفشي كام بترمي منشورات على معتصمي رابعه , هانت خلاص , يا مسهل يارب , كلها كام يوم والمعتصمين في رابعه يزهقو ويمشو ........... أو الورق اللي في مطابع الداخليه يخلص !!.

August 4

أسعد الرؤساء المصريين حظا في تاريخ مصر الحديث , هو الرئيس اللي هيجي بعد مرسي أيا ما يكون اسمه ووصفه وإمكانياته , عارف إنت لما يكون عندك حصان مشلول وبتدخل بيه السباق ؟ وبعدين الحصان ده يموت أو تجيله شوطه تاخده وربنا يرزقك بعده بحصان أعرج بس مش مشلول ؟ اهو الحصان الأعرج ده ساعتها هتشوفه في الحلبه وتقول ( بسم الله ماشاء الله ...مَجَري ياخواتي !! ) , الإنتخابات الرئاسيه اللي جايه هي فرصه للأعرج و النطيحه والمترديه وأنصاف السياسيين لإثبات زعامتهم !!.

August 4

أهو ده بقى البرادعي , تتفق معاه أو تختلف , لكن أول ما تشوفه بيتكلم هتلاقي نفسك قاعد ومستربّع وبتسمع , فيه واحد يقولك ( ماليش في أم كلثوم ) , لكن لما بيسمعها بتغني بينسى إنه مالوش في أم كلثوم !! , البرادعي هو الطرب الأصيل في السياسه بعيد عن التلوث السمعي السياسي والدرابوكا اللي بنعيش فيها !!.

يبدو إن الضربه اللي ضربها الجيش المصري للإخوان في مصر أزعجت أمريكا , الإداره الأمريكيه خايفه جدا على التيارات ( الإسلاميه ) والإرهابيه في العالم كله اللي ساعدتها على مدار قرن كامل تقريبا وصرفت عليها دم قلبها , البعبع الأمريكي الذي صنعته في الشرق الأوسط لخلق فتنه وتفتيت الدول الإسلاميه في خطر حقيقي , وأمريكا قررت إنها تلعب عالمكشوف , هترمي كل أوراقها مره واحده , و يا صابت ياتنين عور ... عن يوم الأحد أتحدث !!.

August 3

ذكرياتي
.
وانا في الثانويه العامه كنت باخد درس ب 20 جنيه في الشهر عند مدرس كده مش هقول اسمه لأني أستشعر الحرج ! , مش هقول على إسمك يا أستاذ نُصّه , بدل ما يكون مستخبي عندي في الأصدقاء ولا حاجه ومسمي نفسه ( حماده الموس ) , المهم بقى , قال لي أستاذي العزيز الموس مرارا وتكرارا وهو لم يكذبني قط ( إنت ياد يا محمد هيبقالك مستقبل عظيم , إنت عبقري يابني والله , إيدك بقى عالعشرين جنيه بتاعة الشهر ده لأنك بقالك 4 شهور مدفعتش يعني من أول الدراسه !! ) , ياااه يا أستاذي وانا اللي كنت فاكرك بتحبني لشخصي !!.
وشوف حكمة ربنا يا مؤمن , بعد نيف و سبعتاشر سنه ونص تقريبا لانا بقيت ذو مستقبل عظيم ولا هو خاد العشرين جنيه !!.
أديني نازل الصيدليه أهو , وكل يومين تلاته ربنا هيبعت لي زبون ماركة ( ماري منيب ) ويسألني ( إنت جايه تشتغلي إيه ؟) وانا أقول ...سوّاق ...سوّاق يا هانم ........ سوّاااااااااق !!.

August 2

أسوأ مشهد في حياتنا اليوميه , أكتر مشهد مستفز , لما شيخ ملياردير يطلع على منبر وقدامه مجموعه من المسلمين الغلابه , الغلابه أوي , اللي بالعافيه بيلاقو قوت يومهم , و الملياردير يشخط في الغلابه ويقول لهم ( اتقو الله واخشو عذابه ) وبعد كده يوعدهم بجنة ربنا لو سمعو كلامه !! , كأن قدرنا أن يعيش الشيخ في جنة الدنيا ويمتلك بيمينه مفاتيح جنة الأخره !! ................... أغلب ظني أن الفقر نفسه يكفّر عن ذنوب صاحبه مثل حج بيت الله الحرام , وفي مصر ملايين المصريين يحجون إلى بيت الله الحرام كل يوم !!.

بشوف حلقه من مسلسل الزوجه التانيه , ممممممممممم المسلسل ده عمل تشويه للفيلم الاصلي أكتر من اللي عمله مرسي لكرسي الرئاسه , بس تقريبا يعني زي ما وجود مرسي كان مهم عشان نعرف قيمة عبد الناصر فممكن نقول إن وجود البت الملزّقه دي مهم جدا عشان نعرف قيمة سعاد حسني , ومش غريبه أبدا إن المسلسل الملزق تم إنتاجه في عهد الرئيس الملزّق .......... وداعا بلا رجعه يا عام الملزقين , بس بالله عليك يا سيسي بعد ما تخلصنا من الإخوان تخلصنا من أبطال مسلسل الزوجه التانيه , المؤلف والمخرج لازم يتسجنو بتهمة خيانة الوطن و ( الغباء الفني )!!.

لو صدق ظني ( الحسن ) بالسيسي , فانا أتوقع إن فض اعتصام رابعه هيكون عمليه استخباراتيه بالمقام الأول , هتعتمد أكتر على مفاهيم عسكريه زي التمويه والخداع , أتوقع إن السيسي يكون زرع عناصر من عنده في الإعتصام من فتره طويله , لو كان الوضع كده فعلا هحترم الراجل ده أكتر مش بس عشان نضف مصر من اعتصام مسلح , لأ , عشان هتأكد إن مصر لسه فيها عقول في المخابرات بتفكر وبتلعب زي زمان , يعني هتطمن أوي على جيش مصر , كده هيبقى السيسي جاب جون في مرمى أوباما ( و موزه ) بكعب رجليه من نص الملعب !!.

August 1

وانا ماشي في الطريق ( العين السخنه ..الزعفرانه ..راس غارب ...الغردقه ...سفاجا ) بلاقي عساكر غلابه أوي قاعدين في الكماين ...بيشغلو نفسهم بأي حاجه , بيلعبو مع بعض لحد وقت الفطار , الدنيا صحرا من كل ناحيه , تخيلت إن واحد مسلح ( من بتوع الإعتصام السلمي !! ) عدّى عالكمين وضربت في دماغه إنه يضرب طلقه في راس العسكري ده ( جيش أو شرطه ) , إيه اللي ممكن يحصل ؟ ولا حاجه ...لا حد هيعرف إسمه ولا البلد اللي جاي منها ومش مهم إنه اتقتل , ومش هيصلو عليه في رابعه .............ولا قناة الجزيره هتصوره !!.

الوضع في مصر حاليا أشبه بمباراه , مباراه لا تقبل القسمه على اتنين , أنا ومعي أغلب المصريين نتمنى فوز فريق ( الطيبين ) , فوز فريق الأشرار مصيبه حقيقيه , لكن الكارثه الكبرى هي الوقوع في فخ التعادل , مصر لن تحتمل التعادل , لن تحتمل أن يصبح عنوانها لسنوات طويله ( يبقى الوضع على ما هو عليه , وعلى المتضرر اللجوء إلى الجحيم ) !!.

ورئيسهم الجبار اللي مجابتهوش ولاده اللي عايزين يموتو نفسهم عشان يرجعوه للحكم كل ما مبعوث دولي يقابله في السجن يطلع يقول ( 30 يونيو دي ثوره مش إنقلاب !!) , وبوتين جاي مصر يوم الأربع , أقطع دراعي من هنا لو مطلعشي بوتن من قاعدته مع مرسي وهو شايل يافطه مكتوب عليها ( يسقط يسقط حكم المرشد ) واحتمال مرسي هو اللي يكون كاتب اليافطه بإيده !!........... تباً لهؤلاء , إنهم ينتحرون من أجل الزريبه يا عمده !!.

July 31

فكرة تقديم أطفال في مسيره بالأكفان هي جريمه لا تقل وقاحة ولا سفالة عن جريمة القتل , المسئول الإخوانجي الحقير الذي دعى لهذه المسيره يستحق الإعدام , الأب الذي سمح لأطفاله بارتداء الأكفان يستحق الإعدام , يا ولاد الكلب لسه إيه متاجرتوش بيه ؟ لسه إيه من دين ربنا وسلوك الإنسان العاقل البسيط مش بعتوه في مزاد الشريعه ؟ طيب باقي إيه من شريعة ربنا ؟ إننا ندخل الحمام بالرجل الشمال ؟!!.

وبعد تفويض الشعب للسيسي بمحاربة الإرهاب وبعد زيارة أشتون ممثلة الإتحاد الأوروبي جت اللحظه الحاسمه لفض الإعتصام ...لسان حال الإخوان حاليا يقول ......... أشتاتاً أشتون !!

أبو الفتوح يعقّب على خبر القبض على عصام سلطان و أبو العلا ماضي قائلا: من العار استهداف شباب الثوره !! .... أه والنعمه زي ما بقول لكو كده , يعني عصام سلطان وابو العلا ماضي من شباب الثوره ؟! على كده بقى أن بت شقرا واسمي هيلاري وجوزي ياختي اسم النبي حارسه وصاينه اسمه كلينتون , كلينتون و عهد االله كلينتون , بت يا مونيكا , إنتي يا بت يا مقصوفة الرقبه , قومي شوفي المخفي كلينتون جوزي راح في أنهي كوركيبه وقولي له ستي كلنتون بتقولك تيجي حالا يا واطي !!
.
تقول الحكمه الصينيه القديمه : قليلٌ منَ ال ( تتحِ ) لا يُسكرْ !!.

حقيقه للذكرى
.
ثورتي 25 يناير و30 يونيو لم ينجحا في تحقيق شئ بقدر نجاحهما في إعادة الشعبيه الجارفه للزعيم الراحل جمال عبد الناصر , شعبيه لم يحظى بها ناصر في حياته ولا بعد مماته , ملايين المصريين غفرو لناصر ذلته الوحيده وهي ( سجن الإخوان ) , وربما أدركو الأن أنه لا شئ في إنجازات ناصر يفوق بناء السد العالي وتأميم القناه ورفع رأس مصر في عنان السماء سوى سجن الإخوان , رحم الله الزعيم ورحم الزعامة من بعده !!.

July 30

بذمتكو الحاجه أشتون دي مش شبه موظفة السفاره الأمريكيه اللي كانت في فيلم عسل أسود ؟ أكيد لما قابلت مرسي في سجنه سألته : عندك حساب في البنك ؟ طيب ايه اللي يضمن لنا إنك هترجع مصر تاني بعد ما تسافر أوروبا ؟ وأكيد مرسي جاوب بإجابه نموذجيه زي الواد اللي في الفيلم وقال لها : مصر دي فيه حاجه بتشدني ليها معرفشي ليها , عايز أفجّرها وأولع فيها معرفشي ليه ؟ عايز أحرق الناس اللي فيها معرفشي ليه , مبروك يا مرسي إحنا كده خلصنا وانت خدت التأشيره , هنربيك عندنا في الدول التي تحارب الإرهاب ونرجعك لمصر إرهابي محترف أد الدنيا !!.

Top of Form

4421

Bottom of Form

ذكريات مراهق ساذج !
.
وانا في الكليه والجيش كنت بلاقي شباب الإخوان ( الرسميين ) ممنوعين من التجنيد بأمر من المخابرات مش عارف ولا أمن الدوله , وكنت أتحمس بقى وأقول إزاي يا ناس ؟ دول مصريين وبيحبو بلدهم إزاي نحرمهم من شرف ارتداء الزي العسكري ؟! هع هع هع............ كنتُ مغفلٌ , كنتُ غفيرٌ , كنتُ حمارٌ !! , تخيل حضرتك إن الجيش كان بيقبل شباب الإخوان في رتبة ظابط حربيه وضابط احتياط وشاويش وجندي كان ممكن إيه اللي يحصل النهارده ؟! تخيل بس إن جيش مصر العظيم ده كان فيه 10 ألاف من أعضاء الإخوان الرسميين ؟ , يالله بقى , أيام الجهل والسذاجه والحماس ( مش فتح ) , الله لا يرجعها دي أيام والحمد لله على نعمة العقل !!.

في التكيّه ......................عن الغلابه في حزب الكنبه !
.
.
عم راضي
لسه عايش في التكيه
راضي بيها
لسه عامل دور ضحيه
ومحمي فيها
صوت مؤيد
خدّامين البيه يا سيد
.
بعد ثوره وناس تموت
مش طالع لك أي صوت
مش باين لك ليه إيدين؟
إنت عايش ولا ميت
ولا مرمي بين بينين ؟!
إنت مين ؟
.
مصر جايّالك بتجري
وانت قاعد
قوم يا عم الحاج ساعد
خلّي لولادك قضيه
عم راضي لسه عايش
في التكيه !!.
.
محمد حسين

محمود مكي يصرح : لدي مبادره لحل الأزمه الحاليه ولن أعلن عنها الأن !! , هع هع هع يعني على طريقة المستشيخ اللي قال ( ليس الأن.......... ليس الأن ) , أقتله ( الشعب المصري ) ولكن ليس الأن !!.

July 29

وحكاية ( الميدان التالت ) بتاع أبو الفتوح دي عامله زي فيلم الرجل التالت بتاع أحمد ذكي ومحمود حميده وليلى علوى , وقت عرض الفيلم كانت السينما عامله سؤال بيقول مين هو الراجل التالت في الفيلم ؟, وانا عرفت الإجابه ( ليلى علوي ) , أحسنت إختيار الإسم يا تتح , أبو الفتوح هو كمان بيلعب دور ليلى علوي في السياسه , تلاقيه شغال ( عشيقه ) محمود حميده بس يقولك بحب ( أحمد ذكي ), وما بين محمود حميده واحمد ذكي قرر أبو الفتوح إنه يعمل ميدان أو يعمل ( شريفه ) !!.

مصر دي كبيره أوي أوي ومهمه جدا جدا , عشان كده هتلاقي الجزيره سايبه قطر وبتتكلم عن مصر و وهتلاقي توكل كرمان سايبه اليمن وبتتكلم عن مصر , وهتلاقي بتوع البحرين عارفين أدق التفاصيل عن مصر , وهتلاقي كل فسل وكل إمعه سايب ( إمعته ) وبيتكلم عن مصر , ولو سألتني كمواطن مصري مثقف يعني مين هو رئيس اليمن ؟ هقولك معرفش , وعزة جلال الله ماعرف , كل ده مش مهم , ولو حضرتك بتابع قناة ناشيونال جيوجرافيك هتلاقي دايما فيه ناموس وهاموش ( ونحانيح ) سايبين مكانهم وبيحاولو يقرصو ودن الفيل !!.

ولما كانت الناس بتنزل تتظاهر وتعتصم ليله واحده أيام مرسي كان حبايبنا من شباب الإخوان بيسألو ( هما المعتصمين دول بيصرفو منين ؟! ) , والمعنى إنهم ممولين وفيه حد بيصرف عليهم , مع إني أعرف ناس كتير منهم في وظايف مرموقه جدا , إنما اعتصام 100 ألف أغلبهم عاطلين عن العمل لمدة شهر محدش من شباب الإخوان سأل هما بيصرفو منين وعايشين أزاي ؟! , على فكره يا صاحبي سيدنا جبريل مش بينزل في رابعه ولا الملايكه بيرمو دولارات عليهم ...وربنا سبحانه وتعالى مش بينزّل علي معتصمي رابعه مائدة من السماء !!.

خبر : القبض على عصام سلطان وترحيله إلى سجن طره ! , أدي عيبه بقى , بدأنا نطبق العلمانيه بحذافيرها ونأكد شكوك الإخوان والسلفيين , مش كان أفضل لو نحافظ على هويتنا الإسلاميه وإننا شعب متدين بطبعه , ونرحله لسجن القناطر ؟! أنا ضد الإختلاط في السجون.

Top of Form

62187

Bottom of Form

July 29

فلاح وشال الوجع
على كتفه زي الفاس
وقال يموت الجدع
ما يمدّ إيد للناس
عاشق تراب زرعته
ميّل عليها وباس
على راسي يابه تكون
وجزمتك ع الراس .
.
.
محمد حسين

أنا ضد تطبيق قانون الطوارئ ....................من أول السنه الجايه ! , و ناوي أفتح مطعم وأكتب على بابه .... ( الأكل بكره ببلاش ) !!.
رأيي باختصار شديد : مصر أولا ولتذهب الديموقراطيه والحريات العامه إلى الجحيم !!

July 28

قاعد بتفرج على فيلم رعب , هما ليه المخرجين الكفره بتوع أفلام الرعب دول بيجيبو ممثلات جميله أوي ( مزز ) عشان الوَحش ياكلها والشرير يقطعها بالساطور في فيلم الرعب ؟ يا أخي حرام عليك , ربنا ينتقم منك , لما البنت اللي كانت لابسه الروب وطالعه من الحمام دلوأتي دي تبقى البطله اللي الوحش بياكلها في الفيلم أومال مين هتبقى البطله اللي هتتباس في الأفلام الرومانسي ؟ أم أيمن وتهاني الجبالي ؟!!.

سؤال في مستوى الطالب النحنوح !
.
بعد حالة الكراهيه الشديده اللي بقت موجوده عند الإخوان لجيش مصر العظيم وبعد دعوة القرضاوي للجهاد ضد الجيش المصري هل تعتقد إن الإخوان هيحتفلو معانا بعد كده بذكرى انتصار اكتوبر كل سنه ولا هيرجعو زي زمان ويحتفلو بنكسة 67 زي ما كان بيعمل أجدادهم اللي سجدو شكرا لله وقت النكسه ؟!.

الإخوان مصرّين بقى ! , مسرّحين شوية ( قرابين بشريه ) ماشيه حاليا في شوارع حلوان بالسلاح , المفروض أجهّز بيان التعاطف والشجب من دلوأتي ؟ على فكره مفيش إخوانجي اتقتل في اعتصام رابعه نفسه , حاول تقرا المشهد صح قبل ما تشتغل نحنوح !!.

سليم العوا رجع تاني , زعبوله الأوله رجع تاني , عامل مبادره , بيقولك نرجع مرسي ومرسي يدي صلاحياته لحكومه جديده ومعرفشي إيه , المهم إن مولانا سليم العوا بيخوفنا من حكم العسكر ( اللي هو مش موجود ) , أه وعزة جلال الله , ممممممممممم يا راجل دانت قعدت سنه كامله , 365 ليله تغسل لطنطاوي رجليه كل ليله قبل ما ينام بالمايه والملح وتدعكها ( ولا مؤاخذه ) وتقول له ( عايز حاجه بقى يا سيدي قبل ما انام ) , والله عيب عليكي كده يا بت يا سنيه يا قليلة الأصل !!.

وصف لحال المعتصمين الغلابه في رابعه !!
.
إبليس عايزها حريق
لابسلي راجل دين
رامي بتوبه الردئ
على ناس كتير سالمين
.
يا مصري ضلّ وتاه
إهرب لنور الله
واعرف تصاحب مين ؟!
.
.
محمد حسين

الجزيره جايبه وائل قنديل وحسن نافعه وواحد أزهري , قاعدين بقى واحد بيطبل والتاني بيغني والتالت بيرقص , الأزهري عايز يحاكم شيخ الأزهر على أحداث إمبارح !! , يا زين ما خلفتي وجبتي يا جزيره ...................( عالمه وبلّاله ...... و وائل لا مؤاخذه قنديل ) !!.

سؤال بسيط جه على بالي , لما المعتصمين في رابعه يرجعو بيوتهم والليله تتفضّ بإذن واحد أحد قناة الجزيره هتعمل إيه وتشتغل فين ؟ يعني هتاكل عيش منين ؟ عيد ميلاد أمير قطر وحفلة طهور ابنه و عودة الشيخه موزه من عند الكوافير بسلامة الله ؟ الحاجات دي مش بتأكل عيش , قطر مالهاش تاريخ ولا جغرافيا ولا اي تلاتين لزمه ووجودها في خريطة العالم عامل زي ( السنطه ) اللي بتطاع في رجل فيل , ليه بقى عامله لنفسها قناه فضائيه أد كده وبتصرف عليها مليارات ؟ , وهو فريق مركز شباب ( كفر البدماص ) ينفع يعمل له قناه فضائيه وجريده يوميه ؟!!.