منوع + أشعار 07/2013

من 04/06 ل 22/07

July 22

ممكن الإخوان يستغلو ذكرى 23 يوليو في حشد أكبر زي ما عملو في ذكري العاشر من رمضان .....بس والنبي حد يفهمهم بس إن إنتصار العاشر من رمضان ده بتاع السادات اللي قتلوه و ذكرى 23 يوليو دي بتاعة عبد الناصر اللي كفّروه ............ و يبقى الجديد عند الإخوان ( إن القارعه بقت تتباهي بشعر عدوتها !!) .

على فكره , اللي بيحصل في رابعه هو صوره مصغره لشكل مصر لو استمر حكم الإخوان , الإخوان في رابعه اختارو لهم رئيس ومجلس وزراء ومجلس شورى ...يعني عاملين لنفسهم دوله صغيره حدودها إشارة المرور مع تكفير كل الجيران ( مصر ) ...هو ده أخرهم على فكره...هو ده تمامهم , هما بس كانو فاكرين إنهم يقدرو يعملو دولتهم المتخلفه دي في أرض مساحتها مليون كيلو متر مربع وتاريخها 7 ألاف سنه اسمها مصر ,أخرهم كام فدان يعملو فيهم دوله لمده كام يوم , اللي حصل السنه اللي فاتت في مصر من هرتله وتهبيل من دراويش وبهاليل الإخوان كان أفضل وصف له ( صرصار صغير بيحاول يبلع فيل ضخم ) !!.

ثروت الخرباوي اليوم : الإخوان يشاركون في تنظيم إرهابي مسلح في سيناء يضم القاعده وحماس وهم ضالعون في أحداث رفح , كما رجح الخرباوي أن يسعى الإخوان للإنفراد بسيناء واحتلالها وتكوين جيش ( إسلامي ) فيها بمساعدة حماس والقاعده كتكرار لنموذج حزب الله في لبنان .............مممممممممممممم ده رأيي اللي كتبته امبارح ومعجبشي الناس !!.............اللهم انصر جيش مصر العظيم على الإخوان الإرهابيين ومَنْ حالفهم ومَنْ والاهم.

ياااااااااااااااه , كالعاده , أخر بؤ مايه في الإزازه وأخر نفس في السجاره قبل الأدان ب ( فيمتو ) ثانيه , يارب توب علينا بقى من المايه...قصدي السجاير !!.

تحت الطريق الدائري عند مخرج المرج هتلاقي سوق كبيير أوي وناس ياما , أمم يا مولانا , اللي راكب فزبه واللي راكب عربيه كار بحمار واللي راكب شيروكي , اللي قاعده بتبيع مناديل واللي واقف يشوي دره , واللي جاب فوطه واستغل الزحمه وبقى يمسح عربيات , اللي فارشه بخضار واللي بيركب عربيه ( بكبوت ) عشان يروح بلدهم البعيده , واللي سايق ميكروباس و اللي راكبه توكتوك , الست دي قاعده بصندوقين فاكهه, دي دوله لوحدها يا سيدي , يتهيألي عدد الناس هناك أكتر من عدد المعتصمين في رابعه , هي دي مصر , ناس بيجرو على أكل عيشهم ولقمه حلال بعرق الجبين , الفرق بس إنهم مفيش حد ( ولا جهه ) بتجيب لهم وجبة الفطار والسحور لحد عندهم مجانا !! , وأحرار , أحرار أوي , .... مش عايشين في اعتصام اجباري !!.

July 21

أغلب الأراء السياسيه الساذجه تأتي من هؤلاء الصحفيين , الذين يملأون الصحف والجرائد بالشخابيط والهرتله السياسيه , أعتقد بعد الحمله التي ستطال المتأسلمين سوف تأتي حمله أخرى على الصحفيين وشعارها ( مَن كان منكم بلا جريده ...فليرمني بحجر !! ).

الكوميديا السوداء التي سوف يذكرها كتاب التاريخ الإسلامي :
.
إنه في العام 2013 قامت جماعه تطلق على نفسها ( جماعة الإخوان المسلمين ) في مصر بإرضاع أطفالها كراهية العدو الصهيوني والعلم الإسرائيلي وعندما كبر الأطفال وتنفيذا لتعليمات و ( كاتالوج ) الرضاعه قامو بإحراق علم مصر !!.
وفي العام نفسه قامت الجماعه نفسها والتي ربت صغارها على حلم تحرير القدس من يد الصهاينه بالهجوم على مدينة العريش ربما بغرض تحريرها من يد المصريين .... !!.

العيب الأزلي لرئيس وزراء تركيا ( أردغ ) إنه بيمارس السياسه على طريقة اللي بترقص على السلم , لا اللي فوق شافوها ولا اللي تحت , هو سيدنا أردغ خليفة المسلمين و هو برضه مسيو أردغ عضو الإتحاد الأوروبي , هتلاقيه بيتكلم عن الحريه والعلمانيه ووشه لأوروبا وعن الخلافه الإسلاميه ومدّي ضهره ( ولا مؤاخذه ) لأوروبا , هو باختصار هذا الشخص الوحيد في العالم الذي يعتقد أنه يستطيع أن يخدع كل الناس كل الوقت , أو بالبلدي , يعني : أردوغان عايز يفتح كباريه ويعمل فيه قسم خاص للمحجبات !!.

July 20

معرفتش أفطر , نفسي اتسدت بسبب الأخبار وتعليقات أصدقائي , بصو بقى , الله يرحم الستات اللي ماتو امبارح في المنصوره , ويحرق اللي قتلهم بجاز , وعشان نكون على نور ومحدش يزايد عليا فانا احتمال كبير أكون أكتر واحد انتقد المجلس العسكري في حكمه واكتر واحد في مصر شايف إن الشرطه هي أوسخ جهاز في الدوله , لكن حاول تفكر , أبوس إيد اللي خلفوك حاول تفكر , مين قتل الستات في المنصوره ؟ نوع الضحيه ؟ واحده ست في مقتبل العمر , تأثير مقتلها هيكون مدوي , طيب دي الشرطه ؟ والشرطه هتختار واحده ست وتقتلها ليه ؟ ماهو بلطجية الإخوان على قفا من يشيل ...اعرف بس مين القاتل , واقرا تاريخ الإخوان واعرف بيعملو ايه في الخصومه قبل ما تهتف بسقوط حكم فلان وعلان , ...الست بثينه كامل مش عاجبها الست جميله اسماعيل ..وخالد بيه منتصر مش عاجبه عمرو حمزاوي والعكس صحيح ...أقولكوش على حاجه , إلهي تتحرق مصر بجاز وسخ , يالله رجعو حكم الإخوان , أنتو والله لا تستحقو زريبه أنضف من كده ولا حاكم أنضف من مرسي ...اهتفو معايا بقى ( الشعب يريد ...الزريبه من جديد !!).

خبر حقيقي , أردوغان رفض الرد على مكالمة تليفونيه للبرادعي لأنه بيعتبر البرادعي غير ذي صفه , وبيعتبر مرسي هو الرئيس الشرعي لمصر !! هوبا ..........وجون وجون وجون , الله عليك يا حبيب والديك , هاتها بقى من ال 3 شبكات يا برادعي , تصفيق حار جاف صيفا بارد ممطر شتاء , مممممممممم طيب اعتبره محمد بديع يا أخي , وهو بديع كانت صفته الرسميه إيه يا جحش ؟ ولا اعتبره الجنايني اللي شغال في جنينة نتينياهو , أظن الجنايني مالوش صفه رسميه , ولا إيه يا أردغ ؟!

وابو بركه بيقول ( المنقلبون على مرسي جريمتهم لا تقل عن الشرك بالله ) !! , قابل بقى يا عم الحاك يا بتاع ( فسيل وتني ) , أهو الراجل كفّرله يجي خمسين ستين مليون في قاعده وكوباية شاي , تحب حضرتك بقى نعمل المسالحه الوتنيه دي فين ؟ في المعبد الوثني اللي عايش فيه الكفار اللي هما احنا ولّا في الفردوس الأعلى اللي عايش فيه أبو بركه وابو دومه والدفاس ؟! ...أنا رأيي نعمله في أرض محايده , نعمله في الجُرن الواسع اللي بين المعبد الوثني والفردوس الأعلى برعاية البرادعي وحمزاوي والمطربه أنغام !!.

السفير المصري بتركيا يعتذر عن حضور حفل إفطار جماعي دعى إليه أردوغان !! , يا دين النبي , أخيرا بقى عندنا سفراء بينفّذو الإراده السياسيه لدولتهم , مش فاكرين أن شغلانه السفير دي بتعني التنقل بين موائد الرحمن وحفلات الشيطان !!.

July 19

ليسَ مصرياً مَنْ لم يمسك كوز دره مشوي ( intact ) وياكله وهو ماشي في الشارع , أقطع دراعي من هنا إن عمرو حمزاوي لو نفسه هفّته عالدره المشوي , بيجيب كوز ويفرّطه في طبق وياكله بالشوكه والسكينه !! , يا دكتور عمرو ليسَ هكذا يؤكل الذره المشوي , وليس هكذا تؤكلُ الكتف , وليس هكذا تُحكم مصر !! , أرجوك يا مولانا إلبس جلابيه فلاحي وانزل لفّ في المناطق الشعبيه , هتلاقي ناس متعرفشي حاجه عن ( الإيثكس السياسيه ) , البطون الخاويه لا تفكر يا مولانا ولا تشاهد السي إن إن !!.

وكل ما الجيش المصري يطلع يقول ( قبضنا على عناصر من حماس في سينا وبحوزتهم أسلحه ومتفجرات ) , يطلع مولانا اسماعيل هنيه ويقول ( محصلش , أحنا مالناش علاقه باللي بيحصل في مصر ) ! , طيب يا مولانا , مع إني عارف ومتأكد إن عناصر حماس لما بتدخل مصر من الأنفاق بيبقى معاها أسلحه ومتفجرات مش روايات نجيب محفوظ ومحمد عبد الحليم عبد الله إنما ما علينا , بعد كده يا عم اسماعين لما عناصرك يتقبض عليها في مصر وتتنفخ نفخ البلالين في العيد متبقاش تعيط زي الولايا .....إلا سؤال والنبي على استنفرام كده لاسماعيل هنيه : هو أبوك اسمه هنيه ؟ أومال أمك اسمها إيه ؟ مغاوري ؟!!.

منصة الإخوان في رابعه أعلنت البلتاجي رئيسا للجمهورية وصفوت حجازي رئيسا للوزراء , والبلتاجي أخد أول قرار باعتقال السيسي ومحاكمته !! نياهاهاهاها , وخبر تاني بيقول أنصار مرسي اقتحمو مستشفى الأمراض النفسيه في العباسيه !! , المفروض إن المحررين في الصحف يحذرو القرّاء وينبهو عليهم إن الخبر الأول هو تكملة الخبر التاني ...يعني يتكتب المانشيت كده ( انصار مرسي يقتحمون مستشفى المجانين ويختارون البلتاجي رئيسا مؤقتا للبلاد ) !!.

أجمل إعلان تلفزيوني هو إعلان كومباوند ( ماونتين فيو هايد بارك ) , عريس شايل عروسته وطالعين السلم وطلع وراهم لفيف من سكان العماره يتقدمهم اللوا شربيني ( رئيس اتحاد ملاك العماره ) وبيطلب من العريس إنه يدفع فلوس سلك الأسانسير ولمبة الأسانسير !! , الإعلان ده بيفكرني جدا بحالي من كام سنه ( ولحد دلوأتي ) , أنا كمان عندي رئيس اتحاد ملاك العماره من طينة اللوا شربيني , بس اسمه الدكتور فلان , الشقه بتاعتي مهجوره ومعيشتش فيها غير 20 يوم من ساعة ماشتريتها , وكل سنه بنزل أجازه أروح أبص عليها ألاقي ( اللوا شربيني ) بتاع عمارتنا واقفلي عالسلم وبيكلمني عن فلوس الزباله والبواب واللي واللي للشقه المهجوره !!.
فكرت بعد الإعلان إني أخد شقه في ماونتين فيو , بس الفرق بين سعر شقتي الحاليه وسعر شقه في ماونتين فيو هو صفر , أه والله صفر , بس صفر عاليمين !!.
قلت مش مشكله هدفع مقدم واتغرّب 10 سنين تاني عشان أدفع أقساط شقه في ماونتين فيو ميكونشي فيها ( اللوا شربيني ولا الدكتور فلان ) , بس ياخوفي أرجع من الغربه ألاقي الدكتور فلان بتاع شقتي القديمه اشترى شقه في نفس العماره في ماونتين فيو , وابقى أنا ساعتها بجد ........................اللي بيقع عليه البلكونه في الصحرا !!.

إنجز يا سيسي في صفقة الخروج الأمن لقيادات الإخوان عشان التعليمات تيجي للرجاله المعتصمين في رابعه بفض الإعتصام بقى , الناس هناك خلّلت وفيهم اللي بقاله شهر مستحماش , لدرجة إن رابعه العدويه نفسها جاتلي في المنام وقالت لي الميدان اللي طلعت بيه من الدنيا بقى مزبله يا محمد , وقالت إنها بتفكر تعزّل من المنطقه , وتاخد شقه تقسيط في المدن الجديده , سألتني عن التجمع الخامس قلت لها التجمع لأ , البنطلون لأ !!.

July 18

مسيره معدّيه من تحت البيت في عذبة النخل حاليا , قوامها 79 فرد ونص , بتهتف ( الشعب يريد الثوره من جديد ) شايلين علم كبير شبه علم الزمالك , الهتاف ده مع رفعة الجسم لفوق ده شغل ألتراس , الله بقى هو ابو اسماعيل لسه فيه النفس ؟! , عموما الله يرحمكو يا 79 ..دانتو داخلين في قلعة الأقباط بخطى ثابته , شكل اللي بعتكو ده بعتكو فعلا ...يعني لبّسكو في الحيطه !!.

في إعلان تلفزيوني للتبرع لمركز مجدي يعقوب للقلب , المشهد فيه مجموعه من أطباء القلب المتخصصين ومعاهم طبيب بدقن ( سلفي ) ! , في الحقيقه وبحكم طبيعة شغلي أقدر أقول إني قابلت أطباء قلب مصريين كتير أوي , في مصر والسعوديه , وأزعم إني مشفتش طبيب قلب بدقن ( الطراز السلفي ) ! , في لحظه كده قلبي اتقبض , وقلت مصيبه لا يكون أسطورة الطب في العالم مضطر إنه يجيب في الإعلان بتاعه واحد بدقن عشان هو متهم يا ولداه بإنه مسيحي , أه وعهد الله , طبيب كبييييييييير أوي بس تهمته مسيحي !!.

بص يا مولانا , هي الحكايه باختصار إنك قدام اختيار من اتنين مفيش غيرهم , يا إما تضحي بالإرهابيين دول يا إما تضحي بسينا , واختار انت بقى , أنا عن نفسي شايف إننا نضحي بالإرهابيين لأن سينا مش هنقدر نعوض ذره واحده من ترابها , أما الإرهابيين لو صعبانين عليك يعني فاحنا ممكن نحتفظ بإرهابي واحد وإرهابيه واحده ونجوزهم لبعض , وفي ظرف كام سنه يكونو خلفو لنا كام عيل إرهابي من النوع اللي بيرضع ديناميت ونابلم , وابقى احتفظ بيهم في مكان معزول , كنوع من المحافظه على الكائنات والحشائش النادره !!.

Top of Form

445

Bottom of Form

وأنصار الإخوان نزلو يعتصمو في رابعه عشان 4 أهداف رئيسيه , أولا يرجعو مرسي للرئاسه , ثانيا يرجعو الإخوان للحكم , ثالثا يقضو على ثورة 30 يونيو , رابعا يعملو كحك العيد ! , وانا عشان عارف كويس إمكانياتهم البشريه والعقليه الهائله عندي إحساس إنهم هيفاجئو الجميع في اللحظه الأخيره و هيتألقو و هيقدرو يعملو كحك العيد !!.

لو عايز تعمل مصالحه وبتتكلم عن ( الإخوان الفصيل الوطني ) , أرجوك وقّف أي واحد من اللي معتصمين في رابعه واسأله : إيه رأيك في اللي بيحصل في سينا و جنودنا اللي بيتقتلو كل يوم ؟ اسمع منه بقى وبعدها يا سيدي ابقى اعمل لهم مصالحه ولا عجين الفلاحه حتى !!.

نياهاهاهاها , واحده ست بتهتف في رابعه والنسوان بيرددو وراها ( إرحل يا سيسي , مرسي هو رئيسي , يا سيسي يا جبان يا عميل الأمريكان , ...و معرفشي ايه كده ) , شكلهم من أهالينا الغلابه , المهم إن طريقة هتافهم و نبرة صوتهم فكرتني بأغاني الأفراح بتاعة البلد عندنا زمان , ده هتاف أفراح شعبيه مش هتاف ثورجيه , والنبي لو الستات دي خدت فرصتها في رابعه وحبّت إنها ترتجل وتبدع هتهتف وتقول ( ياللي عالترعه حوِّد عالمالح...البت بيضه والشعر سايح ) !!.

الأيام اللي فاتت والناس اللي بتطلع تتكلم على منصة رابعه أثبتت لي إن الإخوان معندهمش كوادر , لأ خالص , الإخوان عندهم مباتشية أفراح !! , أفندينا وصل ................. وصل وصل وصل .

July 17

وبعد ما أيمن نور يخلّص الإعتكاف ( الإجباري ) بتاعه , هيروح لجميله اسماعيل ويركع على رجليه وعلى طريقة أحمد حلمي في فيلم عسل إسود لما قال ( أنا مصري , أه والله مصري , وحتى اسمي مصري كمان ) هيقول أيمن نور لجميله اسماعيل ( دانا ليبرالي , والله العظيم ليبرالي وحتى اسمي أيمن نور كمان مش وجدي غنيم ) , واحتمال يرسم تاتو على دراعه لصورة البرادعي , أصل التعريض ده فن زي رقص الباليه , وأهم حاجه فيه إنك تعرف تمشي على طراطيف صوابعك , وتوصل لحركه معينه كده يحتار فيها الأطبا والمشاهدين , وتلاقي الواحد مننا بيسأل نفسه ( يا ترى الراقص المحترف ده رافع إيديه لفوق ولا دي رجليه
) ؟!!

والناس اللي عايزينا نعمل مصالحه معاهم بيقولو إن السيسي كان بيقول لظباط الجيش في التحيه العسكريه ( من ربكم الأعلى ؟) , والظباط في نفس واحد يقولو ( عبد الفتاح السيسي ............... خزاعه ...خزاعه ) , طب وعهد الله قناة الجزيره دي لولا الملامه كانت تجيب راجل مربوط في شجره وعسكري بيجلده بالكرباج وهو عمال يصرخ ويقول ( أحدٌ أحدْ ) , ولو فتحت الكادر ( ولا مؤاخذه ) شويه كنا هنشوف صورة راجل اسمراني كده مربوط على صخره وبيقولو ده سيدنا بلال ابن رباح جاي يعتصم معانا في رابعه !!, لا يا مولانا مفيش مصالحه مع الناس دي .........وثيقة المصالحة أكلتها العته ولم يبقى منها إلا إسم ( مصر ) !!.

هدم الأنفاق بين مصر وقطاع غزه بيعني باختصار إننا بنسد جحور التعابين , وأعظم حاجه في ثورة 30 يونيو إنها أزاحت حكم اللي كان بيقول لنا ويحاول يقنعنا إن التعبان ده قريبنا ومش بيعض ومن النوع المألوف ...كان ناقص يقول إنه تعبان بالاستيك !!.

July 16

وتصدق بالله يا محترم ؟ الإخوان دول لو فكرو يعتصمو في القطب الشمالي أو في صحراء سيبيريا أول حاجه هيعملوها إنهم يبنو جامع كبير , مش عشان يصلّو فيه ولا حاجه لا سمح الله , عشان يتظاهرو ويعتصمو جوه الجامع ده لو الشرطه قرّبت منهم , ويقولو ( لمراسل الجزيره في القطب الشمالي ) , ضربونا يا بيه واحنا بنصلي , ضربوني بالخرطوش في عيني وانا ساجد !! , أه يا عيني !!

ومما ورد في الأثر الإخوانجي , أن الرحال تُشد إلى ثلاث مساجد , المسجد الحرام والمسجد النبوي ........ وكوبري اكتوبر ( بديلا عن المسجد الأقصى ) !!

قصه صغنونه لستنا أسماء كرمان و ستنا توكّل محفوظ !!
.
من فتره كده أمي تعبت أوي , ودخلناها المستشفى ( الإنعاش ) , مكانتش قادره تاخد نفسها , قامو حطّوها على جهاز تنفس صناعي ووصلوها بأنبوبة أكسجين , بدأت تاخد نفسها بصعوبه , لكن يشاء السميع العليم إن يجيلنا واحد قريبنا من بعيد غتت وغبي , ويدوس برجله على خرطوم الأكسجين !! , فجأه أمي بدأت حالتها تنتكس تاني , ولما عرفنا إن الراجل الغتت هو السبب وحاولنا نفهمه بالزوق إنه يشيل رجله مفهمش أو عمل نفسه مش فاهم , وقبل ما تدخل أمي في مرحلة صعبه مفهاش رجوع ربنا بعت لنا راجل ابن بلد وجرئ شال الغتت ورماه من الشباك , أمي رجعت تتنفس تاني وبدأت حالتها تتحسن , في اللحظه دي مركزتش الراجل ابن البلد ده كان مواطن عادي ولا عسكري جيش , المهم إن أمي عادت لها الحياه من تاني , وأيا ما يكون اللي عمل كده فانا مدين له بجميل العمر , فهمتي يا أختي الناشطه الدولاريه الشهيره ؟!

يخرب بيت أبو النشطاء , قال هنعمل انتخابات الأول وبعدين دستور !! , بنلف في نفس أم الدايره كأننا بنعمل فطير , الله عليك يا عم الناشط الفطاطري , دي صباح قرّبت تموت يا ناس واحنا رافضين نتولد , واقطع دراعي إن الناشط من دول بيبني البيت ويشطبه وبعد كده بيروح للمهندس يقول له والنبي اعمل لي رسم كروكي للبيت ده بقى , لا نوشتاء نوشتاء مش أي كلام , وبالسمنه البلدي كمان !!.

July 15

أصدقائي الأعزاء , أبوس إيد اللي خلفوكو تفهمو بقى , مفيش حاجه اسمها حركة أحرار الإخوان , ولا حركة المنشقين عن الإخوان , ولا حركة الإخوان الطيبين , ولا حركة الإخوان اللي مش إخوان أوي , لو كان أبو الفتوح انشق عن الإخوان يبقى غيره ينشق , ولو كان الجهاديين والإسلاميين رمو السلاح وعملو مراجعات زي ما قالو يبقى غيرهم يعملها , فقعتو مرارة أمي , وبتشيرو الأخبار بهطل , و أي عيل برياله بيضحك عليكو ويعمل حركه وحزب ويقولك أنا منشق , وانت بقى تقعد تقول له روح ياد يا منشق تعالى ياد يا منشق وكده يعني , وتصيّته في المنطقه , أقسم بالله لو استمريتو على الغباوه دي مصر هيجي عليها يوم ويحكمها أي حد وأي حاجه إن شا الله كلب البحر , ويبقى احنا نستحق عن جداره لقب ( الشعب اللي انضرب 19 قفا على سهوه !!
).

يا دين النبي , أنا في البلد عند أمي ( قريه صغيره ) , وبناتي حكمو عليا دلوأتي إني أقف معاهم في الشارع قدام البيت عشان يشوفو المسحراتي وهو بيطبل !! جبت اللاب وقعدت على حجر جنب البيت وبكتب حاليا ...الناس معدّيه من قدامي بماكينات الري والبهايم وسارحين الغيطان , وانا عمال بكتب كلمه واقول ( الله يسلمك ..اتفضلو والله , نتسحر سوا ) ,فكروني بطفولتي الجميله , عظيمه يا مصر يا أرض اللوا !!

أتوقع إن الست داليا السعدني تعتذر بكره الصبح عن تولي وزارة البحث العلمي بعد كمية الألش والمعاكسه و البصبصه اللي حصلت الليله دي , واحتمال كبير إن جوزها يحلف عليها بالطلاق ماهي نازله من البيت ( اقعدي هنا يا وليه , عليه التلاك مانتي نازله ولا شايفه الشارع , هو انتي فاكره نفسك متجوزه محمد عبد المنصف ؟) !!.

بعد ما شوفت صورة وزيرة البحث العلمي الجديده أقدر أقول إن الإقبال على البحث العلمي هيبقى تاريخي يا فندم , ويا ببلاوي أفندي احنا كده مش محتاجين ميزانيه للبحث العلمي , الشباب هيدرسو ويحضرو الماجستير والدكتوراه على نفقتهم الخاصه و هينتشرو في المعامل ..................ويشتغلو بلقمتهم !!.

طول عمري بقول الإخوان يعرفو يعملو مظاهره لكن ميعرفوش يعملو ثوره , اليمين المحافظ مبيعرفشي يثور , ممكن يتظاهر أو يتظاهر بإنه بيتظاهر !! , القاعده في رابعه والإعتصام الإجباري والوجبات والتقسيمه واللي ضايع منه موبايل واللي بتدور على عيل ضايع واللي واللي بيعيدو للأذهان فكرة رحلات الكشافه بتاعة الإخوان , وبصراحه يعني واحقاقا للحق هما شاطرين في موضوع الكشافه ده , بس عايز أقول للمعتصمين إن رحلات الكشافه بتاعة المدارس ممكن تغيّر رائد الفصل أو بالكتير الأخصائي الإجتماعي بتاع المدرسه , إنما متغيرشي نظام حكم في دوله بحجم مصر , قومو يا شباب وارجعو بيوتكو واتعلمو يعني إيه إنسان ثائر , بالمناسبه واسمحولي يعني أقول لكو باختصار ( قطعان الخرفان لا يمكن أن تثور حتى لو أكلها الذئب) !!.
بالمناسبه كمان إنتو أول قطيع خرفان في التاريخ البشري يتظاهر ضد الراعي تنفيذا لتعليمات الذئب ) !!

يا سلاممممممممممم , أخيرا بقيت أسمع أسماء وزرا من النوع المألوف ...بعد سنه من التنقل في الوزارات بين حسن أبو لغد وزيزي سيلان ومتولي و سيد بشله وفي كل مره الإخوان يقولو دي حكومة جباره ..دي كلها طيارين وبيرأسها عبد الحليم حافظ !!

July 14

المتحدث بإسم الإخوان بيقول : مدة عزل مرسي لن تُحسب من فترته الرئاسيه !! يعني تقريبا هنعتبرها أجازة حضانة أطفال أو هنقول كان في الحمام ............ , يا كابتن يا كابتن , انت خايف على الوقت كده ليه ؟ هو انت حاجز مده ولا مدتين ؟ طيب اقول لك على اقتراح حلو ...إحنا ممكن نقضيها بوس بوس وتطلع من هنا سلطان زمانك , يا خراشي وكمان جايبين لي راس معزه !!.

والإخوان كل ما يتزنقو في الركن يقيمو الصلاه ويقومو يصلو , في أي وقت مش مهم , وصورينا يا جزيره , ركزي هنا يا جزيره , ولو اتزنقو جامد بيفجرو خط الغاز في سينا , ولو واحد فيهم جاله اسهال أو حب شباب فلزما وحتما ولابد إنه يقول إن الإسهال وحب الشباب أصابوه ( في مقتل ) بينما كان يؤدي صلاة الفجر , أه الفجر , حتى لو كنا بعد العصر !!

July 13

أنا ضد اتهام اللي في رابعه العدويه بجهاد المناكحه أو الزنا لا بالتصريح ولا بالتلميح , مش عشان خالد عبد الله كان نموذج ابن صرمه وقذف اللي في التحرير نعمل زيه ومش عشان قالو علينا كفار وممولين وأنجاس هنعمل زيهم , من زمان وانا بقول ومحدش صدقني ( إحنا الليبراليين أولى بالإسلام وبالدفاع عنه من هؤلاء المدعين الخوارج !! ).

فرصه هايله للعمل بالجماهيريه الليبيه !!
.
طيارات الجيش بترمي منشورات على معتصمي رابعه العدويه , بتطالبهم بفض الإعتصام وتديهم الأمان , الجيش كده بدأ يقع في الغلط , إنت مش عارف يا سيسي إن أغلب معتصمي رابعه مش بيعرفو يفكو الخط ؟! كان من باب أولى ترمي عليهم كاسيتات مسجل عليها منشور الجيش وعلى الكاسيت زرار أخضر كبير للتشغيل مرسوم عليه صباع الفنجري !
أهو دلوأتي هتلاقي هرج ومرج في اعتصام رابعه وكل واحد ماسك المنشور في إيديه وعمال يسأل أي حد لابس قميص وبنطلون ( يا بلدينا يا بلدينا بيقول ايه المنشور ده ؟ .... هو باقي كتير على طرابلس ؟! ) , وواحد تاني إخوانجي مثقف فهم اللعبه بتاعة الجيش وعمّال بيقول للي حوالي ( يا رداله ...يا رداله , السيسي بيضحك علينا وعايز يسفّرنا السعوديه ) !!.

Top of Form

5884

Bottom of Form

يقولون أن ديناً جديدا قد ظهر في ( رابعه العدويه ) لنبي الله صفوت حجازي , وأن أنصار هذا الدين الجديد محاصرون الأن في شعِب صلاح سالم !!
مرحى مرحى , قشطه يا برنس , إحنا دلوأتي نتسحر ونشرب لنا كاسين عرق سوس وبكره ننزل لولاد دين صفوت حجازي بالبرطوش ...اليوم خمر وغداً أمر !!.

إعلان غير مدفوع الأجر
.
في هذا العام سوف لن نشتري كعك العيد من محلات ( العبد ) , سوف نشتري كعك العيد من فرن الإخوان الموجود في رابعه .
في هذا العام سوف لن نشتري بقره , سوف تكونين أنتِ البقره !!.
صديقي الليبرالي واليساري الملحد الزنديق , بعدما تنتهى من صيام شهر رمضان أيها الفاسق الماجن أدعوك أن تشتري كعك العيد من أفران حجازي , العنوان ميدان رابعه العدويه , لديهم كعك بالخرطوش وكعك بالديناميت وكعك بالسم سم , وفريق ديلفري من حركة حماس مجهز بأحدث الموتوسيكلات والأر بي جيهات , اشتري من حجازي ياواد يا مغازي ...تعاطفك لواحده مش كفايه !!.

جميل أوي شعار الإخوان ده , جميل وعبقري عبقرية التنين , قال بيقولك ( إرحل يا سيسي ..مرسي هو رئيسي ) !! , العبقريه في الشعار بتكمن في التناسق الفكري والهارموني , ماهما يا سيدي عايزين واحد اسمه السيسي يرحل عن الحكم مع إنه مش بيحكم عشان واحد اسمه مرسي يرجع للحكم مع إنه مكانشي بيحكم برضه !! , يعني على طريقة درأ المفاسد مقدم ..والباقي تقسيط على 7 سنين !! , أنا ممكن بقى وعلى نفس النسق أعمل مليونيه بكره في سوق ستوته في المنصوره واحمل شعار ( إرحل يا عم إمام ..المعلم ابراهيم بتاع البليله هو الراجل التمام !! )

عزيزي الشاب الإخوانجي والسلفنجي المعتصم الأن بميدان رابعه العدويه , من حقك أن تعتصم طالما أنك صاحب قضيه , ولكن تذكر جيدا قضيتك وهدفك الذي اعتصمت من اجله , فبعد أيام قليله سوف يخرج عليك القيادي الذي أمرك بالإعتصام ليأمرك ثانية بفض الإعتصام , بينما شيئا من أهدافك التي اعتصمت من أجلها لم يتحقق !! , فلا مرسي عاد إلى قصر الرئاسه ولا الإخوان عادو إلى سدة الحكم , حينها فقط سوف تعلم وتتأكد إن اعتصامك لأسابيع متتاليه وبعدك عن زوجتك وأطفالك كان ورقة ضغط فقط ممن يصدرون إليك الأوامر من أجل الخروج الأمن لهم دون محاسبه أو سجن أو مسأله , قضايه كثيره تنتظرهم , إما تحريض على القتل أو صفقات مشبوهه مع الأمريكان والصهاينه والقطريين , كارثة قتل جنودنا في سينا وملفات أمنيه عبثت بها أياديهم , ربما تعلم وقتها أنك كنت مجرد مُستخدَم ( بفتح الدال ) , مجرد ( كوره شراب) تعبث بها أقدام أسيادك وألهتك العوالي !!.

July 12

إنما أعجب حاجه في ثورة 30 يونيو دي , إنها أزاحت حكم الإخوان ومع ذلك نزلت النهارده أشتري عيش لقيته متوفر وكتير , أحجام وأشكال , الله بقى ؟ إزاي ياخوانا فيه عيش مع إن مفيش باسم عوده ؟! , دانا كنت فاكر إن باسم عوده هو ( إله الفينو ) عند القدماء المصريين !!.

أرجو من الساده القائمين على ما يسمى بالمصالحه الوطنيه أن ينتبهو هذه المره , ويعلمو جيدا أن حرف واحد خطأ في وثيقة واتفاقية المصالحه ربما يكلفنا الكثير جدا , ولا يُلدغ المؤمن من جحرٍ مرتين , يجب عليهم أن يتذكرو كتابة هذا البند بدقه شديده ( وينبغي على الإخوان بموجب هذا الإتفاق التخلي عن الأراضي المصريه التي احتلوها في 2012 و 2011 !! ) , تذكرو جيدا أن تكتبوها هكذا ( الأراضي بالتعريف ) وليس ( أراضي ) !!.

نياهاهاهاها , الإخوان في رابعه سمعو كلام أحمد منصور ( إبن موزه البار ) , وبقو يعملو زينا بالظبط , رافعين كلهم علم مصر ( بتاعنا ) ومشغلين أغنية ( بسم الله ...الله أكبر بسم الله ) بتاعة الفاسق الزنديق عبد الحليم حافظ اللي كنا مشغلينها في 30 يونيو , أصبرو عليهم يومين كمان في الحر ده وهتلاقيهم شايلين صور البرادعي والسيسي !!........ وزمان قالو إن الصعايده لما عملو القناه التامنه في التلفزيون المصري وحبو إنهم يقلدو القناه التانيه بتاعة القاهره فقالو في الإعلان ................ ( القناه التامنه .....تشانيل تو ) !!.

كنت فاكر إن الطبال علاء صادق هو أول واحد هينط من مركب الإخوان لما تغرق , بس اتفاجئت إنه لسه شغال وطبلته سخنه , يبدو إن ال 8 مليار اللي أخدها الشاطر من أمريكا مقابل بيع سينا لحماس لسه باقي منهم شوية فكه , وعلاء صادق حالف مبيسيبشي ولا فتفوته قبل ما يمشي !!.

July 11

الجامع مليان بدون الإخوان !!.
.
في صلاة العشا والتراويح كان الجامع والشارع اللي جنبه مليان مصلين مع إن الإخوان ( والسلفيين ) متجمعين في رابعه , تقريا مفيش ولا دقن شوفتها , يعني تقدر تقول إن تجمع الإخوان في رابعه مش سايب أي ثغره ولا مكان فاضي في المساجد , هنا بقى السؤال للإخوانجيه " إنتو كنتو بتصلو التراويح قبل كده فين ؟! ويا ترى الملايين اللي في الجوامع حاليا مش في رابعه هما كمان كفار وضد الشرعيه والشريعه والشعريه ؟!.

إحنا داخلين على انتخابات جديده , توقعاتي إن الإخوان هيلحقو نفسهم في اللحظه الأخيره ويعملو شنط رمضان زي كل سنه ( من فلوس أمريكا طبعا ) , بس المره دي ومن باب التمويه هيكتبو عليها من بره ( حزب النور ) ويرسمو على الكيس من جوه صورة ابو الفتوح !!.

إنما سؤال جه على بالي , الساده المستشارين أبناء مكي ( أحمد ومحمود ) , أنجال عائلة ( إبو ) بالإسكندريه ومعاهم الباشمهندس اللي سلق أفضل دستور عرفته البشريه والمجموعه الشمسيه , الدستور التوافقي اللي قالو هيلم شمل المصريين ويجيب الإستقرار ...الناس دي فين دلوأتي ؟ هو ليه البلد دي كل واحد فيها بيهد حته من جدارها وياخد حسنته ويقعد في بيتهم , وكأنَ شيئاً لم يكن ............. وبراءةُ الأطفالِ في عينيه ؟!.

وقالك واحد من المعتصمين في رابعه شاف صلاح الدين القليوبي في الميدان واقف معاهم !! , وقبل كده شافو سيدنا جبريل والشيخ العريفي شاف الملايكه بيجاهدو في سوريا , إنما سؤالي للي شاف صلاح الدين الأيوبي : يا كابتن يا كابتن بالله عليك ماشفت فرجينيا جميلة الجميلات معاه ؟! , طب كل ده من كام يوم اعتصام في الحر , باقي لكو أسبوع واحد يا بهاليل السيده وتشوفو مركب سيدنا نوح وهي بتعدي في من تحت كوبري قصر النيل !!.

July 10

يا سلاممممممممممممم , أخيرا وبعد 17 ساعه صوم لقيت قدامي كوباية النسكافيه السيك ( مش بتاع الأطفال ) , أبوسِك منين طيب ؟!.

القرضاوي بيقول إن متظاهري التحرير كل واحد أخذ 1000 جنيه عشان يخرج عن الشرعيه !! .
يا خساره انا كنت في المنصوره ونزلت ميدان المحافظه ...خدت 300 بس , قالولي أصل انت من الأقاليم وفلاح وكفايه عليك كده , أنا أطالب حكومة الببلاوي بمساواة متظاهري الأقاليم بمتظاهري التحرير ( لا للدوله المركزيه ) , وال 700 جنيه الباقيين هاخدهم يعني هاخدهم يا ببلاوي , وديني مانا عاتقك , واسمع بقى : فلوسي هاخدها كاش موني مش هقبل شيكات مؤجله ولا كمبيالات ماهو انا مش المعلم ( الضو عواجه )...........ولا بلعب في الزمالك ) !!.

عن أهمية الرضاعه الطبيعيه !!
.
لو حضرتك ضليع في علم الحيوان ( الزو أولوجي ) زي مانا ضليع كده في علم الكرات والفجل الرومي , هتعرف إن الغزاله الصغيره ( الرضيعه يعني ) والديب الصغير ( الرضيع ) الإتنين بيبقى شكلهم بيس خالص وسوكيوت , ومش بيعضو ولا بيقتلو حد , عشان كده احنا في مصر قررنا ومن باب المساواه والوحده الوطنيه والعداله المستخبيه في علبة الحلاوه الطحنيه إننا نمسك ببرونه ( بزازه ) ونرضّع صغار الغزلان جنبا إلى جنب مع صغار الدببه , لأن الديب الصغير مالوش ذنب إن أبوه الديب الكبير شرّاني وقتال قتله وتاريخه أسود ومهبب , وكلنا عشم وأمل في ربنا إن الديب الصغير ده لما يكبر يبقى غزاله أو فرس أو حتى سمكه بلطيه !!.
................. عن مقولة وأفشخانة ( الإخوان فصيل من المجتمع المصري ) أتحدث ....................وكما قال الشاعر البدوي ( فمنْ أنباكَ أن أباكَ ذيبُ ؟!!).

July 9

أصدقائي الأعزاء يا ريت يعرفوني لو كان حازم الببلاوي محكوم عليه في أي قضايا أو بتحوم حوله الشبهات , أما عامل السن فانا فاكر مداخله للجنزوري مع قناه تلفزيونيه والمذيع قاله بس السن ؟ الجنزوري قال للمذيع ( أنا مش جاي رئيس وزاره عشان أشيل حديد !! ) , ومعتقدشي احنا جايبين الببلاوي عشان يشيل حديد أو يرمي الجله ( بضم الجيم ).
ياريت تفوقو بقى وتعرفو إن معركتنا حاليا مع نظام إرهابي بيحاول يدخل البلد في حرب أهليه , وندعم كلنا الجيش , فرصة الشباب جايه بس الوضع حاليا صعب جدا على الكهول المخضرمين بالسياسه ما بالكم بالشباب .

رسالتي إلى الدكتور البرادعي وكل أصدقائي المحترمين ( زياده عن اللزوم ) , المتربيين ع الغالي , بتوع الدش واشر والأنسر ماشين واللبان السحري والجل أبو لمعه , بعد انتشار موضه ( الإخوان فصيل وطني ) , ويجب لمّ الشمل والمصالحه الوطنيه وإيد واحده ...وركبه حديد !! , ممكن تعمل حضرتك اختبار بسيط جدا وانت تعرف الإخوان فصيل وطني ولا لأ , وبلاش الشعارات لأننا هرمنا , وعهد الله هرمنا , اسأل أي واحد إخوانجي , أي واحد , أه والله أي واحد , وقول له ( لو حصلت خناقه على ملكية قطعه أرض مصريه بين اتنين , واحد منهم مصري قبطي والتاني مسلم حمساوي , هتقف سيادتك مع مين ؟! , أو ممكن تختصر وتسأله يعني ايه وطن ؟ )...وبعدها كلمني عن الفصيل الوطني .
بالمناسبه وعلى حد علمي , القانون المصري بيجرم ملكية الأرض المصريه على غير المصريين !!.

كل سنه وكل المصريين ( مسلمين وأقباط ) بألف خير , رمضان بعد بكره واحنا هنصوم بإذن الله زي كل سنه يعني وزي 1400 رمضان فاتو قبل كده , ده طبعا بعد إذن حزب النور والدكتور أبو الفتوح !!.

July 8

خبر تتناقله وكالات الأنباء : أمريكا تدرس ما إذا كان ما حدث في مصر انقلابا !!
ترجمة الخبر : أمريكا تبدأ مرحلة المفاوضات والمساومه وتبحث عن المكاسب الممكنه مع عدلي والسيسي وجبهة الإنقاذ قبل أن تمنح الإخوان الشالوت الأمريكي المعهود لكل حليف !!.

July 8

للبيع سياره لانوس 2010 عامله 7 ألاف كيلو , رخصه 3 سنين بإسمي , الوسطاء يمتنعون , يشترط موافقة حزب النور على عملية البيع ومباركة المشتري !!.

رسالتي إلى عِذْبة قطر وقناة الجزيره : اصبرو شويه , دوركو جاي ,.................................... صبراً أل جاسم , فإن موعدكم النفخ !!.

انسحاب حزب النور من مفاوضات خريطة الطريق , يعني مش عشان البرادعي كان هيشكل الحكومه؟ ولا عشان أنصارهم قاعدين في رابعه ؟ و لا عشان هما مستنيين يوصلو للحكم على ضهر دبابه أمريكيه !!.
عموما انسحابهم من النظام الحاكم حاليا هيعمل لنا مشكله كبيره أوي في إدارة البلاد , دلوأتي (في غياب حزب النور ) , عدلي منصور والبرادعي والسيسي لو حبو يدخلو الحمام ويتوضّو قبل ما يصلُّو مش هيعرفو يدخلو الحمام بالرجل اليمين ولا الشمال , يبقى أزاي هيقدرو يحكمو مصر ؟!!

في إحدى القرى السياحيه بالعين السخنه , القريه جميله وهاديه , البحر رائع وحمام السباحه ممتاز , البلكونه شايفه البحر والبيسين , الأكل معقول أوي , إنما اللي أسعدني جدا جدا ربما لدرجة البكاء هو مشهد غير مألوف في القرى السياحيه , مشهد اتنين من جنود الجيش على شاطئ القريه قبل ادان المغرب مباشرة , الجنود شايلين سلاحهم بحماس ( ومأفزين ) , شوفتهم بيتكلمو مع واحد من المسئولين في القريه قبل ادان المغرب وأغلب ظني إن وجودهم له علاقه بخروجنا من البحر والبيسين في وقت مبكر ربما لدواعي أمنيه , في اللحظه دي حسيت إن مصر رجعت تاني لينا , ولو صدق حدسي بأن الجيش يقوم الأن بتأمين حدودنا البريه والبحريه حتى في القرى السياحيه لمنع دخول الأسلحه والإرهابيين , لو صدق توقعي وبعيدا عن التنظيرات السياسيه فأنا أنحني احتراما وتقديرا لهذا الشخص المصري المجهول المسمى عبد الفتاح السيسي !!.

حزب النور يرفض تعيين البرادعي في منصب رئيس الحكومه , حزب النور يرفض تعيين البرادعي في منصب نائب رئيس الجمهوريه , ............. حزب النور يعيش الأن بمبدأ ( خُلقنا لنعترض .......... ونصلح راديوهات !! )
.
انتظرو خلال يومين خبر يقول ( حزب النور يرفض تعيين البرادعي في منصب مواطن مصري ويطالب بشطب جنسية البرادعي المصريه ......... ويصلح راديوهات ) !!.

July 7

مش بحب كلمة ناشط سياسي , كلمة مواطن أفضل بكتير , ماهو حضرتك احنا بنتكلم عن حال بلدنا بس , وبنفكر مين يحكم ومين أفضل ونعمل ايه ونحل المشاكل إزاي ؟ مش فينا حد بيتكلم عن نظام الحكم في فنزويلا ولا الخطوات التركيه للإنضمام للإتحاد الأوروبي , أي حد بيحب بلده وعنده ذرة عقل لازم يلعب الدور ده , دور المواطن , أما بقى حزب الكنبه اللي شعاره دايما ( طالما بعيد عن ............. يبقى خلاص ) فده نقدر نقول عليه حزب ( جحا ) , ومصر للاسف فيها أكتر من 70 % أعضاء في حزب جحا وهو ده اللي خلى الإسلاميين البهاليل يركبو على ................ !!.

July 7

صباح الخير , من كام يوم الجيش وقف مع الشعب وأمهلنا 48 ساعه لاحتلال الميادين , ومن يومين أمريكا وقفت مع الإخوان وأمهلتهم 48 ساعه لاحتلال الميادين ( فاخترْ لنفسك أي الدار تختارُ ؟ ) , الحكايه مش لعبه أصلها وأمريكا مش هتسيبك تنضف وتمشي في طريق صح , في ثورة 25 يناير أمريكا دعمت الإخوان للإستيلاء على السلطه , وفي ثورة 30 يونيو ( زرعت ) لنا السلفيين زي العقله في الزور , أنا ضد العنف اجمالا بس أحيانا بعتقد إن أي خروف ماشي في رابعه حاليا بيهتف ويقول ( يا سيسي يا جبان يا عميل الأمريكان ) لازم ينضرب بالنار بتهمة و( كبيرة) الغباء !!

سوف يشهد التاريخ بكل أسى وأسف وغثيان إن حزب النور وافق على شخصية تافهه زي هشام قنديل إنه يبقى رئيس وزراء ومش عاجبه شخصيه عظيمه زي البرادعي !! , هو انا بس عندي سؤال.... لما بهاليل ودراويش حزب النور هيشتغلو سياسه في مصر أومال مين اللي هيقرّي عالتُرب ؟!.

July 6

رأيي الشخصي
.
اختيار البرادعي رئيسا لوزراء مصر هو اختيار مهم ومفيد جدا لمصر و ضار جدا بمحمد البرادعي , في العرف المصري إن الشخصيه اللي بتتولى منصب بتتحرق , يعني هيبقى صعب إنه ينزل انتخابات رئاسيه , كده البرادعي بيحرق نفسه وبما إنه شخصيه محنكه سياسيا فأكيد لما قبل الترشيح يبقى عارف إنه هيبقى كارت محروق في انتخابات الرئاسه , معقوله يكون البرادعي عارف وبيضحي بحقه وحلمه الشخصي عشان خاطر مصر؟! ولا يكون ارتضىى بمنصب رئيس الحكومه لأنه حاسس إن منصب الرئيس القادم محجوز للسيسي ( متطلبات المرحله ) ؟!

July 6

الله بقى , ده الموضوع طلع بجد مش أوشاعه , محمد بديع مرشد ( النسوان ) نزل ميدان رابعه وهو ( قصدي هي ) لابس ( يوووووووه قصدي لابسه ) نقاب !!.
بكده نقدر نقول إن محمد بديع مش مرشد الجماعه ولا حاجه , لأ خالص , ده هو الجماعه ذات نفسها !!

July 6

الحكايه باختصار وأمانه
.
عزيزي عاصر اللمون , عزيزتي عاصرة اللمون , المعلّقه , المذبذبه , لا إلى هؤلاء ولا إلى هؤلاء , أيهما تفضل لحكم مصر , رئيس أرعن كاذب تحركه جماعه فاشيه متخلفه وفي الخلفيه إرهابيين يحملون السلاح أمثال عبود الزمر وعاصم عبد الماجد , أم رئيس قاضي دستوري متزن وفي الخلفيه قائد جيش مصر , خير أجناد الأرض ؟!.

نما سؤال يعني ولا مفاخده !! , هي أخبار سيدنا جبريل اللي البهاليل شافوه بيصلي في رابعه ايه ؟ وأخبار الملايكه اللي العريفي شافهم بيجاهدو في سوريا ؟! مش قلت لكو التجاره بالدين ممكن تكسبك زي المخدرات بالظبط , وممكن تبيعك هدومك زي المخدرات برضه ؟!.
قمار يعني , خدلك سيف بقى...... وكمان سيف , إنزلي بالسته, قصدي ب 30 سته !!

أنا واحد من هؤلاء الذين يؤمنون بضرورة وأهمية سجن قيادات الإخوان ومنع الإتصالات عنهم من باب درء المفاسد , لكني ضد تعذيبهم وانتهاك أدميتهم كبشر .
أنا ضد دخول الإخوان كجماعه وحزب في السياسه لكني ضد قتلهم والتنكيل بهم .
سميها بقى شيزوفرنيا , سميها بلاستيك , زي ماتحب !!

صباح الخير , 3 ساعات في الطريق من عين شمس للعباسيه , دراويش المعزول قافلين صلاح سالم والأوتوستراد , المهم بقى رافعين شعارات بتقول ايه ؟ ........ إسمع يا سيدي ( حا شي...أمريكا بتمشيه !! , يا سيسي يا جبان يا عميل الأمريكان !! ) نياهاهاهاها , بانحو عالصبح كده , بانجو وكوزب عالريق يا ناس !!

أغلب ظني إن قيادات الإخوان مؤمنه ومتأكده تماما إن الدور انتهى ( جيم أوفر ) وبيحاولو يحشدو أنصارهم ودراويشهم للخروج من الليله بأي مكسب ممكن , حتى لو كان المكسب ده هو الصابونه اللي في حمام الرئاسه , يعني على طريقة عادل إمام ( العمليه دي مخودشي فيها أقل من 20 جنيه ) !!.

مقتل 5 أمناء شرطه في سيناء على يد الإرهابيين حلفاء خليفة المسلمين المخلوع , والإرهابيين نزلو علم مصر ورفعو الرايه السوده بتاعتهم على وحده هناك !! , وفيه بقى ولاد غوازي ونوشتاء وحكوكيين بيتكلمو عن مشاركة الإخوان في السياسه وبيقولو فصيل من المجتمع , ديك ابو الإخوان على ديك أبو الحكوكيين والنوشتاء والغوازي !!

July 5

لما تلاقي أمريكا بتدعم الإخوان بكل قوتها يبقى لازم تفهم إن الإخوان عايزين يعملو دولة الخلافه الإسلاميه فعلا وهيحاربو إسرائيل ويحررو القدس !! , وإن شيخ الأزهر لا يمثل الإسلام ولكن اللي بيمثل الإسلام هو أوباما ونتينياهو !!

أمريكا بتهددنا بحجب المعونه ! , والجحش ابن الجحش فاهم إن الحكايه لها علاقه بديموقراطيه وملوخيه , أمريكا يا جحش بتديك المعونه لما بتكون راضيه عن الجيش وبتحجبها لما بتزعل منه , يعني المعونه دي حاجه لها علاقه بأمن ستك وتاج راسك إسرائيل , عموما لو انت مزنوق في المعونه أوي كده مع إن قيمتها السنويه أقل من خساير ماسبيرو وجريده الأهرام في شهرين أنا عندي حل , فقد قررت في هذه الظروف العصيبه إني أجمع من الشعب المصري ما يعادل المعونه الأمريكيه , أه أنا هركب دقن وألمّ المعونه , وهو محمد حسان أحسن مني في إيه ؟ ولما أتزنق بعد كده هقول وديتها لغزه , ماهو احنا شعب بيعشق غزه , بيموت في دباديب غزه , ونستحق بجداره وبلغة العرب القدماء لقب ( كُثّير غزه ) !!

عربيات الإخوان بتلف الشوارع بالميكروفونات تقول احنا معاك يا مرسي وبتلعن في السيسي والجيش ... مع هتاف ( إسلاميه إسلاميه ) , كأننا عملنا حمله صليبيه مش ثوره شعبيه !! , ما رأي النوشتاء السياسيين , وبتوع حكوك الإنسان في الحرب الأهليه اللي داخلين عليها ؟ , ما رأيكم دام جهلكم ؟!!

دعوه للمحبه والتعايش
.
مع اقتراب شهر رمضان أوجه دعوه صادقه إلى كل الشباب الليبرالي والثورجي , في أول يوم رمضان أرجو من كل صديق ليبرالي إنه يعزم صديق إخوانجي على الفطار , حتى لو هتفطرو عيش وجبنه , الجوده بالموجود يا صديقي , وبعد ما تفطرو وتصلو المغرب والعشا ممممممممممممم تبلغ عنه الجيش عشان يقبضو عليه , وبكده تبقى خدت أجرين , أجر إفطار صائم وأجر القبض على عضو في تنظيم إرهابي سري !!.

صباح الخير , ظاهره غريبه جدا حصلت النهارده , نزلت من شويه أصلي الجمعه , لقيت جامع مفتوح وناس قاعدين وشيخ واقف على منبر , الشيخ كان بيتكلم عن حرمة الدم وسماحة الإسلام , وبعدين قال إن فيه شهر كده هيبدأ بعد كام يوم اسمه شهر رمضان والناس بتصوم فيه , يا سبحان الله , ولما رجعت البيت لقيت مصحف مكتوب فيه أيات ( متمسحتش يعني ) , إزاي كل ده بيحصل رغم رحيل الإخوان ؟ , أنا مش مصدق عنيه , دانا كنت خلاص جهزت المعبد والأصنام و الجواري و خمور الأندرينا !!.

أسماء محفوظ على تويتر بتسأل الحقوقيين وتتسأل : ( ليه قيادات الإخوان بتترحل على طره وبتهمة ايه ؟! ) , ........ إنتي خايفه يا بيضه لا رجليكي تيجي في الخيّه ؟! , لا متقلقيش , هقولك معلومه عن صديقك الإخوانجي , هو مش هيقول إسمك مش عشان بيحبك ولا خايف عليكي , لأ خالص , بس عشان هو اتعود إنه يكدب !!
أما التهمه يا ستنا أسماء ( ذات الوجهين ) فهي التحريض على القتل وحمل السلاح ولو حضرتك مشغله قناة غير الجزيره حاليا كنت هتعرفي إن مطار العريش بينضرب حاليا بأسلحة الإرهابيين الثقيله.
...خليكي انتي بقى على جنب يا ناعمه يا غُريبه لحد ما نلاقيلك عقوبه مناسبه ( مثلا الجلد 100 جلده بقلم الروج ) !!.

نياهاهاهاها ,أمريكا عامله مناحه وصوان كبير أوي في واشنطن وعماله تعيط و تتشحتف على حكم حليفهم الإخوانجي !!
وزمان قال عبد الناصر : إذا رأيتم أمريكا راضيه عني وعامله صوان كبير عشاني فاعلمو أني رئيس ابن صرمه خاين !!
الله يجراك خير يا سيسي , عليا النعمه إنت طلعت واد مصري دكر , من نسل ناصر يعني , وضربت أمريكا وقطر والإخوان وحماس بشالوت واحد , يعني باختصار لاعيب حريف وجبت جون من نص الملعب بكعب رجليك !!.

July 4

أيوه يا سيدي هو انقلاب عسكري , أه انقلاب عسكري جدا رغم إن رئيس مصر حاليا قاضي في المحكمه الدستوريه مش عقيد صاعقه , ورغم إن مرسي غار بعد خروج 30 مليون مصري للشوارع ( أكبر حشد في تاريخ البشريه ) , ورغم إن البيان طلع بعد اجتماع للسيسي ضم شيخ الأزهر ( مش قائد المنطقه المركزيه ) , وبابا الكنيسه ( مش قائد الجيش التاني ) والبرادعي ( مش مدير الكليه الحربيه ) , إنما لو حضرتك حابب تقول عليه انقلاب عسكري فانا موافق ومش هزعلك , يعني تقصد حاجه غير شرعيه ؟ طيب أوكيه , ماهو لما تكون حضرتك هيجبروك على الجواز من عيشه الكيلاني لسنين طويله يبقى أكيد في لحظه كده هتنفجر وتكتشف إن أكبر حلال في الدنيا إنك تعط مع لبنى عسل !!.

أصدقائى الأعزاء المصريين والمصريات , الثائرين والثائرات , الليبراليين منهم والليبراليات , ياريت والنبي نأجل خلافاتنا الصغيره ومشاكلنا وكلاكيعنا النفسيه حاليا , إحنا يا أصدقائي بنحفر دلوأتي عشان نرمي قواعد البيت ( والسيميل ) والعمدان , لسه بدري على مانوصل لمرحلة الإختلاف في النقاشه والبياض والأباليك ونوع السيفون والستاير الشيفون ومقابض البيبان والشطافات الخارجيه !!.

صباح الخير , حاسس بانتصار شخصي معشتهوش قبل كده , بقالي سنتين وانا بحذر الناس من كدب الإخوان وتدليسهم , بصرخ واقول بلدنا اتسرقت يا ناس , توقعت حاجات كتير صح , عشان الفتره دي كانت كافيه للتأكيد إن الإخوان أغبى فصيل سياسي على وجه البسيطه , قلت إزاحتهم مش هتاخد مننا ساعات , قلت الحجر والشجر والبشر مش طايقينهم , قلت السلفيين بتوع مصلحتهم وأول ناس هينطو من المركب , الحمد لله , حمد الله على سلامتك يا مصر , بس في ساعة النصر مقدرتش أحضر , اتحبست هنا في المنصوره والطريق اتقفل , حضرت يومين في ميدان المحافظه بس منزلتش التحرير , كان نفسي اكون في التحرير امبارح بس الظروف مسمحتش , وانا قاعد بقول للظروف : يا ست الحاجه وديني التحرير , الفرح ده فرحي , دانا قريب العروسه والله , تقولي أبدا , العدد كومبليت ومفيش جاتوه يكفي , قلت يالله بقى مفيش نصيب , العيال اللي كالو جاتوه وفرحو في التحرير انا مش مسامحكو , مش مسامحك ياد ياللي كلت الحته بتاعتي !!.

July 4

سيد علي يصرح : أنا صحيح ابن المشروع الإسلامي , بس الإسلاميين ولاد الحرام رموني في سبت غسيل وانا طفل صغير , والبرادعي والسيسي هما اللي خدوني من قدام الجامع وربوني أحسن تربيه !!.

محمد حسان في أحدث خطبه : ( أه يانا يامه يانا يامه يانا يامه ........... إي وربي !! ).

غباء في الوقت الضايع !!.
.
وبيقولك يا سيدي إن رئيس المحكمه الدستوريه المستشار عدلي محمود محمود منصور .........مسيحي !! , أه يا عم , مسيحي وامه اسمها فاطنه !!

July 3

تقول الأسطوره الإخوانجيه ( إحنا عندنا كوادر !! ) نياهاهاها , وكان رد الشعب عليهم ( واحنا عندنا محشي ...نغرف لكو ؟! ).

بجد والله , أطالب الساده المؤرخين والمسئولين عن التاريخ المصري شطب هذه السنه من كتب التاريخ , أنا موافق إن تاريخ مصر يتكتب فيه رئيس حرامي لكن مش إرهابي واهطل !!.

يا دين النبي 33 مليون في الشارع ههههههههههههههههههههههههههههههه داحنا لو كان بيحكمنا ابليس الرجيم مكانشي طلع له معارضين بالشكل ده , ألف مليون مبروك على عيونك يا مصر , كفاره يا حبيبتي يا مهره يا طاهره يا عفيه .

بعد منع عصام سلطان وعصام العريان وعصام الحداد من السفر
( ومعاهم ام أيمن ) , أطالب عصام الحضري بتوخي الحذر هو والبطيحه اللي معاه !!

عدد المتظاهرين المؤيدين لمرسي في رابعه العدويه عدد كبير فعلا , وللأمانه يعني واحقاقا للحق , العدد ده أكبر من عدد المعارضين لحكم مرسي .........في مسيرة السنبلاوين !! , كده وبحق ربنا مرسي يبقى من حقه ( شرعاً وشريعةً وشرعيةً ) يكون رئيس مجلس محلي مدينة السنبلاوين !!.

ونقول لمرسي اشتغل رئيس , والنبي تشتغل رئيس , أبوس إيديك تبقى رئيس , دي شغلانه حلوه وقيمه وسيمه وهو يقول لا أبدا , والنبي ما يحصل ولا يكون , عليا الطلاق لازم أرجع السجن !!

وانا بقالي سنه عمّال بدافع عن السوريين والسوريات اللي في مصر , واقول شباب سوريا الحر مينفعشي يتسول في مصر , وحرائر سوريا ميتباعوش في سوق النخاسه الإسلامبولي , وبعدين ألاقي منكو ناس بتدعم الخروف اللي زل أنفاسكو عندنا ؟ ايه يا حرائر سوريا , عجبتكو حكاية سوق النخاسه ؟!!. طيب تخيلو كده إن عبد الناصر كان بيحكم مصر , يا ترى كان هيكرم ضيافتكو إزاي ؟!

صباح الخير , الجيش عامل اجتماع مع البرادعي ممثل عن القوى الثوريه والشاطر اختار لمرسي إنه يكون (قطب النحاس ) المضحي من أجل الجماعه , يعني صدّرو مرسي ولبسوه في الحيطه لأن معركة الإخوان حاليا هي مركة وجود , نكون أو لا نكون , الإخوان مش خايفين على منصب الرئيس ولا الشرعيه ولا البطاطس المقليه , هما عارفين كويس إن ثورة 30 يونيو هدفها القضاء على التنظيم الإرهابي الدولي برمته , عشان كده هيعملو المستحيل في الداخل والخارج , هيبقى مشهد عادي جدا إنك تشوف مسلحين من حماس إو من تونس وأفغانستان واقفين في صفوف الإخوان وبيحاربو الشعب والجيش المصري , مش حضرتك انتخبت تنظيم ارهابي دولي عشان يحكمك ؟! , عموما ملحوقه , إنسى اللي بيعمله الإخوان حاليا وخليهم يجيبو أخرهم , احنا مع الجيش والشرطه والجيش تحديدا قادر إنه يلم الخرفان الكبار في نص ساعه , كل خوفي بس من لقاء البرادعي والسيسي إن البرادعي عشان هو سو كيوت وناعم يفكر ويخطط إن الإخوان لهم حق في ممارسة السياسه تاني , إرهابيين وماشيين بالسلاح وهيمارسو السياسه !!

ملخص خطاب مرسي
.
انا مش عندي منصب عشان استقيل منه ولو كان عندي منصب كنت لوّحت الإستقاله على وجوهكم , المعارضين هم مجموعه من الجرذان والخونه وسوف نحاربهم بيت بيت ... دار دار ...زنقه زنقه !! .

مرسي بيقول لا بديل عن الشرعيه , وانا بحافظ على شرعيتي وكل واحد يحافظ على شرعيته !! ........كل واحد ياخد باله من شرعيته ياخوانا , أه انا بقول اهو , أنا مره ابويا اشترالنا اتنين كيلو شرعيه , شوينا كيلو وحمرنا الكيلو التاني في الزيت والسكر وانابيب البوتاجاز !!

مرسي : قلبي على وطني انفطر !! ....اه يا ضنايا يا وطني يابني !!

مرسي بيقول ويكرر ويعيد ويزيد ( لا بديل عن الشرعيه ) , الله يخرب بيت أهلك , انت محسسنا إن فيه اتنين ستات واقفين على باب القصر وبيطلبو منك الموافقه على عمل كشك سجاير ............ مش 17 مليون مصري بايتين في الشارع بيقولولك غور جتك داهيه ................ انت كداب ومتأمر واهبل وحمار كمان !!.

مرسي على تويتر يطالب الجيش بسحب إنذاره , أتوقع أن يستجيب الجيش لطلب مرسي خلال ساعات , هيسحب الإنذار...... ويطلع الكارت الأحمر مباشرة !!.

July 2

السي إن إن بتقول أوباما يطالب بتنحي مرسي فورا !! , نياهاهاها , مانا قلت لك يا مرسي المتغطي بالأمريكان ( عريان ) مش ( شاطر ) , شفت بقى ؟ أهو لا نفعك قطر ولا الصهاينه ولا جهاد ( المناكحه ) في سوريا , شلوت أمريكاني مصاحب للغضب الشعبي والعسكري .

رئاسة عذبة القرود تهدد بإجراءات تصعيديه وتقول مرسي لن يظهر !! , أه فهمت كده , إجراءات تصعيديه يعني منحدر الصعود , ومرسي لن يظهر عشان هو راجل مبروك وبخطوه وبيمشي عالحيط , يعني لو حضرتك شوفت شبح في سجن طره شايل ( أصعة رمل وزلط ) وهو مش باين تحتها يبقى أكيد ده مرسي عشان محدش يتخض بس !!.

يا خرابي , عبد المجيد محمود عامل نفسه بطل قومي , كِن في جنب يا عبده , خدلك يومين لحد ما نخلص على نظام الخرفان ونفوق للرفايع الصغيره اللي زي حالاتك , أخرك معانا كام يوم ونلاقي مخرج للورطه القانونيه دي ونشوف نائب عام محترم .

صباح الخير , أتوقع في خلال ساعات وبعد رحيل نظام الإخوان أن تتوقف الحكومه السعوديه عن قراراتها الأخيره بشأن قانون العمل أو تؤجل العمل به لمدة عامين على الأقل دعما منها للثوره المصريه وأن تفتح الإمارات خزائنها لإنقاذ مصر من غيابة الجب التي وصلت لها تحت حكم البهلول خليفة البهاليل , كما أتوقع علاقات محترمه مع فرنسا وألمانيا وغيرها من الدول الأوروبيه , ...................مفيش غيرها ( عذبة قطر ) اللي هتعمل عزى ومناحه وصوان كبير , بس مش عارف هتعمل الصوان الكبير فين ؟ ممكن تعمله في سلطنة عمان والبوفيه اللي هيقدم القهوه الساده يكون في الكويت !!

متظاهري رابعه العدويه بيقولو إن سيدنا جبريل كان بيصلي معاهم !! , طيب يا إخوان لو حد منكو شاف ابويا الله يرحمه بيصلي في رابعه يبلغني أصله واحشني أوي , هتلاقوه أسمراني شويه وبشنب , مات الله يرحمه من 20 سنه تقريبا , يعني دفعة 94 , قال سيدنا جبريل قال , دي مش تجاره بالدين , لأ دي سراية المجانين , حقنا والله نعمل لكو عزل في رابعه ونلبسكو كلكو المريله إياها بالشألوب , أه يا سيدي انا مصدقك والله , إنت هتلر واللي جنبك دي فرجينيا جميلة الجميلات ولسه راجعه يا دوب بالتاكسي من عند الملكه كليوباترا !!.

أجمل حاجه في ثورة 30 يونيو إن أصدقائي بتوع المزرعه السعيده ومعرفشي ايه اختفو فجأه , مبقوش يبعتولي طلب المشاركه ,هههههههههههه يا خرابي حتى بتوع المزرعه السعيده سابو الماوس والكي بورد ونزلو يتظاهرو ضد الإخوان , كده مش باقي حد منزلش الشارع غير الحاج مارك ابن زوكر بيرج .......... هو وابو الفتوح !!.

كلام وهرتلة الإسلاميين عن ثورة إسلاميه ضد الشعب والجيش والشرطه في مصر هو باختصار فرفره , يعني ( رقصة الوداع ) ................كالطيرِ يرقصُ مذبوحاً من الألمِ !!

مهلة الجيش اللي قال عليها النهارده معناها نهاية حكم الإخوان رسمي , لأن المهله بتشترط توصل القوى السياسيه لاتفاق وبالتالي نهاية المظاهرات في الشارع , لو افترضنا مثلا إن البرادعي وصباحي طلعو علينا بكره وحلفو طلاق بالتلاته انهم حلو كل المشاكل مع الإخوان وإن الإخوان ندمو أشد الندم على ما فعلوه وحلفو على ( أوفة مصاحف ) يبقو مصريين ويفكرو في البلد مممممممممممممم أعتقد فيه حوالي 17 ثائر ممكن يقتنعو بكلام البوب وصباحي ويسيبو الميادين وبالتالي اجمالي العدد المتبقى في شوارع وميادين مصر هيكون 17 مليون - 17 مواطن !!.

July 1

انتظرو خلال يومين خطبه عصماء لشيخ البهاليل محمد حسان بيلعن فيها جدود ابو الإخوان ويدعو لجزمة السيسي بطولة العمر و الخير واليمن والبركات ..........ووحوي يا وحوي , أصله شيخ كبير أوي وانا عارفه نياهاهاهاها , اه نسيت وهيتنحنح ويتشحتف ويبص للسما وهو بيدعي , تقولشي السيسي ساكن فوق سحابه يا جدعان !!.

Top of Form

70354

ياحمد , ياحمد , قول لمامتك بابا هيطلع في التلفزيون بكره , عشان دي أخر مره هنشوف خلقته فيها , سجلوها فيديو بقى , بعد كده لو ابوك عمل مداخله مع إذاعة الشباب والرياضه هتعتبرو اليوم ده عيد ويمكن تطبخو فيه لحمه و رز !!.

Bottom of Form

وقال ايه الخرفان الصغيرين كانو بيقولو خروفهم الكبير مش هيمشي!! , ههههههههههههههههههههههههه , هو فعلا مش هيمشي , لان ركبه سابت دلوأتي ومش شايلاه , يالله اختارو منكو خروفين يكونو متغذيين كده ومكترين في البرسيم عشان يشيلو الخروف الكبير ( أبو ركبه حديد ) !!.

نياهاهاهاها حماس أسقطت حكم الإخوان ( نيران صديقه !! ) , القبض على عناصر حماس مدججه بالأسلحه في مكتب الإرشاد ومحيط مكتب الإرشاد كافي جدا لإسقاط حكم الخرفان ....عناصر أجنبيه يا مولانا ومعاها سلاح وبتضرب نار على المصريين من معبد الإخوان الرئيسي , الجيش المصري مكانشي يقدر يطلع ببيان أقل من كده , بيقول للإخوان الإرهابيين ( جيم أوفر ) !!.

حضرتك فيه جماعه إرهابيه محظوره دوليا ,الجماعه دي لها مقر رئيسي في المقطم , كويس كده ؟ طيب لو حضرتك هجمت عالمقر ده أو دخلت تفتشه هتلاقي فيه ايه ؟ ايه اللي ممكن يكون موجود في المقر الرئيسي لجماعه ارهابيه ؟ أكيد طبعا أسلحه وزخيره ومدافع واربجيهات ومطاوي قرن غزال , لا لا لا , مستحيل تلاقي عندهم المجموعه الكامله لفاروق جويده , ولا شريط كاسيت لأغاني فيروز !!.

المعبد الرئيسي للخرفان في المقطم اتحرق وبيتهد حاليا , الله أكبر ولله الحمد , مش باقي من نبوئتي بتكرار قصة سيدنا ابراهيم غير إن الثوار يعلقّو الفاس في رقبة كبير الأصنام والألهه محمد بديع , ولو حد سألهم ( من فعل هذا بألهتنا ؟ ) , يقولو له ( بل فعله كبيرهم فاسألوهم إن كانو ينطقون ) !!

هنا المنصوره , ثوره الأحرار والحرائر , ما يقرب من مليون متظاهر يملأون الميدان والطريق من أول مستشفى التأمين الصحي وحتى مبنى المحافظه وكورنيش النيل , أهل المنصوره يحملون علم مصر فقط ورساله قصيره تقول باختصار ......................باي باي إخوان !!.