منوع

حلو أوي شعار الحمله ده ( كمّل جميلك ) , وخصوصا إنه جه مناسب جدا لإسم الأغنيه ( تسلم الأيادي ) ............ يعني تسلم الأيادي ... كمل جميلك , بالظبط بتخيل منظر مواطن خد حتة لحمه وراح لجزار ابن حلال أوي , قال له ممكن تشيلي الشغت والجلد اللي في حتة اللحمه دي ؟ أنا أصلي عايزها نضيفه , فلما الجزار عمل كده , المواطن قال له ( تسلم الأيادي ) وبعدين نفس المواطن طلب من الجزار تاني إنه يفرم الجلد والشغت اللي شاله عشان يعمله أكل للقطط وقال للجزار معلش بقى ( كمّل جميلك ) !!.

.

.

واهو نبقى نحكي لأحفادنا بعد 30 سنه إن مصر دي يا ولاد جالها رئيس اسمه عبد الناصر , أمم القناه ووقف جنب الغلابه وبنى السد العالي ورفع راس مصر للسما ومات في جيبه 17 جنيه , ومصر برضه يا ولاد جالها رئيس كان بيقول بنزيمه ودونت ميكس وفوده بتاع الزقازيق , ولما اتقفش ولبس في الحيطه فضلو يسألوه في التحقيق وهو يرد ويقول ( أنا رئيس مصر الشرعي والتحقيق غير قانوني ) , هما يسألو وهو يرد بنفس الرد ( أنا مش قصير أوزعه أنا طويل واهبل ) ........... هو ده التضاد الذي يبرز المعنى ويوضحه ......... حدوته حلوه تنفع للأطفال أفضل بكتير من حدوتة الضفدعه والساحره الشريره !!.

.

.من سنتين تقريبا , قبل انتخابات الرئاسه مباشرة حصلت مناظره شهيره بين أبو الفتوح وعمرو موسي , في الوقت ده كنت بأيد إلى حد ما أبو الفتوح ( كنتُ مغفلٌ ...كنتُ حمارٌ ) , بس بعد المناظره كتبت هنا إن أبو الفتوح سقط تماما قدام عمرو موسى , هو ده الفرق بين السياسي المحنك والبهلول !! , لدرجة إن تتح سأل عمرو موسى سؤال غبي بهلولي ( عن حالته الصحيه ) , وكان تعليقي عالسؤال إن واحد واقف على رجله 4 ساعات متصله في المناظره أكيد مش عنده مشكله في القلب ولا مشكله عضويه تُذكر , وأغلب ظني إن اللي في سن عمرو موسى بيعاني من مشاكل في البروستاتا وقلت إن البروستاتا مش مهمه في حكم الأوطان ولا إيه رأيك يا تتح ؟!!.

الحقيقه أصدقائي النشطاء والنحانيح اللي بيعترضو على وجود عمرو موسى على رأس لجنة ال50 , مش لاقيلهم أي مبرر , لو موسى واحد من نظام مبارك فكلنا كنا في نظام مبارك , دفعنا رشاوي عشان نعدّي وخدنا حقوق مش حقوقنا بالواسطه وخربنا البلد مداين في عهد مبارك الفاسد , ولو مشكلة عمرو موسى إنه بيشرب خمره فلو سمحت لما يترشح لمشيخة الازهر متبقاش تنتخبه ولو جه يخطب بنتك متوافقش ....قول له لأ انت بتشرب خمره , لكن حكم الاوطان وكتابة الدساتير والدبلوماسيه ملهاش في الليله دي , على فكره السادات كان بيشرب حشيش مش رز بلبن !! , لساني وجعني وانا بفهم الناس إنك لما بتتعب أوي بتروح لأفضل طبيب حتى لو بيشرب سيرتو , ولما بتبني بيت الأحلام بتجيب أفضل مهندس حتى لو بيشرب جاز ولا بيشرب ماية الطرشي , فوقو بقى من أم الغيبوبه دي , غيبوبوة شعب ابن صرمه متدين بطبعه , شعب بيرتكب كل أنواع الكباير والرذايل بس لما بيسافر بره ويدخل مطعم بيكون حريص أوي إن اللحمه متبقاش لحم خنزير !!

.

.

صباح الخير ............ في فقه مصالحة الزوجين المتخانقين !!.
.
وانا شغال في صيدليه في مصر قبل ماسافر كان بييجي يقعد معايا واحد صاحبي هو الشيخ مسعد , راجل عمره 60 سنه ومعاه عكاز صغير كده , تلاقيه دايما مبتسم ولسانه رطب بكلمات الشكر والمدح , في يوم حكالي على موقف كوميدي جدا , حكى الشيخ مسعد إن فيه راجل من أهل الحي مراته غضبت وراحت بيت أهلها , وطلب من الشيخ إنه يروح معاه بيت نسايبه عشان يصالحو مراته , الشيخ قاله ماشي نتقابل بعد صلاة العشا ونروح , وبالفعل دخلو على بيت نسايب الراجل وخبطو الباب فتح لهم أبو الست ( الغضبانه ) , ودخلو قعدو في الصاله , الراجل ساب الشيخ مسعد قاعد مع حماه ودخل الأوضه يصالح مراته بكلمتين , مفيش 10 دقايق والناس اللي قاعدين بره سمعو صوت جاي من الأوضه , تنهيدات وأهات وحبشتكانات !! , الشيخ نط من عالحصيره وخطف عكازه وطلع جري عالباب , الغريبه إن أبو الست ( اللي مش غضبانه ) قالو استنى يا شيخ مسعد خدني معاك !!.
.
الموقف ده كل ما بفتكره بتجيلي نوبة ضحك لحد ما عيني تدمع رغم إنه اتحكى لي من 15 سنه , بس أنا استفدت منه درس مهم جدا , لو واحد من صحابي أو قرايبي مراته غضبت وقالي تعالى نصالحها هقول له ماشي بس بشرط ( مراتك وحماك ييجو يقابلونا بالنهار على قهوه بلدي جنب قسم الشرطه وسط المعلمين والصولات والمخبرين وحرس سلاح ) , إنما لو قالي هنروح لها بيت نسايبي هقول له إياكشي تولع بجاز إنت ومراتك !!.

.

.

حدث بالفعل !!
.
هو يوم باين من أوله , يوم في منتهى ال..... ( البلتاجي ) , جالي مريض الصبح كاشف على بنته ( 17 سنه ) عند دكتورة الأسنان , وأخد العلاج ( مضاد حيوي ومسكن ) , وجالي تاني من ربع ساعه وانا مشغول أوي , قالي البنت اللي كشفت عليها الصبح عندها سنه تانيه بتوجعها غير السنه اللي كشفنا عليها إديني بقى مسكن تاني للسنه التاني!! , مش دي المشكله , المشكله إني لما قلت له إن نفس المسكن بتاع السنه الأولانيه هيسكن السنه التانيه قام مطلّع ( الجوال ) واتصل بمراته وقعد يكلمها ييجي ربع ساعه عشان يقنعها بوجهة نظر الصيدلي اللي هو العبد لله , واتخانقو في الموبايل واحتمال يتطلقو !!.

.

.

محمد حسين