منوع

صباح الخير , السعوديين لما يحبو يعزمو حد على قهوه يقولو له ( اتفضل معانا , نتقهوا سوا والله !! ) , وانا قاعد دلوأتي بشرب نسكافيه قلت أعزم عليكو يعني عزومة صيادله ( أسوأ من المراكبيه ) , ( اتفضلو معايا ... نتنسكف سوا والله , اتنسكفو معايا ).

.

.

بس يا سيدي , وكل يومين تلاته تقع عيني على فتوى غريبه وشاذه من نوعية الفتاوي الخاصه بالمرأه , كتب يا مولانا ومجلدات تكفي لعمل جبل عالي أوي , ممكن في أوقات فراغنا المستمره نبقى نطلع عالجبل ده ونمارس الرزيله الفكريه بعيد عن أعين العالم المتحضر , ملايين الصفحات في الحيض والبيض وخروج المرأه ودخولها وصوتها ومناخيرها في مجتمع عربي لحد النهارده مش عارف يصنع مشبك غسيل أو حتى ال ( ليّ بتاع الشيشه ) , والشهاده لله يعني من فتره كده وأنا رأيي إن أي كتاب من النوعيه دي لازم يبدأها الشيخ المؤلف العالم العلامه الفاهم الفهامه بالسطرين دول كاستفتاحه أو اصطباحه يعني ( هذا ومن المعروف أن المرأه هي ظاهره كونيه بدأت في الظهور في منتصف القرن العشرين وتحديدا بعد ضرب هيروشيما بالقنبله النوويه وبداية ظهور البترو دولار , واكتشف هذه الظاهره الكونيه ( المرأه ) فريق من العلماء اليابانيين وأعزو وجودها إلى تجمّع حزمة من الإشعاعات النوويه وتكثيفها على سطح أملس فكانت المرأه ...لذا وجب التنبيه , إحذروا المرأه , إحذروا الإشعاعات النوويه ) !!.

.

.وبعد اللي حصل في الكام شهر اللي فاتو دول , يجب إدراج ماده في الدستور المصري تنص صراحةً أنه لا يجوز بأي حال من الأحوال بيع مصر إلا بموافقة 80 % من الشعب المصري ...بلاش 50% + 1 دي , لأن مصر فيها ملايين متلتله من النشطاء السياسيين والنحانيح ( غير الإخوان والإسلامجيه طبعا ) , والنحانيح دول ممكن يبيعو مصر بحتة حشيش أو حظّاظه أو دراع بلاي ستيشن !!.

.

.

و دمعه سابت أثر
على خد بات محروم
بتساوي ألف كتاب
من سيرة العشّاق !!.
.
محمد حسين

.

.

و لعلمك بقى , الإداره الأمريكيه وال cia وال fbi و الwc ...كلهم على بعض كده مش هيقدرو يقبضو على الإرهابيين اللي نفذو الهجوم على القاعده البحريه الأمريكيه , عارف ليه ؟ عشان أمريكا مفهاش حي ولا منطقه اسمها مدينة نصر !!.

.

.ومصيبة مصر حاليا في نشطائها السياسيين أه والله , فاكر انت مسرحية هللو شلبي لما سعيد صالح الي عامل نفسه عيّان قال للدكتور محمد صبحي ( تكشف عليا ليه ؟ بتاع ايه تكشف عليا ؟ هو انت ظابط ؟ أنا ميكشفشي عليا غير البيه الظابط !! ) , وأهي مصر يا عم ( شلبي ) زي ما هيا بحطّة إيدك متغيرتش , ودلوأتي تقدر تسمع نحنوح بيقول لظابط مخابرات ( هتحارب الإرهاب في سينا إزاي ؟ هو انت ناشط سياسي ؟ ميقدرشي عالإرهاب في سينا غير الناشط السياسي ) !!.

.

.أهي سيره واتفتحت !!

.
وعلى سيرة النقاب , طبعا هو فضل وأجره عظيم , لكنه مش فرض على المرأه المسلمه , سيبك من كل ده وفكّر معايا بهدوء على إجابه للسؤال ده ؟
الوضع الحالي في مصر ( تفجيرات وعمليات انتحاريه وإرهبايين ) , يعني وضع غير مستقر أمنيا , وأغلب المشبوهين والإرهابيين بيتنكرو في صورة إمرأه منقبه , مفيش أسهل من كده , سؤالي كالتالي , لو قلت لك أنا أتمنى منع المنقبات من دخول الأسواق العامه والشعبيه والمترو لأني معرفشي اللي داخله دي ست منقبه فعلا ولا ارهابي متنكر , وبطالب طبعا بتأمين الأماكن دي ونشر صور المجرمين والإرهابيين والمشبوهين على رجال الأمن , هتقوم انت تقولي ( بس أنا مقدرشي أشيل وزر إني أجبر ست مسلمه على قلع النقاب ) , طيب يا صاحبي ....تقدر حضرتك تشيل وزر طفل في السوق دمه ساح عالرصيف بسبب عمليه انتحاريه نفّذها إرهابي كان متنكر في صورة ست منقبه ؟! تقدر ؟ أنا مقدرش ....فكر بهدوء وبلاش تتشنح قبل ما ترد !!.

.

.

في مدرسه بنتي من 7 صباحا , من النجمه , مع أول يوم من العام الدراسي الجديد بنختار لها الفصل بقى ( الكيلاس ) , المهم وسط حشد كبير ولفيف من الأمهات كان فيه كم أب كده , أنا واحد منهم , الموظفات والميسّات بتوع المدرسه حاولو يطردونا عشان عيب وميصحش ولا يمكن أبدا , وفي نهاية الطُرقه ( الرواق يعني أو الردهه حسب ترجمة أنيس عبيد ) كانت واقفه ست صوماليه قصيره ومنقبه زي أغلبهم , المهم قاعده تنادي وتقول حرام , حرام , رجاله حرام !! ........... أنا لو كنت ضغطت عليها شويه كانت قالت هتخشو النار يا كفره !! , عارف إنت سيادتك إيه هو الحرام اللي تقصده ؟ إن الراجل وهو معدي كده من الطرقه قدام الستات المنقبات إحتمال يعني يكون طيفه داس على طرف العبايه !!.

.

.

محمد حسين