بعد محاولة إغتيال وزير الداخليه
.
.
الإخوان بكره هيخرجو في مظاهرات بعنوان ( مش احنا والله يا باشا .... والشريعه ) !!.
.
.
ويقولك
( فصيل وطني بتاع ربنا !! ) , ربنا ياخدك يا شيخ ويخلي لنا الوطن ! ,
إغتيال وزير داخليه ؟ وزير داخليه !! , يا سنه سوخه , يعني مش نقيب شرطه في
قسم الوراق مثلا ؟! , طب وعهد الله وعهد الله كمان مره إحنا لو اتجمعنا
كده كلنا بتوع الدستور ومعاهم البرادعي على التيار الشعبي وحمدين على
الناصريين والإشتراكيين والثوريين وقعدنا مع بعض بالملايين وحاولنا نخطط
لإغتيال أمين شرطه في كمين ميت غمر ما هنعرف , هتلاقي
معانا مسدس واحد وصباحي بيقول للبرادعي ( إنت اللي هتنفذ المهمه دي يا بوب
) , يرد البرادعي ويقول له ( لا يا حمدين ... انت قلبك جامد عني ) , هنا
يظهر عمرو حمزاوي ويقولك ( إحنا نشيل المسدس ده لأن منظر الدم بيتعب لي
أعصابي وبيأثر على سوالفي , ممكن نستبدله ب شومه وخلاص ) , البرادعي يرد
ويقول ( ماهي الشومه ممكن تموته برضه يا حمزاوي ) , والحكايه هترسي على
إننا نتجمع كلنا كده ونكتف امين الشرطه ونخلي جميله اسماعيل تضربه قلمين
وتقول له ( يا سافل يا حقير !! ) , وعهد الله ده أخرنا في الإرهاب !!.
.
.
أهه
, محاولة إغتيال وزير الداخليه , لا سحر ولا شعوذه , طيب مين اللي عمل كده
يا ولاد ؟ أكيد مش أنا ولا أمي ولا جميله اسماعيل , أكيد هو نفسه الفصيل
الوطني اللي عمل كده , شركاء الوطن يا مولانا , ولو حضرتك بتعرف تقرا وتفك
الخط كنت عرفت إن مش دي أول محاوله يقومو بيها لاغتيال مسئول مصري على مدار
80 سنه , دي صفحات كتير يا مولانا , مجلدات يعني , سامعك أه والله سامعك
وانت بتقولي تلاقي وزير الداخليه هو اللي
حاول يغتال نفسه عشان يلبّس الموضوع للإخوان هع هع هع , أه يا سيدي مصدقك
طبعا , إنت عارف الملك مينا مش هو اللي وحد القطرين , القطرين اتوحدو كده
لوحدهم وسبحان الواحد , طب عارف مصر منتصرتش على الصهاينه سنة 73 ولا
حاجه...سنة 73 هي اللي انتصرت على الصهاينه , خليك انت كده عايم في برميل
الطرشي وفاكر نفسك في حمام السباحه بتاع هيلتون رميس , بس عايز أقولك إن
محاولة إغتيال محمد إبراهيم دي هي رصاصه الرحمه اللي أطلقها الإخوان على
نفسهم .... كده هتتعلّقو يا برنس , وهتتنفخو , وعهد الله هتتنفخو لدرجة
إننا مش هنعرف نلمّكو من الفضاء الخارجي ومن ثقب الأوزون !!.
.صباح
الخير , اللي هيفتح قناة الجزيره الأيام دي هيلاقيها عماله تُحرك وتفرك
ورايحه جايه زي المتطلقه , بعد ما حالها اتوقف في مصر , ومبقاش فيه مظاهرات
ولا اعتصامات ولا 500 ألف قتيل ولا 5 مليون أسير ولا حاجه ...الحمد لله
ربنا عدّى الحرب العالميه التالته وال 19 قنبله نوويه اللي انضربو في رابعه
على خير .
معنديش أدنى شك إن الجزيره كانت بتجيب ناس ( كومبارسات ) يلعبو أدوار معينه قدام الكاميرا عشان يسخّنو الليله
والجزيره بقى تلم النقطه , نفس فكرة الغوازي في الكباريهات , وواحد تبع
الرقاصه يطلع ينقط في الأول عشان يشد باقي المعلمين ... كان نفسي بس أشوف
واحد من الكومبارسات دول زي اللمبي كده ويطلع عالقناه يقول لهم ( أنا مت
أهو يا جزيره , شوفتوني وانا ميت ؟ ...بس الفلوس اللي إديتوهالي كانو
ناقصين 20 جنيه ...أنا عديتهم 100 مره وناقصين عشين جنيه ) !!.
.
.
محمد حسين
.
ليست هناك تعليقات:
إرسال تعليق