منوع

حزب الحريه والعداله ( الإسم ده مش غريب عليا !! ) يعلن مقاطعته للإنتخابات البرلمانيه القادمه !! , ليه كده بقى ؟ طيب احنا الفيصل بينا الصندوق ولا مفاخذه, إنزلو وشاركو واكسبو هع هع هع ..... مش ده كان كلامكو يا ولاد الصرمه ؟! , عموما سهله خالص إحنا ممكن في ظرف إسبوعين نعمل 4 أحزاب إسلاميه جديده ( حزب مصر الإسلاميه أوي , حزب مصر المتدينه , حزب الشعب المتدين بطبعه , حزب الشريعه والزريعه ) , ونجيب 4 من أئمة المساجد والزوايا يمسكو رؤساء للأحزاب دي ( بدقون أهو ) , وبعدها بيومين يجتمع معاهم عدلي منصور والببلاوي تحت عنوان كبير في شريط الأخبار ( الحكومه تجتمع مع قادة الأحزاب الإسلاميه في مصر !! ) وبعد ساعتين يطلع قادة الأحزاب دي ويعلنو مشاركتهم في الإنتخابات ويا دار ما دخلك شر !! برضه دي اتعلمناها منكو , مش انتو اللي كنتو بتجتمعو بأيمن نور وسليم لا مؤاخذه العوا وتقولو الحكومه تجتمع مع المعارضه ؟! يا باشا إحنا بنتعلم الوساخه منكو , إحنا مجرد تلميذ مبتدئ في جامعة وساختكو , اللي انتو عملتوه في حكم سنتين يكفي جدا لتلويث سمعة الديموقراطيه في مصر لمدة 200 سنه جايين !!.

.ومصر دي تلاقي فيها الأقباط وقت الحرب واقفين في الصفوف الأماميه وبيرددو معاك الله أكبر الله أكبر ( ومش عاجبين ) , يصومو معانا في رمضان في وقت الشده ( ومش عاجبين ) , يدقو أجراس الكنايس وقت أدان المغرب ( ومش عاجبين ) , يفتحو كنايسهم لصلاة المسلمين وإسعافهم في الثوره ( ومش عاجبين ), يقولو ألف مره نقبل جدا بمرجعية الأزهر ( ومش عاجبين ) , كل ما بتلاقي نفسنا فاضيين بنروح نولع في كنيستين تلاته ( ومش عاجبين ) , رفضو ألف مره التدخل الامريكي لحمايتهم ( ومش عاجبين ) .... وعهد الله أقباط مصر لو اتجمعو في يوم كده وأعلنو إسلامهم عشان يعجبونا برضه مش هيعجبو ... وهتلاقيني بقول للواد بلال ( جون سابقا ) : إنت ياض انت مش كنت مسيحي قبل كده ... وجاي عايز تصاحبتني ياض ؟! ......... مجتمع عنصري متدين بطبع أمه !! .

.

.صباح الخير , من الأخر كده ولهواة اللونين الأبيض والأسود , لو خيروني ما بين فاشيه دينيه وفاشيه عسكريه هختار العسكريه بدون تردد , سوف أقبّل بيادة الجندي المصري لأنه باختصار شال السلاح عشان يحميني , التاني شال السلاح عشان يقتلني , وفي كلا الحالتين , إذا كان العسكري قادر على تعذيبي في السجون فأنا أعلم جيدا أن الشيخ لن يتورّع عن تعذيبي في الشارع وأمام الجميع !!............ أظن الكلام كده واضح , إذا ضاع مننا حلم الديموقراطيه فمرحبا بالفاشيه العسكريه ...معلقتين ونص مربة توت !!.

.حسن البنا نفسه لو كان عايش وحضر اعتصام رابعه كان زمانه طلع عالمنصه وصال وجال ودعى شباب الإخوان للشهاده ( الشهدااااااااااااااااء لهم الجنه ) , وبعد فض الإعتصام كانو هيجيبوه من على حدود السودان أو من حمام السباحه بتاع هيلتون رمسيس أصل مايته طاهره ... وكذلك يفعل المجرمون !!

.

.

.

وانا صغير عشت واتربيت في بيت فقير في قريه بسيطه , لحد ما خلّصت جامعه تقريبا , بيتنا مكانشي فيه تلاجه , في الحقيقه مكناش محتاجينها عشان مفيش أكل بيتبقى لتاني يوم , بنعيش اليوم بيومه , وأول مره أشرب مايه ساقعه من التلاجه كان عمري 21 سنه , في الشتا كنا بنجيب ( منقد ) ونحط فيه حطب وخشب صغير ونعمل راكية نار ونتلمّ حواليها عشان نتدفى ..لو ركزت شويه هتعرف إن الدفا ده جاي من حنية الأم مش من الحطب والخشب , وبيتنا كان مفتوح بالخير لكل قرايبنا , ولاد خالي وولاد عمي وبنات خالي وبنات عمي , بيحسو فيه بالأمان , إحنا أصلنا عمرنا ما عملنا مشكله مع حد ولا نمنا وحد زعلان مننا , يدخل ابن خالي وامي تقول له أعملك شاي ؟ يقول لها لأ عايز أتعشا الأول , تقول له حاضر دقايق يكون العشا جاهز , كنا بنلبس هدوم بعض والصغير ياخد هدوم الكبير لما تضيق عليه , اتعلمت من أمي مبادئ الخياطه , ياااااااااه راحت أيامنا الحلوه , ودلوأتي بقى معايا فلوس , حاسس إني عايش في مفرمه اسمها الدنيا , متطلبات الحياه زادت ألف مره مع إنها أبسط من كده , غلطة عمري هي إني وقعت في خطأ ( وخطيئة ) الغنى , معدش فيه حاجه لها طعم , مفيش فرصه لالتقاط الأنفاس , مفيش فرصه حتى إني أشرب بؤ مايه من الأولّه اللي كنا بنسقّعها على سور البلكونه !!.

.أتخيلُ أنّ امرأةً وقفت على قارعة الطريق وهي شبه عاريه و بكتفها الأيمن جرحُ كبير ينزف بغزاره , تجمّع حولها الماره , فراح بعضهم يسرق بعض النظرات إلى جسدها , و اهتم البعض الأخر بتغطيتها , ولا أحد تقريبا كان مهتما بإيقاف النزيف أو مدركا لخطورته عليها ,................ هذه هي مصر الأن !!.

.

.

نكته أعجبتني.............. أوي !!.
.
بيقولك يا سيدي , صياد طلع في الصحرا عشان يصطاد غزلان ( وديموقراطيه ) , فجأه طلع له أسد , الأسد قال للصياد ...تختار أكلك ولا أعمل معاك حاجه مش كويسه ؟ الصياد فكر ثواني كده وقال للاسد , لأ متاكلنيش , إعمل معايا حاجه مش كويسه , وفي اليوم التاني طلع نفس الصياد يصطاد في نفس المكان غزلان و ( ديموقراطيه ) وطلع له نفس الأسد , الأسد قال للصياد تختار أكلك ولا أعمل معاك حاجه مش كويسه ؟ الصياد قال له من غير تردد , إعمل حاجه مش كويسه , وفي اليوم التالت نفس الصياد طلع يصطاد في نفس المكان غزلان و ( ديموقراطيه ) وقابله نفس الأسد , الأسد ميّل على ودن الصياد وقال له ( إنت شكلك كده مش جاي تصطاد !! ).
المهم بقى إن الأسد ده هو جماعه الإخوان المحظوره , والصياد يبقى النحانيح وأحمد ماهر وقيادات 6 إبريل , أحمد ماهر لما رجع بيتهم ( بعد المره التالته ) لقى الحكومه اتغيرت , والحكومه الجديده قالت له نفسك في إيه ياحمد يا ماهر ؟ أؤمر تُطاع ؟ أحمد ماهر فكر ثواني كده وقال للحكومه ( أنا ليا طلب واحد بس , الأسد اللي كنت بقابله في الصحرا هاتوه يعيش معايا هنا في البيت , أصله شريك لا مؤاخذه في الوطن !! ).
ممممممممممممم أنا بقى اللي عايز أوشوش أحمد ماهر وأقول له ( كان معاه حق الأسد إنت لا جاي عشان ديموقراطيه ولا جاي عشان تصطاد ) !!.

.

.تعريفاتي ....... الشخص المثقف 

.
هو ذلك الشخص الذي لا يسخر من إمرأه قبيحة الشكل ( ربنا خلقها كده ) ولا يتباهي بالتقاط الصور التذكاريه مع أحد الأقزام ( ربنا خلقه كده ) ليطّلع عليها أصدقاءه .
الثقافه هي ذلك الشئ الذي يحولك تدريجيا من عالم الحيوان إلى مرتبة الإنسان , فإذا قرأت ألف كتاب ولا زلت تقع في هذه الخطايا فعذرا لأني أراك كالحمار ..... كالحمار يحمل أسفارا !!.

.

.حكومات في سطور وقحه !!......... + 78

.
.
أستراليا أعلنت تأييدها للعدوان الأمريكي على سوريا , الحقيقه الخبر مفاجئنيش , أستراليا من أد عشرين خمسين سنه كده وهي بتلعب دور ال ( بيج أس أوف أمريكا ) , يا لضيعة يهود , أس بحجم قاره........ ولا عزاء للنحيفات !! .
.
إنما للأمانه يعني ستنا أمريكا لها بين دول العالم ( أس ) و ( مش أس ) , الأس هو أستراليا , واللي مش أي هو بريطانيا اللي أعلنت رفضها العدوان , ليه بقى ؟ عشان بريطانيا تعبت أوي من الفرهده الأمريكيه في السنين اللي فاتت , في أفغانستان والعراق وغيرها , حمل وولاده قيصري من غير تمن يُذكر ( ولا حتى كلمة بحبك في ودنها الشمال ) , زهقت أوي من لعب دور فرجينيا ( أرمله وجايه في أي مصلحه ) .
.
, أما تركيا فمنذ وصول الحكومه الإسلاميه وأردوغانها وهي بتلعب دور الشفايف , في العراق كانت شفايف , في المناورات العسكريه المشتركه مع الصهاينه شفايف , وشعار أردوغان مع كل رئيس أمريكي بييجي ( إحنا ممكن نقضيها بوس وتطلع من هنا سلطان زمانك , إنما أكتر من كده موعدكش , أصل أنا عايز أبقى خليفة المسلمين وميصحش يعني ) .
.
ويبقى العرب في المشرق والمغرب هما النهدين بلا منازع , حبَّتي الرُمّان بين كف أمريكا... تُقلِّبهما كيف تشاء .
وبذا تكتمل سيمفونيه أو معشوقة نزار قباني ( النسخه الأمريكاني ) ... ..............وَجَعي يمتدُّ كسربِ حمامٍ من سيدني إلى أنقره و لندنْ ... يا قلبي لا تحزن .
.
إنما سيبك إنت من الليله الحمره دي , أنا بصراحه بحب الموقف التركي , قولي ليه ؟ عشان تركيا بتحافظ على شرفها , وعلى رأي الواد لوسي في فيلم أشاعة حب ( وشرفي يا أونكل ...تركيا دي بتحافظ على شرفها ) !!.

.

.

محمد حسين 

.