منوع

صباح الخير , وطول ما عندنا قيادات حزب النور بيتظاهرو مع الإخوان الصبح ويكتبولنا الدستور بعد العصر ( يأكلون مع الذئب ويبكون مع الراعي ) , هتظهر عندنا أشكال وسخه زي مرتضى منصور , البلد اللي بتخلّف دول لازم تخلف ده , إحنا عملنا ثوره عشان كان نفسنا في مولود جديد شكله جميل كده بس الحقيقه مصر تعبت أوي في الفتره اللي فاتت من كتر الحمل الكاذب والإنتفاخ !!.

.

.

بعد شهرين تلاته , الواحد مننا هيدخل عالفيس بوك ولو لقى عنده في الأصدقاء 9 أصدقاء على بعض يبقى أبو زيد خاله !! , الناس قطّعت بعض بسبب السياسه يا معلمي , وهنروح بعيد ليه ؟ من كام يوم مراتي حذفتني من قايمة الأصدقاء أول ما لقتني بنتقد في البرادعي !! , بيني وبينكو أنا قلت كويس اوي , مصلحه يعني , الواحد ياخد راحته عالفيس بقى ( و يبرّطع ) , ................ واهو يبقى البرادعي فادني وفاد مصر بحاجه !!.

.

.

أمي الضغط بيعلى عليها أحيانا , أبانا الذي في المخابرات إنت اللي عملت كده أكيد , وعمتي سمينه شويه ...أبانا الذي في المخابرات , إطلع من دول يا لئيم , وفيه راجل من بلدنا الجرار الزراعي اتقلب بيه ومات ...أبانا الذي في المخابرات .
إعصار كاترينا وتعامد الشمس على وجه الملك رمسيس مرتين في السنه وفوز مصر ببطوله أفريقيا ....أبانا الذي في المخابرات .
.
ماسورة مجاري ضربت في شارع عين شمس والكهربا قطعت على الحضانات في الزقازيق , والمطر نازل سيول في الوادي الجديد ..... أبانا الذي في المخابرات .
مقتل 25 جندي في رفح , ومئات غيرهم في سينا , تفجير قنبله في مديريه أمن المنصوره , محاولة إغتيال وزير الداخليه واغتيال النقراشي ونجيب محفوظ وفرج فوده والسادات ومئات غيرهم ......أبانا الذي في المخابرات !!.
............... يلعن ميتين أم أنصاف المتعلمين فيكي يا بلد .

.

.قالي إنتو شغلانتكو دي أي حد يقدر يعملها , هبيع كيس فوار بخمسين قرش ومجموعة إنفلونزا وهقرا اللي كتبه الدكتور في الروشته ....يعني ساعتين زمن أقعدهم في الصيدليه وهبقى صيدلي زيك وأحسن منك , قلت له طيب مفاتيح الصيدليه معاك أهي وانا رايح اسكندريه بقى أقضى كام يوم عالبحر , والله انت كده عملت فيا معروف كبير !!.

الساده النشطاء والمتعاطفين , ممكن لو سمحت طالما انت عارف كده إن شغلانة محاربة الإرهاب سهله أوي , ممكن تشيل الحنّه اللي على رجليك و ترمي اللبانه اللي بؤك وتقول للجيش ( ارتاح انت ) ... وتنزل حضرتك توريني إزاي هتحارب الإرهاب ؟!!.

.

.

صباح الخير , بهدوء , بشويش , حاول تفهم , يارب تفهم , أصلا إحنا مبقاش عندنا رفاهية الإختيار بين ( الفهم واللا فهم ) , يعني لازم نفهم , حضرتك إحنا بنحارب إرهاب صح ؟ طيب عارف إيه الفرق بين مواجهة جماعات إرهابيه منظمه ومنتشره وبين مواجهة عصابة بتسرق الغسيل ؟ بص يا سيدي الجماعات الإسلاميه والإرهابيين منهم مالهمشي مقر كده اسمه مقر الإرهابيين , ومش ماشيين بكارنيهات اسمها كارنيهات المافيا , ومش معلقين باتش على صدرهم بيقول إرهابي , لأ خالص , دول ناس عايشين معانا ووسطنا , في البيوت والجامعات والأسواق والمواصلات , محاربتهم لازم يكون فيها نسبة damage , أكتر الدول تقدما في مجال مكافحة الإرهاب بيبقى عندها نسبة داميج معينه , يعني لازم وانت بتحارب الإرهاب غصب عنك هييجي ناس معينه في الرجلين , ناس بريئه , ممكن يتسجنو ويتعذبو حتى إما بسبيل الخطأ او بمجرد الشك فيهم , يعني حاله من التخبط تسود أي جهاز امني في العالم يواجه جماعات إرهابيه عايشه وسط الشعب , حكاية إنك تطلع بطياره هليكوبتر وتعمل 500 طلعه وتطارد 500 سياره تابعه للإرهابيين وتدمرهم وفي الأخر ميكونشي فيهم سيارتين تلاته مالهمشي علاقه وراحو في الرجلين دي هتلاقيها في كتاب حواديت الأطفال , حكاية إنك تقبض على ألاف الإرهابيين وميطلعشي فيهم عشرين تلاتين واحد مالهمشي ذنب دي متقدرشي عليها ولا المخابرات الأمريكيه نفسها ............. لاحظت مؤخرا إن كتير من أصدقائي لسه مش عارفين يفرقو بين الحلم والواقع , بين المرجو والمتاح , وباختصار يعني ظهرت عليهم أعراض ( البرادعي سيندرومز ) !!.

.

.من أكتر المواقف اللي بتستفزني جدا في شغلي , تدخل واحده ست ومعاها الشغاله , الشغاله مريضه جدا وحالتها بالبلا ولسه طالعه من عند الدكتور , الست تصرف العلاج للشغاله وتقول لها ( شيلي دواكي ) وهي الشغاله أصلا شايله البيبي وشايله نفسها بالعافيه !!.

الحقيقه إحنا العرب عندنا عقدة نقص ( محدثين نعمه ) , مفهومنا عجيب لمهن ووظائف معينه زي الشغاله والسواق والبواب .
جوه كل واحد عربي فرعون عايش وبينتظر الفرصه للخروج !!.
عايز أقول حاجه كمان ( ممنوع دخول المتخلفين عقليا ) , دينا الإسلام عمره 15 قرن تقريبا , وسيدنا رسول الله له ألقاب كتير أقربها وأحبها إلى قلبي هو لقب ( نبي الرحمه ) , أنا أزعم أن 14 قرن من تاريخ المسلمين لم يتأثر فيها المسلمون بشق الرحمه في خلق رسول الله ( إلا من رحم ربي ) , معلوماتنا عن الإسلام بتختزل في الشكل ( اللحيه والنقاب والحجاب والجلباب والهباب ) , ومن جوه هتلاقي ملحد كبير لا يرحم , ربما أكثر إجراما وصلفاً من أبو لهب نفسه !!.

.

.

محمد حسين