منوع 6 / 2013

مساء الخير , لما القاضي سأل الحيوان اللي قتل فرج فوده ( قتلته ليه ؟ ) , قال له عشان كافر وكتاباته كلها كفر , القاضي سأله ( وانت قريت كتب فرج فوده ؟) , رد الحيوان وقال ( لا...انا مبعرفشي أقرا ) !!.
و بناء عليه قام كلاب الإسلاميين الجدد قتلو الشيخ حسن شحاته واللي معاه بتهمة إنهم شيعه وكفار , وغالبا هتكتشف إن الحيوانات الجدد ميعرفوش الفرق بين الشيعه والشيوعيين واللبان الدكر , أيا ما يكون , دينا علمنا إن قتل النفس حرام بغير وجه حق حتى لو كان المقتول كافر أو ملحد , ودينا علمنا إن إقامة الحدود ومحاربة الكفار والملحدين بتكون مهمة ولي الأمر , يعني مش أي عيل برياله ودقن ماشي في الشارع يطبق الحدود على مخاليق ربنا .
الكارثه بقى إن العيل أبو رياله ودقن هو اللي بيحكم مصر حاليا
........., تبا لأمه يحكمها من يجيد القتل ولا يجيد القرأه !!.

.

.

لو يعلم الصهاينه ( أحفاد القرده والخنازير ) , لو يعلمون عدد المحلات التي تحمل إسم ( القدس ) في الوطن العربي ( أسماك القدس , ترزي حريمي القدس , عطارة ونشوق القدس , مخللات القدس , مصنع طائرات نفاثه القدس , عفشجي ابو عطوه القدس سابقا .... إلخ ) , لسقط الصهاينه على الأرض مغشيا عليهم.... من الضحك والسخسخه !!.

.

.للي خايف من 30 يونيو 

.
كل المطلوب من حضرتك إنك تعمل زي ما عمل سيدنا إيراهيم , كسّر على أد ما تقدر من أصنام الجاهليه , وبعدين علّق الفاس على رقبة التمثال الكبير , ولو حد قابلك وسألك ( من فعل هذا بألهتنا ؟ ) , قل بل فعله خليفتهم بجهله فاسألوه إن كانو ينطقون !!..

.

.

حقيقه علميه
.
نهر النيل هو أطول أنهار العالم إذا أضفنا إليه روافده ( وذيوله ) , و جماعة الإخوان المسلمين هي أكبر جماعه إرهابيه في العالم إذا أضفنا إليها الجماعات الإسلاميه ( والسلفيين ) !!

.

.

يا أهل الخير , عاوز بكره أروح القاهره أجيب مراتي وبناتي عشان يحضرو فرح أخويا والعربيه فيها بنزين ربع التانك , ميوصلنيش القاهره , مش لاقي بنزين , وعهد الله مانا لاقي بنزين 90 ولا 92 , وحياة خليفة المسلمين ان شاء الله أعدمه مانا لاقي , أعمل ايه يا ناس ؟ اروح أجيب مراتي من القاهره للسنبلاوين في تكتك ؟!!
أنا بقول يعني لو حد في حضراتكو شايل صفيح 92 كده ولا حاجه للزمن , أو كان عايز يأمن بيها مستقبل عياله يجيبها وانا ابن بلد هشوفه برضه , هدفع يا باشا كاش , توتو على كبوته , الوسطاء يمتنعون , أخوكو مزنوق !!

.

.

في قريتنا الفقيره , الفقيره جدا , ميكروفون الجامع كان بيذيع من شويه , بيقول ( يا أهالي البلد فيه ناس من سوريا قاعدين قدام الجامع واللي طالع من ذمته حاجه يجيبهالهم !! ) , أمي سمعت الميكروفون وقالت لي ( بييجو بنات من سوريا هنا يحلّو من على حبل المشنقه ! ) , والترجمه يعني بنات مزز !!.
أنا حاسس إن حد ضربني بسكينه فجأه , مش بنات سوريا اللي يشحتو من القرى الفقيره في مصر , مش أحرار سوريا اللي يعيشو كده , لعنة الله على محمد مرسي والجيش الحر وبشار الأسد , لعنة الله عليهم أجمعين .

.

.

كتير جدا من مشايخ السلفيين بينكرو عليك الإهتمام بالسياسه ومعارضة الحاكم , وكل معلوماتهم عن أهمية خلق الإنسان إن ربنا خلق الراجل عشان ياكل ويستمتع بالمرأه , وخلق المرأه عشان تاكل وتمتع الرجل .......................بأبي أنت وأمي يا حنظله !!.

.

.سبحان العاطي الوهاب , بعد الشبشب والقبقاب , البلتاجي والعريان مش عاجبهم عبد الناصر ولا الإمارات ولا ألمانيا ولا كوكب المريخ , والحقيقه مشكلة الإخوان مش في كتاب التاريخ ( عبد الناصر ) ولا كتاب الجغرافيا ( الإمارات وألمانيا ) , مشكلتهم الرئيسيه في كتاب القراءه من أول زرع وحصد !! , سيدي الخروف الذي لا يقرأ ولا يعرف الفرق بين فرويد والريس متقال , كيف ستحكمني ؟!

.

.إذا الإخوان قدرو يحشدو مليون شخص في مليونيتهم , أتحداك أن تجد من بينهم مفكر واحد أو صحفي موهوب أو شاعر أو أديب أو فيلسوف , وإذا حشد الليبراليين والثوار 50 مليون يوم 30 يونيو , أتحداك ان تجد من بينهم قاتل أو عضو في جماعه إرهابيه , هذا هو الفارق ,................................ فاخترْ لنفسكَ أيُّ الدارِ تختارُ ؟!!

.

.بما أن اللي نزلو النهارده من أنصار الإخوان هما 25 مليون نسمه يبقى أكيد اللي هينزل يوم 30 هيكونو حوالي 250 مليون ...وبكده نعرف يا ولاد ان عدد سكان مصر هو 700 مليون نسمه حسب أخر إحصائيه لخميس بتاع مصر 25 !!

.

.في مظاهرات الإخوان التي يقودها السفاحين والقتله , باسم الله ماشاء الله يعني , خرج الغلابه من اعضاء التنظيم في القرى والنجوع إلى مكان الحشد , وفي الطريق منسيوش 3 حاجات مهمه جدا , أولا يطلعو بدري ويرجعو بدري عشان البلطجيه اللي بيثبتو الناس بالسلاح على الطريق , وثانيا يدورو على بنزين وسولار من السوق السوده عشان يمونو الإتوبيسات والعربيات , وثالثا كل واحد عمل حسابه وهو راجع يشتري من مصر لندتين جاز عشان الكهربا المقطوعه !! شوفتو إنجازات أعظم من كده تستحق النزول والتأييد ؟!

.

.صباح الخير يا مصر , وصلت أرضك بالسلامه , فين مصر يا ناس ؟ وين هنادي يامّاي ؟! , حاسس إني هقضي أجازتي في البنزينه , هتفسح في البنزينه , المفروض بقى يعملو حمام سباحه ملحق بكل محطة بنزين ومرجيحه وزحليقه عشان (الأطفال ) يستمتعو بأم مشروع النهضه !!.

.

.صباح الخير , أصدقائي الأعزاء الغاليين , أنا مسافر بعد ساعه بإذن الله , هطلع من هنا العصر أوصل مصر على العشا كده , بس العشا بتاعة بعد بكره , مسافر بالناقه ( قصدي العربيه ) , إدعولي بقى ربنا ييسرلي الطريق ويجنبني أنا والعربيه كل مكروه , اسكتو مش انا اشتريت لابتوب !! , أه والله أول مره اشتري لابتوب في حياتي , جبته جديد ب 1500 لحلوح , لينوفو مواصفاته حلوه في مستوى الطالب الغبي اللي زي حالاتي , لو عرفت أدخل فيس في المينا سأفعلها , بس مش عارف الحاجه أمي في السنبلاوين هتعرفني وانا شايل لابتوب ولا لأ ؟ أكيد أول ما هتشوفني هتنادي على أخويا وتقول له ( يا هاني محصل الكهربا واقف بره , شوف الفاتوره بكام وقول له الكهربا قاطعه مش دافعين ) , إدعو لي كتير بقى بسلامه الوصول , أراكم على خير بإذن الله .

.

.

مؤتمر مرسي بتاع الجهاد في سوريا كان غرضه جمع بهاليل السلفيين حواليه قبل يوم 30 , وحركة المحافظين النهارده وتعيين محافظ إرهابي غرضه جمع الإرهابيين بتوع الجماعات الإسلاميه ( بيصرف من جيب أمه تقريبا ) , كده أقدر أقول إن الإخوان مرعوبين وعاملين بالظبط زي البلطجي اللي داخل على خناقه كبيره فبيجمع حبايبه القدام والجداد , ولا يا حمو , واد يا سيد أبو شفه هاتولنا أبو شفطوره عشان عندنا مصلحه ياله .
عموما إحنا هنعمل زي النكته ما قالت بالظبط , وهنستنى لما يتجمع البهلول على الخروف على الإرهابي ونقول كده يبقى العدد كمل , ولّع بقى يا عمنا !!..

.

.أسوأ حاجه في السنتين اللي فاتو , واللي مش هنقدر نكنسها بالمقشه مع نظام الإخوان للأسف , هي أشكال وطبيعه الناس اللي مستقبلا هيكونو بيحملو لقب وزير سابق ورئيس وزراء سابق ومحافظ سابق , للأسف أسماؤهم اتسجلت في دفاتر مصر , تخيل كده وانت داخل محطه مصر ولقيت واحد صرماتي ( رجع لشغلته القديمه ) قلت تلمع جزمتك عنده وقعد الصرماتي يحكي معاك وقالك ( على فكره أنا كنت عضو في لجنة كتابة الدستور المصري بتاع الإخوان ) !!.

أو تروح تزور قبر جدك في العيد وتلاقي هناك واحد فقي بيقرا في التُرب وياخد اللي يطلع من ذمتك وتركز في شكله تكتشف إنه كان وزير سابق !!
.
ورغم احترامي لكل المهن بلا استثناء , عايز أقول للإخوان ( مصر اتهانت أوي في عهدكو يا ولاد الكلب ) !!..

.

.

يعني الراجل أبو وش سمح بتاع الجماعه الإسلاميه اللي بقى محافظ الأقصر ده هيشجع على السياحه ويجيب لنا السياح الألمان والأمريكان وهيجيب السويديات كمان يزورو الأثار المصريه ؟ وهيعمل بانوراما الصوت والضوء في معبد الكرنك ويعيد اكتشاف فرقة رضا للفنون الشعبيه ؟! عليا النعمه المحافظ ده أصلا لو موجود في أي دوله أوروبيه من اللي بتبعت لنا سياح كانو حطوه في محميه طبيعيه كدليل قطعي إن إنسان الغاب طويل الناب لسه عايش معانا على نفس الكوكب وبيتكلم زينا بالظبط !!

.

.

نياهاهاهاها , محافظ الأقصر الجديد واحد من اللي قتل السياح قبل كده , يا دين أمي على الإختيارات , عليا النعمه مرسي ده كان بيرضع بيبي وهو صغير , إبعدي إنتي من وشي يا إليزابيث دلوأتي , خدي ناتاشا في إيدك واستخبو في أي معبد ولا تابوت فرعوني لحد يوم تلاتين , بس يارب مايردمو عليكو قبلها !!.

.

.

بعد ما شوفت مناقشه شارك فيها اتنين إخوانجيه أقدر أقول لكو وانا ضميري مستريح إن محمد بديع لو طلب مرات واحد إخوانجي ونام معاها قدام جوزها , جوزها هيمصمص شفايفه ويقول ( لو مش العلم اتقدم كنت قلت إن فضيلة المرشد نايم مع مراتي ) !!.

.

.

بعد خطاب مرسي المؤيد للموقف الأمريكي والصهيوني من سوريا , هل تعلن إسرائيل رد الجميل للصديق الوفي يوم 30 يونيو وتدعو الصهاينه وحركة حماس( للجهاد ) في مصر ضد المصريين الثائرين أم تكتفي بالدعم الإعلامي عن طريق قناة الخنزيره القطريه ؟!.

.

.

صباح الخير , في تركيا حصلت مظاهرات وثوره ونزل أعداد كبيره للشارع , في اليونان حصل قبل كده وأمريكا نفسها اللي اخترعت الديموقراطيه وعملت لها ريموت كنترول وتاتش سكرين بيحصل فيها مظاهرات , لكن مسمعناش في الحالات دي عن نزول أنصار الحزب الحاكم للشارع , عشان هي دي الديموقراطيه , الشارع للمعارضه , والحزب الحاكم له أليات تانيه , أجهزه أمنيه وفي إيده تفاوض سياسي واتخاذ قرارات ترضي المعارضه , لكن في مصر تحديدا هينزل انصار الإخوان للشارع , ليه بقى ؟ عشان احنا مقضينها نُص ديموقراطيه ونُص بهلله , اللي نعرفه عن الديموقراطيه هي الصناديق والباقي بهلله .
رغم قناعتي التامه إن عدد أنصار الإخوان ميزيدوش عن 20 % من الشعب , إلا إن نزولهم للشارع هيعني باختصار حرب أهليه , كل قطرة دم هتسيل في أرض مصر ذنبها في رقبة خليفة البهاليل قصدي خليفة المسلمين !!.

.

.الشعب اللي تخيّره بين العربيات الياباني والعربيات الألماني فيقوم يختار الياباني لازم يكون رئيسه واحد زي مرسي , ولما تقول لصاحبك عايز أشتري عربيه , يقولك بدون تفكير هات تويوتا , تسأله ليه ؟ يقولك معرفش بس الكل بيشتريها , يعني على طريقة هذا ما وجدنا عليه أباؤنا !.

........................ تباً ثم تباً لجيل الكورولا البيضه !!

.

.

وحكاية فتحنا باب الجهاد دي عامله زي فتحنا المزاد , أسوأ حاجه في الدنيا إنك تشوف شباب المسلمين المتدين بيتباع في سوق النخاسه الإسلامي زي الجواري والغلمان في العصر الجاهلي .... بكمْ تشتري هذا الغلام ؟!!.

.

.بناتي قاعدين 24 ساعه بيتفرجو على قناة طيور الجنه وبيسمعو أغاني تحرير القدس , طيب لما بنتي تكبر وتسألني أقول لها إيه ؟ أقول لها أصل احنا ربنا وفقنا وتحالفنا مع الصهاينه وبدل ما نحرر القدس حررنا دمشق من إيد العرب والمسلمين ؟!!.

نداء إلى الساده المسئولين , إرحمو أطفالنا الصغار , ماهو يا إما تشيلو من قدامهم أغاني تحرير القدس يا إما توفرو لهم الكوله !!.

.

.خطبة مرسي الجهاديه امبارح هي جواز سفره للمرور من يوم 30 يونيو بسلام , هكذا أقنعه الأمريكان .

أمريكا الدوله المتقدمه جدا اللي اخترعت ( الترباتاتو ) لسه مش فاهمه طبيعة المصريين , يا ستنا امريكا إحنا احفاد عبد الناصر , وعبد الناصر مكانشي أهبل وبرياله , يوم ما أمم قناة السويس كان متوقع عدوان ثلاثي عليه إنما أصلنا شعب بيستغبى في موضوع أرضه وكرامته , وعند الكرامه مبيحسبهاش , عارفين والله إن يوم 30 يونيو هنواجه عدوان ثلاثي جديد على مصر , عدوان ( إخوانجي أمريكي صهيوني ) , طيب وماله هي جديده علينا ؟.
إحنا يا ستنا امريكا اللي حاربنا 3 دول عظمى في وقت واحد وحاربنا الهكسوس والتتار , مش بقولك شعب بيستغبى في موضوع الكرامه .
وعايز أقول لمرسي جواز السفر اللي إديتهولك أمريكا ده تبرمه كده وانت عارف بقى تحطه فين ؟ , لو مش عارف إسأل متولي هيقولك !!.

.

.صباح الخير , بهاليل الإخوان بعد خطاب مرسي للصديق الوفي من كام شهر غيّرو وجهتهم الجهاديه للأندلس , وشويه وراحو قالبين على بورما , ودلوأتي راجعين وعايزين يحررو دمشق !!.

رأيي الشخصي في العرب من سنين وحسب ما بيقول كتاب التاريخ إن الوطن العربي فيه 4 دول صاحبة تاريخ وحضاره , واحده منهم وقعت من سنين طويله بسبب إدمان القات ووجود تنظيم القاعده ( اليمن ).
ال 3 دول الباقيين هما اللي كنت بعوّل عليهم فيما يسمى مجازا بإسم العالم العربي , دول كبيره بشعوبها وتاريخها , فيها ناس عندهم علم وثقافه ونخوه , وهما بالترتيب مصر والعراق وسوريا , العراق راحت في الوبا والكوليرا قصدي في الديموقراطيه والإنفتاح الأمريكي , دخلت في حرب أهليه والعرب هناك قتلو بعض , أمريكا أصلها مش بتوسخ إيديها بدمنا !.
حاليا حتة الغسيل اللي أمريكا أمرت العرب بشطفها ونشرها هي سوريا , وانا بختلف تماما مع بشار الأسد وشايفه سفاح مسئول عن قتل الألاف من شعبه , وبحمله جزء من المسئوليه , لكن طالما الموضوع هيوصل لتدمير سوريا وتفكيكها ونشر الحرب الأهليه والطائفيه فيها على غرار العراق يبقى لازم أقف جنب بشار , مضطر أعصر على نفسي لمونه لأول مره .
عزيزي الشاب السلفي المتدين الغبي , حضرتك يا مولانا هتبقى واقف في سوريا بتجاهد ضد جيشها النظامي وفوق منك غطاء جوي من الطيران الصهيوني الأمريكي , ومش بعيد الصهاينه يرمو عليك ساندوتشات هامبورجر وبيبسي عشان تاكل وتشرب , متنساش قبل ما تاكل تقول باسم الله ومتنساش تشرب على 3 مرات عشان دي سنه عن سيدنا رسول الله !!.
.
من أجل مصر موحده خاليه من الإرهابيين , من أجل سوريا موحده خاليه من الإرهابيين والأمريكان والصهاينه لا أملك إلا أن أقول ................. هنا دمشق !!.

.

.

ومادام الحكايه كده والمسلمين والصهاينه بقو في خندق واحد ضد بشار , والإتنين واخدين بعض عن حب , يبقى خير البر عاجله , إحنا نكتب الكتاب ونعلّي الجواب وبعد الفرح بإذن واحد أحد يطلع أهل العريس وأهل العروسه يعملو مظاهره مشتركه ويهتف فيها المسلمين والصهاينه ( على دمشق رايحين .. بنقول لأوباما أمين ) !!.
طب وعهد الله أنا مش صعبان عليا في الليله دي غير ال 78 ألف اغنيه وقصيده اللي كتبهم العرب المسلمين عن القدس , مش كنا نستفيد منهم ونفتح بيهم قنوات فضائيه ( للاطفال وحديثي الولاده والمبتسرين ) , ونسميها القدس واحد والقدس دراما والقدس بلاس 2 !!.

.

.

أتوقع من وكالات الأنباء العالميه أن تتناقل الخير كالتالي :
.............. خطاب مرسي الجهادي ضد بشار الأسد أثلج قلوب الملايين من المسلمين والصهاينه !!........أه والله والصهاينه , مسلم وصهيوني إيد واحده , ...................... يالَفَرحَةَ يهود !!.

.

.

أوباماقال ل مرسي من كام يوم شكلك مش مكمل معانا بعد يوم تلاتين يا كتكوت , قام مرسي طلع النهارده يعلن الجهاد ضد بشار الأسد عشان يقول لأوباما ( أرجوك متسيبنيش .............. دانا بتاعك يا معلمي ) !!.
المضحك بقى في الليله دي إن خطاب مرسي بينادي بيه على الأمريكان , قامو السلفيين جايين !!.

.

.

وانا يعني شايف من باب الإحتياط إننا بدل مانقعد نفتح باب الجهاد ونقفله ونفتحه ونقفله , إحنا نشيل الباب خالص ونركّب مكانه ستاره زي الصالون أو نركب مكانه سوسته زي ال.........( الصالون برضه !! ).

.

.

حكايات أبله فضيله ... الحلقه 12 ( حزب مصر القويه )
.
وبعدين يا ولاد قام الدكتور أبو الفتوح أعلن مشاركته في ثورة 30 يونيو , وبكده يبقى دخل بين الثوار رسمي وطلّع كارنية نقابة الثوار كمان , ويشاء السميع العليم إن يوم 29 يونيو بالليل يخرج الرئيس محمد مرسي في خطبه عصماء إلى الأمه , يتنحنح فيها ويكثر من الأحاديث والأيات وفي نهاية الخطبه يعلن إقالة حكومة هشام قنديل وإيقاف العمل بالدستور والإعداد لدستور توافقي , بعدها ب 3 ثواني يخرج الدكتور أبو الفتوح ويقول كده الموقف اتغير , الريس مرسي عدّاه العيب وأزح وعمل اللي عليه , نديله فرصه بقى , في الوقت ده ينسحب أنصار تتح من وسط الثوار في عمليه بدائيه بسيطه تُسمى ( تفريغ ) الثوره , بمعنى ترك فراغ داخل الحشد الثوري , الحكاية دي يا ولاد عامله بالظبط زي الثعلبه اللي بتطلع في شعر الشباب , يعني حته فاضيه مقوّره في النص كده بتظهر فجأه وبتخلي شكل الواحد مش ولابد , وحزب مصر القويه ما هو إلا ثعلبه في رأس الثوره !!.

.

.حزب مصر القويه أعلن أنه سيشارك في ثورة 30 يونيو , أقطع دراعي من هنا لو منزلوش يوميها وهما رافعين شعارات تتطالب بتغيير وزير البيئه ورئيس مجلس محلي مدينة ههيا !!.

.

.وحكاية إن العريفي بيدعو المصريين للجهاد في سوريا دي بتفكرني بنكتة الطياره اللي كانت هتقع عشان فيها وزن زياده , والطيار طلب إن بعض الركاب يضحو وينطو من الطياره عشان الباقي يعيش هنا بقى جه الدور على الراكب المصري اللي وقف وقال ( من أجل مصر وعيون مصر وقام رامي الراكب الصيني اللي قاعد جنبه !! )....برضه مولاك وولي نعمك الشيخ العريفي وقف في جامع مصري وقال من أجل السعوديه وعيون السعوديه وقام رامي البهاليل المصريين اللي قاعدين قدامه في فرن الجهاد ) !!.

.

.

وبعد خطبة الشيخ ( السعودي ) االتي دعى فيها (المصريين) للجهاد ضد النظام في ( سوريا) , المستشاره الألمانيه تدعو الفرنسيين الشرفاء للخروج من أجل إسقاط الحكومه الكنديه !!.
وأنا من هنا ( قاعد في التكييف ) أوجه دعوتي للواد حماصه صاحبي بتاع دمياط بأن يحمي مرات الحاج مرعي بتاع الكليمه اللي ساكن هو ومراته وعياله في البدرشين !!.

.

.إذا رأيتم أمريكا وإسرائيل تدعمان المقاومه في سوريا ضد نظام بشار , فاعلمو أن العريفي أتى إلى مصر من أجل حفنة دولارات , يعني جاي ياكل عيش , وعلى رأي الرقاصه اللي قالت زمان ......... ( أنا رايحه أعرق في طنطا ) !!

.

.

الشيخ العريفي بيخطب في مصر دلوأتي , وده معناه إن الإخوان على رأي عمنا نجم مزنوقين في شوية سلفيين , والحقيقه السلفيين بعد خطبة العريفي هييجو للإخوان , اصلهم متعودين إنهم ييجو !.
يعني تقدر تقول إن الإخوان بزيارة العريفي دي كأنهم جابو كوباية عصير وقرو عليها أيتين وكام حديث وحطو فيها حبيتين منوم وقالو للشاب السلفي على رأي محمود سعد ( إشرب العصير !!) مع ابتسامه إسلاميه حانيه لأخوك الكريم , اخوك الكريم هيشرب , أصله متعود إنه يشرب !!.
عموما سلامات يا عريفي , إنت شرفت مصر بلد الامن والأمان زي ما بتقول بس حاول متطلعشي الدائري عشان بلطجية السلاح مبتفرقشي معاهم إخوانجي من سلفي من ليبرالي , وانت راجل فرفور عايش في القصر المكيف ومش حمل تتثبت برشاش في الشارع , كما نرجو من فضيلتكم مغادرة مصر قبل يوم 30 يونيو , انا خايف عليك تقع من ضمن الأسرى والسبايا في إيد البلاك بلوك ودي عيال فاجره متعرفشي ربنا ومعندهمشي خوات بنات ولا خوات مشايخ !!.

.

.صباح الخير , يوم 30 يونيو فيه ملايين المصريين هينزلو يهتفو بسقوط النظام , وناس تانيه هتنزل تحمي النظام , وفيه راجل واحد بس هيقف في البلكونه بالفالنه الحمالات يهتف بشرعية مرسي وفي نفس الوقت يشاور للثوار بعلم تمرد , إدخل جوه يا تتح أنا خايف عليك من برد الصيف بدل ما عضم صدرك يسوّس !!.

.

.

.حاسس إننا عايشين في فاصل إعلاني سخيف قطع المسلسل الجميل , المشكله بقى إن حياة الإنسان مالهاش ريموت عشان يعرف يغير المحطه لحد ما يخلص الفاصل الإعلاني , حياة كل واحد فينا عباره عن تلفزيون بيجيب قناه واحده بس ولازم نستحمل فواصلها السخيفه !!.

.

.

اللي خايف من النزول 30/06 أو لسه مش واثق في النصر ونجاح الثوره , عايز أقول له إنت عارف أحلى حاجه في الإخوان هي إيه ؟ أحلى حاجه فيهم إنهم تنظيم له راس بتفكر وجسم بيتحرك ( يعني جزء فوق وجزء تحت ) , ولو كنت حضرتك داخل على جواز يعني وسألت واحد أكبر منك هتعمل ايه في الليله الموعوده ؟ هيقولك أهم حاجه تظبّط إنت من فوق هتلاقي اللي تحت بيجي معاك لوحده زي الحلاوه , وصباحيه مباركه يا عريس !!.

.

.صباح الخير , البورصه المصريه خسرت في الإسبوع اللي فات 45 مليار , بالمعدل اللي احنا ماشيين بيه يبقى ده مصر هتبيع عفش البيت ( وطقم الجيلي ) قبل نهاية السنه الماليه الحاليه , لو واحد إخوانجي صاحبك كلمك تاني عن استثمارات ومليارات متلتله جايه من الصين والهند والسند و بلاد تركب الأفيال إبقى طلّع أخر جنيه في جيبك وابرمه وحطه في عينه ( يا سيدي مشيها عينه المره دي ) , ومتنساش بعد ما تعمل كده تركبه على فيل من بتوع المستثمرين ( مشيها فيل برضه ).

نزولك 30 يونيو بقى فرض عين مش فرض كفايه , هتموت يا مولانا لو منزلتش , هتموت عطشان أو مقتول من البلطجيه عالطريق أو هتموت من الجوع , ولو محصلشي كل ده يبقى هتموت بالمراره أكيد .
أما الكلام عن الديموقراطيه والإنتخابات اللي جايه ومين هيعمل ايه ؟ فاسمحلي يعني أقولك إن التجربه أثبتت لنا إننا مجتمع قَبَلَي بتحكمه عقلية القبيله , عمره ما هيفهم يعني ايه ديموقراطيه حتى لو عاش المواطن المصري في سويسرا 50 سنه هيرجع مصر عشان ينتخب قريبه أو الراجل اللي عامل شادر كبير أو تاجر الدين .
في المجتمع القبلي لازم يحكم شيخ قبيله , وكل المطلوب مني ومنك إننا ندعي ربنا , يارب يارب ارزقنا بشيخ قبيله يكون عنده ضمير !!.

.

.صباح الخير , صديقي الإخوانجي العزيز فلان الفلاني هو تقريبا الإخوانجي الوحيد عندي في الأصدقاء , بعتز جدا بصداقته , إنسان محترم حقيقي ( طفره في الجينات الإخوانجيه ) , إنما لقيته النهارده كاتب على صفحته ( مش عايزين ثقافتكو ولا فنكو ) , الجمله دي بتختصر مأساه كبيره , الثقافه والفن يا صاحبي يعني هوية المجتمع , انت كده رافض شكل مصر وهويتها وتارخيها , الثقافه والفن في مصر لا تعني سعد الصغير ودينا وأورتيجا , الثقافه بتعني العقاد وأنيس منصور وجلال عامر وغيرهم كتير والفن بيعني أم كلثوم وعبد الوهاب والأبنودي وجويده وغيرهم كتير , تاريخ مصر يا صاحبي زي تاريخ أي دوله بينطبع ويتحفظ في صورة أعمال فنيه وأدبيه وثقافيه , نقطه أخيره لصديقي الغالي , كلمة ( فنكو وثقافتكو ) هي كلمات مكتوبه بضمير المخاطَب , يعني موجهه إلى الأخر , ودي الكارثه التانيه , فكرة الإنتماء , إنتو عايشين في دولة الإخوان , ومصر بالنسبالكو هي حتة أرض بتاكلو فيها عيش مش أكتر !!.

إعتز يا صديقي بثقافة بلدك وتاريخها , واتمسك بيها حاول يعني , أمي وأمك مش ملايكه ونازلين من السما , فيهم عيوب ومميزات كتير , لكن دايما بنفخر بأمهاتنا !!.

.

.

أنا مش مبسوط بضرب أحمد المغير , بجد مش مبسوط , لأننا في النهايه عرب , ومهما اختلفنا وانفعلنا فمش لازم ننسى أبدا إن من شيم العرب عدم ضرب النساء خصوصا المرضعات !!.

.

.

شيزوفرنيا الإخوان
.
ركز حضرتك هتلاقي بهاليل الإسلاميين في الإجتماع السري إياه بيقولو نضرب إثيوبيا ونحط السيخ المحمي في صرصور ودنها , وبعدين يطلع البرادعي بشياكه يعتذر عن جليطة البهاليل , يقوم يقولك البرادعي مش خايف على ماية النيل هع هع هع وبعد يومين يطلع مرسي يقولك الشعب الإثيوبي حبيبي ووطني حبيبي الوطن الأكبر !!.
.
ركز حضرتك تاني , هتلاقي ظابط أمن الدوله اللي اتقتل على إيد البهاليل ( فرع البهاليل المسلح ) بينحتو في فروته وعرضه وبعدها يطلع مرسي يعزي الظابط الشهيد !!.
.
طيب ركز حضرتك تالت مره , هتلاقي البهاليل الصغيرين ممكن ينشرو صورة عماد عفت واللي ماتو أيام مبارك والعكسر لكن مينشروش صورة جيكا وكرستي , ليه يا مولانا ؟ هما مش شهدا دول ولا ماتو في حادثة موتوسيكل ؟!!.
.
................ باختصار شديد , في زريبة الإخوان يستطيع قائد القطيع أن يقنع أي خروف إن أمه اللي عايشه هي رابعه العدويه في نصف حياتها الأول وتستحق القتل والرجم ويقنع نفس الخروف قبل ما يخلص كوباية اليانسون اللي في إديه إن أمه هي رابعه العدويه في النص التاني ولا يجوز عليها إلا الرحمه والصدقه الجاريه لأنها ماتت

.

.

 أكبر إهانة للمرأه المصريه في تاريخ مصر هو ما يحدث الإن , محاولة إنتاج مسلسل بدون نساء !! , حضرتك مش متخيل , المسلسل هيتصور في شارع ( مفهوش نساء ) ومنزل ( مفهوش نساء ) ومكان عمل ( مفهوش نساء ) وجامعه أو مدرسه ( بدون نساء ) , باختصار صفعه على وجه المرأه المصريه , أنتي يا سيدتي صفر على الشمال , إلا إذا كان مولانا وجدي العربي ناوي إنه يصور كل المشاهد في حمام كبير ويسمي المسلسل الإسلامي ( بإذن الله حمام الملاطيلي 2 ) !!

.

.صباح الخير , جمله قالها الموكوس ابن الموكوس قي هرتلة امبارح بتختصر المشهد , ( أنا مستعد أن أذهب إليهم في عقر دارهم ) , تقمص فيها دور السادات , بس المشكله إن قيادات المعارضه اسمهم البرادعي وصباحي مش مناحم بيجن وجولدا مائير , هنا بقى مربط الفرس , نظرة الإخوان للشعب المصري على إنه عدو , وأتحداك أتحداك إن مرسي يقدر يقول الجمله دي وهو بيتكلم عن حماس ولا إيران ولا قطر , لأنهم من الأهل والعشيره , مطلوب النزول 30 /06 لا لأي شئ إلا لإستعادة حدود مصر الأربعه , حدود مغلقه واضحة المعالم , واستعادة علم مصر والنشيد الوطني وأغاني أم كلثوم وعبد الوهاب , استعادة الجنسيه والهويه , باختصار مطلوب استعادة مصر من أيدي التتنظيم الإرهابي الدولي !!.

.

.

.يا دين النبي , يعني مرسي جايب ألف خروف من (علية القطيع ) وكاميرات وكهارب ومايه وشاي وعصير وبانجو ومعسل عشان يقول لنا كلمتين اتنين ( أبوس إيديكو متنزلوش يوم 30/06 ) !! أصل عندنا مشكلة سد النهضه , ليه يامولانا ؟ هو احنا نازلين نقفل الهويس ؟ إحنا هنشيلك انت وخرفانك بس , وأصغر عيل فينا هيمسك ميكروفون بعدها ويقول بنحب الشعب الإثيوبي وكل الخيارات مفتوحه , شفت بقى إنها سهله أوي ؟!!.

.

.

مرسي بيقول ( ثوار أحرار هنكمل المشوار ) , مش قلت لكو الراجل ده فيلسوف كبير أوي وهينزل معانا يوم 30 /06 ؟!!.

.

.

هههههههههههههه إحنا عملنا ثوره عشان نغير الطبال اللي كان بيحضر مؤتمرات مبارك ويغني ونجيب مكانه منشد , منشد يا خلق الله منشد هع هع هع , بنحبك ياريس بإذن الله , المنحه ياريس يرحمكم الله , إنت عظيم ياريس صدق الله العظيم !!

.

.عارفين ليه الإخوان دايما بيتهمو البرادعي إنه عميل مع إنه ممسكشي حتى ( عمدة كفر ) من يوم ما رجع من النمسا ؟! عشان هما ميعرفوش حد محترم , ميعرفوش إن ربنا خلق ناس نضيفه , الإخوانجي بيقضي عمره كله وكل اللي يعرفهم ويتعامل معاهم شخصين اتنين إما واحد إخوانجي زيه أو فرج بتاع السجن ؟!.

.الحمد لله , ربنا كتبلي حج بيته الحرام من كام سنه , وكان عندي أمنيه إني أروح التحرير ( أحج للتحرير ) , المكان المقدس اللي سالت فيه أطهر دماء , للأسف كل المظاهرات كانت بتحصل وانا في الغربه , يوم 30 يونيو هكون في مصر بإذن الله وهنزل التحرير , الحجه اللي كان نفسي فيها , بس خايف أنزل مالاقيش ثوره , وألاقي راجل عجوز قاعد في جنب أسأله مصر فين يا حاج ؟ يقول لي ( اتأخرت ليه ؟, باعوها يابني وقفلو المزاد !!)................ يارب ما تخيب سعينا

 .

.

.

جمال وعلاء طلعو براءه وقبل منهم كل رجالة مبارك , وكل قتالين القتله بتوع الزمر وبن لادن والجهاديين والإسلاميين وزفت الطين طلعو براءه , كده السجون المصريه نضفت وبقت فاضيه وبتنش , والإستعداد يجري على قدم وساق لملئها بالثوار , علاء عبد الفتاح ودومه و انا وحضرتك وغيرنا كتير , هو ده بقى سيادتك القصاص اللي كان بيقول عليه بديع , قصاص بما لايخالف شرع البلطجيه وتجار الدين , قصاص من الثوره والثوار , وفي نهاية المشهد هتكتشف إن نوسه هتبقى زي ابتسام ومرسي هيبقى أزفت من مبارك !!

.

.

محمد حسين