ماذنب الحيوانات

مش عارف ليه دايماً المصريين بيحشروا الحيوانات، ويمرمطوها جوة شتايمهم وامثالهم الشعبية،جايز لأننا بنحتقر الحيوانات ، على عكس الغربيين اللى دايما بيحترموا الحيوان وبيعملوا لها منظمات تدافع عن حقوقها، فمن النادر لو لقيت واحد اجنبى بيشتم ويقول:
SON OF THE DOG، أو يقول جو تو هيل ياواد "يادونكى"،أما المصرى فأنه يبادر صديقة تانى يوم الصباحية، بسؤاال تصحبة ابتسامة صفراء :- ها... عملت ايه؟ سبع ولا ضبع؟ وكأن الضبع مضرب المثل فى العجز الجنسى مثلا... الضبع على فكرة كويس ياجدعان ومابيتعاطاش فياجرا، وبيخلف ضباع صغيرة كمان.
وعندما نصف شخصاً يجتهد فى عمله فاننا نقول:- ده حمار شغل...ومش عارف ده مدح ولا ذم الصراحة. ولما تلاقى واحد خفيف الحركة نصفه فنقول:- الواد عامل زى القرد.، وعندما تجد شخصاً جالباً للنحس فدائما يوصف بأنه "غراب البين"، أو "البومة "(طبعاً عارفين مين اشهر بومة فى مصر دلوقتى)...وعندما أراد ابن الرئيس ان يهين منتقدية فقال:- اسمه سيادة الرئيس يا"بغل
ناهيك عن حفنة لابأس بها من الامثال الشعبية، مثل ديل الكلب عمرة ماينعدل،الحداية مابترميش كتاكيت،الثعبان لما يدفى يقرص،القط يحب خناقه،حمارتك العارجة ولا سؤال اللئيم.
دبور وزن على خراب عشه.
-آخر الحيوانات التى مرمطناها كان "الخروف"، وصراحة هو مايستاهلش البهدلة اللى احنا عملناها له،لأنه مهما عمل، أخلاقة مش هتبقى زى أخلاق اللى احنا بنشبههم بيه...هو انضف بكتير طبعا.

محمد عبد العزيز