المماتنه

مش احنا كائن حي ؟ يبقى لازم نعمل حاجه اسمها ( مماتنه ) , يعني تأقلم في الشكل واللون واسلوب الحياه مع الوضع الجديد , الفراشه بيبقى لونها أخضر عشان تقدر تستخبى وسط أوراق الشجر في حالة الخطر ولو نقلتها لبستان ورد مكسي باللون الأحمر لونها هيتغير تدريجيا للأحمر, بيسموها كده فعلا ( مماتنه ) , طيب مصر دلوأتي , البهيه اللي ترابها زعفران بيحكمها جماعه محظوره وتنظيم سري , نعمل ايه بقى احنا ككائن (ولا مؤاخذه حي )؟ , لازم نتأقلم مع الوضع الجديد , حضرتك لما تكون عايز تعمل جمعيه أهليه تجري في إجراءات حظرها مش ترحيصها عشان يبقى عندك جمعيه محظوره أد الدنيا ولا حد يقدر يكلمك , ولو بتعمل شركه يبقى تفتخر وتقول أنا عندي شركه مش مرخصه يعني موقفي القانوني سليم 100 % , وبالمناسبه حكاية هدم أبو الهول والأهرامات دي أوشاعه , من كرم ربنا إن الفراعنه لما حبو يبنو أبو الهول مطلعوش ترخيص مباني من حي الجيزه , ولو ركزت في الأهرامات هتلاقي فيها دورين على الأقل مخالفين , يعني مباني مخالفه ومش مرخصه وذي الفل هتتهد ليه بقى ؟ , كمان لما يحكمك جماعه مخظوره وتنظيم سري لازم نغير شويه في مصطلحاتنا , وزارة الداخليه نسميها وزارة ( العسس ) , والمناصب السياديه تبقى بطريقة الشفره , يعني رئيس الوزراء نسميه ( خالتي بتسلم عليك ) هذا وقد قام السيد هشام قنديل خالتي بتسلم عليك المصري ( يعني رئيس وزراء مصر ) بتفقد مصنع قطونيل , والوزير نسميه ( سيكو سيكو ) وفي زيارة مفاجئه للسيد سيكو سيكو الصحه لإحدى المستشفيات اكتشف أن الأم لا تغسل صدرها قبل الرضاعه , وهكذا يعني.
بجد بجد فشخنا العالم والتاريخ البشري انبهار , مصر اللي قال فيها الأنبياء والشعراء والفلاسفه اللي متقالش في بلد تانيه بيحكمها جماعه محظوره ومصره إنها تكون محظوره وحالفه طلاق بالتلاته لا تفضل محظوره.
التاريخ البشري بعد نهاية حكم الإخوان مش هيبذل أي مجهود في وصف الحكم الإخواني لمصر , هيكتبه كده ,:
العنوان : حكم الإخوان لمصر 2012............؟؟ ,
الموضوع ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه.
.
محمد حسين