صباح الخير , بصراحه كده احنا نكّارين للجميل , الإخوان من ساعة ما مسكو الحكم في مصر وكل حاجه ذي الفل وأحسن, محدش اتقتل من الشباب ولا حد مات على فرشته حتى , والمواصلات بقت فاضيه ورغيف العيش أد غطا الحله النحاس الكبيره ( الرغيف الإسلامي ) , ومن ساعة ما الإخوان مسكو الحكم واحنا بنطبق الشريعه بمبادئها وحذافيرها , منعنا الخمره والكباريهات والربا , وفتحنا المساجد اللي كانت مقفوله وحاكمنا كل الحراميه اللي نهبو البلد , شرم الشيخ غيرنا اسمها وبقت (دقن الشيخ ) وغيرت نشاطها من السياحه والمايوهات للعلاج بالأعشاب والطب النبوي , ولأول مره في تاريخ مصر نشوف رئيس مصري مبيكدبش , بقى عندنا حرية إعلام وصحافه حقيقيه ومحدش بيتحاكم بتهمة إهانة الرئيس , والإعلام الرسمي بقى ملك للشعب فعلا وبينتقد في النظام الحاكم , الثوره أفرزت لنا مجموعه من المبدعين الأحرار الجدد أمثال علاء صادق وأحمد غانم , والدولار رجع ذي أيام الملك فاروق ( بربع جنيه ) , اقتصادنا متين وقطر مالهاش دعوه بينا لأننا بنحافظ على استقلال الوطن وسلامة أراضيه وسلامتها أم حسن , محدش من جنودنا مات في سينا , إحنا أصلا معندناش جنود في سينا ومصر مفيهاش محافظه اسمها سينا , بصو في الخرايط الإسرائيليه وانتو تعرفو , ورئيسنا المؤمن التقي بيبل المخده كل يوم بدموعه وبيصلي الفجر جماعه , مصيبتنا الكبيره في بني علمان وبني ليبرال وأبناء ساويرس والمسيحيين , ربنا ينتقم منهم , إبعت يا رب وظيفه ب 20 ألف في الشهر ولا حاجه , يا كريم يا قوي.
.
محمد حسين
ليست هناك تعليقات:
إرسال تعليق