وانا رايح أجيب شاي من البوفيه لقيت كتاب مرمي على الأرض , شدني العنوان ( كيف تتحدث الإنجليزيه بطلاقه في 4 أسابيع ) !! أه والنعمه , الكتب دي بتاكل عيش هنا وبقلاوه كمان مع إني أعرف شخصيه عربيه مهمه فضلت ربع قرن ( 25 سنه ) تتعلم انجليزي وكلنا شفنا النتيجه !! , إنما حكايه بسرعه وكله في السريع وانجز بقى وشغل التيك أواي بقى موضة العرب , في شغلنا مثلا بيدخل المريض يقولك الدوا ده بتاع ايه ؟ تقول له مضاد حيوي , يرد ويقولك أه يعني (حق كل شي ) بعدها فهمت الفوله وبقيت أقوله أكيد طبعا ده بيعالج السيلان ويزود الإنتصاب ومفيد جدا للكحه وأعراض الشرخ الشرجي , ومشهور كمان إن يدخلك واحد ويقولك عايز دوا للقولون مثلا بس ( واحده بواحده !! ) , يعني حبايه واحده تخلص الموضوع !! أه يا سيدي دي مش هتخلص عالمرض ده بس , لا وكل الأمراض اللي في جتتك و هتمنعها إنها ترجعلك تاني يعني وقايه وعلاج , وعشان كده في مجتمعاتنا المتخلفه بتلاقي عادل عبد الفتاح وأمثاله بياكلو عيش , بشرى ساره للعرب والمسلمين توصلنا بفضل الله إلى عشب سحري لتفتيح البشره وتكبير حجم العقل وعلاج الزهايمر وتصغير منطقة الأرداف وتطويل شعر الرأس وإيقاف كل أنواع الإسهال في نفس ذات العشبه السحريه( من منتجات عادل عبد الفتاح ) !!.
.
محمد حسين
ليست هناك تعليقات:
إرسال تعليق