الأيام اللي بنعيشها صعبه , واللي جايه أصعب , وعشان حضرتك تقدر تعيش وتتعايش وتبقى من المعمرين في مصر وتحتفل بعيد ميلادك ال 99 ويطلعلك كرش حلو كده ويبقى لك مؤخره عريضه ( الشاسيه المصري المعروف ) وتلبس النضاره ( قعر كبايه ) , فلازم وحتما تتخلص من كل الحقايق اللي تعرفها وتملى دماغك بالأساطير , يعني مثلا الديناصورات لم تنقرض واحتمال تلاقيها مستخبيه تحت العماره اللي انت ساكن فيها وتطلع لك فجأه وتقولك ( بخ ) , وطائر الرخ ده طائر حقيقي وانا لسه مراتي عاملالي بيضتين من بيض طائر الرخ بالزبده على الغدا , والعضو المسئول عن الحب في جسمك هو الطحال , عشان كده لو شفت حد شايل الطحال متسألوش ( إنت مش بتحبني ليه ؟ ) هيحبك إزاي بقى ؟ , أم كلثوم كانت مطربه يابانيه , وجيفارا عاش ومات في البدرشين , فيكتور هوجو كان فاتح محل كباب وكفته في كفر صقر بس المحل مشتغلش وسافر كوريا الشماليه واشتهر هناك , والإخوان المسلمين جماعه ثوريه مناضله في الأساس واللي أسسها عبد الناصر , واللي قتل السادات جوز خالة البرادعي الله يرحمه بقى , السيبروفلوكساسين هو المضاد الحيوي الوحيد المسموح للحوامل , وفتره الرضاعه الحقيقيه للطفل بتكون من 18 ل 88 سنه , ومحمد بديع هو مؤسس صفحة خالد سعيد اللي مات في حادثة موتوسيكل , صدقني دي الطريقه الوحيده للحياه والتعايش تحت حكم جماعة الإخوان المسلمين !!.
.
محمد حسين
ليست هناك تعليقات:
إرسال تعليق