منوع

هو أنا ليه كل مابكتب في بوست إن مصر محتاجه حاليا يحكمها راجل أوي مش نحنوح ولا مسهوك كل أصدقائي بيفهمو إن المقصود بالراجل أوي هو السيسي ؟! هه هه هه ضحكات شريره متقطعه ( عادل أدهم ) , أنا مش ببقى قاصده والله تحديدا وبتكلم بصفه عامه , بس أديكو بتعترفو بنفسكو أهو !!.

.

.

في ليبيا الشقيقه ( الجاره الغربيه لمصر) رئيس الوزراء اتخطف امبارح من اتنين عيال تقريبا كده كانو راكبين موتوسيكل , ولما لقو مفيش منه رجا وهيتكلفو لقمته ونومته سابوه !! .
وفي السودان الشقيق ( الجاره الجنوبيه ) قال وزير الدفاع السوداني إنهم مقدروش يتعاملو مع الغاره الجويه الإسرائيليه على الخرطوم عشان الطياره كانت طافيه نورها !!.
في أوروبا والدول المتقدمه بتكون الحدود بين بعض الدول عباره عن بلاطه بلون مختلف عن لون البلاط اللي في الشارع , يعني لا سور عالي ولا أسلاك شايكه عشان دي شعوب وصلت لمستوى قياسي من الثقافه والتحضر والأمن .
أهي الدول الأوروبيه دي ينفع أوي يحكمها فاروق جويده أو أحلام مستغانمي أو محمد البرادعي , إنما الدوله اللي فيها تقريبا أكبر سلاح حرس حدود في العالم و مع ذلك مش بتسلم من غباوات وأذى جيرانها يلزمها راجل أوي , مش نحنوح ولا مسهوك , عندك إرهاب في كل مكان وجيران ما يعلم بيهم إلا ربنا وجارك الوحيد المثقف هو عدوك !!.
كارثه حقيقيه إنك تطبق مفاهيم وطريقة دوله زي البرازيل أو ماليزيا على دوله تاريخها وجغرافيتها وتركيبتها مختلفين تماما ( زي مصر ) , بعض القاده السياسيين بيتخيل إن مصر دي بتقع في مركز الإتحاد الأوروبي !!

.

.مره كنت قاعد على شط الترعه بمص عودين قصب في ساعة عصاري , كنت أياميها في ثانويه عامه , وفجأه وانا قاعد ومنسجم لمحت عربيه جايه من بعيد , ركزت كده لقيته حسن صاحبي اللي كان معايا في ابتدائي , بس هو سافر بلاد بره واتعلم هناك , وحشني أوي ابن اللذين ده , قمت نطيت وطلعت جري استنيته ينزل من العربيه وخدته بالحضن , واحشني أوي يا حسن , المهم حلفت عليه ييجي يقعد معايا على شط الترعه زي زمان , الجو كان تحفه , جه معايا وقالي مش هقدر أقعد عالأرض والتراب كده عشان البدله مش تتكسّر قمت جبتله كرسي يقعد عليه , قلت له مص قصب معايا قالي مقدرش , بعتت واحد جابله كوباية عصير قصب من المعصره وأكدت عليه إن الكوبايه تكون معقمه , المهم واحنا قاعدين بنحكي عن حال مصر وحال الناس في أوروبا لمحنا الواد ابن عوضين الغفير جاي يجري على شط الترعه , واد صغير أد كده , يادوب 3 سنين وماشي بلبوص لا بامبرز ولا يحزنون , حسن أول ما شاف المنظر اتضايق أوي وقال إزاي أهله سايبينه كده من غير بامبرز وهدوم و ( بيبي سيتر ) , ولسه مكملشي كلامه ونلاقي الواد ابن عم عوضين وقع في الترعه , في اللحظه دي قومنا بسرعه أنا وحسن مفزوعين هو نفض هدومه من قاعدة الكرسي وانا قلعت هدومي عشان أنط في الترعه , حسن كان خايف عالواد من البلهاريسيا وانا كنت خايف عليه من الغرق والموت !!.

.

.

دبانه غتيته أوي , رخمه فعلا , من فصيلة البلتاجي , بقالي 3 ساعات بهش فيها ومفيش فايده , خلصت علبة مبيد عليها وهي لابدالي ومش راضيه تموت ولا تطلع بره الصيدليه , أنا بقول طالما كده يعني ومفيش حل يبقى نمشيها مفاوضات بقى يا مصيلحي , واهو الدبان فصيل وطني برضه , وشركاء معانا في نفس الوطن !!.

.

.

محمد حسين