منوع

صباح الخير , الحديث عن أشخاص وشخوص وشخصيات وحكايات وروايات الفيس بوك شرحه يطول , ربما أسعفني الحظ ولقيت عندي 9 سنين فاضيين عشان أكتب كتاب بلغة الإشاره عن عالم الفيس ( متخافشي يا نُصه مش هقول على إسمك ) , ومن ثم تحويل الكتاب إلى ملف إكسل إل إل إل ( أصله كتاب كبير بقى ) , واقطع دراعي من هنا لو الواد مارك قدر ينتع الكتاب ده عالفيس ويعمله أب لود , فلان بيحب فلانه ( واللي يحب يبان في لاياكته ) ’ وفلانه بتحب فلان وما دام بتكتب كومنت بتنكر ليه .؟ الواد فلان هربان يا ولداه من ضغوط الحياه وحبيبته اللي هجرته وبدل ما يسكر ويضرب بانجو قال أدخل عالفيس وهناك هلاقي البيره والبانجو ببلاش , الحاج فلان اتصاحب على الأستاذ فلان عشان يفرش ببضاعته على صفحة صاحبه .
.
ومن وحي كتابي المستقبلي أسوق لكم هذا المقطع , شابتر 9 صفحه 9126 .... واد يا ( يو ... إل ) يا صاحبي ...إنت بتخطف البنات من صفحتي ياض انت ياض انت ياض انت ياض ؟!.

من فضلك لا تيأس ولا تفقد الأمل مهما كان الطريق مظلماً , فهناك صديق ينتظرك دائما في نهاية الطريق عشان يقلِّبك في الجوز جنيهات اللي باقيين في جيبك , .......... إطلع بالمحفظه ياض بدل ماغُزّك!!.

من سنتين تلاته شباب الإخوان عزل نفسه عن الجميع وبقت صفحات الإخوان عالفيس وفي الواقع خاصه بالإخوان وبس , والسلفيين لما اختلفو شويه مع الإخوان عزلو نفسهم في صفحات خاصه , والنهارده البرادعاويه بيعملو أد لبعض وهينعزلو عن الجميع , والفلول من الأول وهما مع نفسهم , كده بقينا باللفظ والمعنى دولة ( كانتونات ) , وكانتونات يا مولانا تبقى جمع ( كنتونه canton ) , كنتونه للإخوان وكنتونه للسلفيين وكنتونه للبرادعاويه , وعلى رأي زينات صدقي ( كتاكيتو بُنِّي )...........أنا هقوم بقى أدور لي على كنتونتين فاضيين عشان أبدأ أجهز في التالف ومنتهي الصلاحيه واشيله من الصيدليه !!.

سؤال جادي جدا وصادم لأبناء البرادعي ( حبيبي السابق ) :
.
دلوأتي حضراتكو عددكو كبير , بالملايين ماشاء الله , نقول مثلا 5 مليون , طيب البرادعي ساب جبهة الإنقاذ ( كيان ) قومتو انتو سيبتوها ومشيتو ورا البرادعي ( شخص ) , البرادعي ساب حزب الدستور ( كيان ) وانتو مشيتو وراه ( شخص ) , البرادعي ساب رئاسة الجمهوريه ( كيان ) وانتو مشيتو وراه ( شخص ) , البرادعي ساب مصر ( ...... ) وانتو مشيتو وراه ( شخص ) هنا بيجي السؤال , أيوه هو اللي في ذهنك ده , ماذا لو ؟ ماذا لو مات البرادعي بعد ساعتين ؟ لو البرادعي مات وكلنا هنموت هتعملو ايه ؟!....... أه سامعك كويس والله , سامعك وانت بتقول ( إن أفكار وأحلام ورؤى الدكتور محمد البرادعي لا تموت !! ) , أه يا مرارة أمي ياني , يابني احنا كبرنا عالكلام ده , ده ممكن تقوله مع الست منى الشاذلي أو تعمل بيه مداخله عالجزيره , الواقع بيقول غير كده , كل البرادعاويه اللي أعرفهم بيتعاملو مع البرادعي تعامل التلميذ للأستاذ والمعلم والقائد والملهم , بيقعدو قدامو ويستربعو ويتكيفو من حكمته (وأنت مرأة حضرتنا .... وبحكمتك تختال علينا !! ) , لما بشوفهم بفتكر أيام زمان لما كنت في كتاب الشيخ عوضين , وبنقعد قدامه عالحصيره ونتعلم , نسيت أقول لحضراتكو إن الشيخ عوضين لما مات كلنا فرحنا وطلعنا نجري وكل واحد رجع بيته !!

خلاص خلاص , عشان مخسرشي صحابي , البرادعي بيتعرض لحمة تشويه على أوسع نطاق وانا مش عضو في حملة التشويه دي , أه والله ( لسه مطلعتش الكارنيه ) وبناء عليه فأنا سأتوقف عن انتقاد أفكار وقرارات مولانا الدكتور محمد البرادعي الذي لا ينطق عن الهوى , هقول وراه وخلاص , النظام الحالي فاشي وفاسد , وكان يجب فض اعتصام رابعه بالحب , الحب يا منى , ويجب المصالحه مع الإخوان , ولا للإقصاء .......... حلو كده يا أساتذه ؟ , طفو النور بقى عشان معاد جلسة الكهربا بتاعي جه !!.

إتفضلو تَمْن السكوت
اللي باع أرضَك وخانك
واللي قال الخير ده خيره
ولّا غيره ؟
اللي ضحى يوم عشانك
واللي شال صاحبه وزميله
جوه عَلَمِك يا بلدنا والتابوت
اتفضلو تمن السكوت !!.
.
قوم نصالح في الديابه
ونراضيهم
لجل يبقى الديب غزال
هو انت ليه طيب خال
واحنا ليه غاويين نموت ؟!
اتفضلو تمن السكوت !!.
.
محمد حسين

يعني انا دلوأتي لو حطيت صورة البرادعي ببدلته ونضارته عالبروفايل بتاعي هيكمل عدد الإصدقاء عندي 5 ألاف خلال يومين ( حملة add )؟ .
طيب مان لو حطيت صورة كيم كارديشان بالمايوه هيبقى عندي 5 مليون فولور خلال ساعتين .......... لو ده دليل عالشعبيه يبقى كارديشان من حقها تحكم نص الكره الأرضيه !!.

البرادعاويه صفحاتهم كبرت وربربت فجأه ...ربي يزيد ويبارك , بس لاحظت حاجه غريبه في صفحات أصدقائي , لغة التعالي زادت أوي , هما باقي لهم تكه واحده ويقولو لغيرهم الجمله دي ( إنت مش معانا ليه ؟ يا أخي اتقي الله , أومال هتقابل ربنا تقول له إيه ؟ تقول له أنا مكنتش برادعاوي؟! ) , أهلا وسهلا بمصر في عنبر العقلاء رقم 3 !!.

Top of Form

1

Bottom of Form

وعمر البشير اللي بيطبق شرع الله في السودان من ربع قرن اخترع حد جديد في الإسلام , وبيجلد كل واحد ينزل في المظاهرات 20 جلده في الشارع , أه والله , إي وربي , هذا وقد ورد في كتاب صحيح التلمساني عن فلان عن علان عن ترتان أن سيدنا عمر البشير رضي الإخوان عنه وأرضوه قد قال في محكم تقسيمه للسودان بما لا يخالف شرع الله أن : من يخرج متظاهرا ضدي يُجلد 20 جلده ولا تُقبل له شهاده أبدا حتى لو شهاده بكالوريوس !!.

October 4

صباح الخير .......... إضحك الثوره تطلع حلوه !!.
.
زمان كانت الموضه في النكت إنها تبدأ بالجمله دي ( مره واحد صعيدي ) , بعدها اتغيرت الموضع وبقت ( مره أبو العربي ) , ومن سنتين تلاته بقت النكتب بتبدأ ب ( مره واحد إخوانجي ) , واحنا بصراحه شعب ابن نكته , أنا كل خوفي في السنين الجايه يبدأو النكت ب ( مره واحد برادعاوي ) , طيب سيبو عليا أنا الطلعه دي , بيقولك يا سيدي مره واحد برادعاوي خد حتة أرض في الصحرا وقال نزرعها رز وبسله ( أهو ناكل مع بعض لقمه عالغذا ...على رأي أحمد رزق ) , وجاب البذره والسلك الشايك ( عشان الناموس ميعديش ) , بس نسي يجيب العمال ويحفر بير عشان يطلع مايه تروي الأرض , رمى البذره في الصحرا وفضل قاعد جنبها حاطط إيده على خده , استنى يوم واتنين وشهر واتنين ولا الرز طلع ولا البسله ظهرت , قام اتصل بابن عمه الكبير اللي معاه دكتوراه وعايش في فيينا , وحكى له الحكايه , إبن عمه قال له ( يا غبي ...يا حمار .... إنت متعرفش إن الرز والبسله مش بيطلعو إلا لما بتشغل لهم موسيقى كلاسيك ؟!! ).

بعد بكره , المصريين هينزلو يحتفلو مع الجيش بذكرى انتصار أكتوبر , والإخوان هينزلو يشتمو في الجيش ( تقريبا عشان انتصر في أكتوبر ) , إنما فيه فريق تالت هيبقى واقف في البلكونه , عامل علامه رابعه بإيد وشايل علم مصر في الإيد التانيه ولابس تي شيرت مكتوب عليه أد add !!.
.
زمان من ألفين سنه تقريبا سأل أحد المريدين أبو الأسود الدؤلي وسيباويه عن معنى كلمة ( نُص ) وطريقة إعرابها فقالا له في صوت واحد ( إبقى أسأل خالد على يا برنس ) !!

الحاله الوحيده اللي هبدأ فيها الهجوم والنقد اللاذع لمنصور والببلاوي و للسيسي وقيادات الجيش هي إنهم يقبلو بالمصالحه مع قيادات الإخوان ومينفذوش حكم المحكمه بحل الجماعه ومصادرة أملاكها , وتتشال الماده اللي بتقول منع تأسيس الأحزاب على أساس ديني , بالمناسبه لو النظام الحاكم في مصر حاليا عمل كده فتأكد إن السبب هو حضرتك , البرادعي , خالد على , وأنصارهم ونحانيحهم , زيارة أشتون والضغوط الأمريكيه مجابتشي نتيجه قبل كده لما كنا صف واحد ضد الإخوان , يعني قدر الجيش والنظام يقفو في وش أمريكا والإتحاد الأوروبي , مش هيكسر الإراده دي غير الضغوط الداخليه بتاعة حضراتكو ( لا للإقصاء وفصيل وطني ومتعاطفين ونص ثوره ونص زفت ) عايز تفهم كده إنت حر مش عايز خليك عايش بعقلك زي ما تحب .......... وقتها هبقى ضد السيسي والبرادعي والإخوان والكل كليله ... أنا واحد شايف مصر كده , بشكل معين , وعقلي الحقير بيقولي إن التيار اللي له تنظيم دولي مالوس إنتماء وإن التيار اللي بيشيل سلاح مستحيل هتتعمل ديموقراطيه وهو عايش معاك , ساعتها هبقى ضد الكل , ومش مهم إني هبقى لوحدي , مواطن مالوش أي تلاتين لزمه , بس دماغي مش للبيع !!.

بيقولو الإخوان نزلو النهارده في شوارع القاهره , مظاهرات سلميه كالعاده , كسرو بس شوية عربيات وأرصفه ومحلات وضربو الناس في الشوارع , خالد داوود خد له طعنه سلميه في القلب وراح المستشفى , أكيد أمه هي الي غزته بالسكينه عشان تلبسها للإخوان وتقبض تعويض !!.
و لكن ما رأي إلهنا وربنا الذي عايش في فيينا والذي أنزل في كتابه أن ( الإخوان فصيل وطني ولا للإقصاء والحب يا منى !! ) أو كما قال , يا ربنا انت مش واخد بالك , منى نفسها باقي لها يومين ويغتصبها الإخوان !!

حكاية ثوره
.
.
قالو إني كنت بحلم
قلت مش عارف حقيقي
هو ده كان حلم فعلاً
ولّا كان خارطه لطريقي ؟!
.
البدايه هي نقطة لنطلاق
إرمي كل الشين وراك
واجري قابل بكره
في نُص الطريق
قلت طيب
حلم نادي يبلّ ريق
.
شُفت ناس فايضين طيابه
جنبهم شُفت الديابه
والدروب زحمه ولَمّه
فين جمال الحلم لما
تبقى ماشي فوسط غابه ؟!
.
كنا عشره ومعروفين
كنا عشره مشكِّلين
بعد يوم واتنين
تلاته زاغو منا
قالو داخلين في الشمال
وانتو ليه داخلين يمين ؟!.
وانتهينا كل واحد راح لحاله
والأكاده مكمّلين
.
رجعوني للبدايه
مش هنام تاني وأحلم
بالمحال
داحنا حتى القتل فينا
شئ حلال !!.
.
.
محمد حسين

October 5

صباح الخير , بكره 6 أكتوبر وهيبقى يوم مشهود , لازم كلنا نتحلى بالروح الرياضيه ونقول للفايز ( مصر والعرب ) ألف مبروك , ونقول للخسران ( الصهاينه والإخوان ) هارد لك , خسرتو معركه صحيح لكن مخسرتوش الحرب , كمان معايا للإخوان رساله من فضيلة الدكتور يوسف القرضاوي و الأخت الفاضله توكل كرمان لشحذ الهمم بيقولو للإخوان ( إن اليهود قدرو ينتصرو على جيش مصر قبل كده و اليهود مش أحسن منكو يا إخوان ) !!.
معاك حق يا مولانا القرضاوي , اليهود مش أحسن من الإخوان ولا أوسخ منهم !!.

أنا بني أدم لعين يا أخي , طبعي غريب من يوم ماتولدت , رغيف عيش طري طالع من الفرن وحتة جبنه قديمه وعودين سريس أفضل عندي مليون مره من فرخه برازيلي معموله بانيه , القاعده جنب أمي قدام الفرن وهي بتخبز أحب إلي نفسي من القاعده في جُزر هاواي ( وانا منزّل رجلي في ماية البيسين ) , ريحة عرق العسكري اللي نازل أجازه من الجيش أجمل من بارفان جيفينشي على بدله إيطالي لابسها واحد مصري , مصر عندي أجمل من أمريكا وفرنسا والنمسا !! , بحبها زي ماهي كده , بعبلها وغباوتها , بحفرها ومطباتها وترابها وبلاعتها وشمسها ونيلها , ماليش نبي اسمه خيرت الشاطر ولا نبي اسمه البرادعي ولا نبي اسمه تتح ولا حتى نبي اسمه السيسي , وعيت على الدنيا لقيت مصر الوحيده في الكون اللي لها اتنين أنبيا بتحبهم وتحترمهم ويحلفو بيهم , محمد وعيسى , هما مش كفايه ؟! .
.
دعوه عامه
.
أصدقائي الأعزاء الرسامين والمصممين , اللي شاطرين في برامج الفوتو شوب , يا ريت بمناسبة ذكرى انتصار أكتوبر , وبمناسبه إن مصر هيبقى فيها 17 نبي !!, يا ريت لو تقدرو تصممو لنا صوره ( أو ترسموها ) , تكون صوره لمصر بسيطه ومعبره , واحده ست فلاحه قاعده قدام الفرن بتخبز ( دي أمي على فكره ) , ابنها رجع من الجيش لقاها قاعده كده كام قعد جنبها ياكل عيش من اللي طالع من الفرن مع حتة جبنه وعود سريس , ( ده أنا على فكره ) , بعد شويه بنتها رجعت من الكليه وجت قعدت جنبهم , كانت جعانه أوي ( دي أختي على فكره ) .
.
يا ريت لو تقدرو تعملو الصوره دي , هديه لمصر بمناسبة انتصارها على اليهود والإخوان والنحانيح , مش مهم يكون فيها علم مصر , اللي في الصوره هما علم مصر , ومش مهم يكون مكتوب فيها كلام ولا أغاني , هي الصوره بتنطق لوحدها , ياريت لو تقدرو تعملوها النهارده , ونعمل حملة add للمصريين , المصريين وبس , اللي نبيهم اسمه عيسى واسمه محمد , لو عملتوها هغير صورة جلال عامر من على بروفايلي ( أنا مغيرتش الصوره دي من يوم ما مات عم جلال ) , سامحني بقى يا خال .
.
محمد حسين

الكنيسه المصريه أعلنت إنها هتدق أجراسها بكره الساعه 2 الضهر بمناسبة ذكرى انتصار أكتوبر !!.
جالكو كلامي , عرفتو بقى واتأكدتو بنفسكو إن المسيحيين في مصر كانو متواطئين مع الجيش المصري في 73 وعملو إنقلاب على الصهاينه ؟! , وإن نفس المسيحيين تواطئو مع نفس الجيش في 30 يونيو وعملو انقلاب ضد ( حلفاء الصهاينه ) ؟!.
في حرب أكتوبر 73 ( الإنقلاب الأول ) كان صبحي صالح قاعد بيتغذى الساعه 2 الضهر ( رقاق وبط ) لأن اليوم ده كان 10 رمضان الموافق 19 ربيع أول !! ...يعني مشاركشي في الإنقلاب أهو ( برافو صبحي صالح ) , وفي 30 يونيو كان صبحي صالح قاعد بيخطط إزاي يحرق مصر هو ورفقاء الجهاد , يعني مشاركشي في الإنقلاب التاني .......... تحيه من القلب إلى حضرة الصول الفقيه الدستوري صبحي صالح , وتعالو بقى نتصالح على رأي البرادعي وناديه مصطفى !!.

ثوره وناس عايشين
زي الوبا هبّّاش
وناس بتاكل طين
يا ريته طين ببلاش
وناس تموت في كمين
وناس تقول أوباش
.
يادي الشهيد البطل
عملو عليك حكايات
لا سلمت م اللي قتل
ولا حتى م البهوات
.
كرافته يابني أوام
واضربلي حتة جل
عندى المسا تصوير
هطلع وابيع في كلام
والعن جدود الكل
وهبقى م المشاهير !!.
.
.
محمد حسين

من عشره خمستاشر سنه كنت بشتغل في صيدليه بعد العصر ( بعد مارجع من الكليه ) , وفاكر كويس إوي إننا كنا بنسيب باب الصيدليه مفتوح ومفهاش حد ونروح أنا وصاحب الصيدليه نصلي المغرب والعشا في الجامع , كنا بنرجع نلاقي المرضى مستنيين والصيدليه مش ناقصه حباية نوفالجين ...كان فيه أمان حقيقي , وكنت بخلص شغلي الساعه 12 بالليل وارجع بلدنا ماشي على رجلي , 3 كيلو تقريبا في طريق مهجور وضلمه .
دلوأتي بقى الأب بياخد بنته يوصلها الجامعه ويرجعها عشان مش مأمن عليها من ركوب الإتوبيس والتاكسي , هو الأمان راح فين في ال 10 سنين دول , والتدين فين ؟ ........... طيب ليه بشوف تلتين البنات والستات في مصر بقو منقبات ؟!
............ باختصار : مصر في الكام سنه اللي فاتو ( مع المد الوهابي والإخوانجي ) دخلها النقاب والدقن من الباب وخرج التدين والطيبه من الشباك !!.