منوع

خلاص خلاص , عشان مخسرشي صحابي , البرادعي بيتعرض لحمة تشويه على أوسع نطاق وانا مش عضو في حملة التشويه دي , أه والله ( لسه مطلعتش الكارنيه ) وبناء عليه فأنا سأتوقف عن انتقاد أفكار وقرارات مولانا الدكتور محمد البرادعي الذي لا ينطق عن الهوى , هقول وراه وخلاص , النظام الحالي فاشي وفاسد , وكان يجب فض اعتصام رابعه بالحب , الحب يا منى , ويجب المصالحه مع الإخوان , ولا للإقصاء .......... حلو كده يا أساتذه ؟ , طفو النور بقى عشان معاد جلسة الكهربا بتاعي جه !!.

.

.

سؤال جادي جدا وصادم لأبناء البرادعي ( حبيبي السابق ) :
.
دلوأتي حضراتكو عددكو كبير , بالملايين ماشاء الله , نقول مثلا 5 مليون , طيب البرادعي ساب جبهة الإنقاذ ( كيان ) قومتو انتو سيبتوها ومشيتو ورا البرادعي ( شخص ) , البرادعي ساب حزب الدستور ( كيان ) وانتو مشيتو وراه ( شخص ) , البرادعي ساب رئاسة الجمهوريه ( كيان ) وانتو مشيتو وراه ( شخص ) , البرادعي ساب مصر ( ...... ) وانتو مشيتو وراه ( شخص ) هنا بيجي السؤال , أيوه هو اللي في ذهنك ده , ماذا لو ؟ ماذا لو مات البرادعي بعد ساعتين ؟ لو البرادعي مات وكلنا هنموت هتعملو ايه ؟!....... أه سامعك كويس والله , سامعك وانت بتقول ( إن أفكار وأحلام ورؤى الدكتور محمد البرادعي لا تموت !! ) , أه يا مرارة أمي ياني , يابني احنا كبرنا عالكلام ده , ده ممكن تقوله مع الست منى الشاذلي أو تعمل بيه مداخله عالجزيره , الواقع بيقول غير كده , كل البرادعاويه اللي أعرفهم بيتعاملو مع البرادعي تعامل التلميذ للأستاذ والمعلم والقائد والملهم , بيقعدو قدامو ويستربعو ويتكيفو من حكمته (وأنت مرأة حضرتنا .... وبحكمتك تختال علينا !! ) , لما بشوفهم بفتكر أيام زمان لما كنت في كتاب الشيخ عوضين , وبنقعد قدامه عالحصيره ونتعلم , نسيت أقول لحضراتكو إن الشيخ عوضين لما مات كلنا فرحنا وطلعنا نجري وكل واحد رجع بيته !!

.

.

من سنتين تلاته شباب الإخوان عزل نفسه عن الجميع وبقت صفحات الإخوان عالفيس وفي الواقع خاصه بالإخوان وبس , والسلفيين لما اختلفو شويه مع الإخوان عزلو نفسهم في صفحات خاصه , والنهارده البرادعاويه بيعملو أد لبعض وهينعزلو عن الجميع , والفلول من الأول وهما مع نفسهم , كده بقينا باللفظ والمعنى دولة ( كانتونات ) , وكانتونات يا مولانا تبقى جمع ( كنتونه canton ) , كنتونه للإخوان وكنتونه للسلفيين وكنتونه للبرادعاويه , وعلى رأي زينات صدقي ( كتاكيتو بُنِّي )...........أنا هقوم بقى أدور لي على كنتونتين فاضيين عشان أبدأ أجهز في التالف ومنتهي الصلاحيه واشيله من الصيدليه !!.

.

.

من فضلك لا تيأس ولا تفقد الأمل مهما كان الطريق مظلماً , فهناك صديق ينتظرك دائما في نهاية الطريق عشان يقلِّبك في الجوز جنيهات اللي باقيين في جيبك , .......... إطلع بالمحفظه ياض بدل ماغُزّك!!.

.صباح الخير , الحديث عن أشخاص وشخوص وشخصيات وحكايات وروايات الفيس بوك شرحه يطول , ربما أسعفني الحظ ولقيت عندي 9 سنين فاضيين عشان أكتب كتاب بلغة الإشاره عن عالم الفيس ( متخافشي يا نُصه مش هقول على إسمك ) , ومن ثم تحويل الكتاب إلى ملف إكسل إل إل إل ( أصله كتاب كبير بقى ) , واقطع دراعي من هنا لو الواد مارك قدر ينتع الكتاب ده عالفيس ويعمله أب لود , فلان بيحب فلانه ( واللي يحب يبان في لاياكته ) ’ وفلانه بتحب فلان وما دام بتكتب كومنت بتنكر ليه .؟ الواد فلان هربان يا ولداه من ضغوط الحياه وحبيبته اللي هجرته وبدل ما يسكر ويضرب بانجو قال أدخل عالفيس وهناك هلاقي البيره والبانجو ببلاش , الحاج فلان اتصاحب على الأستاذ فلان عشان يفرش ببضاعته على صفحة صاحبه .

.
ومن وحي كتابي المستقبلي أسوق لكم هذا المقطع , شابتر 9 صفحه 9126 .... واد يا ( يو ... إل ) يا صاحبي ...إنت بتخطف البنات من صفحتي ياض انت ياض انت ياض انت ياض ؟!.

.

.وانا صغير كان دادي ( بابي ) متعود وهو راجع البيت كل يوم يجيب لي الشوكولا اللي بحبها ( فيريرو روشيه ) ولما نجحت في تالته ابتدائي وطلعت الأول على مدرسة ( الفرير ) جابلي هديه طياره لعبه بس بتطير فعلا , مش هنسى شكلها أبدا , كانت وقتها أمريكا بس اللي بتصنع الطيارات دي وكانت غاليه أوي , مش هنسى كمان القطه الشيرازي ( كوكي ) اللي كانت عندي وكنت بلعب معاها ورا سور الفيلا بتاعتنا , وبابي وعدني أول مانجح في تالته اعدادي هيجيب لي عربيه حقيقيه وهيبدأ يعلمني السواقه وهنطلع نقضي الأجازه كلها في البرازيل ( في المزرعه بتاعة بابي ) .

............... ياااااااااااه كانت أيام , ذكريات بقى لطفوله معشتهاش خالص بس قلت أحكي لكو عليها من باب الإحتياط !!.

.

.

محمد حسين

.