منوع

واحنا في الثانويه العامه كان فيه سؤال في التعبير بيتناقله الطلبه كنوع من الهزار والمداعبه , السؤال بيقول ( إكتب عن معاناة نمله في رحلتها على لوح زجاجي مكسور تماما ) !!.
معرفشي ليه السؤال ده جه في ذهني دلوأتي , الغريبه كمان إن عندي إحساس لأول مره إني أقدر أكتب موضوع التعبير ده واخد فيه الدرجه النهائيه ............... إحساس شخصي !!
..... اللهم ارفع مقتك وغضبك عنا .

.

.

في لحظه كده وفي دخلة العيد افتكرت الشهدا بتوعنا بالرحمه , ربي يرحمهم جميعا , جيكا وكرستي وعماد ومينا وسالي , وكل واحد نزل عشان خاطر بلده مش عشان خاطر جماعه ولا حزب , ومع ذلك ربنا يرحم شهداء الإخوان , لو حد متابع صفحتي هيلاقيني مش بجيب سيرة الشهدا كتير لسببين , أولا بتعب جدا لما بفتكرهم ( مش مهم حضرتك تصدق ) , ثانيا مش بتاجر بأسماءهم ولا بصورهم ( مش مهم تصدق برضه ) , بعد سنه واتنين وتلاته من موتهم عايز أقول لحضراتكو كلمتين :
أولا : مش كل واحد ييجي يقولك أنا هجيب لكو حق الشهدا تجرو وراه , الإخوان قالوها ألف مره وكل نصاب هيقولك كده , والحكايه باختصار وقلتها من سنتين إن حق الشهدا اندفن معاهم , كل الأدله اختفت واتفرمت والقاضي قدامه ورق أبيض ساده , أعظم قاضي في الكون ميقدرشي يصدر حكم بالإدانه على ورق أبيض !!.
ثانيا : مش كل واحد حاطط صورة الشهيد يبقى ثورجي وبينام ويصحى يحلم بحقه يرجع , صدقني المره دي كمان , كتير منهم الموضوع بالنسباله سبوبه مش أكتر , ومش شرط السبوبه تكون فلوس , يكفي جدا إنها تكون سناره والشهيد هو مجرد طعم بيصطاد بيه البنات أو بتصطاد بيه الأولاد !!.

.

.النهارده وقفة العيد كل سنه وانتو طيبين , في شغلانتنا دي يوم الوقفه وقبل منه بيومين تلاته كمان بنشتغل كوزموتيك وبس يعني مستحضرات تجميل وكداهون , ممكن نشيل الأدويه في كرتونتين ونرميهم في المعمل , وانا ماليش في الكوزموتيك يا مولانا أه وعهد الله , يعني مش بعرف ماكينة براون بتشتغل إزاي ؟ ابقى اقري الكتالوج يا ستي , أصلي كنت غايب في المحاضره دي , وعلى سيرة الكوزموتيك فانا بتفهم شوية حاجات كده في ليلة العيد , يعني مثلا السويت وكريمات إزالة الشعر بقول ماشي , صبغة شعر أشقر فاتح على واحده ست تخينه وبكرش بقول مايضرش , شامبوهات وشاور جيل ومعجون سنان بقول ( حُمّاية ) العيد مايجراش حاجه , إنما اللي مش بقدر أفهمه في مبيعاتنا ليلة العيد هما حاجتين , حبوب التخسيس وكريمات تفتيح البشره , يعني حضرتك ( بكسر التاء ) هتاخدي أقراص التخسيس دي باليل وتصحي الصبح مانيكان ؟ يعني هتنامي وانتي بجسم عبد الفتاح القصري تصحي تلاقيكي بجسم هيفاء وهبي ؟ طيب بشرة إيه اللي هتفتحيها في كام ساعه دي؟ هي بشره ولا علبة سلامون ؟!.

.

.

صباح الخير , من سنه كده قول سنتين وانا صوتي اتنبح , غلبت أقول إن قيادات الألتراس وقيادات 6 إبريل بيبيعو أعضائهم عشان يحسنو دخلهم , والمشتري موجود , أكبر تاجر ( أمخاخ ) في الشرق الأوسط , فلوس زارا بقى يامولانا والتوحيد والنور وسيناكولا وتجارة العمله والمخدرات , هقول تاني , لاهو انت فاكر إن المليارات اللي بيصرفها الإخوان في كل انتخابات جايه من محل العطاره بتاع المرحوم حسن البنا ؟!
شوفو اللي حصل من الألتراس امبارح وانتو تعرفو , فريق يد ايه اللي انتو رايحين تستقبلوه في المطار بالشماريخ ؟ ده فريق القدم في الأهلى ماشاء الله بقى من كتر ماخاد بطولات بياخد بطولة أفريقيا من هنا واللاعيبه تنزل من المطار على ملعب التدريب عشان يستعدو للماتش الجاي ولا حد بيقول لهم فين الكاس اللي معاكو !!.
لما بتكلم عن الألتراس ( أهلاوي وزملكاوي ) وعن 6 إبريل بتكلم عن قيادات , أما حضرتك كواحد من المريدين والتابعين فانا معنديش شك إنك غلبان في عقلك ومتحمس لنادي وفكره مش أكتر , يعني لا بتاخد أبيض ولا أسود , بس بتتحشد يا مولانا , ولعلمك الشديد أنا مش زعلان من القيادات بتاعتكو وغالبا لو كنت مكانهم كنت بعت يا باشا , ماهو احنا بشر و انا لا يمكن أبيع مبادئي بألف دولار في الشهر , لو 5 ألاف يبقى هفكر , إنما لو 10 ألاف دولار هقولك إلحقني بمرتب أول شهر , مصاريف مدارس بقى وعربيه وقسط شقه كلهم هييجو في ذهني ويعمو عيني , فاكر ابراهيم يسري في فيلم مرجان أحمد مرجان ؟ أهو كده بالظبط , إنت إزاي تسمح لنفسك انك تقولي عايز جيهان ؟ طيب يابراهيم أنا هديك مرتب 20 ألف دولار في الشهر , ممممممممم طيب والنبي ابقى وصّل الدبله بتاعة جيهان لها .
المشكله بقى حضرتك إنك إنت ولا مؤاخذه تبقى جيهان !!.

.

.

بيقولك يا سيدي إن شركات السيارات الفخمه زي مرسيدس وبي إم بقت بتعمل سيارتها الحديثه مبرمجه بالكامل ( full computerized ) والجديد عندهم هو امكانية التحكم عن بعد في السياره , يعني حضرتك تبقى سايق عربيتك المرسيدس في هونج كونج ورايح تشتري ( بليله ) من عند الإجاوي اللي بعد ميت غمر ده تلاقي عربيتك وقفت فجأه وجايالك رساله من شركة مرسيدس في ألمانيا على شاشة الكمبيوتر بتاعة العربيه بتقولك ( ناسف لقد قمنا بإيقاف سيارتك لوجود العطل الفلاني والذي يستوجب تغييره الأن , أو يقولك نأسف فهذه السياره تم الإبلاغ عن سرقتها ) !!.
أنا لما قريت الخبر متخضتش ولا اتفاجئت , مانا اعرف مصنع بوتاجازت أد كده , صغير أوي في النمسا , بيصدر كل منتجاته لمصر ومفيش بيت عندنا بيخلو من البوتاجاز النمساوي ده , المهم صاحب المصنع بيقدر وهو قاعد في فيينا يتحكم ( عن بعد ) في درجة حراره البوتاجاز اللي في الورّاق أو السنبلاوين ويعلّيه ويزود النار أو يهديها أو يفجره لو يحب , المشكله إن المصنع ده احتياطات الأمان عنده ضعيفه جدا والبوتاجاز ممكن ينفجر في أي لحظه ويحرق البيت باللي فيه , و أخر واحد أخر شخص أخر إنسان ممكن يتأذى من حرارة البوتاجاز ده هو صاحب المصنع في النمسا اللي في إيده الريموت كنترول !!.

.

.

لما تقرا لأي كاتب عربي بيكتب عن العلاقات الزوجيه والأسريه , و العلامات التي تعرف من خلالها أن زوجتك ترغب في علاقه زوجيه هتعرف إيه هو سبب انتشار الطلاق والإنحلال الأسري في مجتماعتنا ؟!.
يقول أحد الجهابذه الكتاب ( من بياعي البليله سابقا ) إذا رأيت زوجتك بتلعب في شعرها وبتبص لك فاعلم أنها ترغب في علافة زوجيه !! لا والنبي بجد ؟ مش معقول ....مقال بديع أهو في أدب المصاطب !!.
وأغلب ظني أن هذا الكاتب يعتقد أن المرأه هي مخلوق فضائي بدأ في الظهور مع نهاية الحرب العالميه التانيه وربما كان السبب في ظهور هذا المخلوق هو
الإشعاع النووي .
ولما تسمع شيخ بيفتيك في الدين والشريعه والعقيده والخشبه والحديده هتعرف إيه هو سبب انتشار الإلحاد في مجتمعاتنا .
يقول أحد المشايخ الكبار ( من دعاة الإلحاد ) : إذا كانت زوجتك مسيحيه فعليك أن تبغضها في الله وأن تعاشرها كأنك تغتصبها !!.
.............. يارب توب علينا بقى من المشايخ دول وبتوع الدكتوراه في العلاقات الزوجيه.

.

.إمبارح كنت بحلم وانا نايم , وده مش طبيعي الحقيقه لأني متعود أحلم وانا صاحي وعيوني مفنجله , بس كل حين ومين كده تلاقيني اتكعبلت في كابوس جميل وانا نايم , قال خير اللهم اجعله خير , الحيوان اللي اسمه عبفتاح السيسي ده ( حلوه الحيوان دي ؟ ) , المهم بقى إنه زهق من البيض الإخوانجي اللي في الشارع والبيض النحانيحي اللي عالفيس وقالك يا عم وانا مال أمي , هي مصر دي تبقى مرات خالي ؟ ياكشي تولع بجاز , أنا هرجع لثكناتي و حمامي وبشكيري , وقام الحيوان ده بعت طياره مخصوص لمولانا عم مغاوري الجنايني اللي عايش في بلاد بره , وجابه وقال له ( أدي مفاتيح البلد أهي , والرقم السري كذا , لو محتاج أي سلاح أنا تحت أمرك , مطلوب من جناب معالي فخامتك إنك تحمي البلد والنظام وثورة 30 يونيو اللي شاركت فيها بنفسك , تقدر تستعين بملايين النحانيح اللي بيحبوك ) , عم مغاوري الجنايني قعد يفكر كده شويه وتحت ضغط أنصاره ونحانيحه قرر إنه يتنازل ويقبل بالمهمه , وقام غسل الحنِّه اللي على رجليه ( والتاتو الفراشه ) , واختار لنفسه فريق من المساعدين بيضم ( بلال فضل , أسماء محفوظ , علاء عبد الفتاح , أحمد ماهر ) و بدأو يحطو خطة تأمين مصر والنظام والتفاوض مع الإخوان وحماية مصر من المظاهرات ( السلميه ) بتاعتهم , في الوقت ده أنا كنت نمت جوه الحلم , أصله حلم مركِّب زي فيلم ألف مبروك كده , المهم بقى صحيت جوه الحلم وبفتح عيني ألاقي التلفزيون شغال وصورة واحد بهلول برياله واقف وافتح إيدك وبيقولك وسوف أفعل وها أنا أفعل , سألت مراتي مفيش أخبار عن عم مغاوري وعلاء عبد الفتاح ؟ قالت لي جابوهم من حمام السباحه بتاع هيلتون رميسيس وأسماء محفوظ طلعوها من عند قناة السويس كده !!.

.

.صباح الخير , الفيس بوك بقى مليان بيض , نوعين من البيض , النوع الأول بيتفرج عالجزيره 24 ساعه كأنها قناة المجد ( قرأنٌ يُتلى أناء الليل وأطراف النهار ) ومش بعيد يتمتم بعد كل خبر ويقول ( صدق الله العظيم ) , والنوع التاني بيشغلها 24 ساعه برضه بس بيشغل جنبها كاسيت بصوت عالي عشان الجيران ميعرفوش كأنه مشغل فيلم سيكس .

النوع الأول هتلاقيه بيكتب الخبر كده ( إلحقونا يا خلق دبابات الجيش بتقتل المصريين وتهد الحوامع ومانعه الناس من الصوم وداخله عالكعبه تهدها ) , النوع التاني بيقولك نفس الخبر بس معاه علامات استفهام يعني ( هو صحيح الجيش بيقتل في المصريين وبيهد الجوامع ؟ أنا سمعت إن الجيش رايح يهد الكعبه حد عنده تاكيد للمعلومه دي ؟ ) هع هع قال معرفتكش أنا كده يا مولانا ال ( إيج ).
النوع الأول عايز يرجع البهلول للحكم حتى لو ضاعت نُص البلد دي , والنوع التاني عايز يثبت لنفسه إن إلهنا ( الله يرحمه ) اللي عايش بره كان صح ومعاه حق في كل عطسه عطسها حتى لو ضيع النُص التاني من البلد .
إديني بقى في القيم والمبادئ والمثل العليا , محاضره عصماء وكلام مُقعر من فصيلة ( العداله الإجتماعيه , والإختيار الإنتقائي والبنيه التحتيه اللي هي اسمها إنفرا ستراكشر يا جاهل ).
.
لو حضرتك بقالك 3 سنين ولسه مش فاهم إن قطر ( والجزيره ) هي مجرد بصقه على جانب الطريق بتقرف الناس ومحدش قادر يدوس عليها بجزمته لأنها بصقه أمريكيه مش أكتر تبقى انت حمار , حمار أوي , في منتهى الحموريه , والمشهد الحالي في الشارع المصري باختصار هو صورة لخروف كبير راكب على ضهر حمار في العيد الكبير وبيهتفو للثوره والثوار والشهداء !!.

.

.

حتى الأغبياء يدخلون الجنه أحيانا !! .
.

  وانا راجع في أجازه صيفيه , سايق العربيه كالعاده ومنهك تماما بعد 48 ساعه متواصله بدون نوم ( 2600 كيلو تقريبا ) , وقبل ماوصل البيت ب 10 دقايق , قلت أركن قدام أي محل ورد أشتري بوكيه ورد لمراتي , وركنت فعلا ونزلت اخترت الورد وقلت للبياع لفهولي بقى بشكل كويس في كيس سلوفان , وعشان البياع معندوش كيس سلوفان قام لفلي الورد في كيس زباله إسود !!.
يا الله , في الحقيقه ده حال حاجات كتير أوي في مصر ( ورد ملفوف في كيس زباله ) ............. حتى الأغبياء يدخلون الجنه أحيانا .

.

.

محمد حسين