منوع

أنا عندي حل جميل أوي نحل بيه كل مشاكل مصر ونفك الإشتباك اللي داير بينا حاليا , ويبقى سلامه في خير زمان وخير زمان في النعام , إحنا نجمّع كل مشاكل البلد وأحلامها وأمانيها ونحطها في علبه قطيفه حمره عليها شريط سلوفان , ونبعتها مع ورده بيضا مُعطره وقُبله حانيه عن طريق DHL على عنوان السيد الأستاذ الدكتور حبيب الملايين في ( فيينا ) , وهو بقى لما يفضى ويكون مزاجه رايق ويخلص الجاكوزي بتاعه كده يبقى يفتح العلبه ويبدأ يحل لنا المشاكل دي ويحط أبو قرش لوحده وابو قرشين لوحده , أه نسيت حاجه مهمه لازم نبعتها , علبة جوانتيات معقمه وعلبة ماسكات للوجه اللي بتلبسها الستات لما تكون بترش مبيد في الشقه ( عشان الريحه بس ) !!.

.

.

صباح الخير , وبعد خامس نَفَس من النسكافيه بتبقى لازم وحتما ولابد تاخد شفطه من السجاره , قصدي بعد خامس شفطه من السجاره بتبقى لازم تاخد نَفَس من النسكافيه ...هي عدَلها كده 5/1 , تلكَ إذاً قسمةٌ معقوله ...5/1 يعني مش 6/1 ولا 4/2 عشان الناس اللي بتحب تصطاد في المايه العكره على الريق .

.

.كده تمام أوي , شركة بوسيني BOSSINI بعتت لي رساله عالموبايل , وبتقول الحاجه بوسيني ( إغتنم الفرصه , باقي يومين على انتهاء العرض , تخفيضات حتى 50 % !! ) , أموت أنا واعرف الشركه دي عرفت إن المرتب نزل النهارده إزاي ؟! بصي يا حاجه بوسيني والله أنا مش هكدب عليكي , هو المرتب نزل النهارده الصبح واتصرف العصر وانتي لو تعرفي حالي هتيجي ت ( بوسيني ) وتطبطبي عليا ومتبعتيش رسايل تاني , قال بوسيني قال , يا ولاد الحراميه دانتو أقل تي شيرت عندكو بيعمل له 9 ريال قبل الخصم !!..

.في كورنيش مدينة الخُبَر ( عالخليج العربي ) هتلاقي مراجيح وزحاليق كتير للأطفال , جنبها كده فيه بنات وستات فارشين بحاجات من اللي بيطلبها الأطفال في المواقف دي , كلها حاجات بريال أو ريالين أو 5 ريال , يعني شوكولاته نوع مضروب أو بسكوت , مايه ساقعه وبيبسي , بلالين وطيارات ورق وكور بلاستيك وهكذا , الميزه المشتركه بين كل البياعين دول ( البائعات ) إن كل واحده فيهم ماسكه في إيدها اليمين ( تابلت ) وفي إيدها الشمال أي فون, والسماعه في ودنها , هتلاقيها بتكلمك من طراطيف مناخيرها وبتاخد الفلوس بطراطيف صوابعها يعني باختصار بيلعبو دور أحمد مظهر في فيلم الأيدي الناعمه , أخر مره كنت هناك من كام يوم , بناتي بيتخانقو على الحاجات اللي بيشتروها وانا بكلم في البياعه وهي مش سامعاني , مشغوله في الشات بتاعها والسماعه قافله ودنها , كان نفسي أمسكها من زمّارة رقبتها وأقول لها ( لما انتي بنت طاهر القويري إيه اللي مقعدك القاعده السوده دي , ما تروحي بتابليتك و أيفونك للكافيتيريا بتاعة ماريوت الزمالك أو حتى قهوة السعداوي اللي في الحلميه وتتشاتي براحتك ) !!.

.

.

.

كانت هتبقى أجمل أوي وأكثر عمقا لو غنتها نجاة الصغيره بالشكل ده ( مممممم متى ستعرفُ كَمْ أهواكَ يا ( بَجَماً ) .... أبيعُ من أجلهِ الدنيا وما فيها تيراراااا)
.
وعلى رأي المعلم محمد رضا الله يرحمه ( يا واد افهم دانا بشرّبك صنف لو حمار شربه كان زمانه بقى جينتل مان ) !!.

.كلام في العشق الممنوع +18 !!

.
حضرتك , أيوه إنت , هل ممكن تقبل أي نقد لحد من الصحابه ؟ , يعني مثلا لو قلت لك إن سيدنا خالد بن الوليد كان فارس مغوار وقائد عظيم لجيوش المسلمين لكنه كان ( مزواجا ) بطريقه فجه , وكان بعد غزو كل قبيله يتجوز بنت من بنات القبيله ( أحيانا تقبل به زوجا خوفا منه ...جايز ) ؟! هتقبل حضرتك الكلام ده ؟ طبعا لأ ........... ممممممممم يبقى إنت أكيد واحد من دراويش مرسي أو دراويش تتح أو دراويش البرادعي .
حكاية الدروشه دي لها أصل في مصر وجذور ( روتس ) , إحنا شعب إتعود إنه لما يحب إنسان يوصل بيه لدرجه معينه من القداسه , وصل بينا الحال إننا نسمي ولادنا ( عبد الرسول وعبد النبي ) ومبنعرفش الفرق بين النقد لإنسان وبين السباب والبذاءه , أنا شخصيا متأكد تماما إنك مش هتقبل أي نقد لسيدنا خالد بن الوليد , هتقبله إزاي إذا كنت مقبلتش النقد لسيدنا محمد بن البرادعي ؟!!.

.

.

عبد المنعم أبو الفتوح شايف إن ثورة 30 يونيو كانت ( كبوه لثورة يناير ) , يعني ممكن نقولها بالبلدي كده إن ثورة يناير كانت ماشيه في حالها في أمان الله وبعدين اتكعبلت في 30 يونيو , ووقعت محطتشي منطق , هو ده بقى المنطق بتاع تتح , طيب أبو الفتوح شايف 30 يونيو كبوه وخالد على شايف إنها نص ثوره ونص إنقلاب يعني نص ثوره ونص كبوه , تقدر تقولي إيه الفرق بين خالد أبو الفتوح وعبد المنعم علي ؟ أنا أقولك يا كابتن , الفرق بسيط أوي ( واحد فيهم كبوه والتاني ابن كبوه ) !!.

.

.

صباح الخير , عارف إنت الواد الغتيت المكلبظ اللي اتصاحب عليك في ابتدائي عشان ياخد منك علبة الألوان وعدة الهندسه , وفي إعدادي بقى صاحبك أكتر وكل يوم بيتغدى عندك في البيت , ولما بقيتو في ثانوي بقى صديقك الأنتيم عشان معجب بالبت نوسه جارتكو ؟! ...........الواد ده بقى لما دخل الجامعه عمل حساب عالفيس بوك وبعتلك طلب صداقه عشان ينشر بوستاته على صفحتك مش أكتر !!.

.

.

للبيع سياره مرسيدس موديل 2014 ...عداد 9 كيلو فقط , فابريكه , جنوط , فرش جلد , تكييف تلاجه , بتلمع , بحالة الوكيل , برنامج كمبيوتر كامل لكل شئ , بس من غير موتور ( ماكينه ) ممممممممممم , أنا عن نفسي مدفعشي فيها تلاته تعريفه إلا إذا كنت محتاجها عشان أعملها حوض سمك زينه هتبقى روعه الصراحه !!.

................. ده بوست سياسي !!.

.

.للبيع سياره مرسيدس موديل 2014 ...عداد 9 كيلو فقط , فابريكه , جنوط , فرش جلد , تكييف تلاجه , بتلمع , بحالة الوكيل , برنامج كمبيوتر كامل لكل شئ , بس من غير موتور ( ماكينه ) ممممممممممم , أنا عن نفسي مدفعشي فيها تلاته تعريفه إلا إذا كنت محتاجها عشان أعملها حوض سمك زينه هتبقى روعه الصراحه !!.

................. ده بوست سياسي !!.

.

.

.إمبارح كنت قاعد بتفرج على فيلم عربي أنا وبنتي الصغيره لمار ( 3 سنين ) وبعدين كعادة الأفلام العربي الفاشله وصلنا لمشهد الرقاصه , بنتي أول ما شافت الرقاصه قالت لي ( بابا بابا شوف طنط بترقص !! ) , وانا بقيت مش عارف أرد عليها واقول لها ايه ؟ أقول لها أيوه مانا واخد بالي أهو , ولا أقول لها : لأ يا لمار , دي مش اسمها طنط يا حبيبتي , دول ناس وحشين ومش بيتقال عليهم طنط !!.

.

.سؤال أخير عشان أقفل الليله دي 

.
دلوأتي البرادعي ممكن يترشح لإنتخابات الرئاسه في مصر وهو عايش في أوروبا كده أو ينزل مصر أجازه 48 ساعه يقدم أوراق ترشحه ويرجع , وما شاء الله البوب أنصاره بالملايين , يعني ممكن ينجح بسهوله , سؤالي بقى , هو البرادعي لو فاز في انتخابات الرئاسه هينزل مصر عشان يحكمها ولا هيتصل برقم 9 ( الإستقبال ) و يطلب إن الشعب يجيله ديليفري على سويسرا ؟! يعني هو اللي هيجيلنا ولا احنا اللي هتروح له ؟!.
.
أنا أصلي أعرف كتير من أعضاء مجلس الشعب في السنبلاوين عندهم فلل وقصور في 6 اكتوبر والرحاب وعايشين هناك على طول بس وقت الإنتخابات بينزل الدايره عشان يهتم بإبن الدايره !!.

.

.

طيب بدون إنفعال أهو ...أدي كلام البرادعي في اليوم السابع
.
قال الدكتور محمد البرادعى نائب رئيس الجمهورية للشئون السياسية السابق عبر تغريده له بموقع التواصل الاجتماعى "تويتر" ان هناك حملة فاشية ممنهجة من "مصادر سيادية" واعلام "مستقل" ضد الاصرار علي إعلاء قيمة الحياة الانسانية وحتمية التوافق الوطني !!.
.
وعندي 3 أسئله سهلين أوي
.
أولا : حكاية مصادر سياديه دي من غير تسميتها كده مش تحسها شُغل ستات ( بلاش الكلمه التانيه ) ؟!.
.
ثانيا : إحنا كنا بننتقد محمد مرسي ومحمد بديع عشان بيعتبرو أي إنتقاد ليهم هو هجوم على الإسلام , ودلوأتي مولانا البوب بيعتبر أي انتقاد له هو هجوم على مفاهيم الإنسانيه ( المعذَّبه )........... يعني خلصنا من مرسي مندوب ربنا في مصر وجالنا البرادعي مندوب كوكب الإرض والإنسانيه .
.
ثالثا : حمدين صباحي مسابشي مصر و عارض النظام واتسجن وابراهيم عيسى وأحمد فؤاد نجم وغيرهم كتير , حضرتك ليه مصرّ إنك تعارض النظام وانت عايش ملك في أوروبا...........فين الرجوله في كده ؟!
.........................................................................................................................................................................................................................................................................................
أصدقائي الأعزاء , مش أن الأوان بقى نفهم إن الفرق بين التنظير السياسي وبين حكم مصر عامل بالظبط زي الفرق بين شرم الشيخ وكفر الشيخ , مصر مليانه أوي بلاد زي كفر الشيخ والبرادعي ينفع يحكم شرم !!.

.

.

من سنتين تلاته وانا كنت بحب البرادعي حب عنيف من بتاع أيام زمان , يعني ورد ودباديب و جوابات و قلب أحمر في الفالانتاين داي , ومن كام شهر بدأت انتقده بعد موقفه السلبي المتخاذل واستقالته من منصب نائب الرئيس في ظروف صعبه , ساعتها كنت بحس بتأنيب الضمير ومش عارف هتصدقوني ولا لأ ؟ , كان نفسي فعلا أحس إني غلطان وأعتذر لفخامة جناب البوب , لكن بعد التكريعه بتاعته النهارده على تويتر عايز أقول لحبيبي السابق محمد البرادعي رساله باللغه اللي بيفهمها
.
............. فَك يو , يا سَن أوف بيتش !!........ إنتهت الرساله .
.
أسوأ أنواع السياسيين في نظري هو اللي يمارس التنظير السياسي وهو مدلدل رجليه في ماية البيسين في أوروبا , إرجع بلدك يا دكر وادخل السجن على يد النظام الفاشي الإمبريالي التوسعي العميل السفّاح ابن الصرمه ( الذي بيعمل ضد مفاهيم الإنسانيه !! ) , إنت مش أحسن من اللي اتسجن ولا اللي اتقتل , جيفارا مسابشي بلده وراح يهاجمها من سويسرا , إنما كلامك بقى بيجيب لي غثيان , للأسف أنا بكره جدا الشخص اللي يبقى ( نُص جيفارا ونُص ليلى علوي !! ).
..................................................................................................................................................................................................... خالص اعتذاري لدراويش البرادعي !!.

.

.رأيي الشخصي , صناعة السيارات في العالم يعني ألمانيا ..... غير كده تقدر وانت ضميرك مستريح تعمل بيبي على كل باقي الدول !!

...اليابان ممكن تصنعلك شاشه إل سي دي أو مايكروويف أو ستاره بالريموت كنترول أو طقم كاسات وجيلي , والكوريين زي اليابانيين ونوسه زي ابتسام , وأمريكا ممكن تعمل كاتشب ( شاكّب على رأي بنتي الصغيره ) , أو تعمل ساندوتشات هامبورجر أو حتى تعمل حواجبها , السويد بتصنعلك عربيه الأكثر أمانا في العالم يعني باختصار عربيه فولفو بطريقة أقراص ocp اللي بتبلبعها الستات عشان تسمع كلام ست كريمه مختار , الصين بتعمل العربيات زي السرنجات كده disposable يعني استخدام مره واحده وبعدين ترميها ( بلاستيك يا مولانا ....بالاستيك ) , أما صناعة السيارات في العالم فتعني الماكينه الألمانيه .
في المشهد السياسي المصري , ممكن نقول إن أبو الفتوح مش عربيه من أساسه لكنه ساندوتش هامبورجر ( شاطر ومشطور وبينهما فراغ عاطفي ) , أما البوب فهو عربيه سويدي مليانه Air bags و معاه هتحس بالأمان ocp من الأخر , ده كلامه بيريّح بشكل !! , ومولانا خالد علي هو العربيه الصيني , إستخدام مره واحده ......يعني بالاستيك .
مصر يا مولانا شوارعها مليانه حفر وبلاعات ومطبات وإرهابيين و50 % تحت خط الفقر و 120 % مبيفكوش الخط , يبقى يلزمها عربيه ألماني , فإن لم يكن فعربيه فرنسي فإن لم يكن فالدبابه أحق أن تُتّبع!! .............. والله الموفق والمستعان !!

.

.

ماهو أنا مش هقبل طلب الصداقه ده حتى لو عملتلي عجين الفلاحه , شوف حضرتك ( بفتح التاء أو كسر رقبتها ) : تلاتهْ مَنْ كُنّ فيهِ مش هقبل طلب صداقته
.
أولا : بنت حاطه صورة مزه عريانه شويه ( والنبي خساره ) , وده للأسف مش هقبله عشان هانز بليكس مقيم معايا إقامه دائمه !!
.
ثانيا : واحد عامل حسابه عالفيس من ساعتين وده بقلق منه واتوغوش لأني مستهدف ( ومعظم النار من مستهدف الشررِ ) !!
.
ثالثا : واحد عامل حساب من فتره طويله بس معندوش ولا صديق , يعني سيادتك هيبقى أنا وهو لوحدنا , والكلام دم ده عيب وحرام ويتهزله 7 صفحات !!.

.

.

صباح الخير , تخيل حضرتك إني وقعت فجأه قدام بوست مكتوب بالفرنساوي ( الفرنصاوي ولا مؤاخذه ) , وانا في الفرنصاوي معجبكشي يا مولانا , يعني الفرنصاوي بتاعي مش بيسعفني زي الإنجليزي بتاع ميس ميرفت كده , الغربيه بقى إني فهمت البوست بيقول إيه أه والله , ليه بقى فهمته ؟ , لأني قريته على إنه إنجليزي وفهمته بقى بالقياس ( بالمفهوميه والحداقه ) وده بيأكدلك على مقولتي الخالده إن الإنجليزي والفرنساوي ( راضعين على بعض ) , أو فيه بينهم علاقه مشبوهه والعياذ بالله من أيام ما كانت إنجلترا وفرنسا بيعتبرو إن دول العالم التالت عباره عن صينية بطاطس في الفرن وبيقسموها بينهم , إنجلترا تقول لفرنسا أنا هاخد مصر والسودان والهند واسيبلك تونس والجزاير والمغرب وعليهم السنغال , تقوم فرنسا تضرب رجليها في الأرض وتعيط زي الأطفال وتقول لها أنا عايزه لبنان كمان , طيب يا ستي هتعملي ايه بلبنان دي كلها أد كده ولا هي فراغة عين وطفاسه وخلاص ؟ تقولك لأ مانا يلزمني ضهر في العبّ بتاع الشام ده عشان لما أنزل هناك في أي وقت ألاقي حد بيعملي لقمه سخنه عالغدا , أما احنا في مصر بقى فلجل حظنا المهبب وقعنا في معلقة إنجلترا ( قصدي مجموعة إنجلترا ) , وجه علينا اليوم اللي بنقول على الفرنساوي فرنصاااااوي , مش كان زمانا بنتكلم بشياكه كده زي المغاربه والتوانسه ونقول أفيك بليزير وسيل فو بلايه ؟........ ودي كانت حكاية إنجلترا وفرنسا ولاد الصرمه اللي بيرعو الديموقراطيه وحقوق لا مؤاخذه الإنسان في العالم , يا حراميه , دانتو واكلينا ( بلا ومساحه ).......... محدش يسألني يعني ايه ( بلا ومساحه ) هو المثل كانت أمي بتقوله كده !!.

.

.

.من أجمل ما قرأت وسمعت في الشعر الفصحى هذين البيتين : 

.
يا فاتناً لولاهُ ما هزّني..... وجدٌ ولا طعمُ الهوى طابَ لي
هذا فؤادي فامتلكْ أمرهُ.... واظلمهُ إنْ أحببتَ أو فاعدلِ
.................................................................
رائعة عبد الله الفيصل بصوت كوكب الشرق ( من أجل عينيك )
.
في البيتين حاله متفرده مسموح به في الشعر العربي ( الحاله الوحيده المسموحه ) وهي تحويل الحرف الساكن ( بالسكون ) في القافيه إلى حرف متحرك ( مكسور ) ...يعني أخر كلمه في البيتين المفروض تكون ( فاعدلْ ) لأنه فعل أمر ...لكن يجوز كسره في القافيه ويبقى كده ( فاعدلِ ).
.
وزن البيتين نموذجي , زي ما بيقول الكتاب ............
مستفعلن مستفعلن فاعلن ... مستفعلن مستفعلن فاعلن

.

.

قالتْ لهُ ( لن أرحل أبداً ...ما عادَ بالإمكان شفائي منك !! ) ......... وممممم وبعدين خفّت الحمد لله واتجوزت واحد تاني وعندها منه ولدين وبنت زي القمر دلوأتي !!............... من حكايات أصدقائي أيام الجامعه .

.

.

مناقشه سريعه مع صديق سوداني , سألته عن الوضع في السودان , قالي اللي بيخرجو في مظاهرات دول بلطجيه بيحرقو ويدمرو الممتلكات , قلت له يعني البشير كويس ؟ قالي لأ زي الزفت , قلت له يبقى انت مع الثوره قالي لا , لو البشير مشي دلوأتي السودان هتولع في بعضها !!........ انتهت المناقشه .

يتهيألي نفس الكلام ينطبق على سوريا , لو بشار مشي سوريا هتتقسم وهتولع ف بعضها .
عارف ليه بقى يا محترم , مصر دي قامت فيها ثورتين في سنيتين وفيها كم الإحتقان والغل ده ومع ذلك محصلتشي حرب أهليه والبلد متحرقتش ؟!
............ أيوه إنطق بقى , أنا شايف الكلمه على طرف لسانك بس انت مش عايز تنطقها عشان متزعلشي منك نشطاء الفيس بوك ..
.......... أيوه هي دي , عشان عندك جيش وطني محترم نزل وقت الجد وحمى البلد ........... هي دي الحكايه باختصار ومليون قبُله أطبعها على جبينك يا خالد علي , أبوس راس اللي خلفوك إرجع بيتك واشتغل محامي زي ما كنت , أو دافع عن حقوق العمال والغلابه ده عمل محترم أوي بس أخرك كده .

.

.

حدث بالفعل.... أه والله
.
من شهرين وانا عندي لمبه منوره في شاشة العّدادات اللي في تابلوه العربيه , عامله شبه لمبة الكهربا العاديه كده , المهم النهارده افتكرت إني أدوّر في الكتالوج بتاع العربيه واشوف اللمبه دي معناها إيه ؟ لا تكون حاجه خطيره و تعمل لي مشكله أكبر , جبت الكتالوج وفضلت ساعه أدوّر في صفحاته إني ألاقي صفحه فيها صور الإشارات اللي ممكن تظهر في الشاشه ؟ أبدا , الله يخرب بيت شركة لينوفو lenovo , يعني عملت كل حاجه ونسيت تحط الصفحه دي في الكتالوج ؟!!.

.

.أنا ( نباتي ) حضرتك !!.

.
من فتره كده وانا بشوف كلمة ( نباتي ) هي كلمة سيئة السمعه , عامله زي ناشط سياسي بالظبط , عشان الناس بتفهم إن اللي بيقول على نفسه نباتي يعني واحد مثقف أوي أخر حاجه وعارف بقى أضرار البروتين الحيواني وتأثيره على بشرة الإنسان وكده يعني , أغلب المثقفين اللي بيطلعو في التلفزيون هتلاقيهم بيقولو على نفسهم ( نباتيين ) , وتلاقي الواحد منهم يرجع البيت يقلع بلبوص ويقوم جايب رغيف عيش كبير أوي ويعمل لنفسه ساندوتش فراخ على سمك على بيض ومعاه عود جرجير , أهو عود الجرجير ده بقى سيادتك هو اللي خلّى مولانا يقول على نفسه نباتي !! .
عموما أنا قررت إني أكون مثقف أوي ( قصدي أكون نباتي ) , القرار ده خدته من ساعتين وهفضل أقاوم كده لحد مارجع البيت بالليل واشوف مراتي طابخه إيه ؟!.

.

.

في شغلانتنا دي بنشوف مهازل والله , من شويه دخل عليا مريض يمني ( بيشتغل راعي غنم ) , ورّاني جرح في ركبته , الجرح كبير جدا وواخد مساحه كبيره ومتلوث وحالته بالبلى وطبعا مسخّنه, بقالي نص ساعه بقنعه إنه لازم يروح المستوصف اللي جنبي عشان الجرح ده محتاج تطهير كويس جدا والدكتور يكتبله على مضاد حيوي محترم , هو بقى رافض ومش مقتنع وعايز كريم وخلاص , أقول له يابن الحلال مش هينفع ومش هيجيب معاك نتيجه , أخر ما غلبت قلت له الجرح ده هيموتك ومفيش فايده بيقولي ( ما عندي وقت ) , وهو ماشي كنت عايز أقول له ( طيب ابقى سلم لي على أبويا الله يرحمه ) , اللي خلاني مبقيتشي أتعاطف مع المريض ده أولا إنه غبي ومصرّ على غبائه , ثانيا إنه وهو طالع سألني على كريم دهان للشعر !! , شعر إيه يابني اللي هتدهنه وانت رايح تقابل وجه كريم ؟!.

.

.

حضرتك ممكن تنفعل أوي وتنتفض كده لو شفت واحد صاحبك ناشر على صفحته صورة لبنت لابسه مايوه , إنما عادي جدا وممكن تعمل لايك لو شفت صاحبك التاني ناشر فتوى لياسر برهامي بتقول ( المسلم يعامل زوجته المسيحيه كأنه يغتصبها ...و سجي عليه أن يبغضها في الله !! ) , في رأيي الشخصي الفتوى أكثر سفاله ووقاحه من صورة البنت العريانه , إنما هعمل إيه واحنا شعب عمره 7 ألاف سنه ولسه بيقول على السكر أوكَّر !!.
أغلب البيوت المصريه يجب أن يُكتب على بابها هذه العباره ( إحذر ...فصاحب هذا البيت يُعامل معاملة الأطفال ) !!.

.

.بعد نص قرن من موته ولسه الناس بيموتو فيه , ده عشق وهيام لواحد مات يعني مش خوف ورعب ولا مصلحه وسبوبه , أمي قبل يوم 30 يونيو بيومين قالت لي إنتو عايزين تشيلو مرسي ليه بابني ؟ , ده راجل طيب وبتاع ربنا وزود المعاشات وعمل كذا وكذا في السنه دي , قلت لها يامه انتي عارفه عبد النصر عمل ايه في أول سنه ؟ قالت لي بعفويه شديده ( هي الدنيا دي هتجيب حد تاني زي عبد الناصر ؟! ).

..... كلمة أمي بتلخص الحكايه كلها , عارف إنت بقى يعني إيه زعيم ؟ لأ يا باشا معرفشي والله ......... أديك عرفت أهو !!.

.

.

28/09

النهارده ذكرى رحيل الزعيم الخالد جمال عبد الناصر , 43 سنه يا زعيم , ناصر اللي عاش فقير ومات فقير وعوده منحناش لحد , ناصر اللي اتعرض لأسوأ حملة تشويه في السنين اللي فاتت ( برعاية الحظيره القطريه ) مره من الإخوان وألف مره من النشطاء والنحانيح , إنما رأيي الشخصي إن أكبر إهانه اتعرض لها اسم جمال عبد الناصر من يوم رحيله إن نفس الكرسي اللي قعد عليه قعد عليه واحد بهلول اسمه محمد مرسي , رحمة ربي عليك يا زعيم .

.

.

قيودصباح الخير , الواحد مننا بيوعى عالدنيا يلاقي نفسه محاصر بمجموعه كبيره جدا من القيود , لو فكرت شويه هتلاقيها موجوده حواليك في كل مكان وكل لحظه , مينفعشي تنزل من البيت من غير ما تسرّح شعرك , وكل عشرين تلاتين سنه لهم تسريحه شعر مختلفه ولازم تلتزم يا أخ علي ( هذا ما وجدنا عليه أباؤنا ) , قدرتك الجسمانيه عليها قيود , تقدر تشيل قلم أو كوميدينو لكن متقدرشي تحرك النخله اللي قدامك دي , القميص بيتلبس فوق والبنطلون تحت ( طيب مينفعشي العكس ؟) , البنت لازم تستنى إبن الحلال ييجي يخطبها , لكن لو بتحب هي واحد مينفعشي تروح تخطبه , وانت مينفعشي تنزل من بيتك عريان أو بالفالنه , عاداتنا وتقاليدنا بيقولو كده , ولما تييجي تكتب بوست بالعربي لازم تكتبه من اليمين للشمال مستحيل تكتب عربي من الشمال أو من فوق , ولو حبيت تقول للبت نوسه بحبك لازم تدور عالحروف الأربعه بترتيبها ده عالكي بورد , حرف الباء عامل زي الطبق كده وتحته نقطه أو بطاطسايه , طيب أنا مش لاقيه الحرف ده , تقريبا مش موجود عندي في الكي بورد أو كان موجود واختفى ...الزرار بتاع الطبق والبطاطسايه اتكسر , أعمل إيه بقى ؟ أفضل معلّق مشاعري كده لحد ما نلاقي حرف الباء ؟!. ..... ممممممممم أنا فكرت إني أكسر قيد من القيود دي , مش هلتزم بالحروف ولا بعددها أهو : ( نمالتمكتنتخ0قاتثقتثهقحقهتاخهخثحق ) يعني بحبك يا نوسه بس من غير قيود !!

.

.

محمد حسين