Mohamed Hussein
5 يونيو
هحذف البوست اللي فات واحتفظ برأيي الرافض لفكرة ( مؤتمر مانحين في مصر ) وهو رفض في الشكل العام , في الأيام اللي جايه هبقى مديون لكل أصدقائي باعتذار عن رفض فكرة المؤتمر أو يبقى أصدقائي مديونين ليا باعتذار , أنا منفعل بجد فعلا , عندي مشاكل كتير واجراءات أكتر قبل النزول النهائي , و بحب مصر بغباوه أو بغشم جايز , و احتمال عشان كده خانني التشبيه في البوست ................... تحياتي للجميع و أعتذر مقدما .
Mohamed Hussein
4 يونيو
قالو عنّك .... قالو عنَّا
قالو فارس جاي يجري
و احنا شاربين من كيعانا
.
يا رئيس جاي بهوانا
لك حدانا صوت و طاعه
و ابتسامه و رقص جايز
بس مش رقص النطاعه
برضو مش تأييد عجايز
.
اللي زيّك حقه يفهم
حبّه أكتر
في القصايد و المعاني
حد تاني مش هنسمح
يبقى فاسد
مش هنسمح
يبقى فاسد حد تاني !!.
.
.
محمد حسين
Mohamed Hussein
4 يونيو
الحمد لله , كنت واحد من اللي شجعو الناس على الإنتخاب في الشهرين اللي فاتو , قلت يا ناس انتخبو السيسي ولا حمدين ولو مش عاجبك ده ولا ده انزل واعمل إكس قدام الإتنين , إنما بلاش تقاطع وتقعد في بيتكو , الحشد كان مطلوب جدا عشان خاطر اللي قاعد لنا بره عالساقطه واللاقطه , 25 مليون كان رقم كويس اوي , كنت اتمنى اكتر لكن 25 كفايه , الرقم بيقول إن المقاطعه كانت فشنك ماتهزش شكل عمليه انتخابيه , فيه دول ومؤسسات لاتعترف إلا بلغة الأرقام , لما تقول لهم 25 مليون والرئيس ب 96 % تبقى حطيت في بؤه ولا مؤاخذه قديمه , هيعترف بيك غصب عنه حتى لو كان كارهك , السياسه عموما مفهاش حب وكراهيه ولا تعرف فاروق جويده
.
.
عبد الفتاح السيسي , قدامك فرصه ذهبيه بجد تبقى زعيم حقيقي مش مجرد رئيس لمصر , الطريق قدامك مفتوح , دعم شعبي غير طبيعي , دعم عربي كامل والشارع معاك , هتمشي عدل ومظبوط هنقول ناصر 2 , هتسمع للألاضيش والطبالين هتبقى نهايتك جنب الإتنين اللي في السجن , الشارع مالهوش عزيز ولا كبير , معركتك الحقيقه هتبقى مع حيتان الحزب الوطني و هوامير الإخوان اللي بيتحكمو في رأس المال في مصر , ممكن تختصر الطريق وتاخدهم في صفك وتبقى اخترت الإختيار التاني أو تقف جنب الغلابه اللي انتخبوك وانت مش محتاج عشان الغلابه والناس الطيبين هما ضهرك وسندك اللي هيحميك وقت الجد .
Mohamed Hussein
4 يونيو
عزيزي الإرهابي
.
عزيزي الإرهابي اللي حاطط الأر بي جي على يمينه والقنبله البلاستيك على شماله و شريط الشيخ كشك في جيب البنطلون و قاعد مستني التعليمات عشان تنال الشهاده , عزيزي الإرهابي اللي فاهم إن حور العين مستنيينه في الجنه ورا باب الريان على طول وهما على أحر من الجمر وكل شويه يبصو في ساعتهم ويقولو هو المجاهد اتأخر ليه , يا ترى المجاهد اتأخر ليه ؟ .
.
عايز أقولك يا عزيزي إن اللي فات ده كان حماده واللي جاي حماده هيدخلوه الجيش عشان يسترجل , و السيسي بقى رئيس مصر الشرعي المنتخب , يعني النفخ بعد كده هيكون رسمي فهمي نظمي , عالهواء مباشرة , واحتمال على قارعة الطريق .
.
إنما إيه شعورك دلوأتي ؟ شعورك ايه بعد ما الشيخ اللي قالك ( الشهداء لهم الجنه ) هرب وراح على قطر عشان يغسل لموزه رجلها بمايه و ملح و يجاهد في قناة الجزيره و فنادقها ال 7 نجوم ؟ يا ترى لسه مصرّ إنك تحارب جيش مصر ؟ طب هتحارب لوحدك ولا مستني فتوى من القرضاوي ( مفتي الناتو والمارينز ) يستدعي فيها القوات الامريكيه و سيده أوباما لضرب مصر ( في سبيل الله ) ؟!.
Mohamed Hussein
4 يونيو
بنات مصر نزلو عن بكرة أبيهم وانتخبو السيسي قام السيسي ماكدبشي خبر وقام معيّن العقيد أحمد على متحدث رسمي بإسم رئاسة الجمهوريه !!, أهو السيسي طلع بيفهم في الزوق والإتيكيت و ماعندهوش نفسنه ولا حاجه , أو جايز الحاجه انتصار ضغطت عليه عشان يخلص من المعاكسات .
طب أنا يا سيسي كنت بأيّدك أنا و رجاله كتيييير , و عايزين حقنا بقى , أيوه عايز سكارليت جوهانسون تبقى المتحدث بإسم وزارة الخارجيه.
Mohamed Hussein
4 يونيو
التاريخ هيفتكره و هيقول إنه واحد من أعظم الرؤساء اللي حكمو مصر , مسك الحكم في وقت ما يعلم بيه إلا ربنا , مشي في خط مستقيم زي ماتفقنا , لا التفت لجعجعه المجعجعين ولا لحشيش النخبجيه والمثقفين , اتعرض لاهانات كتير وتجريح وتطاول ولسانه مانطقش بكلمه واحده خارجه , راجل دخل القصر وهو نضيف وخرج منه نضيف , كان رمز محترم يليق بإسم مصر , أخر قرار خده هو اصدار عقوبه على أي كلب خسيس مابيحترمش علم بلده ونشيدها ( القرار ده لوحده يكفيه ).
.
.............. ألف ألف شكر سيادة الرئيس المصري المحترم : عدلي منصور
Mohamed Hussein
4 يونيو
جزيره الحرمان !!
.
حد من حضراتكو شاف تغطية الجزيره لفرحة المصريين وفوز السيسي امبارح ؟ عرفتو يعني إيه دعاره إعلاميه ولا لسه ؟ عرفتو التقارير ممكن تتفبرك إزاي , و إن مفيش حاجه اسمها إعلام حر ولا لسه ؟ عرفتو يعني إيه قناه لما تحب ( تغطي ) حدث لازم ( تكشف ) ضهرها ؟ عرفتو يعني ايه مليارات بتتصرف على قناه من حكومة زبّالين ؟ .
.
امبارح كان أخر ليله قضتها الجزيره في أحضان الرزيله الإعلاميه وقبلها طبعا أيام وليالي وشهور وسنين ( ماهي دي مش قاعدة أول دُخْله أبدا ) , عندهم بس وعلى شبكة رصد هتلاقي الأخبار بتنزل بطريقه ( كدبه تداري على كدبه تداري على كدبه وهكذا) , يعني السيسي اتقتل , لأ ماتقتلش بس رجله اتقطعت لا ماتقتلش ولا رجله اتقطعت بس هو اتقتل بعد الإنتخابات والفريق صدقي صبحي اللي قتله , السيسي يهودي لا ده جده اللي يهودي ومراته فاتحه شبكة دعاره , انشقاقات في الجيش المصري ,اللوا الفلاني انشق عن جيش الإنقلابيين , وكان أخر ليله قضتها الجزيره في كباريه الورده الحمره هي امبارح لما قالت ( الحزن يخيم على الشعب المصري بعد فوز قائد الإنقلابيين بالرئاسه ) شوفتو الحزن اللي كان مالي الشوارع يا ولاد ؟ شوفتو الصويت والعويل وشق الجيوب اللي كان في الشوارع والميادين امبارح ؟!
.
طب أقول لحضرتك ايه وانت بقالك سنتين تلاته شايفها بتنزل كل يوم من بيتها في نصاص الليالي وترجع بعد الفجر وهي سكرانه طينه وكل يوم وهي راجعه بتشوفها نازله من عربية زبون شكل ( جزيرة الحرمان والكبت ) , ولحد النهارده حضرتك مصر إنها بتشتغل ممرضه ؟ اقولك ايه أنا؟ طب اعتبرك مثقف وذكي واقول انك مستقبل مصر إزاي ؟ يعني أحط مستقبل البلد دي في إيد واحد بيعمل البانجو ساندوتشات و يفطر بيها ؟!.
Mohamed Hussein
3 يونيو
التحرير والميادين بقو مليانين بشر في نص ساعه , زي النمل , والصفحه عندي مليانه زغاريط من الأصدقاء و لا كأنه فرح ابن العمده , وفي الأخر يقولك السيسي جاب 23 مليون صوت منين ؟ يابني انزل بنفسك و عدّ الناس لو مش مصدق .... دي شعبيه تخوّف بجد , ترعب , يارب ما تخيب ظن الناس و عشمهم فيك يا سيسي .
Mohamed Hussein
3 يونيو
يا ترى شعورك إيه دلوأتي يابه عبفتاح ؟ والنبي تلاقيك مبسوط , أيوه غالبا هتبقى مبسوط , شوفت تأييدي لك نفعك إزاي ؟ أنا لوحدي جبت لك بتاع 23 مليون صوت ( لا الفكه دي مجهودات فرديه من عندك ) , ماتنسانيش بقى في شقه حلوه كده في الرحاب , 180 متر أرضي بجنينه و تكون بتبص على بحيرة البط , أصلي نازل مصر نهائي ونفسي أنزل أعوم مع البطه , أه والله , و نكاكي سوا بقى .
Mohamed Hussein
3 يونيو
الزغاريط اشتغلت في القاعه ..إعلان نتيجه ده ولا حفلة طهور .
.....................السيسي رئيس ب 23 مليون و 750 الف , أول مره أأيد حد و ينجح ههههههههههههههههههههههههههههههههه .
Mohamed Hussein
3 يونيو
أنا خلاص كرهت حكاية انتخابات وديموقراطيه وصناديق بسبب أم المقدمات اللي بتتقال قبل اعلان النتايج دي , و أيات قرأنيه و نشكر فلان ونتوجه بالشكر لعلان واحنا اشتغلنا في ظروف ماعرفشي ايه بس احنا قلنا لأ أبدا , لازم نكمل واستحملنا كتير و تعبنا كتير وكنا نقدر إنما لأ إنما أه , .................مقدمة إعلان نتيجة دي ولا مقدمة ابن خلدون ؟!
Mohamed Hussein
3 يونيو
الإخوانجية داليا مجاهد ( مستشارة اوباما ) : الثورة القادمة في مصر لن تكون سلمية ..!!
وانا مش لاقي رد يليق بيها غير كلمه قالها عبد الفتاح السيسي في لقائه مع ابراهيم عيسى , قال عبد الفتاح : ( خيرت الشاطر جالي قبل 28 يونيو وقال لي : هيكون فيه عناصر مسلحه من أفغانستان ومجاهدين من فلسطين و مسلحين من ليبيا وهيكون و هيكون و هيكون) .... و انا بطبعي بخاف !!.
.
ولسه الكولجيه بيتعاطفو مع الإرهابيين , و رئيس جمهورية الضمير اللي بتعتمد الكولّه ك ( رمز مقدس من رموز الدوله لا يمكن إهانته ) بيقول : فصيل وطني !!.
Mohamed Hussein
3 يونيو
إنت يابني عايز ديموقراطيه ولا مش عايز ديموقراطيه ؟......... أيوه عايز ديموقراطيه.
.
طب عايز مرشح مدني منتخب صح ؟ ....... أيوه عايز مرشح مدني منتخب صح.
.
طب عندك مرشح مدني ينزل انتخابات ؟ ............. عندي كتير .
.
طب تضمن له يجيب بس 10 % وتساندوه وكده ؟ ....... لأ 10 % كتير أوي .
.
طب عايزه يبقى رئيس إزاي ؟ نعمل انقلاب مدني منتخب مثلا عشان يبقى رئيس ؟ ......... لأ انا مش بحب الإنقلابات أنا عايزه ييجي بالصناديق والديموقراطيه.
.
طب يابني نجيبه إزاي وانت لسه قايل مش هيجيب حتى 10 % ؟ ...........ماليش دعوه , لازم الدوله بنت الحرام والإعلام ابن الصرمه والجيش ابن التيت والشرطه بنت ال (عسل ) و المخلوقات الفضايئه وكل مؤسسات الدوله يقفو معانا احنا ومع مرشحنا لحد مايبقى رئيس والكل يساندنا عشان نجيب رئيس بيمثل الثوره .
.
أه بس فهمتك فهمتك فهمتك , إنت عايز رئيس مدني منتخب بطريقة التعيين !!.
Mohamed Hussein
3 يونيو
حوار عالشات
.
الزوج : ازيك يا حبيبتي وحشتيني
الزوجه : وانت كمان وحشتني اوي
الظابط المراقب ( في سره ) : ممممممممم شكلها هتحلو كده
.
الزوج : طابخالنا ايه النهارده يا حياتي
الزوجه : عملت المحشي زي مانت طلبت بس تعبني اوي
الظابط ( في سره ) : انتي يا ستي مش لسه طابخه محشي من اسبوعين , أومال انا مراتي بتطلع عيني على بال ما تعملي محشي ليه ؟
.
الزوج : طيب حبيبتي انا مش هتأخر بقى
الزوجه : خلاص , هقوم اجهز الغدا اهو على بال ما تيجي
الزوج : استني استني , ماتنسيش تعملي حساب حضرة الظابط اللي بيراقبنا معانا عالغدا , الراجل بقاله 9 ساعات قاعد و زمانه على لحم بطنه , اتفضل معانا لقمه على ما قسم يا حضرة الظابط
.
الظابط ( بيكتب عالشات ): لا والله انا متغدي من بدري , تسلم يابو الزوق والواجب
Mohamed Hussein
3 يونيو
إحنا متراقبين !!.
.
- زي أي بني أدم عاقل عنده لحم ودم برفض تماما فكرة المراقبه عشان باختصار فيها انتهاك لأدمية الإنسان وحريته , برفض المعنى الشامل لكلمة مراقبه , حتى كاميرات المراقبه اللي عندي في الصيدليه بقرف منها مع إنها معموله عشان الزبون اللي داخل يبلطج أو يسرق , بس فكرة إني أكون باكل ساندوتش أو بتكلم في الموبايل وفيه كاميرا بتراقبني هي فكره بلتاجيه مقرفه .
.
- الداخليه أعلنت إن حسابات الفيس وتويتر في مصر متراقبه عشان أسباب معينه أو كلمات معينه زي قنبله وصاروخ ( و مزه وكرباج !! ) , وانا رأيي الشخصي هقوله باختصار : ( إنت كداب يابو صلاح ) , ماهي لو دي داخليه تقدر تراقب مكانشي وزيرها حضر صوانات عزا أكتر ماحضر اجتماعات , دانا حتى رأيي إنهم ينقلو مقر وزارة الداخليه لعمر مكرم عشان مانتعبش سيادة الوزير في المواصلات رايح جاي .
.
لسه لحد النهارده المخبر بيقعد عالقهوه ماسك جرنان مخروم ولابس بالطو قديم وقال يعني كده متنكر , والواد خيشه صبي القهوه يجيله على الساعه 12 بالليل يقول له الحساب يا حضرة المخبر عشان عايزين نقفل القهوه !! .
.
- إنما أكتر حاجه هلكتني ضحك من الهري بتاع امبارح وكل واحد كاتب احنا متراقبين هي دي : فجأه كده بقى الناس كلهم مهمين دوت كوم , مستهدفين دوت نت , زعماء دوت أورج , ممممممممممممم يا بني هو احنا بنعمل ايه على أم الفيس ده غير اننا بنكتب النهارده الهري اللي كتبناه امبارح وبكره هنكتب الهري بتاع النهارده وحماصه هيبقى زي سعيد ونوسه زي ابتسام , وبنلعب كاندي كراش ونعاكس المزه , ماهو يابيه لو قبضو على كل واحد بيلعب كاندي كراش و بيعاكس المزه بتاعته تبقى البلد كلها هتبات في الكراكون .
Mohamed Hussein
2 يونيو
اللهم وفّق عبدك الضعيف سيادة الرئيس عبد الفتاح السيسي و وزير داخليته سيادة اللواء محمد ابراهيم إلى ماتحبه وترضاه , اللهم سدد رميهم و اجمع شملهم وارزقهم بالبطانه الصالحه ( اللي هي موجوده فعلا ) , اللهم أمين .............. #احنا_متراقبين
Mohamed Hussein
2 يونيو
غرامك قصه محسومه
بقلب نضيف مايعرفشي
لا زيف ولا غش
.
و كان نفسي أنا اكتب لك
حروف ديبانه من دوبي
و أسْمع بعض مكتوبي
بصوت سومه
لكن معلش !!.
.
يا مصر
قولي لي من فضلك
مريض بيكي
و مش عارف دوايا منين ؟
و كام عاشق وكام شاعر
كتب عنك وقال فيكي
كتاب واتنين ؟!
.
يا شجرة توت
و نسمة تفوت على توبي
تطبطب حبّه و تسلِّم
و ليه بعرف كلام عشّاق
و ناس جامدين
و عندك ببقى خيبه و طين
و عيّل لسه بتعلّم ؟!
.
دانا مرّه
عملت حكايه من ذهني
و من عقلي وترتيبي
و قلت اكشف
و اشوف في الكشف ترتيبي
و رقمي الكام ؟
لقيتني بعيد وأيّ بعيد
في كشف الصبّ والعاشقين
أنا واحد من الخايبين
مانيش واحد من الشطّار
و قال الكشف يا حبيبتي
و قال إسمي رقم مليار !!.
.
محمد حسين
Mohamed Hussein
2 يونيو
حكومة حماس سلّمت و رفعت الرايه البيضا , وعمر البشير رجع لورا الخط الأحمر بمترين تلاته و واقف انتباه , سيبك من الهلفطه بتاعة زمان بقى , السياسه لا تعترف إلا بالأقوياء , يا بني عبد الفتاح السيسي ده كان راجل بتاع مخابرات مش بتاع بليله !!.
Mohamed Hussein
2 يونيو
قال الفيلزوك
.
صديق عزيز 1: مش عيب تبقى راجل صيدلي كده وتشتغل طبال للسيسي !! ................... ده اللي هو أنا ؟ بس ماتقولشي طبّال , قصدي ماتقولشي صيدلي قصدي ماتقولشي راجل !!.
.
صديق عزيز 2: شموخ ايه وعزه اللي بيبان فيها السيسي في الصور وهو بيرفع البنطلون لحد صدره !! ......... مممممممممممممم طب حضرتك هي حكاية رفع البنطلون دي لها علاقه بالديموقراطيه و ألياتها ؟ يعني لها علاقه بال democracy ?
.
صديق عزيز 3 : انت ماسك العصايا من النص وبتقول بأيد السيسي وبحترم حمدين وده كله عشان اللايكات , لأ لأ دانت بقيت مؤيد صريح للسيسي وده كله عشان اللايكات !!....أيوه يا صاحبي عندي اقساط شقه وبجمّع اللايكات عشان أكمل القسط الجاي .
.
صديق عزيز 4 : فيلم المندس بيفضح الفلول والعسكر من أيام الثوره وانت ازاي مش عايزني اتفرج عالجزيره ؟! ............. لا يا عم اتفرج , بس الفرجه عالجزيره لها أصول , يعني مثلا حضرتك لازم تقفل الباب عليك كويس وماتسمحشي للولاد الصغيرين اقل من 18 سنه يدخلو وتطفي النور وتاخد التلفزيون على حجرك , و ممكن تقلع في الأول أو تقلع في النص براحتك بقى.
.
..........................................
..........................................
الحكايه باختصار عشان بس نحافظ على المراره و نترحم شويه من المرار
.
1- اصدقائي الثوريين والثورجيه والثوار والثائرين وكل كلمه فيها حرف ال ( ث) , كل اللي بعمله عالفيس اني بحط حضرتك قدام نفسك في مرايا واحيانا كتير بضربك قلم صغير عشان تفوق , اللي بيوجعك ويلسعك اوي اني بضربك القلم بإيدك مش بإيدي , عشان كده ده اسمه اسلوب لاذع أو لاسع !!.
.
2- قوة الثورجيه واحزابهم وحبشتكانتهم انت بنفسك تقدر تحددها , لا نافعه في أي انتخابات ولا لها وجود في الشارع وكل زعييم ( بين قوسين ) من زعماء الثوره وزعماء الأمه خد له بتاع عشرين الف واحد وعايز يعمل بيهم دوله على مزاجه !! , عشان كده حضرتك رافض الإنتخابات وهترفض أي انتخابات جايه عشان عارف ان أخرك فيها صفر , الحاجه الوحيده اللي تقدر تعملها هي انك تثور والثوره يعني الهد والهد مفيش أسهل منه , يتهيألي احنا ثورنا وهدّينا في 2011 وكانت مشكلتنا اننا ماعملناش حسابنا مين اللي هيبني بعد ما نهد ؟!.
.
3- مستقبل مصر مش دور كوتشينه هنلعبه عالقهوه واللي يخسر يحاسب عالمشاريب , عشان كده انا مع ثورة 30 يونيو تماما , عشان لقينا فيها الشعب اللي يهد والرئيس اللي يبني , جايز مايكونشى بنَّاء محترف زي ما حضرتك عايز وجايز مايكونشي هيبني المبنى بنفس الرسم الهندسي اللي انا وانت بنحلم بيه لكن يكفيه إنه بيعرف يمسك ( المسطرين ) ويشمّر دراعه ويشيل المسئوليه ويبني .
أنا أصلي تعبت أوي من فكرة البنّا اللي قاعد يبني مستقبل مصر بقلم ماركر على سبوره بيضا وهو قاعد عالبيسين في أحد قصور فيينا !!.
Mohamed Hussein
1 يونيو
طب تصدقو بقى ؟ أنا شوفت صور كتير لابويا الحاج المشير الرئيس عبفتاح السيسي , أيوه الراجل الكبير بتاعنا اللي بيجيب لنا اللحمه البتلو , كل صوره فيهم تحس إن فيها عِزّه كده و شموخ , أسد واقف قدام الكاميرا , الصوره الوحيده اللي حسيته فيها كاشش و كمشان هي صورته مع مراته !! حتى أنتَ يا عبفتاح ؟!............. الست المصريه لها هيبه برضه يا جدع , ربنا عالمفتري .
Mohamed Hussein
1 يونيو
أدوات النصب وشيوخه .............. أرجوك حاول تفهم , مفيش وقت , الوقتُ يدهمُنا !!.
.
- في افلام الرعب الأمريكي بتلاقي شوية بيض شكله جميل كده بس بتاع حيوانات مفترسه والبيض ده فضل مرمي في كهف من الكهوف مئات السنين لحد ما جت ظروف جويه مناسبه ( يعني شوية حراره على شوية رطوبه مثلا ) والمهم البيض فقس وطلعت منه الحيوانات المفترسه دي ............كويس كده ؟.
.
- اللي حصل إن من أد 25 سنه كده بدأت قناة اسمها الجزيره , شوية برامج واخبار على كيف كيفك , وجود مستمر في مواقع الحدث , مصداقيه زي الكتاب ما بيقول , ملايين ومليارات بتتصرف عالحكايه دي , واحنا مالنا يا موهيي , كده حضرتك اقتنعت تمام ( يعني بقيت زبون بمعنى الكلمه ) , بعد سنه واتنين وتلاته بقت الجزيره بالنسبالك نبي ( لا ينطق عن الهوى ) , شويه بقى وجه الوقت المناسب ( ثورة يناير ) والظروف المناخيه اللي سمحت للبيضه تفقس ويطلع منها الحيوان المفترس .
.
هبسطهالك شويه : في قريه من القرى كان فيه ناس بيبنو جامع وجمعو من بعض 20 الف جنيه , فجأه جالهم رجل غريب ( لابس أبيض فابيض ) وقال لهم انتو بتعملو ايه ؟ قالو له بنبني جامع بس جمعنا مبلغ قليل أوي , قال لهم طب خدو 50 الف مني عالفلوس اللي معاكو وكملو بقى تمن الجامع من بعض وهجيلكو بعد اسبوعين ( المصداقيه ) , الناس فرحت بالراجل الطيب الكريم واتشجعت و جمعو 100 الف كمان وبقى معاهم 170 ...الراجل جالهم بعد اسبوعين فعلا قالو له معانا 170 , قال لهم لا كده مش نافع خالص , هاتو ال 170 الف دول وانا هبني لكو الجامع على حسابي , وخد منهم الفلوس وهرب ( الحرامي ) !!.
.
قبل ثورة يناير كانت الجزيره هي الراجل الطيب اللي كسب مصداقية الناس ولما بدأت الثوره كان الجو مناسب للبيضه انها تفقس و يخرج منها الحيوان المفترس ( الحرامي ) اللي شوه عقول الناس اللي صدقته .
.
.............. نهايته , والنبي يابه الحاج , أحبّ على إيدك مفيش وقت , مش أي حد يديك حاجه صفره تشربها تقوم شاربها على إنها حلبه حصى !!.
Mohamed Hussein
1 يونيو
لسه فيه مصريين بيتفرجو عالجزيره , أه والله , إنت مش مصدق ؟ طب وعهد الله لسه فيه مصريين بيتفرجو على قناة الجزيره , مع إن القناه دي عملت كل حاجه ومش باقي غير إن المذيعين والمذيعات اللي فيها يطلعو عالشاشه و هما لابسين قمصان نوم حريمي لونها بامبي و يحلفو بأيمانات الكُفار و باللات والعزى وهبل إنهم شغالين في كاوليه للدعاره الإعلاميه مش قناه ولا حاجه , بس برضه وقتها هتلاقي مصريين قاعدين قدام الشاشه ويقولو لهم لأ , ماتقولوش على نفسكو كده , إنتو حد جميل و بيشتغل ممرضه !!.
Mohamed Hussein
1 يونيو
المثقف الحمار
.
- ميرفت التلاوي طرقعت لوفد الإتحاد الأوروبي و طردته تقريبا, ولو عايز حضرتك تفهم ان السياسه داخله برجلها اليمين في كل حاجه من أول الإنتخابات لحد اللقمه اللي بناكلها و الهدمه اللي بنلبسها هقولك .
.
1- الوفد الأوروبي قال تجاوزات حصلت اثناء الإنتخابات وتحرشات جنسيه !! , سيبك من الأولى وركز في التانيه وانت تعرف قصدي , الوفد عارف هو بيخاطب أنهي شعب وايه اللي بيوجعه , يعني لو دي انتخابات في اليابان مش هيقول تحرش حتى لو حصل................ حاول تفهم .
.
- لما السيسي قال لمبات موفره طلع بحث علمي غربي تاني يوم بيقول اللمبات الموفره بتجيب سرطان ( و اسهال تقريبا ) , فبلاش والنبي تاخد كل حاجه مكتوب عليها بحث علمي من فوق على انها تمت في معمل و عملها علماء لابسين بالطو ابيض ونضاره قعر كوبايه , لأ مش شرط , أصغر عيل في أوسخ جهاز مخابرات أمريكي هينشرلك بحث علمي موثق بالتجارب والصور إن البتنجان الأسود فيه ماده مضاده للأكسده ولو محصول البنتنجان الأسود انضرب في أمريكا هيتغير البحث وهيبقى الكلام عن البطاطا ........... حاول تفهم .
.
- شركات الأدويه العملاقه بتنشر على صفحاتها فقرات عن مشاريعها الخيريه في العالم وكيف أنها تبنّت رعاية الأطفال المعاقين في تنزانيا و الفقراء المعدمين في الكونغو وهكذا ....في الوقت اللي أغلبهم بيشتغل في تجارة السلاح والحروب و حتى التجاره في الأمراض والفيروسات ............... حاول تفهم .
.
مراكز حقوق الإنسان ومنظمات المجتمع اللامؤاخذه المدني هتلاقيها بتسب وتلعن في اللي بيحصل في مصر وفي نفس الوقت بتشيد بالتجربه الديموقراطيه في العراق بعد ما الأمريكان خربوها مداين...... حاول تفهم .
.
- الخلاصه عايز أقول , مصيبتنا السوده هي إننا بنصدق أي حاجه حبذا لو مكتوبه بالإنجليزي !! , التقارير والمنظمات والهيئات والحبشتكانات مش ملايكه نازلين من السما فحاول والنبي تقرا وانت دماغك شغاله يعني تفكر وانت بتقرا , عشان احنا بجد بجد بجد هرمنا من فكرة المثقف الحمار !!.
Mohamed Hussein
31 مايو
و بعد 3 سنين من الشد والجذب و المد و الهد , وبعد ماشوفت عقول النخبه والمثقفين و المعارضه و معارضة المعارضه واللي مش معارضه بس عاملين نفسهم معارضه و بعد ما كتبت ألاف البوستات و قريت ألاف المقالات واطّلعت على أوراق القضيه بالكامل بحيثياتها و أبعادها , وبعد ما سمعت شهادات من شهود الإثبات و شهود النفي و بعد ما طلعت مع البرادعي لسابع سما و نزلت على جدول رقبتي و بعد ما سهرت ليالي مع حمدين وقلت النوم كان احسن , وبعد ماستنّيت أنهار العسل بتاعة الإخوان وانا ماسك الكوز في إيدي كداهو و بعد ما ركبت في الكرسي الوراني بتاع ميروكباس خالد على وقعدت شهور و الميكروباس مش بيكمل , قررت إني أغيّر الحلم اللي كنت بحلمه , بلا حياه ديموقراطيه لولبيه حلزونيه بلا تكتّل لمعارضه مدنيه محترمه بلا بطيخ , دلوأتي هحلم حلم جمييييل أوي على أدي , بحلم إن ربنا يرزقني بولد و بنت , الواد هسميه ( فسواني ) و البت هسميها ( بَعْليصه ) و يارب يارب يارررررررب أكبر لحد ماشوف فسواني ابني و دراعي اليمين و عكّازي لابس بدله و واقف معايا وقفة راجل في فرح أخته بعليصه .
Mohamed Hussein
31 مايو
علاء الأسواني بيشبّه اللي حصل في انتخابات الرئاسه بمباراه بين الأهلى والزمالك وان الأهلي كان متقدم بس الحكم ( عشان زملكاوي ) عمل شوط تالت عشان الزمالك يفوز !! ممممممممم ياراجل إذا كان نادي الأهلي نفسه اعترف بالهزيمه الساحقه في بيان رسمي مختوم و متوثق .
وانا كل مافتكر إن دول النخبجيه بتوع مصر اللي كنا بنمشي وراهم أقول اللهم ارفع عنا سخطك و غضبك والزلازل والبراكين والجراد و القُمَّل و النخبجيه !!.
Mohamed Hussein
31 مايو
و لسه بيبدأو الفرز و قالو السيسي عدّى 90 % و عدّى ال 20 مليون صوت قام عمر البشير رمى حتة الطمباك اللي في بؤه والعصايا اللي في إيده وقال : إحنا علاقتنا كانت وحشه بالإخوان , عليا الطلاق مابحب مرسي ولا بطيقه , ألف مبروك ياريس سيسي , و حلايب مصريه ميه في الميه ولو عايزين أم درمان كمان خدوها .... أنا عايز أعيش !!.
Mohamed Hussein
31 مايو
لو فكرتو كويس هتلاقو ان فيه حلّين اتنين بس يضمنو لمصر الإستقرار والرخاء التام
.
الحل الأول : هو المصالحه , أيون المصالحه
.
إحنا نروح قصر الرئاسه و نصالح السيسي عالبرادعي وبعدين نطير على فيينا نصالح البرادعي على حمدين وبعدين نطلع على بلطيم نصالح حمدين على خالد على وبعدين نروح المندره بتاعة خالد على اللي بيعزم فيها أنصاره ونصالحه عالسيسي وبعدين نرجع قصر الرئاسه تاني ونصالح السيسي عالإخوان و بعدين نطلع على قطر ونصالح الإخوان على البرادعي و هكذا لحد مانفسنا يتقطع , و على رأي سمير غانم إحنا نشتري كتاكيت ونربيها والكتاكيت دي تكبر وتبيض و تفقس تطلع لنا كتاكيت جديده تكبر وتبيض وتفقس ونفضل كده نبيض ونفقس ونبيض ونفقس لحد ماتتم المصالحه .
.
الحل التاني :
إننا نقف ورا السيسي الرئيس المنتخب ب 23 مليون صوت و نحط ايدنا في إيده و نحاول نبني البلد دي بجد , ونسيب كل كتكوت في عشته يبيض ويفقس براحته , وهو الكتكوت لما يعرف إن الحدّايه قربت من العشه هيجيلنا لوحده ( ده إذا عرف أو فهم أو حس ) .
ورد في الأثر : إن الحمار هو أول المخلوقات اللي بتعرف تتنبأ باقتراب الزلازل وإن الناشط السياسي المصري هو أخر المخلوقات دي , يعني الحمار بالنسباله يبقى أينشتاين .
Mohamed Hussein
31 مايو
أحلى حاجه في حبايبي واصحابي البرادعاويه والنحانيح إن عندهم حل لكل مشكله , أي مشكله تخص البلد حلها موجود عندهم و بوضوح وشفافيه تامه
يعني مثلا :
.
لو سألته هتعملو إيه في البرلمان الجاي ؟..... يقولك الحل هو :*ثلثقخحاعضاثاعاهاهحعشبايبعهاا * #عبث
.
طب نعمل إيه مع الإخوان ؟... هيقول لك الحل هو :
*/*/*/*/*/*/*/ ضثالفعضالعضاحتثعلاضعحه #موجهه
...........................
إنما رأيي أنا الشخصي في البرادعاويه الحاليين ( رفقاء الأمس ) إنهم وباختصار ومن الأخر يعني : هخبثتتلثقختلضاالضعللحاضع #تيت حصثتبخحهصضتختقخ.
Mohamed Hussein
31 مايو
من وحي الإنتخابات الرئاسيه
.
- لو حصل يعني و رئيسة حزب الدستور راحت لحمدين صباحي البيت و قالت له عايزين نعمل تكتّل مع التيار الشعبي عشان الإنتخابات البرلمانيه اللي جايه , هيقوم حمدين يقول لها ( تكتّل دي تبقى امك ) , و يجري وراها بالشبشب في الشارع .
Mohamed Hussein
31 مايو
روبرت فيسك بيلسّن بالكلام على ابويا الحاج عبفتاح , بيقول ( الديكتاتور العربي الجديد ) !! .
أيوه يا عم روبرت إحنا شعب لعين يا أخي , شعب نزل الشارع عمل انقلاب ونزل يصوت في الإنتخابات قام جاب ديكتاتور !! حلوه الجمله دي يا حاج فيسك ؟ حلوه شعب نزل الشارع عمل انقلاب دي ؟ مع إن الشعب لما ينزل الشارع بيبقى اسمها في الكتب بتاعتكو ثوره , طب حلوه الجمله التانيه دي : شعب نزل يصوت في الإنتخابات قام جاب ديكتاتور ؟ مع إن الشعب لما بينزل يصوت في الإنتخابات بيبجيب رئيس منتخب حسب الكتاب بتاعتكو برضه , شكلك ماقريتشي عن الديموقراطيه من أيام الغزو الأمريكي البريطاني للعراق يا مولانا , وعشان كده انت وأمثالك منبهرين بالديموقراطيه الأمريكاني في العراق أو بمعنى أصح منبهرين بخرابها , أه لو عبفتاح السيسي وصل للحكم على ضهر دبابه أمريكاني كان زمانكو بتقولو نيلسون مانديلا الجديد .
.
إنما هو السؤال اللي محيرني بجد , هو روبرت فيسك يقرب لعزمي لامؤخذه بشاره ولا هي الحكايه تشابه أسماء محفوظ ؟!.
Mohamed Hussein
30 مايو
سرحت كده بخيالي و قلت هي مصر دي اتكتب عنها كام ألف كتاب و كام ألف ديوان شعر ؟ كام ألف شاعر و مؤرخ و درويش طافو في شوارعها وحواريها وتاريخها وكتبو كلام ؟ كام مليون كلمه وحرف ؟ كام ألف عود وناي و ربابه ؟ كام ألف مدّاح وعاشق وصوت طالع من القلب ؟.
و بعدين بقى قلت لنفسي هو لو فيه شاعر قطري حب يكتب قصيده عن قطر هيكتب فيها ايه ؟ هيجيب كلام منين ؟ أكيد هيكتب بيت ونص عن قطر وبعد كده مش هيلاقي كلام فيقوم مكمّل بالسعوديه والإمارات ومجلس التعاون الخليجي وعلى بال مايكون كمل قصيدته يكون وصل حدود تنزانيا !!
.
أنا إنْ قدَّر الإلهُ مماتي ..لا ترى الشرقَ يرفعُ الرأسَ بعدي .
Mohamed Hussein
30 مايو
رساله إلى الرئيس ...... رقم 1
.
عبفتاح يا والدي اسمع كلام ابنك الكبير محمد , لو فيه أي مخرج قانوني لتعديل قانون التظاهر بشكل يحفظ هيبة الدوله ومصالح الناس و لو لك صلاحيات في كده اعمله كأول قرار , اعمله عالأقل من باب سد الذرائع على المغيبين اللي نظرهم تحت رجليهم , وبالتالي هيطلع شباب كتير من اللي اتحبس بسبب قانون التظاهر , إنما مش عايز تدخّل مباشر للإفراج عنهم حتى لو عندك صلاحيات العفو المباشر , دي أول حاجه تقطّعها وترميها , عشان مَنْ يملك حق المنح يملك حق المنع وانا مش عايز ديكتاتور جديد بإسم الإنحياز للثوره ولا حتى بإسم اللبّان .
.
عبفتاح يا والدي , فيه شوية ناس حواليك بيتنططو و لولاهم كان زمان ال 24 مليون صوت بتوعك بقو 30 بالمستريح , ناس مؤيدين وكل حاجه إنما عاملين شبه أسلحه فاروق بيضربو لورا , يعني تأييدهم يهينك مايشرفكش , إنت عارفهم بقى والعارف لا يُعرف , هات بكرة سوليتيب من بتاعة الكراتين واقفل بؤهم وخليهم يقعدو في البيت , , عشان هيتحسبو عليك في النهايه وانت مش هتستفيد أي حاجه لما تستفز مشاعر الناس , أه والنبي يابويا البت المذيعه اللي لابسه سلسله دهب على صدرها مكتوب عليها السيسي دي أول واحده تقعد في بيتهم وتاخد منها السلسله عشان خاطر مصر .
.
عبفتاح يا والدي , العيال الثورجيه والكولجيه هما في النهايه عيالنا , والضنا غالي , صح ضايعين في البلاله وشاربين ماية الطرشي وعاملين بيها أحلى دماغ إنما تقدر تكسبهم في صفك عشان خاطر البلد دي , هما مش كتير , بتاع مليون ولا حاجه يعني مش محصلين اصواتك في المنوفيه وبالتالي لا هينفعو يحكمو في يوم من الأيام ولا حتى هينفعو يعملو معارضه عليها القيمه إنما يعرفو يهدّو , ماهو الهد مفيش أسهل منه , شاكوش و أجنه وفاس أردني تهد بيهم أتخن بيت , الصعب إنك تبني , خدهم معاك و خليهم يبنو , خدهم في حضنك بدل ما الإخوان يركبوهم كالعاده .
.
اللي طلبته ده مش كتير يابه عبفتاح , ولا محتاج أبار بترول تظهر في ميدان رمسيس ولا جبل عسل و لا بحيرة مربى , اللي طلبته محتاج راجل واعي وحكيم مش أكتر , اسمع كلامي بقى ده المثل حدانا بيقول ( إن كبر ابنك خاويه ).
Mohamed Hussein
30 مايو ·
الناس مقامات برضه
.
بوتين يهنئ السيسي بفوزه بالإنتخابات الرئاسيه في مصر !! و بكره ولا بعده هتلاقي وفد من الإتحاد الأوروبي جاي يبارك ... مممممممم الله يمسيه بالخير مرسي أول ما بقى رئيس جت له مكالمة تهنئه من البلتاجي و وفد من المهنئين والمباركين من كوادر الجماعه فرع السنبلاوين ( أه طبعا اتغدو في القصر قبل ما يرجعو , إحنا ناس مايفوتناش الواجب ) .
Mohamed Hussein
29 مايو
يا ولاد , يا رجاله , يا بنات , تعالو عايز أقول لكو على حاجه مهمه أوي و سر خطير
.
بقى أنا كان نفسي أطلع واد نخبجي مثقف طحن بقول ( عبث و موجهه ) واقرا رواية الفيل الأزرق و كتاب الأسود يليق بك للكاتبه أحلام بتستعماني ياهرم , واكتب في بوست ( يقرأ : الحب في زمن الكوليرا لجابريل ماركيز ) و في بوست تاني ( يشعر بالسلام مع النفس ) , أنا أعرف السلام مع اسرائيل بس , إنما للأسف للأسف مجموعي ماجبش , أصلي أعلنت تأييدي للسيسي وبما إني أيدت السيسي أو حمدين يعني ماقاطعتش أبقى من عامة الشعب و الغوغاء والدهماء و المتسلّقه ( ده رأي النخبه المثقفه المقعره فينا ) .
.
و بعدين و بعد مانفعلت شويه كده وهديت قلت وماله ؟ دهماء دهماء , وايه يعني لما أبقى غوغائي متسلق ؟ خدوهم غوغائيين يغنيكو ربنا , ده حتى الغوغائيين بيبقى دمهم خفيف مش إتمين كده زي العيال بتوع ساقية الصاوي اللي بيشيلو الموبايل و يقولو في نص الكلام how come ? .
عشان كده قلت أعزم حضراتكو كغوغائيين أمثالي عالبوست ده , عيشو حياتكو بقى , غوغائيه في حب مصر , اللي عايز ياكل بصل ورنجه و ينفخ في وش اللي جنبه ماشي , واللي عايز يقرقض في ضوافره يقرقض , واللي عايز يقعد وشعره منكوش ولابس شبشب فرده وفرده مايضرش , و كل اللي نفسه في أي حاجه من الحياه الغوغائيه الدهمائيه البوهيميه يعملها .
...............................................
ملحوظه : هذا البوست للغوغاء والدهماء فقط وال 24 مليون المؤيدين للسيسي و حمدين ويمنع منعا باتا دخول المثقفين والنخبجيه ( النخبجيه اشتكو من كُتْر مراسيلي ).
Mohamed Hussein
29 مايو
هتلاقي واحد كده بيروح المؤتمرات الخارجيه و اللقاءات الثنائيه مع قادة و زعماء العالم وهو فارد عوده و راسه مرفوعه لفوق عشان هو رئيس مصر , مش هيقبل إن رئيس مصر يقابله في دوله أجنبيه عمده قريه , مش هيهلفط بالكلام عشان عارف إنه رئيس مصر ماينفعش يبقى عبيط و برياله و أضحوكة العالم , مش هيستنى تعليمات تجيله من مكتب فلان ولا علان عشان عيب رئيس مصر ياخد تعليمات , ... باختصار هتلاقي واحد مصري اسمراني خد شويه من شموخها و هي رضيت عليه فبقى رئيس ............. وهي دي كل الحكايه .
Mohamed Hussein
29 مايو
ولسه ماقولناش يا هادي قام طلع لنا عمر عفيفي وقال إن منصب رئيس الجمهوريه شاغر ( يعني مطلوب واحد رئيس جمهوريه حسن المظهر ممشوق القوام يجيد الأله الكاتبه ) و بسلامته بيجهّز الرجاله لثوره تالته , بلا انتخابات بلا بطيخ , مممممم هات إيدك كده يا حاج عمر , أيوه انا عارف انك في أمريكا بس حاول تمدها بس , و شبكة العشره دول أنا نفسي تنزلو في ثوره تالته فعلا , عشان الناس تاكلكو بسنانها في الشوارع و نبقى ندوخ احنا بقى عشان نطلع حقوق الشهدا من بين سنان الغلابه و الناس الطيبين .
.
5 يونيو
هحذف البوست اللي فات واحتفظ برأيي الرافض لفكرة ( مؤتمر مانحين في مصر ) وهو رفض في الشكل العام , في الأيام اللي جايه هبقى مديون لكل أصدقائي باعتذار عن رفض فكرة المؤتمر أو يبقى أصدقائي مديونين ليا باعتذار , أنا منفعل بجد فعلا , عندي مشاكل كتير واجراءات أكتر قبل النزول النهائي , و بحب مصر بغباوه أو بغشم جايز , و احتمال عشان كده خانني التشبيه في البوست ................... تحياتي للجميع و أعتذر مقدما .
Mohamed Hussein
4 يونيو
قالو عنّك .... قالو عنَّا
قالو فارس جاي يجري
و احنا شاربين من كيعانا
.
يا رئيس جاي بهوانا
لك حدانا صوت و طاعه
و ابتسامه و رقص جايز
بس مش رقص النطاعه
برضو مش تأييد عجايز
.
اللي زيّك حقه يفهم
حبّه أكتر
في القصايد و المعاني
حد تاني مش هنسمح
يبقى فاسد
مش هنسمح
يبقى فاسد حد تاني !!.
.
.
محمد حسين
Mohamed Hussein
4 يونيو
الحمد لله , كنت واحد من اللي شجعو الناس على الإنتخاب في الشهرين اللي فاتو , قلت يا ناس انتخبو السيسي ولا حمدين ولو مش عاجبك ده ولا ده انزل واعمل إكس قدام الإتنين , إنما بلاش تقاطع وتقعد في بيتكو , الحشد كان مطلوب جدا عشان خاطر اللي قاعد لنا بره عالساقطه واللاقطه , 25 مليون كان رقم كويس اوي , كنت اتمنى اكتر لكن 25 كفايه , الرقم بيقول إن المقاطعه كانت فشنك ماتهزش شكل عمليه انتخابيه , فيه دول ومؤسسات لاتعترف إلا بلغة الأرقام , لما تقول لهم 25 مليون والرئيس ب 96 % تبقى حطيت في بؤه ولا مؤاخذه قديمه , هيعترف بيك غصب عنه حتى لو كان كارهك , السياسه عموما مفهاش حب وكراهيه ولا تعرف فاروق جويده
.
.
عبد الفتاح السيسي , قدامك فرصه ذهبيه بجد تبقى زعيم حقيقي مش مجرد رئيس لمصر , الطريق قدامك مفتوح , دعم شعبي غير طبيعي , دعم عربي كامل والشارع معاك , هتمشي عدل ومظبوط هنقول ناصر 2 , هتسمع للألاضيش والطبالين هتبقى نهايتك جنب الإتنين اللي في السجن , الشارع مالهوش عزيز ولا كبير , معركتك الحقيقه هتبقى مع حيتان الحزب الوطني و هوامير الإخوان اللي بيتحكمو في رأس المال في مصر , ممكن تختصر الطريق وتاخدهم في صفك وتبقى اخترت الإختيار التاني أو تقف جنب الغلابه اللي انتخبوك وانت مش محتاج عشان الغلابه والناس الطيبين هما ضهرك وسندك اللي هيحميك وقت الجد .
Mohamed Hussein
4 يونيو
عزيزي الإرهابي
.
عزيزي الإرهابي اللي حاطط الأر بي جي على يمينه والقنبله البلاستيك على شماله و شريط الشيخ كشك في جيب البنطلون و قاعد مستني التعليمات عشان تنال الشهاده , عزيزي الإرهابي اللي فاهم إن حور العين مستنيينه في الجنه ورا باب الريان على طول وهما على أحر من الجمر وكل شويه يبصو في ساعتهم ويقولو هو المجاهد اتأخر ليه , يا ترى المجاهد اتأخر ليه ؟ .
.
عايز أقولك يا عزيزي إن اللي فات ده كان حماده واللي جاي حماده هيدخلوه الجيش عشان يسترجل , و السيسي بقى رئيس مصر الشرعي المنتخب , يعني النفخ بعد كده هيكون رسمي فهمي نظمي , عالهواء مباشرة , واحتمال على قارعة الطريق .
.
إنما إيه شعورك دلوأتي ؟ شعورك ايه بعد ما الشيخ اللي قالك ( الشهداء لهم الجنه ) هرب وراح على قطر عشان يغسل لموزه رجلها بمايه و ملح و يجاهد في قناة الجزيره و فنادقها ال 7 نجوم ؟ يا ترى لسه مصرّ إنك تحارب جيش مصر ؟ طب هتحارب لوحدك ولا مستني فتوى من القرضاوي ( مفتي الناتو والمارينز ) يستدعي فيها القوات الامريكيه و سيده أوباما لضرب مصر ( في سبيل الله ) ؟!.
Mohamed Hussein
4 يونيو
بنات مصر نزلو عن بكرة أبيهم وانتخبو السيسي قام السيسي ماكدبشي خبر وقام معيّن العقيد أحمد على متحدث رسمي بإسم رئاسة الجمهوريه !!, أهو السيسي طلع بيفهم في الزوق والإتيكيت و ماعندهوش نفسنه ولا حاجه , أو جايز الحاجه انتصار ضغطت عليه عشان يخلص من المعاكسات .
طب أنا يا سيسي كنت بأيّدك أنا و رجاله كتيييير , و عايزين حقنا بقى , أيوه عايز سكارليت جوهانسون تبقى المتحدث بإسم وزارة الخارجيه.
Mohamed Hussein
4 يونيو
التاريخ هيفتكره و هيقول إنه واحد من أعظم الرؤساء اللي حكمو مصر , مسك الحكم في وقت ما يعلم بيه إلا ربنا , مشي في خط مستقيم زي ماتفقنا , لا التفت لجعجعه المجعجعين ولا لحشيش النخبجيه والمثقفين , اتعرض لاهانات كتير وتجريح وتطاول ولسانه مانطقش بكلمه واحده خارجه , راجل دخل القصر وهو نضيف وخرج منه نضيف , كان رمز محترم يليق بإسم مصر , أخر قرار خده هو اصدار عقوبه على أي كلب خسيس مابيحترمش علم بلده ونشيدها ( القرار ده لوحده يكفيه ).
.
.............. ألف ألف شكر سيادة الرئيس المصري المحترم : عدلي منصور
Mohamed Hussein
4 يونيو
جزيره الحرمان !!
.
حد من حضراتكو شاف تغطية الجزيره لفرحة المصريين وفوز السيسي امبارح ؟ عرفتو يعني إيه دعاره إعلاميه ولا لسه ؟ عرفتو التقارير ممكن تتفبرك إزاي , و إن مفيش حاجه اسمها إعلام حر ولا لسه ؟ عرفتو يعني إيه قناه لما تحب ( تغطي ) حدث لازم ( تكشف ) ضهرها ؟ عرفتو يعني ايه مليارات بتتصرف على قناه من حكومة زبّالين ؟ .
.
امبارح كان أخر ليله قضتها الجزيره في أحضان الرزيله الإعلاميه وقبلها طبعا أيام وليالي وشهور وسنين ( ماهي دي مش قاعدة أول دُخْله أبدا ) , عندهم بس وعلى شبكة رصد هتلاقي الأخبار بتنزل بطريقه ( كدبه تداري على كدبه تداري على كدبه وهكذا) , يعني السيسي اتقتل , لأ ماتقتلش بس رجله اتقطعت لا ماتقتلش ولا رجله اتقطعت بس هو اتقتل بعد الإنتخابات والفريق صدقي صبحي اللي قتله , السيسي يهودي لا ده جده اللي يهودي ومراته فاتحه شبكة دعاره , انشقاقات في الجيش المصري ,اللوا الفلاني انشق عن جيش الإنقلابيين , وكان أخر ليله قضتها الجزيره في كباريه الورده الحمره هي امبارح لما قالت ( الحزن يخيم على الشعب المصري بعد فوز قائد الإنقلابيين بالرئاسه ) شوفتو الحزن اللي كان مالي الشوارع يا ولاد ؟ شوفتو الصويت والعويل وشق الجيوب اللي كان في الشوارع والميادين امبارح ؟!
.
طب أقول لحضرتك ايه وانت بقالك سنتين تلاته شايفها بتنزل كل يوم من بيتها في نصاص الليالي وترجع بعد الفجر وهي سكرانه طينه وكل يوم وهي راجعه بتشوفها نازله من عربية زبون شكل ( جزيرة الحرمان والكبت ) , ولحد النهارده حضرتك مصر إنها بتشتغل ممرضه ؟ اقولك ايه أنا؟ طب اعتبرك مثقف وذكي واقول انك مستقبل مصر إزاي ؟ يعني أحط مستقبل البلد دي في إيد واحد بيعمل البانجو ساندوتشات و يفطر بيها ؟!.
Mohamed Hussein
3 يونيو
التحرير والميادين بقو مليانين بشر في نص ساعه , زي النمل , والصفحه عندي مليانه زغاريط من الأصدقاء و لا كأنه فرح ابن العمده , وفي الأخر يقولك السيسي جاب 23 مليون صوت منين ؟ يابني انزل بنفسك و عدّ الناس لو مش مصدق .... دي شعبيه تخوّف بجد , ترعب , يارب ما تخيب ظن الناس و عشمهم فيك يا سيسي .
Mohamed Hussein
3 يونيو
يا ترى شعورك إيه دلوأتي يابه عبفتاح ؟ والنبي تلاقيك مبسوط , أيوه غالبا هتبقى مبسوط , شوفت تأييدي لك نفعك إزاي ؟ أنا لوحدي جبت لك بتاع 23 مليون صوت ( لا الفكه دي مجهودات فرديه من عندك ) , ماتنسانيش بقى في شقه حلوه كده في الرحاب , 180 متر أرضي بجنينه و تكون بتبص على بحيرة البط , أصلي نازل مصر نهائي ونفسي أنزل أعوم مع البطه , أه والله , و نكاكي سوا بقى .
Mohamed Hussein
3 يونيو
الزغاريط اشتغلت في القاعه ..إعلان نتيجه ده ولا حفلة طهور .
.....................السيسي رئيس ب 23 مليون و 750 الف , أول مره أأيد حد و ينجح ههههههههههههههههههههههههههههههههه .
Mohamed Hussein
3 يونيو
أنا خلاص كرهت حكاية انتخابات وديموقراطيه وصناديق بسبب أم المقدمات اللي بتتقال قبل اعلان النتايج دي , و أيات قرأنيه و نشكر فلان ونتوجه بالشكر لعلان واحنا اشتغلنا في ظروف ماعرفشي ايه بس احنا قلنا لأ أبدا , لازم نكمل واستحملنا كتير و تعبنا كتير وكنا نقدر إنما لأ إنما أه , .................مقدمة إعلان نتيجة دي ولا مقدمة ابن خلدون ؟!
Mohamed Hussein
3 يونيو
الإخوانجية داليا مجاهد ( مستشارة اوباما ) : الثورة القادمة في مصر لن تكون سلمية ..!!
وانا مش لاقي رد يليق بيها غير كلمه قالها عبد الفتاح السيسي في لقائه مع ابراهيم عيسى , قال عبد الفتاح : ( خيرت الشاطر جالي قبل 28 يونيو وقال لي : هيكون فيه عناصر مسلحه من أفغانستان ومجاهدين من فلسطين و مسلحين من ليبيا وهيكون و هيكون و هيكون) .... و انا بطبعي بخاف !!.
.
ولسه الكولجيه بيتعاطفو مع الإرهابيين , و رئيس جمهورية الضمير اللي بتعتمد الكولّه ك ( رمز مقدس من رموز الدوله لا يمكن إهانته ) بيقول : فصيل وطني !!.
Mohamed Hussein
3 يونيو
إنت يابني عايز ديموقراطيه ولا مش عايز ديموقراطيه ؟......... أيوه عايز ديموقراطيه.
.
طب عايز مرشح مدني منتخب صح ؟ ....... أيوه عايز مرشح مدني منتخب صح.
.
طب عندك مرشح مدني ينزل انتخابات ؟ ............. عندي كتير .
.
طب تضمن له يجيب بس 10 % وتساندوه وكده ؟ ....... لأ 10 % كتير أوي .
.
طب عايزه يبقى رئيس إزاي ؟ نعمل انقلاب مدني منتخب مثلا عشان يبقى رئيس ؟ ......... لأ انا مش بحب الإنقلابات أنا عايزه ييجي بالصناديق والديموقراطيه.
.
طب يابني نجيبه إزاي وانت لسه قايل مش هيجيب حتى 10 % ؟ ...........ماليش دعوه , لازم الدوله بنت الحرام والإعلام ابن الصرمه والجيش ابن التيت والشرطه بنت ال (عسل ) و المخلوقات الفضايئه وكل مؤسسات الدوله يقفو معانا احنا ومع مرشحنا لحد مايبقى رئيس والكل يساندنا عشان نجيب رئيس بيمثل الثوره .
.
أه بس فهمتك فهمتك فهمتك , إنت عايز رئيس مدني منتخب بطريقة التعيين !!.
Mohamed Hussein
3 يونيو
حوار عالشات
.
الزوج : ازيك يا حبيبتي وحشتيني
الزوجه : وانت كمان وحشتني اوي
الظابط المراقب ( في سره ) : ممممممممم شكلها هتحلو كده
.
الزوج : طابخالنا ايه النهارده يا حياتي
الزوجه : عملت المحشي زي مانت طلبت بس تعبني اوي
الظابط ( في سره ) : انتي يا ستي مش لسه طابخه محشي من اسبوعين , أومال انا مراتي بتطلع عيني على بال ما تعملي محشي ليه ؟
.
الزوج : طيب حبيبتي انا مش هتأخر بقى
الزوجه : خلاص , هقوم اجهز الغدا اهو على بال ما تيجي
الزوج : استني استني , ماتنسيش تعملي حساب حضرة الظابط اللي بيراقبنا معانا عالغدا , الراجل بقاله 9 ساعات قاعد و زمانه على لحم بطنه , اتفضل معانا لقمه على ما قسم يا حضرة الظابط
.
الظابط ( بيكتب عالشات ): لا والله انا متغدي من بدري , تسلم يابو الزوق والواجب
Mohamed Hussein
3 يونيو
إحنا متراقبين !!.
.
- زي أي بني أدم عاقل عنده لحم ودم برفض تماما فكرة المراقبه عشان باختصار فيها انتهاك لأدمية الإنسان وحريته , برفض المعنى الشامل لكلمة مراقبه , حتى كاميرات المراقبه اللي عندي في الصيدليه بقرف منها مع إنها معموله عشان الزبون اللي داخل يبلطج أو يسرق , بس فكرة إني أكون باكل ساندوتش أو بتكلم في الموبايل وفيه كاميرا بتراقبني هي فكره بلتاجيه مقرفه .
.
- الداخليه أعلنت إن حسابات الفيس وتويتر في مصر متراقبه عشان أسباب معينه أو كلمات معينه زي قنبله وصاروخ ( و مزه وكرباج !! ) , وانا رأيي الشخصي هقوله باختصار : ( إنت كداب يابو صلاح ) , ماهي لو دي داخليه تقدر تراقب مكانشي وزيرها حضر صوانات عزا أكتر ماحضر اجتماعات , دانا حتى رأيي إنهم ينقلو مقر وزارة الداخليه لعمر مكرم عشان مانتعبش سيادة الوزير في المواصلات رايح جاي .
.
لسه لحد النهارده المخبر بيقعد عالقهوه ماسك جرنان مخروم ولابس بالطو قديم وقال يعني كده متنكر , والواد خيشه صبي القهوه يجيله على الساعه 12 بالليل يقول له الحساب يا حضرة المخبر عشان عايزين نقفل القهوه !! .
.
- إنما أكتر حاجه هلكتني ضحك من الهري بتاع امبارح وكل واحد كاتب احنا متراقبين هي دي : فجأه كده بقى الناس كلهم مهمين دوت كوم , مستهدفين دوت نت , زعماء دوت أورج , ممممممممممممم يا بني هو احنا بنعمل ايه على أم الفيس ده غير اننا بنكتب النهارده الهري اللي كتبناه امبارح وبكره هنكتب الهري بتاع النهارده وحماصه هيبقى زي سعيد ونوسه زي ابتسام , وبنلعب كاندي كراش ونعاكس المزه , ماهو يابيه لو قبضو على كل واحد بيلعب كاندي كراش و بيعاكس المزه بتاعته تبقى البلد كلها هتبات في الكراكون .
Mohamed Hussein
2 يونيو
اللهم وفّق عبدك الضعيف سيادة الرئيس عبد الفتاح السيسي و وزير داخليته سيادة اللواء محمد ابراهيم إلى ماتحبه وترضاه , اللهم سدد رميهم و اجمع شملهم وارزقهم بالبطانه الصالحه ( اللي هي موجوده فعلا ) , اللهم أمين .............. #احنا_متراقبين
Mohamed Hussein
2 يونيو
غرامك قصه محسومه
بقلب نضيف مايعرفشي
لا زيف ولا غش
.
و كان نفسي أنا اكتب لك
حروف ديبانه من دوبي
و أسْمع بعض مكتوبي
بصوت سومه
لكن معلش !!.
.
يا مصر
قولي لي من فضلك
مريض بيكي
و مش عارف دوايا منين ؟
و كام عاشق وكام شاعر
كتب عنك وقال فيكي
كتاب واتنين ؟!
.
يا شجرة توت
و نسمة تفوت على توبي
تطبطب حبّه و تسلِّم
و ليه بعرف كلام عشّاق
و ناس جامدين
و عندك ببقى خيبه و طين
و عيّل لسه بتعلّم ؟!
.
دانا مرّه
عملت حكايه من ذهني
و من عقلي وترتيبي
و قلت اكشف
و اشوف في الكشف ترتيبي
و رقمي الكام ؟
لقيتني بعيد وأيّ بعيد
في كشف الصبّ والعاشقين
أنا واحد من الخايبين
مانيش واحد من الشطّار
و قال الكشف يا حبيبتي
و قال إسمي رقم مليار !!.
.
محمد حسين
Mohamed Hussein
2 يونيو
حكومة حماس سلّمت و رفعت الرايه البيضا , وعمر البشير رجع لورا الخط الأحمر بمترين تلاته و واقف انتباه , سيبك من الهلفطه بتاعة زمان بقى , السياسه لا تعترف إلا بالأقوياء , يا بني عبد الفتاح السيسي ده كان راجل بتاع مخابرات مش بتاع بليله !!.
Mohamed Hussein
2 يونيو
قال الفيلزوك
.
صديق عزيز 1: مش عيب تبقى راجل صيدلي كده وتشتغل طبال للسيسي !! ................... ده اللي هو أنا ؟ بس ماتقولشي طبّال , قصدي ماتقولشي صيدلي قصدي ماتقولشي راجل !!.
.
صديق عزيز 2: شموخ ايه وعزه اللي بيبان فيها السيسي في الصور وهو بيرفع البنطلون لحد صدره !! ......... مممممممممممممم طب حضرتك هي حكاية رفع البنطلون دي لها علاقه بالديموقراطيه و ألياتها ؟ يعني لها علاقه بال democracy ?
.
صديق عزيز 3 : انت ماسك العصايا من النص وبتقول بأيد السيسي وبحترم حمدين وده كله عشان اللايكات , لأ لأ دانت بقيت مؤيد صريح للسيسي وده كله عشان اللايكات !!....أيوه يا صاحبي عندي اقساط شقه وبجمّع اللايكات عشان أكمل القسط الجاي .
.
صديق عزيز 4 : فيلم المندس بيفضح الفلول والعسكر من أيام الثوره وانت ازاي مش عايزني اتفرج عالجزيره ؟! ............. لا يا عم اتفرج , بس الفرجه عالجزيره لها أصول , يعني مثلا حضرتك لازم تقفل الباب عليك كويس وماتسمحشي للولاد الصغيرين اقل من 18 سنه يدخلو وتطفي النور وتاخد التلفزيون على حجرك , و ممكن تقلع في الأول أو تقلع في النص براحتك بقى.
.
..........................................
..........................................
الحكايه باختصار عشان بس نحافظ على المراره و نترحم شويه من المرار
.
1- اصدقائي الثوريين والثورجيه والثوار والثائرين وكل كلمه فيها حرف ال ( ث) , كل اللي بعمله عالفيس اني بحط حضرتك قدام نفسك في مرايا واحيانا كتير بضربك قلم صغير عشان تفوق , اللي بيوجعك ويلسعك اوي اني بضربك القلم بإيدك مش بإيدي , عشان كده ده اسمه اسلوب لاذع أو لاسع !!.
.
2- قوة الثورجيه واحزابهم وحبشتكانتهم انت بنفسك تقدر تحددها , لا نافعه في أي انتخابات ولا لها وجود في الشارع وكل زعييم ( بين قوسين ) من زعماء الثوره وزعماء الأمه خد له بتاع عشرين الف واحد وعايز يعمل بيهم دوله على مزاجه !! , عشان كده حضرتك رافض الإنتخابات وهترفض أي انتخابات جايه عشان عارف ان أخرك فيها صفر , الحاجه الوحيده اللي تقدر تعملها هي انك تثور والثوره يعني الهد والهد مفيش أسهل منه , يتهيألي احنا ثورنا وهدّينا في 2011 وكانت مشكلتنا اننا ماعملناش حسابنا مين اللي هيبني بعد ما نهد ؟!.
.
3- مستقبل مصر مش دور كوتشينه هنلعبه عالقهوه واللي يخسر يحاسب عالمشاريب , عشان كده انا مع ثورة 30 يونيو تماما , عشان لقينا فيها الشعب اللي يهد والرئيس اللي يبني , جايز مايكونشى بنَّاء محترف زي ما حضرتك عايز وجايز مايكونشي هيبني المبنى بنفس الرسم الهندسي اللي انا وانت بنحلم بيه لكن يكفيه إنه بيعرف يمسك ( المسطرين ) ويشمّر دراعه ويشيل المسئوليه ويبني .
أنا أصلي تعبت أوي من فكرة البنّا اللي قاعد يبني مستقبل مصر بقلم ماركر على سبوره بيضا وهو قاعد عالبيسين في أحد قصور فيينا !!.
Mohamed Hussein
1 يونيو
طب تصدقو بقى ؟ أنا شوفت صور كتير لابويا الحاج المشير الرئيس عبفتاح السيسي , أيوه الراجل الكبير بتاعنا اللي بيجيب لنا اللحمه البتلو , كل صوره فيهم تحس إن فيها عِزّه كده و شموخ , أسد واقف قدام الكاميرا , الصوره الوحيده اللي حسيته فيها كاشش و كمشان هي صورته مع مراته !! حتى أنتَ يا عبفتاح ؟!............. الست المصريه لها هيبه برضه يا جدع , ربنا عالمفتري .
Mohamed Hussein
1 يونيو
أدوات النصب وشيوخه .............. أرجوك حاول تفهم , مفيش وقت , الوقتُ يدهمُنا !!.
.
- في افلام الرعب الأمريكي بتلاقي شوية بيض شكله جميل كده بس بتاع حيوانات مفترسه والبيض ده فضل مرمي في كهف من الكهوف مئات السنين لحد ما جت ظروف جويه مناسبه ( يعني شوية حراره على شوية رطوبه مثلا ) والمهم البيض فقس وطلعت منه الحيوانات المفترسه دي ............كويس كده ؟.
.
- اللي حصل إن من أد 25 سنه كده بدأت قناة اسمها الجزيره , شوية برامج واخبار على كيف كيفك , وجود مستمر في مواقع الحدث , مصداقيه زي الكتاب ما بيقول , ملايين ومليارات بتتصرف عالحكايه دي , واحنا مالنا يا موهيي , كده حضرتك اقتنعت تمام ( يعني بقيت زبون بمعنى الكلمه ) , بعد سنه واتنين وتلاته بقت الجزيره بالنسبالك نبي ( لا ينطق عن الهوى ) , شويه بقى وجه الوقت المناسب ( ثورة يناير ) والظروف المناخيه اللي سمحت للبيضه تفقس ويطلع منها الحيوان المفترس .
.
هبسطهالك شويه : في قريه من القرى كان فيه ناس بيبنو جامع وجمعو من بعض 20 الف جنيه , فجأه جالهم رجل غريب ( لابس أبيض فابيض ) وقال لهم انتو بتعملو ايه ؟ قالو له بنبني جامع بس جمعنا مبلغ قليل أوي , قال لهم طب خدو 50 الف مني عالفلوس اللي معاكو وكملو بقى تمن الجامع من بعض وهجيلكو بعد اسبوعين ( المصداقيه ) , الناس فرحت بالراجل الطيب الكريم واتشجعت و جمعو 100 الف كمان وبقى معاهم 170 ...الراجل جالهم بعد اسبوعين فعلا قالو له معانا 170 , قال لهم لا كده مش نافع خالص , هاتو ال 170 الف دول وانا هبني لكو الجامع على حسابي , وخد منهم الفلوس وهرب ( الحرامي ) !!.
.
قبل ثورة يناير كانت الجزيره هي الراجل الطيب اللي كسب مصداقية الناس ولما بدأت الثوره كان الجو مناسب للبيضه انها تفقس و يخرج منها الحيوان المفترس ( الحرامي ) اللي شوه عقول الناس اللي صدقته .
.
.............. نهايته , والنبي يابه الحاج , أحبّ على إيدك مفيش وقت , مش أي حد يديك حاجه صفره تشربها تقوم شاربها على إنها حلبه حصى !!.
Mohamed Hussein
1 يونيو
لسه فيه مصريين بيتفرجو عالجزيره , أه والله , إنت مش مصدق ؟ طب وعهد الله لسه فيه مصريين بيتفرجو على قناة الجزيره , مع إن القناه دي عملت كل حاجه ومش باقي غير إن المذيعين والمذيعات اللي فيها يطلعو عالشاشه و هما لابسين قمصان نوم حريمي لونها بامبي و يحلفو بأيمانات الكُفار و باللات والعزى وهبل إنهم شغالين في كاوليه للدعاره الإعلاميه مش قناه ولا حاجه , بس برضه وقتها هتلاقي مصريين قاعدين قدام الشاشه ويقولو لهم لأ , ماتقولوش على نفسكو كده , إنتو حد جميل و بيشتغل ممرضه !!.
Mohamed Hussein
1 يونيو
المثقف الحمار
.
- ميرفت التلاوي طرقعت لوفد الإتحاد الأوروبي و طردته تقريبا, ولو عايز حضرتك تفهم ان السياسه داخله برجلها اليمين في كل حاجه من أول الإنتخابات لحد اللقمه اللي بناكلها و الهدمه اللي بنلبسها هقولك .
.
1- الوفد الأوروبي قال تجاوزات حصلت اثناء الإنتخابات وتحرشات جنسيه !! , سيبك من الأولى وركز في التانيه وانت تعرف قصدي , الوفد عارف هو بيخاطب أنهي شعب وايه اللي بيوجعه , يعني لو دي انتخابات في اليابان مش هيقول تحرش حتى لو حصل................ حاول تفهم .
.
- لما السيسي قال لمبات موفره طلع بحث علمي غربي تاني يوم بيقول اللمبات الموفره بتجيب سرطان ( و اسهال تقريبا ) , فبلاش والنبي تاخد كل حاجه مكتوب عليها بحث علمي من فوق على انها تمت في معمل و عملها علماء لابسين بالطو ابيض ونضاره قعر كوبايه , لأ مش شرط , أصغر عيل في أوسخ جهاز مخابرات أمريكي هينشرلك بحث علمي موثق بالتجارب والصور إن البتنجان الأسود فيه ماده مضاده للأكسده ولو محصول البنتنجان الأسود انضرب في أمريكا هيتغير البحث وهيبقى الكلام عن البطاطا ........... حاول تفهم .
.
- شركات الأدويه العملاقه بتنشر على صفحاتها فقرات عن مشاريعها الخيريه في العالم وكيف أنها تبنّت رعاية الأطفال المعاقين في تنزانيا و الفقراء المعدمين في الكونغو وهكذا ....في الوقت اللي أغلبهم بيشتغل في تجارة السلاح والحروب و حتى التجاره في الأمراض والفيروسات ............... حاول تفهم .
.
مراكز حقوق الإنسان ومنظمات المجتمع اللامؤاخذه المدني هتلاقيها بتسب وتلعن في اللي بيحصل في مصر وفي نفس الوقت بتشيد بالتجربه الديموقراطيه في العراق بعد ما الأمريكان خربوها مداين...... حاول تفهم .
.
- الخلاصه عايز أقول , مصيبتنا السوده هي إننا بنصدق أي حاجه حبذا لو مكتوبه بالإنجليزي !! , التقارير والمنظمات والهيئات والحبشتكانات مش ملايكه نازلين من السما فحاول والنبي تقرا وانت دماغك شغاله يعني تفكر وانت بتقرا , عشان احنا بجد بجد بجد هرمنا من فكرة المثقف الحمار !!.
Mohamed Hussein
31 مايو
و بعد 3 سنين من الشد والجذب و المد و الهد , وبعد ماشوفت عقول النخبه والمثقفين و المعارضه و معارضة المعارضه واللي مش معارضه بس عاملين نفسهم معارضه و بعد ما كتبت ألاف البوستات و قريت ألاف المقالات واطّلعت على أوراق القضيه بالكامل بحيثياتها و أبعادها , وبعد ما سمعت شهادات من شهود الإثبات و شهود النفي و بعد ما طلعت مع البرادعي لسابع سما و نزلت على جدول رقبتي و بعد ما سهرت ليالي مع حمدين وقلت النوم كان احسن , وبعد ماستنّيت أنهار العسل بتاعة الإخوان وانا ماسك الكوز في إيدي كداهو و بعد ما ركبت في الكرسي الوراني بتاع ميروكباس خالد على وقعدت شهور و الميكروباس مش بيكمل , قررت إني أغيّر الحلم اللي كنت بحلمه , بلا حياه ديموقراطيه لولبيه حلزونيه بلا تكتّل لمعارضه مدنيه محترمه بلا بطيخ , دلوأتي هحلم حلم جمييييل أوي على أدي , بحلم إن ربنا يرزقني بولد و بنت , الواد هسميه ( فسواني ) و البت هسميها ( بَعْليصه ) و يارب يارب يارررررررب أكبر لحد ماشوف فسواني ابني و دراعي اليمين و عكّازي لابس بدله و واقف معايا وقفة راجل في فرح أخته بعليصه .
Mohamed Hussein
31 مايو
علاء الأسواني بيشبّه اللي حصل في انتخابات الرئاسه بمباراه بين الأهلى والزمالك وان الأهلي كان متقدم بس الحكم ( عشان زملكاوي ) عمل شوط تالت عشان الزمالك يفوز !! ممممممممم ياراجل إذا كان نادي الأهلي نفسه اعترف بالهزيمه الساحقه في بيان رسمي مختوم و متوثق .
وانا كل مافتكر إن دول النخبجيه بتوع مصر اللي كنا بنمشي وراهم أقول اللهم ارفع عنا سخطك و غضبك والزلازل والبراكين والجراد و القُمَّل و النخبجيه !!.
Mohamed Hussein
31 مايو
و لسه بيبدأو الفرز و قالو السيسي عدّى 90 % و عدّى ال 20 مليون صوت قام عمر البشير رمى حتة الطمباك اللي في بؤه والعصايا اللي في إيده وقال : إحنا علاقتنا كانت وحشه بالإخوان , عليا الطلاق مابحب مرسي ولا بطيقه , ألف مبروك ياريس سيسي , و حلايب مصريه ميه في الميه ولو عايزين أم درمان كمان خدوها .... أنا عايز أعيش !!.
Mohamed Hussein
31 مايو
لو فكرتو كويس هتلاقو ان فيه حلّين اتنين بس يضمنو لمصر الإستقرار والرخاء التام
.
الحل الأول : هو المصالحه , أيون المصالحه
.
إحنا نروح قصر الرئاسه و نصالح السيسي عالبرادعي وبعدين نطير على فيينا نصالح البرادعي على حمدين وبعدين نطلع على بلطيم نصالح حمدين على خالد على وبعدين نروح المندره بتاعة خالد على اللي بيعزم فيها أنصاره ونصالحه عالسيسي وبعدين نرجع قصر الرئاسه تاني ونصالح السيسي عالإخوان و بعدين نطلع على قطر ونصالح الإخوان على البرادعي و هكذا لحد مانفسنا يتقطع , و على رأي سمير غانم إحنا نشتري كتاكيت ونربيها والكتاكيت دي تكبر وتبيض و تفقس تطلع لنا كتاكيت جديده تكبر وتبيض وتفقس ونفضل كده نبيض ونفقس ونبيض ونفقس لحد ماتتم المصالحه .
.
الحل التاني :
إننا نقف ورا السيسي الرئيس المنتخب ب 23 مليون صوت و نحط ايدنا في إيده و نحاول نبني البلد دي بجد , ونسيب كل كتكوت في عشته يبيض ويفقس براحته , وهو الكتكوت لما يعرف إن الحدّايه قربت من العشه هيجيلنا لوحده ( ده إذا عرف أو فهم أو حس ) .
ورد في الأثر : إن الحمار هو أول المخلوقات اللي بتعرف تتنبأ باقتراب الزلازل وإن الناشط السياسي المصري هو أخر المخلوقات دي , يعني الحمار بالنسباله يبقى أينشتاين .
Mohamed Hussein
31 مايو
أحلى حاجه في حبايبي واصحابي البرادعاويه والنحانيح إن عندهم حل لكل مشكله , أي مشكله تخص البلد حلها موجود عندهم و بوضوح وشفافيه تامه
يعني مثلا :
.
لو سألته هتعملو إيه في البرلمان الجاي ؟..... يقولك الحل هو :*ثلثقخحاعضاثاعاهاهحعشبايبعهاا * #عبث
.
طب نعمل إيه مع الإخوان ؟... هيقول لك الحل هو :
*/*/*/*/*/*/*/ ضثالفعضالعضاحتثعلاضعحه #موجهه
...........................
إنما رأيي أنا الشخصي في البرادعاويه الحاليين ( رفقاء الأمس ) إنهم وباختصار ومن الأخر يعني : هخبثتتلثقختلضاالضعللحاضع #تيت حصثتبخحهصضتختقخ.
Mohamed Hussein
31 مايو
من وحي الإنتخابات الرئاسيه
.
- لو حصل يعني و رئيسة حزب الدستور راحت لحمدين صباحي البيت و قالت له عايزين نعمل تكتّل مع التيار الشعبي عشان الإنتخابات البرلمانيه اللي جايه , هيقوم حمدين يقول لها ( تكتّل دي تبقى امك ) , و يجري وراها بالشبشب في الشارع .
Mohamed Hussein
31 مايو
روبرت فيسك بيلسّن بالكلام على ابويا الحاج عبفتاح , بيقول ( الديكتاتور العربي الجديد ) !! .
أيوه يا عم روبرت إحنا شعب لعين يا أخي , شعب نزل الشارع عمل انقلاب ونزل يصوت في الإنتخابات قام جاب ديكتاتور !! حلوه الجمله دي يا حاج فيسك ؟ حلوه شعب نزل الشارع عمل انقلاب دي ؟ مع إن الشعب لما ينزل الشارع بيبقى اسمها في الكتب بتاعتكو ثوره , طب حلوه الجمله التانيه دي : شعب نزل يصوت في الإنتخابات قام جاب ديكتاتور ؟ مع إن الشعب لما بينزل يصوت في الإنتخابات بيبجيب رئيس منتخب حسب الكتاب بتاعتكو برضه , شكلك ماقريتشي عن الديموقراطيه من أيام الغزو الأمريكي البريطاني للعراق يا مولانا , وعشان كده انت وأمثالك منبهرين بالديموقراطيه الأمريكاني في العراق أو بمعنى أصح منبهرين بخرابها , أه لو عبفتاح السيسي وصل للحكم على ضهر دبابه أمريكاني كان زمانكو بتقولو نيلسون مانديلا الجديد .
.
إنما هو السؤال اللي محيرني بجد , هو روبرت فيسك يقرب لعزمي لامؤخذه بشاره ولا هي الحكايه تشابه أسماء محفوظ ؟!.
Mohamed Hussein
30 مايو
سرحت كده بخيالي و قلت هي مصر دي اتكتب عنها كام ألف كتاب و كام ألف ديوان شعر ؟ كام ألف شاعر و مؤرخ و درويش طافو في شوارعها وحواريها وتاريخها وكتبو كلام ؟ كام مليون كلمه وحرف ؟ كام ألف عود وناي و ربابه ؟ كام ألف مدّاح وعاشق وصوت طالع من القلب ؟.
و بعدين بقى قلت لنفسي هو لو فيه شاعر قطري حب يكتب قصيده عن قطر هيكتب فيها ايه ؟ هيجيب كلام منين ؟ أكيد هيكتب بيت ونص عن قطر وبعد كده مش هيلاقي كلام فيقوم مكمّل بالسعوديه والإمارات ومجلس التعاون الخليجي وعلى بال مايكون كمل قصيدته يكون وصل حدود تنزانيا !!
.
أنا إنْ قدَّر الإلهُ مماتي ..لا ترى الشرقَ يرفعُ الرأسَ بعدي .
Mohamed Hussein
30 مايو
رساله إلى الرئيس ...... رقم 1
.
عبفتاح يا والدي اسمع كلام ابنك الكبير محمد , لو فيه أي مخرج قانوني لتعديل قانون التظاهر بشكل يحفظ هيبة الدوله ومصالح الناس و لو لك صلاحيات في كده اعمله كأول قرار , اعمله عالأقل من باب سد الذرائع على المغيبين اللي نظرهم تحت رجليهم , وبالتالي هيطلع شباب كتير من اللي اتحبس بسبب قانون التظاهر , إنما مش عايز تدخّل مباشر للإفراج عنهم حتى لو عندك صلاحيات العفو المباشر , دي أول حاجه تقطّعها وترميها , عشان مَنْ يملك حق المنح يملك حق المنع وانا مش عايز ديكتاتور جديد بإسم الإنحياز للثوره ولا حتى بإسم اللبّان .
.
عبفتاح يا والدي , فيه شوية ناس حواليك بيتنططو و لولاهم كان زمان ال 24 مليون صوت بتوعك بقو 30 بالمستريح , ناس مؤيدين وكل حاجه إنما عاملين شبه أسلحه فاروق بيضربو لورا , يعني تأييدهم يهينك مايشرفكش , إنت عارفهم بقى والعارف لا يُعرف , هات بكرة سوليتيب من بتاعة الكراتين واقفل بؤهم وخليهم يقعدو في البيت , , عشان هيتحسبو عليك في النهايه وانت مش هتستفيد أي حاجه لما تستفز مشاعر الناس , أه والنبي يابويا البت المذيعه اللي لابسه سلسله دهب على صدرها مكتوب عليها السيسي دي أول واحده تقعد في بيتهم وتاخد منها السلسله عشان خاطر مصر .
.
عبفتاح يا والدي , العيال الثورجيه والكولجيه هما في النهايه عيالنا , والضنا غالي , صح ضايعين في البلاله وشاربين ماية الطرشي وعاملين بيها أحلى دماغ إنما تقدر تكسبهم في صفك عشان خاطر البلد دي , هما مش كتير , بتاع مليون ولا حاجه يعني مش محصلين اصواتك في المنوفيه وبالتالي لا هينفعو يحكمو في يوم من الأيام ولا حتى هينفعو يعملو معارضه عليها القيمه إنما يعرفو يهدّو , ماهو الهد مفيش أسهل منه , شاكوش و أجنه وفاس أردني تهد بيهم أتخن بيت , الصعب إنك تبني , خدهم معاك و خليهم يبنو , خدهم في حضنك بدل ما الإخوان يركبوهم كالعاده .
.
اللي طلبته ده مش كتير يابه عبفتاح , ولا محتاج أبار بترول تظهر في ميدان رمسيس ولا جبل عسل و لا بحيرة مربى , اللي طلبته محتاج راجل واعي وحكيم مش أكتر , اسمع كلامي بقى ده المثل حدانا بيقول ( إن كبر ابنك خاويه ).
Mohamed Hussein
30 مايو ·
الناس مقامات برضه
.
بوتين يهنئ السيسي بفوزه بالإنتخابات الرئاسيه في مصر !! و بكره ولا بعده هتلاقي وفد من الإتحاد الأوروبي جاي يبارك ... مممممممم الله يمسيه بالخير مرسي أول ما بقى رئيس جت له مكالمة تهنئه من البلتاجي و وفد من المهنئين والمباركين من كوادر الجماعه فرع السنبلاوين ( أه طبعا اتغدو في القصر قبل ما يرجعو , إحنا ناس مايفوتناش الواجب ) .
Mohamed Hussein
29 مايو
يا ولاد , يا رجاله , يا بنات , تعالو عايز أقول لكو على حاجه مهمه أوي و سر خطير
.
بقى أنا كان نفسي أطلع واد نخبجي مثقف طحن بقول ( عبث و موجهه ) واقرا رواية الفيل الأزرق و كتاب الأسود يليق بك للكاتبه أحلام بتستعماني ياهرم , واكتب في بوست ( يقرأ : الحب في زمن الكوليرا لجابريل ماركيز ) و في بوست تاني ( يشعر بالسلام مع النفس ) , أنا أعرف السلام مع اسرائيل بس , إنما للأسف للأسف مجموعي ماجبش , أصلي أعلنت تأييدي للسيسي وبما إني أيدت السيسي أو حمدين يعني ماقاطعتش أبقى من عامة الشعب و الغوغاء والدهماء و المتسلّقه ( ده رأي النخبه المثقفه المقعره فينا ) .
.
و بعدين و بعد مانفعلت شويه كده وهديت قلت وماله ؟ دهماء دهماء , وايه يعني لما أبقى غوغائي متسلق ؟ خدوهم غوغائيين يغنيكو ربنا , ده حتى الغوغائيين بيبقى دمهم خفيف مش إتمين كده زي العيال بتوع ساقية الصاوي اللي بيشيلو الموبايل و يقولو في نص الكلام how come ? .
عشان كده قلت أعزم حضراتكو كغوغائيين أمثالي عالبوست ده , عيشو حياتكو بقى , غوغائيه في حب مصر , اللي عايز ياكل بصل ورنجه و ينفخ في وش اللي جنبه ماشي , واللي عايز يقرقض في ضوافره يقرقض , واللي عايز يقعد وشعره منكوش ولابس شبشب فرده وفرده مايضرش , و كل اللي نفسه في أي حاجه من الحياه الغوغائيه الدهمائيه البوهيميه يعملها .
...............................................
ملحوظه : هذا البوست للغوغاء والدهماء فقط وال 24 مليون المؤيدين للسيسي و حمدين ويمنع منعا باتا دخول المثقفين والنخبجيه ( النخبجيه اشتكو من كُتْر مراسيلي ).
Mohamed Hussein
29 مايو
هتلاقي واحد كده بيروح المؤتمرات الخارجيه و اللقاءات الثنائيه مع قادة و زعماء العالم وهو فارد عوده و راسه مرفوعه لفوق عشان هو رئيس مصر , مش هيقبل إن رئيس مصر يقابله في دوله أجنبيه عمده قريه , مش هيهلفط بالكلام عشان عارف إنه رئيس مصر ماينفعش يبقى عبيط و برياله و أضحوكة العالم , مش هيستنى تعليمات تجيله من مكتب فلان ولا علان عشان عيب رئيس مصر ياخد تعليمات , ... باختصار هتلاقي واحد مصري اسمراني خد شويه من شموخها و هي رضيت عليه فبقى رئيس ............. وهي دي كل الحكايه .
Mohamed Hussein
29 مايو
ولسه ماقولناش يا هادي قام طلع لنا عمر عفيفي وقال إن منصب رئيس الجمهوريه شاغر ( يعني مطلوب واحد رئيس جمهوريه حسن المظهر ممشوق القوام يجيد الأله الكاتبه ) و بسلامته بيجهّز الرجاله لثوره تالته , بلا انتخابات بلا بطيخ , مممممم هات إيدك كده يا حاج عمر , أيوه انا عارف انك في أمريكا بس حاول تمدها بس , و شبكة العشره دول أنا نفسي تنزلو في ثوره تالته فعلا , عشان الناس تاكلكو بسنانها في الشوارع و نبقى ندوخ احنا بقى عشان نطلع حقوق الشهدا من بين سنان الغلابه و الناس الطيبين .
.
ليست هناك تعليقات:
إرسال تعليق