|
|
مشهد ليل داخلى:-
-غرفة واسعة بها مكتبة ضخمة، و يتوسط سقفها نجفة اثرية عملاقة، نلاحظ أدخنة تتصاعد من سيجار يمسكه شخص ضخم الجثة يجلس على مقعد جلدى وثير ، لايظهر من الرجل سوى يده والسيجار ، حيث يجلس معطيا ظهره للكاميرا. يدخل رجل عريض المنكبين ، ويرفع صوته قائلاً فى فرح بالغ:- الخطة ماشية زى الفل يابرنس...انت دماغك دى إيه الماظات...عينى عليك باردة. يصدر الرجل الجالس على الكرسى ضحكة مجلجلة ويقول:- الاغبيا فاكرين انى خيال مآتة لابيهش ولا بينش ، مش عارفين انى انا اللى كنت وراء ثورة يناير ، وانا اللى وصلت الاخوان للحكم، وبعدين خليت الناس يكرهوهم، فطلعوا وعملوا ثورة 30-6 ، الاخوان رجعوا للسجون ، والبرادعى هرب ، و عملت مهموز امبارح ف السيسى لما خليت ال سى بى سى يمنعوا حلقة باسم...انا عبقرى والمصحف ، مع ان الموضوع ده اتهرس ف 100 فيلم عربى، وكل مرة يطلع الجناينى هو زعيم العصابة ...بس ماحدش خد باله كالعادة. لحظة سكوت ، ثم يدير الرجل الكرسى ليواجه الكاميرا، يسلط الضوء تدريجيا فوق وجه الرجل ، ليظهر للمشاهدين وجه " عدلى منصور " وهو يضحك فى هستيريا ويقول :- أنا عدلى يالطفى.. |
ــــــــــــــــــــــــــــــــــــــــــــــــ
صيغة
( أفعل من ) من الصيغ اللى خدت حقها فى اللغة العربية، بيستخدموها للتفضيل
، يعنى هتلاقى جمل كتير زى :- أكذب من مسيلمة -أغزل من إمرئ القيس - أجود
من حاتم - أذكى من إياس - أبصر من زرقاء اليمامة .
لو استخدمنا الصيغة دى على شخصيات مصرية معاصرة هتكون كده:- أهطل من مرسى - أجبن من صفوت - أسقع من العريان - أقصر من الببلاوى - أسكت من عدلى . |
عاوز طاقة ترجع بيها مرسى؟؟!
هات 5 عربيات نقل ووصلهم بكابل بطارية ، وامسك الناحية التانية هات فرقة مزيكا تحمسك وكمان 4 كلاب روت وايلر كلهم اسمهم ماكس ،عشان لو فكرت تراجع نفسك ولا حاجة. حط الكابل تحت باطاتك...خد نفس...وقول لعربيات النقل تدور. أو بلاش تعمل ده كله...واستمر فى أكل العلف. |
___________________________
قابلت "تشى جيفارا "وقد انتهى من التسوق ، كان يحمل تحت باطه بطيخة و بيده ربع لانشون ، و علبة شاى ليبتون خرز، كان متبرماً لأنه لم يجد السيجار الذى يفضله.، فحاولت تهدئته، فقال فى ضجر:- يعنى ايه مفيش سيجار؟؟ ماتخلنيش اقول انه انقلاب بقا ع المسا.
قلت :- انقلاب ايه ياعم تشى...انت اخوان ولا ايه.
قال : ياعم انا شيوعى ، وبعدين الاخوان مابيشربوش سيجار ...بيلبسوه بس.
قلت له:- مش انت اللى قلت برضو" ان الطريق مظلم وحالك..فاذا لم تحترق انت وانا من سينير الطريق". استحمل شوية ياعم.
قال لى:- ياعم انا بقالى سنتين ف البلد دى ، خلتونى اكره الثورة واندم انى كنت ثائر فى يوم م الايام.
قلت:- يعنى انت مع الاخوان ولا مع السيسى ولا مع النحانيح؟
قال:- اللهم طولك ياروح...يا ابنى انا مع دماغى...انا مش خروف تابع لاى حد.
قلت :- شكلك طابور خامس ياجيفارا
رد فى عصبية :- اتصدق انك ابن تيييييت ...غور من وش أمى دلوقتى ، خلينى اشوف توكتوك يوصلنى.
ـــــــــــــــــــــــــــــــــــــــــــــ
ملحوظة مهمة :-
الاخوان فى عهد مبارك كانوا بيحضروا المحاكمات بتاعتهم عادى جداً ومن غير مايوصفوا القاضى انه قاضى غير شرعى ، على الرغم إن مبارك الفاسد هو اللى معينه ، وعلى الرغم ان مبارك اصلاً ومن وجهة نظرهم رئيس غير شرعى للبلاد لأنه جاى عن طريق التزوير. يعنى نفس الظروف تقريباً...يبقى ليه المحاكمات بتاعتهم زمان كانت فلة شمعة منورة ، ودلوقتى بقت محاكمات غير شرعية فاسدة؟؟ باختصار ياصديقى...لأن الاخوان ومبارك كانوا بيلعبوا لعبة علينا...مبارك كان بيديهم حتة صغيرة من التورتة، وهما يمثلوا انهم المعارضة الشرسه لنظامه ، لكن ف الحقيقة الاتنين كانوا بياكلوا من نفس الماجور... وعشان كده لازم يقولوا على 30/6 انه انقلاب...لانه فعلا انقلاب قضى على سيستم تبادل الادوار بين نظام مبارك ونظام الاخوان. |
ليست هناك تعليقات:
إرسال تعليق