Mohamed Hussein
19 يونيو
كنا بنلعب في الطين الصبح و نفرح بالليل بالمناظره اللي كانت بين عمرو موسى و ابو الفتوح و نقول هيه هيه مصر بقت زي أمريكا يا جدعان , و بعد كام يوم نلعب في الطين الصبح ونتخانق بالليل هنقاطع انتخابات مرسي وشفيق ولا هنعصر على نفسنا لمونه و ننتخب مرسي مرشح الثوره ( ولا مؤاخذه ) زي ما قال نخبتنا الأشاوس علاء الأسواني وبلال فضل .
.
في الوقت ده كانت أجهزة المخابرات بتتابع و تراقب عمليات بيع فنادق البحر الأحمر للقطريين والإخوان و التدفقات الماليه المريبه و السلاح من و إلى مصر , بتتبابع محاولة الإخوان للتوغل في أجهزه سياديه و مكالماتهم لحماس و بقية ولاد عمهم الإرهابيين .
.
سنتين يا مؤمن , سنتين و احنا بنلعب في الطين و رجالتنا في المخابرات شغالين , عارف كان زمانا فين دلوأتي لولا رجالتنا دول ( بعد فضل الله على مصر ) ؟ كان زمان الصوماليين بيجمعو من بعض تبرعات و بطاطين عشان يبعتوها لمصر و كان زمان المصريات لاجئات في سوريا وكان زمانك انت ياللي ساكن في المنصوره محتاج تأشيره و جواز سفر عشان تشوف أختك اللي متجوزه في بورسعيد !! .
.
مصر خرجت بمعجزه و شعب و جيش من المفرمه الإخوانجيه الصهيو أمريكيه , ألف حمد الله على سلامتك يا غاليه .
Mohamed Hussein
19 يونيو
و سبحان الله سبحان الله , أدينا داخلين على سنه اهو , قيادات الإخوان و مشايخهم و بهاليلهم في السجون و اللي مش مسجون هربان في قطر ( ملاذ كل تافه صعلوك ) ومع ذلك هتلاقي الأدان في مصر بيأدن 5 مرات في اليوم ( مش بقى 3 ولا حاجه ) و رمضان جاي بعد كام يوم ( ماقدمش اعتذار ) , وماسمعناش إن الحج هيتلغي , و اجراس الكنايس بتضرب في معادها و الشمس بتطلع في معادها و بتتعامد على أنف الملك الفرعوني في معادها , هي دي مصر الفرعونيه القبطيه الإسلاميه ( عبقرية مصر ) و يا جبل مايهزك ريح .
الحكايه أصلها معادله بسيطه خالص بتقول ( مص _ الإخوان = مصر ) , علمونا كده في تانيه ابتدائي إن الصفر لما بيجي بعد علامة ناقص مابيغيرش حاجه في المعادله .
Mohamed Hussein
19 يونيو
الفن مش هو فيفي عبده ولا هشام عباس ... الفن يعني احمد ذكي والريحاني والقصري والست فاتن وسومه و كفى بهم نعمه , الفن يعني الإبداع والرقي والموهبه الي بتبقى من عند ربنا .
.
الدين مش هو الإخوان والسلفيين ولا توب قصير ولا كباير هرتكبها زكايب زكايب عشان أقيم دولة الخلافه , الدين هو ابتسامه تبتسمها وانتي بتدي واحد غلبان صدقه أو بتملّس بأيدك على شعر طفل يتيم , ماعرفشي فيه كام حور عين لكل واحد هيدخل الجنه ومش عايز اعرف , ومش بعمل العمل الطيب و بعده احسب انا كده كسبت كام حور عين النهارده ؟ ولا ماشي بالأله الحاسبه في إيدي , مجرد سعيك لرضا ربنا هو حافز كافي جدا لعمل الخير .
.
الثورجيه والإحساس بالغلابه مش معناها إنك تسب وتلعن في الحكومه والأجيال اللي قبلنا واللي بعدنا وكوكب الأرض 9 مرات كل يوم ولا معناها إنك تقعد اسبوعين من غير ما تستحمى , الثورجيه هي حماس وعقيده بيحركها العقل ويا ويلك لو اتحركت من غيره....... ( وممكن تستحمى عادي , المايه لا تنقض الفكر الثورجي ) .
.
مش بتفرج عالجزيره ولا بتفرج على أحمد موسى , ولما سمعت عن فيلم الجزيره الوثائقي الأخير قلت تيييييييييييييت ولما سمعت عن فيديوهات دفاع مبارك قلت نفس التييييييت .
.
............. أنا كده , قررت أكون كده , قلت هركب عقلي بنفسي و استربّع عليه عشان محدش غيري يركبه .
Mohamed Hussein
18 يونيو
صح الفيديوهات بتقول الإخوان ارهابيين من يومهم , و مخططين لكل حاجه و جاهزين , و أيوه ثورتنا اتركبت من أول ساعه الناس نزلت فيه , بس لا عمري في يوم هندم على ثورة يناير ولا هقول احنا أسفين يا مبارك , جرايمه في ال 30 سنه لا تُعد ولا تُحصى , دوله اتجرّفت بالكامل عشان خاطره هو و ننوس عين أمه الصغير , يكفيه بس جرماً إن الجماعه الإرهابيه كبرت و توحّشت في عهده , ده تقريبا كان بيعلفها بإديه و أدي النتيجه : أجيال فاتت وأجيال جايه اتكتب عليهم يدفعو التمن !! .
............احنا مش أسفين يا #زفت #الطين
Mohamed Hussein
18 يونيو
النهارده كان عندنا اجتماع في الشركه مع الرئيس التنفيذي الجديد , البيج بوس الكبير , وانا بقالي 5 سنين مابحضرش اجتماعات في شركتنا ( عشان ماعنديش مراره ستانلستيل ) , المهم الراجل شكله محترم و وقور , بدأ كلامه بطريقة ( إذا اضطُررت سأفعل و ها أنا أفعل ) و لما زمايلي بدأو يتكلمو الراجل بدأ يهدى و يتكلم بطريقة ( إنتو مش عارفين انكو نور عنينا ولا ايه ؟ ) , و شرح بقى واستفاض في حكاية الماركت ليدر و شغل التنميه البشريه اللي انتو عارفينه ده , بس أول ما قال ( و هنمشي في خطين متوازيين ) عرفت انه زملكاوي و اننا هنفشل تاني و #مكملين !!.
.
شركتنا راجعه و الزمالك راجع و مرسي راجع و الديناصورات تحتل شوارع القاهره .
Mohamed Hussein
18 يونيو
أفرجو عن عبد الله الشامي و 20 غيره , يا عم ده النائب العام اللي أفرج عنه أو القاضي تقريبا , يعني مش السيسي ؟ لأ طبعا وهو السيسي ماله ومال كده .
طب لو كان صدر ضده حكم ب 10 سنين سجن ؟ يبقى القضاء مسيس والسيسي هو اللي أصدر الحكم صح ؟! .
في حالة علاء عبد الفتاح يبقى القضاء مسيس ولو علاء خد براءه في الإستئناف يبقى مش مسيس , في حالة عبد الله الشامي لأ مش مسيس ولو كان خد حكم يبقى مسيس , في حالة أحكام الإعدام على قيادات الإرهابيه يبقى مسيس في حالة براءة ناس منهم مش مسيس , مسيس مش مسيس , مسيس مش مسيس , مسيس مش مسيس ( تعرف تقولها 7 مرات ورا بعض ) ؟!.
Mohamed Hussein
18 يونيو
و تشوف منظر الشاب السلفي من دول وهو بيلزق ورقة ( هل صليت على النبي اليوم ) بمنتهى الحماس والعزيمه و تبص في عنيه تحس بقمة التحفز و إياك إياك حد يقرب من الورقه دي , كله إلا الورقه اللي مكتوب فيها اسم سيدنا النبي يا كفره يا ولاد الحرام ( هو بس مافكرش ولا بيفكر ولا هيفكر ليه الورقه دي في التوقيت ده تحديدا وليه مكانوش بينشروها قبل كده ؟ ) , حماس وعزيمه و عقل في الفريزر من سنين , بيفكروني باللي قتل فرج فوده و هو حاسس إنه بيجاهد وحور العين مستنياه على نار , وقال اصله كافر و كتاباته مليانه كفر بس انا مابعرفش اقرا واكتب سعادتك .
.
شباب السلفيين هما باختصار مجرد زباين عند الإخوان , الواحد منهم زبون زبون مش أي كلام , بس بصراحه شوية زباين لوز لوووووووووز , تحمّل على ضهر الواحد فيهم أحلى نقلة ( سباخ ) و هيوصلها للمكان اللي هتقوله عليه من غير أي تفكير ولا تردد بس أهم حاجه أهم حاجه تعلّق في صدره حجاب مبروك من بتاع سيدنا الولي أبو خطوه , يعني كان أيه قرأنيه على كام حديث شريف و اركب يا معلم !!.
Mohamed Hussein
17 يونيو
قُصر الكلام
.
بوسترات ( هل صليت على النبي اليوم ) هي الحلقه الأخيره من مسلسل ( التجاره بدين ربنا ) من تأليف وإخراج جماعة الإخوان الإرهابيه , بطولة الإخوان و السلفيين ( كومبارس ) , و كل مسلسل في الدنيا لازم بيبقى له أخر , فكّر حضرتك كده هتتأكد إنها الحلقه الأخيره فعلا , عشان مش باقي حاجه من دين ربنا ماتاجروش بيها !!.
الإخوان دلوأتي مزنوقين في الركن و بيفرفرو , و البوستر ده هو النزع الأخير ( حلاوة روح ) , و رأيي الشخصي إن هيفاء وهبي في فيلم ( حلاوة روح ) كانت أكتر احتراما و تدينا من محمد بديع في مسلسل ( حلاوة روح ) بس احنا اللي مجتمع نظره ضعيف .
Mohamed Hussein
17 يونيو
شوف بقى يا أخي الكريم , عشان تبقى معانا في الجماعه و تنال رضوان الله و فردوسه الأعلى فانت مسموح لك تكدب و تقتل و تكفّر و تقذف محصنات و تسب و تلعن و تحرق و تزوّر و تزيّف و تتاجر في العمله و المخدرات و السلاح و الأطفال اليتامى والفقرا الغلابه و تتاجر بكتاب الله و أياته و تستعدي الأجنبي على أرضك وجيشك و تملى قلبك غل وسواد للغير , و تفهم كويس إن أي حد غير جماعتنا يبقى كافر بس إوعى إوعى , إياكَ يا بني أن تنسى الصلاه على سيدنا رسول الله ( هل صليت على النبي اليوم ؟) !!.
.
يا مقصّرين التوب ..ربِّي علينا يتوب ...ساعة ما نبقى هناك
هي الحكايه قلوب .. و لّا الحكايه يادوب ...بالدقن و المسواك ؟!.
Mohamed Hussein
17 يونيو
حكاية ( صلي عالنبي )
.
مشهد رائع من فيلم رشه جريئه : عيّل صغير عمل صوابعه كداهوه مسدس وقال لصاحبه طريخ طروخ , قام صاحبه صدّق وعمل له ميت و اهله قالو ده طخه طخ !!.
.
وهي دي كل الحكايه يا ساده , الإرهابيه بعد ما يأست وفاض بيها و أفلست تماما قالت نلعب على حكاية الوازع الديني عند الناس و نكسب شويه تعاطف , و فجأه ظهرت ملصقات صلي عالنبي , انت مابتصليش عالنبي ليه ؟ يا جدع تعالى صلي عالنبي , عيب عليك يعني لو ماصلتش عالنبي .........مممممممممممم عليه أفضل صلاة وسلام يا سيدي ( بس غريبه ان البوسترات دي مكانتش منتشره قبل كده ولّا هي حكاية صلي عالنبي دي اكتشفوها أوّل امبارح بالليل ؟! , ولادك مش يعرفو حاجه عن سكس معالي الوزير !!.
.
يعني باختصار الإرهابيين قررو بعد إفلاسهم إنهم يلعبو دور العيل الغتيت ( أيوه اللي بيبقى تخين اوي و قصير ده ) , اللي بيجي كل شويه يرن الجرس بتاع البيت و يطلع يجري , وفي كل مره الداخليه ( الغبيه ) تطلع تفتح الباب وتجري ورا الواد الغتيت في الشارع و الناس تضحك بقى والنشطاء يضحكو والكولجيه يقولك هي الشرطه الغبيه بتجري ورا الواد الغتيت ليه ؟ هو الغتيت كان عمل ايه يعني ؟ الحريه للغتيت , كلنا الغتيت !!.
على فكره , الغتيت بيرن الجرس عشان عايز الشرطه الغبيه تجري وراه في الشارع و الناس تتفرج عليهم , هو ده المطلوب ....وانت ؟ أيوه انت ؟ مش هتصلي عالنبي بقى ( من أقوال صاحب غزوة الصناديق , و قالت الصناديق لدين ابوكو نعم , نعم يا دلعدي ) .
Mohamed Hussein
17 يونيو
( المجاهدين ) بتوع داعش بيهددو جيش مصر و بيهددو كمان بفتح مصر ............فتح مصر ؟ ده على أساس إن مصر دي علبة سلمون صح ؟.
.
و من كام شهر كده ( المجاهدين ) التانيين بتوع حماس كانو عملو عرض عسكري ب 5 عربيات ربع نقل ( زي اللي بننقل فيهم الفراخ وشكاير الكُسب في مصر ) , راكب عليهم كام عيل من المقاطيع بتوعهم وقالك بقى عرض عسكري وخاف يا جيش مصر !! .
.
و من كام سنه أيام مبارك ( بعد حادث أديس ابابا ) , كانو ( المجاهدين ) التالتين بتوع حكومة السودان بتهدد بالحرب على مصر , و واحد طلع سأل مبارك هتعمل ايه في تهديدات السودان بالحرب ؟ قام مبارك قاله السودان دوله عربيه شقيقه و عندها 3 دبابات و طيارتين !!.
.
وبعد سنين طويله من تهديدات السودان لمصر تيجي غاره اسرائيليه تضرب مصنع بيعمل ( بمب العيد ) في السودان و يطلع وزير الدفاع ولامؤاخذه السوداني يقولك احنا ماعرفناش نرصد الطياره الإسرائيليه عشان الطيار كان طافي النور !! , كان معاه حق مبارك , هما 3 دبابات وطيارتين ده حتي مفيش عندهم رادار
.
عموما يعني وعشان احنا مش فاضييين و ورانا بلد عايزين نبنيها و مش لنا في قزقزة اللب و التفتفه , فانا رأيي إن المجاهدين الأولانيين بتوع داعش يعملو جبهة مع المجاهدين التانييين بتوع حماس و المجاهدين التالتين بتوع عمر البشير , أه يعملو جبهه قتاليه واحده واحنا نبعت لهم عربيتين أمن مركزي ( لا كتيبة جيش ايه ؟ الحكايه مش مستاهله , بيقولك الطيار طافي النور ؟ ) , و بس بقى نجيبهم بالكام عربيه الربع نقل و الدبابتين , أهو عالأقل نستقيد من العربيات دي في نقل الفراخ بين المحافظات .
Mohamed Hussein
17 يونيو
الوزرا هيحلفو اليمين الساعه 7 الصبح يعني بعد ساعتين تقريبا !! , يبقى لازم يكونو صاحيين من قبل 5 مثلا , طب انا ماعرفشي حد في مصر كلها بيصحى قبل 5 الصبح كل يوم غير الحاجه أمي ربنا يديها الصحه , طب أمي مش موجوده ليه في التشكيل الوزاري يا عم ابراهيم ؟ ولّا عشان يعني مابتعرفشي تربط الطرحه سبانيش ؟!
Mohamed Hussein
16 يونيو
التشكيل الوزاري الجديد
.
شالو نبيل فهمي من الخارجيه وجابو واحد تاني , تلاقيهم شالوه عشان حكاية ( العلاقه بين مصر وامريكا زواج شرعي وليست علاقه عابره ) , هو السياسي كده ممكن يتحرق بجمله قالها أو موقف صغير عمله , عموما أهي فرصتك ياسطى نبيل تشتغل بقى مأذون شرعي زي مانت بتحب .
.
لغو وزارة الإعلام , على فكره ده كان مطلب ثوري يا منى , مفيش دوله محترمه فيها وزاره للإعلام يا شريف , دي رقابه على الرأي و الفكر و المعتقد يا يسري ........... ولا إيه رأي الثورجيه ؟!.
.
عملو وزارة جديده للعشوائيات , أهي وزيرة العشوائيات دي لو حد قفشها بتلف في شوارع الزمالك ولا الرحاب ولا المهندسين يبقى لازم يعتقلها أو يضربها بالنار , و أساسا المفروض يبقى مكتبها في الخصوص ( ماتنساش تاخد معاها حتتين سلاح بقى ) أو أضعف الإيمان في المرج القديمه جنب محطه المترو ( فيه هناك راجل حاطط باترينه في الشارع فيها جاتوه و دايما مليانه دبان , بيبع ال 12 حتة جاتوه ب 5 جنيه والدبان هديه مجانيه ) .
.
إحم إحم , السيد الفريق أول بسم الله الرحمن الرحيم باقي في منصبه وزيرا للدفاع و السيد اللواء بسم الله الرحمن الرحيم برضه باقي في منصبه للداخليه , حد عنده اعتراض ولا حاجه ؟!!.
.
و تقريبا كده والله أعلم , مفيش ولا مزه في الحكومه الجديده , شوفتو بقى إن الحكومه دي جاده جدا في تطبيق قانون ( منع التحرش ) ؟!.
Mohamed Hussein
16 يونيو
قبل زحمة رمضان بقى و قبل مانشغل بشنطي وكراتيني و أوراقي و فرشتي ورولتي عشان انزل مصر , عايز أقول لكل المصريين وكل المسلمين ( كل سنه وانتو طيبين , رمضان كريم ) , تهنئه من القلب لبدلنا مصر ربنا يحفظها من شر الإرهابيين و شر تجار الثورات و المتنطعين , و تهنئه خاصه جدا بمناسبه اقتراب شهر رمضان المبارك للصديقه المصريه القبطيه الجميله الطيبه ميريام أيوب , اللي كتبت على صفحتها من كام يوم :
.
ايوة انا المسيحيه اللى مستنية رمضان بفارغ الصبر !!
ايوة انا المسيحيه اللى مستنية الزينة بتاعة رمضان
ايوة انا المسيحيه اللى مستنية صوت المدفع و الناس بتتجمع عشان يفطروا
ايوة انا المسيحيه اللى مستنية المسلسلات بتاعة رمضان:)
ايوة انا المسيحيه اللى بتفضل تسأل صحباتها رمضان امته ؟:)
.
عايز أقول لها كل سنه وانتي و أقباط مصر قبل مسلميها بألف خير , ماتزعليش لو واحد من المسلمين استغل بوستك الرائع و قال بقى إنه ( يهديكي ) للإسلام , معلش يا ميريام , حقك عليا انا , أهي بلدنا يا ستي وكل ما تلاقي فيها 1000 واحد يمين أكيد هتلاقي اتنين تلاته شمال , اتنين تلاته مايغيّروش حاجه في المعادله أبدا , نسيجنا واحد من 1500 سنه .
Mohamed Hussein
16 يونيو
عايز لما أنزل مصر أشتغل مستشار للسيسي ( لشئون أي حاجه ) , يتهيألي هقدر أفيده أكتر من ناس كتير من بتوع ( فرخ الكربون ) , السي في بتاعي هكتب فيه جملتين اتنين ( ماعنديش جواز سفر أمريكي و لا نمساوي ولا معايا تأشيره لأي دوله في كوكب الأرض ) , يعني هشتغل بطريقة ( يا قاتل يا مقتول ) , يا إما نقدر نعمل حاجه للبلد دي فعلا يا إما أموت فيها زي اللي ماتو , ماعندناش رفاهيه الإختيار .
.
عايز 7500 جنيه في الشهر يا سيسي ( ألفين مدارس و 4 مصاريف بيت , و 1500 لزوم علاج و دكاتره و مصايف في جمصه وراس البر مش مهم ) ده غير الحوافز و البدلات و المستنقعات , والله انا كده كارمك أخر كرم , وممكن أجي الشغل بعجله , أهو عالأقل اترحم من مخالفة ربط الحزام اللي هاخدها كل يوم في مصر .
........... هه ؟ قلت ايه يابه عبفتاح ؟ نقرا الفاتحه ؟!.
Mohamed Hussein
16 يونيو
عصام حجي وجواز السفر
.
دكتور عصام حجي خد جواز سفره من الدرج وسافر على امريكا تاني ( على بلد المحبوب وديني ) , بيقول إنه عرف حجم الجهل في مصر لما اشتغل فيها السنه اللي فاتت دي !! .
طب يا دكتور عصام هو احنا كنا قلنالك ان مصر دي سويسرا مثلا ؟ طب لو هي سويسرا كنا هنحتاج حضرتك في إيه ؟ .
على أي حال انت راجل عالم محترم لكنك مش بتاع سياسه , بتاع معامل وبحث علمي جايز بس السياسه حماده تاني خالص , وانا كان رأيي إنك تستقيل أو تقال أيام حكاية جهاز عبد العاطي بسبب تصريحاتك , وقلت ان تصريحك وقتها ينفع أقوله انا و اصحابي الصيّع لكن مستشار الرئيس ماينفعش , كان المفروض يتصرف بشكل تاني خالص , مش قلت لك ؟ جايز عبد العاطي يكون في البحث العلمي بتاع كفته بس انت كمان في السياسه والعمل العام بتاع كفته برضه .
.
و بعد استقالة البرادعي واستقالة عصام حجي بنفس الأليه تقريبا أنا عرفت الغلط فين و نصلحه ازاي ؟
يا ريس عبد الفتاح , نصيحه لوجه الله , لو في يوم احتجت لعالم كبير من المصريين اللي عايشين في أمريكا وأوروبا لازم قبل ما تسلمه أي عمل سياسي تاخد منه جواز السفر و تقطّعه , و لازم يحلف على مصحف إن بلده هي مصر و إنه يوم مايعجبوش الشغل في مصر يقرر إنه يسافر على بلده ( مصر ) !!.
.
في حفظ الله دكتور عصام ربنا يكتب لك السلامه , ماتقلقش على مصر والجهل اللي فيها , ربنا هيبعت لها اللي نفسه طويل وماعندوش جواز سفر و هيطلّعها من الجهل ده , أجدادنا في يوم من الأيام كانو بيعلمو العالم معنى الحضاره , وبعد 7 الاف سنه من حضارة المصريين اكتشفو أمريكا و لقو فيها شوية هنود حمر وقرود بتتنطط عالشجر , و الحكايه أصلها جينات و هندسه وراثيه و حضرتك سيد العارفين , ربنا هيبعت لنا اليوم ده تاني , ساعتها ممكن حضرتك تفكر جديا في الحصول على الجنسيه المصريه !!.
Mohamed Hussein
15 يونيو
و عشان تعمل بحث علمي في مصر على نضافه و صح الصح يعني محتاج تعمل كام خطوه تمهيديه في الأول
.
بص يا سيدي , إنت تسجن عادل عبد العال و سعيد حساسين و معاهم الحويني و محمد حسان و كل واحد نطق كلمة ( بول البعير ) و بعدين تطلع على قنواتنا الفضائيه تلم البهوات والمزز بتوع ( خبيرة الأبراج , عالمة الفلك , واعرف اسم عروستك من صوابع رجليك ) و بالمره هات معاهم سماح أنور و ريهام سعيد , و بعدين تعدّي على كل محلات العطاره و النشوق واللبان الدكر و تقفلها و بعدين الستات اللي بيبقو فارشين بأدويه في الشارع و علاج الإنتصاب والضعف الجنسي تلمّهم , بعدين تروح حضرتك على شركات بير السلم اللي بتقولك المنتج الأصلي بتاع الملكه حتشبسوت والشامبو اللي كانت بتستخدمه نيفرتاري يوم الصباحيه و تنفيهم لجزيرة مالطه أو تبعتهم العراق , وانت في طريقك عدّي على بتوع الحجامه والطب النبوي و خدهم معاك .
.
يعني باختصار مطلوب من حضرتك تلمّ نص الشعب اللي عايش في ماية البطيخ ده عشان النص التاني يعرف يزرع لك بطيخه بالهندسه الوراثيه على شكل متوازي مستطيلات ( لسهولة النقل ) زي ماعملو اليابانيين و الصينيين .
.
Mohamed Hussein
15 يونيو
خبر سحب قلادة النيل من البرادعي مش حقيقي ( أعتقد ) , أنا ضد البرادعي وضد سحب قلادة النيل منه , الحكايه مش لعب عيال , دي جايزه من الدوله و كل حاجه لها أصولها , البرادعي ممكن يكون جبان أو رخو أو له وجهة نظر مختلفه ... و صح لبّسنا في الحيطه يوم ما استقال لكنه مش خاين ولا بيواجه تهمه معينه ( غير العبط السياسي جايز .... و دي مش تهمه ) ماعتقدش عبد الفتاح السيسي ولا الحكومه يعملو حركه زي دي , اعقلو يا بشر , البلد مش مستحمله , بلاش تشمّتو فينا كلاب السكك .
Mohamed Hussein
15 يونيو
قمة السيطره إنك تخلّي اتنين أرَنَات زي إبراهيم محلب و محمد إبراهيم يصحو من النوم الساعه 4 الفجر و توقفهم في طابور الصباح و تخليهم يركبو عجل .
ده الواحد مننا لما بيقنع مراته انها تعمل محشي مره كل شهرين بدل كل 6 شهور دي بيبقى قاعد و نافش ريشه و حاسس إنه أسد فشر حازم أبو اسماعين.
عاجبني أنا أوي الراجل عبفتاح السيسي ده , سيبك انت بقى من الهري , بلا كفاءه سياسيه بلا كفاءه جنسيه , وزير داخليه في مصر بيتثبّت ؟!! , دي من علامات الساعه , ................ السيطره حلوه مفيش كلام .
Mohamed Hussein
15 يونيو ·
خطوتين يا سيسي
.
الأولى هي التحفظ على أموال محلات زاد وسعودي المملوكه لقيادات اخوانجيه في البنوك , ده اسمه ( تجفيف منابع الإرهاب ) , ماحنا مشينا في طريق والوقوف في نص الطريق ده انتحار , ماينفعشي تبقى جماعه إرهابيه واحنا سايبين فلوسها وتمويلها شغال , صح المحلات دي هي مجرد نفحه من فلوس الإخوان اللي رعرعت و لظلظت في عهد المخفي مبارك برعايه و مباركه أمريكيه لكنها خطوه في الطريق .
.
التانيه هي خبر سمعته عن تحديد اسم الأزهر الشريف كجهه واحده و وحيده لجمع الذكاوات والتبرعات من الناس ( دي كانت فكرتي من سنتين ) , حضرتك كده كمواطن مصري عايز تطلع ذكاه أو صدقه هيبقى قدامك حلّين , إما انك تروح للفقير بنفسك و توصل له صدقتك لحد بيته أو تتبرع بيها لمؤسسة الأزهر , يعني لجهه محترمه وعليها رقابه , ولا تحب فلوس صدقتك وذكاتك نشتري بيها سلاح ومتفجرات أو نصرفها على دور أيتام ونبقى ناخد شوية أيتام نلبسهم كفن و نقول أطفال مع الشرعيه وضد الإنقلاب ؟!!.
.
كده السيسي مش بيلعب , بيشتغل بجد وشايل روحه على كفه , مش بيخاف , ياريت حضرتك تسانده و لما يغلط أو يعك هنتقده قبلك ( حاول تصدق ) .
Mohamed Hussein
15 يونيو
حالة لغط غريبه بتحصل في العراق , اللي يقول دول مسلحين داعش واللي يقول لأ لأ دي مجموعات من جيش صدام القديم واللي يقول ده تحالف بين الإتنين , لخبطة ال 3 سنين اللي فاتو اتجمعو واتركّزو في العراق , و امبارح بالصدفه لقيت مذيع في قناة مصريه عامل مداخله عالهوا مع واحد عراقي وبيسأله نفس السؤال , هما مين اللي دخلو الموصل وتكريت وصلاح الدين ؟ داعش ولا مقاتلي صدام ؟ ممممممممم يعني الإعلاميين المصريين بيدخلو على صفحاتنا بتاعة الفيس تقريبا و زي ما بنعمل بيعملو بالظبط .
بس النهارده ربنا هداني لحل المعضله دي , الحل بسيط خالص , لأ ماتسمعشي كلام اللي بيقولو مجاهدين ولا اللي بيقولو صداميين , وماتقراش تقارير ولا حاجه , الحل باختصار هو إنك تشوف قناة الجزيره بتقول عليهم ايه و تفهم العكس تماما , أه , الجزيره بتقول ثوره إسلاميه في العراق , بس كده يا معلم , أنا ضدها وش , ماهو المثل بيقول ( خد رأي الجزيره واعمل عكسه ) , عشان كده انا ضد العك اللي بيحصل في العراق رغم كراهيتي الشديده لحكومة المالكي العميله ولأمريكا وإيران .
.
الجزيره مابيجيش من وراها أي خير حتى اسألو سعيد الصحاف , و في العراق حاليا ماتش بيلعبو فيه عالملابس الداخليه , أطراف كتير هتستفيد من اللي بيحصل ... تركيا تستغل الموقف وتعمل دوله للأكراد في شمال العراق و تسكّن فيها أكراد تركيا عشان تخلص منهم و ايران تلاقيها فرصه كويسه للدخول العسكري في العراق لحماية المالكي وحكومته وامريكا هتدخل لنفس السبب ( اه بالمناسبه , لسه عندنا حمير فاهمين ان فيه حالة عداء بين امريكا وايران !! ) , وداعش تحقق أي انتصار وهمي بعد هزيمتها الساحقه في سوريا عشان يفضل لها وجود ( برعايه أمريكيه ) ...مش بقول لكو ماتش و بيلعبو فيه عالفالنات ؟
Mohamed Hussein
14 يونيو
وجع
.
بقى لما واحد متغرب زي حالاتي يفكر إنه ينزل مصر بقى عشان يعيش ( يعيييييش ) , و بنتي الحمد لله خلصت جريد 1 يعني أولى ابتدائي وعايز أنا بقى أدخلها تانيه ابتدائي في مصر , مطلوب مني إيه يا رجاله ؟ صلّو بقى عاللي هيشفع فيكو يوم الدين :
.
الأوّل أجيب شهادتها من المدرسه و تكون متوقعه بتوقيع المدير السعودي المعتمد , بعدين أروح أوثقها في وزارة التعليم في الدمام بعدين أوثقها في وزارة الخارجيه اللي في الخبر بعدين أبعتها للسفاره المصريه في الرياض تتوثق , بعدين تاخدها مراتي بقى و تدبّس بنتي في الشهاده وتنزل مصر
.
تروح القنصليه السعوديه الي هي في جاردن سيتي تقريبا بعدين تروح وزارة الخارجيه المصريه اللي في ماعرفشي فين بعدين تطلع على مدرسه لغات تقوم المدرسه تقول لها تروح الإداره التعليميه الفلانيه بعدين تجيب خطاب متوجه من ماعرفشي مين لمعرفشي فين بعدين ترجع المدرسه عشان يعملولها امتحان ( أومال انت فاكر تانيه ابتدائي دي بالساهل كده ؟ )
.
بعدين لو كانت المدرسه بتدرّس ألماني مثلا أو فرنساوي من كي جي وان يبقى لازم البت تاخد كورس مكثف في الألماني ده ( بتاع ال 3 سنين ) يعني لازم نفكّ البت من دبوس الشهاده المتوثقه عشان تاخد الكورس , بعدين نرجع ندبسها تاني ونروح بيها المدرسه , بعدين المدرسه تحطنا على ويتنج ليست و تنظر في أمرنا بقى , بس الحمد لله الحمد لله مش مطلوب توقيع من امين عام الأمم المتحده ولا كاترين أشتون ولا مطلوب ختم من سفارة المجر في كوستاريكا .
.
الحقنا يا عبد الفتاح , الحقني يا ريس دانا مواطن مصري مش فنزويلي و عايز أدخل بنتي تتعلم ( ولا تحب أعلمها صنعه و تشتغل خياطه ؟ ) , البت هتتعلم في مدرسه خاصه يعني مش هنكلف أم الدوله أي حاجه , و ناقص تقولو هناخد خالك رهينه عندنا لحد مابنتك تخلص التعليم , يا ريس البلد دي محتاجه تتفور القوانين اللي فيها , يعني مطلوب مني أعدّي على 27 جهه و هيئه رسميه وخاصه في بلاد الله لخلق الله عشان بنتي تدخل تانيه ابتدائي ؟ دانا لو هشغلها في الموساد الإسرائيلي مش هيلفّفونا ال 7 لفات دي .
.
السيد المحترم وزير خارجيه مصر , المسئول الأول عن القوانين الباليه الخاصه بالمغتربين دي , عايز أسأل معاليك , هو حضرتك جنابك يعني مرّيت على 27 جهه وهيئه و دخلت كذا اختبار كده قبل ماتبقى وزير خارجيه ؟! إيه ؟ بتقول إيه ؟ لأ ؟ بس يا معلم كده يبقى مفيش مدرسه هتقبلك في تانيه ابتدائي !!.
Mohamed Hussein
14 يونيو
فكره ب 20 جنيه
.
خلاص بقى يابه الحاج عبفتاح , حفله و عملنا و عجل وركبنا , ورّينا للعالم منظر محترم جدا في الحفله و قلنا للأعمى إن مصر فيها أمن واستقرار , ندخل بقى في الخطوه اللي بعد كده , هقولك تعمل ايه ؟ عشان انا عارف إن الناس اللي حواليك ممكن يكونو طيبين و وطنيين بس غالبا هيكونو من بتوع فرخ الكربون و طابع دمغه أبو 15 ساغ , و المروحه العهده , أيوه الناس اللي البيروقراطيه خدت من جتتهم راقات .
.
بص يا سيدي , دلوأتي حكاية العجل دي حلوه وممكن تتحول لحمله اعلاميه عشان تشجع الناس على كده , من ضمن فوايدها انها هتخف الزحام في القاهره والتلوث وطبعا استهلاك البنزين , إنما ولنفس الأسباب دي ممكن نعمل فكره تانيه سهله أوي ومش هتكلف الدوله أي حاجه .
.
بقى القاهره اللي فيها اكتر من 20 مليون نسمه دي هتلاقي منهم عالأقل مليون نسمه يوميا بيلفو في شوارعها جايين من الأقاليم ( يعني فلاحين زي حالاتي ) , اللي رايح الوزاره الفلانيه يخلص ورقه واللي رايح ميدان التحرير يجيب شهادة تحركات واللي واللي ده غير أهل القاهره نفسهم اللي بيلفو عشان تخليص الأوراق والشهادات والتراخيص والمرور وخلافه
.
والحل باختصار هو انك تنسف مطبخك القديم ده كله , كام ألف جهاز كمبيوتر في كل المصالح الحكوميه في مصر , وبرنامج كمبيوتر يربط الوزارات والهيئات ببعض ( البرنامج ده موجود حتى في الدول العربيه ) , وكل واحد يخلص مصلحته من مدينته أو حتى من بيته عن طريق النت , الرسوم اللي بتاخدها في ختم ورقه ولا توثيقها أو شهاده أو مخالفه ممكن تزود عليها 10 جنيه بس أو حتى 5 جنيه , ولما يكون فيه ملايين الأوراق والمعاملات بتحصل في السنه يبقى حضرتك بتتكلم في مليارات بتتصرف في الهم ده , ال 10 جنيه هتعمل مليارات وفي نفس الوقت هتوفر عالمواطن فلوس أكتر في المواصلات والتنقل بين المحافظات ووقته اللي بيضيع والمجهود والزحمه والتلوث وخلافه .
.
وهتحقق له رفاهيه هو محتاجها ( حياة المواطن فيها اللي مكفيها ) .......... وبس كده , قرار جمهوري , وزير شاب يتولي تحويل النظام الإداري للدوله من نظام فرخ الكربون لبرنامج كمبيوتر , تدريب للموظفين لمدة 6 شهور والحكايه دي تاخد سنه بالكتير , التكلفه هيدفعها المواطن وهو اللي كسبان .
.
إيدك على عشين جنيه بقى يابه الحاج عبفتاح تمن الفكره دي .
Mohamed Hussein
14 يونيو
كان نفسي أكون إنسان وباخد يومين أجازه في الإسبوع , طب يوم واحد طيب ؟ طب نص يوم ؟ طب ساعتين ؟ بلاش خالص , ممكن أخد يوم العيد أجازه ؟ برضه لأ .
.
إوعى حد يضحك عليك ويقولك أصل مهنتنا دي مهنه ساميه , ساميه نفسها قطّعت كارنيه النقابه و شغّاله دلواتي سمسار في مدينة الرحاب , و بتكسب من بيع شقه واحده أد مكسبك من بيع 100 ألف علبة نوفالجين فاصوليا !!.
Mohamed Hussein
14 يونيو
بروتوكولات حكماء الفيس بوك
.
1- من حقك تؤيد البرادعي و تدعمه وتدافع عن افكاره بمنتهى القوه , ده يبقى اسمه توجه سياسي , وساعتها تحط على بروفايلك صورة جيفارا أو نيلسون مانديلا أو صلاح جاهين أو أي حد من العظماء .
.
2- من حقك تؤيد حمدين و تدعمه وتدافع عن أفكاره بمنتهى القوه , ده يبقى اسمه انتماء سياسي , وساعتها برضه تحط صورة أي حد من العظماء .
.
3- من حقك تؤيد مرسي أو ابو اسماعيل وتدافع عن أفكاره بمنتهى القوه , ده يبقى اسمه عقيده سياسيه و حط صورة اللي يعجبك .
.
4- لكن مش من حقك تؤيد السيسي ولا تدعمه و لا تدافع عنه وإلا يبقى إسمك طبّال , طبّاااااااااااااااال , والمفروض بقى ماتحطش صورة جلال عامر , صورة أحمد موسى تبقى لايقه عليك أكتر , طب يا جدعان ماينفعشي تسمّو تأييدي انتماء سياسي أو توجه سياسي ؟ لأ ماينفعش ولازم تغيّر الصوره دي فورا , إحنا أصلنا بنمارس الديمقراطيه بمنتهى الديكتاتوريه بقى و محدش يقدر علينا .
............................
............................
من يوميات ( نائم في علبة الكولّه ) .
Mohamed Hussein
14 يونيو ·
فيديو عجيب وغريب , يخليك تضحك وتبكي في نفس اللحظه , شيخ شيعي ( مرجع ) طلع على المنبر يخطب , افتكر مشهد مقتل سيدنا الحسين رمى الميكروفون من ايده وقعد يصوت ويلطم و شق في هدومه , واحد من المصلين كان متأثر أوي قام طلع على المنبر و نزل طحن في مولانا الشيخ ومولانا الشيخ يطحن فيه , ضرب بالمحبه والتأثر يعني , واحد مسك الميكروفون وقعد يسخّن الباقيين عشان يطحنو في بعض !! ............ أنا مش بسخر من طقوس الناس و معتقداتهم , بس معاه حق الغرب الكافر ابن الحرام ياخدنا غسيل و مكوه , و كتّر خير كوكب الأرض إنه مستحملنا لحد دلوأتي , إحنا أكبر دليل على إن الإنسان أصله قرد .
.
باسم الإسلام ( والجهاد ) جماعة الإخوان في مصر بتقتل وتحرق وتكدب وتقذف محصنات و تكّفر في خلق الله وماعندهاش مانع تستعين بعدوك على جيش بلدك , بإسم الإسلام ( والجهاد ) جماعة بوكو حرام بيخطفو أطفال بنات صغيرين و ياخدوهم رهينه عشان يفرجو عن بعض ال ( مجاهدين ) , بإسم الإسلام ( والجهاد ) أنصار داعش بيقطعو روس الناس و يلعبو بيها كوره , بإسم الإسلام ( والجهاد ) حركة طالبان والمجاهدين الأفغان كانو بيحارب الإتحاد السوفيتي لصالح أمريكا ويزرعو حشيش عشان يشترو بتمنه سلاح , بإسم الإسلام ( والجهاد ) منعت حركة شباب المجاهدين في الصومال الناس ( الستات ) من مشاهدة مباريات كرة القدم عشان الرجاله لابسين شورتات , بإسم الإسلام ( والجهاد ) جلدو صحفيه في السودان عشان كانت لابسه بنطلون جينز و هيقطعو رقبه واحده مسيحيه حامل بتهمه الرده عن الإسلام .
.
أعظم وأكبر و أهم دليل على عظمة دينا الإسلامي وإنه باقي أبد الدهر هو وجود أكتر من مليار مسلم لحد النهارده لسه ما ألحدوش ولا شقّو خلجاتهم بسبب اللي مكتوب فوق ده , ولولا إيماني بالله و حيائي منه وشوية عقل باقيين عندي كنت قلت مالها البوذيه بس ؟ بوذي وأفتخر !!.
Mohamed Hussein
13 يونيو
بعد 15 سنه في الشغلانه دي اللي انا بشتغلها , النهارده اتسألت أغرب سؤال في حياتي , واحده داخله عايزه جهاز تسبيح !! , أيوه جهاز تسبيح على مافهمت يعني جهاز يقول سبحان الله سبحان الله .
طب يعني هما الغرب الكفره ولاد الحرام دول اللي اخترعو جهاز تسبيح عشان المسلمين يشتروه مش عارفين يخترعو أي جهاز يصوم رمضان بدالي السنه دي ؟ الجو هيبقى حر أوي , أنا مستعد أشتري الجهاز اللي هيصوم مكاني بأي سعر و يا سلام بقى لو كان معاه أوبشن إنه يصلي بدالي ضهر و فجر وانا أكمّل الباقي !!................................. هلَكَ المتنطعون .
Mohamed Hussein
13 يونيو
و لقيت واحد صاحبي كاتب كده بالنص : هو ايه لزمته الماراثون ده وركوب العجل ولا هي تكلفه ومصاريف عالفاضي ؟! ........... أه والله .
مممممممممم بص يا صاحبي , النوع اللي حضرتك شوفته من العجل ده بيموّن بنزين 80 مش 92 زي مانت فاهم , والعجله الواحده بيكفيها لتر بنزين تمشي بيه 20 كيلو , يعني لو قلنا عندنا 5 الاف عجله شاركو في الماراثون يبقى كلفونا 5 الاف لتر بنزين ب 15 الف جنيه , وقول الصور دي اتاخدت بكاميرا كانون ديجيتال ب 350 جنيه وهنرمي الكاميرا بعد كده , تبقى التكلفه الإجماليه 15 ألف و 350 جنيه , لأ الترينجات دي كل واحد جايب الترينج بتاعه معاه من البيت , مش كتير على مصر 15 ألف 350 جنيه صح ؟ ممممممممممم مانا مش لاقي كلام أقولهولك بصراحه .
.
و لعلمك الشديد أنا واثق إن السيسي خد الشباشب بتاعة الوزرا رهن لحد ما يرجعو العجل , زي ما عبله كامل عملت كده , أيوه أصل العجل ده عهده والوزير اللي يبوّظ حاجه في عجلته نعمل له محضر تبديد عهده و نخصم تمنها من مرتبه و نحط السيخ المحمي في صرصور ودنه .
................ أه , نسيت أقول حاجه , صاحبي ده بيشتغل محامي و حقوقي و ناشط سياسي لحد مانلاقي ناشط سياسي !!
Mohamed Hussein
13 يونيو
السيطره حلوه مفيش كلام
.
إنما أحلى حاجه في صور الماراثون دي هي منظر الوزرا وهما واقفين مش طايقين نفسهم ونازل عليهم غضب ربنا , تلاقي السيسي بعت لهم عسكري من الشرطه العسكريه جابهم من بيوتهم , العسكري دخل على محمد ابراهيم في سريره وقال له قوم قوم السيسي عايزك دلوأتي حالا عشان هتركبو عجل !! , ومحمد ابراهيم بقى قعد يبرطم في سره و يسب ويلعن في ثورة 30 يونيو و انتخابات الرئاسه و يقول يا جدعان دانا وزير داخليه , أمين الشرطه عندي ما بيتثبّتش أقوم أنا الوزير أتثبت بالشكل ده ؟ فيه وزير داخليه يصحى قبل الفجر عشان يركب عجل !!.
.............. السيطره حلوه مفيش كلام .
افتكرت صوره للمخفي مرسي , كان واقف جنب السيسي و وراه كام ظابط كده ( رتبه ) , واقف مرعوب و خايف كأنه حرامي غسيل مش رئيس دوله !!.
Mohamed Hussein
13 يونيو
ههههههههه يا لهوي , دي حكاية ماراثون العجل دي كانت الساعه 5 الفجر !! , يعني انت صحيت يا عبد الفتاح و لمّيت رجالتك و الوزرا و عملتو ماراثون الساعه 5 فجر النهارده ؟ بالك إنت ؟ في نفس التوقيت ده بالظبط كنت أنا صليت الفجر و رتبت شوية حاجات في شنط السفر و دخلت انام عالسرير , حطيت راسي عالمخده ومسكت التابلت بتاع بنتي عشان ألعب شوية كاندي كراش قبل مانام ( أحب أبشّر الشعب المصري كله إننا وصلنا ل ليفل 41 في كاندي كراش ) .
.
بص يابه الحاج عبفتاح , اللي أوله شرط أخره نور , أنا بقالي 15 سنه بنام بعد الفجر ( هذا ما وجدنا عليه أباؤنا ) , و نازل مصر عشان أعيش فيها , عايز انت بقى تصحى من الساعه 5 انت ورجالتك ماشي أهلا وسهلا , وابقو خلّو بالكو من البلد وانا نايم , إنما تقولي الشعب لازم يصحى من 5 الصبح هقولك على جثتي و جثة شامبو , قول الشعب كله يصحى 5 الصبح ما عدا محمد حسين و إلا هروح تحت كوبري الملك الصالح اسرق علبة كوله من العيال اللي هناك واشم فيها ليلتين تلاته وانزل اهتف لوحدي : يسقط يسقط حكم العسكر .
Mohamed Hussein
13 يونيو
رساله رقم 2 من رئيس الجمهوريه
.
الرساله الأولى كانت حفلة التنصيب و حضور وفود من أغلب دول العالم , حفل محترم يليق بإسم مصر , يوميها قلت انسى ال 10 مليون و لّا حتى 100 مليون , الرساله كانت بتقول ان البلد دي فيها استقرار سياسي وفيها أجهزه أمنيه تقدر تأمّن مئات المسئولين من مختلف دول العالم في نفس الوقت , الرساله كانت موجهه لكل دول العالم اللي بتعلب سياسه خارجيه و للمستثمرين و لشركات السياحه .
.
النهارده كانت الرساله رقم 2 , رئيس الجمهوريه لابس بنطلون ترينيج و تي شيرت و راكب عجله في ماراثون فيه ألاف الشباب و لمسافة 20 كيلو , مفيش رساله أبدا ممكن توجهها للعالم تبقى أقوى من كده , بس اللي عمله السيسي ده اسمه ( سلعه ) , يارب يكون عندنا مسئولين يعرفو يروّجو للسلعه دي صح .
.
إنما السؤال اللي محيرني بجد , لأ مش الإتنين شباب اللي ورا السيسي اللي عضلاتهم مفتوله دول , أكيد دول من قوات الحمايه الخاصه ومدربين على استخدام السلاح بمنتهى الدقه وهما سايقين العجله و العربيه , بالمناسبه افتكرت حادثة اديس ابابا اللي اتعرض لها مبارك و لما مبارك حكى عنها قال اتعرضنا لاطلاق نار من قناص فوق بيت بعيد , قلت للسواق يلف بالعربيه , والسواق بيلف قام الحارس بتاعي جاب القناص بطلقه والعربيه بتلف !!.
.
السؤال بقى , هو عبد الفتاح السيسي راح زار الست اللي اتعرضت للتحرش إمتى و إزاي ؟ و عمل حكاية الماراثون دي إمتى وإزاي ؟ حد في حضراتكو شاف موكب للسيسي قافل صلاح سالم والدائري مثلا ؟!! الله يجحمه بقى أحمد نظيف ولا حبيب العادلي , كان لما واحد منهم بيروح يزور أخوه في محافظه تانيه كانو بيقفلو المحافظتين بالضبه والمفتاح عشان الباشا معدّي .
.
هو الراجل عبد الفتاح السيسي ده جرئ أوي للدرجادي ولا متهوّر ولا عبقري وعامل حساب كل حاجه ؟ ربنا يحفظك للبلد دي يا عبد الفتاح لو كان جواك خير لها .
Mohamed Hussein
12 يونيو
حاول تتخيّل
.
حضرتك قاعد في بيتك في بغداد , فتحت التلفزيون لقيت صور وفيديوهات بتقول قوات داعش دخلت الموصل و صلاح الدين , قناه تانيه بتقول ان القوات دي مدعومه من مقاتلي جيش صدام القديم بيقودها عزة الدوري , افتكرت إن بنتك الكبيره متجوزه وعايشه في الموصل , بتتصل بيها مباتردش , شوفت في التلفزيون ناس كتير هربانين من الموصل في الإتجاه للجنوب و جثث كتير مرميه , دققت أوي مالقتشي صورة بنتك , الحمد لله كان قلبك هيقف , ابنك الوسطاني شغّال في شركه في البصره في جنوب العراق و طبيعه شغله بتخليه يطلع ناحية الحدود الشرقيه مع إيران , قلبت القناه لقيت إيران بتحشد قواتها عالحدو , قريت خبر إن أمريكا بتعرض على المالكي التدخل العسكري لمواجهة قوات داعش , داعش ولا عزة الجوري ؟ أمريكا مالها ومال المالكي ؟ هي إيران عايزه إيه مننا ؟ إبني كمان مابيردش عالموبايل , مين داعش دول وايه علاقتهم بالإسلام ؟ المالكي عايز يسلّح الشعب يعني عايزها حرب أهليه ؟ , فجأه حسيت إن رجليك بتنزل في بحر رمال بيشدّك زي النداهه , بلدي رايحه فين ؟ ولادي عاملين إيه ؟ مش هيبقى فيه عراق تاني ؟ هيبقو دويلات , دويله للأكراد و دويله للسنه و دويله للشيعه أنا عارف , أمريكا هتاخد اللي فيه النصيب و تسيب لإيران شويه بالإتفاق , يارب بنتي ترد , يابني رد بقى قلقتني عليك , بلدي مش لاقيها ولا عيالي .
.
على فكره على فكره يا مصري , فوق فوق , العراق دي مش بتقع في القاره القطبيه الجنوبيه ولا أهلها بيتكلمو أوردو , و جه الوقت الي تخاف فيه على بلدك , فوق يا مصري فووووووووووووووووووق .
Mohamed Hussein
12 يونيو ·
إنقل يابني الكهارب هنا بقى عند حبيب العادلي , أصله خد براءه النهارده من قضايا التريح وغسيل الأموال , قول ورايا بقى ( القضاء مسيس , عودة الفلول , السيسي سفاح , يسقط حكم العسكر ) , ياض قول ماتخافش , انطق ياض .
.
طب قول ورايا تاني , حبيب العادلي اتعدم 9 مرات قبل كده في عهد مرسي وطنطاوي بس خد براءه في المره العاشره في عهد السيسي ليه يا كفره ؟!.
.
عندنا في الكليه , في مادة الفارماكولوجي تحديدا بتيجي اسئله في الإمتحان عن الأعراض الجانبيه بتاعة الأدويه , يختارو اسم دوا ولا اتنين ( الإسم العلمي ) ويسألك الأعراض الجانبيه ايه side effects.........المهم يعني المصري دايما معروف بقوته و جبروته و كان الشايع بين اغلب الأدويه في الأعراض هما ال 3 كلمات دول nausea , vomiting , diarrhea ...يعني غثيان وقئ واسهال , فكان لما بيجينا السؤال في الإمتحان واحنا مش مذاكرين او مش فاكرين كنا بنكتب ال 3 دول , يعني بقو ستامبه كده محفوظه وغالبا الإجابه بتبقى غلط , بس بنكتبها عشان مانسبش المكان فاضي .
.
كتير من النشطاء والكولجيه ماشيين بمبدأ الستامبه المحفوظه nausea , vomiting diarrhea عوده الفلول , القضاء مسيس , يسقط حكم العسكر , حافظينها بقى و بيعملوها إجابه لهم في أي سؤال حتى لو كانت اجابه غلط بس عشان مايسيبوش مكان الإجابه فاضي !!.
.
يعني مثلا هو لو فكّر شويه أو ذاكر يعني هيعرف إن براءة حبيب العادلي مالهاش علاقه بشعاراته التلاته المقدسه المحفوظه , و إن الحكايه وما فيها لا قضاء مسيس ولا عوده فلول ولا نيله , يا بني ذاكر شويه وحاول تفهم , الإجابه الصحيحه إنك تقول منظومة التقاضي في مصر فاسده مش القضاء مسيس , والمنظومه دي بتبدأ من أول الظابط وأمين الشرطه اللي ممكن يكون مرتشي لحد الأحراز اللي بيتلعب فيها لحد وكيل النيابه مرورا بالحلقه الأخطر ( المحامي العُقر ) وأخر واحد في السلسله دي هو القاضي .
.
الكلام ده قلته من سنتين لما الإخوان جابو نائب عام ملاكي وطلع يقول انا هقتص من قتلة الثوار , ساعتها قلت انه كداب وألف كداب , عشان القضايا كلها اتستفت و تحوّرت واتدورت واتقورت ووصلت للقاضي ورق فولسكاب فاضي !! , من سنتين وانا عارف ان مبارك و أي حد من نظامه مش هياخدو أي حكم عشان معاهم مليارات وممكن يشترو نقابة المحامين باللي فيها على مديرية الأمن والشارع اللي هي فيه .
.
لو من حقنا نطالب بحاجه يبقى نطالب بتفوير المظومه بالكامل بقوانينها وعناصرها و ده محتاج وقت أو ممكن حضرتك تريح دماغك خالص و تقول : القضاء مسيس , يسقط حكم العسكر , السيسي سفاح nausea vomiting diarrhea
.
19 يونيو
كنا بنلعب في الطين الصبح و نفرح بالليل بالمناظره اللي كانت بين عمرو موسى و ابو الفتوح و نقول هيه هيه مصر بقت زي أمريكا يا جدعان , و بعد كام يوم نلعب في الطين الصبح ونتخانق بالليل هنقاطع انتخابات مرسي وشفيق ولا هنعصر على نفسنا لمونه و ننتخب مرسي مرشح الثوره ( ولا مؤاخذه ) زي ما قال نخبتنا الأشاوس علاء الأسواني وبلال فضل .
.
في الوقت ده كانت أجهزة المخابرات بتتابع و تراقب عمليات بيع فنادق البحر الأحمر للقطريين والإخوان و التدفقات الماليه المريبه و السلاح من و إلى مصر , بتتبابع محاولة الإخوان للتوغل في أجهزه سياديه و مكالماتهم لحماس و بقية ولاد عمهم الإرهابيين .
.
سنتين يا مؤمن , سنتين و احنا بنلعب في الطين و رجالتنا في المخابرات شغالين , عارف كان زمانا فين دلوأتي لولا رجالتنا دول ( بعد فضل الله على مصر ) ؟ كان زمان الصوماليين بيجمعو من بعض تبرعات و بطاطين عشان يبعتوها لمصر و كان زمان المصريات لاجئات في سوريا وكان زمانك انت ياللي ساكن في المنصوره محتاج تأشيره و جواز سفر عشان تشوف أختك اللي متجوزه في بورسعيد !! .
.
مصر خرجت بمعجزه و شعب و جيش من المفرمه الإخوانجيه الصهيو أمريكيه , ألف حمد الله على سلامتك يا غاليه .
Mohamed Hussein
19 يونيو
و سبحان الله سبحان الله , أدينا داخلين على سنه اهو , قيادات الإخوان و مشايخهم و بهاليلهم في السجون و اللي مش مسجون هربان في قطر ( ملاذ كل تافه صعلوك ) ومع ذلك هتلاقي الأدان في مصر بيأدن 5 مرات في اليوم ( مش بقى 3 ولا حاجه ) و رمضان جاي بعد كام يوم ( ماقدمش اعتذار ) , وماسمعناش إن الحج هيتلغي , و اجراس الكنايس بتضرب في معادها و الشمس بتطلع في معادها و بتتعامد على أنف الملك الفرعوني في معادها , هي دي مصر الفرعونيه القبطيه الإسلاميه ( عبقرية مصر ) و يا جبل مايهزك ريح .
الحكايه أصلها معادله بسيطه خالص بتقول ( مص _ الإخوان = مصر ) , علمونا كده في تانيه ابتدائي إن الصفر لما بيجي بعد علامة ناقص مابيغيرش حاجه في المعادله .
Mohamed Hussein
19 يونيو
الفن مش هو فيفي عبده ولا هشام عباس ... الفن يعني احمد ذكي والريحاني والقصري والست فاتن وسومه و كفى بهم نعمه , الفن يعني الإبداع والرقي والموهبه الي بتبقى من عند ربنا .
.
الدين مش هو الإخوان والسلفيين ولا توب قصير ولا كباير هرتكبها زكايب زكايب عشان أقيم دولة الخلافه , الدين هو ابتسامه تبتسمها وانتي بتدي واحد غلبان صدقه أو بتملّس بأيدك على شعر طفل يتيم , ماعرفشي فيه كام حور عين لكل واحد هيدخل الجنه ومش عايز اعرف , ومش بعمل العمل الطيب و بعده احسب انا كده كسبت كام حور عين النهارده ؟ ولا ماشي بالأله الحاسبه في إيدي , مجرد سعيك لرضا ربنا هو حافز كافي جدا لعمل الخير .
.
الثورجيه والإحساس بالغلابه مش معناها إنك تسب وتلعن في الحكومه والأجيال اللي قبلنا واللي بعدنا وكوكب الأرض 9 مرات كل يوم ولا معناها إنك تقعد اسبوعين من غير ما تستحمى , الثورجيه هي حماس وعقيده بيحركها العقل ويا ويلك لو اتحركت من غيره....... ( وممكن تستحمى عادي , المايه لا تنقض الفكر الثورجي ) .
.
مش بتفرج عالجزيره ولا بتفرج على أحمد موسى , ولما سمعت عن فيلم الجزيره الوثائقي الأخير قلت تيييييييييييييت ولما سمعت عن فيديوهات دفاع مبارك قلت نفس التييييييت .
.
............. أنا كده , قررت أكون كده , قلت هركب عقلي بنفسي و استربّع عليه عشان محدش غيري يركبه .
Mohamed Hussein
18 يونيو
صح الفيديوهات بتقول الإخوان ارهابيين من يومهم , و مخططين لكل حاجه و جاهزين , و أيوه ثورتنا اتركبت من أول ساعه الناس نزلت فيه , بس لا عمري في يوم هندم على ثورة يناير ولا هقول احنا أسفين يا مبارك , جرايمه في ال 30 سنه لا تُعد ولا تُحصى , دوله اتجرّفت بالكامل عشان خاطره هو و ننوس عين أمه الصغير , يكفيه بس جرماً إن الجماعه الإرهابيه كبرت و توحّشت في عهده , ده تقريبا كان بيعلفها بإديه و أدي النتيجه : أجيال فاتت وأجيال جايه اتكتب عليهم يدفعو التمن !! .
............احنا مش أسفين يا #زفت #الطين
Mohamed Hussein
18 يونيو
النهارده كان عندنا اجتماع في الشركه مع الرئيس التنفيذي الجديد , البيج بوس الكبير , وانا بقالي 5 سنين مابحضرش اجتماعات في شركتنا ( عشان ماعنديش مراره ستانلستيل ) , المهم الراجل شكله محترم و وقور , بدأ كلامه بطريقة ( إذا اضطُررت سأفعل و ها أنا أفعل ) و لما زمايلي بدأو يتكلمو الراجل بدأ يهدى و يتكلم بطريقة ( إنتو مش عارفين انكو نور عنينا ولا ايه ؟ ) , و شرح بقى واستفاض في حكاية الماركت ليدر و شغل التنميه البشريه اللي انتو عارفينه ده , بس أول ما قال ( و هنمشي في خطين متوازيين ) عرفت انه زملكاوي و اننا هنفشل تاني و #مكملين !!.
.
شركتنا راجعه و الزمالك راجع و مرسي راجع و الديناصورات تحتل شوارع القاهره .
Mohamed Hussein
18 يونيو
أفرجو عن عبد الله الشامي و 20 غيره , يا عم ده النائب العام اللي أفرج عنه أو القاضي تقريبا , يعني مش السيسي ؟ لأ طبعا وهو السيسي ماله ومال كده .
طب لو كان صدر ضده حكم ب 10 سنين سجن ؟ يبقى القضاء مسيس والسيسي هو اللي أصدر الحكم صح ؟! .
في حالة علاء عبد الفتاح يبقى القضاء مسيس ولو علاء خد براءه في الإستئناف يبقى مش مسيس , في حالة عبد الله الشامي لأ مش مسيس ولو كان خد حكم يبقى مسيس , في حالة أحكام الإعدام على قيادات الإرهابيه يبقى مسيس في حالة براءة ناس منهم مش مسيس , مسيس مش مسيس , مسيس مش مسيس , مسيس مش مسيس ( تعرف تقولها 7 مرات ورا بعض ) ؟!.
Mohamed Hussein
18 يونيو
و تشوف منظر الشاب السلفي من دول وهو بيلزق ورقة ( هل صليت على النبي اليوم ) بمنتهى الحماس والعزيمه و تبص في عنيه تحس بقمة التحفز و إياك إياك حد يقرب من الورقه دي , كله إلا الورقه اللي مكتوب فيها اسم سيدنا النبي يا كفره يا ولاد الحرام ( هو بس مافكرش ولا بيفكر ولا هيفكر ليه الورقه دي في التوقيت ده تحديدا وليه مكانوش بينشروها قبل كده ؟ ) , حماس وعزيمه و عقل في الفريزر من سنين , بيفكروني باللي قتل فرج فوده و هو حاسس إنه بيجاهد وحور العين مستنياه على نار , وقال اصله كافر و كتاباته مليانه كفر بس انا مابعرفش اقرا واكتب سعادتك .
.
شباب السلفيين هما باختصار مجرد زباين عند الإخوان , الواحد منهم زبون زبون مش أي كلام , بس بصراحه شوية زباين لوز لوووووووووز , تحمّل على ضهر الواحد فيهم أحلى نقلة ( سباخ ) و هيوصلها للمكان اللي هتقوله عليه من غير أي تفكير ولا تردد بس أهم حاجه أهم حاجه تعلّق في صدره حجاب مبروك من بتاع سيدنا الولي أبو خطوه , يعني كان أيه قرأنيه على كام حديث شريف و اركب يا معلم !!.
Mohamed Hussein
17 يونيو
قُصر الكلام
.
بوسترات ( هل صليت على النبي اليوم ) هي الحلقه الأخيره من مسلسل ( التجاره بدين ربنا ) من تأليف وإخراج جماعة الإخوان الإرهابيه , بطولة الإخوان و السلفيين ( كومبارس ) , و كل مسلسل في الدنيا لازم بيبقى له أخر , فكّر حضرتك كده هتتأكد إنها الحلقه الأخيره فعلا , عشان مش باقي حاجه من دين ربنا ماتاجروش بيها !!.
الإخوان دلوأتي مزنوقين في الركن و بيفرفرو , و البوستر ده هو النزع الأخير ( حلاوة روح ) , و رأيي الشخصي إن هيفاء وهبي في فيلم ( حلاوة روح ) كانت أكتر احتراما و تدينا من محمد بديع في مسلسل ( حلاوة روح ) بس احنا اللي مجتمع نظره ضعيف .
Mohamed Hussein
17 يونيو
شوف بقى يا أخي الكريم , عشان تبقى معانا في الجماعه و تنال رضوان الله و فردوسه الأعلى فانت مسموح لك تكدب و تقتل و تكفّر و تقذف محصنات و تسب و تلعن و تحرق و تزوّر و تزيّف و تتاجر في العمله و المخدرات و السلاح و الأطفال اليتامى والفقرا الغلابه و تتاجر بكتاب الله و أياته و تستعدي الأجنبي على أرضك وجيشك و تملى قلبك غل وسواد للغير , و تفهم كويس إن أي حد غير جماعتنا يبقى كافر بس إوعى إوعى , إياكَ يا بني أن تنسى الصلاه على سيدنا رسول الله ( هل صليت على النبي اليوم ؟) !!.
.
يا مقصّرين التوب ..ربِّي علينا يتوب ...ساعة ما نبقى هناك
هي الحكايه قلوب .. و لّا الحكايه يادوب ...بالدقن و المسواك ؟!.
Mohamed Hussein
17 يونيو
حكاية ( صلي عالنبي )
.
مشهد رائع من فيلم رشه جريئه : عيّل صغير عمل صوابعه كداهوه مسدس وقال لصاحبه طريخ طروخ , قام صاحبه صدّق وعمل له ميت و اهله قالو ده طخه طخ !!.
.
وهي دي كل الحكايه يا ساده , الإرهابيه بعد ما يأست وفاض بيها و أفلست تماما قالت نلعب على حكاية الوازع الديني عند الناس و نكسب شويه تعاطف , و فجأه ظهرت ملصقات صلي عالنبي , انت مابتصليش عالنبي ليه ؟ يا جدع تعالى صلي عالنبي , عيب عليك يعني لو ماصلتش عالنبي .........مممممممممممم عليه أفضل صلاة وسلام يا سيدي ( بس غريبه ان البوسترات دي مكانتش منتشره قبل كده ولّا هي حكاية صلي عالنبي دي اكتشفوها أوّل امبارح بالليل ؟! , ولادك مش يعرفو حاجه عن سكس معالي الوزير !!.
.
يعني باختصار الإرهابيين قررو بعد إفلاسهم إنهم يلعبو دور العيل الغتيت ( أيوه اللي بيبقى تخين اوي و قصير ده ) , اللي بيجي كل شويه يرن الجرس بتاع البيت و يطلع يجري , وفي كل مره الداخليه ( الغبيه ) تطلع تفتح الباب وتجري ورا الواد الغتيت في الشارع و الناس تضحك بقى والنشطاء يضحكو والكولجيه يقولك هي الشرطه الغبيه بتجري ورا الواد الغتيت ليه ؟ هو الغتيت كان عمل ايه يعني ؟ الحريه للغتيت , كلنا الغتيت !!.
على فكره , الغتيت بيرن الجرس عشان عايز الشرطه الغبيه تجري وراه في الشارع و الناس تتفرج عليهم , هو ده المطلوب ....وانت ؟ أيوه انت ؟ مش هتصلي عالنبي بقى ( من أقوال صاحب غزوة الصناديق , و قالت الصناديق لدين ابوكو نعم , نعم يا دلعدي ) .
Mohamed Hussein
17 يونيو
( المجاهدين ) بتوع داعش بيهددو جيش مصر و بيهددو كمان بفتح مصر ............فتح مصر ؟ ده على أساس إن مصر دي علبة سلمون صح ؟.
.
و من كام شهر كده ( المجاهدين ) التانيين بتوع حماس كانو عملو عرض عسكري ب 5 عربيات ربع نقل ( زي اللي بننقل فيهم الفراخ وشكاير الكُسب في مصر ) , راكب عليهم كام عيل من المقاطيع بتوعهم وقالك بقى عرض عسكري وخاف يا جيش مصر !! .
.
و من كام سنه أيام مبارك ( بعد حادث أديس ابابا ) , كانو ( المجاهدين ) التالتين بتوع حكومة السودان بتهدد بالحرب على مصر , و واحد طلع سأل مبارك هتعمل ايه في تهديدات السودان بالحرب ؟ قام مبارك قاله السودان دوله عربيه شقيقه و عندها 3 دبابات و طيارتين !!.
.
وبعد سنين طويله من تهديدات السودان لمصر تيجي غاره اسرائيليه تضرب مصنع بيعمل ( بمب العيد ) في السودان و يطلع وزير الدفاع ولامؤاخذه السوداني يقولك احنا ماعرفناش نرصد الطياره الإسرائيليه عشان الطيار كان طافي النور !! , كان معاه حق مبارك , هما 3 دبابات وطيارتين ده حتي مفيش عندهم رادار
.
عموما يعني وعشان احنا مش فاضييين و ورانا بلد عايزين نبنيها و مش لنا في قزقزة اللب و التفتفه , فانا رأيي إن المجاهدين الأولانيين بتوع داعش يعملو جبهة مع المجاهدين التانييين بتوع حماس و المجاهدين التالتين بتوع عمر البشير , أه يعملو جبهه قتاليه واحده واحنا نبعت لهم عربيتين أمن مركزي ( لا كتيبة جيش ايه ؟ الحكايه مش مستاهله , بيقولك الطيار طافي النور ؟ ) , و بس بقى نجيبهم بالكام عربيه الربع نقل و الدبابتين , أهو عالأقل نستقيد من العربيات دي في نقل الفراخ بين المحافظات .
Mohamed Hussein
17 يونيو
الوزرا هيحلفو اليمين الساعه 7 الصبح يعني بعد ساعتين تقريبا !! , يبقى لازم يكونو صاحيين من قبل 5 مثلا , طب انا ماعرفشي حد في مصر كلها بيصحى قبل 5 الصبح كل يوم غير الحاجه أمي ربنا يديها الصحه , طب أمي مش موجوده ليه في التشكيل الوزاري يا عم ابراهيم ؟ ولّا عشان يعني مابتعرفشي تربط الطرحه سبانيش ؟!
Mohamed Hussein
16 يونيو
التشكيل الوزاري الجديد
.
شالو نبيل فهمي من الخارجيه وجابو واحد تاني , تلاقيهم شالوه عشان حكاية ( العلاقه بين مصر وامريكا زواج شرعي وليست علاقه عابره ) , هو السياسي كده ممكن يتحرق بجمله قالها أو موقف صغير عمله , عموما أهي فرصتك ياسطى نبيل تشتغل بقى مأذون شرعي زي مانت بتحب .
.
لغو وزارة الإعلام , على فكره ده كان مطلب ثوري يا منى , مفيش دوله محترمه فيها وزاره للإعلام يا شريف , دي رقابه على الرأي و الفكر و المعتقد يا يسري ........... ولا إيه رأي الثورجيه ؟!.
.
عملو وزارة جديده للعشوائيات , أهي وزيرة العشوائيات دي لو حد قفشها بتلف في شوارع الزمالك ولا الرحاب ولا المهندسين يبقى لازم يعتقلها أو يضربها بالنار , و أساسا المفروض يبقى مكتبها في الخصوص ( ماتنساش تاخد معاها حتتين سلاح بقى ) أو أضعف الإيمان في المرج القديمه جنب محطه المترو ( فيه هناك راجل حاطط باترينه في الشارع فيها جاتوه و دايما مليانه دبان , بيبع ال 12 حتة جاتوه ب 5 جنيه والدبان هديه مجانيه ) .
.
إحم إحم , السيد الفريق أول بسم الله الرحمن الرحيم باقي في منصبه وزيرا للدفاع و السيد اللواء بسم الله الرحمن الرحيم برضه باقي في منصبه للداخليه , حد عنده اعتراض ولا حاجه ؟!!.
.
و تقريبا كده والله أعلم , مفيش ولا مزه في الحكومه الجديده , شوفتو بقى إن الحكومه دي جاده جدا في تطبيق قانون ( منع التحرش ) ؟!.
Mohamed Hussein
16 يونيو
قبل زحمة رمضان بقى و قبل مانشغل بشنطي وكراتيني و أوراقي و فرشتي ورولتي عشان انزل مصر , عايز أقول لكل المصريين وكل المسلمين ( كل سنه وانتو طيبين , رمضان كريم ) , تهنئه من القلب لبدلنا مصر ربنا يحفظها من شر الإرهابيين و شر تجار الثورات و المتنطعين , و تهنئه خاصه جدا بمناسبه اقتراب شهر رمضان المبارك للصديقه المصريه القبطيه الجميله الطيبه ميريام أيوب , اللي كتبت على صفحتها من كام يوم :
.
ايوة انا المسيحيه اللى مستنية رمضان بفارغ الصبر !!
ايوة انا المسيحيه اللى مستنية الزينة بتاعة رمضان
ايوة انا المسيحيه اللى مستنية صوت المدفع و الناس بتتجمع عشان يفطروا
ايوة انا المسيحيه اللى مستنية المسلسلات بتاعة رمضان:)
ايوة انا المسيحيه اللى بتفضل تسأل صحباتها رمضان امته ؟:)
.
عايز أقول لها كل سنه وانتي و أقباط مصر قبل مسلميها بألف خير , ماتزعليش لو واحد من المسلمين استغل بوستك الرائع و قال بقى إنه ( يهديكي ) للإسلام , معلش يا ميريام , حقك عليا انا , أهي بلدنا يا ستي وكل ما تلاقي فيها 1000 واحد يمين أكيد هتلاقي اتنين تلاته شمال , اتنين تلاته مايغيّروش حاجه في المعادله أبدا , نسيجنا واحد من 1500 سنه .
Mohamed Hussein
16 يونيو
عايز لما أنزل مصر أشتغل مستشار للسيسي ( لشئون أي حاجه ) , يتهيألي هقدر أفيده أكتر من ناس كتير من بتوع ( فرخ الكربون ) , السي في بتاعي هكتب فيه جملتين اتنين ( ماعنديش جواز سفر أمريكي و لا نمساوي ولا معايا تأشيره لأي دوله في كوكب الأرض ) , يعني هشتغل بطريقة ( يا قاتل يا مقتول ) , يا إما نقدر نعمل حاجه للبلد دي فعلا يا إما أموت فيها زي اللي ماتو , ماعندناش رفاهيه الإختيار .
.
عايز 7500 جنيه في الشهر يا سيسي ( ألفين مدارس و 4 مصاريف بيت , و 1500 لزوم علاج و دكاتره و مصايف في جمصه وراس البر مش مهم ) ده غير الحوافز و البدلات و المستنقعات , والله انا كده كارمك أخر كرم , وممكن أجي الشغل بعجله , أهو عالأقل اترحم من مخالفة ربط الحزام اللي هاخدها كل يوم في مصر .
........... هه ؟ قلت ايه يابه عبفتاح ؟ نقرا الفاتحه ؟!.
Mohamed Hussein
16 يونيو
عصام حجي وجواز السفر
.
دكتور عصام حجي خد جواز سفره من الدرج وسافر على امريكا تاني ( على بلد المحبوب وديني ) , بيقول إنه عرف حجم الجهل في مصر لما اشتغل فيها السنه اللي فاتت دي !! .
طب يا دكتور عصام هو احنا كنا قلنالك ان مصر دي سويسرا مثلا ؟ طب لو هي سويسرا كنا هنحتاج حضرتك في إيه ؟ .
على أي حال انت راجل عالم محترم لكنك مش بتاع سياسه , بتاع معامل وبحث علمي جايز بس السياسه حماده تاني خالص , وانا كان رأيي إنك تستقيل أو تقال أيام حكاية جهاز عبد العاطي بسبب تصريحاتك , وقلت ان تصريحك وقتها ينفع أقوله انا و اصحابي الصيّع لكن مستشار الرئيس ماينفعش , كان المفروض يتصرف بشكل تاني خالص , مش قلت لك ؟ جايز عبد العاطي يكون في البحث العلمي بتاع كفته بس انت كمان في السياسه والعمل العام بتاع كفته برضه .
.
و بعد استقالة البرادعي واستقالة عصام حجي بنفس الأليه تقريبا أنا عرفت الغلط فين و نصلحه ازاي ؟
يا ريس عبد الفتاح , نصيحه لوجه الله , لو في يوم احتجت لعالم كبير من المصريين اللي عايشين في أمريكا وأوروبا لازم قبل ما تسلمه أي عمل سياسي تاخد منه جواز السفر و تقطّعه , و لازم يحلف على مصحف إن بلده هي مصر و إنه يوم مايعجبوش الشغل في مصر يقرر إنه يسافر على بلده ( مصر ) !!.
.
في حفظ الله دكتور عصام ربنا يكتب لك السلامه , ماتقلقش على مصر والجهل اللي فيها , ربنا هيبعت لها اللي نفسه طويل وماعندوش جواز سفر و هيطلّعها من الجهل ده , أجدادنا في يوم من الأيام كانو بيعلمو العالم معنى الحضاره , وبعد 7 الاف سنه من حضارة المصريين اكتشفو أمريكا و لقو فيها شوية هنود حمر وقرود بتتنطط عالشجر , و الحكايه أصلها جينات و هندسه وراثيه و حضرتك سيد العارفين , ربنا هيبعت لنا اليوم ده تاني , ساعتها ممكن حضرتك تفكر جديا في الحصول على الجنسيه المصريه !!.
Mohamed Hussein
15 يونيو
و عشان تعمل بحث علمي في مصر على نضافه و صح الصح يعني محتاج تعمل كام خطوه تمهيديه في الأول
.
بص يا سيدي , إنت تسجن عادل عبد العال و سعيد حساسين و معاهم الحويني و محمد حسان و كل واحد نطق كلمة ( بول البعير ) و بعدين تطلع على قنواتنا الفضائيه تلم البهوات والمزز بتوع ( خبيرة الأبراج , عالمة الفلك , واعرف اسم عروستك من صوابع رجليك ) و بالمره هات معاهم سماح أنور و ريهام سعيد , و بعدين تعدّي على كل محلات العطاره و النشوق واللبان الدكر و تقفلها و بعدين الستات اللي بيبقو فارشين بأدويه في الشارع و علاج الإنتصاب والضعف الجنسي تلمّهم , بعدين تروح حضرتك على شركات بير السلم اللي بتقولك المنتج الأصلي بتاع الملكه حتشبسوت والشامبو اللي كانت بتستخدمه نيفرتاري يوم الصباحيه و تنفيهم لجزيرة مالطه أو تبعتهم العراق , وانت في طريقك عدّي على بتوع الحجامه والطب النبوي و خدهم معاك .
.
يعني باختصار مطلوب من حضرتك تلمّ نص الشعب اللي عايش في ماية البطيخ ده عشان النص التاني يعرف يزرع لك بطيخه بالهندسه الوراثيه على شكل متوازي مستطيلات ( لسهولة النقل ) زي ماعملو اليابانيين و الصينيين .
.
Mohamed Hussein
15 يونيو
خبر سحب قلادة النيل من البرادعي مش حقيقي ( أعتقد ) , أنا ضد البرادعي وضد سحب قلادة النيل منه , الحكايه مش لعب عيال , دي جايزه من الدوله و كل حاجه لها أصولها , البرادعي ممكن يكون جبان أو رخو أو له وجهة نظر مختلفه ... و صح لبّسنا في الحيطه يوم ما استقال لكنه مش خاين ولا بيواجه تهمه معينه ( غير العبط السياسي جايز .... و دي مش تهمه ) ماعتقدش عبد الفتاح السيسي ولا الحكومه يعملو حركه زي دي , اعقلو يا بشر , البلد مش مستحمله , بلاش تشمّتو فينا كلاب السكك .
Mohamed Hussein
15 يونيو
قمة السيطره إنك تخلّي اتنين أرَنَات زي إبراهيم محلب و محمد إبراهيم يصحو من النوم الساعه 4 الفجر و توقفهم في طابور الصباح و تخليهم يركبو عجل .
ده الواحد مننا لما بيقنع مراته انها تعمل محشي مره كل شهرين بدل كل 6 شهور دي بيبقى قاعد و نافش ريشه و حاسس إنه أسد فشر حازم أبو اسماعين.
عاجبني أنا أوي الراجل عبفتاح السيسي ده , سيبك انت بقى من الهري , بلا كفاءه سياسيه بلا كفاءه جنسيه , وزير داخليه في مصر بيتثبّت ؟!! , دي من علامات الساعه , ................ السيطره حلوه مفيش كلام .
Mohamed Hussein
15 يونيو ·
خطوتين يا سيسي
.
الأولى هي التحفظ على أموال محلات زاد وسعودي المملوكه لقيادات اخوانجيه في البنوك , ده اسمه ( تجفيف منابع الإرهاب ) , ماحنا مشينا في طريق والوقوف في نص الطريق ده انتحار , ماينفعشي تبقى جماعه إرهابيه واحنا سايبين فلوسها وتمويلها شغال , صح المحلات دي هي مجرد نفحه من فلوس الإخوان اللي رعرعت و لظلظت في عهد المخفي مبارك برعايه و مباركه أمريكيه لكنها خطوه في الطريق .
.
التانيه هي خبر سمعته عن تحديد اسم الأزهر الشريف كجهه واحده و وحيده لجمع الذكاوات والتبرعات من الناس ( دي كانت فكرتي من سنتين ) , حضرتك كده كمواطن مصري عايز تطلع ذكاه أو صدقه هيبقى قدامك حلّين , إما انك تروح للفقير بنفسك و توصل له صدقتك لحد بيته أو تتبرع بيها لمؤسسة الأزهر , يعني لجهه محترمه وعليها رقابه , ولا تحب فلوس صدقتك وذكاتك نشتري بيها سلاح ومتفجرات أو نصرفها على دور أيتام ونبقى ناخد شوية أيتام نلبسهم كفن و نقول أطفال مع الشرعيه وضد الإنقلاب ؟!!.
.
كده السيسي مش بيلعب , بيشتغل بجد وشايل روحه على كفه , مش بيخاف , ياريت حضرتك تسانده و لما يغلط أو يعك هنتقده قبلك ( حاول تصدق ) .
Mohamed Hussein
15 يونيو
حالة لغط غريبه بتحصل في العراق , اللي يقول دول مسلحين داعش واللي يقول لأ لأ دي مجموعات من جيش صدام القديم واللي يقول ده تحالف بين الإتنين , لخبطة ال 3 سنين اللي فاتو اتجمعو واتركّزو في العراق , و امبارح بالصدفه لقيت مذيع في قناة مصريه عامل مداخله عالهوا مع واحد عراقي وبيسأله نفس السؤال , هما مين اللي دخلو الموصل وتكريت وصلاح الدين ؟ داعش ولا مقاتلي صدام ؟ ممممممممم يعني الإعلاميين المصريين بيدخلو على صفحاتنا بتاعة الفيس تقريبا و زي ما بنعمل بيعملو بالظبط .
بس النهارده ربنا هداني لحل المعضله دي , الحل بسيط خالص , لأ ماتسمعشي كلام اللي بيقولو مجاهدين ولا اللي بيقولو صداميين , وماتقراش تقارير ولا حاجه , الحل باختصار هو إنك تشوف قناة الجزيره بتقول عليهم ايه و تفهم العكس تماما , أه , الجزيره بتقول ثوره إسلاميه في العراق , بس كده يا معلم , أنا ضدها وش , ماهو المثل بيقول ( خد رأي الجزيره واعمل عكسه ) , عشان كده انا ضد العك اللي بيحصل في العراق رغم كراهيتي الشديده لحكومة المالكي العميله ولأمريكا وإيران .
.
الجزيره مابيجيش من وراها أي خير حتى اسألو سعيد الصحاف , و في العراق حاليا ماتش بيلعبو فيه عالملابس الداخليه , أطراف كتير هتستفيد من اللي بيحصل ... تركيا تستغل الموقف وتعمل دوله للأكراد في شمال العراق و تسكّن فيها أكراد تركيا عشان تخلص منهم و ايران تلاقيها فرصه كويسه للدخول العسكري في العراق لحماية المالكي وحكومته وامريكا هتدخل لنفس السبب ( اه بالمناسبه , لسه عندنا حمير فاهمين ان فيه حالة عداء بين امريكا وايران !! ) , وداعش تحقق أي انتصار وهمي بعد هزيمتها الساحقه في سوريا عشان يفضل لها وجود ( برعايه أمريكيه ) ...مش بقول لكو ماتش و بيلعبو فيه عالفالنات ؟
Mohamed Hussein
14 يونيو
وجع
.
بقى لما واحد متغرب زي حالاتي يفكر إنه ينزل مصر بقى عشان يعيش ( يعيييييش ) , و بنتي الحمد لله خلصت جريد 1 يعني أولى ابتدائي وعايز أنا بقى أدخلها تانيه ابتدائي في مصر , مطلوب مني إيه يا رجاله ؟ صلّو بقى عاللي هيشفع فيكو يوم الدين :
.
الأوّل أجيب شهادتها من المدرسه و تكون متوقعه بتوقيع المدير السعودي المعتمد , بعدين أروح أوثقها في وزارة التعليم في الدمام بعدين أوثقها في وزارة الخارجيه اللي في الخبر بعدين أبعتها للسفاره المصريه في الرياض تتوثق , بعدين تاخدها مراتي بقى و تدبّس بنتي في الشهاده وتنزل مصر
.
تروح القنصليه السعوديه الي هي في جاردن سيتي تقريبا بعدين تروح وزارة الخارجيه المصريه اللي في ماعرفشي فين بعدين تطلع على مدرسه لغات تقوم المدرسه تقول لها تروح الإداره التعليميه الفلانيه بعدين تجيب خطاب متوجه من ماعرفشي مين لمعرفشي فين بعدين ترجع المدرسه عشان يعملولها امتحان ( أومال انت فاكر تانيه ابتدائي دي بالساهل كده ؟ )
.
بعدين لو كانت المدرسه بتدرّس ألماني مثلا أو فرنساوي من كي جي وان يبقى لازم البت تاخد كورس مكثف في الألماني ده ( بتاع ال 3 سنين ) يعني لازم نفكّ البت من دبوس الشهاده المتوثقه عشان تاخد الكورس , بعدين نرجع ندبسها تاني ونروح بيها المدرسه , بعدين المدرسه تحطنا على ويتنج ليست و تنظر في أمرنا بقى , بس الحمد لله الحمد لله مش مطلوب توقيع من امين عام الأمم المتحده ولا كاترين أشتون ولا مطلوب ختم من سفارة المجر في كوستاريكا .
.
الحقنا يا عبد الفتاح , الحقني يا ريس دانا مواطن مصري مش فنزويلي و عايز أدخل بنتي تتعلم ( ولا تحب أعلمها صنعه و تشتغل خياطه ؟ ) , البت هتتعلم في مدرسه خاصه يعني مش هنكلف أم الدوله أي حاجه , و ناقص تقولو هناخد خالك رهينه عندنا لحد مابنتك تخلص التعليم , يا ريس البلد دي محتاجه تتفور القوانين اللي فيها , يعني مطلوب مني أعدّي على 27 جهه و هيئه رسميه وخاصه في بلاد الله لخلق الله عشان بنتي تدخل تانيه ابتدائي ؟ دانا لو هشغلها في الموساد الإسرائيلي مش هيلفّفونا ال 7 لفات دي .
.
السيد المحترم وزير خارجيه مصر , المسئول الأول عن القوانين الباليه الخاصه بالمغتربين دي , عايز أسأل معاليك , هو حضرتك جنابك يعني مرّيت على 27 جهه وهيئه و دخلت كذا اختبار كده قبل ماتبقى وزير خارجيه ؟! إيه ؟ بتقول إيه ؟ لأ ؟ بس يا معلم كده يبقى مفيش مدرسه هتقبلك في تانيه ابتدائي !!.
Mohamed Hussein
14 يونيو
فكره ب 20 جنيه
.
خلاص بقى يابه الحاج عبفتاح , حفله و عملنا و عجل وركبنا , ورّينا للعالم منظر محترم جدا في الحفله و قلنا للأعمى إن مصر فيها أمن واستقرار , ندخل بقى في الخطوه اللي بعد كده , هقولك تعمل ايه ؟ عشان انا عارف إن الناس اللي حواليك ممكن يكونو طيبين و وطنيين بس غالبا هيكونو من بتوع فرخ الكربون و طابع دمغه أبو 15 ساغ , و المروحه العهده , أيوه الناس اللي البيروقراطيه خدت من جتتهم راقات .
.
بص يا سيدي , دلوأتي حكاية العجل دي حلوه وممكن تتحول لحمله اعلاميه عشان تشجع الناس على كده , من ضمن فوايدها انها هتخف الزحام في القاهره والتلوث وطبعا استهلاك البنزين , إنما ولنفس الأسباب دي ممكن نعمل فكره تانيه سهله أوي ومش هتكلف الدوله أي حاجه .
.
بقى القاهره اللي فيها اكتر من 20 مليون نسمه دي هتلاقي منهم عالأقل مليون نسمه يوميا بيلفو في شوارعها جايين من الأقاليم ( يعني فلاحين زي حالاتي ) , اللي رايح الوزاره الفلانيه يخلص ورقه واللي رايح ميدان التحرير يجيب شهادة تحركات واللي واللي ده غير أهل القاهره نفسهم اللي بيلفو عشان تخليص الأوراق والشهادات والتراخيص والمرور وخلافه
.
والحل باختصار هو انك تنسف مطبخك القديم ده كله , كام ألف جهاز كمبيوتر في كل المصالح الحكوميه في مصر , وبرنامج كمبيوتر يربط الوزارات والهيئات ببعض ( البرنامج ده موجود حتى في الدول العربيه ) , وكل واحد يخلص مصلحته من مدينته أو حتى من بيته عن طريق النت , الرسوم اللي بتاخدها في ختم ورقه ولا توثيقها أو شهاده أو مخالفه ممكن تزود عليها 10 جنيه بس أو حتى 5 جنيه , ولما يكون فيه ملايين الأوراق والمعاملات بتحصل في السنه يبقى حضرتك بتتكلم في مليارات بتتصرف في الهم ده , ال 10 جنيه هتعمل مليارات وفي نفس الوقت هتوفر عالمواطن فلوس أكتر في المواصلات والتنقل بين المحافظات ووقته اللي بيضيع والمجهود والزحمه والتلوث وخلافه .
.
وهتحقق له رفاهيه هو محتاجها ( حياة المواطن فيها اللي مكفيها ) .......... وبس كده , قرار جمهوري , وزير شاب يتولي تحويل النظام الإداري للدوله من نظام فرخ الكربون لبرنامج كمبيوتر , تدريب للموظفين لمدة 6 شهور والحكايه دي تاخد سنه بالكتير , التكلفه هيدفعها المواطن وهو اللي كسبان .
.
إيدك على عشين جنيه بقى يابه الحاج عبفتاح تمن الفكره دي .
Mohamed Hussein
14 يونيو
كان نفسي أكون إنسان وباخد يومين أجازه في الإسبوع , طب يوم واحد طيب ؟ طب نص يوم ؟ طب ساعتين ؟ بلاش خالص , ممكن أخد يوم العيد أجازه ؟ برضه لأ .
.
إوعى حد يضحك عليك ويقولك أصل مهنتنا دي مهنه ساميه , ساميه نفسها قطّعت كارنيه النقابه و شغّاله دلواتي سمسار في مدينة الرحاب , و بتكسب من بيع شقه واحده أد مكسبك من بيع 100 ألف علبة نوفالجين فاصوليا !!.
Mohamed Hussein
14 يونيو
بروتوكولات حكماء الفيس بوك
.
1- من حقك تؤيد البرادعي و تدعمه وتدافع عن افكاره بمنتهى القوه , ده يبقى اسمه توجه سياسي , وساعتها تحط على بروفايلك صورة جيفارا أو نيلسون مانديلا أو صلاح جاهين أو أي حد من العظماء .
.
2- من حقك تؤيد حمدين و تدعمه وتدافع عن أفكاره بمنتهى القوه , ده يبقى اسمه انتماء سياسي , وساعتها برضه تحط صورة أي حد من العظماء .
.
3- من حقك تؤيد مرسي أو ابو اسماعيل وتدافع عن أفكاره بمنتهى القوه , ده يبقى اسمه عقيده سياسيه و حط صورة اللي يعجبك .
.
4- لكن مش من حقك تؤيد السيسي ولا تدعمه و لا تدافع عنه وإلا يبقى إسمك طبّال , طبّاااااااااااااااال , والمفروض بقى ماتحطش صورة جلال عامر , صورة أحمد موسى تبقى لايقه عليك أكتر , طب يا جدعان ماينفعشي تسمّو تأييدي انتماء سياسي أو توجه سياسي ؟ لأ ماينفعش ولازم تغيّر الصوره دي فورا , إحنا أصلنا بنمارس الديمقراطيه بمنتهى الديكتاتوريه بقى و محدش يقدر علينا .
............................
............................
من يوميات ( نائم في علبة الكولّه ) .
Mohamed Hussein
14 يونيو ·
فيديو عجيب وغريب , يخليك تضحك وتبكي في نفس اللحظه , شيخ شيعي ( مرجع ) طلع على المنبر يخطب , افتكر مشهد مقتل سيدنا الحسين رمى الميكروفون من ايده وقعد يصوت ويلطم و شق في هدومه , واحد من المصلين كان متأثر أوي قام طلع على المنبر و نزل طحن في مولانا الشيخ ومولانا الشيخ يطحن فيه , ضرب بالمحبه والتأثر يعني , واحد مسك الميكروفون وقعد يسخّن الباقيين عشان يطحنو في بعض !! ............ أنا مش بسخر من طقوس الناس و معتقداتهم , بس معاه حق الغرب الكافر ابن الحرام ياخدنا غسيل و مكوه , و كتّر خير كوكب الأرض إنه مستحملنا لحد دلوأتي , إحنا أكبر دليل على إن الإنسان أصله قرد .
.
باسم الإسلام ( والجهاد ) جماعة الإخوان في مصر بتقتل وتحرق وتكدب وتقذف محصنات و تكّفر في خلق الله وماعندهاش مانع تستعين بعدوك على جيش بلدك , بإسم الإسلام ( والجهاد ) جماعة بوكو حرام بيخطفو أطفال بنات صغيرين و ياخدوهم رهينه عشان يفرجو عن بعض ال ( مجاهدين ) , بإسم الإسلام ( والجهاد ) أنصار داعش بيقطعو روس الناس و يلعبو بيها كوره , بإسم الإسلام ( والجهاد ) حركة طالبان والمجاهدين الأفغان كانو بيحارب الإتحاد السوفيتي لصالح أمريكا ويزرعو حشيش عشان يشترو بتمنه سلاح , بإسم الإسلام ( والجهاد ) منعت حركة شباب المجاهدين في الصومال الناس ( الستات ) من مشاهدة مباريات كرة القدم عشان الرجاله لابسين شورتات , بإسم الإسلام ( والجهاد ) جلدو صحفيه في السودان عشان كانت لابسه بنطلون جينز و هيقطعو رقبه واحده مسيحيه حامل بتهمه الرده عن الإسلام .
.
أعظم وأكبر و أهم دليل على عظمة دينا الإسلامي وإنه باقي أبد الدهر هو وجود أكتر من مليار مسلم لحد النهارده لسه ما ألحدوش ولا شقّو خلجاتهم بسبب اللي مكتوب فوق ده , ولولا إيماني بالله و حيائي منه وشوية عقل باقيين عندي كنت قلت مالها البوذيه بس ؟ بوذي وأفتخر !!.
Mohamed Hussein
13 يونيو
بعد 15 سنه في الشغلانه دي اللي انا بشتغلها , النهارده اتسألت أغرب سؤال في حياتي , واحده داخله عايزه جهاز تسبيح !! , أيوه جهاز تسبيح على مافهمت يعني جهاز يقول سبحان الله سبحان الله .
طب يعني هما الغرب الكفره ولاد الحرام دول اللي اخترعو جهاز تسبيح عشان المسلمين يشتروه مش عارفين يخترعو أي جهاز يصوم رمضان بدالي السنه دي ؟ الجو هيبقى حر أوي , أنا مستعد أشتري الجهاز اللي هيصوم مكاني بأي سعر و يا سلام بقى لو كان معاه أوبشن إنه يصلي بدالي ضهر و فجر وانا أكمّل الباقي !!................................. هلَكَ المتنطعون .
Mohamed Hussein
13 يونيو
و لقيت واحد صاحبي كاتب كده بالنص : هو ايه لزمته الماراثون ده وركوب العجل ولا هي تكلفه ومصاريف عالفاضي ؟! ........... أه والله .
مممممممممم بص يا صاحبي , النوع اللي حضرتك شوفته من العجل ده بيموّن بنزين 80 مش 92 زي مانت فاهم , والعجله الواحده بيكفيها لتر بنزين تمشي بيه 20 كيلو , يعني لو قلنا عندنا 5 الاف عجله شاركو في الماراثون يبقى كلفونا 5 الاف لتر بنزين ب 15 الف جنيه , وقول الصور دي اتاخدت بكاميرا كانون ديجيتال ب 350 جنيه وهنرمي الكاميرا بعد كده , تبقى التكلفه الإجماليه 15 ألف و 350 جنيه , لأ الترينجات دي كل واحد جايب الترينج بتاعه معاه من البيت , مش كتير على مصر 15 ألف 350 جنيه صح ؟ ممممممممممم مانا مش لاقي كلام أقولهولك بصراحه .
.
و لعلمك الشديد أنا واثق إن السيسي خد الشباشب بتاعة الوزرا رهن لحد ما يرجعو العجل , زي ما عبله كامل عملت كده , أيوه أصل العجل ده عهده والوزير اللي يبوّظ حاجه في عجلته نعمل له محضر تبديد عهده و نخصم تمنها من مرتبه و نحط السيخ المحمي في صرصور ودنه .
................ أه , نسيت أقول حاجه , صاحبي ده بيشتغل محامي و حقوقي و ناشط سياسي لحد مانلاقي ناشط سياسي !!
Mohamed Hussein
13 يونيو
السيطره حلوه مفيش كلام
.
إنما أحلى حاجه في صور الماراثون دي هي منظر الوزرا وهما واقفين مش طايقين نفسهم ونازل عليهم غضب ربنا , تلاقي السيسي بعت لهم عسكري من الشرطه العسكريه جابهم من بيوتهم , العسكري دخل على محمد ابراهيم في سريره وقال له قوم قوم السيسي عايزك دلوأتي حالا عشان هتركبو عجل !! , ومحمد ابراهيم بقى قعد يبرطم في سره و يسب ويلعن في ثورة 30 يونيو و انتخابات الرئاسه و يقول يا جدعان دانا وزير داخليه , أمين الشرطه عندي ما بيتثبّتش أقوم أنا الوزير أتثبت بالشكل ده ؟ فيه وزير داخليه يصحى قبل الفجر عشان يركب عجل !!.
.............. السيطره حلوه مفيش كلام .
افتكرت صوره للمخفي مرسي , كان واقف جنب السيسي و وراه كام ظابط كده ( رتبه ) , واقف مرعوب و خايف كأنه حرامي غسيل مش رئيس دوله !!.
Mohamed Hussein
13 يونيو
ههههههههه يا لهوي , دي حكاية ماراثون العجل دي كانت الساعه 5 الفجر !! , يعني انت صحيت يا عبد الفتاح و لمّيت رجالتك و الوزرا و عملتو ماراثون الساعه 5 فجر النهارده ؟ بالك إنت ؟ في نفس التوقيت ده بالظبط كنت أنا صليت الفجر و رتبت شوية حاجات في شنط السفر و دخلت انام عالسرير , حطيت راسي عالمخده ومسكت التابلت بتاع بنتي عشان ألعب شوية كاندي كراش قبل مانام ( أحب أبشّر الشعب المصري كله إننا وصلنا ل ليفل 41 في كاندي كراش ) .
.
بص يابه الحاج عبفتاح , اللي أوله شرط أخره نور , أنا بقالي 15 سنه بنام بعد الفجر ( هذا ما وجدنا عليه أباؤنا ) , و نازل مصر عشان أعيش فيها , عايز انت بقى تصحى من الساعه 5 انت ورجالتك ماشي أهلا وسهلا , وابقو خلّو بالكو من البلد وانا نايم , إنما تقولي الشعب لازم يصحى من 5 الصبح هقولك على جثتي و جثة شامبو , قول الشعب كله يصحى 5 الصبح ما عدا محمد حسين و إلا هروح تحت كوبري الملك الصالح اسرق علبة كوله من العيال اللي هناك واشم فيها ليلتين تلاته وانزل اهتف لوحدي : يسقط يسقط حكم العسكر .
Mohamed Hussein
13 يونيو
رساله رقم 2 من رئيس الجمهوريه
.
الرساله الأولى كانت حفلة التنصيب و حضور وفود من أغلب دول العالم , حفل محترم يليق بإسم مصر , يوميها قلت انسى ال 10 مليون و لّا حتى 100 مليون , الرساله كانت بتقول ان البلد دي فيها استقرار سياسي وفيها أجهزه أمنيه تقدر تأمّن مئات المسئولين من مختلف دول العالم في نفس الوقت , الرساله كانت موجهه لكل دول العالم اللي بتعلب سياسه خارجيه و للمستثمرين و لشركات السياحه .
.
النهارده كانت الرساله رقم 2 , رئيس الجمهوريه لابس بنطلون ترينيج و تي شيرت و راكب عجله في ماراثون فيه ألاف الشباب و لمسافة 20 كيلو , مفيش رساله أبدا ممكن توجهها للعالم تبقى أقوى من كده , بس اللي عمله السيسي ده اسمه ( سلعه ) , يارب يكون عندنا مسئولين يعرفو يروّجو للسلعه دي صح .
.
إنما السؤال اللي محيرني بجد , لأ مش الإتنين شباب اللي ورا السيسي اللي عضلاتهم مفتوله دول , أكيد دول من قوات الحمايه الخاصه ومدربين على استخدام السلاح بمنتهى الدقه وهما سايقين العجله و العربيه , بالمناسبه افتكرت حادثة اديس ابابا اللي اتعرض لها مبارك و لما مبارك حكى عنها قال اتعرضنا لاطلاق نار من قناص فوق بيت بعيد , قلت للسواق يلف بالعربيه , والسواق بيلف قام الحارس بتاعي جاب القناص بطلقه والعربيه بتلف !!.
.
السؤال بقى , هو عبد الفتاح السيسي راح زار الست اللي اتعرضت للتحرش إمتى و إزاي ؟ و عمل حكاية الماراثون دي إمتى وإزاي ؟ حد في حضراتكو شاف موكب للسيسي قافل صلاح سالم والدائري مثلا ؟!! الله يجحمه بقى أحمد نظيف ولا حبيب العادلي , كان لما واحد منهم بيروح يزور أخوه في محافظه تانيه كانو بيقفلو المحافظتين بالضبه والمفتاح عشان الباشا معدّي .
.
هو الراجل عبد الفتاح السيسي ده جرئ أوي للدرجادي ولا متهوّر ولا عبقري وعامل حساب كل حاجه ؟ ربنا يحفظك للبلد دي يا عبد الفتاح لو كان جواك خير لها .
Mohamed Hussein
12 يونيو
حاول تتخيّل
.
حضرتك قاعد في بيتك في بغداد , فتحت التلفزيون لقيت صور وفيديوهات بتقول قوات داعش دخلت الموصل و صلاح الدين , قناه تانيه بتقول ان القوات دي مدعومه من مقاتلي جيش صدام القديم بيقودها عزة الدوري , افتكرت إن بنتك الكبيره متجوزه وعايشه في الموصل , بتتصل بيها مباتردش , شوفت في التلفزيون ناس كتير هربانين من الموصل في الإتجاه للجنوب و جثث كتير مرميه , دققت أوي مالقتشي صورة بنتك , الحمد لله كان قلبك هيقف , ابنك الوسطاني شغّال في شركه في البصره في جنوب العراق و طبيعه شغله بتخليه يطلع ناحية الحدود الشرقيه مع إيران , قلبت القناه لقيت إيران بتحشد قواتها عالحدو , قريت خبر إن أمريكا بتعرض على المالكي التدخل العسكري لمواجهة قوات داعش , داعش ولا عزة الجوري ؟ أمريكا مالها ومال المالكي ؟ هي إيران عايزه إيه مننا ؟ إبني كمان مابيردش عالموبايل , مين داعش دول وايه علاقتهم بالإسلام ؟ المالكي عايز يسلّح الشعب يعني عايزها حرب أهليه ؟ , فجأه حسيت إن رجليك بتنزل في بحر رمال بيشدّك زي النداهه , بلدي رايحه فين ؟ ولادي عاملين إيه ؟ مش هيبقى فيه عراق تاني ؟ هيبقو دويلات , دويله للأكراد و دويله للسنه و دويله للشيعه أنا عارف , أمريكا هتاخد اللي فيه النصيب و تسيب لإيران شويه بالإتفاق , يارب بنتي ترد , يابني رد بقى قلقتني عليك , بلدي مش لاقيها ولا عيالي .
.
على فكره على فكره يا مصري , فوق فوق , العراق دي مش بتقع في القاره القطبيه الجنوبيه ولا أهلها بيتكلمو أوردو , و جه الوقت الي تخاف فيه على بلدك , فوق يا مصري فووووووووووووووووووق .
Mohamed Hussein
12 يونيو ·
إنقل يابني الكهارب هنا بقى عند حبيب العادلي , أصله خد براءه النهارده من قضايا التريح وغسيل الأموال , قول ورايا بقى ( القضاء مسيس , عودة الفلول , السيسي سفاح , يسقط حكم العسكر ) , ياض قول ماتخافش , انطق ياض .
.
طب قول ورايا تاني , حبيب العادلي اتعدم 9 مرات قبل كده في عهد مرسي وطنطاوي بس خد براءه في المره العاشره في عهد السيسي ليه يا كفره ؟!.
.
عندنا في الكليه , في مادة الفارماكولوجي تحديدا بتيجي اسئله في الإمتحان عن الأعراض الجانبيه بتاعة الأدويه , يختارو اسم دوا ولا اتنين ( الإسم العلمي ) ويسألك الأعراض الجانبيه ايه side effects.........المهم يعني المصري دايما معروف بقوته و جبروته و كان الشايع بين اغلب الأدويه في الأعراض هما ال 3 كلمات دول nausea , vomiting , diarrhea ...يعني غثيان وقئ واسهال , فكان لما بيجينا السؤال في الإمتحان واحنا مش مذاكرين او مش فاكرين كنا بنكتب ال 3 دول , يعني بقو ستامبه كده محفوظه وغالبا الإجابه بتبقى غلط , بس بنكتبها عشان مانسبش المكان فاضي .
.
كتير من النشطاء والكولجيه ماشيين بمبدأ الستامبه المحفوظه nausea , vomiting diarrhea عوده الفلول , القضاء مسيس , يسقط حكم العسكر , حافظينها بقى و بيعملوها إجابه لهم في أي سؤال حتى لو كانت اجابه غلط بس عشان مايسيبوش مكان الإجابه فاضي !!.
.
يعني مثلا هو لو فكّر شويه أو ذاكر يعني هيعرف إن براءة حبيب العادلي مالهاش علاقه بشعاراته التلاته المقدسه المحفوظه , و إن الحكايه وما فيها لا قضاء مسيس ولا عوده فلول ولا نيله , يا بني ذاكر شويه وحاول تفهم , الإجابه الصحيحه إنك تقول منظومة التقاضي في مصر فاسده مش القضاء مسيس , والمنظومه دي بتبدأ من أول الظابط وأمين الشرطه اللي ممكن يكون مرتشي لحد الأحراز اللي بيتلعب فيها لحد وكيل النيابه مرورا بالحلقه الأخطر ( المحامي العُقر ) وأخر واحد في السلسله دي هو القاضي .
.
الكلام ده قلته من سنتين لما الإخوان جابو نائب عام ملاكي وطلع يقول انا هقتص من قتلة الثوار , ساعتها قلت انه كداب وألف كداب , عشان القضايا كلها اتستفت و تحوّرت واتدورت واتقورت ووصلت للقاضي ورق فولسكاب فاضي !! , من سنتين وانا عارف ان مبارك و أي حد من نظامه مش هياخدو أي حكم عشان معاهم مليارات وممكن يشترو نقابة المحامين باللي فيها على مديرية الأمن والشارع اللي هي فيه .
.
لو من حقنا نطالب بحاجه يبقى نطالب بتفوير المظومه بالكامل بقوانينها وعناصرها و ده محتاج وقت أو ممكن حضرتك تريح دماغك خالص و تقول : القضاء مسيس , يسقط حكم العسكر , السيسي سفاح nausea vomiting diarrhea
.
ليست هناك تعليقات:
إرسال تعليق