الدليل الحصرى لمعرفة الناشط النحنوح المصرى:-
1- اكتر جملة بيقولها دلوقتى :- " الحكاية مش حكاية اخوان...الحكاية وطن اتهان " ...مع انه عارف كويس اوى ان الاخوان لو كانوا تمكنوا من البلد كانوا هيهينوا الوطن اهانه غير مسبوقة. 2- دايما رافع شعار " يسقط يسقط حكم العسكر " ، مع انه برضو عارف ان لو الجيش وقع هنتحول فورا لنموذج سوريا ، و مفيش قوة منظمة تقدر تحكم البلد دلوقتى غير الجيش . 3- رافض لمبدأ إقصاء الاخوان...مع ان اسم النبى حارسه وصاينه ...هو هو برضو كان الاخوان هيرموه فى الزبالة لو كانوا تمكنوا. 4- اغلب وقته قدام اللاب توب والموبايل تنظير وفلسفة فارغة ، وماعندوش بدايل حقيقية ، ولولة ونحنحة ( على رأى المثل:- ضجيج بلا طحن ). 5- مسيطرة على دماغة نظرية المؤامرة:- ابانا الذى فى المخابرات..فى رأيه هو اللى بيعمل كل حاجة ف البلد...من اول قتل الجنود على الحدود لغاية طاجن البامية اللى باظ منه وهو بيعمل الغدا. 6- بيشم كُلة كتير |
___________________-
دون مورسيشوت
دون كيخوت :- رواية جميلة بطلها ألونسو كيخانو ..اللى زهق من حياته فقرر إنه يدور على مغامرة ، وفضل يطوف بالبلاد ، فوق حصانه الضعيف ( روسينانتى ) وبمساعدة صديقه (سانشو بانثا)...قرر ينصب نفسه كمحارب ضد الظلم والظلام. وبدأ يتخيل نفسه فى معارك وهمية من صنع خياله، وتخيل ان طواحين الهواء شياطين بأذرع هائلة.، و ان الاغنام جيوش جرارة من الاعداء فبدأ يطلق سهامه عليها ، فالرعاة مسكوه وطحنوه ضرب ، وفى النهايه جيرانه يقبضوا عليه ويرجعوه بلده داخل قفص.
حالة دون كيخوت ماتفرقش كتير عن حالة الاخوان دلوقتى ، حالة من انكار الواقع ، والزج بانفسهم فى معارك وهمية ومتخيلين بكده انهم هينتصروا ، وطول لما هما لاقيين النسخه العصرية من سانشو بانثا ...( النشطاء والنحانيح المتعاطفين) ، هيسوقوا فى هبلهم وتخيلاتهم اللوذعية اللا منطقية.
بس النهاية معروفة....القفص اللى اتحط فيه دون كيخوت...هيتحطوا فيه.. بس ف السجن ، جايز يفوقوا من غفلتهم ...زى ما دون كيخوت فاق بس فى الجزء التانى من الرواية.
______________--
-بص ياعم الحاج...انت راجل طيب وفاكر ان اردوغان خليفة المسلمين وانشكحت اوى لما عمل بصوابعه الاربعة علامة رابعة ، ورحت انت لاطعها على البروفايل عندك..
مضطر اصدمك بشوية معلومات تكشفلك ان اردوغان ده مش صلاح الدين القليوبى ولا عنتر بن شداد ، ده مجرد شوكة مزروعة باتقان لتسهيل مصالح اسرائيل فى المنطقة..
1- اسرائيل زودت تركيا بعدد من طائرات " هارون " ، وطوروا سوياً دبابة تحمل اسم "باتون"
2- اسرائيل زودت تركيا بمنظومة الكترونية مطورة بتاريخ 19/2/2013
3-فاكر لما عملوا تمثيلية المقاطعة ايام قافلة الحرية؟؟..ساعتها العلاقات التركية الاسرائيلية كانت فلة شمعة منورة مش زى ما اوهمونا انهم مش طايقين بعض...والدليل اسرائيل باعت لتركيا القمر الصناعى "أفق" ، ونظام الدفاع المضاد للصواريخ " آرو".
لسه زعلان ان مصر طردت السفير التركى ؟؟ لسه متخيل ان تركيا عاوزة الخير لمصر؟
يبقى انت صحيح بوخمار خنفشار خرسيس مرسيس.
__________________
من
أفلامى المفضلة فيلم ( Trueman show ) ...الفيلم بطولة جيم كارى وبيحكى
حكاية ترومان اللى اكتشف ان حياته كلها خدعة ، والمدينة اللى كان عايش فيها
كانت مجرد استديو كبير ، وسكانها ممثلين ، البحر مزيف والشمس مزيفة والقمر
مزيف.
اكتشفت ان احنا كمصريين عايشين نفس حياة ترومان ، من اول لما اقنعونا ان المصارعة الحرة عروض حقيقية ، وبعدين اكتشفنا ان اغلبها تمثيل فى تمثيل ، وبرامج الكاميرا الخفية اللى كنا بنموت من الضحك عليها ، وبعدين طلعت برضو تمثيل . ياراجل ده اقنعونا ان بوجى اخو طمطم مع ان بوجى قرد وطمطم ارنبة. فى السنتين اللى فاتوا كلنا اتخدعنا فى شخصيات كانوا بيأدوا دورهم ببراعة منقطعة النظير ، هتلاقى مننا ( ترومان السلفى ) اللى كان فاكر ابو اسماعيل اسد الاسلام ، بس اكتشف انه مزور ونصاب ، و (ترومان الليبرالى ) اللى اكتشف ان البرادعى اللى كان فاكره قائد الثورة طلع خرع ومش قد المسئوليه ، و (ترومان الطيب ) اللى كان فاكر الاخوان ناس بتوع ربنا ، لكنه اكتشف انهم شوية افاقين همهم الاوحد السلطة. قايمة طويلة من الشخصيات اللى اكتشفنا انها كانت بتمثل علينا ، اصابتنا باحباطات وانكسارات وهزات نفسية عميقة ، لكن ترومان ف الفيلم قرر انه يسيب الاستوديو المصنوع ، وينطلق يعيش حياته الحقيقية الغير مزيفة. لكن احنا نعمل ايه ...والحياة كلها بقت استديو كبير...واللى حوالينا بيمثلوا علينا؟؟!! |
23 November
__________________-
-يقول
العلماء أن الابتسامة بتحرك فى وشك 14 عضلة ، لكن التكشيرة بتحرك 70 عضلة ،
كأنك لما بتكشر بتفتح صالة حديد فى وشك ، ده طبعا كلام علماء سويسرا
والنمسا الناس اللى اكبر هم ممكن يخلي الناس تكشر هناك ان الجبنة
البارميزان ماتكونش ساحت كويس فوق سندويتش الكوردون بلو ...
-لكن هنا فى مصر ، التكشيرة بقت الراعى الرسمى لوش المواطن المصرى ، لدرجة انك لو شفت واحد بيضحك صدفة هتقول عليه :- مجنون ده ولا ايه ( بصوت اللمبى )...والناس معذورة :-ثورتين فى الراس توجع، وكل يوم يصحوا على خبر اغتيال او قطر عمل حادثة ، أو تفجيرات وحرايق ...العيشه بقت غاليه والموت ارخص... -الناس بطلت تضحك فى وش بعض واكتفوا بكتابة ( هههههههه) أو (هاهاهاها ) على الفيس بوك مع ان الرسول وصانا نضحك فى وش بعض كنوع من انواع الصدقة ، -الناس استبدلت تعبيرات وشها بالوشوش الصفرا اللى اسمها (emoticons )..لدرجة انك تنزل الشوارع تلاقى تعبير " وش بلاستيك " ينطبق حرفيا على المواطن المصرى ... لذلك لاتستعجب لما تقرا الخبر ده قريب :" وبتشريح وجه مواطن مصرى ...عثر تحت جلده على كميات هائلة من البلاستيك ، والحديد ( ماركة عز مش الدخيلة )" |
ملخص احداث اليوم:-
-انجولا تقرر هدم المساجد هناك وتشريد المسلمين ، فتنتفض جماعة انصار بيت المقدس للحدث ، وتعلن انها بصدد اجراء عمليات انتحاريه سيشيب لها الولدان لكن ليس فى انجولا او فى بيت المقدس ... فى مدينة نصر طبعا. -ينفعل المذيع الكيوت شريف مدكور على انصار بيت المقدس ، ويوجه لهم رسالة صارمة من خلال برنامجه اللذوذ ، تذكرك بالشاب السيس اللى ف فيلم " رامى الاعتصامى " عندما وقف يهتف بصوت حنون : من حقنا ...من حقنا...نحلم بحضن يضمنا . -نادى بايرن ميونيخ يشاهد شريف مدكور فيسأل احد اصدقائه المصريين عنه ، فيرد عليه :- ده واد سيس ، اللى زيه عندنا بنقول عليهم : بيروحوا ورا مصنع الكراسى. فيعجب رئيس البايرن بالفكرة ، وبعد فوز البايرن على بروسيا بالثلاثة ...يكتب على الموقع الرسمى للنادى :- "we took prussia dortmund behind the factory of chairs" |
____________________
لما
تعرف ان التعاون التجارى بين تركيا وانجولا وصل السنادى نصف مليار دولار؛
ولما تسمع ان انجولا النهاردة حرقت المساجد بصورة وحشية ؛ و تلاقى
العثمانلى اردوغان عامل نفسه من بنها ؛ و مكسل يعمل بايده علامة زى بتاعه
رابعة او حتى يعمل زى حسين او انشراح ، ولما تلاقى منظمات حقوق الانسان
اللى فشختنا ف افكارنا مندده بالقمع وكبت الحريات ف مصر ... ساكته خاااالص
عن اللى بيحصل ف انجولا ؛ والجماعات الجهادية منفضة لانجولا ؛ لان عندهم
طلعة قريب فى سينا يصطادوا كام عسكرى مصرى غلبان عشان طبعا ده بالنسبالهم
ذروة الجهاد وسنامه انك تقتل عساكر جيش بلدك .
كل المعطيات اللى فاتت تاكدلك ان الموضوع مش دفاع عن الاسلام او المسلمين زى مابيوهموا الغلابه ،،،،الموضوع كله مصالح أساحبى. |
عزيزى الناشط
متفهم تماماً لموقفك من قانون التظاهر ، وانه آداه سيئة فاشية لقمع الحريات ، بس عاوز الفت نظرك لكام نقطة كده:- 1- فاكر يانجم لما سيادتك رحت تتظاهر قدام مجلس الشعب ، وشباب الاخوان بمعاونة الداخلية وقفوا قدامك وضربوك على دماغك...وقالولك :- امشى ياض من هنا ...روح العب بعيد. 2-طب فاكر لما سيادتك اعتصمت قدام الاتحادية ، وبرضو الاخوان جم طردوك وسلخوا الناس على اسوار القصر 3- تعرف ياباشا أن الاخوان دلوقتى بيمدحوا فى منى سيف واحمد حرارة بعد لما كانوا بيقولوا ع الاولى اخت الشاذ ، والتانى قالوا عنه ممثل وعينه ماطارتش ولا حاجة؟؟؟ تفتكر ليه بيمدحوهم دلوقتى تحديدا؟؟؟ 4- القانون مجحف انا معاك ،و اخذ الحق صنعة برضو ،بس سيادتك بتحشد بصورة غير مباشرة عشان الاخوان يركبونا تانى...ماهو ياصاحبى انت خايب وماعملتش حزب او جبهة منظمة زى الاخوان او الجيش ، فانت كده بترجع الاخوان للصورة، بس ساعتها لما يتفوا على وشك او يسلخوك قدام الاتحادية ....ساعتها ماتقولش : اح |
_________________
الزياطون
زاط ...يزيط ...فهو زائط او زياط :- وهو الشخص اللى بيستنى الجنازة عشان يشبع فيها لطم ، امبارح اكتشفت عدد كبير من الزياطين بسبب مظاهرة مجلس الشورى 1- الزائط الالكترونى :- وده مانزلش ف حياته مظاهرة ، ولاشم غاز ، ولا خد خرطوش ، بس قاعد ينظر ويشجب ويندد ، ويلعن فى سلسفيل الحكومة والسيسى و ( يسكط يسكط حكم العسكر ). 2- الزائط الاخوانجى :- هو نفسه اللى كان زمان بيسب ويلعن ويخون فى نفس الشباب اللى نزل امبارح ، لكن دلوقتى هما على قلبه زى العسل وبيقول عليهم ثوار أحرار ، وبيشير بوستات عيلاء غبد الفتاح ووائل عباس بعد ماكان بيقول ع الاول شاذ والتانى خمورجى. 3- الزائط الامنجى :- وده اللى مع قمع الداخلية وافتراها ووحشيتها ، هتلاقيه مشير صور قمع مظاهرات فى امريكا والمانيا وانجلترا ..وهتلاقيه شمتان فى اللى راحوا يتظاهروا. 4- الزائط الدستورى :- وده من اعضاء لجنة الخمسين ، اللى هى برضو لسه واضعة مادة المحاكمات العسكرية اللى هى مادة فاشية برضو..ايه بقى اللى نرفزك ياعم الزائط دلوقتى؟؟ ماعرفش. -اعتقد ان البلد دى حالها ممكن ..جايز ...يتصلح لو اختفى الزياطون ، وانتهت الى الابد عبارة ..( ياعزيزى كلنا زياطون |
مواطن وناشط وثورجى واخوانجى
عم عبده كان ماشى ف حاله بيدور على فرن يبيعله رغيف ب ٥ قروش ؛ عشان هو مش هيقدر يجيب ابو ربع جنيه ، قابله ناشط.... قاله ياعم عبده لازم تتظاهر ضد الحكومة والجيش والداخلية ، عم عبده قال: يابنى اجيب لقمة عيشى الاول ؛ الناشط قعد يزن ع الراجل وخده من ايده للمظاهرة ؛ هناك الناشط خلع م المظاهرة وقعد يكتب على تويتر من الكافى شوب اللى جمب الميدان؛ عم عبده وقف مش فاهم حاجة م اللى بيحصل ؛ لغاية لما جتله رصاصة ف صدره مات بعدها على طول ؛ جه واحد اخوانجى معاه كاميرا صور عم عبده وبعت الصورة للجزيرة ؛ اللى كتبت تحتها : عم عبده شهيد الشرعية
_____________-
الازدواجى الشرير
دكتور جيكل ومستر هايد اشهر قصة عن الشخصية المزدوجه اللى الصبح شخص وبلليل شخص تانى تماماً ...بس احنا فى مصر عندنا الف جيكل والف هايد - اول امبارح تظاهر عدد من النشطاء ضد قانون التظاهر ، مع ان نفس الشخصيات كانت مصابة بالخرس والطرش والعمى لما الداخلية كانت بتقمع كل مظاهرات الاخوان فى ال 6 شهور اللى فاتوا ( مش بقول كده دفاعا عن الاخوان...ولا انحيازا للداخلية طبعا ...بس بوضح الازدواجية ). -اول امبارح برضو الاخوان اعترضوا بشده على قانون التظاهر وتعاطفوا مع ثوار مجلس الشورى ، رغم انهم لما مرسى طلع قانون التظاهر اشادوا بيه جدا وقالوا:- أيوة بقى ...اغضب ياريس. -امبارح الجياكل والهييايد عملوا مندبة على الحكم الجائر على بنات اسكندرية ، رغم انهم برضو سكتوا تماما لما فيه ناس ماتت فى المظاهرات، وعشرات الجنود بيموتوا كل يوم ع الحدود. هو الموت اقوى ولا الحبس ؟؟ -لكل جيكل وهايد فى البلد دى بقول:- استقيموا يرحمكم الله. |
3 تصريحات مالهومش علاقة ببعض بس لما تدقق فيهم هتلاقى ان التلاتة ليهم نفس المعنى:-
1- محمد السبكى :- أفلامى ساعدت على الارتقاء بمستوى السينما المصرية. 2-فيفى عبده:- سأقوم بانشاء قناة متخصصة فى الرقص الشرقى لمحاربة القنوات التى تقدم (الرقص المبتذل). 3-علاء الاسوانى:- ارفض ان يستخدم باسم يوسف الايحاءات الجنسية فى برنامجه. |
________________--
اختراعات مستحيلة اتمنى وجودها
١-قطرة للأذن: تنضف الودان من التلوث الناتج عن سماع اوكا واورتيجا لفترات طويلة. ٢-فلتر للمخ: بيفصل الذكريات السيئة ويسيب الذكريات الحلوة بس. ٣-صنفرة للضمير : ضماير الناس بقت مصدية ومحتاجة تتلمع. ٤-عدسات للعين: بترمى شعاع ع الناس ... الشعاع ده بمجرد مايلمس الشخصيات الزبالة ...يطلع صوت فورى. ٥- وده اختراع انا بتمناه شخصيا:ـ زرار للنوم: اول ما الواحد يدوس عليه يروح فى سبات عميييييق. |
ليست هناك تعليقات:
إرسال تعليق