فى
مادة التاريخ، كان دايماً يجيبوا سؤال تقليدى شهير بعنوان :- من قائل هذه
العبارة ، والحقيقة إن العبارات اللى كنا بنتسئل عنها كانت بتحوى قدر كبير
من البلاغة والفصاحة بتعكس بطبيعة الحال ثقافة مجتمع .
راجع بنفسك مقولات عظيمة لسعد زغلول ومصطفى كامل وعبد الناصر ، وقارن بينها وبين العبارات اللى سمعناها فى السنتين اللى فاتوا..وانت تكتشف الفرق بنفسك، وتتوقع السؤال ده هيكون ازاى بعد 10 سنين فى اختبار التاريخ:- من قائل هذه العبارة :- 1- الواد اللى بياخد 20 جنيه عشان ينزل سكينة الكهربا. 2- الاصطفاف الصناعى غير المبرر هيتحول لكراهة فى الاركان 3- هااااا احححححح 4- انتوا مش عارفين انكوا نور عينيا ولا إيه؟ |
_________________________
ملخص احداث الاسبوع:-
بدأ الاسبوع حاراً على غير العادة فى هذا التوقيت النوفمبرى المعهود، فأكدت شبكة رصد أن السبب هو غضب الله على الانقلابيين ، وانها ستسرب تسجيلاً جديدا للسيسى يؤكد فيه أنه يحب الصيف اكثر من الشتاء ، يأتى مرسى الى المحاكمة فى ميكروباص 14 راكب مصراً انه لابد ان يلم الاجرة من جميع الركاب باعتباره الرئيس الشرعى لمصر ، الزمالك يلاقى بهتيم استعدادا لطلائع الجيش ، فيضطر الاهلاويه الاخوان لتشجيع الزمالك لأول مرة لانه يلاعب الجيش الانقلابى ، رصد من جديد تؤكد أن السيسى متهرب من الخدمة العسكرية وان اسمه الحقيقى سيسى عيزرا زرعه الموساد داخل كتيبة صاعقة منذ حرب 48 (قبل مايتولد اصلا) ، وان مايؤكد ذلك اسناده مهمة تأمين القناة لشركة اسرائيلية ، اوباما يقرر تعليق كل انشطة التجسس على كل تليفونات العالم بعد ان اصابه الغثيان عند سماعه تسجيلاً لمكالمة عزة الجرف(أم ايمن ) مع ام احمد مرات مرسى وهى تقول لها :- اللى فات حمادة واللى جاى حمادة تانى خالص، الببلاوى ينسى ان ياخذ دواء الزهايمر وعدلى منصور يتجاوز level 138 من كاندى كراش بنجاح باهر، الهند تطلق أول مركبة فضائية خاصة بها إلى المريخ بينما تكتفى مصر بإطلاق صافيناز على العالم. |
______________________
حصان طروادة :- كان مالوش فى الطور ولا فى الطحين ، كان مجرد حصان خشب استخبى جواه الاغريق فى دخول طروادة اللى سكانها كانوا فى حالة سكر ومخمورين .
اما سيادة الناشط الثورجى المندفع بحسن او بسوء نية، واللى قرا قبل كده قصة طروادة وشاف براد بيت عملها فيلم ، وشاف الاخوان ازاى استخدموا سيادته كحصان طروادة عشرات المرات اشهرها موقعة عصر الليمون ، وجاى دلوقتى كتفه بكتفهم ف التحرير فده ماينفعش نقوله (لايلدغ المؤمن من جحر مرتين)، أو نوصفه انه زى حصان طروادة.
-ده باختصار ...حمار .....حمار طروادة.
________________________-
مش
عاجبك علم بلدك فتحرقه؛ ومش عاجبك جيش بلدك فتفرح لما جنوده بتتقتل بدم
بارد ؛ وبتشمت فى بلدك لما بتتغلب من غانا ؛ وبتفرح فى اى مصيبة بتحصل
لبلدك وبتعتبرها انتقام الهى من الانقلابيين ؛ و بتكفر كل شعب بلدك عشان مش
مقتنعين بالهبل اللى بتعمله .
معلش....انا كررت كلمة بلدك ف البوست ده كتير ...بس لحظة: كابتشين كابتشين.... انت بجد متأكد ان دى بلدك؟ |
_________________________
وأعلنت
جماعة (انصار بيت المقدس) مسئوليتها عن اغتيال المقدم "محمد مبروك" و
اغتيال الجنود المصريين صباح اليوم ؛ وبسؤال امير جماعة انصار بيت المقدس
:- انتوا امتى هتنصروا بيت المقدس بقا بالصلا ع النبى ؟
قال فى ثقة : احنا اصلا مش هنروح ننصر بيت المقدس ... بيت المقدس هو اللى هييجى لحد عندنا.... و فى تاكس |
_________________
الأحلام المؤجَلَة.....كوابيس مستقبلية.
ـــــــــــــــــــــــــ
من
أشهر المشاهد فى تاريخ السينما مشهد الراجل المجنون فى السرايا الصفرا وهو
بيقول لاسماعيل يس : انت فاكرنا مجانين ...احنا العاقلين واللى بره دول
هما المجانين ؛ الكلام ده من يجى ٦٠ سنة ؛ لما كانت العيشه مرحرحة
والجنيه ماتعرفش تشيله من تقله ؛ والسمنه البلدى والجبنة الركفور اللى برخص
التراب ؛ و الشوارع الفاضية ؛ والذوق النضيف والست ام كلثوم وعبد الحليم ؛
والاوبرا ونجيب و طه حسين والعقاد ؛ و الاهم من
ده كله النفوس كانت لسه صافية ؛ والناس كانت بتحب بعضها بجد ؛ بس على
الرغم من ده كله الراجل اعتبر الناس اللى بره المستشفى ...مجانين .
لو الراجل ده لسه موجود فى زمننا ده حيث قمه الكره والاستقطاب والعيشة المقرفة و الذوق الوضيع كان اكيد هيغير جملته عشان تبقى : انت فاكرنا مجانين .... احنا عايشين ... واللى بره أموات......أموااااات |
مؤرخ
اسمه محمد الجوادى بتستضيفه قناة الجزيرة بشكل شبه يومى ؛ بيدافع بشكل
غريب عن الاخوان وانهم اتظلموا واللى حصل ضدهم انقلاب دموى ؛ وان الكائن
الاخوانى حد حبوب و حد لذوذ ومش ارهابى ده كيوت.
المهم وقع تحت ايدى كتاب من تاليفه اسمه النخب الحاكمه ؛ وقريت فقرات مطولة من الكتاب بيمدح فيها فى مبارك وف سياساته و حكمته ؛ ده كان كلامه زمان ؛ لكن لما قطر تدفعله اكتر ؛ لازم يغير كلامه ومع اعترافى بثفافته ، لكن تسوى ايه ثفافتك يا جوادى لما تبيع شرفك لتميم امير قطر؟؟؟ |
تخيل كده ان من 80 سنة مثلاً شاب كيوت عامل تسريحة الاستاذ عماد حمدى وتعب عشان يشق مجرى راسه عشان يبقى ماشى ع الموضة ، ورفع البنطلون عشان يدفى صدره زى الاستاذ حسين صدقى ، تفتكر كانت اروش كلمة او جملة ايه وقتها؟؟
قول اى كلمة وقارنها بنظيرتها الحالية فى وقتنا ده ، هتكتشف اد ايه اللى هما كانوا فاكرينه روش ساعتها ...تحول بمرور الزمن لحاجة ( اولد فاشون )..
-خد عندك ياسيدى ...الشاب ده مثلاً اول ما ظهرت كلمة (كيلوت) ...كانت قمة فى الروشنة طبعاً مقارنة بمرادفتها اللى قبلها ( لباس) ...لكن انت دلوقت ماعدش ينفع تقول (كيلوت )...لازم تقول ( بوكسر ) عشان تبقى مواكب للعصر.
-كلمة زى ( تختة ) تحولت ل ( دكة ) ودلوقتى العيال بتقول (ديسك) ، كلمة (صديرى ) بقت (فيست ) ، الجزمة بقت (شوز ) ...دكان البقالة بقى (سوبر ماركت ) وبعدين دلوقتى (هايبر)..
-ده غير ان فيه كلام زمان كانوا بيعتبروه قبيح وذم ، بقى دلوقت مدح وثناء، يعنى لو قلت لواحد يا (فاجر)) هينبسط منك اوى دلوقت ، لكن لو قلتها للشاب اللى كان عامل تسريحة عماد حمدى ممكن يرفع ضدك شكوى فى وزارة الحقانية .
-طب انت عاوز تقول ايه ياعم زيزو؟
عاوز اقول ان اللى انت فاكره روش و لذوذ وكووول دلوقت ، هتلاقيه بعد شويه موضة قديمة ، ومش بعيد لو البوست ده حد قراه بعد 30 سنة مثلاً ، يقول: ياااااه...الكلام زمان كان خنيق اوى
___________________
ليست هناك تعليقات:
إرسال تعليق