علموني

أعتذر لكل أصدقائي مسبقا ...أي حاجه تضايقك في الشعر ده اعتبرها إن القافيه حكمت !!
.

علموني إني أكل باليمين
بس أسرق بالشمال !
.
علموني إني أكدب
في الخطابه والكتابه
والمقال.
.

علموني إن كدبي
يبقى عادي
لما أمي تكون نوال!
.
علموني إن بنت الإيه
دي سافله
ثايره ليه وسط العيال؟!
.
بس قتلك يا صديقي
خير حقيقي
ذي موتة ربنا
الإتنين حلال !
.
علموني إن خلوه
تبقى حلوه
لما بنت تقول يا خال !
.
علموني إني أزرع
في غيطاني
زهره واحده
وسط غابه من ضلال
.
علموني إن ديني
يكون مطيه
للي فاشل .
واللي عاطل
واللي عاجز
واللي عايز جاه ومال !
.
علموني إني أكدب
إني أصلب
أني أمشي
إني أرشي
إني إسمع
إني أركع
إن عقلي يكون شوال!
.
علموني إني اعيش
بلجام ودقن
تفرق إيه الدقن يابا
لما تركب عالبغال ؟!
.
قالو سنه عن رسولنا
يومها قلنا
قال رسولنا إمتى نقذف ؟
إمتى نحلف ؟
إمتى نوعد إمتى نخلف ؟
إمتى قال ؟!
إمتى قال ؟!
.
يا طاحونه ودايره بينا
دينا راجع تاني لينا
مش بدقن وتوب وسبحه
مش بغتره والعقال !
.
دينا راجع بالعداله والكرامه
بالمعامله مش مجامله
دينا راجع بالرجال !
.
علموني إن عشقك
يابلادي
وسط بوّاسي الأيادي
شئ محال !
.
خوفوني إني أكتبلك 

ياغاليه
جوز غناوي
في اللي ماتو بين إيدينا
مش خيال.
.
خوفوني إني أحبك
ذي مانتي
.
مش هطاطي يا حبيبتي
لسه جوايا احتمال !!
.
محمد حسين