Mohamed
Hussein
5
يوليو 2017·
أحلامي الخزعبليه
.
اعتقد إني اكتر
واحد في مصر كلها بيتوه و هو سايق , حتى لو كان المكان اللي رايحه روحته 17 مره قبل
كده , ماتعرفشي بقى التوهان ده سببه قلة تركيز ولا ذاكره ولا الاتنين مع بعض .
.
من ضمن أحلامي
الخزعبليه المجنونه عشان أتغلب عالحكايه دي إن إدارة المرور تشتغل لحسابي
في كل مكان بعيش فيه أو ممكن أروحه
, و بالتالي تبقى كل اللوح الإرشاديه اللي
فيها العناوين و الإتجاهات مكتوبه عشاني مخصوص
( و بإسمي ) , و اهي تبقى فرصه حلوه إني اتخلّص من أكتر جمله بسمعها في حياتي ( هما
قالو لك فين بالظبط ؟ ) . .
.
يعني مثلا , طالع
من مدينة نصر رايح لمكان في التجمع , ألاقي لوحه بتقول ( هتمشي 4 كيلو يا محمد خلي
بالك ) , ( لف من اليوتيرن الجاي ده يا محمد ) , ( أدخل بقى أول يمين في تاني شمال
) , و لو توهت و دخلت أول يمين في أول شمال
ألاقي لوح ليا برضه مخصوصه في حالة التوهان ( يابني انت كده دخلت أول شمال قلنالك تاني
شمال ) ( ارجع بضهرك الحته دي وادخل الشمال اللي جاي و ماتقرفناش معاك ) .
.
و لما بتوع المرور يزهقو من كتر اللوح اللي بيكتبوها عشاني يحطولي
لوحه واحده في طريقي , مكتوب عليها ( أبوس إيدك
خد تاكسي بعشرين جنيه و خليه يمشي قدامك لحد ماتوصل و حساب التاكسي علينا ) .
.
لا لا , استنو
بقى , فيه فكره أحسن , بدل التكلفه و اللوح الكتير دي , الحكومه تعيّن لي أمين شرطه بموتوسيكل مخصوص , يروح معايا كل مكان
( و يكون من النوع اللي مابيتوهش ) , وابقى ماشي بقى و قدامي موكب مُكوّن من عدد واحد
أمين شرطه بموتوسيكل , و نسمّيه ( موكب المواطن اللي بيتوه كل مره ) .
...............................................................................................................
ليست هناك تعليقات:
إرسال تعليق