Mohamed
Hussein
3
يوليو 2017·
البنات صحيو من
النوم النهارده قبل منّي , و مامتهم كانت نايمه , لقيتهم دخلو المطبخ شويه و طلعو في
ايديهم صينيه صغيره عليها ساندوتش جبنه و مج نسكافيه , كانو أصلا سألوني من فتره انت
بتشرب النسكافيه بتاعك ازاي يا بابا و قلت لهم , أتاريهم كانو بيخططو من ورايا , أول
مره يعملوها , هما صحيح زمانهم دلوأتي بياخدو
علقه معتبره من الحكومه المركزيه لأنهم بالتأكيد نيّلو المطبخ بستين نيله , بس مش
مهم , الحركه بتاعتهم دي تسوى عندي ييجي سبعتاشر جنيه .
.
بصو من الأخر بقى
, عارفين عادل إمام في عريس من جهه أمنيه ؟ انا هكون أنيل منه بشويتين تلاته , و هطلّع
القطط الفطسانه في أي عريس يتقدم , إنت ياض
انت قصير و ماينفعشي العروسه تبقى اطول منك , و انت يابني طويل , هنعمل ايه بالطول
ده كله ؟ , و انت ياض امك تخينه ( امك تخينه أوي يا ممتاز ) , و انت يابني تجيب لنا
شهاده بخلوّك من كل الأمراض المستعصيه و شهاده إنك عمرك ما شميت كوله في حياتك ( مع
ان أبو العروسه نفسه قعد سنه كامله يشم كوله و من قعر البرطمان ) , وانت ياض أهلاوي
؟ يا وقعتك هباب , اهلاوي و جاي تتقدم لبنتي ؟ دي العيله و البلد بتاعتنا كلها زملكاويه
و متعصبين , كده محدش هيحضر الفرح , بص انت
لو عايز تتجوز بنتي و بتحبها و شاريها تروح
تشجع الزمالك و تقول لأصحابك و عيلتك كلها انك بقيت زملكاوي , و تستني لما الزمالك
يفوز ب 7 بطولات دوري ورا بعض و بعدين تجيلي .
.............................................................................................................................
ليست هناك تعليقات:
إرسال تعليق