Mohamed
Hussein
20
يوليو 2017·
السفاره المصريه
بتخطر واشنطن باستيائها من صياغة إرشادات السفر لمصر !! .
.
بيان إرشادات السفر
الأمريكي الخاص بمصر بيتكلم عن التالي
- حوادث ارهابيه
حصلت من سنين , من غير ما يقولو تاريخها , أكيد سهوا يا جدع و جل من لا يسهو .
- الأجمل في البيان
هو تقسيم الجماعات في مصر, ما بين جماعه إرهابيه ( اللي هي مش الإخوان ) و جماعات معارضه
سياسيه عنيفه ( اللي هي الاخوان ) ههههههههههههه , عنيف أوي الأستاذ ترامب ده , و جميلة
أوي حكاية جماعات معارضه سياسيه عنيفه بتفكرني بالمعارضه السلميه المسلحه في سوريا
و الجيش الحر العنيف الكيوت .
.
أصدقائي الأعزاء
, من شهور و انا بقول لحضراتكو , رؤساء أمريكا يختلفو ممكن في الشكل أو في ترتيب الأولويات
أو في لون الكرافته , لكن مايختلفوش في الجوهر و المضمون و السياسات العامه , الكيل
بمكيالين هيفضل قاعده في جوهر السياسه الأمريكيه , التقارير بكل أشكالها هتفضل ورقة
ضغط أو ورقة مساومه , مفيش حاجه في أمريكا اسمها مصداقيه , مصداقيه دي تبقى خالتك
.
.
و الأهم و اللي
انا واثق منه تماما و اللي أبصم عليه بالعشره , إن أمريكا مستحيل في يوم من الأيام
لا بعد شهر ولا بعد سنه ولا بعد عشره هتعلن إن جماعة الإخوان جماعه إرهابيه , إعلان
صريح و رسمي يعقبه مطارده لعناصر الجماعه ( اللي بيتفتح لهم الكونجرس نفسه ) و تسليمهم
لمصر , الكلام ده من سابع المستحيلات حتى لو أمريكا حكمها الأستاذ كمال أبو ريه أو
الأستاذه نيرمين الفقي , ماهو أصل الحكايه بتقول ببساطه شديده , مفيش حد بيفرّط في
ابنه ضناه .
.................................................................................................................
Mohamed
Hussein
19
يوليو 2017·
هو حضرتك متخيل
ايه ؟ متخيل فيه كام جحر تعبان في مصر ؟ .
.
- لما تتكلم عن
شمال سينا , المنطقه اللي اهملتها الدوله من عشرين تلاتين سنه لحد ما بقت وكر , وكر
بحجم دوله , وكر للإرهاب و المخدرات و السلاح و كل انواع الجريمه , متخيل ان الناس
اللي عاشت و اتربت جوه الوكر ده يتكلمو عن مصر ازاي ؟ يتكلمو عن جيش مصر ازاي ؟ الجيش
ده اللي رايح يقولهم ستوب , لا ارهاب ولا سلاح و لا مخدرات , ألاف البني أدمين اللي
عملو مليارات من الإجرام هيكون رأيهم ايه ؟ اللي انت رايح تحاربهم في ( لقمتهم الحرام
) ؟ هتبقي حاطط ايدك في ماية ساقعه ولا في جحر تعبان ؟ التعبان ده هيعمل معاك ايه في
مواقع التواصل و هيعمل ايه على أرض الواقع ؟ خصوصا إن الإجرام لما بتعيش فيه سنين طويله
بتستسيغه يعني بيبقى بالنسبالك حلال و مقبول و منطقي و حق مكتسب .
.
- لما تتكلم عن
جزيره في النيل و محدش من السكان معاه رخصة مباني , ألاف الأسر سكنت بالشكل ده , وضع
يد على أرض الدوله و استغلال لفساد المحليات , طبيعي يدخّلوك في قصة البيضه الأول ولا
الفرخه ؟ يعني المواطن اللي غلطان لما بلطج على أرض الدوله ولا الغلط عند أبله انشراح
بتاعة المجلس المحلي اللي خدت رشوه و طنشت ؟ طب هي رشوة أبله انشراح بتلغي عقلانية
و منطقيه إن نفس المواطن مجرم و بلطجي زيه زي أبله انشراح ؟ طب لما الدوله تفوق ( من
مرحلة الطابونه ) و تقرر انها تقنن أوضاع و تسترد أراضي و تهدم مخالفات مباني , تفتكر
الأهالي اللي عاشو سنين طويله في منطقه حولوها لوكر إجرامي و سلاح و إرهاب و خلافه
, الأهالي هيتعاملو مع الدوله ( اللي فاقت ) دي إزاي ؟ هيتعاملو ازاي في الواقع ؟ و
ازاي في الإعلام و مواقع التواصل؟ الدوله هتبقى إيديها في مايه ساقعه ولا في جحر تعابين
؟ , خصوصا برضه ان وجود الناس دي لسنين طويله في نفس المكان بيخليهم يستسيغو المخالفه
و الجريمه و البلطجه , يعني برضه بيعتبروها حق مكتسب .
.
شوف بقى حضرتك
و هات ورقه و قلم , أو بمعنى أصح هات كشكول و دستتين أقلام , و اكتب لوحدك كده , كام
جحر تعابين متسابين من أيام ما كانت طابونه ؟ كام جحر تعابين محتاج ينضف ؟ كام تعبان
هيحاول يلدغ إيد الدوله اللي مابقتشي طابونه ؟ .
.
و بعد ما تخلص
كتابة الكشكول من الجلده للجلده , هات كوباية شاي و اقعد ساعة عصاري كده و تخيل , هل
المخالفين و اللي بيبلطجو باي شكل بيبقو كيانات منفصله وقت الجد ؟ ولا بيبقو كالجسد
الواحد ؟ يعني هل تتوقع إن قناة الخنزيره و قنوات الخرفان في تركيا و رجال الأعمال
الفاسدين و سكان الوراق اللي معاهم سلاح و شمامين الكوله و أيقوناتهم اللي في امريكا
و العربجيه زي ممدوح حمزه و العواطليه زي فلان الفلاني , الناس دي وقت الجد بيبقو كيانات
منفصله ولا بتحس انهم جسد واحد ؟ جسد ضد الدوله و ضد الشعب و ضد الإصلاح و التنضيف
و الأمن و الجيش و الشرطه و المستقبل و الخير و نور ربنا ؟ .
........................................................................................................
Mohamed
Hussein
19
يوليو 2017·
الثروه السمكيه
: تطهير مليون و 200 ألف متر مربع من بحيرة المنزله و إزالة تعديات على مساحة 400 فدان
من المسطح المائي للبحيره .
.
بس بس , أكيد فيه
مسثمر موزمبيقي عينه على بحيرة المنزله و عايز شوية السمك اللي فيها , و مش بعيد يكون
الموضوع كله له علاقه بالماسونيه العالميه و الدوله عايزه تعمل فيها عين حورس و عين
سمكه ( و خرزه زرقا عشان الحسد ) , أو نكون بنحقق حلم الصهاينه من ( من بحيرة المنزله
للفرات ) .
.
طب الناس الغلابه
اللي اعتدت على بحيرة المنزله دي و بنت عليها او ردمت حته ارض و زرعتها او عاشت و عملت
بيبي فيها , الناس دي غلابه أوي و مش معاهم فلوس ياخدو فيلا ب 3 جناين , يروحو فين
يا حكومه ؟ الناس بتعمل بيبي في بحيرة المنزله بقالهم 50 سنه , يعملو بيبي فين ؟ ولا
هو المستثمر الموزمبيقي كاسر عينكو ؟
.........................................................................................................
Mohamed
Hussein
19
يوليو 2017·
أيام فض اعتصام
رابعه , الخرفان جابو صوره لطفلين مقتولين , و قالو الجيش قتلهم في فض الاعتصام , و
انتشرت الصوره و اتضح بعد كده انها لأطفال ماتو في سوريا .
بعد 4 سنين من
الحكايه دي نفس الخرفان جابو صوره لطفل و قالو انه مات تحت أنقاض بيت اتهدم في جزيرة
الوراق , و طبعا الجيش اللي هدم البيت !! و الحقيقه ان الصوره دي برضه من سوريا و من
شهور و إن مفيش بيت اتهدم على ناس جواه في الورّاق .
.
و ما بين صورة
الطفلين بتوع رابعه و صورة الطفل بتاع جزيرة الوراق , بينهم بالظبط 4 سنين و 40 مليون
كدبه , اعتقادي ان الكائن الضاني الإرهابي المفرد لو فكّر في يوم قبل ما ينام يعدّ
على صوابعه كام كدبه كدبها ( أو روّج لها ) مش هيعرف , الحكايه في اليوم الواحد بتحتاج
أله حاسبه , الجماعه دي اللي أنشأتها المخابرات البريطانيه دينها و عقيدتها و هويتها
و انتمائها اسمهم الكدب , التدليس , التزوير , التزييف , الخيانه , المتاجره بكل شئ
حتى الدم و الدين .
.
أكتر حاجتين بحمد
ربنا عليهم , الأولى إني اتولدت مصري , أعظم جنسيه في الكون , إبن لأعظم دوله في التاريخ
و التانيه اني
ماتولدتش لقيت أب و أم أعضاء رسميين في التنظيم الإرهابي الصهيوني الدولي , و إلا كنت
هطلع زيهم .
.
حقيقي عايز أقول
لكل خروف ولكل نعجه من أعضاء الجماعه الإرهابيه , في الشرق أو في الغرب , والله العظيم
و عزة جلال الله , انتو كائنات مقرفه , كائنات مثيره للقرف , كائنات تستحق أن تعامل
معاملة الصراصير , مش اكتر من كده ولا أقل .
.........................................................................................................
Mohamed
Hussein
18
يوليو 2017·
خبر مش مفاجئ
:
وزير البترول
: توقيع عقود المسح و التنقيب بالبحر الاحمر خلال أيام .
.
عقود زي دي و تنقيب
زي ده في مياهنا الإقليميه في البحر الأحمر كانت مستحيل تتم من غير اتفاقية ترسيم حدود
.
زي ما عملنا بالظبط
في البحر المتوسط , اتفاقية ترسيم حدود مع اليونان و قبرص و بناء عليه بدأنا نستكشف
و ننقب عن ثرواتنا في مياهنا الإقليميه ( يعني في ملكنا الرسمي ) , غاز و بترول و خلافه
.
.
مستحيل تقدر تعمل
مسح أو تنقيب في حاجه مايعه و صايصه , مايه ملهاش معالم , مستحيل تعرف و انت مش عارف
هي نقاط حدودك فين ؟ مياهك الإقليميه أخرها فين , ساعتها بتبقى المايه عامله زي حتة
الأرض اللي بيشتركو فيها مجموعة ورثه ( على المشاع ) , لا انت عارف تستفيد ولا الناس
اللي مشاركينك عارفين يستفيدو, يعني زي ما بيشبهوها كده , زي البيت الوقف .
.
و هنا سؤال مش
بلاقي له اجابه أبدا , هما الساده أصحاب المعالي و السمو رؤساء مصر السابقين ماعملوش
ترسيم حدود لمياهنا الإقليميه في البحرين المتوسط و الأحمر ليه ؟ هل مثلا ثرواتنا في
الداخل كانت مكفيه و فايضه و مايلزمناش أي خير ممكن يطلع من مياهنا الإقليميه ؟ ولا
مكانوش فاضيين ؟ كانو شبعانين مثلا ولا كانو خايفين ؟ .
.
لما بنقول التركه
الهباب و بنقول طابونه يبقى بنعني الكلمه بالحرف الواحد , التركه الهباب مش بس فساد
وصل لمرحلة إنه يكوّن دوله موازيه و حلقات في سلسله لما تمسك أولها ماتعرفش توصل لأخرها
, التركه الهباب يعني جزيره في النيل يسكنها 50 ألف أسره , مفيش واحد فيهم معاه عقد
تمليك يوحد ربنا , كل اللي عايز يستولى على أرض الدوله ( اللي هي أرض الشعب ) يروح
و يستولي , و الصرف الصحي بتاعهم يصب في النيل و نشربه احنا , احنا الشعب , بالهنا
و الشفا .
.
التركه الهباب
يعني قضايا معلقه و قرارت مرميه في الدرج و ناس مدلدله رجليها في ماية البيسين .
.
التركه الهباب
يعني دعم للوقود و دعم لتذكرة المترو , تبقى بجنيه و بعد 10 سنين بجنيه , صلاة النبي
أحسن , مفيش تحريك أسعار , فيه خسائر فادحه في كل القطاعات بس بنريّح الزبون و ( نهشتكه
) .
.
عبد الفتاح السيسي
يلزمه قلب من حديد و يلزمه كمان صبر أيوب , كل ملف على مكتبه أكبر و أنيل من الملف
التاني , و كل الملفات اللي عملها و اشتغل فيها لسه فيه أكتر منها , عمل ترسيم حدود
و حل مشكلة الكهربا و أعاد تسليح الجيش المصري و بدأ في شبكة الطرق و الكباري و دخل
في ملف الدعم ( كل الملفات دي كانت حقول ألغام ) , و لسه باقي له ملفات أكتر : الدروس
الخصوصيه اللي بندفع فيها عشرين تلاتين مليار جنيه ( من جيب الشعب ) , ال 6 مليون موظف
في الجهاز الإداري المترهل , البيروقراطيه اللي بتاكل الأخضر و اليابس , و ملف ثقافتنا
و هويتنا اللي بقت ما بين لسان معوج ناحية الغرب و قنديل البحر يبقى جيلي فيش , و البنت
الشمال سينجل ماذر , و لسان معوج ناحية الشرق , نقاب و عباية سوده و توب أبيض قصير
و مسبح و سيارة و شماغ و كيف الحال , اه و الله صحيح , كيف الحال ؟! .
..............................................................................................................
Mohamed
Hussein
18
يوليو 2017·
الحكايه كلها من
فصلين , لو عايزين نذيع هنذيع
.
في الفصل الأول
, كانت سوريا و ليبيا و اليمن و مصر و قبلهم العراق , و كل كلب هييجي و يتأمر هيكون
له مصلحه , اللي عايز غاز و اللي عايز بترول و اللي عايز يبيع سلاح و اللي يكفيه انك
تخرب و جيوشك تتهد ( عشان اسرائيل تنام بعمق و أمان ) و اللي عايز يكون له وجود عسكري
و قواعد و اللي بيحلم بعودة دولته و امبراطوريته واللي و اللي , في الفصل ده وقعت العراق
و سوريا و ليبيا و اليمن , إنما مصر مابتقعش , متبته في الأرض بشكل عجيب .
.
في نفس الفصل الأول
كان لازم غطاء عربي للخراب العربي , و النبي حلوه غطاء عربي للخراب العربي دي ( تنفع
مطلع لأغنية الحلم العربي !! ) , و ده تكفلت بيه دول الخليج , أصلهم بسم الله ما شاء
الله ناصحين أوي , فلوس و دفعو , مليارات متلتله , تحالفات و عملو , و حرب سنية ضد
الشيعه و اوعى ايدك كده ملخت الكُم , و مشيت الحدوته و تم الخراب للدول الأربعه , و
الاحتياطي النقدي بتاع دول الخليج ضاع نصه بغبائهم و تواطئهم , ممكن يا أخي تقول مضطرين
, باعتبار ان منطقة الخليج كلها محميه بنفوذ بريطاني امريكي , او بمعنى أصح محتله بنفوذ
بريطاني أمريكي , و وقت ما تكون محتل و رقبتك في إيد غيرك يبقى مفيش حاجه اسمها سياده
تامه في قراراتك المصيريه , يعني بتبقى سيادتك مش سيادتك , و سلّم لي على سيادتك .
.
في الفصل التاني
من الحدوته , هتلاقي مصر برضه , مع ان الفصل كله الغرض منه تقسيم السعوديه بعد حرب
اقليميه يشارك فيها المستعمرين القدامى , بقايا دولة الفرس و بقايا الدوله العثمانيه
, بمباركة أمريكيه بريطانيه , في الفصل ده هيحاولو يجرو رجل الجيش المصري , الموضوع
كله هيتوقف بقى على شخللة جيب سلمان , ال نص تريليون دولار اللي خدهم ترامب , هل هيبقو
كفايه بالنسبه للإداره و المخابرات الأمريكيه ؟ ولا هيلاقو في تقسيم السعوديه لقمه
أكبر و احلى ؟ .
.
طب دور قطر في
الليله دي كلها كان ايه ؟ كان فار الغيط مش اكتر , الخاين العربي اللي رضع الخيانه
و اتربى عليها , وبالتالي مستحيل هينضف , و في اخر مشهد في الحدوته هيقررو انهم يحرقو
الفار و يرموه في غيط القمح , الفار هيتحرق و يبقى فحمه و هو عارف , بس لحد ما يبقى
فحمه هيكون ولع في غيط القمح , ده المطلوب و دي الخطه اللي عارفاها مصر كويس جدا .
.
العيال بقى بتوع
الربيع العربي و ربيع ياسين و حلب تحترق و أيقونات يناير و الإختفاء القسري و مراكز
حقوق الإنسان و المجد للديموقراطيه الأمريكاني و أوباما اللي هيدرس ثورتهم في مدارس
نيويورك , العيال دي و عهد الله نفسي أكون سايق قطر بضاعه كبير و يكون القطر ده شايل
على ضهره ( أكتر من اللي بنشيله احنا الزملكاويه ) و أقوم موقفهم صف واحد و أدوس عليهم
بحيث مايبقاش فيه صباعين جنب بعض , ليه بقى ؟ لأن الخيانه مش هي لوحدها اللي بتخدم
عدوك , الغباوه و الحموريه بتخدمه أكتر .
....................................................................................................................
Mohamed
Hussein
17
يوليو 2017·
حكاية جزيرة الوراق
, الورّاق , راق راق راق
.
- مفيش مستثمر
إماراتي عايزها ولا هتروح لجمال مبارك ولا جمال عبد الحميد ولا هيبنو فيها رمز للماسونيه
ولا عين حورس ولا عين جمل ولا عين اللي شافك و ماصلّاش عالنبي .
.
- مكانشي فيه تهجير
للناس ولا حاجه , كان بيتم هدم بيوت مخالفه و مبنيه على أراضي الدوله , زي البيوت اللي
بتشوفها بعينك مهدومه في الطريق الزراعي و الصحراوي و في كل شبر في مصر ( دي دوله بتستعيد
أملاكها و بتطبق القانون ) .
.
- الدوله لما بتلاقي
أرض متاخده بوضع اليد و مزروعه و مثمره مش بتسحبها من صاحبها انما بتقوله ادفع تمنها
, و كذلك في البيوت اللي اتبنت و اتسكنت و دخلها مرافق ( لو سمحت ادفع حق الدوله اللي
هو حق الشعب ) .
.
- مفيش حاجه اسمها
أصل ده فقير و مش لاقي شقه ف راح بنى في جزيره عالنيل , مش عايز أقولك لفظ أبيح , انا
اتغربت 13 سنه و اللي حوشته في الغربه كلها مايسمحليش أعيش في عشة فراخ عالنيل , يعني
الواحد يسكن في عشه فراخ عالنيل و يصحى الصبح يقول كاك كاك كاك يلاقي النيل قدامه ؟
لا الفلوس بتاعتي ماتكفيش حكاية كاك كاك دي .
.
- يا نطع مفيش
حاجه اسمها الفقير معذور لما يخالف القانون , و إلا يبقى معذور لما يسرق و معذور لما
يقتل و معذور لما يشتغل إرهابي و معذور لما يكون مش لاقي يتجوز يقوم خاطف مراتك و واخدها
في توكتوك ورا مصنع الكراسي او حتى في جزيرة الوراق نفسها , ابقى تعاطف معاه بقى .
.
- المناطق العشوائيه
بتبقى قنابل في أي مجتمع , أرض خصبه للمخدرات و السلاح و الإرهاب و كل أنواع الجريمه
, يعني هتطرطش عليك و على عيالك حتى لو كانت شقتك في عماره فخمه في الزمالك , وبالتالي
لازم الدوله تفرض سيطرتها و هيبتها عشان ماتبقاش طابونه , الله يخرب بيت أم اللي علمك
و إدّاك شهادة جامعه .
.
- الدوله شغاله
في ازالة المخالفات و تقنين أوضاع الناس من أكتر من سنه , لا سابت غنى ولا فقير , لا
وزير ولا غفير , لا رجل أعمال ولا رجل على باب الله , يعني محدش كاسر عين الدوله دي
, إنما انت لو حد كاسر عينك قولنا عليه واللي اتكسر يتصلح .
.
- اه بالمناسبه
و حاجه اخيره , لو الحكومه قررت تقفل محل أندريه بتاع الكبده عشان مخالف او طالع بره
في الشارع او بيستخدم كبدة كلاب و حمير , فبلاش وقتها تقول إن مستثمر كويتي عينه على
محل أندريه بتاع الكبده , و انه حرام يا جدعان , ده اندريه بيعمل كبده من 300 سنه و
حج بيت الله 7000 مره و كان الأول على دفعته في الثانويه العامه , عشان مرارتي و الله
مش مستحمله .
...............................................................................................................
Mohamed
Hussein
17
يوليو 2017·
العيال الشمامين
كالعاده ماكدّبوش خبر , مابيخيبوش ظني فيهم أبدا , و قالك يا سيدي إن الحكومه بتعمل
كده في جزيره الوراق عشان فيه مستثمر إماراتي عايزها !! .
.
أه على يدي , المستثمر
الإماراتي واقف هنا , و الحكومه واقفه هنا , المستثمر الإماراتي قال للحكومه عايز جزيرة
الوراق ( أبغي جزيره الوراق ) , الحكومه قالت له بس طال عمرك دي فيها ناس و عشوائيات
و مخالفات و وجع دماغ , ماتيجي نديك حته حلوه و نضيفه كده في مطروح عالبحر ؟ قال لهم
: لا , أنا كلمتني ام يزيد ( زوجتي ) و قالت لي يابو يزيد ما ترجع إلا و انت مستثمر
فلوسك في جزيره الوراق !! .
.
.
طب نصحصح كده مع
بعض بقى عشان مانتلخبطش
- جزيره الوراق
رايحه لمستثمر اماراتي .
- محلات الرويعي
اللي اتحرقت رايحه لمستثمر خليجي .
- أنفاق قناه السويس
بنحفرها و بنعمر سينا عشان نوصل مايه ساقعه للصهاينه .
- كوبري سندوب
اللي في مدخل المنصوره رايح للكويت
- محطات سيمنز
اللي في بني سويف هتحل مشكلة الكهربا في كوريا الشماليه .
.
و غالبا الحكومه
هتخلي الأهلي يتغلب من الزمالك بكره تسعه صفر عشان يدارو عالمواضيع اللي فوق دي , أقل
من تسعه صفر مش هقبل يا حكومه , و إلا هفتكر المواضيع و اعملّك فضيحه .
...............................................................................................................
Mohamed
Hussein
16
يوليو 2017·
إصابة 31 رجل شرطه
بإصابات بالخرطوش و هما بينفّذو حملة إزاله لمباني مخالفه و تعدّيات على أراضي الدوله
في جزيره الوراق !! .
.
طب كده تمام أوي
, موضوع جزيره الوراق مفتوح و معروف من سنين , يعني مفيش حد بنى مخالف هناك أو اعتدى
على أرض الدوله يكون اتفاجئ بالحمله الامنيه دي .
و ثانيا الظابط
و رجل الشرطه اللي رايح ينفذ حملة الإزاله هو مش رايح عشان عداوه مسبقه مع حد من سكان
الجزيره , يعني الموضوع مش تار شخصي , ده موظف دوله بينفذ قرارات الدوله , و هنا مربط
الفرس , كلمة الدوله و هيبتها ( أو خيبتها ) .
.
هنتعامل ازاي بقى
في الموقف ده ؟ قدامنا طريقتين في التعامل , طريقه هياتم و طريقة زكي بدر , مفيش طريقه
وسط والله , إما إن الدوله تبقى إيديها طريه كده و طبق جيلي بالمكسرات و نخش في سكة
ناس غلابه و يعملو ايه , و الضنا غالي و يروحو فين , و طب معلش سماح المرادي , طب نعمل
قاعده عرفي و نجيب ناس من دولا و ناس من دوكهما و دولا يحبو على راس دوكهما و ناخد
اتنين تلاته نحقق معاهم و يقولو أسفين و الله و المحامي يطلعهم تاني يوم الصبح و يرجعو
الجزيره بزفه بلدي و مزمار ...دي اسمها طريقه هياتم
.
التانيه بقى طريقه
زكي بدر , و حكاية سمعتها زمان , ان زكي بدر بعت حمله أمنيه لإزالة مصانع طوب مخالفه
( تقريبا في ميت غمر ) , أصحاب المصانع المخالفه اتلمو على بوكس الشرطه و اعتدو على
رجال الشرطه و رمو البوكس في الترعه , فقام مولانا العارف بالله زكي بدر بكل بساطه
ولّع في المصانع المخالفه دي باللي فيها !! ............دي كده اسمها هيبة الدوله حتى
لو كانت هتجرح شعور الناس المرهفين اللي قلبهم قلب خسايه .
...............................................................................................................
Mohamed
Hussein
16
يوليو 2017·
سأل رجل أعرابي
حكيم الزمان , و قال له , من فضلك يا حكيم , أخبرني بالله عليك , كيف يتحول الإنسان
إلى حمار براس كلب ؟
- فقال له الحكيم
, يتحول الإنسان إلى حمار براس كلب عندما يجلس لسنوات طويله أمام قناة الخنزيره .
.
فقال الأعرابي
, و كيف ذلك يا حكيم ؟
قال الحكيم : سوف
تقنعه قناة الخنزيره بضروره الجهاد في سوريا ضد الجيش العربي السوري و الإنضمام إلى
رفقائه من المجاهدين من كازاخستان و الفلبين و نيجيريا و الجزائر و السودان و بوركينا
فاسو و جزر القمر و بنجلاديش و النيجر ( المعارضه السوريه ) , و سوف تخبرة قناة الخنزيره
أنه بهذا الجهاد إنما يواجه المد الشيعي و الهجمه الشيعيه الشرسه على أهل السنه و الجماعه
, و الخطر الشيعي الإيراني الإستيطاني التوسعي , و إنه لو مات ( بإذن واحد أحد ) سيكون
شهيد و هيلاقي حور العين مستنينه على باب الجنه , طابور ورا بعضه , و هما لابسين لانجريهات
إيطالي .
.
قال الأعرابي
: جميل يا حكيم , طب فين المشكله , مالحكايه حلوه اهي , جهاد و دولارات من أمريكا و
معارضه سوريه من 70 دوله و حور عين و لانجريهات ايطالي , فين المشكله بقى ؟ .
قال الحكيم : المشكله
إن نفس قناة الخنزيره بعد كام يوم هتروّج لوجود القوات الإيرانيه في الدوحه لحماية
عرش الشاذ تميم , و هتقنع نفس الحمار اللي براس كلب إن أجمل حاجه في الدنيا هي المد
الشيعي , و إن إيران حد جميل اخر حماده .
...........................................................................................................
Mohamed
Hussein
16
يوليو 2017·
إختراع اسمه (
الإنصاف ) .
.
للشاب الناقم اللي
بيعاني , اللي مش عاجبه حاله و عيشته , اللي النداهه ندهته , اللي الخروف لبّسه ( مختمه
) و بيسحبه من 7 سنين وراه زي الحمار لحد مابقى يشتم بلده و تاريخها و جيشها , تعالى
أحكي لك حدوته بقى , حتة صغيره من الحدوته .
.
ابويا و امي كانو
ناس غلابه على قد حالهم هما الاتنين , خلفو 6 عيال أنا أكبرهم , ابويا و امي و العيال
السته كانو عايشين في أوضه في بيت معمول من الطين ( الطوب الني ) , الأوضه دي فيها
سرير نحاس صغير بينام عليه ابويا و أمي و ممكن معاهم أصغر اتنين في خواتي , بس أنا
و بقية خواتي بننام على حصيره عالأرض , قد ايه الحكايه دي بقى ؟ استمرت كام سنه ؟ مممممممم
12 سنه , لحد ما بنينا بيت لنا لوحدنا , يعني ايه الكلام ده ؟ يعني انا عيشت طفولتي
كلها بنام على حصيره , و أول مره في حياتي أنام فيهم على سرير و مرتبه ماكنتش طفل وقتها
.
.
طب الحكايه دي
سابت جوايا ترسبات و حقد و غل و أمراض نفسيه تخليني أشتم بلدي ؟ لا خالص , طب أبويا
الله يرحمه كان بيصحى من النوم يلعن سلسفيل أبو الحكومه اللي مش عارفه توفّر له بيت
له هو و ولاده ؟ برضه لا خالص , ليه لا ؟ عشان الحكومات رغم فسادها الا انها مش مطلوب
منها توفر بيت كبير لراجل و مراته دخلهم على قدهم و قررو انهم يخلفو 6 عيال , الحكومه
وفرت للعيال دي ( اللي هما احنا ) مدارس و اتعلمنا كلنا و دخلنا الجامعه ( ببلاش )
و مستشفيات حكوميه , و احنا حضرّنا العفريت و كان لازم نصرفه , يعني كان لازم نستحمل
و نتصرف , ده اسمه ( الإنصاف ) .
.
طب خد التقيله
بقى , الكلام ده و العيشه دي كانت في التمانينات , وقتها مكانتش مصر بتحارب , ولا بيتصرف
على خرابها مئات المليارات ولا الدول حواليها بتقع كأنها معموله من الورق , يعني لا
كان فيه مخطط ولا مؤامره ولا حصار اقتصادي ولا يحزنون , و مع ذلك مكانشي فيه سرير ننام
عليه انا و اخواتي !! طب فكرة ان الحكومات مطلوب منها تجوز الشاب و تعلمه لحد مايخلص
الجامعه ببلاش و تجيب له شقه و عروسه و وظيفه و تدلك له عضلة السمانه , الفكره دي لا
عمري شوفتها ولا سمعت بيها ولا قريت عنها في كتاب , لو سمحت من فضلك اكتب لي اسم الدوله
اللي بتعمل كده عشان أسافر لها و ابقى ضمنت مستقبل بناتي و انا مدلدل رجلي في ماية
البيسين .
.
أما حكاية انك
تعتبر الظروف مبرر انك تشتم البلد نفسها و الشعب نفسه و الجيش ( اللي هو العمود الفقري
و جهاز المناعه بتاعنا ) و تلعن تاريخ بلدك , فالحكايه دي بصراحه و من غير عجن كتير
, حكايه مايقولهاش أي حد ( ابن حلال ) !! , أه و الله زي مابقولك كده , و برضه ممكن
تكتب بين القوسين ( ) اسم الدوله اللي في الشرق أو في الغرب , الغنيه أو الفقيره ,
الديموقراطيه أو اللي بتاكل دراع العيال الصغيره , الدوله اللي فيها ناس كتير زي معاليك
بيشتمو بلدهم و جيشها و تاريخها مهما كانت الظروف , اهو منك نستفيد باعتبار انك عميق
و سابقنا بمليون فدان
....................................................................................................................
Mohamed
Hussein
15
يوليو 2017·
اتنين من الكلاب
التلاته اللي نفذو هجوم البدرشين تم تصفيتهم , لا الجيش المصري بيسيب حق ولاده ولا
الشرطه بتسيب حق ولادها , مصر مابتنساش تارها , الكلب التالت هيكون هربان في منطقه
صحراويه اكيد , بس هيجيبوه , و اجمالا انا موافق تماما إن الإرهابي الهربان يتّاخد
أبوه مكانه لحد ما يظهر و لو ماظهرش يتنفّذ الحكم في أبوه , الأب اللي عرف يخلّف و
ماعرفش يربّي , و موافق جدا على تصفيه الإرهابيين مش محاكمتهم , و نعمل زي مالصين عملت
في وقت من الأوقات , الإرهابي اللي يتم تصفيته نخلّي أهله قبل ما يستلمو الجثه يدفعو
تمن الرصاصه اللي اتقتل بيها .
.........................................................................................................
Mohamed
Hussein
15
يوليو 2017·
مواهبي المدفونه
عن الذاكره و التركيز
و قدرتي الفائقه على حفظ التواريخ و الشوارع و الأرقام و العناوين و الأسماء فشر الأستاذ
هيكل .
.
بص بقى , هتقولي
احفظ قرأن هقولك حفظت والله وانا صغير كذا جزء و نسيتهم طبعا , هتقعد تحللني تحليل
نفسي و سيكولوجي و منفلوطي براحتك , بس انا عندي تفسير مختلف تماما لحالتي دي , التفسير
بيقول باختصار , طبع , جينات , ربنا عايز كده !!.
.
من صغري و انا
فاقد للحاجات اللي فوق دي , التركيز و الذاكره والحفظ , بميل أكتر للتفكير و التأمل
, أفكر في أي حاجه , في وشوش الناس و ملامحهم , في تعاملهم مع بعض , في درجات الخضره
في الأرض الزراعيه و هي عامله زي سجاده رائعه , في العامل اللي بيشتغل و يوميته خمسه
جنيه بيعيش بيها , طب لو ضهره وجعه مش هيشتغل هيعيش ازاي ؟ , بتأمل في الجمال و القبح
, في لبس الناس و شياكتهم ( مع إني عمري لا كنت جميل ولاشيك ) , بس ملهاش علاقه , التأمل
هو التأمل , بفكر في الشجر و الأرض و المايه و هي بتجري في القنايه , بسرح معاهم ,
بتأمل في تصرفات المدرس و نبرة صوته وهو بيشرح , الحاجات دي كلها سحبت مني رصيد التركيز
و الذاكره , سحبتها و ودتها فين بقى ؟ والله ماعرف , أنا لو أعرف اقول على طول يا سعادة
البيه .
.
في الكليه مثلا
, انا شيلت مادتين , ماشيلتهمش ولا حاجه يعني ماسقطتش بس أصلا ماروحتش الإمتحان , ليه
بقي ؟ هقولك أهو , في المره الأولى روحت نقلت جدول الامتحان اللي متعلق في الكليه
, بس ماكتبتوش في ورقه ( مكانشي معايا قلم ) , لا حفظته , و قلت خلاص انا عارف كده
( و ذاكرتي لا عمرها تخوني أبدا ) , و عليها يا سيدي , قلت الهيستولوجي يوم الحد و
الكيميا العضويه التلات , و دول اخر مادتين في الامتحانات طب تمام , قاعد في امان الله
بذاكر يوم السبت عشان عندي امتحان تاني يوم , لقيت زمايلي داخلين عليا البيت , مرعوبين
, ماعرفشي عرفو طريق قريتنا ازاي , واللي يشتمني و اللي يقولي الله يخرب بيتك احنا
قولنا جرالك حاجه , و انا اقولهم فيه ايه يا جدعان ؟ و انتو جايين منين كده ( و انا
مبتسم ) ؟ جايين منين يا جزمه ؟ من الامتحان طبعا , امتحان ايه ؟ الهيستولوجي , لا
الهيستولوجي بكره , و عليها أجلت الماده و بقيت شايلها , مع اني كنت جايب امتياز في
التيرم الأول !! .
.
عندي موهبه كمان
مدفونه , إني ممكن اسهر لأقصى مدى , بس لما بنام بنام , و النبي أقل من قنبله عنقوديه
مش هصحى , و دي كانت الحاله التانيه , في تالته كليه تقريبا , قاعد لوحدي في سكن طلبه
خارجي و كل زمايلي في الكليات التانيه خلصو و روحو , عندي امتحان كيميا طبيه بكره
, و الماده دي أصلا بنت #$%@# جزمه , كلها مركبات structures , و المركبات مش زي مالناس عارفه كده , لا دي
حماده تاني خالص , مركب الدوا بيكون حاجه ابن تيت , ينفع يكون خريطه معقده مش مركب
كيميائي , تلاقي حته أورجانيك و حته مش اورجانيك و حته هيتيروسايكليك و حته أليسيكليك
, يعني من الاخر تحسه مركب كافر و ابن حرام و انا طبعا موهوب في الحفظ زي مانتو عارفين
, أحفظ المركب الفلاني من هنا و أقلب الصفحه ألاقي واحد تاني و اكون نسيت الأولاني
, فضلت على كده ل 4 الفجر و قلت انام بقى عشان الامتحان الساعه 10 , نمت فعلا و الشقه
كانت دور أرضي , صحيت مفزوع و انا لا معايا ساعه ( ولا موبايل طبعا ) ولا منبه , ماشي
بكارت ميناتيل , فتحت الشباك و طلّعت راسي و سألت ست ماشيه في الشارع , هي كان واضح
انها راجعه من الشغل مش رايحه الشغل !! , لو سمحتي الساعه كام ؟ هي بعد لحظة ذهول من
الخلقه اللي بتتكلم قالت لي 12 ونص , قلت تمام اوي و كملت نوم بقى !! مانا بقيت خبره
في تأجيل المواد .
.
عندي موهبه تالته
مش موجوده عند حد في كوكب الأرض , و هي اني بفكر صح و اتصرف غلط , في الطرق مثلا تلاقيني
فكرت بسرعه و عرفت اني لازم ادخل يمين , عقلي قالي كده , و اللوحه المروريه كمان قالت
كده بس في لحظه التصرف بدخل شمال, ماتعرفشي بقى اذا كنت مش بثق في لوحات المرور ولا
بثق في عقلي , انما اهو ده اللي بيحصل , و برضه حصلت معايا في الكليه , كان امتحان
العملي بتاع العقاقير , و هيجيلي نبات طبي مطحون و المفروض اني اعرف النبات ده ايه
بشوية اختبارات بسيطه و بميكروسكوب , العينه اللي جت لي (اسمها unknown ) عملت عليها كل الاختبارات و كلها أجمعت انها
نبات ال senna , أجمعت بوضوح غير طبيعي يعني كان ناقص العينه
تنطق تحت الميكرسكوب و تحلف طلاق بالتلاته إنها senna
, بس انا كتبت انه نعناع mentha , طب ليه عملت كده ؟ و عهد الله ماعرف لحد النهارده
.
.
اجمالا عايز اقول
لحضراتكو , مواهبي المدفونه دي المفروض الدوله تتبناها و تستفيد منها , معرفشي تستفيد
ازاي بس لازم تستفيد .
...............................................................................................
Mohamed
Hussein
15
يوليو 2017·
عارفين بقي , الجميل
في الموضوع , إن حجم الزعل و الوجع اللي حصل جوه قلوب و صدور الناس لما زادت الأسعار
مره و اتنين و لما اترفع الدعم , الحجم ده أقل بكتير من حجم الوجع جوه نفس الناس و
نفس الصدور لما بيسمعو عن حادث إرهابي , مع إنهم مايعرفوش حد من الشهدا ولا لهم قرايب
في جيش ولا شرطه , إنما خوف المواطن المصري الطبيعي البني أدم على بلده و أمنها و سلامتها
بيسبق خوفه على لقمة عيشه و كسوة عياله .
.
بعد عشره عشرين
سنه هنبقى نحكي لولادنا و أحفادنا عن الفتره دي , نحكي حواديتها و معاناتها و إزاي
انتصرنا و عديّنا , هنحكي بمنتهى الفخر , زي ما كان أبائنا و أجدادنا بيحكو لنا بفخر
عن نصر اكتوبر العظيم .
و اللي هيبعد م
الميدان , عمره ما هيبان في الصوره .
.................................................................................................................
Mohamed
Hussein
14
يوليو 2017·
-
مره كنت راكب مع سواق ميكروباص و وقّفنا ظابط شرطه , الظابط قال للسواق هات رخصك و
قبل مالسواق يطلع رخصه , الظابط قاله انزل يابن ال #%^8 , و بعدين راح الظابط جاب مدفع
رشاش و دبابه و طياره f16 من جوه , و قتل السواق و داس
عليه بالدبابه و ضربنا كلنا بال f16
.
.
- على فكره بقى
, مرتبات ظباط الشرطه بتزيد كل 3 أيام يعني مرتين في الإسبوع , و تلاقي ظابط الشرطه
لسه متخرج و بيقبض ييجي ديشيلون جنيه .
.
- يا عم ما هما
اللي واكلينها والعه , البلد بتاعتهم .
- الواد ابن خالة
إبن عمتي كان محبوس في معتقلات الإنقلاب , و هو ماعملشي أي حاجه غيرشي إنه كان مخبي
في بيته قنابل و أحزمه ناسفه , يعني مسجون رأي و معتقل سياسي , و جم ولاد التيت خدوه
و حبسوه , و في المحكمه المحامي بتاعه قال للقاضي ان موكلي اتعرض للتعذيب النفسي و
الجسدي و كسرو له الحوض و اغتصبوه و سرقو الكليه الشمال و الطحال و 7 فقرات من العمود
الفقري .
....................
مممممممم الحقيقه
كل اللي فوق ده فستك , يعني بلح , مرحلة عيشناها من مراحل النطاعه , الخروف الإرهابي
يروّج و يفتكس و الحمار الكولجي يتركب كالعاده و هوبا لايك و شير و هوبا هري و عجن
و مرقعه .
.
الحقيقه بقى تعالى
وانا اقولهالك , مانا عايش في البلد دي والله مش عايش في فنزويلا :
.
- أعرف ظباط شرطه
صغيرين , اضطرو يشترو عربيات بالتقسيط , بيدفعو قسط 2000 جنيه مثلا و باقي المرتب مايكفيش
البيت , مع انه عايش هو و مراته بس , يعني لسه مفيش اطفال ولا مدارس , وبيضطر يستلف
من أبوه و أمه كل شهر .
.
- أعرف الأب و
الأم اللي بقو عايشين في رعب على ولادهم , رعب يومي , من ساعة ماينزلو الشغل لحد ما
يرجعو , و مكالمه كل ساعتين تلاته , و كل يوم ينزلو تلاقي الأب و الأم بيقولو لبعض
: يا ترى العيال هترجع ولا لا ؟ .
.
- بحكم اني بحب
السفر و التنطيط بالعربيه , للمنصوره و اسكندريه و نواحي العين السخنه و سفاجا , أكيد
أكون عدّيت على مئات الكماين في الكام سنه اللي فاتو , و شوفت ألاف الظباط و الأمناء
, هو انا خلقه عن بقية مخاليق ربنا ؟ ليه ماسمعتش لفظ خارج ليا ولا لغيري ؟ ليه محدش
قل أدبه عليا ؟, الظابط يقولي رخصك أقوله اتفضل , يبص فيها و يرجعها و يقولي اتفضل
, يعني سلامو عليكو عليكو السلام , لا مره حد استظرف عليا ولا مره انا استظرفت على
حد .
.
- مع ظهور نتيجة
الثانويه العامه لاحظت ظاهره غريبه , كتير من الأهالي بقو خايفين يدخّلو ولادهم شرطه
, ليه بس يا جدعان ؟ ده حتى ظابط الشرطه بيقبض دشيليون جنيه و بيضرب الناس بالمدافع
و واكل البلد والعه ؟ يقولك يا عم اسكت , مرتبه أقل من مرتب مدرب بيعّلم العيال الكوره
الريشه في نادي نص لبّه , و بقت احتماليه إنه يموت أكتر من إنه يعيش , وفي الأخر هيتقال
عليهم بلطجيه , بلا وجع دماغ .
.
الحقيقه و في أغلب
بوستاتي بتكلم عن الجيش و بشكره جدا على ستره للبلد في معركتنا المستمره من سنين و
على تضحياته , و في أغلب الاحيان بنسى أشكر ظباط الشرطه و أفرادها , ده تقصير مني و
قلة ذوق و جليطه , عشان كده البوست ده اعتذار واجب , لكل رجال الداخليه , اللي شالو
البلد مع الجيش و اللي قدمو ألاف الشهداء في حربنا ضد الإرهاب , ربنا يرحم شهداء النهارده
و كل شهيد ضحّى بنفسه عشان يحمي أرضنا و عرضنا و أطفالنا من كلاب السكك و ولاد الحرام
.
........................................................................................................
ليست هناك تعليقات:
إرسال تعليق