Mohamed
Hussein
29
يونيو 2017·
هحكي لكو حدوته
بقى
.
كان فيه ولد تعبان
, جسمه بيسخن , اهله خدوه و راحو للدكتور , الدكتور كشف عليه و عملو أشعه و تحاليل
و عرف ان الولد ده عنده ورم معين في جسمه , بس الدكتور عايز يريح أهل المريض و مايخسرهمشي
كزبون , قال لهم الواد حلو و زي الفل , عنده دور برد بس , و كتب لهم على لبوس عشان
السخونيه تنزل , الولد بقى كويس و رجع سخن تاني بعد فتره , اهله راحو للدكتور و برضه
كتب لهم عاللبوس بتاع السخونيه , و فضلو على كده 30 سنه , الورم بيكبر جوه ابنهم بس
الدكتور ده ابن حلال اوي و ايده فيها الشفا , ده بلبوسه بيخلص الموضوع .
.
وفي يوم من الأيام
المريض ده وقع تحت ايد دكتور تاني , الدكتور التاني طلب تحاليل و اشعه و شاف الورم
قد كده , أهل المريض قالو له يا دكتور ابننا عنده دور انفلونزا احنا عارفين و كان بيرتاح
على لبوسه بيكتبهاله الدكتور اللي قبلك , الدكتور بص لهم و قال لهم ابنكو عنده ورم
و الورم فضل يكبر , و لو ماعملناش له عمليه بأقصى سرعه هتبقى كارثه , موافقين نعمل
العمليه ؟ بس هيبقى فيه ألم و وجع و دم و فتح و تنضيف , ولا تحبو ايه ؟ قالو له موافقين
يا دكتور , اللي انت شايفه صح اعمله .
.
الدكتور بدأ يعمل
العمليه , بس ماعندهوش بنج ( مشكلته انه معندوش بنج ) , أهل المريض شافو ابنهم بيتألم
و يصرخ , و شافو دم , انفعلو أوي و قالو للدكتور وقّف عندك ( مع انهم شافو الورم بعنيهم
) , الدكتور قال لهم فيه ايه ؟ قالو له مش عايزين عمليه , احنا مش مستحملين المنظر
ده , اقفل على كده و هناخد ابننا و نمشي , ده دور انفلونزا يا دكتور و مش مستاهل ,
الدكتور قال لهم رايحين فين ؟ قالو له هنروح للدكتور الأولاني اللي ايده فيها الشفا
عشان يكتب لنا عاللبوسه , والواد ياخد اللبوسه و هيبقى زي الفل .
ولا يوم من أيامك
يا دكتور يابو لبوسه .
......................................................................................................................
Mohamed
Hussein
29
يونيو 2017·
زيادة أسعار الوقود
........ و هما تلاته متر قماش
.
- الزياده اللي
حصلت النهارده في أسعار الوقود , هي خطوه اضافيه من خطوات رفع الدعم و برنامج الإصلاح
الاقتصادي , طيب طيب .
.
- و التوقيت ؟
الناس لسه في عيد , و بكره ذكرى 30 يونيو .
.
- طب الحاله ؟
حالة الناس صعبه للغايه وانا منهم , بقينا بنكح تراب , و عدد كبير جدا من الطبقه المتوسطه
مبقاش متوسطه , نزلنا لتحت و تقريبا ماشيين بخطى ثابته ناحية شريحة الفقراء و الغلابه
يا سعادة بيه .
.
- و المشكله ؟
المشكله ان أجرة المواصلات هتزيد و هيزيد بعدها اسعار السلع تاني , حتى أم عبده بتاعة
الجرجير هتزود الأسعار و تقول عشان البنزين زاد .
.
- طب الأسباب ؟
الأسباب اضطرار , و السيسي مابيفرقش معاه التوقيت , ده عيبه و ميزته في نفس الوقت
, هو بيشوف الحاجه الصح و يعملها , ماعرفش حد في تاريخ مصر جازف بشعبيته قد السيسي
, احيانا بقول في نفسي هو الراجل ده جرئ أوي ولا مجنون ؟ .
.
- التلاته متر
قماش هما ميزانية الدوله , اللي لو حاولت تعمل منهم جلابيه مش هتلاقي حته باقيه للفانله
و اللامؤاخذه , و لو حاولت تعمل منهم فانله ولا مؤاخذه مش هتلاقي حته باقيه للجلابيه
, ميزانيه مصر نصها رايح في الدعم و تسديد فوايد الديون , دي التركه اللي ورثناها
, يا اخي الناس تورث أراضي و اطيان و عقارات و احنا بنورث ديون و نسدد في فوايدها
, فانت بقى عندك تلاته متر قماش في الميزانيه , ترفع الدعم عالبنزين و تزوده على بطاقة
التموين , تحاول تعمل مشاريع تلاقي القماشه مش مكفيه , ترفع الدعم تلاقي الناس بتشتكي
, تقوم تدعم من سكه تانيه , تعمل الجلابيه تلاقي الفانله ضربت منك , و هكذا , يعني
زي البدله بتاعة سمير غانم في مسرحية المتزوجون .
.
- الحدوته و الحكايه
باختصار , ان السيسي بيسابق الزمن و مستعجل أوي معرفشي ليه , و في النهايه بيراهن على
قوة احتمالنا , و اعتقادي ان زيادة الأسعار هتتوقف على نهاية 2018 لما يكون عندنا اكتفاء
ذاتي من الغاز و البترول , و ممكن والله اعلم أسعار الوقود تنزل بعدها و معاها أسعار
السلع .
.
- طب هنعمل ايه
و انا هعمل ايه ؟ هصبر و احتسب , وليه أصبر يعني ؟ هو السيسي أغلى عندي من بناتي و
من بيتي اللي بيكح تراب ؟ لا طبعا , بس هصبر عشان السيسي مارفعشي الدعم و هياخد المليارات
اللي تيجي من كده يحطها في حسابه في بنوك سويسرا ولا يعمل بيها حمام سباحه لولاده
, السيسي بيحاول يصلح ما أفسده الدهر عشان يعرف يعمل بنيه اقتصاديه حقيقيه , مش نبقى
بنضحك على نفسنا زي ما كنا عايشين سنين طويله .
.
هربط الحزام على
بطني ياريس بس خف إيدك شويه و حاول تنجز , عشان الحاله بقت ض ج .
.................................................................................................................
Mohamed
Hussein
28
يونيو 2017·
ألو , أيوه ياريس
برايز , بقولك ايه , احنا دلوأتي معانا سجاده حمره و قناديل بحر كانت مستنيه القناه
الجديده تتحفر عشان تعرف تعدّي , و كراكات غرقت في الوحل و هي بتحفر , و مارشميللو
نقص من السوق , و مره كنت راكب جنب سواق ميكروباص و الظابط وقفنا و ضربنا بالمدافع
و المنجانيق , و كوتشي لابسه السيسي ب10 مليون دولار و ثوره عملناها عشان اسعار الطماطم
و واقي ذكري نفخناه و وزعناه عالعساكر , و سواق توكتوك مثقف أوي , و الفيديو بتاع كحك
العيد و حفرنا بير في أوغندا لشهيد الصابونه , و قولنا لايطاليا مصر اللي قتلت ريجيني
, و رفعنا علم فرنسا و علم سويسرا و علم تركيا و كل أعلام الدنيا ماعدا مصر , و قولنا
حلب تحترق و الإرهاب اسمه عنف متبادل , و معانا أستاذ خالد علي و أبله هايدي , بس مش
معانا شعب ولا جيش , نعمل ايه بقى زياده عن كده عشان السيسي يرحل و نعرف نحكم مصر ؟
ايه ؟ بتقول ايه ياريس برايز ؟ نعمل هاشتاج عن التأثير السلبي لمحطات سيمنز على ساندوتشات
الحلاوه بالقشطه ؟
..................................................................................................................
Mohamed
Hussein
28
يونيو 2017·
تفسير العلاقه
بين هجرة القناديل للبحر المتوسط و بين قناة السويس الجديده
.
أثبتت دراسه علميه
حديثه نشرتها جريدة ( علمني العوم والنبي يا احمد ) المتخصصه في شئون البحار و القواقع
و القناديل و ضئ القناديل أن هناك تطابق جيني واضح تماما بين قناديل البحر و بين العروسه
الغتيته اللي شايفه نفسها اوي .
فقد أثبت الدراسه
التي استمرت 3 سنين و اسبوعين و عصريه ان قنديل البحر يشبه تماما البنت الغتيته اللي
على وش جواز و اللي رافضه تدخل في شقة العيله بتاعة بولاق و عايزه شقه جديده في التجمع
, بالمثل فإن قناديل البحر ( الغتيته برضه ) رفضت الدخول في قناة السويس القديمه (
شقة بولاق ) و دخلت بس لما عملنا قناة السويس الجديده ( شقة التجمع ) , صباحية مباركة
و ألف مبروك لعروسين .
.
المرجع , جريدة
: 3almny eloum wenaby
yahmed
.
للباحث الكوري
الجنوبي :yamama tezywawa
......................................................................................................................
Mohamed
Hussein
28
يونيو 2017·
و قال الناشط الثوري
المثقف التنين اللي سابقنا بمليون فدان إن قناديل البحر ظهرت في شواطئ البحر المتوسط
بتاعتنا بسبب قناة السويس الجديده , أه الجديده , اللي بسببها القناديل عرفت تعدي من
البحر الأحمر !! .
.
عزيزي الناشط الثوري
العميق , اللي أعمق من قناة السويس و قناة بنما و المحيط الهادي و المحيط اللي مش على
بعضه , هو قنديل البحر بيعدي من القناه الجديده و كان مكسوف من القديمه مثلا ؟ و بعدين
مش القناه الجديده دي تفريعه و اصغر من طشت أم وجدي غنيم ؟ دلوأتي بقت كبيره و عميقه
و تساع من قناديل البحر ملايين ؟ .
.
الحقيقه يا مولانا
تعالى بقى و أنا اقولهالك
الحقيقه ان سبب
ظهور قناديل البحر هو العاصمه الإداريه الجديده مش قناة السويس الجديده , و هقولك ليه
, لأننا عملنا العاصمه الإداريه الجديده دي عشان نحقق حلم الصهاينه ( من منيا القمح
للفرات ) زي ما قال القيادي الثوري و الخبير الإسترا*** ممدوح ( حمره ) , و طبعا ماينفعشي
نحقق حلم الصهاينه و احنا لسه عندنا قناديل في البحر الاحمر , قولنا لازم نسلّم لهم
البحر الاحمر نضيف , خالي من قناديل البحر , انت عايز البت راشيل لما الصهاينه يحتلو
الغردقه و العين السخنه تيجي نازله المايه هي و امها ( ام راشيل ) و قناديل البحر تقرصهم
؟ دي حتى تبقى عيبه في حقنا .
.
فكانت الفكره اللي
عملها السيسي بعد ما بدأنا في العاصمه الإداريه هي طرد القناديل من البحر الاحمر للمتوسط
, دي الخطوه الأولى , بعدها بييجي دور الميتسرال اللي اشتريناها و الرافال كمان , هتقولي
ازاي ؟ هقولك اصبر عليا بس , الميسترال موجوده في البحر المتوسط و هيكون دورها اننا
نلم فيها القناديل من شواطئنا بتاعة البحر المتوسط و نروح نرميها على حدود اليونان
, وقبل ما نرميها نحلّفها على مصحف انها ماترجعشي تاني .
.
هتقولي طب ايه
دور الرافال ؟ مانت أصلك غشيم و مش فاهم أي حاجه , يا مغفل , انا قلت لك هنلم القناديل
و نحطها في الميسترال , انما مسألتش نفسك القناديل هتتجمع في مكان واحد و تعوم على
وش المايه ازاي عشان نعرف نلمها ؟ هنا بييجي دور الرافال , لا مش هتضرب صواريخ ولا
قنابل , الرافال اللي اشتريناها بتصدر موجات فوق محشيه , الموجات دي بتسمعها قناديل
البحر بس و بتتلم عليها , فهمت بقى ؟ يعني الميسترال هتبقى واقفه كده و الرافال فوقها
كده , الرافال تعمل ززززز ( يعني صوت موجات فوق محشيه ) و القناديل تتلم , نقوم شايلينها
من المايه و نعبّي الميسترال بقى و نتوكل على الله نشوف طريقنا لليونان , نرمي القناديل
و نلف الميسترال و نرجع , قوم لما الصهاينه ييجو يحققو حلمهم عندنا يلاقو شواطئنا كلها
أنضف من الصيني بعد غسيله , و على رأي الواد المسطول اللي في مسلسل ظل الرئيس , ربنا
يخليك في حالك بقى .
.................................................................................................................
Mohamed
Hussein
27
يونيو 2017·
حركة حماس بتحكم
قطاع غزه من 10 سنين , و من يوميها فكرة الجهاد عند الحركه بقت بلح , و الجهاد الوحيد
المتاح هو جهاد ضد جنود الجيش المصري !! .
حركة حماس بقياداتها
الحاليه ماقتلتش جندي صهيوني واحد ولا حتى حرقت لمبة في شقه بيسكنها واحد صهيوني ولا
قطعت لهم حبل غسيل يا مؤمن أو طرطشت عليهم بشوية ماية , طب امتى بقى أشاوس حماس هيحاربو
الصهاينه بجد و يحررو أرضهم و يحررو القدس هما و التنظيم الإرهابي الدولي الكيوت ؟
الإجابه , بسم الله الرحمن الرحيم , حركة حماس هتحارب الصهاينه و تحرر القدس هي و الإخوان
لما أنا بإذن واحد أحد أفوز بجايزة مستر إيجيبت وجايزة أحسن باك شمال في العالم , اه
و عهد الله زي ما بقول لكو كده , يعني سنه 3956745 ميلاديه , بعد صلاة العصر .
..................................................................................................................
Mohamed
Hussein
27
يونيو 2017·
امبارح خدت البنات
و روحت فسحتهم في حديقة الأسره family park
اللي جنب الرحاب , الحديقه دي تبع الجيش , و المستوى جوه وهم , النظافه
و الجمال و التخطيط و التنوع , هتشوف الجمال ده في كل شئ حواليك .
.
اللي شغالين جوه
كلهم أو اغلبهم عساكر جيش لابسين مدني و بيأدو خدمه مدنيه في مكان ترفيهي , في الملاهي
و المطاعم و الحراسه و كل مكان جوه .
.
طيب لو انا عيني
ضيقه و تايواني مضروب عايش على أرض مصر هشوف الصوره كده , انما حيث اني مصري و بعرف
أشوف من الغربال يبقى أكيد هشوف الصوره أوضح .
.
في الصوره و المشهد
و جوه نفس الحديقه , 20 ألف زائر ممكن يكون منهم بدون مبالغه 5 ألاف سوري , السوريين
بيتعرفو من شكلهم و من لبس الستات و البالطو المميز و ربطة الطرحه .
.
طب ايه بقى الحدوته
؟ الحدوته ان ده اسمه جيش مصر , هتشوفه في كل مكان حواليك , حدائق و جناين و فنادق
و قاعات أفراح و مستشفيات و أكشاك لخدمة المواطنين , و في نفس الوقت هو جيش مصر اللي
بيصنع سلاح و يحمي حدود طولها اكتر من 4 ألاف كيلو و يحارب الإرهاب اللي خرب دول تانيه
و هدّها , و في نفس الوقت هو جيش مصر اللي عنده خطة انتشار لحماية البلد بكافة ربوعها
في حالة الخطر , و في نفس الوقت هو جيش مصر اللي عنده خطة تانيه للتعامل مع أي أزمه
طارئه , أزمه في لبن الأطفال هتلاقيه بيتدخل و يحل المشكله , اسكندريه غرقانه في شوية
مطر هتلاقيه , مرض معين انتشر و مستشفيات الحكومه مش قادره عليه هيفتح مستشفياته للمدنيين
مع انها مستشفيات عسكريه .
.
و في نفس الوقت
هو جيش مصر اللي عنده سلاح المهندسين , اللي بيعمل أغلب المشاريع العملاقه في البلد
, طرق و كباري و قنوات بحريه و سدود و جسور و مساكن لسكان العشوائيات .
.
و في نفس الوقت
هو جيش مصر اللي خلّى الحديقه بتاعة الأسره دي فيها 5 ألاف سوري , محدش فيهم اسمه لاجئ
, ولا سمح للمصري يكون لاجئ .
.
و حيث اني زي ما
قلت لحضراتكو عيني مش ضيقه ولا تايواني مضروب هقولكو الخلاصه , جيش مصر هو الجيش الوحيد
في العالم اللي يقدر يشيل بلده في أي مشكله و أي ازمه و أي توقيت , و الحكايه دي معملهاش
الجيش عشان يبقى بديل عن الحكومه , ماهي أصل الحموريه بتبقى منهج فكري عند ناس محسوبين
علينا بني أدمين , جيش مصر مقالشي لحكومات مصر المتعاقبه افسدو و النبي و اتملو بيروقراطيه
و ترهّل عشان اكون بديل عنكو , مقالشي لوزارة الصحه اعملي ازمه في لبن الأطفال , مقالشي
لوزارة النقل خلّيكي بروطه كده , مقالشي لاسكندريه اغرفي في شوية مايه , مقالشي للمحليات
ارتشي و اسمحي بمباني غير ادميه , مقالشي للمحافظات اعملي عشوائيات جواكي عشان ابقى
اتدخل و أحلها انا .
.
باختصار يا محترم
, البلد دي عامله زي كف إيد له خمس صوابع , شعب و جيش و تاريخ و أزهر و كنيسه , ممكن
صباع فيهم يكون مش عاجبك شويه , لكن ماينعفشي تقطعه , ولا عزاء للحمير .
..............................................................................................................
Mohamed
Hussein
26
يونيو 2017·
عايز أكلم حضراتكو
في حاجه , هي هتزعل ناس كتير مني , انما ظاهره غريبه و بالنسبالي بشوفها سيئه جدا
.
.
الحدوته يا ساده
أو الظاهره الغريبه بدأت بالتكنولوجيا الحديثه و ظهور مواقع التواصل الاجتماعي و الفيس
و الواتس و الإيميل و الترباتاتو , و اللي كانت نتيجتها , ان معايدات الناس على بعض
رساله عالواتس أو ستيكر عالفيس , ده وانت قاعد في الليفنج روم بتاعك و ممدد عالكنبه
, تعيّد على اخواتك و قرايبك بالشكل ده , شئ ممتع و جميل و زي الهباب طبعا .
.
اللي فات ده مش
الظاهره اللي أقصدها , انما البدايه , الظاهره هي حكاية ان كل واحد عنده شاليه في العين
السخنه او فيلا في الساحل أو حتى معندوش ياخد مراته و عياله و يطلعو من ليلة العيد
يقضو العيد كله في المصيف الجميل اللذوذ ده , 3 أيام أو اربعه أو خمسه , طب فين المشكله
؟ يعني ايه فين المشكله يا محترم ؟
.
المشكله يا محترم
و الظاهره اللي في تمادي مستمر دي قتلت او بتقتل أو هتقتل أي حاجه فيها ترابط اجتماعي
, يعني معاليك عندك أجازه الصيف أكتر من 100 يوم , لو سمحت سيب بس يومين في العيد الصغير
و يومين في العيد الكبير ماتطلعش فيهم الشاليه ولا الفيلا , طب تروح فين بقى ؟ والله
انا مكسوف جدا وانا بقولك تروح فين , مكسوف منك بصراحه , في العيد يا صديقي تروح تعيد
على والدك و والدتك و اخوك و بنت عمك و عمك و خالك , قرايبك يعني , تقول لهم كل سنه
وانتو طيبين فيس تو فيس , تقولها بلسانك ماتكتبهاش عالواتس , و تمسك ايديهم و تلمسها
, و تسلم و تعيّد ماتبعتشي ستيكر , روح لهم حتى لو في بلاد و محافظات تانيه , اتعب
شويه و اتلمو مع بعض , و لو خلصت معايده على قرايبك يوم العيد ابقى سافر للشاليه او
الفيلا من تاني يوم او من تالت يوم , لا المصيف هيطير ولا الشاليه , ولا حبكت ان اليوم
اللي بتتجمعو فيه في السنه و تصلو الرحم و تعيدو على قرايبكو يكون في مارينا و السخنه
و شرم , هي مامة حضرتك ساكنه في شرم ؟ اختك عايشه في مارينا ؟ .
.
بصو انا عارف ان
فيه ناس كتير هتزعل , بس خلينا ننسى اللي فوق و أسأل كل واحد بيقضي العيد كله بالشكل
ده سؤال , هو حضرتك رايح فين بالظبط ؟ ماقصدشي المصيف اللي انت رايحه فين , انما أقصد
حضرتك رايح فين اجتماعيا ؟ و الخطوه اللي بعد كده ايه ؟ تبعت لاخوك ستيكر في فرحه مع
كلمتين و ألف مبروك ؟ تبعت لمامتك التعبانه اللي راقده في المستشفى فيديو فيه دعاء
للمرضى بلسان واحد من المشايخ ؟ ده الطريق اللي حضرتك ماشي فيه ؟ .
...........................................................................................................................
Mohamed
Hussein
25
يونيو 2017·
في البلد عندنا
متعودين نفطر يوم العيد بط و فراخ و رقاق , و في القاهره و المدن الكبيره بياكلو رنجه
, ماعرفشي الناس في الصعيد و سينا و حلايب و النوبه و مطروح متعودين ياكلو ايه يوم
العيد .
الحاجات دي اسمها
( تنوع ثقافي ) , و الحقيقه ان مصر مش دوله واحده , دي سبعتاشر دوله في بعض و كل دوله
فيهم لها عاداتها و تقاليدها و بتفرح و تعيّد بطريقتها , المهم كلهم تحت عَلَم فيه
3 ألوان و حضاره فيها 7 ألاف سنه و مليون كيلو متر مربع و نشيد بلادي بلادي , و الأهم
إن مصر لما بتفرح محدش في الدنيا بيعرف يجاريها في فرحتها ولا يعرف يقلّدها , مانا
قلت لكو مصر دي دوله لها روح , مش دوله بلاستيك .
........................................................................................................................
ليست هناك تعليقات:
إرسال تعليق