Mohamed
Hussein
8
ديسمبر 2016·
شيك على بياض
.
لو كان لنا عمر
أنا و هو , يبقى هنتخب السيسي في 2018 و أبصم بالعشره من دلوأتي , 3 حاجات كانو الفيصل
بيني كمواطن و بين السيسي كرئيس لمصر و نجح فيهم بامتياز , ( حاجات ملهاش علاقه بكل
المشاريع العملاقه اللي عملها ولا اللي بدأ فيها ) , إنه مايخونشي بلده ولا يخون أمنها
القومي , إنه مايوسخشي تاريخها و يوسخ توب جيشها و يشارك في حروب قذره بالوكاله , إنه
مايتصالحشي مع جماعه ارهابيه خاينه , السيسي نجح بامتياز في ال 3 حاجات رغم انه اتعرض
لأصعب ضغوط ممكن يتعرض لها أي رئيس دوله في العالم , القصه بالنسبالي بقت محسومه و
خلصانه , اللي نجح في الإختبارات دي في السنين الصعبه أوي اللي فاتت مش هيسقط فيها
في السنين اللي جايه , لأن اللي جاي عمره ما هيكون أصعب من اللي فات .
.........................................................................................................................
Mohamed
Hussein
8
ديسمبر 2016·
و لا عزاء للبهايم
.
.
لما قريت جملة
السيسي ( اللي يقدر على ربنا يقدر علينا ) , في الحقيقه قريتها 10 مرات و كل مره أقول
( الله الله الله ) , هو المعنى و المقصود ايه ؟ المعنى بيقول إننا تعبنا اوي في ال
5 سنين اللي فاتو , اتحاربنا حتى في لقمة العيش , عشان بس رفضنا نقتل أو نحرق أو نخرب
دول عربيه , يعني عملنا الطيب و الخير , و وقفنا في حلف الله مش حلف الشيطان رغم كل
الصعوبات و رغم التهديدات و رغم لوي الدراع المتواصل و الحرب اللي ماوقفتشي لحظه ,
حتى لما الكل و أقرب الناس لنا وقفو في حلف الشيطان قلنا مش مهم , احنا في حلف الله
و رعايته , واللي معاه ربنا محدش هيقدر عليه .
.
مضمون الفقره دي
تحديدا من خطاب السيسي كانت موجهه للشعب , الشعب اللي هو احنا مش الإرهابيين المنحطين
( اللي جايين يعلمونا دين ربنا ) و لا الكولجيه اللي مركوبين من الإرهابيين , و الفقره
كانت بتتكلم تحديدا عن الخليج , خليج تيريزا ماي , بتقول لهم : تصحبكم السلامه , و
خدو الباب وراكو , مش هنغير ثوابتنا و قناعاتنا ولا هنوسخ ايدينا بدم اخواتنا عشان
نرضيكو و نرضي أسيادكو الأمريكان و البريطانيين , هاتو أخر ما عندكو , اللي شرب البحر
يشرب البحيره , يا جبل ما يهزك ريح .
.................................................................................................................................
Mohamed
Hussein
8
ديسمبر 2016·
من أجمل ما جاء
في خطاب السيسي :
.
(( إحنا عمرنا
ماتآمرنا على أحد ولن نتآمر، ولا قتلنا أحد ولن نقتل ولا خونا أحد ولن نخون"،
وهانفضل نبنى ونعمر ونصلح، واذا كان ده يرضى ربنا، يبقى اللى يقدر على ربنا يقدر علينا
))
.
يعني ايه الكلام
ده ؟
1 - يعني مابعتناش
جيوشنا و طياراتنا تقتل العرب و تدمر جيوش الدول العربيه مهما كان التمن .
2 - يعني ماصرفناش
مليارات الدولارات في خراب الدول العربيه .
.
3 - يعني ماقولناش
على شوية ارهابيين مرتزقه فصيل وطني أو معارضه كيوت .
.
4 - يعني ماوسخناش
إيد مصر بإننا نحطها في إيد الأمريكان و البريطانيين و حلف الشيطان , مهما كان التمن
.
.
5 - و إيه بقى
كان التمن ؟ حرب اقتصاديه شامله و لوي لدراع مصر ؟ الدولار نط من 7 جنيه ل 18 و السلع
أسعارها بقت الضعف ؟ مات الشعب المصري ؟ لا , الشعب ده مابيموتش ولا بيركع .
.
6 - و ايه كمان
كان التمن ؟ ترسانه اسلحه الجيش الليبي اللي اتنهبت يتنقل معظمها لمصر و أنفاق حركة
حماس الإرهابيه تنقل أسلحه و ارهابيين , هل حصل لمصر انفلات أمني في الشوارع ؟ هل الناس
أصابها الخوف ؟ هل المصريين بطّلو يضحكو و ينكتو و ينزلو الشوارع و يفسحو عيالهم و
يحبّو و يغنّو ؟ برضه لأ , الشعب ده مابيخافشي ولا بيتهز .
.
7- باختصار , البلد
دي لها كتاب تاريخ لو فردت صفحاته جنب بعض هتوصل من هنا لحد أسوان , بس موقف مصر في
5 سنين اللي فاتو , موقف الجيش و الشعب , هيتعملّه كتاب تاريخ لوحده , كتاب جديد لانج
, يقول مين هي مصر ؟ ثباتنا و شجاعتنا و مواقفنا و صبرنا و قوة احتمالنا وايدنا النضيفه
, كتاب ينفع أوي يكون عنوانه ( اللي يقدر على ربنا يقدر علينا ) !! .
................................................................................................................................
Mohamed
Hussein
8
ديسمبر 2016·
في خطبة الجمعه
الجايه , هيطلع مشايخ في الخليج على المنابر و طبعا معاهم القرضاوي , و يقولو :(( أيها
الناس , أما بعد , فقد بارك الله في قومٍ أمّتهم تيريزا ماي )) , و في أخر الخطبه هيلعنو
جدود أبو بشار الأسد أصله علوي و العياذ بالله ( أه ورحمة خالي شوقي اكتشفو انه علوي
هو و أبوه ) , و هيدعو للأمريكان بطولة العمر و لطائرات الصهاينه اللي بتقصف دمشق و
تدمر جيش بشار العلوي ابن التيت بالتوفيق و السداد , اللهم سدّد رميهم .
.
بس مش عارف بصراحه
المشايخ دول هيعيطو ويتشحتفو في أنهي فقره بالظبط ؟ فقرة بارك الله في تيريزا ماي ولّا
فقرة لعنة الله على بشار العلوي ابن التيت ؟ , أصلي بحب فقرة الشحتفه دي أوي و بتأثر
بيها و بتعملّي روح معنويه .
......................................................................................................................
Mohamed
Hussein
7
ديسمبر 2016·
عشان نقفل صفحه
اتفتحت .
.
بيقولك يا سيدي
, تريزا ماي قالت لحكام الخليج , إن أمن الخليج من أمن بريطانيا !! , يعني بالبلدي
كده بتقولهم مسافة السكه بس بالإنجليزي أو بمعنى أصح بالبريطاني , و لو مرّه هبّ النسيم
في الرياض لازم يغنّي و يقول مانشستر .
.
أصدقائي الأعزاء
, ياريت تقرو فكرتي عشان نقفل الصفحه دي و نحاول مانتكلمش فيها تاني , بسم الله الرحمن
الرحيم :
.
1- خلّونا نرمي
الماضي بالعك اللي فيه دلوأتي ( مؤقتا يعني ) , و مين أسس دوله مين و مين ساعد مين
و مين كان نايم في حضن مين , و مين و مين و مين ( بصوت سهير البابلي ) .
.
2- خلونا كمان
نركن على جنب هاجس النحنحه و السهوكه , و التدين اللي بيهبط علينا فجأه , و حكاية أرض
الرسول و الكعبه مين هيحميها ؟ ماهو المؤكد إن القواعد الامريكيه ( والبريطانيه ) مش
هيحمو الكعبه ولا أرض الرسول ولا الأمريكان و البريطانيين مقطعين حصر الجامع , و وقت
الجد كالعاده هنشيل الليله احنا , عشان ده قدر مصر .
.
3- حكاية استبدال
النفوذ الأمريكي في الخليج بنفوذ بريطاني دي أخر نكته سمجه ممكن الواحد يسمعها , التاريخ
الحديث بيقول ان بريطانيا عمرها ما خرجت من عباية أمريكا أو بمعنى أصح أمريكا عمرها
ما خرجت من عباية بريطانيا , أو بمعنى أدق جدا أمريكا و بريطانيا عمرهم ماخرجو من عباية
الكيان الصهيوني .
.
4- ايه اللي حصل
في اخر 20 سنه ؟ من غير هري كتير , بص عالخريطه , السودان اتقسمت , فلسطين اتقسمت
, العراق راحت , سوريا كمان , ليبيا , و اليمن في السكه , و هنا السؤال البسيط أوي
بيقول , هي دول الخليج كان لها دور في اللي حصل بفلوسها و بترولها و دولاراتها ؟ طب
دورها كان ايه يا ترى ؟ هل حاولت تساعد الدول دي و تمنع تقسيمها أو انهيارها ولا ساعدت
في العكس ؟! .
.
5- طيب حتى لو
شاركو في العكس ممكن نقول مجازا كده ( عفى الله عما سلف ) باعتبار ان اللي حصل حصل
و اللي فات ده اسمه الماضي و حياة الشعوب لا تتوقف عند مواقف حتى لو كانت كارثيه ,
يعني ممكن نقول ان المستقبل أهم , حضرتك شايف مستقبل السياسات الخليجيه رايح فين ؟
هل بيغسل ايديه و يتبرأ و يعتذر عن اللي حصل ولا مكمّل مهما كان التمن ؟! .
.
6 - أصدقائي الأفاضل
, قلتها و هكررها دايما , أنا على دين دولتي , على دين دولتي , و مش خايف على مصر
, البلد دي عمرها لا ماتت ولا هتموت , بناكل قش و نعيش , كل بوستاتي اللي اتكلمت فيها
عن الخليج اليومين اللي فاتو مكانتشي تريأه ولا شتيمه ولا سخريه , كانت صرخه جايز حد
يسمع أو يفوق .
.
7- يا قوم , يا
أسيادنا , يا حبايبنا , إلحقو نفسكو , ده لو ربنا سبحانه و تعالى سمح للخرفان انها
تنطق و سألناها تختارو مين يحرسكو و يحميكو يا خرفان ؟ , أكيد هيقولو اي إجابه إلا
إنهم يختارو الديب !! , و دي الخرفان مش البني أدمين , مين هيحميكو من الديب اللي اختارتوه
( و ساعدتوه ياكل اخواتكو ) يا بني أدمين ؟
................................................................................................................................
Mohamed
Hussein
7
ديسمبر 2016·
الطبيب لمواطن
ياباني : احنا هناخد أهم عضو في جسمك و ندّيك مليون دولار .
- المواطن الياباني
( في رد فعل سريع ) : يحط ايديه الاتنين على راسه و يصرخ لأ لا لأااااااااااااااااااه
.
.
الطبيب لمواطن
فرنسي : احنا هناخد أهم عضو في جسمك و نديك مليون دولار .
- المواطن الفرنسي
( في رد فعل سريع ) : يحط ايده على قلبه و يصرخ لأ لأ لأاااااااه .
.
الطبيب المواطن
عربي : احنا هناخد أهم عضو في جسمك و ندّيك مليون دولار .
- المواطن العربي
( في رد فعل سريع ) : يحط ايديه الإتنين و يبقى بالظبط بالظبط زي لاعب الكوره اللي
واقف في حيطه قدام ضربه حره مباشره , و يصرخ , لأ لأ لأاااااااااااااااااه .
.
.
و أخيرا
............
.
الطبيب لمواطن
خليجي : احنا هناخد أهم عضو في جسمك و نديك مليون دولار .
- المواطن الخليجي
( بهدوء ) يقول للطبيب : اسأل تريزا ماي و هيلاري كلينتون , لو قالو أوكيه يبقى انا
موافق , و من غير فلوس خالص , خلّي الحساب علينا .
.
الطبيب للمواطن
الخليجي : طب يابني مش تعرف الأول احنا هناخد أنهي عضو أو أنهي حته في جسمك ؟! .
- المواطن الخليجي
: و الله ما بتفرق معانا , عايزين تاخدو حته و تستخدموها , عايزين تحطو أي حاجه من
عندكو في أي حته من عندنا ( تعملو قاعده عسكريه جديده مثلا ) , براحتكو خالص , جسدنا
و ما نملك نفدي بيهم الست تريزا و الست هيلاري , نحنا أهل كرم و جود .
.............................................................................................................................
Mohamed
Hussein
6
ديسمبر 2016·
قناة ال CNN عملت حوار مع سامح شكري و قبل الحوار عملت تقرير
عن 30 يونيو و وصفته بالإنقلاب !! , طبعا سامح شكري مافوّتشي الحكايه دي .
.
أمريكا بساساتها
و قياداتها و إعلامها و سلطاتها مصرّه على اعتبار 30 يونيو انقلاب ( واضح ان 30 يونيو
بتوجعهم أوي لحد دلوأتي ) , و طبعا 25 يناير ثوره شعبيه ( هيدرسوها لعيالهم في المدارس
) , مع ان الأعداد اللي نزلت في 30 يونيو أكتر من اللي نزلت في 25 يناير و مع ان الجيش
وقف مع المتظاهرين في الحالتين و أجبر الرئيسين على التنحي ( واحد فيهم عسكري بدبوره
و التاني مدني برياله ) .
.
بس أهو الامريكان
مزاجهم كده , هواهم كده , و دايما يا جدع تلاقي أرائهم و كلامهم متطابق مع كلام الجماعه
الإرهابيه , تطابق عجيب يا مولانا , اوعى تكون ( بِعْد الشر ) فهمت ان أمريكا و بريطانيا
هما الراعي الرسمي للجماعه الإرهابيه , اوعى تفهم كده أصل الكولجيه بياخدو على خاطرهم
و يزعلو .
.
أما بقى عن حرية
الإعلام الأمريكاني و نزاهته فعايز أقولك , ابقى تعالى بكره من بدري و هات معاك سلطانيتين
, عشان تاخد ب 2 دولار نزاهة اعلام أمريكي , كل دولار لوحده .
...................................................................................................................................
Mohamed
Hussein
6
ديسمبر 2016·
شوفت يا عم اللي
حصل ؟ .
- ايه خير ؟ .
.
بيقولك دول مجلس
التعاون الخليجي هتجتمع الفتره الجايه عشان يوحدو سياساتهم و أهدافهم و يتكاتفو في
المرحله الصعبه دي بتاعة خراب الشرق الأوسط , و هيعزمو دوله كمان تحضر اجتماعاتهم و
مشاوراتهم .
- أكيد هيعزمو
مصر , طالما بيتكلمو عن توحيد سياسات و تكاتف ضد مخطط خراب الشرق الأوسط .
.
لا سيادتك مش هيعزمو
مصر .
- أومال هيعزمو
مين ؟ .
.
هيعزمو جمهورية
بريطانيا العربيه الشقيقه .
- هههههههههههه
لا بتهزر طبعا , يعني يجتمعو عشان يتكاتفو في وش مخطط الخراب يقومو يستعينو ببريطانيا
اللي هي أصلا العقل المدبر لمخطط الخراب ؟!
.
يا جاهل أصلك مش
فاهم .
- طب اشرح لي انت
يا عبقرينو .
.
هو انت لو عندك
بيت بيبانه مخلّعه و شبابيكه بايظه و عارف ان فيه حرامي داير يلف عالبيوت اللي حواليك
يسرقها و ينهبها و يحرقها و إن الدور جاي جاي عليك , بتعمل ايه ؟
- قولي بنعمل ايه
؟ .
.
العقل بيقول انك
تجتمع انت و اخواتك عشان تفكّرو ازاي تحمو البيت أبو شبابيك بايظه ده و تأمّنوه كويس
من الحرامي , ولازم تستعينو بحد عنده خبره و قدره , يعني نجّار يكون شاطر و أمين مثلا
.
- صح , معاك حق
, بس هما الخلايجه هيستعينو بالنجّار كده ؟ .
.
لا , ماهما عشان
خلايجه , هيستعينو بالحرامي !! .
..........................................................................................................................
Mohamed
Hussein
6
ديسمبر 2016·
عايز تعرف دماغك
لسه معاك و لّا سافرت من بدري ؟! .... اقرا الخبر ده و شوف تعليقك أو رد فعلك السريع
المباشر .
.
بيقولك يا سيدي
القبض على شبكة للإتجار في الأعضاء البشريه فيها 12 طبيب و عدد من أساتذة الجامعات
!! ......... تعليقك هيحدد دماغك فين بالظبط و هيحدد عودك مفرود ولا محنى .
.
ايه يا مولانا
؟ مش هتقول ( وزارة الصحه بلطجيه ؟ ) و لا حكاية بلطجيه دي تخصص للداخليه ؟ عارف يعني
ايه اتجار في أعضاء بشريه ؟ على فكرة وزارة الصحه دي الوزاره اللي انا تابع لها .
.
و ممكن كمان تقرا
خبر عن صيادله بيتاجرو في المواد المخدره اللي ممكن يبلعها سواق نقل و يفعصله عربيتن
تلاته و هو ماشي في الطريق ( انا صيدلي بالمناسبه ) , يا ترى وقتها هتقول ايه لما تقرا
الخبر ؟ هتقول الصيادله بلطجيه ولا هتحط الجيش المصري في جمله قذره زي عوايدك ؟! .
.
و ممكن كمان تقرا
خبر عن رشاوي للمهندسين في الأحياء و بيوت تقع على دماغ اللي فيها , هتقول نقابة المهندسين
بلطجيه ؟ ولا هتجمع كرتونة البيض الممشش اللي بتتحفنا بيها و تقول هاهاهاها زوّدو مرتبات
القضاه تاني ؟! .
.
لو دماغك معاك
مش هتقول كلمة بلطجيه بالتعميم على أي وزاره و لا أي جهه , عشان التعميم كارثه , انما
هتقول ببساطه شديده و تشاور عالمجرم و تحط صباعك في عنيه و تقول طبيب مجرم صيدلي مجرم
مهندس مجرم ظابط شرطه مجرم , و طبعا تبقى فاهم ان كل مهنه من دول فيها عشرات الألاف
من الناس الطبيعيين اللي مش مجرمين , وفي النهايه عندك قانون بيتطبق عالكل , بالمناسبه
فيه 2 قضاه بيتحاكمو حاليا , واحد بتهمة الرشوه في اسكندريه و التاني بتاع الحشيش في
السويس .
.
لو دماغك متباعه
من بدري و ضهرك محني و مركوب هتفضل مركز على الجيش و الداخليه و القضاء , المؤسسات
اللي أسيادك طالبين اسقاطها عشان مايبقاش عندك دوله و وقتها تميم يفرح و سلمان يرقص
و أمريكا تكتب فيك قصائد شعر و غزل و الإرهابيين يبقو معارضه كيوت و أبو الدرداء يبقى
رئيس مجلس محلي مدينة بلبيس قصدي رئيس دولة بلبيس الشقيقه !! .
....................................................................................................................................
Mohamed
Hussein
6
ديسمبر 2016·
رساله لخادم الحرمين
............. مرحلة ال ( هوووووب )
.
معالي صاحب السمو
الملكي طويل العمر , ارقص كويس و النبي , اه كويس , لا فيه أحسن من كده , ارقص كمان
, برافو عليك , رقصك هايل .
.
تعالى بقى بعد
ما خلصت رقص أحكي لك حدوته صغيره , بقى صلي على سيدك النبي , من أد عشره خمستاشر سنه
كان فيه واحد تخين و بكرش بيحكم كشك جنبك عالخليج , التخين ابو كرش اسمه حمد و الكشك
اسمه قطر و عندهم قناه تعجبك اوي اسمها الجزيره .
.
المهم في الوقت
ده حمد ابو كرش ضرب أحلى صحوبيه مع بشار الأسد , و بقو زي بتاعتين في بتاع واحد , الدول
العربيه كلها تبقى في وادي , و قطر و سوريا في وادي , في الوقت ده كانت الجزيره بتعمل
تقارير عن بشار الأسد إنه حامي الحمى و المناضل البطل اللي هيحرر القدس و يجيب الديب
من ديله , و فجأه هوووووب بقى بشار شيعي علوي سفاح مجرم بلطجي ( في نفس قناه الجزيره
) و الأيه اتقلبت 180 درجه في يوم و ليله يا معلم , قصدي يا طويل العمر .
.
طب ايه اللي حصل
؟ اللي حصل ان ده دور أبو كرش و ابنه و قناتهم العجب , الدور الصهيوني الأمريكي اللي
فكرته بسيطه جدا , واحد من البيت ( حبذا لو كان عنده عقدة نقص ) ياخد الحاكم العربي
من دول و يتصاحب عليه , لحد مايوصله للحفره المحفوره و يزقه و يرجع يشوف الدور على
مين بحسب تعليمات اللي بيشغلهم و يخطط لهم , يعني باختصار ياخدك من ايدك لحد مايلبّسك
في الحيط .
.
عرفت ليه بقولك
ارقص كويس ؟ عشان انت دلوأتي داخل عالحفره , يعني في مرحلة الهووووب , و اجمل حاجه
فيك طال عمرك انك مش بس رايح للحفره و ماشي في طريقها , لا دانت بترقص كمان , ماشاء
الله عليك متعدد المواهب , و الله ما قصّرت .
...................................................................................................................................
Mohamed
Hussein
5
ديسمبر 2016·
و بس يا سيدي
, طويل العمر استنى لما السيسي غادر الإمارات و بعدين راح زارها , و بعد كده طلع على
قطر بنت اللامؤاخذه و قابل اللامؤاخذه أميرها و رقص معاه رقصه المعرفشي ايه .
.
أصدقائي الأعزاء
اللي بقالهم شهرين تلاته بيحاولو يلاقو مبررات حلزونيه لتصرفات طويل العمر , و ايشي
تلاقيه بيعمل كده عشان ينيم أمريكا في الدره , و ايشي الحاجات دي كان متفق مع مصر عليها
, و ايشي و ايشي و شفتشي , عايز أقولكو حاجه بس حاولو تركّزو .
.
لو حضرتك ماشي
في الشارع و لقيت بتاعه ماشيه على 4 عجلات و لها دركسيون و مرايتين في الجنب و زماره
( لو دوست عليها هتقول بيب ) و كشافين قدام و كشافين ورا , فتأكد إن البتاعه دي على
بعضها كده اسمها عربيه , أه و الله عربيه , مفيش داعي خالص انك تقعد تعصر دماغك و تعمل
شألباظات عشان تحاول تقنعني أو تقنع نفسك ان البتاعه دي تبقى تمثال سعد زغلول أو طاجن
رز معمر , لا و الله هي عربيه , حاول تصدق .
.
بالمثل بقى , تصرفات
طويل العمر من أول حركة بترول أرامكو و حكاية الصبي إياد متني و بعد كده فيلم الخنزيره
( اللي أكيد بمباركته ) و بعدين حركة الإمارات و زياره قطر بتقول باختصار ان جلالته
مستمر في التصرفات الصبيانيه من أجل عيون ماما أمريكا , عندك معطيات بتؤدي لنفس النتيجه
, ماتحاولشي تغمي عنيك و تلغي عقلك تحت أي ظرف و مهما كانت الأسباب , هما احرار في
قناعاتهم و اختياراتهم , واحنا كمان أحرار أوي , نشوف مصالحنا بقى .
...............................................................................................................................
Mohamed
Hussein
5
ديسمبر 2016·
من يومين , و انا
ماشي بتمشّى كده في التايم لاين لقيت صديق من اياهم , كاتب على صفحته ( إثبت حضورك
بكتابة اسم من أسماء الله الحسنى ) !! .
.
و الله و بالله
و تالله الرحمن الرحيم الملك القدوس السلام المؤمن المهيمن العزيز الجبار قمت عامله
بلوك من غير تردد , و من غير ماعرف هو تبع مين , دولجي ولا كولجي ولا خروف ولا عويسي
ولا منجاوي , عشان بس المراره مش مستحمله و معنديش استعداد استنى عليه يومين كمان لحد
مالاقيه حاطط صورة برّايه خشب قديمه و كاتب تحتها اعمل لايك على برّاية الرسول , الغريبه
اني عملت له بلوك و إيدي ماحصلهاش حاجه ( إنها سليمه إنها سليمه ) , ولا السحليه العملاقه
( أم 7 رجول و مناخير 3 فتحات ) جت لي بالليل وانا نايم .
.
معركتنا الرئيسيه
معركة عقل , و صفحتي حابب انها تكون كده , مفهاش تجاره قذره لجمع اللايكات , لا تجاره
بدين ربنا , ولا تجاره بشعارات ثوريه و صور شهدا , ولا تجاره بشعارات تحرريه بلهاء
وصور عريانه , لا ده الدين ولا دي الثوره ولا ده التحرر , العقل يا بني أدمين هو اللي
ربنا ميزّنا بيه عن باقي المخلوقات , عن كل المخلوقات بما فيها الحمير و التعالب و
فيران الغيط و الديدان و القرد أبو بتاعه حمره .
..........................................................................................................................
Mohamed
Hussein
4
ديسمبر 2016·
انا و لوجي بنتي
.
.
لوجي : بابا ,
المدرسه عامله رحله لفصول رابعه ابتدائي , هنروح المتحف المصري .
أنا ( رد سريع
جدا ) : لا طبعا , متحف مصري ايه بس اللي تروحيه , مش هتستفيدي حاجه ولا هتستمتعي
, و بعدين الجو برد و زعابيب و تلج .
.
لوجي : يا بابا
انا ماكملتش كلامي , الرحله مجانيه !! .
أنا ( رد سريع
برضه ) : بجد و النبي ؟ لا طبعا لازم تروحي , المتحف المصري ده ممتع جدا و هتستفيدي
كتير و تعرفي حاجات عن تاريخ مصر و الأثار الفرعونيه , و هتستمتعي أوي .
.
لوجي : طب بالنسبه
للبرد و التلج و الزعابيب ؟ .
أنا : برد و تلج
ايه بس ؟ انتي فاكره نفسك عايشه في شمال روسيا ؟! .
.....................................................................................................................
Mohamed
Hussein
4
ديسمبر 2016·
مش عارف ليه الناس
استغربت ان كل القائمين على فيلم الخنزيره القذر المسئ للجيش المصري , كلهم طلعو من
خرفان الجماعه الإرهابيه , فين وجه الإستغراب بس ؟ الكائن الوحيد اللي وصل لمستوى قياسي
من الوساخه و الإنحطاط هو الكائن الإخوانجي , الكائن اللي بيرضع زباله و كراهيه و خيانه
من يوم ما يتولد , و بالتالي هو الكائن الوحيد اللي ممكن يوافق إنه يشارك في فيلم لتشويه
جيش بلده .
.
عارف يا محترم
يعني ايه واحد يتدرب أيام و أسابيع و شهور و يتعب أوي و يبذل مجهود مضاعف عشان في النهايه
يصور و يفبرك كام مشهد ضد الجيش العربي الوحيد اللي لسه واقف على رجليه ؟ يعني بتعب
أوي و يبذل المجهود ده كله عشان في النهايه يقول لنا و يثبت لنا انه أوسخ و أحط مخلوقات
الله , أهي دي صفه مش هتلاقيها غير في الكائن الإخوانجي الضاني , جينات بتتوارثها قطعان
الأغنام في زريبة حسن البنا .
.
البرادعي لو عايز
يتصالح مع الأشكال دي و ماله , يروح لهم قطر أو تركيا يتصالح و يعيش معاهم أو ياخدهم
عنده في النمسا و يتصالحو و ينامو في حضن بعض , إنما أرض مصر اللي ربنا حماها من الطوفان
بفضل جيشها و شعبها مبقاش فيها مكان للخونه , الأرض اللي اتروت بدم الجنود و عرق الغلابه
و المرابطين مستحيل هتطرح نباتات شيطانيه , مفيش قانون للطبيعه بيقول كده , ولا أيه
في كتاب الله , بالعكس دي قضيه محسومه ( عاجلا أو أجلا ) , و البلدُ الطيبُ يخرجُ نباته
بإذن ربه و الذي خبثَ لا يخرجُ إلا نكِدا ..... صدق الله العظيم .
......................................................................................................................................
Mohamed
Hussein
3
ديسمبر 2016·
وكيل النيابه
: حضرتك الدكتوره منى مينا ؟ .
منى مينا : أيوه
انا يافندم .
.
النيابه : حضرتك
متهمه بنشر إشاعات كاذبه من شأنها الإضرار بسمعه مصر لما قولتي حكاية السرنجه اللي
بتستخدم أكتر من مره و انتشرت بعد كده في صحف و قنوات عالميه .
منى مينا : والله
كان ضميري سليم و نيتي حلوه , و معايا ورق من النقابه يثبت ان ضميري سليم و نيتي حلوه
.
.
النيابه : طب خلاص
يا دكتوره طالما ضميرك سليم و نيتك حلوه يبقى نخلي سبيك بغرامه ألف جنيه أو 2 كيلو
سمك شبار , لو مش معاكي فلوس أو سمك يبقى خليها علينا احنا .
منى مينا : يعني
هتفرجو عني و بس كده ؟.
.
النيابه : لا مش
بس كده , و هنعدم الواد ده اللي اسمه محمد حسين , اللي قعد يكتب عالفيس عن خطورة تصريحاتك
بصفتك شخص مسئول و خطورة ترجمتها و إنك كان المفروض تتأكدي الأول و تكلمي وزير الصحه
.
.
منى مينا : أه
اعدموه هو و أصحابه اللي عملو لايك عالبوستات دي , و حطو السيخ المحمي في صرصور ودنه
.
أنا : يحيا العدل
, يحيا العدل , ربنا ياخدنا احنا يا شيخ .
................................................................................................................................
Mohamed
Hussein
3
ديسمبر 2016·
الحلزونه يامّه
الحلزونه
.
كان عندي صديقه
لذيذه أوي , كتبت في يوم على صفحتها إن رئيس الوزرا أصدر قرار بمنع العمره !! , اه
و الله بجد , و التعليقات تقولها يابنتي اعقلي , يابنتي مش كده , يا بنتي مستحيل ,
تقولهم لا لا انا متأكده , طب يابنتي فين الخبر ده , تقولهم هجيب لكو الخبر أهو ( هذا
و قد صرح مصدر رفض الكشف عن اسمه أن رئيس الوزراء المصري قال لأحدى القنوات الفضائيه
انه أصدر قرار بمنع العمره ) !! , فتحت صفحتها قبل ماعملها بلوك لقيتها شغاله بوستات
زي الفل , دولة يأجوج و مأجوج اللي منعت العمره , هتستنو خير منين يا كفره ياللي بتمنعو
العمره , اللهم أخرجني من هذه الدوله الظالمه اللي بتمنع العمره , بتاع 17 بوست ورا
بعض , اللي يجننك انها في كل تعليقاتها تكتب ( اللي مش عاجبه كلامي يا كماحه يعملي
بلوك ) انا مصره على رأيي و عندي الدليل ( فاكرينه طبعا الدليل بتاعها ) .
.
أعتقد صديقتنا
اللذيذه لسه لحد النهارده بتهري في نفس الموضوع وبتشتم في دولة يأجوج و مأجوج ( و مش
بعيد تقول ان السيسي هيعين أبو لهب وزير للخارجيه لما يعمل حكومه جديده , و حنظلة وزيرا
للزراعه و استصلاح الأراضي ) و بالتأكيد عندها نفس الدليل إياه , و هتفضل كده لحد ماتموت
, ولما تموت ( بعد عمر طويل ) هييجي الملايكه يحاسبوها , هتقولهم انتو جايين تحاسبوني
أنا ؟ طب ماتروحو تتشطرو على رئيس الوزرا اللي منع العمره !! .
.
مين اللي عمل في
عقول الشباب كده , و وصّلها للحاله البائسه اللي تصعب عالكافر دي ؟ و الله يا عم مش
أنا ( ولا أمي الله يرحمها ) , إنما ممكن تسأل البرادعي و خيرت الشاطر .
.................................................................................................................................
Mohamed
Hussein
3
ديسمبر 2016·
في احتفالات الإمارات
بعيدها الوطني , حضر السيسي و رؤساء دول تانيه كتير , السيسي قابل المسئولين الإماراتيين
على هامش الإحتفال , و قابل رؤساء فرنسا و اليمن , طبعا بالعقل و المنطق من المفترض
ان العلاقات الإماراتيه السعوديه كانت بتقول انهم تؤأمين ملتصقين في كل المحافل الدوليه
, متطابقين في الرأي و التوجه , و بالتالي و بالمنطق البسيط كان أولى بطويل العمر يحضر
الإحتفال ( قبل رئيس فرنسا اللي جاي من أخر الدنيا ) , و عدم حضوره بيعني
............. !! ., اه و الله العظيم .
.
من يومين كتبت
عن توقع لاحتمال قمه مصريه سعوديه في الامارات و كان رأيي انها هتفشل لو تمت , و إن
طويل العمر معندوش رفاهية الإختيار !! , و يبدو إن طويل العمر فعلا معندوش حتى رفاهية
اختيار إنه يمشي في طريق يكون احتمال انه في أخر الطريق ده يقابل السيسي أو يقابل مصر
بمعنى أصح , مع نفسك بقى يا حماده , و ماتنساش طبعا تبلّغ أرامكو انهم يوقفو شحنات
البترول بتاعة الشهور الجايه , و شوف لك كام كاتب صايع أو كام مسئول نص لبه خليهم يطلعو
يتريأو عالسيسي , ولا نملك لكم إلا الدعاء , ربنا يحمي الشعب السعودي من شر أعداؤه
و شر حُكّامه .
...................................................................................................................................
Mohamed
Hussein
2
ديسمبر 2016·
توضيح بسيط لأصدقائي
الأعزاء .
.
1- أحيانا بكتب
بوستات يبقى الغرض منها الإبتسامه و الضحكه مش اكتر , يعني الهدف و التارجيت ان الناس
تبتسم , يمكن يكون اعتقاد مني اننا محتاجين لكده أوي .
.
2- للأسف بلاقي
كتير من الأصدقاء متحفزين بشكل مبالغ فيه , إما تحفز للهجوم على شخص ورد اسمه في البوست
أو تحفز للدفاع عنه , زي ماحصل في البوست الأخير .
.
3- أصدقائي الغاليين
, هذا العبد لله الماثل أمامكم ماعندوش أي مشكله خالص في حضن البحيري و ناعوت , أو
اي اتنين يعملو كده , حتى لو في الشارع , مش مشكلتي ولا قضيتي , انا مش ربنا ولا معايا
تفويض بالاعتداء على خصوصيات الناس , كل اللي يعنيني في وجودك في الشارع و النبي يا
مولانا لا تكسر اشاره و لا ترمي زباله و لا تمشي عكس السير , غير كده ياكشي تعمل شألباظات
انت حر .
.
4- اسلام بحيري
و فاطمه ناعوت قضيتي معاهم قضية عقل و فكر مش قضيه حضن و بوسه , بتفق مع كتير من افكارهم
في مضمونها و جوهرها و بختلف في الشكل و الطريقه , وفي النهايه معنديش أصنام بعبدها
.
.
5- عندي بس شعور
بمبالغه شديده في وصف المحتوى الثقافي و الفكري لاسلام و فاطمه ناعوت , بحس ان الناس
بتتعلق بقشايه , و اجمالا رأيي ان النخبجيه و المثقفين في مصر على اختلاف مشاربهم هما
أقل بكتير من الأحجام اللي ظاهره للمريدين , ده مش حال مثقفين و مفكرين و نخبجيه حقيقيين
بالحجم المتخيل و إلا مكانشي يبقى ده حال المريدين !! .
.
6- الأزهر بالنسبالي
مؤسسه عريقه و عمود خيمه حتى لو كان محتاج شغل كتير أوي و تطوير و فلتره و تنقيح ,
و رأيي ان ده يحصل من جوه البيت و يبقى مشروع من مشروعاتنا القوميه , بس بشوية احترام
للكيان و لأهميته , لو عايز تعرف أهمية الكيان ده ابقى اسأل نفسك : ليه محور الشر من
كام سنه أنشأ كيان مماثل اسمه الإتحاد العالمي لعلماء المسلمين ؟! اللي هو بتاع القرضاوي
؟ و ليه الكيان ده و معاه الجرايد الأمريكيه و البريطانيه و المراكز الحقوقيه دائمة
الهجوم على مؤسسه الأزهر ؟ , اللي اعرفه ان الحدايه مابترميش كتاكيت
.
7- باختصار عايز
أقول لحضراتكو , انا مش مقطع حصر الجامع ولا متدين أوي , بالعكس , بس عندي حاجتين مهمين
, بحب البلد دي بطريقتي , و بحط كل واحد في حجمه الطبيعي .
.........................................................................................................................
Mohamed
Hussein
2
ديسمبر 2016·
يا جدعان مفهاش
حاجه و الله , عادي يعني , في حفل توقيع الكتاب الجديد بتاع ابراهيم عيسى , فاطمه ناعوت
حضنت اسلام البحيري ( أكيد بتعتبره زي ابن خالتها ) و اسلام البحيري حضن فاطمه ناعوت
( أكيد بيعتبرها زي بنت خالته ) .
.
بلاش نبص في كل
حضن كده و نقف لهم عالواحده , سيب الناس تحضن ( و تنبصط ) , مش أحسن مانبقى زي الصومال
و أفغانستان ؟!, و هناك أصلا الراجل ممنوع يحضن بنت خالته أو يبوسها إلا بعد مايتجوزو
و يخلفو 3 عيال .
....................................................................................................................................
Mohamed
Hussein
2
ديسمبر 2016·
يا أستاذ يا أستاذ
, هو ليه كل الناس بقى عندها ألوان عالفيس بوك و انا لأ ؟ .
- قولي يابني
, انت بتدخل الفيس من موبايل ؟ .
.
لا و الله , بدخل
من لابتوب لينوفو قديم ماركة ( أبو منافله ) .
- طب احمد ربنا
إن إدارة الفيس بوك لسه سايباك تفتح صفحتك أساسا .
.
يعني ايه يا سعادة
البيه ؟ يعني مفيش أمل يبقى عندي ألوان و بهرجه و حبشتكانات ؟ .
- لا يابني فيه
أمل .
.
إمتى بقى ؟
- لما عبد الفتاح
القصري الله يرحمه ياخد جايزة أحسن باك شمال في العالم .
.
أه فهمتك فهمتك
, انت قصدك ان مفيش أمل , بس انا عندي عقدة نقص أد كداهو و كل مابشوف حد عنده ألوان
عالفيس بقعد أقرقض في ضوافري , خلاص انا هتصرف .
- هتتصرف ازاي
؟! .
.
طالما مفيش أمل
يكون عندي ألوان على لابتوبي أبو منافله يبقى هقنع الناس انهم مايستخدموش الألوان
.
- و دي هتعملها
ازاي بقى ؟ هتعرف تقنعهم ؟ طب فكر كده هتقول ايه .
.
استنى هفكر اهو
, هات سيجاره كليوباترا عشان اعرف افكر و اسنجف إشاعه حلوه .
- أهي , بس فكر
بسرعه و اشجيني .
.
بس بس , وجدتها
, أنا أقولهم ان فكرة الألوان عالفيس دي معموله كدعايه ترويجيه لدعم المثليين , أه
المثليين اللي هما اللامؤاخذه , و اللي بيستخدمها يبقى متضامن معاهم ( مش لامؤاخذه
بس بيحترمهم ) .
- أوباااااااااااااااا
, دي فكره عبقريه شيطانيه .
.
أوماااال , دانا
معاشر الخرفان و الكولجيه بقالي 5 سنين , يعني الشر بقى فينا بس ربنا هادينا .
.............................................................................................................................
Mohamed
Hussein
2
ديسمبر 2016·
فيه 2 صحفيين توانسه
اتقدمو للمحاكمه العسكريه و عقوبتهم المتوقعه هتوصل ل 3 سنين سجن , واحد فيهم عشان
قال ان تونس فيها قاعده عسكريه امريكيه ( مع ان الرئيس التونسي نفسه صرح من كام يوم
انه سمح للطائرات الامريكيه باستخدام المجال الجوي التونسي لمطاردة الإرهابيين و كداهون
!! ) , و التاني عشان كتب مقاله اعتبروها اهانه لقيادات الجيش التونسي .
.
محاكمات عسكريه
في جرائم النشر !! , محاكمات عسكريه عشان خبر و مقاله , رساله لحبايبنا الكتاكيت بتوع
الإجابه تونس , اللي بيقولو على مصر دوله فاشيه بتقصف القلم و تسرق البرّايه .
..........................................................................................................................
ليست هناك تعليقات:
إرسال تعليق