12 مارس
عم مصطفى وعمك الحاج محمود
.
عم مصطفى هو الراجل اللي شغال في الجراش اللي بركن فيه في عين شمس , راجل صعيدي في الأربعينات , متجوز وعنده 4 عيال فوق راس بعض ( والله مانا فاكر 4 ولا خمسه ) , هو ومراته وعياله عايشين في أوضه مترين في مترين في مدخل الجراش على الشمال , بياخد من صاحب الجراش 500 جنيه في الشهر ويلقّط رزقه بقى , يعني يمسحلك العربيه , يغسلها , تديله جوز جنيهات , 5 جنيه , وكده يعني .
مره دخلت الجراش وكانت الساعه 11 بالليل , لقيت باب الأوضه مفتوح ولمحت بطرف عيني عم مصطفى قاعد جوه , قلت سلامو عليكو يا عم مصطفى ماردش , دخلت وركنت العربيه وحطيت المفتاح في العلبه وناديت عليه سلامو عليكو يا عم مصطفى , ماردش , الله ؟ انا شايفه قاعد وبياكل وماسك لقمة العيش في إيده , علّيت صوتي أوي , لقيته اتفزع , عليكم السلام يا دكتور , ازيك يا باشا والله ماخدت بالي , لا مؤاخذه نمت وانا باكل !!.
متخيل حضرتك المشهد ؟ راجل من تعبه طول النهار قعد يتعشى ورفع اللقمه على بؤه وقبل ما توصل اللقمه كان نام من التعب والهدّه !! .
.
عم الحاج محمود راجل بلدياتنا , من يوم ما وعيت عالدنيا وانا بشوفه بيشتغل بالاجره عند الناس , ماهو متجوز وعنده عيال , وماعندوش أرض ولا وظيفه ولا معاش , كل يومين تلاته يلاقي له ( سرحه ) , مرّه يضم رز ب 5 جنيه , مرّه يشيل حطب , مره يجمع قطن ب 2 جنيه واهي ماشيه .
لما كنت انا عيل عمري 7 سنين كان هو عمره 30 سنه ...نزلت الأجازه اللي فاتت وهو بقى عمره 60 سنه ولسه بيشتغل عند الناس بالأجره , عياله كبرو واتعلمو ما شاء الله بس رافض حتى مساعدتهم , تقابله تلاقيه دايما مبتسم , لا عمره اشتكى ولا قال جاي .
.
مجرد فكره جت على بالي , بتخيل اني قلت لعم مصطفى أو عم محمود إيه رأيكو ان مصر دي بلد بنت تيييييييت وانتو اتبهدلتو اوي فيها , ايه رأيكو تتنازلو عن الجنسيه المصريه ؟!
ليست هناك تعليقات:
إرسال تعليق