27 مارس
هل تعلم أن عدد الستات اللي زغرطو امبارح في مصر بمجرد سماع خطاب السيسي = حاصل ضرب عدد أصوات المؤيدين لخالد على x عدد سكان قطر x عدد المرات اللي ظهر فيها عزمي بشاره على قناة الجزيره ؟
.
مممممممم احنا ممكن نعمل تعديل بسيط في العمليه الإنتخابيه , نخلّي الإدلاء بالرأي عن طريق الزغاريط مش التصويت , دي حته الزغروطه بتبقى فال حلو , ماحنا جربنا نصوّت داخل اللجان الإنتخابيه قام جالنا مرسي !!
27 مارس
يعني السادات كان منوفي ومبارك منوفي والسيسي منوفي وصدقي صبحي منوفي وحمدين من كفر الشيخ !! ...أظن كده الرساله وصلت !!.
.
و سوف يذكر التاريخ أن الفتره من 1970 وحتى 2070 هي فترة الإحتلال المنوفي لمصر وهي اكبر من فترة الإحتلال البريطاني .
27 مارس
هتتعاطف أوي مع حسن حمدي مع إنه حرامي و فاسد وفساده وسرقته من مال الشعب اللي هو مال حضرتك , طبعا انت هتتعاطف معاه عشان انت اهلاوي وهو رئيس النادي الأهلى مممممممم وبعد نص ساعه يا مؤمن من تعاطفك ده هتتكلم في موضوع تاني وتقول أين دولة القانون ؟ الفساد مالي البلد ليه ؟ هما فلول نظام مبارك مش هيتحاكمو ؟ أين الشفافيه والمصداقيه ومتى تتخلص مصر من فساد مراكز القوى ؟!!.....هه , عرفت ولا لسه إنك مجرد بالونه منفوخه عالفاضي وتاجر شعارات وفلايات ؟!
27 مارس
طريقة الهاااااااااااح
.
ما بحبش التأييد الأعمى بطريقة ( هااااااح ) , ولا بحب التأييد بطريقة تشويه المنافس تماما , أصدقائي أنصار السيسي بيصحو من النوم يغسلو وشهم ويلعنو جدود ابو حمدين واصدقائي أنصار حمدين بيصحو من النوم وقبل ما يغسلو وشهم بيسبّو 100 مله ودين للسيسي .
ومعندناش ادنى فهم للحياه السياسيه ولا فاهمين ان حكم الأوطان لا يتوقف على شخص مهما كان اسمه او وصفه .
ومجرد سؤال عايز اسأله لحضراتكو , لو السيسي مات بكره الصبح لا قدر الله ( كلنا هنموت ) أنصار السيسي هيعملو ايه ؟ هتقعد مصر من غير رئيس مثلا ؟ طب لو حمدين عمل حادثه وحصلت له اعاقه لا قدر الله تمنعه من الترشح أنصاره هيعملو ايه ؟ مين البديل عند حضرتك ؟ هتقعد مصر من غير رئيس ؟
أبسط قواعد السياسه إنك يبقى عندك دايما خطه بديله ومرشح بديل ( واحد او اتنين ) مش تسيب نفسك للظروف , يا ريت أصدقائي الأعزاء يحتفظو ب ( شعرة معاويه ) ويأيدو السيسي مع شوية احترام لحمدين أو العكس .
27 مارس
لو كنت في مصر
.
كان نفسي اكون في مصر امبارح واشوف فرحة الناس بخبر ترشح السيسي , فرحة الناس الغلابه مش المنظرين السياسيين , العامل والفلاح والموظف اللي فجأه كده جالهم إحساس بالأمان بعد ما غاب شهور طويله .
.
كان نفسي اكون في مصر امبارح عشان اعرف بالظبط الفرق بين ( دويلة ) الفيس بوك و دولة مصر , أتاري الفيس ده عامل زي دويلة قطر كده , صوت وجعجعه ( ولا أرى طحينا ) , إحساس الأمان والسعاده في عيون الغلابه بيرضيني , بيرضي غروري , بيدغدغ مشاعر جياشه بشيلها دايما لأهالينا الغلابه .
.
كان نفسي أكون في مصر امبارح عشان اقول لحضرتك تنظيرك السياسي وبوستاتك دي تبرمها وتحطها في... في الصندوق ( قصدي صندوق الإنتخابات يعني ) وهانت كلها شهرين ونشوف كام صوت مبروم مرميين في الصندوق يا بتاع دولة قطر العظمى ( قصدي دولة الفيس بوك ) !!.
.
كان نفسي اكون في مصر واروح اخبط على بيت السيسي واقول له تعالى عايزك في كلمتين يا عبد الفتاح , واركّبه جنبي في العربيه ( مانا اصلي متواضع مش مشكله ) واخده ونروح لبيت حمدين نشرب معاه كوبايتين شاي , واقول لهم ماتسيبوش البلد دي , هي محتاجاكو انتو الإتنين , اترشحو واتنافسو واللي يفوز يعين التاني نائب له , تقدرو تعلنوها من دلوأتي , مصر محتاجه مجهود 10 رجاله في السلطه عشان تلمّ أشلائها اللي اتبعترت .
.
السيسي بطل من ابطال ثورة 30 يونيو انقذنا من معجنة الإخوان و حمدين بطل من ابطال يناير انقذنا من معجنة مبارك , وانا ماعرفشي تقريبا الوحيد في مصر اللي مؤمن تماما إن مصر قامت فيها ثورتين وكل ثوره منهم كان لازم تقوم .
.
واهو ربنا سبحانه وتعالى كريم اوي , وعوضني خير عن أسوأ اسبوعين عشتهم في حياتي ( اسبوعين الإعاده بين مرسي وشفيق ) وبقينا بنتكلم عن اتنين منافسين محترمين اسمهم السيسي وصباحي , ياكرم الله , بعد مرسي وشفيق بقينا حمدين والسيسي , اللهم لك الحمد حتى ترضى .
26 مارس
الناس متحمسين أوي , والنبي ياخوانا مش عايزكو تحمّلو السيسي أكتر من طاقته , هو مش نبي ولا في إيده عصايا سحريه , ولا هيضرب الأرض تطلع بطيخ , يعني من الأخر كده قدامنا مش أقل من 4 شهور ونص عشان نبقى زي اليابان , الساعه في إيدي أهي يا سيسي , و هنفخك , قدامك 4 شهور و نص تعمل لنا فيهم قطر بيطير وغواصه بتمشي على القضبان و طياره نوويه بتعوم تحت المايه وكوبري علوي من اسكندريه لأسوان وتخلي الزمالك ياخد الدوري كل شهرين عشان نلحق الأهلي , أنا قلت لك اهو
26 مارس
سيادة الرئيس عبد الفتاح السيسي يعلن استقالته من منصبه وترشحه على منصب مشير الجمهوريه , يوووووه سيادة المشير عبد الفتاح السيسي يعلن استقالته من منصبه وترشحه لمنصب مشير الجمهوريه , يووووووووووه , سيادة الرئيس عبد الفتاح السيسي يعلن استقالته من منصبه وترشحه لمنصب رئيس الجمهوريه , يوووووووه سيادة ال /// , من الأخر السيسي استقال و اترشح للرئاسه , بس الناس ملبوخه بالشكل ده , شايف عالفيس هرج و مرج , فرحه غير عاديه , بيقولو الناس في الشوارع بيباركو لبعض , والجزيره و بعض النشطاء عاملين مناحه وصوان عزا لمدة 4 سنين ( و عندهم أوبن بوفيه طبعا ) , و فيه أخبار ماعرفشي صحتها إن يسري فوده نزل عليه سهم الله فجأه و هو عالهوا , واختفى في ظروف غامضه , تقريبا كده والله أعلم خالته بتولد !!..
26 مارس
عايز تعرف شعبية السيسي أد إيه ؟ شوف كام 10 مليون بني أدم حابسين أنفاسهم دلوأتي ومستنيين قرار استقالته زي مايكونو مستنيين نتيجة الثانويه العامه , حد يبلّغ خالد على إن السيسي هيستقيل دلوأتي , أو بلاش تبلّغوه مفيش داعي , خالد على هتلاقوه قاعد دلوأتي عالقهوه و ماسك كوباية الشاي في إديه ومعلّقها , لا هو اللي بيشرب منها ولا هو اللي بيحطها عالترابيزه , وعنيه متسمره على شاشة التلفزيون في انتظار الخبر .
كون إنك تحب فلان أو تكرهه دي حاجه وانك تنكر شعبيته دي حاجه تانيه , أنا شخصيا كنت اتمنى يكون فيه حد تاني أفضل من السيسي وحمدين , إنما طالما الإجماع هيكون على واحد منهم يبقى لازم أقبل .
.
بالمناسبه , الساده الأشاوس بتوع الجيش بيحارب الإرهاب بعنف , اللي هما نفسهم بتوع الجيش مش عارف يحارب الإرهاب وايده رخوه ( معرفشي ازاي ؟ ) , عايز أقول لهم من النهارده وزير الدفاع اللي هو قائد الجيش هيبقى اسمه صدقي صبحي ...انقلو الكهارب عليه بقى , السيسي هيبقى مجرد مرشح للرئاسه تنتخبه او تنتخب غيره .
.
أه حاجه أخيره , انا تعمدت اكتب اسم خالد على ( اللي مالوش اي تلاتين لزمه ) في البوست ده عشان اصدقائي اياهم اللي مش بيلاقو رد على مضمون البوست كل مره يلاقو حاجه يعلقو عليها ...بساعدكو على أد ماقدر اهو !! . , بالله انزلو بقى بالتعليقات ( انت حاطط خالد على في دماغك ليه ؟ عملك ايه خالد على عشان تبهدله كده , كلنا خالد على , المجد لخالد على , انت مستقصد خالد على ) .
26 مارس
كل ما بكتب بوست رومانسي او اجتماعي مش بيعجب الناس أوي , أصحابي بيستنو بوستات النقد السياسي , يعني حصروني في أدوار الشر أنا والأستاذ محمود المليجي , وكل ده ليه ؟ عشان كنا في الثوره والوطنيه رجاله و وقفنا وقفة رجاله !!.
26 مارس
( حِفان ) مطر و ربنا رماه عليا وانا جاي من البيت , بعشق المطر , أحمدك يا رب على عطاياك .
يا سلام لما الواحد يحلم ويتدلّل في حلمه مع ربه , يارب نفسي يكون ليا سحابه صغيره , بتاعتي انا لوحدي , تمشي فوقي و ترافقني زي ضلي , وكل يوم كل يوم كل يوم ترمي عليا حفان مطر وتغسلني .
26 مارس
لما توصل لمرحلة إن احترامك لبلدك وجيشها وعلمها ونشيدها بقى مجرد وجهة نظر و سؤال تجاوب عليه ب ( صح وغلط ) , تبقى انت اساسا جيت للدنيا دي مش عن طريق علاقه انسانيه سويه بين أب وأم , لأ إنت كنت مجرد فكره فكّر فيها الأب والأم في لحظه عبيطه و هبله و قررو إن هما يرمو فكرتهم علينا , وللأسف مكانشي حد معاهم عشان يقول لهم فكرتكو فاشله , أو يقول لهم عيب أوي لما ترمو ماية الطرشي على الناس من البلكونه !!.
.
............. مش حقيقي أبدا إن كل ما الأباجوره تنطفي في بيت مصري يبقى فيه خير جاي , أحيانا الضلمه بتجيب أشباه بشر أو أشباح بشر .
26 مارس
أخر الخط يا بهوات
.
وصلنا للمرحله دي
- حضرتك وانت قاعد مكانك وفي ايدك التابلت وقدامك التلفزيون , شوفت كلب زي بتاع قطر بيهين مصر ويلقح عليها كلام , فبقى رد فعلك حاجه من اتنين , إما انك تفرح اوي وتحتفل بالمناسبه السعيده دي على صفحتك الشخصيه أو إنك تبتسم بس تتحرج تعمل الحفله على صفحتك !!
.
- حضرتك قاعد زي مانت ولقيت جزمه قديمه زي توكل كرمان بتهين مصر وجيشها فيبقى عندك نفس رد الفعل ( الحاجه من اتنين ) .
.
- حضرتك تفتح الجزيره وتتفرج على وائل قنديل او كلب تاني زي عزمي بشاره وتسمع ابشع الألفاظ عن مصر و يا إما تبتسم يا إما تحتفل .
.
- حضرتك تقرا بوست ساخر بقول فيه رجالة القوات الخاصه في الجيش هيجيبو حمد وامه من بيتهم , تقوم تاخدك الجلاله وتقولي الكلام ده عفى عليه الزمن ( لا بجد ؟ تصدق انا ماعرفشي كده ورابط الفيل قدام الصيدليه ؟ ) , إنما يحلو لك كمان في اللحظه دي انك توصف الجيش وقواته الخاصه بمتهى الإنهزاميه والفشل .
.
- حضرتك باختصار بقت مصر وجيشها بالنسبالك اختيار من اتنين , الإهانه أو الصمت ( مع ابتسامه رقيقه ) , كده احنا وصلنا لأخر الخط , ولام نعترف , لازم نعترف , إحنا ماعملناش ثوره ولا حاجه , إحنا اتعمل علينا ثوره !! , عارف إنت الفرخه البلدي لما بيتعمل عليها شوربه أو ملوخيه ؟ أهو احنا كنا بنلعب دور الفرخه البلدي و عملو علينا شوربه وملوخيه وثوره !! .
25 مارس
المنصف المرزوقي يرفض مصافحة عدلي منصور !! , لما حتة كلب كان شغال لاجئ في قناة الجزيره و مشرد في شوارع باريس يرفض مصافحة رئيس مصر بجلالة قدرها يبقى ايه رأيك يا سيدي الناشط السياسي النحنوح ؟ لما الكلب اللاجئ يقول عدلي طرطور وسفاح وانقلاب يبقى ايه رأيكو يا أتباع مولانا البرادعي الي سابقنا بمليون فدان ؟ لما كلب قطر يسخر من مصر يبقى ايه رأيكو يا أنصار خالد على بتاع نص ثوره ونص انقلاب ؟ إنتو عارفين يعني ايه مصر ويعني ايه رئيس مصر الأوّل ولا كنتو غايبين في الحصه دي ؟!!.
25 مارس
حكاية كلبين
.
هما كلبين مش اكتر , حتة كلب مالوش أي تلاتين لزمه وعامل انشقاق و فرقه وخنقه في صفوف قادة الدول العربيه , اسمه تميم , وحته كلب تاني مدوّن عمال ينظر لإرهاب الإخوان تحت بند الثوريه والثورجيه اسمه وائل عباس , ولسه فينا ناس شايفين الكلب الأولاني حصان وشايفين الكلب التاني فارس , طب العيب عالكلب ولا الناس ؟ فوقو يا بشر , بتقارنو بين الديب و الحرّاس ؟ فوقو يا بشر , اللي في راسكو ده عقل ولا مداس ؟!!.
25 مارس
السيسي يأمر بتشكيل قوات خاصه لمحاربة الإرهاب !! ...... كده الله يرحمك يا حكومة قطر , أنا أصلي عارف الرجاله بتوع القوات الخاصه دول بيبقو عاملين إزاي , تركيزهم بيبقى قليل شويه , يعني ممكن بعد كام يوم السيسي يديهم تعليمات ويقول لهم ( روحو هاتو الواد الإرهابي اللي طايح في امبابه والعيال الصيّع اللي معاه ) , تقوم الرجاله تغيب أد ساعتين تلاته ويرجعو في إيدهم تميم وموزه وحمد , ويقولو للسيسي ( تمام يا فندم , كده الدوحه متقفله والمفتاح سيادتك أهو ) !!............ عملوها في ليبيا أيام القذافي .
25 مارس ·
تميم ابن موزه ( عمدة عذبة قطر ) بيلقّح كلام على مصر في القمه العربيه , أهو الواد ده مصرّ إنه يتفشخ , فيه ناس كده بيبقى الفشخ عندهم غيه زي صيد السمك و تربية الحمام , يعني تسألو هوايتك ايه ؟ يقولك ( أتفشخ ) , ماكفهوش الفشخه بتاعة السعوديه والإمارات ويلزمه الفشخه المصري , هيموت عليها يا عيني , والنبي يا سيسي ما تحرم ابن موزه من اللي نفسه فيه
25 مارس
نفسي أرجع تاني ألبس جلابيه فلّاحي واقعد جنب ماكنة الري على جرف القنايه , أمسك عود حطب في إيدي وارسم بيه أي أشكال عبيطه عالأرض , واشم هوا نضيف واشوف المايه وهي طالعه من ( طرد ) الماكنه ونازله في قلب ( النصبه ) والمح بعيني شكل الزرع وهو بيشرب المايه بعد طول العطش , ولما أزهق من رسم الأشكال العبيطه بعصاية الحطب أجيب حتة طين من القنايه واعملها عروسه بإيدي , واجيب الورقه البرونز بتاعة علبة السجاير الكليوباترا الفاضيه واعملها فستان للعروسه , أو اعمل حتة الطين عربيه و 4 عجلات , واجيب ( أوشبره ) واعملها ال AXE اللي بين العجل , نفسي أشوف وشوش نضيفه وطيبه و قلوب ما تشوهتش بالسياسه ولا اتفرمت بالمدنيه الحديثه , حياتي قبل ما عرف ركوب العربيات وأكل الكاتشب وساندوتشات الهامبورجر وقبل ماعرف الفيس بوك كانت أنضف , أنقى , أطيب , أجمل بكتيييييييييييييييييير .
25 مارس
الخارجيه الأمريكيه : حكم الإعدام على 500 من الإخوان ينافي المنطق والمعايير الدوليه !! ....ههههههههههههههههههههههههههههههههههههههههههههههههههههههههههههههههههههههههههههههه بس برضه لازم نهتف ( يا سيسي يا جبان يا عميل الأمريكان ) !!! ..., أمريكا بتتدخل في أحكام القضاء في مصر لما الموضوع يكون بيخص الإخوان أو مراكز حقوق اللامؤاخذه الإنسان و مركز ابن خلدون وكداهون , وماتنسوش يا ولاد إن الإخوان حبايب أمريكا هيحررو القدس من ايد اسرائيل ( بنت أمريكا المدلله ) , وماتنسوش كمان إن الإخوان هيقيمو دولة الخلافه وعاصمتها واشنطن , اللهم اكفنا شر السرقه والكفر وعقوق الوالدين وشر مراكز حقوق الإنسان وشر أمريكا وجايزة نوبل للسلام و شر أغاني تحرير القدس !!.
25 مارس
بالشألوب يا بشر
.
صديقه عزيزه ناشره فيديو ( من شبكة رصد ) , بيقول ان الجيش بيقتل بدو سينا ويرميهم في بير بعد ما يعذبهم ويحط السيخ المحمي في صرصور ودنهم ..... !! , أه يا مراري ياني , والفيديو مفهوش أي معالم , ولا أي دليل على اي حاجه , نشرته شبكة رصد واول واحد رفعه على صفحته هو أحمد المغير , أصدقاء صديقتي الأشاوس شايفين إن حتى الفيديو لو مش فيه دليل فلازم الجيش يطلع ينفي إنه عمل كده !! .
يا نفوووووووووووخ أمي , بنشوه جيش بلدنا بإدينا ومن غير دليل ونقول عليه جيش سفاح بفيديوهات مفبركه والمفروض إنه يطلع يقول أنا مش سفاح , يعني العقيد مجدي أحمد على يكون عند صديقتي في الأصدقاء وكل ما هي تنشر حاجه من شبكة رصد يجيب هو مصحف ويحلف لها بالتلاته انه ماحصلش !!
.
الدنيا ماشيه بالشألوب , يعني لا مؤاخذه لامؤاخذه لامؤاخذه في دي الكلمه , أنا هقول لحضرتك أمك بتشتغل عاهره و بتفتح للزباين , معنديش دليل ولا نيله غير فلان قالي و علّان أكدلي , المفروض حضرتك بقى تطلع تثبت لنا إن أمك مش بتشتغل عاهره وتجيب لنا الزباين يحلفو عالمصحف إن أمك مش بتفتح لهم !!!!! .
و عهد الله لو اللي جوه الجمجمه بتاعة الناس دي قرص جلّه ما يوصل تفكيرهم للوساخه دي .
.
محاولة بعض المصريين في تشويه جيش مصر فاقت بمراحل محاوله الصهاينه نفسهم , وإذا كان تأييد البرادعي هياخدني في يوم من الأيام لوصف جيش بلدي بإنه سفاح يبقى في ستين ألف سلامه انتي والبرادعي , بلوك يا قمر , وابقى حنِّي رجليكي في شبكة رصد كل يوم وقولي أصل انا مش إخوان .
24 مارس
بالإذن بقى ياخوانا هروح اتعاطف مع بناتي في البيت , محبوسين بقالهم 11 سنه بين 4 حيطان , حكم جائر و ظالم , هروح اتعاطف معاهم واجيلكو بكره بإذن الله , الحريه للوجي و لمار , يسقط يسقط حكم الغربه !!.
24 مارس
بقالي سنه تقريبا مفرحتش بأي خبر بسمعه أو بقراه غير مرتين اتنين , أول مره كان خبر في شريط الأخبار بتاع قناه تلفزيونيه بيقول ( مصر تعلن رسميا وقف المفاوضات مع جماعة الإخوان وتعتذر عن استقدام أي وفود خارجيه بهذا الشأن ) , الخبر ده كان قبل فض الإعتصام بكام يوم .
و ترجمة الخبر باختصار إن النظام الحاكم في مصر زهق من كتر الوفود الي داخله واللي طالعه والبلد اللي حالها واقف ( دي كانت طابونه ) , و رد خيرت الشاطر اللي مابيتغيرش ..... هنا حسيت إن مصر فيها دوله .
.
الخبر التاني هو قرار القاضي بإعدام 500 من الإرهابيين اللي خربو الدنيا في المنيا , ده برضه معناه إن فيه قضاء وممكن يصدر أحكام سريعه وحاسمه .
.
لو فهمت من الخبرين دول إني بحب منظر الدم و العنف و بشمت في إعدام الناس فانا مش ذنبي إنك جيت الدنيا دي على طريقة ( و يخلقُ ما لا تعلمون ) .
.
ولو برضه مش فاهم ومحتاج تفهم يعني ايه هيبة دوله ويعني إيه قضاء حاسم و ناجز بسيطه أوي , شوف صور الناس في سوريا اللي روسهم مقطوعه و محطوطه في جرادل و اللي روسهم مقطوعه و بيتلعب بيها كوره , أمراضك النفسيه لا تعني ليا أي شئ , ومش هقعد انا جنب الحيطه طول العمر و اعيط واقول أصل مبارك ماخدشي اعدام هو وحبيب العادلي و نابليون بونابرت , أه يانا يامه يانا يامه , شكلكو بائس ومثير للشفقه و الغثيان .
24 مارس
و عهد الله السيسي ده لو فاشي فعلا كان زمانه خد باله مني و ظبّطني , دانا بظبّطك يا جدع واسنتفك بقالي سنه اهو , بشتغل طبّال و زمّار و عازف بيانو عشانك يا سيسي , إيه يعني يا جدع لما تديني في الشهر 100 ألف ؟ اديني في السنه مليون , مانت عندك 30 مليون , هات ورك يا عبد الفتاح , هات بيضه وانت بيضه , إيوه هات دي أه هات دي , و كتاب الله انا بايته امبارح من غير عشا وسيبتلك الأكل كله يا عبد الفتاح عشان تتغذى .
.
هو الوحد حظه دكر كده يا جدعان ؟ يعني يوم ما أقع مع واحد فاشي و يعجبني يطلع فاشي كُحّيتي , يعني فاشي و فقره دكر ؟!!.
24 مارس
لا أهتم , مش بهتم , I DO NOT CARE , رأيهم باخده من هنا واحطه في صفيحة الزباله من هنا ( وهو ده قمة الإعجاز العلمي )
.
هيفضلو يتعاطفو كده , هينامو وهما متعاطفين وهيصحو متعاطفين وهيدخلو الحمام يتعاطفو جوه , بيتعاطفو حد وتلات وخميس وبيتعاطفو سبت واتنين واربع ويوم الجمعه بقى هو اليوم العالمي للتعاطف
.
لما اتقبص على بنات 7 الصبح عملو حملة تعاطف ( أصل حسّهم مرهف زي الشعراء كده ) وقالو إزاي ؟ إزاي تحبسو البنات الكيوت يا كفره ؟ مع إن البنات الكيوت كانو بيكسرو في الرصيف ويرمو الحجاره عالناس وخلّعو الدكتوره هدومها وصوروها عريانه , والبنات الكيوت طلعو براءه عشان هما كيوت .
ودلوأتي عاملين حمله للتعاطف مع الإرهابيين اللي خربوها مداين في المنيا , إرهاب وقتل في المسحيين وحرق كنايس وهجوم عالشرطه والجيش , إزاي تحكمو على إرهابيين وقتله بالإعدام يا كفره ؟
.
بالك انت ؟ , هات إيدك كده , وشبكة العشره دول , لو قاضي حكم على إرهابي متهم بقتل 70 ألف بني أدم بالغرامه 3 جنيه ؟ هيتعاطفو برضه ويقولو هي الناس لاقيه تاكل ولا معاها فلوس عشان تحكمو بغرامه 3 جنيه يا كفره ؟
.
ولما ينتهي الحكم وتخلص الليله هيرجعو تاني يقولو , هه الحكومه عامله صفقه مع الإرهابيين و السيسي مش عارف يحارب الإرهاب وعايزينه يحكم مصر إزاي يا كفره ؟!
.................................
عرفت ليه بقى أنا مش مهتم , I DO NOT CARE , وصفيحة الزباله موجوده , يالله عبر عن نفسك وقول رأيك وتعاطف كمان وكمان !!.
قرعة بوظه
.
حضرتك , أيوه انت , كنت زعلان لما قبضو على علاء عبد الفتاح واحمد دومه , وقلت هو القانون والردع بيسيب الإخوان ومتشطر عالنشطاء ليه ؟ حصل ولا ماحصلش ؟ لو أنكرت هضربك بالشبشب على بوزك .
.
حضرتك , أيوه انت , اعترفت ان البلد فيها إرهاب وسلاح وقلت إن الدوله إيدها رخوه في محاربة الإرهاب وشكلها كده فيه صفقه , أيوه انت وماتنكرش وإلا نفس الشبشب موجود .
.
طب علاء عبد الفتاح طلع براءه والنهارده اتحكم على 500 واحد من الإخوان بالإعدام ( طبعا لسه فيه استئناف وليله ) , بس ناس شايله سلاح وبترعب المواطنين عايز القاضي يحكم عليهم بإيه ؟ بالحب ؟ الحب يا منى ؟ ومش ده كان طلب سيادتك ؟ الصرامه والحسم في التعامل مع الإرهابيين ؟ برضه هتنكر هجيب الشبشب .
.
قولي بقى يا ناشط : انت عايز ايه بالظبط ؟؟؟؟؟ , وكنت عايز تحكم مصر إزاي ؟ إنت مجرد فرارجي و عايز تتجوز الدكتوره ؟ دي دكتوره يا عالم دكتووووووووووره , عليا النعمه انت مابتتكلم , إنت بتنهق ( فريد شوقي للفرارجي في فيلم الكرنك ) !!.
24 مارس
النوم سلطان
.
راحت عليا نومه , صحيت في أدان الضهر بالظبط , المفروض أكون في الشغل خلال 5 دقايق , ياربي اعمل ايه بس ؟ شدّ البنطلون والقميص من عالشماعه , أدخل طس وشك بشوية مايه , لأ لأ انت لسه هتلبس الشراب , مش وقته , هاته معاك وابقى البسه هناك , عنيا مقفوله خالص , نزلت في الشارع اهو , وقّف تاكسي بقى , الإسكان يا صديق , فين الإسكان مافي معلوم ؟ طب اوكيه جو رايت فروم هير , اند سيدا , عنيا لسه مقفوله , المحصل واقف قدام الصيدليه وعمال بيرن , أيوه يا هاني جاي في الطريق أهو , وصلت خلاص , المحصل دخل ورايا , إعطيني البرينت يا دكتور , خد يا هاني وخد الفلوس عدّها , ألاقي عندك علكه يا دكتور ؟ لأ والله يا هاني , عنيا لسه مقفوله , دخلت ست , بنتي عمرها 10 سنين وعندها عنجز , أيوه يا ستي شايفه بس دي لازم تروح المستشفى , هتحتاج ادويه كتير وغالبا هتكون سخنت , لأ لأ ولا مستشفى ولا حاجه , هات بس الدهان بتاع العنجز , حاضر يا ستي , ودوا الحساسيه كمان , أوكيه أهو , خلي بالك الدوا ده بيتشرب وده بيندهن , حسابك 25 ريال , عنيا لسه مقفوله , هولّع على مايه عشان اعمل حاجه اشربها , بتوع البنك جايين عشان يغذّو الماكينه اللي بيدخلولها من جوه من عندي , سلامو عليكو , عليكم السلام , اتفضلو , اهلا اهلا , بتاع 7 داخلين ورا بعض من ورا الكرسي اللي قاعد عليه , عنيا مقفوله , واحد منهم وقف وسألني , تعالى عندك كريم حقة التأخير , لأ والله , طب ألاقيه فين؟ , شوف الصيدليه التانيه , الحمد لله المايه بدأت تغلي , اقوم اغسل المج بقى واحط 3 معالق نسكافيه كلاسيك ومعلقة سكر , ياااااااااااه أخيرا أول شفطه , أكتب البوست ده بقى , عيني الشمال بدأت تفتّح شويه .
.
إحساس غريب إنك تتشال من عالسرير وتتحط مباشرة في محطه مصر , قطر رايح وقطر جاي , صوت القطر مزعج , واحده ست بتجري عشان تلحق جوزها وعيّل تايه من أمه وبيعيط , كمسري بينادي على واد صغير عشان يشوف تذكرته قبل مايدخل عند القطورات , ست عجوزه بتسأل الكمسري والنبي قطر طنطا من أي رصيف ياخويا ؟ , يا أستاذ يا أستاذ ماتعرفشي الحمام فين ؟ حاجه ساقعه بيبس , حاجه ساقعه بيبس .
ليست هناك تعليقات:
إرسال تعليق