23 مارس
بتوقّع قريب جدا إن يسري فوده يستضيف علاء عبد الفتاح تاني , هتبقى حلقه مميزه جدا , بس عشان تتفرج عليها صح لازم تتفرج على فيلم السفاره في العماره 9 مرات ورا بعض , و ركّز على شخصية نادر اللي بيحب ماركس ( قريب داليا البحيري ) , عشان هتحتاج إنك تستحضر مكنون الشخصيه دي وانت بتتفرج على علاء عبد الفتاح , و شوف بقى بعنيك أثر البروليتاريا على ساندوتشات الحلاوه بالقشطه .
علاء عبد الفتاح ( هيشكر ) للنظام والحكومه والمعارضه و هيسب الدين للإعلام و لطفاية السجاير اللي قدامه ولرجل الترابيزه وهيلعن ابو التي شيرت اللي هو لابسه .
أه مصر فيها ناس مفهومها عن الفكر اليساري هي إنك تسب بالدين و ماتستحماش ولا تحلق شعرك ( اليساريه هي معاداة الحلاقين ) !!.
23 مارس
1- علاء عبد الفتاح اتحكم عليه بسنه سجن ....... الفاشيه تطل برأسها من جديد , يسقط يسقط حكم العسكر , يسقط السيسي السفاح
.
علاء عبد الفتاح أخد إخلاء سبيل .......... يا عم ده القاضي هو اللي أفرج عنه مش السيسي يا عبيد البياده .
.
2- تشويش على قناة إم بي سي وقت إذاعة برنامج البرنامج ...الفاشيه تطل برأسها من جديد , يسقط يسقط حكم العسكر , يسقط السيسي السفاح
.
مفيش تشويش وحتى التشويش اللي حصل مكانشي من بره القناه ............ يبقى السيسي خايف يعمل تشويش عالبرنامج عشان شعبيته مش تتأثر .
.
....................................
من يوميات الناشط السياسي ( نحنوح إبراهيم نحنوح المفشّ ) !!.
23 مارس
فوتو شوب مصري !!
.
هو ( راجع من شغله وبيفتح الباب ) : سلامو عليكو , إزيك يا حبيبتي وحشتيني
هي ( مقابلاه ورا الباب لابسه ومتشيكه والإبتسامه من هنا لهنا ) , جريت عليه عشان تحضنه : وانت كمان وحشتني حبيبي , اتأخرت ليه انا مستنياك من بدري ؟
.
هو : أسف حبيبتي , الطريق كان زحمه وركنت أمون بنزين .
هي : ولا يهمك حبيبي , المهم انك وصلت بالسلامه , شكلك مرهق من الشغل واكيد تكون جعان , غيّر هدوك على بال ماكون جهزت لك العشا .
.
هو : حاضر حبيبتي , ثواني هغير هدومي واجيلك
هي ( بعد ما جهزت السفره بسرعه جدا ) : ايه رأيك حبيبي في شكل الأكل ؟
.
هو : تحفه , يجنن حياتي , تسلم إيديكي يا عمري
هي : طب خلص أكلك بقى و ادخل خد دش ولما تطلع هعملك مساج بإيدي , واشغلك اغنية (إنت عمري ) اللي بتحبها .
.
هو : ربي يخليكي ليا دايما ويحفظك يا حياتي .
.
.
.
الحقيقه !! :
هو ( راجع من شغله وبيفتح الباب ) : سلامو عليكو , إزيك يا حبيبتي وحشتيني
هي ( ماسكه المقشه و بتكنس الصاله ) : إنت لسه فاكر ؟ معادك فات من نص ساعه , ممكن اعرف اتأخرت ليه يا بيه ؟
.
هو : أسف حبيبتي , الطريق كان زحمه وركنت أمون بنزين
هي ( بامتعاضه ) : وطبعا هتقولي راجع جعان وفين الأكل مش جاهز ليه ؟
.
هو : لا حياتي خدي راحتك خالص
هي : عموما الأكل عالنار بيسخن , ومش كل مره تحسسني كده إن دوري في الحياه اطبخ واكنس وامسح ؟.
.
هو : حبيبتي انا مقولتش حاجه خالص , كل اللي قولته من ساعة مادخلت ( وحشتيني )
هي ( غير مهتمه ) : ولما تخلص أكل اعمل حسابك عايزه أكلمك في كذا موضوع مهمين ومعكننين عليا .
.
هو : خير يا حبيبتي ان شاء الله ؟
هي : الواد بقى عمره 4 سنين ولازم ندخله مدرسه السنه الجايه يعني بعد 9 شهور , والمدرسه اللي دورت عليها قالو ان مستواها بيبقى زي الزفت من اول تالته اعدادي , وشلل الأطفال رجع انتشر في مصر تاني , وقريت النهارده عن ستات بيتعرضو للسرقه في العبور وكلاب ضاله ماشيه في الشوارع , والمايه بتقطع هناك والكهربا وموجة التراب بيقولو على وصول , والبت بتكح من الصبح كحّت مرتين , و جلده الحنفيه بتاعة الحمام عايزه تتغير , وهدومك طبعا نسيت تجيبها من المغسله وفيشة السخان اتحرقت و......
.
هو : ربي يخليكي ليا دايما ويحفظك يا حياتي .
.23 مارس
إخرس يا حيوان !!
.
ربنا أكرمني وخدت شقه في التجمع الخامس ايام ما كانت الأسعار معقوله , شقه نص تشطيب واشتريتها بالتقسيط وقعدت 4 سنين أسدد في تمنها , المهم بقى الشيطان وزّني وقالي ياد يا محمد ماتاخد صيدليه في التجمع بالمره عشان شغلك يبقى جنب بيتك .
أنا ماكدبتش خبر و سمعت كلام شوشو , اتصلت بسمسار هناك وسألته عن أسعار الصيدليات , قال لي أقل حاجه 2 مليون جنيه !! ممممممممم يا قوة الله , 2 مليون يعني ألفين ألف جنيه ؟ دول محتاجين اتغرب كمان 85 سنه عشان اعرف أوفرهم , طب يا عم ممكن تاخد 180 ألف وتقسط الباقي على 70 سنه ؟!
.
طب الصيدليه أم أرنبين دي هنبيع فيها ايه بالظبط ؟ هتكسب كام يعني ؟ مانا عارف التجمع أغلب شققه مقفوله واللي ساكنين هناك باعو اللي وراهم واللي قدامهم و باع سيغة مراته وعيلين من العيال عشان يعرف يكمل تمن الشقه , يعني أكيد هيكونو من نوعية الزباين بتوع حبايتين نوفالجين فاصوليا وكيس فوار فواكه ومجموعة انفلونزا ...طب انا محتاج أبيع كام مجموعة انفلونزا عشان أكسب 2 مليون جنيه ؟!.
.
افتكرت مشهد عبقري لشيرين في فيلم بخيت وعديله , أحمد راتب اللي هو خطيبها دخل عليها الأوضه لقى معاها فلوس كتير اوي , قال لها ( بعتي شرفك يا عديله ؟ ) , قالت له اخرس يا حيوان هو انا لو بعت شرفي هيجيب الفلوس دي ؟!.
لو واحد بقى دخل على صيدلي في التجمع و هو عارف انه شاري صيدليته عالأقل ب 2 مليون , وقال له إنت أكيد بتبيع مخدرات , المفروض الصيدلي يقول له ( إخرس يا حيوان هو انا لو بعت مخدرات طول عمري هكسب 2 مليون جنيه ؟!! ) .
23 مارس
الساده الأفاضل أدامن بيدج المجاعة والعنصرية صناعة اخوانية...... حاولت أعمل لكو بلوك ماعرفتش , ممكن حد من حضراتكو يشرح لي اعمل لكو بلوك ازاي ؟!! كل يوم باجي الاقي صورتين تلاته على بوستين تلاته معمول لي مينشن فيهم على صفحتي , واقعد انا بقى أجيب الملقاط و احذف في صوركو و بوستاتكو , صدقوني انا مش كان حلم حياتي وانا صغير إني أشتغل كوافيره ....بجد اتخنقت , الرحمه يا بشر .
23 مارس
عن الصدق و الصادق والصدوق و الصداقه والمصداقيه وأي حاجه فيها حرف الصاد ...... بلَا بلَا بلَا.
.
- محمد البرادعي , حبيبي سابقا , بعد ثورة يناير رفض الترشح لانتخابات الرئاسه وقال انها مسرحيه , وبعد ثورة 30 يونيو مسك منصب نائب رئيس واستقال في وقت ما يعلم بيه إلا ربنا , أصله لامؤاخذه ( صادق ) مع نفسه , وعنده مصداقيه وصدق بلَا بلَا بلَا ......... ممكن حضرتك تكتب لي بين القوسين دول الفوائد اللي عادت على مصر من استقالة محمد البرادعي في المره التانيه وانسحابه في المره الأولى ( ...... 1 ) , طب ممكن تكتب لي الكوارث اللي عادت على مصر بعد استقالة البرادعي في النقط دي ( ........................................................................................................................................................................................................................2
) , ممكن تستعين بأخبار الصحف العامليه اياميها وبأسباب استبعاد مصر من اكتر من منظمه دوليه وتعرف كانو بيستشهدو بايه وقتها ؟ كل الحكايه يا محترم ان البرادعي اختار نفسه وكيانه وكينونته وغسل اديه من أي مسئوليه وتتحرق مصر بجاز مش مهم خالص , أهم حاجه جايزة نوبل بتاعتي والجاكوزي بتاعي وفوطتي وبشكيري .
.
- خالد على , الشاب النشيط اللي اترشح لانتخابات الرئاسه اللي فاتت وجاب 200 ألف صوت ( عدد الأصوات الإنتخابيه في قرية كفر غنام مركز السنبلاوين ) , اتحرق بقى خالد على بعد ثورة 30 يونيو اللي قال عليها نص ثوره ونص انقلاب , أنا اساسا مش عارف هو نزل في 30 يونيو ولا نصه نزل ونصه مانزلش , طب يا ترى أنهي نص فيهم اللي نزل ؟!..., مولانا خالد على عارف ان حتى ال 200 ألف صوت بتوع كفر غنام دول مش هيجيبهم في الإنتخابات الجايه فقرر إنه ينسحب من قبل ما تبدأ الإنتخابات وقال انها انتخابات مزوره ومسرحيه ( مش بتفكركو بحاجه كلمة مسرحيه دي ؟ ) وتقريبا لو كنت ضغطت عليه شويه كان طلع سيديهات وجاب شهود النهارده بيأكدو إن الإنتخابات اللي هتتم بعد شهرين دي اتزورت !!....اسكت يا جاهل ياللي اسمك محمد حسين , خالد على صادق مع نفسه وعنده مصداقيه و صدق يا أحمق ...بلَا بلَا بلَا .
.
طب ممكن حضرتك تكتب لي الفوايد اللي عادت عالبلد من انسحاب خالد على بتاع اصوات كفر غنام بين القوسين دول ( ....... 3 ) , أو ممكن تكتب رد فعل القنوات والجرايد العالميه والحفله اللي عملتها الجزيره على استقالة خالد على باعتباره مرشح رئاسي حتى لو مايسواش تلاته تعريفه ( ...............................................................................................................
4).
.
نهايته , عايز شعارات حضرتك ؟ أعبّي لك 2 كيلو مصداقيه على صدق مشكّل كده تدخل بيهم عالولاد بدل ماتدخل بإيدك فاضيه ؟ .
22 مارس
برافو حمدين
.
- حمدين صباحي اللي شعبيته في كل شارع وحاره في مصر أعلن إنه مش هينسحب من انتخابات الرئاسه ..برافو حمدين .
خالد على اللي اصوات مؤيديه اكتر بنفرين من عدد شعر راس حسام حسن بيقول إنه هينسحب عشان الإنتخابات مسرحيه !!.
.........
هو ده الفرق بين حمدين وخالد على ..بين موقف راجل بيلعب سياسه و عيل بيلعب ( شلّح ) , حمدين عارف ان فرصته في الفوز مش كبيره بس ممارسة العمل السياسي مسئوليه قبل أي شئ , و هو عارف كويس اوي إن انسحابه هيكون له اثر سئ على العمليه الإنتخابيه من قبل ما تبدأ , برافو حمدين لتاني مره , ياريت والنبي ياعم حمدين تعلّم البرادعي يعني ايه مسئوليه سياسيه تجاه دوله ما !!.
22 مارس
أكتر من 80 % من المصرييين بيأيدوه , شعبيته بتزيد يوم بعد يوم رغم كيد الكائدين , اسمه بقى معروف في كل الأوساط العالميه , انا شخصيا معنديش ادنى شك إنه يقدر يقود السفينه في الفتره الجايه .......... برافو محمد صلاح !!.
22 مارس
مرعي بتاع الكليمه
.
اوعاك تبقى عبيط وفاهم إن فيه أي أمل في حزب النور والبارتيته اللي اسمها السلفيين دي , من يوم ما ربنا خلقهم وهما هما مش بيتغيرو , بيلعبو ببراعه دور ( أرمله وجايه في أي مصلحه ) , ولو ذاكرتك حلوه شويه هتفتكر إنهم ايام ثورة يناير قالو ( الخروج على الحاكم حرام ) ولما جه طنطاوي غنّو مع الإخوان ( يا مشير انت الأمير ) ولما جه مرسي قالو الشريعه و اللي هيقول نعم للإخوان هيدخل الجنه , و لما حسو بس ان السيسي جاي في الطريق طلع واحد منهم وقال ( ماهو سيدنا رسول الله كان بيقود الحروب بنفسه يعني كان عسكري !! هو وكل الخلفاء الراشيدين ) !!.
.
باختصار , بهاليل ومشايخ السلفيين في مصر اللي صدّعونا بكلامهم و سحنتهم بيعيشو في بلاط أي حاكم , بالك انت لو مصر حكمها مرعي بتاع الكليمه ؟ هيأيدوه بشراسه ومش بعيد يطلعو من القرأن أيات وحروف معجزه لما تجمعها جنب بعض تتشكل كلمة ( مرعي بتاع الكليمه ) !!.
.
يعني مشايخك اللي انت بتقول لحمتهم مسمومه دول أخرهم كده أخرهم بيجيبو طشت نحاس وشوية مايه سخنه وملح ويدعكو للحكام رجليه بالليل ,................... عايز مني حاجه تانيه يا فخامه الرئيس قبل ما قوم أصلي العشا وقيام الليل واعتكف ؟!!.
22 مارس
ما له و ما عليه وما للهوى وانا مالي يامّه !!.
.
باسم يوسف
..................
- اعتذر زي ما توقعت وسخر من نفسه على سرقة المقال زي مانا اقترحت من كام يوم , كلام جميل , إنما الأهم هو الفقره اللي قال فيها إن إنتقاد الناس حطّني في حجمي الحقيقي , أنا بقدم برنامج ساخر هزلي , لا انا محلل سياسي ولا زعيم وطني , ده كان كلامي برضه عشان يشيل السكينه من على رقبته .......... مممممممممم هو باسم عندي في الأصدقاء متنكر و بيسرق أفكاري وبوستاتي ولا حاجه ؟ مممممممممم أباسم يا حرامي !!.
.
- كده احنا بدأنا نحط النقط عالحروف قبل ما نطلع سوا عالروف , أو قبل ماننزل للدور التحتاني عشان ناكل لحمه ضاني ( أهي كلها طلوع ونزول مثير للشبهات والغرائز ) , وبعد ما حضرتك تضحك على تكرار كلمة ( المؤامره ) وتكرار كلمة ( الحرب ) حاول تضحك بليز , من قلبك مايجراش حاجه , الضحك مفيد جدا لحالتك الصحيه والنفسيه , هه ؟ خلصت الضحكه ؟ طب باسم قال ( نشوفكو في الحلقه الجايه ؟ ) , هنا بقى لازم تخلص ضحكتك وتغير المحطه , وانت بتغير المحطه افتكر حاجه مهمه اوي اوي , إن كلمة مؤامره وكلمه حرب مش مكرره ولا حاجه زي مانت متخيل ( شوفت بقى انك كنت بتضحك غلط ؟ ) , بس والله مش مهم , المهم انك تضحك غلط ولا صح مش دي القضيه , الحاجه التانيه اللي لازم تفتكرها وانت بتغير المحطه إن فيه مؤامره فعلا وفيه حرب على مصر , ماتخليش ضحكتك تعمي عينك عن الحقيقه , بالمناسبه باسم نفسه فاهم كويس اوي إن فيه مؤامره إنما الضحكه دي هش شغلته اللي بياكل منها عيش , ربنا يديمها علينا .
.
- طب ليه كلمة مؤامره مش مكرره ولا حاجه ؟ بص يا مولانا , مصر فيها 50 برنامج توك شو , كل واحد فيهم بيقدم 10 ساعات في الإسبوع , ولو قلنا إن باسم بيدور في أخر 3 اسابيع بس يبقى حضرتك قدام 1500 ساعه من الهري الإعلامي اللي اسمه التوك شو , طلّع بقى من ال 1500 ساعه كلمة مؤامره هتلاقيها كالتالي , عمرو اديب قالها من 9 ايام في برنامجه في الدقيقه 66 ...وعماد قالها من 11 يوم في الدقيقه 17 وهكذا .......... عرفت انها مش مكرره لو قارنتها بحجم الهري اللي بيتهري في البرامج ؟ إنما واضح ان باسم عنده فريق اعداد كبير و بتاع 12 تلفزيون إل سي دي ومقعد الناس يسمعو حلقات ورا حلقات عشان يطلعو كلمه و يقصوها ( هه كوبي وبيست برضه ...دي شوطه في البرنامج و صايبه الكل تقريبا ) , مجهود جبار يٌحسب لباسم .
.
- إنما الغريب والمريب في فريق الإعداد الضخم بتاع باسم إنه ماخدشي باله إن الخريطه بتاعة مصر مفهاش حلايب وشلاتين !! أو جايز خد باله ورماها للناس عشان يهرو وينكتو فيها بدل حكاية سرقة المقال , ده اسمه تغيير إتجاه السيل !!.
ليست هناك تعليقات:
إرسال تعليق