21 مارس
مش حقيقي أبدا إن كل حاجه في مصر بتتم بأسلوب ومنهج علمي عشان يعني نمسك في زمارة رقبة الراجل الطيب الكبّاره اللي اسمه عبد العاطي ونقعد نبستف فيه ايام وليالي , أغلب حياتنا بنعيشها بعشوائيه وبطريقة البركه (baraka method ) , يعني عندك مثلا محمد الجوادي , واحد من أهم المنظرين للفكر الإخوانجي حاليا , كل ما بقراله كلمتين على طول بييجي في بالي إن محمد الجوادي ده أمه ولدته الأول وبعدين حملت فيه , و هو ده قمة الإعجاز العلمي في نشأة محمد الجوادي !!.
.
بيقولك يا سيدي , يقول الشاعر الجاهلي المفلطح محمد الجوادي في معلقته الشهيره ( لولا الإخوان ) :
لولا الإخوان لما تحررت الصومال والجزائر !!.
لولا الإخوان لما ازدهرت الصناعه في مصر في عصر من العصور !!.
لولا الإخوان لما بقيت الكنائس المصريه حتى الأن !!.
لولا الإخوان لما غربت الشمس في المغرب قصدي تونس , و لما باضت الفرخه 9 بيضات في اليوم .
.
ألا هُبّي بصحنكِ فاصبحينَ ....... و لا تبقى على حد من ولاد الذينَ !!.
.
واهو بقى , هقول ايه يعني ؟ العلم الحديث أثبت إن أنثى الإنسان اسمها المرأه وبتولد و ذكر الإنسان اسمه الرجل واحيانا بيبيض !!.
21 مارس
أردوغان حجب موقع تويتر عن الأتراك , فين الساده النشطاء يبعتو لأردوغان رساله و يقولو له ( الدوله اللي تخاف من موقع تواصل اجتماعي تبقى دوله هفأ ) !! .
نفسي باسم يوسف يعمل حلقه مخصوص عن فضايح أردوغان و ابنه وقفله لتويتر , بس يا خساره مش هينفع , باسم أصلا مشغول بفضيحة سرقة المقال من الكاتب الصهيوني و فيه اللي مكفيه , خلاص يبقى مصطفى النجار يطلع في برنامج توك شو و يتكلم عن فضيحة أردوغان و فضيحة باسم , لأ برضه مش هينفع , مصطفى النجار أصلا مشغول بفضيحة سرقة الملفات والبت مروه اللي هياخد ربع مرتبها و فيه اللي مكفيه , خلاص تاهت ولقيناها , توكل كرمان تكتب على صفحتها بوست عن فضايح أردوغان وباسم و مصطفى النجار , مممممممم برضه مش هينفع , توكّل مشغوله بفضيحة جايزة نوبل و فيها اللي مكفيها !!.
21 مارس
حاضناك
و الحضن باقي
كرّاز واسمه الحنان
.
و عشانك مرّه تبكي
ب دموع تسقى الشراقي
و تفوت تحت البيبان !!.
.
.
محمد حسين
كل سنه وانتي طيبه يا أمي .
20 مارس
1- راحت لخالي وقالت له ( والنبي يابو رضا وانت راجع من صلاة الفجر تيجي تخبط عليا عالشباك عشان تصحيني , أصل محمد عنده امتحان بكره وعايز يصحى الساعه 6 عشان يذاكر ساعتين قبل مايروح الإمتحان وانا مش بعرف في الساعه ولا عندنا منبه ) , قال لها حاضر , وبعد صلاة الفجر جه خالي وخبط على شباكها , يا غاليه يا غاليه اصحي الفجر أدن وخلصنا صلاه , قالت له صحيت يابو رضا استنى هفتح لك بقى تفطر وتشرب شاي , قال لها لأ انا ماشي عشان مستعجل .
.
صحيت هي و صلّت الصبح قبل النهار ما يطلع وراحت لخالي التاني قالت له والنبي يا رمضان هات 5 جنيه سلف عشان محمد عنده امتحان في الكليه وانا مش معايا فلوس ...................
........................... كل سنه وانتي طيبه يا أمي الغاليه .
.
2- قالت لي : انت زعلان ليه وهتسافر وتسوق وانت بالحاله دي ؟ كل ده عشان في الشركه هناك قالولك لازم ترجع قبل العيد وانت كان نفسك تعيد في مصر ؟ خلاص ماتسافرش , ماترجعش خالص ولو عالفلوس اللي هتخسرها خد دهبي و بيعه و عوّض خسارتك ...............
.......................... كل سنه وانتي طيبه زوجتي الحبيبه .
.
3- وانا جايبها من المدرسه قلت لها : هو النهارده الخميس ولا انا بيتهيألي ؟ قالت لي يا بابا مش عارفه النهارده الخميس ولا لأ , كل اللي اعرفه ان النهارده thursday ....... !! قلت لها تصدقي كنت فاكره الخميس ؟!!...................كل سنه وانتي طيبه يا لوجي يا حبيبتي
.
4- جت بسرعه تجري وهي بتضحك وخبّطت عليا جامد على باب الحمام , وقالت لي ( يا بابا اطلع بسرعه بقى عشان سابل يوسف هيبدأ دلوأتي )
................. كل سنه وانتي طيبه يا لمار يا حبيبتي
.
كل سنه وكل أم وكل زوجه وكل بنت في مصر بخير ...كل سنه ومصر بخير .
20 مارس · تم التعديل
بعيداً عن باسم يوسف ................. بوست للأذكياء فقط
.
في فيلم ( الكيت كات ) الرائع , كان أخف دم في الفيلم بعد الشيخ حسنى هو شخصية المعلم هرم ( نجاح الموجي ) , واحد من أفضل أدواره على الأطلاق , والمأمور قال لي خد تعالى ياد يا هرم , قلت له ايه ياد يا هرم دي يا باشا أنا معلم كبير وليا اسمي , طب خلاص قولي يا معلم هرم انت بتاجر في المخدرات ؟ أه صح بس هنكر .
.
المهم بقى إن المعلم هرم تاجر المخدرات أبو دم خفيف أوي , اللي كان بيضحكني طول الفيلم اتأفش في الحمام بتاع الست فتحيه , اللي أفشه هو الشيخ حسني ( الكفيف ) وعشان الشيخ حسني كفيف فكّر إن هرم بيسرق شقة فتحيه !!.
.
لو كان الشيخ حسني مفتح شويه كان لفت انتباهه اكتر العلاقه اللي بين هرم و توحه , دي أهم من أنه يكون حرامي ولا لأ , هرم ابو دم خفيف يبدو إنه على علاقه بالست , و فيه تطابق أو تواصل فكري بينهم ( يعني الكيميا متظبطه مع بعض ) , وانا كل خوفي يكون هرم وقع في المحظور مع الست توحه والعياذ بالله , إنما الفيلم خلص واحنا ماعرفناش العلاقه بينهم وصلت لفين ؟
,.................... يالضيعة يهود !!.
20 مارس
شوف يا باشا , أنا عملت كل حاجه غلط ممكن حضرتك تتخيلها ( بشرب سجاير ونسكافيه وباكل جبنه نستو ) , بس لا عمري سرقت بوست ولا مقال من حد ولا شيرته حتى , ولا عملت كوبي و بيست ولا عدلت كلمتين في بوست بتاع شخص تاني , بزمتك مش أبقى أنا أجدع من بن جوده ؟ قصدي بن يوسف ؟ حقي انا اللي اتكلم عن الإعلام المحايد والمهنيه والمصداقيه و الديموقراطيه والعداله و الورق اللوري .
المفروض كمان أطلع مع أصاله في الحلقه الجايه , وأغني معاها أغنيه : في الدور التحتاني , ناكل لحمه ضاني ونحلى بسوداني ,و اسرق مقالات من تاني ..... أه ياني أه ياني .
ليست هناك تعليقات:
إرسال تعليق