.
19 مارس
إعتذار باسم يوسف مش هيحميه من ألش الناس اسبوعين تلاته جايين , ومش هيحمي انصاره ومحبيه اللي رمو القفاز وبقو قاعدين في الركن زي الغلابه و شعارهم لما بيشوفو بوستات عن سرقة المقال ( يا عم اضرب بقى وخلصنا , هو انت هتضرب ولا هتركن ؟ )
............
الحل الوحيد لباسم يوسف , الوحيد على الإطلاق للخروج من الورطه دي هو إنه يعمل فقره كامله وكبيره في برنامجه عن سرقتة للمقال , فقره ينتقد فيها نفسه بمنتهى العنف ( مش باعتذار ولا بتبرير ) , و يقدر يعملها باسلوب ساخر وسكتشات و دلع بقى , يعني باختصار على طريقة ( كُل نفسك قبل ماحد ياكلك ) ..........رزقك بيجيلك لحد رجليك يا عم باسم و يوم ما يبقى مفيش احداث تعمل عليها حلقه أديك انت اللي بتخترع الحدث وبتعمل عليه الحلقه ...يعني انت صاحب مصنع الشوكولاته اللي بتجيب تسوس في الأسنان و صاحب مصنع معجون السنان كمان , والنبي هتبقى حلقه تاريخيه .
19 مارس
لسه الصفحه بتاعتي مش مظبوطه ... رجعت تاني , حظر اضافه وحظر رسايل ...امبارح اتعملي نكزات كتيييييييير اوي وكانت اتظبطت شويه , والله مانا فاهم حاجه
19 مارس
يالله بقى نقفل المزاد , مش فروسيه اني انتقد باسم وهو واقع في الورطه دي , بس اهي نصيحه هقولهاله لوجه الله , جايز تكون النصيحه الأخيره , يا عم باسم , إنت فنان ساخر مبدع موهوب حقيقي , إبعد عن كتابة المقالات وركز في شغلك , وفي شغلك افتح الكادر بتاع عنيك شويه , ارفع هامش حريتك بإيدك , كبّر القماشه اللي انت شغال عليها , انتقد النظام والمعارضه والحاكم والمحكوم والنشطاء والكل كليله وانتقدني أنا كمان ولو إني مش أد المقام , وفهم الناس انك فنان ساخر بيدور على الموقف ال Abnormal ..., بيدور على اللقطه , صيد الكاميرا , فهمهم انك مش زعيم وطني ولا محلل سياسي واسترتيجي وإلا هتحط رقبتك تحت السكينه باستمرار ...أهي نصيحه و بقولهالك للمره العاشره , عشان الناس محتاجه تضحك فعلا , محتاجه باسم الفنان الساخر وبس .
19 مارس ·
إنت وقعت ولا الهوا رماك ؟
........... على رأي الشاويش عطيه
.
معقوله يا باسم ؟ تطلع حرامي غسيل زي المعلم محمد رضا , قصدي حرامي مقالات ؟ يعني بتتمشى عالفيس وجوجل وأول ما تلاقي مقاله تعجبك تقوم روحك تهفهف عليها وتجيب المقص وتقصها من هنا ومن هنا وتقول دي بتاعتي ؟ كده يا باس ؟ قصدي يا باسم , معلش لا مؤاخذه أصلي بقص الكلا , الكلام يعني .
.
أصحابي هايصين في المقاله اللي اتسرقت لأنها كارثه , بس والله مش سرقة المقاله هو مشكلتي مع باسم , فيه كارثه أكبر , محتوى المقاله نفسه كارثه اكبر , اللي قريها بيقول ان فيها وصف لأمريكا كأنها راعي الحريات والقيم في العالم وهجوم حاد على روسيا ....دي الكارثه الأكبر في نظري .
.
كارثه تالته برضه الناس ماخدتش بالها منها , يعني ايه باسم يوسف يكتب مقالات ؟ طب هو فنان ساخر مبدع في الإعلام المرئي , هل ده معناه إنه يبقى كاتب صحفي مبدع ومخرج سينمائي ماحصلش وعازف بيانو عبقري ؟
ما تفوقو يا بشر من غيبوبة النجوم دي ؟ مره واحد قال لي انت هتفهم في الدو احسن من عصام حجي اللي شغال في ناسا ؟ وعلى صفحة توكل زفت كرمان لقيت الإخوان بيدافعو عنها ويقولو ( انتو بتفهمو في السياسه أحسن من واحده واخده جايزة نوبل في السلام ؟!! ) .
.
تقدم ايه اللي احنا بندور عليه واحنا فاهمين إن أحمد زويل هو أحسن واحد يعالج الصدفيه والحصوه في الشرق الأوسط عشان واخد نوبل في الكيميا ؟ وباسم بيقدم اعلام مرئي ساخر يبقى كاتب مقالات وخبير سياسي و محلل استراتيجي ...وبيعوم في البحر والبر والجو كمان !!.
18 مارس
متشكرين يا رجاله و يا بنات , مشششششششكرين , الصفحه رجعت تاني الحمد لله , ربنا يخليكو للغلابه أمثالي , ............ مممممممم يسقط يسقط حكم العسكر , يسقط يسقط حكم العسكر , أهو يا عم مارك , خف إيدك عني شويه بقى دانا ماحيلتيش غير الصفحه دي هي والعربيه اللي مرميه في الورشه , الله يسترك يا شيخ , إلهي ربنا يكفيك شر بتوع التموين والمرور في مصر و يكفيك شر عبد الرحيم علي قادر يا كريم .
18 مارس ·
هه , اتعملي حظر من اضافة الأصدقاء و بعتان الرسايل لمدة اسبوع , الصفحه كانت هتضيع في شربة مايه , مع اني نادرا ما بضيف حد , الريبورتات شغاله زي الفل , الله ينور يا رجاله !!.
18 مارس
بوتين وقع على معاهده انضمام القرم إلى الإتحاد الروسي , يعني طرقع لأمريكا و الإتحاد اللامؤاخذه الأوروبي , يا ريت الساده النشطاء يرحمو مصر يومين تلاته كده ( يدّوها اجازه ) ويشتغلو هري على روسيا اليومين دول , روسيا فيها ماده خام للهري تكفي ألاف البوستات والله , يعني خد عندك مثلا : مركز شباب كفر موسكو يختار اللاعب بشير التابعي كأفضل لاعب كره قدم في تاريخ العالم والكره الأرضيه والكوره الشراب ...يا فضيحتك يا روسيا , هتودي وشك فين من دول الكومنولث يا روسيا ياختتتتتتتتتتتتتتتتتتي ؟!!.
18 مارس
يا ترى الهري النهارده هيكون على إيه ؟ واحده عملت صنيه مكرونه بالبشاميل ونسيتها في الفرن لحد ماتحرقت ؟ يا فضيحتك يا مصر , يا فضيحتك يا مصر , الحكومه بنت الحرام دي لازم تفهم متطلبات المرحله و تجيب لكل مواطن ( هرّايه ) بالكهربا !!.
18 مارس ·
خطايا وكوارث النظام الحالي الحاكم في مصر ( مجمعه )
.
- من كام شهر كده انتشرت صوره عالفيس , واحد معلّق صوره كبيره للسيسي على بوابة طريق العين السخنه , الصوره تقريبا فوتو شوب أو حقيقيه , بس مش مشكله , إزاي واحد اسمه ( حباصه ) يعلق صورة للسيسي على بوابة طريق ؟ ...الفاشيه تطل برأسها يا منى ..........يا فضيحتك يا مصر .
.
- من شهرين تلاته النشطاء اكتشفو راجل غلبان ومعلق صورة السيسي في المندره بتاعة بيتهم , وفي حي الزمالك عثرو على بنت ( مزه ) عندها قط شيرازي دكر ومسمّياه السيسي , الفاشيه تطل برأسها , يا فضيحتك يا مصر !!.
.
- من كام يوم خالد على أبو 10 ألاف صوت اعلن انسحابه من انتخابات الرئاسه وقال انها هتتزور ( ولو عايز فيديوهات وشهادات للإنتخابات المزوره اللي لسه مابدأتش اساسا هتلاقي عنده ) , المهم مولانا خالد على كان عشمان في المراجعه النهائيه اللي قبل الإمتحان إنه يجيب 18 مليون صوت إلا 10 ألاف , بس النظام الفاشي ابن الجرام حطم حلمه , الفاشيه تطل برأسها ....يا فضيحتك يا مصر !!.
.
- باسم يوسف الفنان المبدع الساخر جاب فيديوهين لأماني الخياط , واحد فيهم بتلعن فيه جدود العسكر ( أيام طنطاوي ) وواحد فيهم بتمدح فيه العسكر أيام السيسي , يا فضيحتك يا مصر , مع ان ده نفس موقفي وموقف حضرتك وحتى موقف باسم يوسف , كنا بنلعن عسكر طنطاوي اللي سلمو البلد للإخوان ومدحنا السيسي اللي انقذ البلد من الإخوان ( بالمناسبه باسم شارك في 30 يونيو في الشارع ايام عسكر السيسي ولعن جدود ابو عسكر طنطاوي زي أماني الخياط بالظبط ..دوّر عالفيديوهات ) , إنما من باب الإحتياط لازم نقول الفاشيه تطل برأسها ...يا فضيحتك يا مصر !!.
.
- البنات اللي اتقبض عليهم في المظاهرات عشان ماخدوش تصريح اتعرضو للإغتصاب في السجن ..معقوله اللي انت بتقوله ده ؟ إغتصاب ؟؟؟؟ لا مش اغتصاب أوي هو تقدر تقول تحرش , أه تقصد تحرش بالإيد ؟ لا لا هو مش بالإيد أوي , ده كان تحرش لفظي , أه مممممممممم الفاشيه تطل برأسها , يا فضيحتك يا مصر .
.
- امبارح واحد اسمه الكابتن وليد في نادي الطيران عزم فيفي عبده واداها جايزة الأم المثاليه بين عضوات النادي ..ومع ان النادي مجرد نادي و كمان نفى الحكايه إلا انها لأ مش ممكن ...الفاشيه تطل برأسها , يا فضيحتك يا مصر !!.
.....................
يسكت يسكت حكم العسكر , يسكت يسكت حكم العسكر .
17 مارس
من 4 سنين تقريبا , أمي أخدت جايزة الأم المثاليه في السنبلاوين ( على مستوى المركز يعني ) , عندنا شهاده تقدير متعلقه في المندره أد كداهو للأم المثاليه أمي اللي اسمها سعديه , ال( سي في ) بتاعها بيقول انها فلاحه مش بتعرف تفك الخط , جوزها توفى وكان عمرها 32 سنه , أكبر واحد في ولادها اللي هو انا عمره 16 , وعندها 6 أطفال اصغرهم 8 سنين , قدرت الأم الفلاحه انها تعلمهم وتربيهم وتدخلهم كلهم جامعه مع ان ابويا الله يرحمه مكانشي سايب لنا عذب و أطيان .
نظام مبارك الفاسد ماقدرش يختار رقاصه عشان تبقى الأم المثاليه ولا عدلي منصور ( القاضي المحترم ) يقدر , ............أصدقائي الأعزاء بتوع ( خُلقنا لنعترض ) , يا ريت تشوفو مين اللي اختار فيفي عبده ؟ , ويارب يارب تفهمو إنكو مجرد مطيه للشيطان بيركبها وقت مايحب .
17 مارس
اهو لحد دلوأتي مش عارفين مين اختار فيفي عبده الأم المثاليه ؟ نادي الصيد ولا نادي الطيران ولا نادي الحبانيه و لا مركز شباب السنبلاوين ؟ وغالبا هيطلع ان ماحدش اختارها من أساسه ....لكن يعني من باب الإحتياط لازم نهتف , أومال يعني يفوت علينا يوم من غير ما نهتف ؟
, الدوله الفاشيه تطلّ برأسها من جديد , دولة الراقصات والعاهرات , يسقط يسقط حكم العسكر , السيسي سفاح وعدلي منصور قاتل , يا فضيحتك يا مصر , يا فضيحتك يا مصر .......................... مبسوطين مني يا بهوات ؟!!., أنا كده ديموقراطي وليبرالي وثورجي اهو , يارب الأسياد يرضو عننا !!.
17 مارس ·
طب على خيرة الله , نادي الطيران اختار فيفي عبده الأم المثاليه !! اصحابي النحانيح بيقولو يا فضيحتك يا مصر !! .
أنا كمان هعمل مسابقه على صفحتي , ماهو انا مش اقل من نادي الطيران , هختار فيفي عبده الأم المثاليه وسعد الصغير الأب المثالي , والبرادعي احسن فلاح فيكي يا مصر وعاصم عبد الماجد شاعر الرومانسيه الأول ...............هه ؟ قولو بقى السيسي سفاح السيسي قاتل , ويسقط يسقط حكم العسكر ...يا فضيحتك يا مصر , يا فضيحتك يا مصر !! .
.
................ممممممممممممممم , ربنا ياخدكو ويريح البلد من غباوتكو قادر يا كريم .
17 مارس
مين الحيوان اللي اختار فيفي عبده الأم المثاليه ؟ مين ابن التيييييييييت اللي عمل كده ؟ وليه الحكايه دي اتحسبت على النظام ؟ هو عدلي منصور اللي اختارها ولا السيسي ؟............ولا احنا عايزين اي حاجه ونقول فيها يا فضيحتك يا مصر ؟ ده على أساس إن سعد زغلول هو اللي اختارها !!.
17 مارس
يا سلام لو نبطل كلام في السياسه , بلاها انتخابات ومرشحين ودعايه و حملات وقضاه ولجنه عليا ولجنه سفلى , مصر مش مستحمله , فيها ايه يعني لو كل مرشح خد أنصاره و راحو عملو مشروع بدل الهرتله في حملات انتخابيه ؟ , يعني مثلا السيسي ياخد انصاره كلهم و يروحو يزرعو 5 مليون فدان في الصحرا , حمدين ياخد انصاره كلهم و يروحو يزرعو 4 مليون فدان في الصحرا , وخالد على ياخد أنصاره كلهم ويروحو يزرعو شجرتين قدام محطة مصر , يالله يا أفنديا عشان الميكروباس طالع !!.
ليست هناك تعليقات:
إرسال تعليق