المذيعه : ممكن تقول لنا أخ عطوه ايه سبب ترشحك للرئاسه ؟
عطوه : والله انا لقيت ان شغلانة الرئاسه دي حلوه وفيها قرشين معقولين و لو مانجحتش يعني هبقى عملت لنفسي شويه شهره عشان لما ارجع اشتغل كهربائي الناس يطلبوني بالإسم ( يقولو عايزين عطوه الكهربائي مرشح الرئاسه السابق )
.
المذيعه : فكره حلوه يا أخ عطوه , قولي إنت عارف مصر عدد سكانها كام ؟
عطوه : يوووووووه كتير ما تعديش
.
المذيعه : طب مساحتها أد إيه ؟
عطوه : دي كبيره يامه
.
المذيعه : طب تاريخها كام سنه ؟
عطوه : كتييييييير أوي , ييجي مليون سنه واكتر
.
المذيعه : واكتر ؟
عطوه : أه , أومال انتي فاكره ايه ؟
.
المذيعه : طب ايه هو برنامجك الإقتصادي ؟
عطوه : بصي حضرتك أنا برنامجي بيقوم على 4 محاور في حين إن برنامج السيسي بيقوم على 3 محاور بس , يعني أنا 4 فاز وهو 3 فاز , يبقى مين أفضل ؟
.
المذيعه : طب انت عايش لوحدك يا عطوه ؟ مش شايفه حد في البيت يعني ؟
عطوه : لأ عايش مع أبويا وامي ومراتي , بس أبويا وامي رجعو البلد عشان زعلانين مني وهينتخبو السيسي ومراتي غضبانه في بيت أبوها وهتنتخب السيسي .
.
المذيعه : طب تحب تقول ايه لأنصارك ؟
عطوه : أحب أقول لأنصاري واصحابي الحدادين ونجارين النابوليا والبوابين والنشطاء السياسيين انتخبو مرشحكم عطوه المفك ومش هتندمو , إنما ماقولتليش انتي هتنتخبي مين يا مزه ؟
.
المذيعه : هنتخب السيسي ... وانت هتنتخب مين يا عطوه ؟
عطوه : هنتخب السيسي طبعا !!.
29 مارس
مرتضى منصور فاز برئاسة الزمالك !! هو يا ربي الغلبان مابيشبعش غلب كده ؟!.
أكبر ناديين في مصر , واحد فيهم كان رئيسه حرامي و إديه أطول من شارع فيصل و التاني بقى رئيسه سافل ولسانه أطول من شارع صلاح سالم .
29 مارس
على عكس أغلب الناس , أكتر حاجه بتقلقني في شكل عبد الفتاح السيسي هي زبيبة الصلاه اللي في قورتك دي , معلش معلش ربنا يسامحني بقى , أصلنا اتلسعنا من الشوريه و بقى عندي عُقده وشنيطه , إخوان على سلفيين على إسلاميين على جهاديين على زفت الطين , و انا بقالي سنتين تلاته كلما رأيت واحد بزبية صلاه أتحسّس مسدسي و أحط إيدي عالمحفظه اللي في جيب البنطلون الورّاني , منهم لله بقى خيرت الشاطر و عبود الزمر والبلتاجي السو كيوت !!
........ يارب زبيبة الصلاه بتاعتك تكون أصلي يا عبفتاح مش تايواني .
29 مارس
ديموقراطيه عجب ومثقفين على كيف كيفك
.
دينا عبد الرحمن بتعيط و ( تتشحتف ) عالهو , وقدمت استقالتها اعتراضا على ترشح السيسي !! , ليه كده يا دينا دانا بحبك والله وأمي كمان بتحبك , ماهو المثل بيقول ( في الحرب لا تشتكي من ألم الأسنان ) ويا أخت دينا في الديموقراطيه لا تشتكي من ترشح المشير !!.
.
أنا أصلي جاهل ومش مثقف زيكو وماعرفشي يعني ايه ( إخلال بمبدأ تكافؤ الفرص ) , يعني إيه إخلال بمبدأ تكافؤ الفرص دي يا جناب العمده ؟! , هو انا عشان جاهل ومش مثقف فهمتها بالشكل ده : يعني الأهلي والزمالك ينسحبو من بطولة الدوري عشان تبقى فيه فرصه لبترول أسيوط واسمنت السويس وخالد على إنهم يفوزو بالدوري , لو كان ده المقصود فعلا فانا هبقى أسمنتي وسويسي و أفتخر !!.
.
يعني يا ولاد الصرمه , جبنا مرشح فلول من نظام مبارك الرسمي فهمي نظمي ومرشح تاني عضو في الجماعه الإرهابيه , كان اخر حاجه يقدر يعملها انه يشيل الميكروفون للمرشد وهربان من السجن ومسألناش هرب إزاي ؟ ومتهم بتخابر ومسألناش و قولنا يترشح ده حقه , ولما جه ظابط في جيش مصر وقلع البدله وقال هترشح زي ما الدستور بيقول تقولو لأ ؟ لا يمكن أبدا ؟ على جثتي وجثة خالد على ؟!
.
عندنا ديموقراطيه عَجَب ومثقفين على كيف كيفك , بالك انت لو عايز تدمر اليابان وتهد اللي عملته في ال 70 سنه اللي فاتو ؟ ابعت لهم أد 10 ولا 20 ألف مثقف و منظّر وناشط سياسي مصري , كلها اسبوعين تلاته وتلاقي اليابان بتشحت على باب السيده , أومال ايه ؟ المثقفين والنحانيح والنخبه العره بتاعتنا دي يُعتبرو ثروه قوميه , وسلاح دمار شامل في إدينا ممكن نستخدمه لمحاربة الأعداء ....إحنا نبعتهم لأي دوله عايزين نهدها و على رأي الأغنيه ما بتقول ( لبِّسهم من صنع بلادي ) !!.
29 مارس
مشتاق يا زرع القصاري
لزهور ما تجرحني
مشتاق لنسمه عصاري
فجأه بتلفحني
و لحِجرها المفرود
و لحضنها الدافي
مشتاق يا أمي أعود
ألقى الحنان صافي
.
.
محمد حسين
29 مارس
لو بقى ...
.
لو كنت ظابط شرطه في مصر , كنت رفضت تنفيذ الأوامر والإنضمام إلى قوات مكافحة الشغب , هو انا هستفيد ايه لما أخد طلقه واروح فيها ؟ وفي الأخر هطلع أنا الغلطان ( أنا الميت الغلطان ) , كنت دوّرت على أي واسطه واتنقلت شرطة السياحه او اشتغلت في المطار أو المرور .
.
لو كنت عسكري جيش في مصر , كنت رفضت تنفيذ الأوامر و رفضت حماية الطرق أو تأمين المناطق الحيويه , وانا هستفيد ايه برضه لما تجيلي طلقه في ضهري من جماعه ارهابيه ؟ عشان خاطر مين ؟ مصر ؟ هي مصر هتمسح دموع أمي اللي ممكن تروح فيها ؟ كنت طلبت أنقل تجنيدي للبحر الأحمر ولا حلايب وشلاتين .
.
لو كنت نحنوح مثقف والثقافه عمّاله تنقّط مني وانا ماشي كنت تعاطفت مع الإرهابيين وقلت دولة العسكر تعود وإزاي تعاملو الإرهابيين بالقسوه دي يا كفره يا ولاد الحرام .؟ وكنت لعنت جدود أبو الجيش على القضاء على طفاية السجاير اللي قدامي , واتكلمت عن حقوق الغلابه يا كفره والناس اللي مش لاقيه تاكل بس ( أهم حاجه ال 12 كلب اللي انا مربيهم ياكلو أحسن أكل ويتعالجو في أحسن مستشفيات والكام قطه شيرازي السو كيوت )
.
لو كنت رئيس مصر , كنت طلعت الإرهابيين الكبار من السجن وقلت لهم طلباتكو ايه ؟ عايزين ترجعو الجماعه الإرهابيه ؟ حاضر من عنيا , عايزين حماس تدخل وتطلع بالسلاح والمخدرات مفيش مشكله , عايزيني أروح أحبّ على إيد أمير دولة قطر العظمى , من عنيا حاضر .
.
إنما بقى لو كنت مصري بجد , عاشق لتراب البلد دي , وعارف أبجديات الدوله والفرق بين الدوله وهيبيتها و الغابه وخيبيتها , لو كنت رئيس مصري أو ظابط شرطه مصري أو عسكري جيش مصري كنت فرمت أي كلب ينزل من بيتهم وفي إيده شومه , بس شومه مش سلاح , ولما أموت هبقى شهيد بجد , ربنا أعلم بحال اللي بينزل من بيته عشان يحمي أرضك وعرضك ويأمّن لك الشارع يا عرة الرجاله , ربنا أعلم , ربنا ( ولله المثل الأعلى ) ماعندوش حساب عالفيس بوك ومش بينشر بوستات وصور الجزيره و شبكه رصد و يصدقها ( يعلم خائنة الأعين وما تخفي الصدور ) , ولو كنت رئيس لمصر كنت لمّيت النحانيح ودخلتهم الجيش , ووقّفتهم خدمه بالسلاح في سينا أو تأمين لمزلقان عين شمس والألف مسكن , عشان يبقو يعرفو يتعاطفو كويس !!.
28 مارس ·
أيام ثورة يناير كنا بنعلّم العالم كله يعني ايه ثوره على نظام فاسد , ولما مبارك غار في داهيه والناس بدأت تنضّف الميدان بقينا نعلّم العالم يعني ايه نضافه ..... انما دلوأتي بنعمل هاشتاج ( انتخبو العر* ) وبنتعاطف مع الإرهابيين اللي بينزلو الشارع بالسلاح , يعني باختصار بقينا نعلّم العالم كله يعني إيه نطاعه !!.
نفس المعلِّم هو هو , بس تقريبا كده المناهج هي اللي اتغيرت !!
28 مارس
قمة المأساه الإنسانيه اللي بتعيشها مصر حاليا , قمة الإنحطاط في عقول البشر , قمة الإنهيار التعليمي والثقافي , إنك تتعامل مع حادثه زي قتل الصحفيه مياده اشرف بالطريقه دي :
هما الإرهابيين نزلو بالسلاح والشرطه اتعاملت معاهم وعايزين بقى نشوف مين الغلطان واللي قتل الصحفيه !! أوووووووووووووووووووووووف على مثقفينك يا مصر أوووووووووووووووووووووووووف على نخبتك العره , يعني ارهابي نازل بالسلاح في الشارع وبيشتبك مع عساكر أمن وانا لسه هستنى عشان اشوف مين الغلطان .؟؟؟؟ هات بوسه يا ناشط , هات بوسه يا مثقف , هات بوسه يا منظّر لأ خدك ايه ؟ عيب عليك , هو انت بتاع بوسه من الخد برضه ؟!.
28 مارس
شهيده جديده عمرها 22 سنه , بتغطي اشتباكات بين الجماعه الإرهابيه والشرطه , هه يا بهوات ؟ حد عايز يتعاطف ؟ حد عايز يزايد ؟ حد عايز يقول مصالحه ؟ حد مش عاجبه قرار القاضي اللي كان من كام يوم ؟
طب شوفت الفيديو بتاع قتل مأمور القسم ؟ شوفت كام واحد كان بيضرب فيه لحد ما مات ؟ طب شوفت كام واحد ضربه وعذبه بعد ما مات ؟ طب شوفت الطبيب ابن الكلب عمل ايه ؟ طب شوفت الشيخ ابن الكلب كان بيفتي ويهري في ايه ؟ معاملة الأسرى ؟ ولا يجوز تعذيب الأسير بعد قتله ؟ هع هع هع يلعن *** ابوكو كلب كلب , والقاضي بعد ما شاف الفيديو ده يحكم بايه يا نشاط ؟ يحكم بإيه يا نحنوح ؟ 50 ولا 70 واحد بيضربو في واحد لحد ما مات وبعد ما مات بيعذبوه ؟ وبيصورو المشهد كمان ( مدعاه للفخر ) , وحوار ديني ابن وسخه حوالين جثة الشهيد ؟ , أنا لو قاضي كنت حكمت على كل واحد في الفيديو وكل واحد كان معدي بس وشاف المنظر إنه يتحط تحت قطر سريع عشان يتفرم , انتو عارفين يعني ايه دوله ؟ عارفين يعني ايه دين ؟ عارفين يعني ايه اشتباكات بين جهاز امني وعصابه ارهابيه مسلحه ؟ عارفين يعني ايه كل يوم جمعه ضرب نار في الشوارع ؟ عارفين يعني ايه كلب لا هو تبع جيش ولا شرطه ويمشي بسلاح في الشارع ؟ , ولا هتعيشو حياتكو تتكرعو عالفيس وتبيعو شعارات زي المهابيل وخلاص ؟!.
28 مارس
هو صحيح عبد الفتاح السيسي بعد ما استقال من منصب وزير الدفاع يبقى دلوأتي عاطل عن العمل ؟ طب هيصرف على بيته و عياله منين يا ضنايا ؟ إنما المعدن المصري الأصيل بيبان وقت الشده, صديقه غاليه جدا عندي في الأصدقاء أول مانتبهت للحكايه دي قالت أنا هبيع ال 10 غوايش اللي حيلتي واديله فلوسهم ( مش هقول على إسمك يا إيناس ) , وانا كمان هتبقى معايا العربيه يا عبفتاح ياخويا لو احتجت اي مشوار او توصيله , يعني الأمر مايسلمشي , عيّل سخن بالليل ومحتاج توديه مستشفى تبارك فرع عين شمس هتلاقيني موجود , الناس لبعضيها يا عبفتاح , وهكلم لك أمي في البلد تبعت لكو ( شالية ) لبن كل يوم جمعه , إذ ربما المدام تحب تعمل رز معمّر للولاد ولا حاجه .
28 مارس
أوِّل ما جيت السعوديه اتعرفت على سواق ليموزين باكستاني اسمه طاهر , هو اللي علمني السواقه بالليموزين بتاعه , يوميها طلعت على كومة رمل كبيره بالعربيه وكنا هنتقلب , طاهر دلوأتي ربنا فتح عليه ورمى الليموزين اللي بيلف بيه في الشوارع عشان يركب الزبون ب 10 ريال , بقى له معارف كتيير جدا , اشترى عربيه فورد اكسبيدشن وعربيه جمس يوكون , وجاب سواق باكستاني يشتغل على عربيه منهم وبقى كل مشاويره بالتليفون ( الرياض , المطار , البحرين , الدمام , دبي .... ) , محتاج واسطه دلوأتي عشان اقابل طاهر , هو بعت تأشيرات ل 15 واحد من قريتهم اللي جنب لاهور , وجابهم كلهم ومشغّلهم في مشاريع خاصه , و في بلده عمل خير كتير , اشترى مثلا عربية اسعاف على حسابه وجاب لها سواق مخصوص وبيدفع له مرتب شهري عشان اي حد يتعب في القريه يوديه المستشفى مجاني , ربنا يفتح عليك يا طاهر .
.
أنا كمان ربنا مراضيني والحمد لله , لازم الواحد يحط لنفسه target ويقف عنده أو يعمل لنفسه end point , يعني مايسيبشي السحاحه تنقط باستمرار كده وهو مش حاسس , السحاحه كل يوم هتنزل نقطه , وعدّاد العمر مش بيقف , يا ريتنا كنا زي العربيات وبنعرف نلعب في العداد !!.
.
...............حاسس إني مسافر من قبل ما يخترعو السفر , 12 سنه كفايه اوي , جايلك يا غاليه انتي والغاليه ( الغاليه مصر والغاليه برضه اسم امي ) !!.
28 مارس ·
ناس بتوع ربنا وعندهم أخلاق حميده
.
الإخوان عاملين هاشتاج بيقولو ( إنتخبو العر* ) !! ...... وانا بالأصاله عن نفسي بقول لهم حاضر هننتخبه يا ولاد ال ****** ..( هما كده 6 علامات ستار تبقى صح ؟!) .
أهما دول الناس بتوع ربنا اللي عندهم أخلاق ( حميده ) , ولو عايز تعرف أخلاقهم وصلت لفين بالظبط اسأل على حميده وشوفها متلقحه في أنهي بار !!.
.
معرفتي المسبقه بخالد على بتقول إنه هيتراجع عن قرار انسحابه من الإنتخابات , هو بس مستني وحاطط ( أمل ) إن السيسي و حمدين مايعرفوش يجمّعو كل واحد 35 ألف توكيل مممممممم في 3 دقايق !!.
مش هتتعب كتير في البحث عن ( أمل ) بتاعة خالد على , هتلاقيها متلقحه جنب حميده في نفس البار , الإتنين سكرانين طينه , واحده قالعه هدومها وبتقول ( إنتخبو العر* ) والتانيه بتقول ( الإنتخابات هتتزور وخالد لازم يتجوز هنومه ) !!.
ليست هناك تعليقات:
إرسال تعليق