16 مارس ·
بلاه البوست اللي فات , بجد شويه وبعيد عن الهزار والإيحاءات , أي حيوان عايز ينسحب من انتخابات الرئاسه يطلع ويقول انا منسحب عشان انا فاشل ومش هنجح , غير كده يبقى مجرد عيل أو راجل برياله وماشي وراه شوية تيران مش اكتر , حكاية المرشح الفلاني اللي مكشوف عنه الحجاب وبيجيله الوحي من السما ( ولا من فيينا ) يقول له الإنتخابات هتتزور ماعدتشي نافعه .
.
اصحابي النحانيح معلوماتهم عن الديموقراطيه زي معلومات توفيق عكاشه عن القنبله الذريه , الديموقراطيه اللي بيفهموها هي الصناديق اللي تجيب المرشح بتاعي وإلا تبقى تزوير وفاشيه بتطل برأسها من باب البلكونه , ديموقراطيه برايفيت يعني , ديموقراطيه دلفري , هه ؟ شبعت ولّا ألفّلك ساندوتش ديموقراطيه كمان ؟!.
16 مارس
واحد ( مابيعرفش ) اتجوز ودخل على عروسته لقاها لابسه لانجري مثير , قال لها ايه يا هانم اللي انتي لابساه ده ؟ وكمان ايه ريحة البارفان دي ؟ وايه الورد اللي عالسرير ده , مش ممكن أبدا , حاجه تقرف , وساب البيت ومشي راح يعيط عند أمه .
.
أمه قالت له مش معقول اللي انت بتقوله ده يابني ؟ هي عملت كده فعلا ؟ وانا اللي كنت فاكره اني جايبالك عروسه بنت ناس ومن بيت متربي ؟ ..معلش يابني حقك عليا , المهم صاحبنا اللي مابيعرفش لم صحابه كلهم وعددهم ( 3) , وراح تحت بلكونة عروسته اللي هي مراته وقالو هنفضحها , ياللي لابسه لبس مثير ومتبرفنه , يا بتاعة الورد والشمعدان .
.
...............مممممممممممممم ولما انت يا خالد على مش أد الجواز كنت عاملي فيها 7 رجاله في بعض وعايز أتجوز عايز أتجوز ليه ؟!! وانا هعمل و هسوّي الهوايل .
وليه البرادعي ( اللي هو أمك ) جاب لك العروسه مع إنه هو كمان عارف كويس انك مابتعرفش ؟!!...........
يعني نبهدل بنات الناس معانا بالشكل ده يا جدعان ؟!...........يهدّها الديموقراطيه اللي جابت لنا الفضايح .
16 مارس
في وسط هذا العبث من شوية عيال و مخابيل و تراحليه عايزين يحكمو مصر , عايز أعبر عن احترامي وامتناني لشخصيه سياسيه مرموقه اسمها عمرو موسى , بعد 50 سنه في العمل السياسي والدبلوماسي , لما اترشح للإنتخابات نزل وشارك وعمل اللي عليه واستقال من الجامعه العربيه عشان يخوض التجربه ( منصب مرموق جدا ) , ولما سقط مقالشي تزوير ودوله فاشيه , و لما انطلب منه يخدم بلده في لجنة دستور شارك و مقالشي مش لاعب معاكو , هو ده الفرق بين راجل بيلعب سياسه و عيل بيلعب في مناخيره !!.
16 مارس
أشكال ولاد تيييييييييييييييييت
.
من كام يوم سامي عنان اعلن انسحابه من الإنتخابات عشان خاطر مصر , يعني اترشح عشان خاطر مصر وانسحب عشان خاطر مصر ( مش عشان فاشل ولا حاجه ) .
والنهارده خالد على اعلن انسحابه عشان خاطر إن الإنتخابات هتبقى مسرحيه , الديموقراطيه بقى وعيون الديموقراطيه , يعني اترشح عشان خاطر الديموقراطيه وانسحب عشان خاطرها ( مش عشان فاشل ولا حاجه ) .
من شهرين قلت خالد على هينسحب هو وال 400 صوت اللي وراه , وقلت انه ساعتها مش هيبقى باقي له غير تابلت محترم وتذكرة طيران وحساب على تويتر , و يالله بينا على عذبة كيمو , قصدي يالله بينا على عذبة فيينا .
ماهو تلميذ البوب النجيب .
.
امبارح كنت بتفرج على برنامج the voice , مراتي قالت لي تصدّق إن شيرين دي بقى يطلقو عليها في مصر ( رمز الأنوثه !! ) , يا نهار هباب , شيرين أه يا ليل بقت رمز الأنوثه , ماهو إذا كانت شيرين رمز الأنوثه والشباب في مصر مسقّط البنطلون و مبين البوكسرات , يبقى اكيد اكيد خالد على زعيم وطني فشر مانديلا وكان هيفوز في الإنتخابات باكتسااااااااااح , هو انا سايب البلد من زمان اوي كده ؟ خايف انزل مصر واروح عند تمثال سعد باشا زغلول ألاقيه رسم تاتو فراشه على صدره !!.
15 مارس
الخارجيه الأمريكيه : الإخوان لا تشكل خطر علي أمريكا حتى نعتبرها تنظيم ارهابي !!.
ومين بس قال انها بتشكل خطر عليكو يا حاج ؟ هو الواحد له عند صاحبه ايه غير لقمه ونومه و حتتين سلاح ؟ .......... ربنا يديم بينكو المعروف ويخسف بيكو الأرض قادر يا كريم !!.
15 مارس
لو كنت رئيس مصر كنت فرمتهم كلهم , دول و دول و دول , اللي بيمارس الإرهاب واللي بيدعمه واللي بيتعاطف معاه ويبرر له , وماعنديش مانع بعد مافرمهم أكتب بإيدي على قبر كل واحد فيهم الشهيد فلان الفلاني , الشهيد الكلب فلان الفلاني , و ماعنديش مانع أسمّى نفسي السفاح , محمد السفاح ( عشان أرضى غرورك ) , البلد دي لازم تعيش , البني أدمين بس لازم يعيشو , الديابه لأ , الحمير لأ , و طز في الألقاب !!.
15 مارس
بنظره سريعه للابتوب بتاعي , فتافيت شيبسي بين الزراير , فتافيت عيش من رغيف فينو كنت باكله من اسبوعين , قشرة لب , بقعه لونها بني وبتلزّق جنب زرار ( إنتر ) , أه دي نقطة نسكافيه أكيد , فيه حاجه محشوره بين زرار ال ح وزرار ال ج .. شكلها كده حبّاية دره مشوي من أيام ما كنت في مصر في الأجازه , واحد صاحبي مره كان بيحكي لي على أول لابتوب اشتراه وبيقول ( كان جبار يا محمد , كنت بعمل عليه بيبي ومش بيجراله حاجه !! ) , شكلي كده قرّبت خالص على المرحله دي .
محاولة تنضيف اللاب بتاعي أصعب من فكرة تنظيف شوارع القاهره , أنا بفكر أقوم أملى البانيو اللي عندي جوه في الصيدليه مايه واغطّس فيه اللاب واسيبه 3 أيام وهو ينضف لوحده , لأ طبعا مش هحط صابون ولا فووم , انت فاكرني عبيط يا عصام وعايز أبوّظ اللاب اللي حيلتي ؟!!.
15 مارس
نشرة أخبار المثفقفين والكولّجيه
.
نشرة الأخبار نبدأها بالعناوين : تشويش متعمد من قبل النظام الفاشي على برنامج البرنامج للرائع باسم يوسف , كيم كارديشتان تطلب من خطيبها مليون دولار عن كل سنه جواز .
.
والأن مع تفاصيل النشره يقدمها لكم : كولّجي ابرهيم نحنوح السبيعي
.
الخبر الأول : شهدت الحلقه الأخيره من برنامج البرنامج والذي تذيعه قناة mbc شهدت تشويشا متعمدا وأصابع الإتهام تشير إلى النظام الفاشي القمعي في مصر , ومعنا على الهاتف الاستاذ الدكتور حماده الجعر الخبير الإعلامي والمتخصص في شئون القنوات الفضائيه والقمر الصناعي والدش والساتلايت أبو 3 روس , سيدي حماده الجعر ولكن ما رايكم فيما يفعله النظام الفاشي في مصر ؟
.
الخبر الثاني : ذكرت وكالات الأنباء العالميه أن النجمه كيم كارديشان صاحبة أجمل ( مناخير ) في العالم طلبت من خطيبها أن يدفع لها مليون دولار عن كل سنه زواج , ترى لماذا طلبت كيم هذا الطلب وهل يستطيع خطيبها أن يلبي لها طلبها ؟ ومعنا للتعليق على هذا الخبر في الأستوديو , السيد ميمي العريان الخبير في شئون كيم كارديشان , وعبر الأقمار الإصطناعيه من بلاد بره معنا ابن عم خطيب كيم للتعليق على الخبر .
.
ومن أخبارنا المحليه
- أسعار الخضار في سوق ستوته بالمنصوره : شهدت أسعار الأوطه ارتفاعا ملحوظه حيت ارتفع سعر قفص الأوطه من 12 جنيه ل 14 جنيه دون إبداء أسباب منطقيه من قبل البائعين , الأمر الذي دعى الكثيرين من نشطاء سوق ستوته للتظاهر والتجمهر والهتاف بسقوط حكم العسكر
.
- في قرية كفر غنام بالسنبلاوين اصطدم سائق عربيه كارو بتوكتوك , مما أدى إلى كسر الفانوس الخلفي للتوكتوك , الحادثه التي تناقلاتها وكالات الأنباء العالميه تشير إلى أن الخطأ يتحمله سائق التوكتول لأن العربيه الكارو مفهاش مرايه عشان يشوف وراه , ومعنا من كفر غنام مراسلنا لتصوير بشاعة الحادث واطلاعنا على أخر المستجدات
.
- الخبر الأخير : مقتل 6 جنود مصريين في هجوم مسلح في محافظه القليوبيه تقريبا ......... والأن مع هذا الفاصل الغنائي
.........................
كان معكم كولجي ابراهيم نحنوح السبيعي من قطاع الأخبار .
15 مارس
عيش , حريه , باسم في الفضائيه
.
هي دي أهداف ثوره يناير يا نظام فاشل وفاسد وعميل , عيش , حريه , باسم في الفضائيه ....................... حلو البؤ ده ؟!.
.
طب تعالى كده ومتخافش , من 3 سنين بدأ التشويش على قناة الجزيره , يوميها حققت الجزيره أكبر نسبة متابعه على يوتيوب , قفزه مكانتش تحلم بيها , وعلى باقي قنواتها اللي ماعليهاش تشويش هتلاقي خبر كل 10 ثواني ( نأسف لتعرض قنواتنا للتشويش بصوره متعمده ) , الخبر شغال 24 ساعه , والتشويش مستمر , ونسبة المشاهده بتزيد والحسابه بتحسب .
.
طب تعالى تاني ومتخافش برضه , من كام شهر لما اتوقف برنامج باسم يوسف على cbc انت بنفسك قلت ده أكيد تعليمات من النظام الفاشي الفاشل الشنقيط ( أهو أي حاجه فيها حرف الشين ) , بعدين ظهر باسم على mbc , قناه بتُبث من مصر على قمر صناعي مصري , وحضرتك وقتها عرفت إن المشكله كانت مع صاحب ال cbc بس كبرياء أهلك منعك من الإعتذار كالعاده .
.
طب تعالى كده ومتخافش برضه , الليله بتاعة الفاشيه دي هيشيلها نظام عدلي منصور أو من الأخر هيشيلها السيسي زي مابيشيل كل حاجه في البلد دي من قبل ما يبقى رئيس , وانا صوتي اتنبح أفهمك إن السيسي ممكن في يوم من الأيام يبقى فاشي فعلا , لكنه مش هيبقى حمار , الحمار بس هو اللي يعمل تشويش أو يوقف برنامج ويهيّج الدنيا عليه , يا راجل حتى الإخوان رغم غبائهم بس فهمو الحكايه دي ومحاولوش يوقفو البرنامج , هما يعني الإخوان كانو بتوع حريه رأي وابداع ؟ .... ولا إيه يا ابراهيم ؟!
.
من الأخر , إبحث عن المستفيد , حضرتك فاهم كويس إن الليله دي بيعملها حد اسمه الشيطان , عايز الدنيا تولع كل شويه , عايز جنازه عشان تشبعو فيها لطم , وكل مره ألاقي أصحابي المثقفين الجامدين التنين بيلطمو فعلا , أصحابي المثقفين طول عمرهم كده , عندَ حُسن ظنِ الشيطان بهم !!.
14 مارس
يوم الجمعه بالنسبالي هنا هو يوم ( النطيحه والمترديه وما أكل السبع ) , الناس أجازات واللي مش بيعرف يطلع يتفسح بييجي يضيع وقته عندي في الصيدليه , من ساعة ما فتحت شوفت بتاع 50 زبون كلهم دخلو يقلّبو في الشامبوهات والكريمات , اللي اشترى منهم حاجه بتاع 10 بالكتير , والباقي بيدخل زي الراجل اللي دخل على عادل إمام في فيلم ( كراكون في الشارع ) و يقول لك ( عَمْ نتفرّج ) , و زي الراجل اللي دخل عليه في أوضته وهو نايم و عايز يعمل زي الناس وكان فعلا هيعمل زي الناس , الله يخرب بيت اللي جابك يابو دومه !!.
14 مارس
توكل لامؤاخذه كرمان : اتضامن مع ابناء قواتنا المسلحة وأدين العملية الارهابية التي تعرضوا لها اليوم من قبل جماعة الحوثي في منطقة همدان، والتي راح ضحيتها شهيدين وعدد من الجرحى، ولا نامت أعين الجبناء.
.
ولما تتكلم عن جيش مصر اللي بيحارب نفس الإرهاب : تقول انقلابيين وسفاحين !!.
.
ربنا يكفينا شر جايزة نوبل و فلوس الجزيره , شوف يا باشا أنا عملت كل حاجه غلط ممكن تتخيلها إلا إني أخد جايزة ولامؤاخذه نوبل , حد الله بينا و بين الحرام , داحنا بنتشعبط في رضا ربنا !!.
13 مارس
بعد انسحاب الفريق سامي عنان من الترشح , كده الإنتخابات الرئاسيه هتنحصر بين 3 مرشحين , عبد الفتاح السيسي و حمدين صباحي وخالد على .
واحد بتاع انضباط وصرامه و واحد بتاع اشتراكيه وحقوق غلابه و واحد بتاع بليله !!.
13 مارس
سامي عنان لقى ان حكاية ( محاولة اغتياله ) دي مالهاش أي صدى والناس كانت بتسمع الخبر كأنها بتسمع خبر ( مشاجرةٌ في نيكاراجوا ) , فقال مابدهاش بقى , أخدها من قصيرها , إنما من ضمن الفولكلور المصري العتيق إن المرشح من دول لما يعلن ترشحه يقول اترشحت عشان خاطر مصر ولما ينسحب يقول انسحبت عشان خاطر مصر هااااااااااااااااح , وانا وما ليكو عليا يمين بكتب البوست ده عشان خاطر مصر وكنت عايز امسحه عشان خاطر مصر , أحبيبتي يا مصر !!.
13 مارس
تعالى نلعب سياسه
.
أوّل مره اشوف الصور دي , أتاري عبد الفتاح السيسي طلع من ورايا في الخباثه ( من غير ما يستأذن حتى ) وضرب ( بالانص ) في دول الخليج , مناورات عسكريه مع الإمارات , صور مع الأمير سلمان ولي العهد السعودي في المناورات , بتخيل شكل العسكري الاماراتي و هو بيسلم على عبد الفتاح السيسي , ممممممم الباشا له شمخه برضه , ده قائد الجيش المصري مش جيش ولا مؤاخذة قطر .
.
طب فين السياسه بقى ؟ , من أد سنتين واحنا بنسب ونلعن في الحكومه القطريه وقناة الجزيره بعد ماتفضحو فضيحة الواد سوكا عند عبد الرحيم على , كنا وقتها كمان بنسب ونلعن الحكومات المصريه على صمتها عن اللي بتعمله قطر , وليه مش نطرد سفيرهم وليه مش نسحب سفيرنا ؟ أهو ده اللي بنفهمه ( على أد تفكيرنا ) , إنما أوراق الضغط مش كده خالص , لو عايز تضرب قطر بالجزمه ماتكلّفش نفسك وتقلع جزمتك وتضربهم بيها عشان هما أتفه من كده , لأ خليهم هما يقلعو جزمتهم و يضربو نفسهم .
.
السعوديه والإمارات عشان ياخدو موقف قوي ويدوسو على الحكومه القطريه كان لازم يكون لهم ضهر وسند , عشان قطر هي الكلب المدلل لأمريكا , و سمعت إن أمريكا كانت ناويه تاخد شقه في ماونتين فيو عشان تعرف تفسّح الكلب القطري فيها , بس على مين ؟ , الحجز اتقفل يا بهوات , المهم بقى , مصر قالت للإمارات جايين لك في مناوره مشتركه , دوسي بقى واحنا وراكي , سندك وضهرك ( الكبير رجع يا بشر ) .
.
طب الكلام ده بيعني ان مصر كده دخلت في صدام مباشر مع أمريكا ( الراعي الرسمي لحمد وموزه ) ؟ , لا طبعا , برضه السياسه مش كده , إنما هي كلها أوراق ضغط وترتيب أولويات ومصالح , أمريكا مفتوح عليها باب اد كده من روسيا ومزنوقه في سوريا ولها تار بايت في ليبيا وغيرهم , ومش بسهوله تصطدم بتحالف مصري سعودي خليجي عشان خاطر عيون كلبها , أمريكا دوله براجماتيه , هترتب ورقها من تاني , مصالحها مع مصر والسعوديه والإمارات أكبر بكتير و أهم من رعاية كلب مدلل , ........ إنتظرو الشلوت الأمريكي لقطر !!.
ليست هناك تعليقات:
إرسال تعليق