13 مارس
بعد انسحاب الفريق سامي عنان من الترشح , كده الإنتخابات الرئاسيه هتنحصر بين 3 مرشحين , عبد الفتاح السيسي و حمدين صباحي وخالد على .
واحد بتاع انضباط وصرامه و واحد بتاع اشتراكيه وحقوق غلابه و واحد بتاع بليله !!.
13 مارس
سامي عنان لقى ان حكاية ( محاولة اغتياله ) دي مالهاش أي صدى والناس كانت بتسمع الخبر كأنها بتسمع خبر ( مشاجرةٌ في نيكاراجوا ) , فقال مابدهاش بقى , أخدها من قصيرها , إنما من ضمن الفولكلور المصري العتيق إن المرشح من دول لما يعلن ترشحه يقول اترشحت عشان خاطر مصر ولما ينسحب يقول انسحبت عشان خاطر مصر هااااااااااااااااح , وانا وما ليكو عليا يمين بكتب البوست ده عشان خاطر مصر وكنت عايز امسحه عشان خاطر مصر , أحبيبتي يا مصر !!.
13 مارس
تعالى نلعب سياسه
.
أوّل مره اشوف الصور دي , أتاري عبد الفتاح السيسي طلع من ورايا في الخباثه ( من غير ما يستأذن حتى ) وضرب ( بالانص ) في دول الخليج , مناورات عسكريه مع الإمارات , صور مع الأمير سلمان ولي العهد السعودي في المناورات , بتخيل شكل العسكري الاماراتي و هو بيسلم على عبد الفتاح السيسي , ممممممم الباشا له شمخه برضه , ده قائد الجيش المصري مش جيش ولا مؤاخذة قطر .
.
طب فين السياسه بقى ؟ , من أد سنتين واحنا بنسب ونلعن في الحكومه القطريه وقناة الجزيره بعد ماتفضحو فضيحة الواد سوكا عند عبد الرحيم على , كنا وقتها كمان بنسب ونلعن الحكومات المصريه على صمتها عن اللي بتعمله قطر , وليه مش نطرد سفيرهم وليه مش نسحب سفيرنا ؟ أهو ده اللي بنفهمه ( على أد تفكيرنا ) , إنما أوراق الضغط مش كده خالص , لو عايز تضرب قطر بالجزمه ماتكلّفش نفسك وتقلع جزمتك وتضربهم بيها عشان هما أتفه من كده , لأ خليهم هما يقلعو جزمتهم و يضربو نفسهم .
.
السعوديه والإمارات عشان ياخدو موقف قوي ويدوسو على الحكومه القطريه كان لازم يكون لهم ضهر وسند , عشان قطر هي الكلب المدلل لأمريكا , و سمعت إن أمريكا كانت ناويه تاخد شقه في ماونتين فيو عشان تعرف تفسّح الكلب القطري فيها , بس على مين ؟ , الحجز اتقفل يا بهوات , المهم بقى , مصر قالت للإمارات جايين لك في مناوره مشتركه , دوسي بقى واحنا وراكي , سندك وضهرك ( الكبير رجع يا بشر ) .
.
طب الكلام ده بيعني ان مصر كده دخلت في صدام مباشر مع أمريكا ( الراعي الرسمي لحمد وموزه ) ؟ , لا طبعا , برضه السياسه مش كده , إنما هي كلها أوراق ضغط وترتيب أولويات ومصالح , أمريكا مفتوح عليها باب اد كده من روسيا ومزنوقه في سوريا ولها تار بايت في ليبيا وغيرهم , ومش بسهوله تصطدم بتحالف مصري سعودي خليجي عشان خاطر عيون كلبها , أمريكا دوله براجماتيه , هترتب ورقها من تاني , مصالحها مع مصر والسعوديه والإمارات أكبر بكتير و أهم من رعاية كلب مدلل , ........ إنتظرو الشلوت الأمريكي لقطر !!.
12 مارس
حلم حياتي
.
بحلم إني أطلع في برنامج توك شو من البرامج الكتير المرطرطه في قنواتنا الفضائيه و يكون المذيع هو خيري رمضان ( عشان بكرهه لله في لله ) , في اليوم ده أنا اكون مش عامل حسابي وخدوني فجأه من البيت , فكنت لابس ترينيج وشبشب جلد من ابو 20 جنيه , ولما أدخل الإستوديو اتفاجئ إني مش الضيف الوحيد في البرنامح , ألافي فيه 4 غيري , وفريق الإعداد يقول لي إن موضوع الحلقه هو ( أثر الديموقراطيه على ساندوتشات الحلاوه بالقشطه ) .
.
أدخل أنا بقى الاستوديو ويكون ترتيبي في الكلام هو رقم 5 يعني أخر واحد ............ يبدأ البرنامج مع ابتسامه ( سمجه وصفرا ) من خيري رمضان
.
يتكلم أول ضيف ( ياسر برهامي ) : الحمد لله والصلاة والسلام على رسول الله , في الحقيقه يا أخ خيري إن الديموقراطيه كُفرٌ بواح و شرٌ و راح !! , واحنا في مصر شعب يسعى إلى الديموقراطيه لأنه شعب يبحث عن الشيطان والكفر كما تبحث الأم عن رضيعها المفقود .
.
يتكلم تاني ضيف ( ابن خيرت الشاطر ) : بسم الله الرحمن الرحيم , في الحقيقه أنا لا أرى أي داعي لوجودنا هنا حاليا للحديث عن الديموقراطيه , فلا ديموقراطيه في مصر قبل عودة الشرعيه الممثله في فخامة الرئيس محمد مرسي ,ثم ماذا ننتظر من شعب من الراقصات والعاهرات وعابدي البياده ؟!.
.
يتكلم تالت ضيف ( عمرو حمزاوي ) : اسمح لي استاذ خيري قبل الحديث عن الديموقراطيه ان أعرج قليلا إلى الوضع الذي وصلنا اليه , فلا يمكن بأي حال الحديث عن الديموقراطيه بمنأى ومعزل عن رؤية الصوره الكامله , وحقيقة الأمر لست متفائل بما نحن مقبلين عليه في الأيام القليله القادمه خصوصا وقد ادركنا جميعا صعوبة تطبيق العمليه الديموقراطيه في شعب يغلب عليه الفقر والجهل .
.
يتكلم الضيف الرابع ( علاء عبد الفتاح ) : ديموقراطية ايه يا ش**اميط , يا ولاد الو*** , ده منظر شعب يتعمل له ديموقراطيه يا ولاد المره التييييييييييييييييييييييت ؟!
.
وييجي بقى الدور عليا , يبص لي خيري رمضان ويبتسم ابتسامه اكثر سماجه : ورأي حضرتك ايه دكتور محمد ؟ أقوم انا قايم من عالكرسي وقالع الشبشب اللي جاي بيه , أمسك فرده منه أنسّلها على روس الضيوف الأربعه , واخلّي الفرده التانيه مخصوص لخيري رمضان نفسه ( ده الغالي ابن الغالي ) ................... يارب حقق حلمي بقى .
12 مارس
بقى الراجل الصعيدي لما ابنه عسكري الجيش يستشهد و يجيله جثه في صندوق يقوم هو يمنع مراته واهل بيته من البكا والصريخ ويقول للظابط لو ينفع اروح مكانه خدوني , والعيال السيكي ميكي اللي بتسقّط البنطلون على وسطها عايزه تتنازل عن جنسيتها............ وفي الأخر تسألني انت مع مين في دول ؟ عايزني اتفهم موقف السيكي ميكي واسب والعن في عساكر الجيش ؟! .ليه بس يابني ؟ يعني لازم ابقى خو.....اجه عشان تحس اني ناشط سياسي وحقوقي ؟!.
12 مارس · تم التعديل
ألف مبروك يا ولاد , انتخابات الرئاسه هتتأجل كام شهر بقى قول سنه ولا اتنين زي ما تقول قول , المرشحين للرئاسه وقيادات المجتمع ولامؤاخذه المدني هيجتمعو النهارده مع عدلي منصور ويطلبو كده ...ألف ألف مبروك للساده النشطاء وابقو حنّو كعوب رجليكو بقى ( بلاش الكلمه التانيه ) .
.
بالمناسبه , صدّق أو لا تصدق , الموضوع مالوش علاقه بدستوريه القانون ولا له علاقه بالمنافسه الشريقه و حق المرشح في التقاضي و الهجايص دي كلها , الحكايه باختصار إن كل مرشحي الرئاسه بما فيهم حمدين ( اللي بحبه وانتخبته قبل كده ) غرضهم التأجيل لشهور لعل وعسى السيسي يموت ولا يفطس ولا تجي له شوطه تاخده ( يعني من باب تأجيل القضاء والقدر ) , وابقى سلّم لي على استقرارك ياسمعيل بيه ........ زتون زتون , نضال نضال مافيش كلام .
12 مارس · تم التعديل
ألف مبروك يا ولاد , انتخابات الرئاسه هتتأجل كام شهر بقى قول سنه ولا اتنين زي ما تقول قول , المرشحين للرئاسه وقيادات المجتمع ولامؤاخذه المدني هيجتمعو النهارده مع عدلي منصور ويطلبو كده ...ألف ألف مبروك للساده النشطاء وابقو حنّو كعوب رجليكو بقى ( بلاش الكلمه التانيه ) .
.
بالمناسبه , صدّق أو لا تصدق , الموضوع مالوش علاقه بدستوريه القانون ولا له علاقه بالمنافسه الشريقه و حق المرشح في التقاضي و الهجايص دي كلها , الحكايه باختصار إن كل مرشحي الرئاسه بما فيهم حمدين ( اللي بحبه وانتخبته قبل كده ) غرضهم التأجيل لشهور لعل وعسى السيسي يموت ولا يفطس ولا تجي له شوطه تاخده ( يعني من باب تأجيل القضاء والقدر ) , وابقى سلّم لي على استقرارك ياسمعيل بيه ........ زتون زتون , نضال نضال مافيش كلام .
12 مارس
عم مصطفى وعمك الحاج محمود
.
عم مصطفى هو الراجل اللي شغال في الجراش اللي بركن فيه في عين شمس , راجل صعيدي في الأربعينات , متجوز وعنده 4 عيال فوق راس بعض ( والله مانا فاكر 4 ولا خمسه ) , هو ومراته وعياله عايشين في أوضه مترين في مترين في مدخل الجراش على الشمال , بياخد من صاحب الجراش 500 جنيه في الشهر ويلقّط رزقه بقى , يعني يمسحلك العربيه , يغسلها , تديله جوز جنيهات , 5 جنيه , وكده يعني .
مره دخلت الجراش وكانت الساعه 11 بالليل , لقيت باب الأوضه مفتوح ولمحت بطرف عيني عم مصطفى قاعد جوه , قلت سلامو عليكو يا عم مصطفى ماردش , دخلت وركنت العربيه وحطيت المفتاح في العلبه وناديت عليه سلامو عليكو يا عم مصطفى , ماردش , الله ؟ انا شايفه قاعد وبياكل وماسك لقمة العيش في إيده , علّيت صوتي أوي , لقيته اتفزع , عليكم السلام يا دكتور , ازيك يا باشا والله ماخدت بالي , لا مؤاخذه نمت وانا باكل !!.
متخيل حضرتك المشهد ؟ راجل من تعبه طول النهار قعد يتعشى ورفع اللقمه على بؤه وقبل ما توصل اللقمه كان نام من التعب والهدّه !! .
.
عم الحاج محمود راجل بلدياتنا , من يوم ما وعيت عالدنيا وانا بشوفه بيشتغل بالاجره عند الناس , ماهو متجوز وعنده عيال , وماعندوش أرض ولا وظيفه ولا معاش , كل يومين تلاته يلاقي له ( سرحه ) , مرّه يضم رز ب 5 جنيه , مرّه يشيل حطب , مره يجمع قطن ب 2 جنيه واهي ماشيه .
لما كنت انا عيل عمري 7 سنين كان هو عمره 30 سنه ...نزلت الأجازه اللي فاتت وهو بقى عمره 60 سنه ولسه بيشتغل عند الناس بالأجره , عياله كبرو واتعلمو ما شاء الله بس رافض حتى مساعدتهم , تقابله تلاقيه دايما مبتسم , لا عمره اشتكى ولا قال جاي .
.
مجرد فكره جت على بالي , بتخيل اني قلت لعم مصطفى أو عم محمود إيه رأيكو ان مصر دي بلد بنت تيييييييت وانتو اتبهدلتو اوي فيها , ايه رأيكو تتنازلو عن الجنسيه المصريه ؟!
ليست هناك تعليقات:
إرسال تعليق