1 أبريل
للناس اللي عايزه تعمل توكيلات للسيسي لازم تعرفو الإسم الصح عشان التوكيلات مش تبقى باطله , اسمه بالكامل :عبد الفتاح سعيد حسين خليل السيسي ..
.
والناس اللي عايزه تعمل توكيلات لحمدين لازم برضو تعرفو الإسم الصح , اسمه : حمدين السيد ابراهيم علي محمد فايق جورج اسماعيل صبّاحي ( ماتنساش الشدّه اللي على حرف الباء ) .
.
انا قلت لكو أهو وربنا يقدرني على فعل الخير .
1 أبريل
اشاعات ماليه الفيس , منها تقريبا الخبر اللي انا نشرته من شويه بتاع هاله شكر الله , بعتذر عن الخبر لو مكانشي حقيقي , وخبر تاني بيقول إن الحكومه النهارده ولا بكره ماعرفش هتعمل اتفاقيه صلح مع الجماعه الإرهابيه وهتخرج القيادات من السجون , وعشان تعرف إني مش بطبل لحد ولا بعمل تماثيل عجوه و اعبدها , لو حصل والحكومه اتصالحت مع الجماعه الإرهابيه وخرجت قياداتهم الإرهابيين من السجون هبقى أول واحد في صفوف المعارضه , المعارضه للسيسي ولمحلب و للكل كليله , مش مهم ساعتها انضم لحزب معارض , مصر مفهاش احزاب , مصر فيها شلل اطفال سياسي و أغلب قيادات المعارضه عباره عن شوية أطفال معاقين .
1 أبريل
دعوتي المفضله
.
اللهم اكرمنا بدعوة الأيتام واحفظنا بفضلك من شر اللئام و من شر جايزة نوبل للسلام !!.
1 أبريل
بتوع الروبابيكيا
.
1- واحد مرشح للرئاسه سألوه : عندك برنامج انتخابي ؟ قال لهم عندي بس مش هقول لكو عليه ( مش عارف طلّع لسانه في اللحظه دي ولا لأ ؟) , ما هما ولاد الصرمه اللي كتبو الدستور الأخير ماكتبوش ماده في الدستور بتقول ( يشترط ألا يكون المرشح للرئاسه ابن كلب أهبل !! ) .
الموقف ده بيفكرني بطفل عمره 3 سنين ونص و راح لإليسا وقال لها عايز اتجوزك , إليسا قالت له ( إنت عندك مشروع انتخابي كبير ؟ ) قال لها عندي , قالت له وعارف هتعمل ايه بعد ما نكتب الكتاب ؟ قال لها يووووووه دانا هسوّي الهوايل بس مش هقولك هعمل ايه عشان مش تتخضي , هع هع هع والنبي انا كمان عارف انت هتعمل ايه يا موكوس !!.
.
2- بكره نلاقي مرشح للرئاسه تسأله عندك مشروع انتخابي ؟ يقولك ماعنديش وهو عنده جوه !!.
.
3- وذكرت وكالات الأنباء العالميه إن ناظر مدرسه عالمعاش اترشح للرئاسه في مصر من يومين واعلن انسحابه امبارح لأن الإنتخابات تجري في أجواء غير ديموقراطيه وغير نزيهه , وهوبااااااااا بقى , بقت الموضه الأيام دي بتوع الروبابيكيا يعلنو ترشحهم للرئاسه وبعد يومين ينسحبو ويقولو أصل الإنتخابات هتتزور واحنا خايفين على نزيهه , والجزيره تصور و سي ان ان تنقل الحدث التاريخي ( انسحاب بتاع الروبابيكا من الترشح للرئاسه ) والواشنطن بوست تكتب تقاريرها
.............. يا بتوع الروبابيكيا العيب مش عليكو , سَبَقكُم إليها المناضل خالد على بتاع أصوات كفر غنّام !!.
1 أبريل
تاريخ بيعيد نفسه بغباوه و ذاكره ماشيه على حل شعرها .
.
- المعلم ( عاذر ) صاحب الشقه اللي اشتريتها في مصر من 8 سنين واتجوزت فيها , كل اجازه بروح مشوار أبص عالشقه وارجع و دي أخر علاقتي بيها , المهم المعلم عاذر عنده محل ادوات كهربائيه في نفس الشارع ال 5 متر اللي فيه الشقه , وكل سنه وانا رايح ابص عليها ألاقيه قاعد قدام المحل على كرسي بلاستيك أحمر وقدامه الشيشه وراكن عربيته قدام المحل قافل بيها الشارع , أقوم أعدّي أنا بصعوبه جدا وافتح ازاز العربيه واقول له ( سلامو عليكو يا معلم عاذر ) , يقوم هو يشيل ال ( لي ) بتاع الشيشه من بؤه ويبص لي بتأمل ويقول عليكم السلام وهو مش عارف مين اللي عدّى ده ؟ , كل سنه اروح الاقيه هو والكرسي والشيشه وال( لي ) والعربيه في نفس الوضعيه ...يشيل ال( لي ) ويبص لي ويقول عليكم السلام , هو مين اللي عدّى ده ؟ الحكايه دي اتكررت 7 مرات ..........التاريخ بيعيد نفسه بغباوه , والأرض شكلها كرويةٌ فعلا بتلف حول نفسها وحول المعلم عاذر .
.
- كل مره نزلت فيها أجازه بنزل بري بالعربيه ماعدا أول مره , يعني نزلت بري 8 مرات , وفي كل مره أوصل مدينة حايل ويبقى باقي لي بتاع 700 كيلو عالمينا , المهم في حايل بتوه وبدخل جوه المدينه وماعرفشي الطريق بتاع تبوك منين وبعد مالف جوه المدينه شويه واخد مخالفة سرعه عند اشاره معينه ألاقي بنزينه أركن فيها واسأل العامل هو طريق تبوك منين , يقولي هتمشي 150 كيلو في الإتجاه ده وبعدها هتلاقي كبري ادخل من عليه يمين كمان 500 كيلو لحد تبوك , كل مره يتكرر نفس المشهد , اوصل حايل واتوه واخد مخالفه واقف في نفس البنزينه واسأل نفس العامل ويقولي نفس الإجابه .... , تاريخ بيعيد نفسه بغباوه , مش قلت لكو الأرض كروية تلف حول نفسها وحول الواد البنغالي بتاع البنزينه ؟!.
.
ماهو أنا أصلي ذاكرتي ضعيفه وبتخوني كتير , واللي قابلينا قالو اللي ذاكرته بتخونه لازم يطخها عيارين ويغسل عاره بيده , ماهو كله إلا الخيانه , يا نهار بمبي , دانا ذاكرتي بتخوني من ساعة ما بقى عمري 12 سنه , يعني من ربع قرن , دي ذاكره ماشيه على حل شعرها بقى , حقي إني أسمي ذاكرتي ( فايزه ) , و قشطه يا فايزه لما بتبقى عايزه .
.
وبما إن التاريخ بيعيد نفسه بغباوه وبما إن ذاكرة أغلب الشعب المصري هي من طراز ( فايزه اللي عايزه ) فمش بعيد أبدا ألاقي الإخوان فازو بانتخابات البرلمان اللي جاي , والاقي راجل غلبان كده يقول لي يا أخي ( انتخب الجماعة دول ناس بتوع ربنا !! ) , والله مانا عارف هي ذاكرتي اللي بتخوني واسمها فايزه والإخوان بتوع ربنا ولا أنا ذاكرتي هي اللي بتاعة ربنا والجماعه هي اللي بتخوني واسمها فايزه
31 مارس
رغم المحاولات المضنيه اللي بشوفها عالفيس , فكّرت إني غالبا هنتخب السيسي بس ماعرفتش أكره حمدين , هوزّع شربات لو السيسي نجح و برضه هوزع شربات لو حمدين نجح , هو انا كده مريض ومحتاج اتعالج ؟ أنا بقيت حاسس إني حد مش طبيعي .
31 مارس
بيقولو إن رئيس اللجنه العليا للإنتخابات هيرفض استلام التوكيلات اللي جمعها انصار السيسي النهارده , لأنها مش تكفي لقبول أوراق ترشح عبد الفتاح السيسي , لأ دي تكفي لإعلان فوزه بالإنتخابات أساسا .
31 مارس
دخلت عليّا الصيدليه , ضحكت ضحكه بلهاء وقالت لي ( تدري ؟ أنا مابحب أطرّش لك حد من الولاد عشان الأغراض عندكو ناقصه !! ) يعني مش بحب ابعتلك حد , وفي الأخر سألتني على فيكس أبو 4 ريال !!
ممممممم وانا والله كان نفسي انتي كمان ماتطرّشيش عندي في الصيدليه , و بناقص ال 4 ريال بتوعك .
توب علينا يارب , يعني بدل ما تدخل عليا نانسي عجرم اللي بتلاعب الكاكولا بأرنوبة مناخيرها , يقوم ربنا يبعت لي عبايه فاضيه ولسانها طويل كمان ؟!.
31 مارس
أصحابي عالفيس كتير منهم بقى حاطط صورة الفريق أول صدقي صبحي على بروفايله , الراجل اتحوّل لنجم في خلال يومين تلاته من توليه منصب وزير الدفاع , دي حاجه في جيناتنا وطبعنا , ماهي مصر دي أكتر دوله في تاريخ البشريه دخلت في حروب , كلها كان دفاع عن الأرض والعرض , مش عيب أبدا إن وزير الدفاع اللي هو قائد الجيش تكون له مكانه خاصه في قلوب الناس , أنا شخصيا في أوقات كتير بشوف إن منصب وزير الدفاع في مصر أهم وأخطر من منصب رئيس الجمهوريه .
.
أمر الله بقى , وضعنا الجغرافي في منتصف الكره الأرضيه , و قناة السويس اللي بتتحكم في جزء كبير جدا من حركة التجاره العالميه وجيرتنا للكيان الصهيوني ( ربنا يريحنا منه ) بيخلونا في حالة حرب مستمره , لو مش عايزيني أحط وزير الدفاع في مكانة تليق بيه هاتو 4 صعايده يشيلو مصر هيله بيله كده ويحطوها عند البرازيل مثلا , الدنيا هناك بيييييييس peace خالص وسو كيوت , وساعتها هحط على بروفايلي صورة وزير البيئه !!.
31 مارس ·
الإقامه بتاعتي ضاعت , بدوّر عليها بقالي 6 ساعات ومش لاقيها ( في سيتتتتتتتت ساعات ) , إفتكرت الناس وهما بيقولو سمّي انت بس وهي هتظهر لوحدها , قعدت أسمّي وادوّر واسمّي وادور واسمّي وادور ومش لاقيها , بس حلوه حكاية هتظهر لوحدها دي , هو انا ضايع مني سحليه ؟!·
31 مارس
قارئة الفنجان
.
ممكن تختصر حال الوطن العربي كله بسؤال بطريقة ال m.c.q السؤال بيقول باختصار : ضع علامة ( صح ) أمام الإجابه الصحيحه وعلامة x أمام الحاصلين على جائزة نوبل للسلام !!.
.
وعلى سيرة الإسلاميين أو اليمين المتطرف الكيوت , أنا شخصيا كمسلم واسمي محمد شايف إن العلاقه الوحيده بين أردوغان وبين المشروع الإسلامي هي إن مراته محجبه ومش بتسلم على رجاله ...... غير كده هتلاقي مولانا أردغ قالب تركيا ( أردغانه أو أردوغانه ) بس بخلفيه إسلاميه ...أهم حاجه الخلفيه , ماهو أصلك جاهل في الدين وماتعرفشي الخبراء والمثمّنين بيقدرو خلفية كيم أردوغان قصدي كيم كارديشان بكام ؟!!.
.
أما الإسلاميين في مصر فهم أسعد حظا , هيقتلوك ويمثّلو بجثتك وبعدين يدخلو في حوار مجتمعي حوالين جثتك عن ( رأي الدين في تعذيب القتيل ) , بعدها بشويه هتلاقي مليون مصري ألحد واتنين مش مسلمين اعتنقو الإسلام , يقومو هما بقى يجيبو الإتنين اللي أسلمو دول ويطلعوهم في الجزيره وينسبو الفضل في كده لمولانا أوباما خليفة المسلمين , عرفت بقى إن الأرض كرويةٌ تلفُ حول نفسها ؟! .
.
ملحوظه : هذا البوست خالي من الدسم , خالي من الشوائب , خالي من خالد علي , وانا خالي من المنصوره .
30 مارس
القاضي حكم بالإعدام على فضيلة الشيخ التقي الورع اللي كان بيرمي الأطفال من فوق سطح العماره في اسكندريه .
أوّل حاجه لازم تعرفوها يا ولاد إن الحيوان ده لما يتعدم هيتقال عليه شهيد من الإخوان وانصارهم وتوكل كرمان والأشكال دي ( فضيلة الشيخ التقي الورع الحيوان الشهيد ) , تاني حاجه إن النشطاء والنحانيح المفروض ينزلو بحملة لمهاجمة حكم القاضي العنيف القاسي و يتعاطفو مع فضيلة الشيخ الحيوان الشهيد , تالت حاجه بيان من الخارجيه الأمريكيه والإتحاد الأوروبي والإتحاد الأفريقي والإتحاد السكندري بيدين حكم القاضي ويشجبه .......
.
هما 3 خظوات مفيش غيرهم وبيتكررو كل مره , عرفتو بقى إن السياسه أسهل من شكة الدبوس ؟!.
30 مارس
فقط في مصر
.
مَن ماتْ و هو يتظاهر سلميا بصدر مفتوح فهو شهيد ومن مات و هو بيأمّن حدودك وواقف خدمه بالسلاح فهو شهيد , ومن مات وهو بيحرق الجامعه فهو شهيد ومن مات في حادثة موتوسيكل فهو شهيد , ومن مات على سريره بأزمه قلبيه فهو شهيد ومن مات في خناقه بين العبايده والدهاشمه فهو شهيد , ومن مات في خناقه عالبت نوسه المزّه فهو شهيد , ومن مات بجرعة حشيش كبيره أو كان بلع 4 حبيات فياجرا مع بعض فهو شهيد ........... لازم المستشفيات والمصالح الحكوميه في مصر يواكبو العصر و الحدث و يسيبو دفتر المواليد بنفس الإسم إنما يغيرو دفتر الوفيات ويسموه دفتر الشهداء !!.
................ اذكرو ( محاسن ) شهدائكم !!.
30 مارس
توكل كرمان : ،انا فخورة بالجماعة الاسلامية في مصر , فخوره بدورها في الكفاح السلمي العظيم من اجل الحرية في مصر !!.
.
والبرادعي من يوم ماستقال وهو بيدعو للمصالحه مع الجماعه الإرهابيه , ومش بعيد يكون هو كمان فخور , والله تلاقيه فخور بالإخوان , إنت فخور يا برادعي ؟! .
.
......... أحمد بدير في مسرحية ريا وسكينه ( أهاا... أنيي إتقلّبت , نايم جنب مرتي ولا في مؤسسة نوبل للسلام ؟!!.
30 مارس
حوار مع مرشح رئاسي
.
المذيعه : ومعانا أحد المرشحين لرئاسه مصر , نتعرف بحضرتك
المرشح : محسوبك عطوه المفك , كهربائي سابقا ومرشح رئاسي حاليا
.
المذيعه : تشرفنا بيك أخ عطوه
المرشح : أهلا بيكي يا مزه
.
المذيعه : ممكن تقول لنا أخ عطوه ايه سبب ترشحك للرئاسه ؟
عطوه : والله انا لقيت ان شغلانة الرئاسه دي حلوه وفيها قرشين معقولين و لو مانجحتش يعني هبقى عملت لنفسي شويه شهره عشان لما ارجع اشتغل كهربائي الناس يطلبوني بالإسم ( يقولو عايزين عطوه الكهربائي مرشح الرئاسه السابق )
.
المذيعه : فكره حلوه يا أخ عطوه , قولي إنت عارف مصر عدد سكانها كام ؟
عطوه : يوووووووه كتير ما تعديش
.
المذيعه : طب مساحتها أد إيه ؟
عطوه : دي كبيره يامه
.
المذيعه : طب تاريخها كام سنه ؟
عطوه : كتييييييير أوي , ييجي مليون سنه واكتر
.
المذيعه : واكتر ؟
عطوه : أه , أومال انتي فاكره ايه ؟
.
المذيعه : طب ايه هو برنامجك الإقتصادي ؟
عطوه : بصي حضرتك أنا برنامجي بيقوم على 4 محاور في حين إن برنامج السيسي بيقوم على 3 محاور بس , يعني أنا 4 فاز وهو 3 فاز , يبقى مين أفضل ؟
.
المذيعه : طب انت عايش لوحدك يا عطوه ؟ مش شايفه حد في البيت يعني ؟
عطوه : لأ عايش مع أبويا وامي ومراتي , بس أبويا وامي رجعو البلد عشان زعلانين مني وهينتخبو السيسي ومراتي غضبانه في بيت أبوها وهتنتخب السيسي .
.
المذيعه : طب تحب تقول ايه لأنصارك ؟
عطوه : أحب أقول لأنصاري واصحابي الحدادين ونجارين النابوليا والبوابين والنشطاء السياسيين انتخبو مرشحكم عطوه المفك ومش هتندمو , إنما ماقولتليش انتي هتنتخبي مين يا مزه ؟
.
المذيعه : هنتخب السيسي ... وانت هتنتخب مين يا عطوه ؟
عطوه : هنتخب السيسي طبعا !!.
ليست هناك تعليقات:
إرسال تعليق