منوع

عصام العريان يتألق من جديد : لو أن جبهة الإنقاذ اتقت الله فسوف يجلب لنا سد النهضه الخير كله !! , ........... أنا أول مره أعرف إن الجفاف بيجيب خير , طول عمري فاكر إن الجفاف بيجيب محلول , وعلى كده الزمالك أحق بتلتين البطولات اللي اخدها الأهلي مؤخرا ...عشان الزمالك بقاله 10 سنين عنده جفاف في إحراز الأهداف .
يعني الضلمه بتجيب سكينه وجفاف النيل هيجيب الخير ؟! ...هو ده بقى مشروعكو يا ولاد سكينه الجافه ؟!!.

.

.

وبما أني نازل أجازه قريب عايز أقول شهاده للزمن , معجزه إلهيه شفتها بعيني :
.
بقى يا سيدي في كوكب السعوديه , لما حضرتك بتدوس على زرار الكهربا بتلاقي اللمبه بتنور ولما بتفتح الحنفيه بتلاقي حاجه كده بتنزل بيسموها مايه , أه والله العظيم , أنا عارف إنك مش مصدقني , ولك حق متصدقشي , أنا في الأول مكنتش مصدق , مكنتش أعرف إن العلم اتقدم للدرجادي , إنما أؤكد لك إن الكلام ده حصل وانا شفته بعيني وعندي الرابط كمان !!.
تعرف حضرتك إني قبل كل أجازه بنزلها كنت بركز أوي في شراء البارفانات , جيفينشي بقى وأورجانزا , وحاجه دلع كده يا جناب العمده , وعبايات صيفي وفالنات وشرابات , إنما أقسم بعزة جلال الله السنه دي وبسبب أم النهضه الخرفاني هشتري ماكنة كهربا وكشافات كهربا كتير عشان شقة القاهره وشقة البلد , ومراتي امبارح اشترت 5 دست شمع عشان النور بيقطع ( مش ندر للسيده ولا هنولعهم في الكنيسه ) , وموصي الواد أخويا على كام لمبه جاز وكلوبين من أبو رتينه , ............................................................................سؤالي بقى لأبطال معركة اللمون , بلال فضل وأمثاله وعلى طريقة الشاويش عطيه الله يرحمه
........... ( إنت وقعت ولا الهوا رماك ؟...............يابن الرفضي ) !!.

.

.

صباح الخير , حقيقي صدق الله قال , احنا متصنفين عالم تالت عشان سيادتك مفيش عالم رابع , كلام منطقي أوي , وماذا فعل نابليون بعد أن حط رجله اليمين في مصر ؟ أكيد يكون حط رجله الشمال , سهله يعني , والراجل بلدياتنا لما بينام مع مراته مش بيبوسها عشان بيبقى ماسك الجلابيه في بؤه , هيبوسها إزاي ؟ ونتصنف إحنا ايه غير عالم تالت , يعني أخر حاجه .............وليس بعد الكفر ذنب.

لما يكون عندك رئيس بيهلفط في الكلام زي اللي واخد حقنة بنج ووراه عوالم أمثال علاء صادق بيقولو الله عليك يا ريس وعلى بلاغتك وحكمتك وفلسفتك يبقى ايه ؟ دي مصر فيها ناس كانت متخيله إن ليلى علوي ريالتها أحلى من الكاكولا , تبقى عالم تلاتشر ولا لأ ؟!
إنما مشكلتنا مش في اللغه والبلاغه والفكر والفلسفه اللي اندهسو واتفعصو بين شفايف مرسي ( اللي بيريل كاكولا ) وصاجات علاء صادق ( اللي غاوي الكاكولا ) , ولا مشكلتنا في البلد اللي بتتباع وخلال سنتين تلاته تحت حكم الخرفان هتعلن الأمم المتحده إن مصر محميه طبيعيه مغلقه بها أنواع نادره من القرود والشمبانزي وطائر النهضه , ولا دي كمان المشكله .
المشكله العويصه سيادتك في الإجابه على السؤال ده : إيه رأي جناب معالي فضيلتك في ثورة يناير ؟ شوفت السؤال سهل إزاي ؟ جاوب بقى يا فالح , الحق والحق أقول أنا وانت هنقول إجابه نموذجيه ( زي بتاعة التقديم في السفاره الأمريكيه كده ) , هنقول حاجه عظيمه أوي خالص أخر حاجه , لكن من جوه قلبنا بنلعن جدود أبو اللي خلفوها والحقيقه يعني المفروض تكون إجابتنا كده ( حاجه عظيمه أوي يلعن جدود أبو اللي خلفوها ) بالظبط زي ما بنقول إحنا شعب متدين بطبعه ولا شعب ابن صرمه ؟ والإجابه إحنا شعب ابن صرمه متدين بطبعه !!.
إنزلو يا ساده في الليله الكبيره 30/06 , أنزلو بس عشان تعرفو تجاوبو عالسؤال وتقولو رأيكو في ثورة يناير بعد كده !!.

.

.

أصعب إحساس بقى إنك تبقى خلصت شغلك وبتقفّل وتلم عزالك و منهك وعايز تروّح بيتكو ويدخل عيك زبون بيشتغل ( حلاق ) , على فكره اكتشفت من خبرتي في الغربه إن مفيش فرق بين الحلاق المصري والحلاق الهندي والجرّاح البريطاني ! , تقريبا الرغي واللوكلوك دي من أمراض المهنه !!.

.

.إوعى تصدق إن الجماعه الإسلاميه هتفتح باب الجهاد ضد أثيوبيا في حال فشل المفاوضات زي ما بتقول , يا سيدي بنات أثيوبيا غير بنات سوريا , الإثيوبيات معصعصين وجلد على عضم , ومبيقولوش يعطيك العافيه.... ولا يجيدون الرقص الشرقي والعياذ بالله !!.

.

.بوست للعقلاء فقط ( عبدة الأصنام يمتنعون ) !!.

.
لو حضرتك أطلقت يد شيخ سلفنجي في الشارع وقلت له طبق شرع ربنا ( اللي تعرفه ) , هيمشي مولاك الشيخ السلفنجي في الشارع , ويشمشم على أي بنت كاشفه شعرها ويروح ينصحها وإذا رفضت النصيحه يضربها بالكرباج ( السوط ).
طيب يا مولانا الشيخ , لو كنت ماشي في الشارع في اسكندريه مثلا ولقيت واحد بيقول لمراته في التليفون ( أيوه يا حبيبتي أنا في مأموريه تبع الشغل في أسيوط ) هتعمل ايه ؟ الراجل ده بيكدب أكيد , والمسلم لا يكذب بنص حديث رسول الله , هتنصحه وتضربه بالكرباج ؟ طبعا لأ , ليه يا شيخ ؟ أصل دي حريه شخصيه وربنا هيحاسيه ! , يا سلام ماهو الحجاب حريه شخصيه وربنا اللي هيحاسب عليه برضه ! , لا بس البنت اللي كاشفه شعرها ممكن تغوي ال7 رجاله اللي هتقابلهم في الشارع و احتمال تقع الرذيله , طيب ماهما الإخوان بكدبهم أغو 12 مليون شخص ووقعت البلد باللي فيها !!
.
طيب سؤال لمولانا الحمار المتدين , هي مشكلة مسيلمه الكذاب إنه كان كاشف شعره ومتبرفن ؟!
طيب حضرتك تعتقد إن المسيخ الدجال هينزل يغوي الناس بكدبه ولا عشان فاتح البلوزه ومبين حته من صدره ؟!!
.
الخلاصه بقى يا ساده : هنفضل كده , أحط شعوب الأرض طول ماحنا بنكدب ونسرق ونقتل ونغتاب ونغتصب ونقذف محصنات ومشكلتنا الوحيده هي شعر المرأه وصباع رجليها الصغير !!.

.

.

إلا غاده عبد الرازق بقى !!
.
وعشان تعرف يعني باختصار , أهم 10 معالم يعرفها العرب عن مصر ويحسدوهم عليها هما من غير ترتيب كده ( السد العالي , الأوبرا , قناة السويس , السينما , الأثار , الأزهر , معرض القاهره الدولي للكتاب , المخابرات المصريه , وغاده عبد الرازق !! ).
.
ستك موزه وجوزها عندهم عقدة النقص الأبديه وعبد الناصر مربي لهم الخفيف حتى بعد ما مات ب نص قرن, وستك وستهم أمريكا عارفه الحكايه دي فقالت بقى خير الشر عاجله , مفيش أحسن من الحكومه القطريه ونستغل الطفل المعجزه أبو كرش في تحقيق حلمه الوهمي :............ شوف حضرتك كده
.
السد العالي : مش هيبقى له أي لزمه بعد بناء سد النهضه , والكهربا هتقل منه 40 % ومستقبله هيكون إما التدمير إذا انهار سد النهضه أو هيتحول لمجرد كوبري للمشاه والحبيبه ...ابحث عن قطر والصهاينه في إثيوبيا !!.
.
الأوبرا : حلفاء قطر في الداخل غيرو رئيسها وجابو خروف من عندهم وبيحرقوها حاليا , وقطر بتخطط لإنشاء أكبر دار أوبرا في العالم !!.
.
السينما : من كام سنه حاولت قطر تشتري ذاكرة السينما المصريه , النسخ الأصليه من الكذا ألف فيلم اللي انتجتهم مصر في تاريخها !!.
.
قناة السويس : مشروع الخرفان في الداخل هو تسليم مفاتيح القناه للمندوب السامي القطري وعزل محور القناه عن مصر .
.
الأثار : راجع تصريحات مرسي عن ال200 مليار اللي كان بيقول هيجيبهم وعرض قطر لتأجير الأثار المصريه .
.
الأزهر : عملاء قطر في الداخل قايمين بالواجب لدرجة إنهم جابو نجاد ( الحليف الحلوف لحمد ) ودخلوه الأزهر في ظاهره محصلتش من 40 سنه تقريبا !!.
.
معرض القاهره الدولي للكتاب : كانو فارشين قدامه بأزايز ( بول البعير ) , وعارضين كتب حسن البنا في الداخل على أساس إنه مفكر يعني , وبكره يتحول لمعرض القاهره الدوالي للزرايب !!.
.
المخابرات المصريه : أهانوها جدا بمسرحية خطف الجنود ودلوأتي شغاله عقبال أملتك في مطبخ الأزهر بتخرط البصل !!
.
إنما لو عايز الشعب المصري يثور يعني على الحكم الخرفاني القطري الصهيوني قول لهم قطر تخطط للإستحواذ على .........................غاده عبد الرازق !!!.

.

.

مصر بين التنتن والتنتن !!
.
كلام مهم جدا ومنطقي للغايه , بص حضرتك الكارثه الحقيقيه اللي واقعين فيها لا محاله , حضرتك سد النهضه الأثيوبي ( أو الإسرائيلي بمعنى أصح ) مشكلته في إيه تحديدا ؟ عارف انت مريض السكر ( ربنا يعافينا ) ؟ بيبقى عنده مشكلتين عكس بعض , يا إما السكر يزيد عليه ويجيبله غيبوبه وممكن يموت , او ياخد إنسولين من غير أكل والسكر ينقص جدا عليه ويجيب له غيبوبه وممكن يموت برضه !
ببساطه شديده , إنشاء سد النهضه بيعني إن مصر بقت مريض السكر وروحها في إيد الدكتور الإثيوبي ( الصهيوني ) , السد هيحجز المايه وهتنقص حصة مصر , هتقل الرقعه الزراعيه جدا وهيحصل جفاف جزئي ( بس دي المشكله الصغيره ), طيب البديل وقتها إيه ؟ إنك تضرب السد وتدمره ؟, دي سهله , لكن شوف حضرتك النتيجه ( غير الرد العسكري الإسرائيلي الأمريكي المتوقع ) , النتيجه هي بالمنطق كده غرق مصر والسودان , لأن السد في خلال سنتين تلاته هيكون حجز مليارات الأمتار المكعبه وراه , الكميه المهوله دي هتنزل كلها برابطة المعلم كده على السودان ومصر زي انهيار جبل الجليد وهتاخد في طريقها السد العالي ( اللي مش هيستوعب الضغط طبعا ) وهيتهد بسهوله , إسرائيل بقى سيادتك مش مضطره تضرب السد العالي في الفتره الجايه عشان تغرق مصر , يكفيها جدا إنها تضرب سد النهضه ( اللي عاملاه بإيديها ) , ويا سيدي من حكم في ماله فما ظلم ! , ويالتالي فحضرتك ( ك مصر يعني ) مضطر في حال إكتمال مشروع سد النهضه إنك تحميه بنفسك وبروحك ودمك كمان , دانت لو تطلب الأمر هتدخل حرب عشان تحميه , شوفت الكارثه فين ؟ دي اسرائيل كده لفانا حوالين صباعها زي سلسلة المفاتيح , إختار إنت بقى الموته اللي تريحك , تموت عطشان ولا تموت غريق ؟....... ماهو مفيش إختيار تالت يا تعطش يا تغرق ................يا تنتن يا تنتن !!.
.
الحل باختصار , هو سعي مصر ( مش الإخوان ) لوقف المشروع بكافة الطرق , أو ضربه في بداية إنشاؤه , وده مش هيحصل على إيد الإخوان ............ الحل باختصار هو التمرد واسقاط حكم المرشد , تمردو فهذه هي ( قبلة الحياه ) الأخيره مصر !!.

.

.

صباح الخير , النهارده الخميس واحنا لسه الصبح , ويوم الخميس ( في الفتره الصباحيه دي ) بيمثل لقاء السحاب الإسبوعي , اللقاء الثلاثي , لقاء العمالقه , الصيدلي المصري وعامل النضافه البنغالي والشارع , هما دول التلاته اللي صاحيين , كل واحد فيهم بيدعك عينيه ويبص للتاني بقرف ويقول له ( إنت اللي نزّلك النهارده ؟ ) أو بمعنى أصح ( أنا إيه اللي نزلني النهارده ؟! ) , مش بحاول أفكر كتير في السؤال عشان أنا عارف مين بيعمل إيه إزاي وفين , وربنا ميرضاش بالظلم , بس عايز أقول لكل النايمين ومأنتخين ومأجزين ... ( وكع في ركبكو كلكو ) , كلكم وليس جميعكم !!.

.

.إسمعو بقى افتكاسات الإخوان المسكفين , أه والله المسكفين !!

.
يقول الأستاذ الدكتور المهندس ( أ.د.م ) فلان الشربيني , أه والله , أ .د . م ( من أنصار الإخوان ) , بيقول إيه بقى ؟ بيقولك يا سيدي إن إنشاء سد النهضه هو فرصه للتخلص من سد عبد الناصر السوفيتي ( اللي هو السد العالي يعني ) وإحالته للتكاعد ( مش التقاعد ) , وليس أمامنا اختيار إلا تحلية مياه البحر !!.
هو انا ليه كل اللي بسمع عنه في الإخوان ولقبهم ( دكتور مهندس ) بحس إنهم بيرضعو من نفس الجاموسه ؟ , يعني تقصد معاليك إننا نسيب المايه العذبه ونعذّب ماية البحر قصدي نحليها ؟!
تصدق فكره حلوه برضه , إننا نحلي ماية البحر , بس يا مولانا احنا مش لاقيين ناكل سيادتك وبنستلف من طوب الأرض , تحلية ماية البحر اللي تعوضنا عن نقص ماية النيل دي محتاجه يجي 56734 مليار جنيه ! .
بس ميمنعشي إنها فكره حلوه , نحلّي ماية البحر وتستاهل عشانها إن المرشد يحلّي لك بؤك أو يحنّي لك ( بؤك برضه ) !!.

.

.

محمد حسين