منوع

حكمت المحكمه الدستوريه بإن الراجل اللي واقف هناك ده حرامي بس هو معذور وعنده أسباب منطقيه وجيهه للسرقه , وإن الراجل اللي واقف جنبه واكل فسيخ ورنجه وريحة بؤه وحشه أوي إنما لو غسل سنانه بالمعجون وأكل عودين بأدونس وكسبره هيبقى زي الفل ...رُفعت الجلسه ...محكمه !!.

.

خبر جميل ......... ومثير !
.
بيقولك يا سيدي , إيران على أبواب ثوره جنسيه !! , أه والله جنسيه , ويقول السائحون والعارفون والذاهبون والعائدون من مدينة طهران الإسلاميه المحافظه والمتدينه و ( المحجبه ) إن شوارع لندن تبدو محافظه ومتدينه الأن بالنسبه لشوارع طهران !! , يا سنه سوخه يا ولاد , يعني الطهرانيون هاجو خلاص , مش يمكن عشان الصيف والحر دخلو والشباب بيفك عن نفسه شويه , يعني أفصد هتلاقي بس إن الناس هناك حرّانه وطهقانه وطهرانه ! , أهي دي بقى الثوره الوحيده فعلا اللي المفروض السلفيين بتوع الفتاوي والعكاوي يبعتو بناتهم فيها عشان يجاهدو جهاد مناكحه , وبصراحه يعني وبدون مجامله , الثوارات العربيه والإسلاميه ( فشخت ) العالم ضخك !!.

.

.

و زي ما فهمت يعني وبحاول أفهم , إن مشروع النهضه الإخواني بيعني تعيين أي واحد بدقن إخوانجيه ( صغيره ومحدده بالفتله ) في أي منصب كبير حتى لو كان الشخص عجلاتي أو كهربائي سيلسيون , وحزب النور السلفي عنده مشروع مختلف تماما , بيعتمد على تعيين الدقن الأطول ( من غير فتله ) في أي منصب رفيع , فقيه دستوري بقى , وزير للبحث العلمي , عضو برلمان , سفير في الأمم المتحده , أيا ما يكون الشخص حتى لو كان مولانا طويل الدقن هو أساسا مقيم شعائر في زاوية الشيخ حسانين , ............فيه منصب رفيع شاغر ؟ إلطع لنا دقن هنا يابني !! , ويبدو من الكلام إن اللي بيفصل بين الإخوانجي والسلفنجي هو ( الفتله ) !.......... وليذهب هذا الخبير العالم المثقف قليل الدقن والحيله إلى الجحيم !!.

.صباح الخير , أجمل حاجه في الهوجه التركيه اللي حصلت دي هي موقف أردوغان اللي قال ( لن أرحل إلا بالصناديق ) , ولدينا أنصار إسلاميين ضعف الموجودين في الشارع ونستطيع حشدهم !! , والنبي مش ناقص غير إنه يقول ( القصاص...القصاص...القصاص يا جدع ) , أول مره أعرف إن تركيا صاحبة النموذج المبهر ( بالنسبالي ) هي كمان عندها مرشد خفي ورئيسها بيرضع من نفس الجاموسه الإخواني , واحد بقاله عشره عشرين سنه منقوع في برطمان الديموقراطيه وبيتكلم عن حشد أنصاره في الشارع هع هع هع , ملعون أبو اللي علمكو ديموقراطيه يا أردغ !!.

أما بالنسبه لمولانا بشار الجار الجنوبي لتركيا , اللي قتل له أد عشره خمستاشر قول 50 ألف واحد من شعبه قبل ما يجي السلفيين ومجاهدي النكاح والبترودولار يكملو على باقي الشعب , فمولانا بشار لقاها فرصه لرد القلم التركي وقال لأردغ ( أطالبك بالتنحي بعد تعاملك المفرط مع المتظاهرين ) !! , إنت شديد أوي مع الموظفين بتوعك يا سيد بيه , يا دين النبي يا جدعان , واحنا بقى سيادتك مطالبين للإختيار بين أردوغان اللي قتل عشره عشرين وبشار اللي قتل كام ألف , وفيها ناس بتقارن بين مرسي ومبارك وكل واحد فيهم قتل له بتاع خمسين قول ستميت واحد , والله إحنا لو بنتكلم عن فراخ وكتاكيت بندبحها كان يبقى عندنا دم أكتر من كده , هي دي بقى تجربة الربيع العربي الإسلامي أو بمعنى أصح التجربه الدنماركيه , وفيها إيه يا بوب ؟ واحد لما كان أبوه حيالله مدير عام بيضرب له عشره خمستاشر عيل , طيب لما أبوه يبقى وزير على الأقل يضرب له خمسين ستين , خلينا بقى قاعدين في العشه نعد الضحايا بتوعنا , كام جوز من هنا على كام جوز من هنا و احنا بنأدن ونكاكي ونبيض على بعض !!.

.

.

أجمل لحظات في عمر الإنسان المصري هي اللحظات والدقايق والساعات والأيام القليله اللي بتسبق مباشرة نطق كلمة ( بحبك ) , أه والله , النظرات بقى والتردد والإحاسيس ومحاولة انتهاز فرصه عشان تقول لها , و تلميحاتك لها و تلميحاتها هي لك , كلام من تحت لتحت ونظرات عين بتفضح صاحبها , لمسات بسيطه لأطراف الأصابع , عموما هما بيبقو كام يوم مش كتير يعني , إنما يا مولانا بعد ماتنطق الكلمه المبروكه ب 3 دقايق كأنك صبيت جركن مايه إثيوبي على العلاقه المشتعله , تلاقي البنت بتقول للولد : عندك شقه ؟ طيب هتيجي تقابل بابا إمتى ؟ مين مياده اللي كانت بتكلمك دلوأتي ؟ أوعى تكون عرفت بنات قبلي ؟ , وهو بيقول لها : على فكره مش ناويه تتحجبي بقى ؟ الجيبه اللي انتي لابساها ضيقه شويه , والبارفان بتاعك ريحته قويه , احذفي كل أصدقائك عالفيس ............. !!, كأن كل واحد فيهم بيكتشف وجود التاني فجأه , ومجهز في جيبه قايمه بالشروط والواجبات .

.............. ودي بتبقى نهاية فرقة سلامه حجازي المسرحيه !!.

.

.

وبما إننا يعني مش قادرين نحافظ على ماية نهر النيل , وبنلوثه ونرمي فيه المخلفات , والستات بيغسلو فيه الهدوم والمواعين , والعيال الصغيره أحفاد عبد السلام بتستحمة فيه , وبنصطاد منه سمك ورز وبصل أخضر , فمش من حقنا نلوم ستنا إثيوبيا إنها هتنشفه علينا ...هذا هو رأي الأستاذ الصحفي الجهبذ اللي مجابتوش ولاده العالم العلامه الفهيم الفهامه وائل قنديل !!.
جرت العاده عند العرب إنهم يوصفه أحلى حاجه بوصف على وزن( أفعل ) , يعني يقولو ( أغزل بيت قالته العرب ) , ( أهجى قصيده عند العرب ) , أشجع فارس عند العرب وهكذا , وبجد والله وائل قنديل وعلاء صادق يستحقو مناصفةً على مجمل الأعمال جائزه ( أعرص مقاله كتبها العرب ) !!.
طيب يا أستاذ وائل , إحنا والله مش بنحمّي هرم خوفو بالشاور جيل كل يوم ولا حاجه , إيه رأيك نديه هديه للشيخه موزه ؟ , وقناة السويس مش بنرشها ديتول ولا نشغل لها موسيقى سلو يتهيألي معندكشي مانع نديها لحمد جوز موزه ؟ , ماهو احنا مهملين بقى , بس على فكره مراتك بتشتكي من إهمالك لها , بقالك فتره مش بتفسحها ولا تقعد معاها في الليالي المفترجه , الواد ابن حمد وموزه كان بيدوّر على واحده مهمله كده , عندك مانع ؟!!.

.

..........محمد حسين 

.