منوع

يا لهوي يامه , البوست بتاع ( مرسي عايز يمص الصدمه ) كتبته وحذفته مرتين , كل التعليقات جايه + 78 , طيب أعمل ايه طيب ؟ الله يخرب بيتك يا مرسي بدل ما تنكس البيت نجسته !!.

.

.

طول عمر حكاية ماية النيل دي وهي الأمن القومي رقم واحد في مصر , وعشان كده كان التعامل معاها مخابراتي بالدرجه الأولى , المخبارات بتوصي بمشاريع معينه كغطاء لتحركاتها , الكلام ده كان أيام عبد الناصر , لكن بما أن مخابراتنا تلتينها مشغول في سينا بيدور على أصدقاء الرئيس وحلفاؤه , وكل ما يمسكو واحد فيهم يطلعوه تاني يوم بناء على أوامر عليا , والتلت الباقي شغال في مطبخ الأزهر , فمفيش مانع أبدا إن مناقشة مسألة ماية النيل اللي هي حياة مصر تتحول لقاعدة مصاطب , رجاله بتنكت وتهزر واللي يقول هنعاملهم بالحب , لا هنحارب , طيب ايه رأيكو في منتخب مصر ؟ طيب نبعت لهم ناديه الجندي وعادل إمام , وهكذا ...قمة الإسفاف اللي بيحصل ده , في جلسه علنيه مذاعه , النهارده زمان قادة اثيوبيا واسرائيل وقطر قاعدين بيتغدو في أديس أبابا ( لحم غزال ) ويتفرجو على المهزله المصريه مع صوت ضحكات تجلجل في بلاد المنبع , الله يرحمك يا ناصر !!.

خطة الجماعه المحظوره قبل 30 /06

.
إنتشار كثيف للبلطجيه والمتحرشين في شوارع القاهره .
.
حالة من الإنفلات الأمني عشان الناس تخاف ومش بعيد يفجرو خط الغاز في سينا ( والعودُ أحمدُ ).
.
الكهربا مش هتقطع في أخر إسبوع مع ترويج إن مشكلة الكهربا اتحلت للأبد وهنصدر كهربا لأمريكا .
.
المايه هتنزلك من الحنفيه في أخر يومين مايه معدنيه ولو عايز كاكولا مفيش مانع .
.
تقارير وأرقام مضروبه عن انخفاض معدل التضخم ونسبة البطاله ومش بعيد الجنيه يطلع قدام الدولار كام ساعه كده .
.
الترويج لوجود مندسين وعملاء وأجانب , خبر عاجل القبض على مواطن ألماني يوقع على ورقة تمرد !!
.
تقرير لمؤسسه ( سيكو سيكو الماليه الكوبيه ) بيقول إن مصر هتبقى أعظم دوله في العالم اقتصاديا بعد 6 أيام , إنشر بعنف وكنت أنت الإعلام أبو ديل .
.
أحلام المشايخ ورؤاهم هتكتر في أخر جمعه قبل 30 /6 ...شاهدت محمد مرسي يصلي إماما برسول الله وعيسى وجبريل عليه السلام , ....رأيت محمد مرسي في وسط المسجد الأقصى وهو لابس أخضر فأخضر ...إي وربي .
.
الترويج لأن أعداد حملة تجرد وصلت ل90 مليون , حتى الجنين في بطن أمه قال نعم لمرسي !!
.
............. يعني باختصار خطتهم هي خطه أي درويش بهلول عايز يبقى ديكتاتور !!.

.

.

.

صباح الخير , بنتي الكبيره ( 6 سنين ) كانت قاعده امبارح بتذاكر , عندها امتحان ( زايانس ) أه والله زايانس , وبعدين سابت مذاكرتها فجأه وقالت لي يا بابا ( هو ليه الحمار مش بيقول ماااااااااااء ؟) , قمت أنا سيبت ريموت التلفزيون وجريت عليها وحضنتها بسرعه وقلت لها ( لا يا بنتي هو بيقول مااااء أحيانا كتير , بس عشان خاطري ركزي إنتي في مذاكرتك يا حبيبتي ومالناش دعوه بالسياسه ) !!. 

............ وهي مصر دي جابها ورا غيرشي إن الحمير فيها بيقولو مااااااااااء أحيانا !!.

.

نقص في البنزين , نقص في السولار , نقص في الغاز , نقص في الكهريا , نقص في المايه ................ الإخوان يحكمون مصر تحت شعار ( فتيمّمو ) !!.

.

.شوف يا سيدي أخرة حكم البهاليل لأم الدنيا :

للبيع بالأسواق , جهاز ( القارئ على الماء ) , لقراءة القرأن على ماء الشرب , فوائد الجهاز يمنع النظره و عين الحسود ( اللي فيها عود ) , ومن فوائده أيضا تقوية العلاقة الزوجيه ( تقريبا كده وهو بيقرأ القرأن في المايه بيرش فيها خليط من الفياجرا وعين الكتكوت من غير ماحد ياخد باله ) , وبيقوى بقى عضلة السمنه والسيبس والفورسيبس ويقوي علاقة المؤمن بربه , ويجوزلك بنتك ويشفي عيالك ويهديلك جوزك .................. ونهضه قليله بتجيب بلاوي كتيره !!
أومال يعني انت كنت فاكر سيادتك لما يحكمك شوية بهاليل ومجاذيب الحسين هتلاقي إعلانات عن إيه ؟ عن الفيمتو سيكوند و البارا ويبونز ؟! , وديني كله هيبقى كده , وقريبا في الأسواق جهاز يرفعلك صباع السبابه وانت بتقرا التشهد , الجهاز يرفع الصباع 3 مرات متتاليه بين كل مره والتانيه 5 ثواني ومزود بعداد لعد ركعاتك اللي صليتيها , والمفاجأه هديه مع الجهاز حزام لتدليك العمود الفقري أثناء الصلاه !!.

.

.

محمد حسين 

عضو في الجماعه المحظوره اللي بتحكمنا بيقول ( مازلنا رقم واحد في الشارع ) !