منوع

صباح الخير , وقالك يا سيدي إثيوبيا كلفت مجموعه من المحامين بترجمة الحوار المصري المفتوح ( ولا مؤاخذه ) بتاع امبارح ( مش بعيد يكون منهم سليم العوا !! ) , وهتقدم مذكره للأمم المتحده تتهم مصر بالتحرض ضدها بالجيش والمخابرات وعادل إمام !!, طيب نعمل ايه احنا بقى ؟!
في العشر سنين اللي فاتو كانت اسرائيل بتنرفز حماس ( أو تتفق معاها الله أعلم ) تقوم حماسه ضاربه صاروخين ماركة ( بومب العيد ) , الصاروخين بتوع حماس يقعو في الصحرا كالعاده بس اسرائيل تصورهم فيديو وفوتو شوب بقى وتقولك دول وقعو في تل أبيب وأصابو مواطن اسرائيلي بمغص مفاجئ وإسهال , وتقوم اسرائيل تنشر الكلام ده للمجتمع الدولي مع تصوير مأسوية المشهد , وبعدها ترد وتدك قطاع غزه على راس الغلابه اللي فيه وتكمل بنى مستوطنات وتجرب أسلحتها وتمرن جنودها , واحد هيقولي طيب قادة حماس بيبقو فين ساعتها ؟ في إيران يا مولانا , في طهران والدوحه في قصورهم المشيده.
ما علينا , المهم يعني إن إثيوبيا بتحكمها اسرائيل من كام سنه , والإخوان ميختلفوش عن حماس أبدا ( بيرضعو من نفس الجاموسه ) , الحوار هيترجم ويتعرض على المجتمع الدولي وهنبان إحنا بقى السفاحين ( زي عبد السلام محمد في في فيلم الخُط لما كان بيقول لعادل إمام.... أنا السفاح !! ), وبالتالي المجتمع الدولي هيقبل أي رد ( على الأقل الإستمرار في بناء السد وتجويع وتركيع مصر والسودان ) .
عايز أقول باختصار ده حالنا مع حكم الإخوان , والمثل بيقول ( لا تنتخب الأهبل ........ولا تخلي الأهبل رئيسك ) !!.

.

.

وقالك بقى إن أهم إن( جاز ) عمله مرسي في فترة سنه هو إنشاء صوامع لتخزين القمح , والإخوان يهللو ويطبلو ويكبرو ويبررو ويبربرو , الله عليك , الله عليك يا حبيب والديك , هنعمل صوامع مش عملنا لأ لسه هنعمل , وبكده نبقى حققنا الإكتفاء الذاتي من القمح !! , سيادتك الصوامع دي يعني المخزن مش أكتر , يعني كيس البدله بس البدله مش موجوده إنما الكيس موجود , يعني علبة المجوهرات القطيفه الفاضيه ( أم شلن ) عشان مفهاش مجوهرات , إنما عندي فكره للريس مرسي بدل ما يجيب طوب وأسمنت ويبني ويوجع دماغه في موضوع الصوامع ده , عندي حل أفضل ومجاني , لما يتعمل سد النهضه يا ريس النيل هيبدأ يجف شويه بشويه لحد ما ينشف خالص ساعتها يا سيدي نستغل مساحة النيل الشاسعه دي ونخزن فيه القمح , دي تشيل لها يجي 2 جيجا أردب قمح , واحد هيقولي طيب هو النيل لما ينشف هيجي منين القمح أصلا ؟ .........................ممممممممممممم إبقى تعالى وانا أقولك !!.

.

.عارف انت , الدنيا دي فيها 3 مستحيلات , إن أبو اسماعيل يصدق وإن مرسي يفهم وإن إليسا تطلع عالهوا و هي مغطيه صدرها !!.

.

.قال أبو لهب ( نضربهم بالنابالم ) , فرد عليه أبو جهل ( لا , ليس هذا برأي , بل نضربهم بالمنجانيق والنبال والخرطوش) , هنا صاح حنظله قائلا ( نرسل لهم الغواني وأصحاب الرايات الحمر ونأخذ من كل رجل قبيله ) , فجأه دخل غلام حنظله إلى الخيمه وقال لسيده ( يا باشا يا باشا , الشعب الإثيوبي كله قاعد ورا الخيمه وسامعكو وشايفكو ) , فغلى الدم في عروق حنظله وقال ( هي الحرب إذاً , يا أيمن نور دق الطبول , يا عصام سلطان أخبر الجيش والمخابرات بالإستعداد ) هنا رد عليه عكرمه ( ولكن الجيش مشغول يا سيدي في مطبخ الأزهر ) , فرد حنظله ( كده قشطه أوي , شوفولنا بقي العيال بتوع تمرد والفيس بوك دول انشغلو شويه ولا لأ ) !!.

.

.طيب دلوأتي الجلسه كانت متذاعه على الهوا والإثيوبيين شافوها أكيد , ومرسي رئيس مصر قال ( إحنا هنمص الصدمه ) , طيب المواطن المصري لو قابل مواطن إثيوبي في ( أحراش ) أفريقيا , هيقدر المصري يرفع عنيه ولا هنتعامل بطريقة ( جدر البطاطا ) ؟!.

عموما خالد الصاوي في عمارة يعقوبيان كان معاه حق , مش هو لوحده اللي كده , دي تقريبا سياسة دوله !!..........................
تنبيه هام : محدش يعلق تعليق أبيح , دي رابع مره أكتب البوست أبوس إيديكو إيدي وجعتني !!.

.

.

محمد حسين